ན་ཟུག

དྲིན་ཆེན་མ་ལོའི་གདོང་གི་རྒས་གཉེར་ལོ་རེ་བཞིན་དུ་ཇེ་མང་དང་།།
མགོ་ཡི་ལན་བུ་ཐར་ཐོར་གསེབ་ན་གང་སར་ཁ་བ་བབས་པ་འདྲ།།
ཚར་དུ་དངར་བའི་དུང་སོའི་ཁྲོད་དུ་རེ་འགའ་ལྷུངས་བ་མཐོང་ཐེངས་རེར།།
ཐ་སྙད་གང་གིས་བརྗོད་ཐབས་བྲལ་ཞིང་ཚོར་བའི་ན་ཟུག་སྙིང་ལ་གཟན།།
བརྙན་གྱི་ལམ་ནས་མཐོང་ཐེངས་རེ་རེར་ཨ་མས་ཁ་གཡང་སྨོན་འདུན་ཁྲོད།།
མ་བུ་ལྷན་འཛོམས་སྐྱིད་པའི་ཉི་མ་ནམ་ཞིག་ཤར་ཞེས་སྨོན་པ་དེར།།
རེ་ཞིང་སྒུག་ནས་ལོ་མང་ཕྱིན་ཀྱང་ད་དུང་དེ་དང་དེ་བཞིན་ཏེ།།
ལས་དབང་གཅིག་པའི་རྒྱང་བཞུད་སྤུན་ཟླའི་ཚོར་བ་གཅིག་མཚུངས་ཡིན་ནམ་སྙམ།།

བཤད་མི་ཚར་བའི་གླེང་མོལ་ཁྲོད་དུ་མ་བུ་ངེད་གཉིས་སྐྱིད་སྣང་ཞིག །
སྐད་ཆ་བཤད་མཚམས་འཇོག་ལ་ཁད་དེར་ཨ་མས་ཁ་པར་འཆར་ངོས་སུ།།
བརྩེ་བའི་འོ་ཞིག་བྱེད་ཐེངས་རེ་རེར་འགོག་མེད་མིག་ཆུ་སེམས་སུ་བཞུར།།
ཨ་མའི་མིག་ལ་ང་ནི་སྔར་ལྟར་ད་དུང་བྱིས་པ་ཞིག་དང་མཚུངས།།

ལས་ཀྱི་ཤུགས་རླུང་བཙན་པོ་ཞིག་གིས་རྒྱང་དུ་དེད་པའི་འཁྱམ་པོ་ངས།།
དགའ་སྡུག་འདྲེས་མའི་དྲན་གདུང་རི་མོ་མ་གསང་སྨྱུ་གུའི་རྩེ་ནས་ལུད།།
སེམས་ཀྱིས་མྱོང་བའི་ཚོར་བ་གསོན་པོ་སྤྲང་འཁྱམས་ང་དང་ང་འདྲ་ལས།།
ཕལ་བ་གང་དང་སུ་ཡིས་མི་རྟོགས་འཇིག་རྟེན་འདི་ཡི་ཆོས་ཉིད་ལགས།།

གོ་ལའི་ཁྱོན་འདི་གསེར་གྱིས་བཀང་ཡང་ཨ་མ་ལས་ལྷག་རིན་ཆེན་གང་།།
མདོ་མེད་ང་འདྲ་འཁྱམས་པོ་ཞིག་གིས་འདི་ལྟར་བརྗོད་པ་མི་འཚམ་མོད།།
གསབ་ཏུ་མེད་པའི་དྲིན་ཅན་ཁྱེད་ཀྱི་བཀའ་དྲིན་ཚིག་གིས་མི་དཔོག་ལ།།
བསམ་གྱིན་བསམ་གྱིན་ཚིག་སྐམ་འགའ་རེ་དབང་མེད་འདི་ནས་ཤོར་ཏེ་ཐལ།།

མི་མཐོང་ཚིག་གི་དབལ་ཁ་རྣོ་ཡང་བཟོད་པའི་གོ་ཆ་ཐབས་ཀྱིས་གྱོན།།
ཚེ་སྲོག་དམར་པོ་འབེན་དུ་གཞག་ནས་མེས་པོའི་ཕ་གཞིས་དྲོན་མོ་འདི།།
རྔུལ་ཆུའི་ཐིགས་པ་རེ་རེའི་ཁྲོད་ནས་དགའ་བའི་འཛུམ་གྱིས་བསྐྱངས་མཁན་ཁྱེད།།
བརྒྱད་ཅུར་སོན་པའི་དྲིན་ཆེན་མ་ལོའི་སྐུ་ཚེ་བྲག་ལྟར་བརྟན་པར་ཤོག །

