རྒྱ་སྟོན་བུ་དར།
ཡངས་པའི་ཡིད་ཀྱི་རྒྱ་མཚོའི་གཏིང་རིམ་ནས།།
དྲན་པའི་རླབས་ལས་འཕྱུར་བའི་ངག་རྗེན་པ།།
ཚེར་མའི་མེ་ཏོག་ནང་བཞིན་ཁོག་ཏུ་ཚེར།།
བུང་བའི་དབྱངས་ཀྱི་ངག་འདི་སྐྱུར་བའི་སྨན། །
སྟོང་ལོ་ཉེར་དྲུག་ཉེར་གཅིག་དུས་རབས་ཀྱི། །
བཞི་ཆ་གཅིག་འདས་ལས་ངན་བོད་ཀྱི་ལས། །
མྱ་ངན་ཐང་སྟེང་རེ་བྲལ་རེ་དྲུག་ལོ། །
འདས་པ་མ་ཚོར་ནང་ཚགས་སྔོ་ལོ་འཕྱར། །
ཝ་སྐྱེས་ཝ་ལ་སྡང་བའི་མཚུངས་འདྲེན་གྱི། །
རང་རིགས་རང་ལ་སྡང་བའི་སྡུག་གྱོང་ཅན། །
ངོས་ལྐོག་ལྕེ་གཉིས་ལྷ་མི་རྫུན་འབྲེལ་གྱི། །
ཕྲག་དོག་གཡོ་ཇུས་ཟླ་མེད་བོད་སྐྱེས་མྱི། །
རྙིང་ཞེན་བྲག་ལས་མཁྲེགས་པའི་རྗེས་ལུས་བས།།
དད་པ་ལོག་པས་འདོད་ཚད་སྒྲུབ་ལ་བརྩོན།།
ཕན་བདེ་བརླག་པའི་ཆོས་སྲིད་གར་མཁན་པས།།
མིག་ལོང་མང་ཚོགས་ཁྲམ་དང་གཏམ་གྱིས་བསླུས།།
སྔོན་ཆད་བོད་ཀྱི་གདོན་གཟུགས་ཕ་མེས་བོན། །
དེང་འདིར་གདོན་གཟུགས་ཁམས་རིགས་ཕྱོགས་སུ་ཟུག །
ཕྱི་རབས་རང་དབང་རྩོད་སའི་ཁ་རྗེ་དཔལ། །
རྒུད་ཅིང་ངོ་བོ་འཇིག་པའི་འགག་འཕྲང་ལུས། །
གནའ་དེང་ཉེ་རབས་སྐྱོ་གར་གཅིག་འཕྲོར་གཅིག །
བཙན་འཛུལ་དགྲ་ཐབས་མ་རྟོགས་རང་ས་བོར།།
བཙན་འཐབ་མ་འཁྱོལ་བཙན་འོག་ཡོངས་སུ་ཚུད།།
མཉམ་རུབ་ལྕག་གི་ཐག་པ་གནའ་ནས་ཆད།།
ཕ་གཞིས་རིགས་རྒྱུད་གཅིག་ཀྱང་གཅིག་ངར་གཉིས།།
ཕ་མཐའི་ཡུལ་གྱར་སྤྲང་འཛིངས་གཅིག་མཇུག་གཉིས།།
གཉིས་སུ་གྱེས་པའི་གླེང་གཞི་ཉིས་འགྱུར་ལྷག །
གཉིས་དང་གཅིག་ཤོས་ནང་འཁོན་གཅོང་ནད་མཐུ། །
ཚོ་རེའི་རྒྱལ་གཅེས་འཐབ་རྩོད་ལ་ལས་བལྟས།།
གཞན་ལུགས་ལྟ་གྲུབ་མི་འཐད་འགའ་རེས་དགག།
དེ་ལྟར་ཟང་ཟིང་ཆོས་བཅས་ཟུང་གཉིས་ལུགས།།
འབྱུང་བ་འཁྲུག་པའི་རླུང་འཚུབ་ངང་ཚུལ་བཞིན།།
སྤྱིར་ན་ཆོས་སྲིད་ལྟ་གྲུབ་སྣོག་པའི་ཁར། །
གྲོང་དང་ཁྱིམ་མཚེས་གྲོགས་དང་ཤ་ཉེ་སྤུན།།
སྐྱིད་སྡུག་རུ་སྡེར་འགྲན་སེམས་སྦྱོར་བ་རྩུབ། །
འབྱུང་རྩ་ཆོས་ལྡན་བོད་པའི་ཁོག་ཏུ་ངེས། །
ལྟ་ལོག་ཤེས་འཇོན་འབྱོར་ཞན་རྟོག་སད་རློམ།།
མཁས་ཕྱུག་བཙུན་པ་ཚུན་གྱི་གྲགས་ཆེན་ལ།།
བརྣབ་སེམས་མེ་ལྕེས་སྐུར་བ་སྡིག་སྲིན་གཤིས།།