སྤྱི་ཟླ་དང་པོའི་ཚེས་༩ ཉིན་གྱི་ཞོགས་པར་ང་དང་ངའི་བརྩེ་བའི་ཨ་མ་ངེད་གཉིས་བརྙན་ལམ་བརྒྱུད་ནས་གླེང་མོལ་ཡུན་རིང་བྱས། ངའི་ཨ་མའི་གདོང་ལ་འཛུམ་གྱིས་གང་ཞིང་། ངེད་མ་བུ་གཉིས་གླེང་མོལ་ཁྲོད་སྐབས་རེར་ངའི་ཨ་མ་ནི་བྱིས་པ་ཆུང་ཆུང་ཞིག་དང་འདྲ་ལ་སྐད་ཆ་བཤད་ཞོར་བགད་ཞོར་ང་ལ་རྣམ་འགྱུར་འདྲ་མིན་བསྟན། ང་ཡང་ཨ་མའི་རྣམ་འགྱུར་ལ་ལྟད་མོར་བལྟས་ཏེ་ངའི་སེམས་སུ་ཨ་མའི་རྣམ་འགྱུར་ནི་གནམ་འོག་ཏུ་གང་གིས་ཀྱང་མཚོན་ཐབས་བྲལ་བའི་ཆེས་མཛེས་སྡུག་དང་ལྡན་ཞིང་ཇི་འདྲའི་ཡིད་དུ་འོང་བ་ཞིག་རེད་འང་སྙམ།  སྐབས་རེར་ཨ་མའི་མོ་རང་ལོ་ན་ཆུང་དུས་ཀྱི་ལོ་རྒྱུས་རྐྱང་རྐྱང་བཤད་དེ་ཧ་ཅང་དགའ་སྤྲོ་དང་ལྡན་པའི་རྣམ་འགྱུར་བསྟན། སྐབས་རེར་མོ་རང་ཆུང་དུས་ཀྱི་དཀའ་ངལ་འཕྲད་ལུགས་སོགས་བཤད་དེ།  རིག་གནས་གསར་བརྗེ་ཆེན་མོའི་སྐབས་སུ་ངའི་ཁྱིམ་ཚང་ནི་ཞྭ་མོ་ཅན་གྱི་ཁྱིམ་ཚང་གི་གྲལ་དུ་བཅུག༼སྐབས་འདིར་ཞྭ་མོ་ཅན་གྱི་ཁྱིམ་ཚང་ཞེས་པའི་དོན་ནི་ས་གནས་དེར་དབང་བའི་གོ་གནས་ཅན་གྱི་ཁྱིམ་ཚང་ཞིག་གི་མིང་ངམ་ཁྱིམ་ཚང་འབྱོར་ཕྱུག་ཅན་ཞིག་ལ་ས་བདག་དང་ཡང་ན་རྒྱ་སྐད་དུ་ 地主家༽ ཟེར།  ང་ཚོ་རྒྱལ་རོང་ཁྲོ་སྐྱབས་སྟོད་ཕྱོགས་པའི་ཁ་སྐད་དུ་ཁྱིམ་ཚང་དེའི་རིགས་ལ་གཏི་ལོ་ནོ་སྟེ་ཟེར།  དེའི་དོན་ནི་༼གཏི་ལོ་ནི་ཞྭ་མོ་དང་༽  ༼ནོ་སྟེ་ནི་སྐོན་པའི་དོན་ཡིན་ལ༽  དོན་དུ་ཞྭ་མོ་བཀབ་པའམ་ཞྭ་མོ་སྐོན་པའི་དོན་ཡིན་ནོ།།
ངའི་ནང་མི་རེ་འགའ་བཙོན་ཁང་དུ་ཁྲིད་དེ་ཕྱིན་ཆད་ཕྱིར་རང་ཡུལ་དུ་ལོག་ཐུབ་མེད་ལ། རེ་འགའ་སྐབས་དེར་གྲོང་གསེབ་གྱི་ལས་ཐོག་པ་འགའ་ཞིག་གིས་ཉིན་མཚན་མེད་པར་གཅར་རྡུང་བྱས་ཏེ་མཐར་ན་ཟུག་གིས་མ་བཟོད་པར་རང་སྲོག་བཅད་དེ་གྲོངས།  སྐབས་དེར་ངའི་ཨ་མ་རང་ལོ་དྲུག་ལས་མ་སོན།  ངའི་ཨ་མས་བཤད་ན་སྐབས་དེ་དུས་ངའི་ཁྱིམ་ཚང་ནི་ཁ་འཐོར་རྒུ་འཐོར་དུ་སོང་སྟེ་བཙོན་ཁང་དུ་ཁྲིད་པའི་མི་དེ་དག་གི་ཤི་བའི་རོ་དང་གསོན་པའི་མིང་ཙམ་ཡང་ད་བར་ཐོས་མ་མྱོང་ཟེར། དུས་དེ་ནས་བཟུང་ང་ཚོ་དང་ཁ་བྲལ་བའི་ནང་མི་དེ་དག་ནི་ནམ་མཁའི་འཇའ་ལྟར་ཡལ་ནས་གར་སོང་ཆ་མེད་དུ་གྱུར་ཏེ་འཇིགས་་སུ་རུང་བའི་མུན་ནག་གི་འཇིག་རྟེན་འདིའི་པང་ཁུག་ན་རིམ་གྱི་འཐིམ་སོང་ཟེར། གང་ལྟར་ང་ཚོ་དང་ཁ་ཐག་རིང་ཞིང་སེམས་ཐག་ཉེ་བའི་ཤི་གསོན་གང་ཡང་ཆ་མ་འཚལ་བའི་ནང་མི་དེ་དག་གི་སྣང་བརྙན་ནི་ང་ཚོའི་དྲན་པའི་མེ་ལོང་ངོགས་སུ་མག་མོག་ཏུ་གྱུར་ཞིང་།།
ད་བར་དེ་དག་ཤི་གསོན་གྱི་གནས་སྟངས་ཙམ་ཡང་རྗེས་འདེད་ས་མ་རྙེད་པར་གྱུར་ཏེ་འདས་སོང་གི་ལོ་དང་ཟླ་བའི་ཁྲོད་དུ་དུས་ཚོད་ནི་དེ་དང་དེ་བཞིན་ཉིན་དང་ཞག་གིས་ཟད།  རེད་ངའི་ཨ་མས་ངར་དེ་དག་གི་གནས་སྟངས་དེ་བཤད་དུས་ངོ་གདོང་གི་རྣམ་འགྱུར་ཡང་འགྱུར་ཏེ་ཧ་ཅང་གི་སྐྱོ་གདུང་གི་ཁེང་ཞིང་། ངས་ཀྱང་ཁྲ་ཆུང་མིག་གིས་ཨ་མའི་གདོང་ལ་ལྟ་ཞོར་སེམས་སུ་ངའི་ཨ་མའི་མི་ཚེའི་རྒྱུད་རིམ་ནི་དཀའ་སྡུག་དང་མནར་གཅོད་ཀྱི་ཁྲོད་དུ་ནར་སོན་པ་ཞིག་སྟེ་ཇི་འདྲའི་དཔའ་མོ་ཞིག་རེད་འང་བསམ་བྱུང་།  སྐབས་དེ་དུས་མོ་སྐྲག་ས་དང་འཇིགས་ས་ནི་མགོ་ནག་གི་མི་ཡིན་པ་ལས་གདོན་འདྲེ་མིན་ལ།  ལྷག་པར་དུ་མཚན་མོར་ཉལ་དུས་དང་གང་སར་འགྲོ་དུས་སུ་ཉེ་འཁོར་དུ་མིའི་སྐད་ཐོས་པ་ལས་གདོན་འདྲེ་ཡི་སྐད་རེ་ཐོས་ན་ཇི་མ་རུང་སྙམ་པའི་འདུ་ཤེས་སྐྱེ་མྱོང་ཡོད་ཟེར། རྒྱུ་མཚན་ནི་སྐབས་དེ་དུས་མི་ཡི་ཁོག་ཏུ་འདྲེ་ཞུགས་པའི་དུས་ཡིན་པས་མྱི་སྐད་གོ་ན་རང་བཞིན་གྱིས་ཞེད་སྣང་དང་འཇིགས་སྣང་གིས་མནར་དགོས་བྱུང་བ་རེད། ད་དུང་ངའི་ཨ་མ་ངེད་གཉིས་སྐད་ཆ་འདྲ་མི་འདྲ་བཤད་རྗེས་ཐ་མ་དེར་ཨ་མས་ང་ལ་སྐད་ཆ་འདི་འདྲ་ཞིག་བཤད་རྗེས་ངའི་སེམས་ཁམས་གཏན་ནས་སྐྱིད་པོ་བྱུང་མ་སོང་།  སྐད་ཆ་དེ་གང་རེད་ཟེར་ན་ཨ་མའི་མ་ཕྱོགས་སུ་གཏོགས་པའི་ཉེ་རིང་ལས་བྱེད་ཤིག་གིས་ཨ་མ་ལ་བརྔན་པ་ཞིག་སྤྲད་འདུག