བསྙོན་འདེང་འབུར་འཇོམ་མ་རབས་ཐབས་ལ་གོམས།།
དཔྲལ་བའི་མིག་གིས་མ་རིག་འགྲན་ཟླ་གཞན། །
འགྲམ་ངོས་རྣ་ཡིས་མ་ཐོས་རྒྱལ་ཁམས་གནས། །
རྣམ་དཔྱོད་ཤེས་པས་དོ་ཡ་མ་བརྙེད་དེ། །
ཉེ་འགྲིས་འཁོར་ལ་གླེན་ཤེད་སུ་ཆེ་བསྡུར། །
ཆུ་ཕྲན་རྒྱ་མཚོའི་འབབ་ལྷིང་ཁྱད་གཞི་ཡི། །
ཁྱད་ཆོས་མངོན་པར་གསལ་བའི་ཅོལ་ཆུང་འགས། །
ཚོགས་སྡེ་སྤྱི་དམངས་འགོ་ལ་འཚང་བྱས་ཏེ། །
གོ་ཐོབ་མིང་གྲགས་ཡོང་ཕྱིར་ཀུ་ཅོ་འདོན། །
རིན་ཆེན་གསེར་དངུལ་ཟངས་དང་རྡོ་ཆས་ཀྱི། །
རྒྱན་ཆས་མགོ་ལུས་བཏུམ་པའི་རྒན་དར་གཞོན། །
འདུ་འཛི་སྣང་བ་ཁྲ་ཁྲས་བློ་སེམས་འཁྲུལ།།
སྲང་མདོའི་བྲོ་ར་ཁྲ་མོའི་བསྟན་པ་གསོ། །
ཕྱོགས་མཐའི་གཞིས་ཆགས་ཁ་ཐོར་སྒེར་གཙོ་བ། །
ཤར་ནུབ་འཁྱམས་པའི་བྱབ་ཆུང་དྲ་རྙོག་གཟན། །
ཡུལ་གྱར་དྲ་འཛིངས་སྣེ་ཁྲིད་ཧུར་པོ་འགས།།
རྟག་ཏུ་ཐད་གཏོང་རིམ་པས་རྨོངས་རྒན་ཁྲིད། །
ལས་འབྲས་མཆུ་རྩེར་ལག་ཏུ་ཕྲེང་བ་ཅན།།
ཁེངས་དྲེགས་ཟོག་པོའི་ཚོ་བའི་དོན་དངོས་ཆ།།
ཉོམ་ཆུང་བརྙས་བཅོས་གཏོང་ཡུལ་འབུ་སྲིན་ཆུང་། །
སྟོབས་ལྡན་ངོ་བསྟོད་ས་ནི་གླང་ཆེན་འདྲ། །
སྤྱི་སེམས་ཁབ་རྩེ་སྒེར་སེམས་མདུང་རྩེ་ཅན།།
གསེར་དང་རག་གན་འཛོལ་བའི་རྣམ་དཔྱོད་དེས།།
རྟ་བོང་འདེམས་ཀ་འཛོལ་ཏེ་བོང་བུ་ཉོས། །
ཕུགས་ལམ་སྔ་འདང་མ་ཤེས་ཆོ་ལོ་རྩེས།།
ནང་ཁ་མ་དགེས་དགྲ་མགོ་མཐོ་རུ་གཏེགས།།
སྒང་པ་བོད་ཀྱི་རྒྱལ་ཁའི་གཏིང་ཚུགས་སློག །
ཡར་ལངས་ཁ་བའི་བླ་སྲོག་གཅེས་སྲུང་སླད།།
རང་རྒྱུད་དག་སེལ་ཐབས་ཀྱིས་ལོངས་དང་ཆོག །
ནང་འགལ་རྐྱེན་བཟློག་དགྲ་མགོ་གནོན་པའི་ཆ།།
བློ་གཅིག་སྒྲིམས་དང་སྟོབས་ཤིག་སྐྱེ་ངེས་ཀྱང་།།
དུས་འདིར་འགངས་ཆེའི་དམ་ཚིག་མ་མཐུན་ན།།
ཚོ་གསུམ་རང་གི་རོགས་རྣམས་ཨེ་མཐུན་ཨང་།།
རང་བཞིན་ཇི་མའི་སྐྱོན་ཚང་བརྟོལ་གྱུར་ན།།
བོད་སྐྱེས་མི་ལ་དཔའ་མཛངས་རྒྱན་ཚིག་ཙམ།།
བྱམས་སེམས་དགེ་སྡིག་ཁ་ཚིག་སྟོང་ཙམ་ན།།
སྐྱེ་བ་གན་དུ་གཏོགས་པར་སྤོབས་ཉམས་ཅི། །
ཨ་ཐང་ཆད་དེ་རྒྱང་གི་མཐའ་ནས་བལྟས། །
ཨམ་གཙིགས་ཁོག་ཏུ་སྦས་པར་མ་ནུས་ཐལ། །
རང་གཏམ་རིང་མོ་ཐ་སྙད་རྐང་དགུའི་དབྱངས།།
འཛེམ་བག་མེད་ལ་མི་སྙན་ངག་ཏུ་བཏབ།།