དེ་ནི་རྒྱུ་ཆ་བལ་ལས་བཟོས་པའི་ཧ་ཅང་གི་དྲོད་འཇམ་ལྡན་པའི་ཉལ་ཆས་ཤིག་རེད། ཨ་མས་ང་ལ་ཟེར་རྒྱུར། ང་ནི་ད་རྒན་ཁོག་ཡིན་པས་དེ་འདྲ་གྱོན་ནའང་ཚོར་བ་དམིགས་བསལ་བ་ཞིག་མེད་ཀི་དེ་བས་རྗེས་མར་ཁྱོད་རང་ཕ་ཡུལ་ལ་ཡོང་དུས་ཁྱོས་གྱོན་ན་བདེ་ཐང་དང་གང་ཐད་ནས་ཡག་པོ་འདུག་བསམ་བྱུང་བས་ངས་བལྟབས་བརྩེག་ཡག་པོ་བྱས་ནས་ཁང་པའི་ཐོག་ལ་ཉར་ཚགས་བྱས་ན་བཞག་ཡོད།  རྗེས་མར་ཁྱོ་ཡོང་དུས་ཨ་ཅེ་ལ་སྐད་ཆ་དྲིས་དང་ངས་གང་དུ་བཞག་ཡོད་ཨ་ཅེས་གསལ་བོ་ཧ་གོ་ནི་རེད་ཟེར།   ཨ་མས་བཤད་པའི་སྐད་ཆ་དེ་ཐོས་མ་ཐག་ཏུ་ངའི་སེམས་ཁམས་རྦད་དུ་སྐྱུར་མོ་སྐྱུར་མོ་ཞིག་དང་ཧ་ཅང་གི་སྐྱོ་སྣང་ཞིག་གིས་མནར། ཡིན་ནའང་ཨ་མར་ངས་ལན་འདི་ལྟར་བཏབ། ཨ་མ་ཁྱེད་རང་གི་གྱོན་དང་ང་ལས་ཁྱེད་ལ་གལ་ཆེ་ནི་རེད་ང་རང་རྗེས་མར་ཡོང་དུས་དེ་འདྲ་ཉོ་ཆོག་ནི་རེད་བ་ལབ་ཡིན། འོན་ཀྱང་ཨ་མས་ངར་མ་རེད་མ་རེད་ཉལ་ཆས་དེ་གཞན་པ་དང་འདྲ་ནི་མ་རེད། ཁྱོད་རང་གིས་གྱོན་ན་མོ་ལ་སེམས་པ་སྐྱིད་པོ་འདུག་ཟེར།   ངའི་ཨ་མ་ལ་མཚོན་ན་ཉལ་ཆས་དེ་ཧ་ཅང་གི་རིན་ཐང་ཅན་ཞིག་དང་རྩ་ཆེན་ཞིག་ཡིན་པའི་སྣང་བ་འདུག་པས་ངས་ཀྱང་ཨ་མའི་འདོད་མོས་ལྟར་དང་ལེན་བྱས་ཏེ།
ཡ་ཡ་བཀའ་དྲིན་ཆེ་འ་ཨ་མ་ཁྱེད་ཀྱིས་ང་ལ་གནང་བའི་ཉལ་ཆས་དེ་ངས་ངེས་པར་དུ་གྱོན་རྒྱུ་ཡིན། ཨ་མས་ང་ལ་གནང་བའི་དངོས་པོ་གང་ཡིན་ན་ང་ལ་མཚོན་ན་འཇིག་རྟེན་གྱི་ཁམས་འདིར་ཆེས་རིན་ཐང་ཆེ་བའི་ནོར་བུ་དང་འདྲ་བས་བཀའ་དྲིན་ཆེ་འ་ཨ་མ་ཞེས་ལན་བཏབ། ཨ་མ་ཡང་དགའ་བའི་འཛུམ་དང་ལྷན་དུ་མོས་བགད་མོ་དགོད་ཞོར་དང་རྩེད་མོ་ཞིག་གི་ཚུལ་དུ་དེ་ད་ཡིན་ནི་རེད་འོ་ཟེར།

ཧྥ་རན་སིའི་ལྷོ་ཕྱོགས་སུ་ Montpellier གྲོང་ཁྱེར་གྱི་ཉེ་འདབས་རྒྱ་མཚོ་ཆེན་མོའི་འགྲམ་དུ་ཁང་ཆུང་གྲུ་བཞི་ཞིག་གི་ནང་དུ་ཕར་མྱི་སྐད་བཤད་ཀྱང་ཚུར་ཡ་ལན་མེད་པའི་གྲོགས་པོ་སྡེར་མའི་མིང་ཅན་འགའ་དང་ལྷན་དུ་འཚོ་ས་ཞིག་ནས་ཨ་མའི་གྱ་སྟོན་དང་འབྲེལ་ཏེ་སྤྲང་འཁྱམས་པ་རྒྱལ་རོང་བ་བསྐལ་བཟང་གཡུང་དྲུང་དུ་འབོད་པ་དེས་སྤྱི་ཟླ་ཚེས་ཉིན།
༡༦/༠༢/༢༠༢༦/