མཐའ་མའམ་རྩོམ་ཡིག་རྫོགས་རྗེས་སུ། མཆན། གོང་བཀོད་རྩོམ་ཡིག་དེ་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་ལྟ་བ་ཡིན་པས་མ་ཁྱབ། ཅེས་དང་།
མཆན་མཚན་ནང་། ཚེ་རིང་དངོས་འགྲུབ་ཅན་གྱིས་སྲིད་སྐྱོང་སྤེན་པ་ཚེ་རིང་ལགས་ནས་སླར་ལོ་ལྔ་མུ་མཐུད་ཀྱི་རྒྱལ་ཁ་ཐོབ་ལེགས་པའི་བསམ་ཚུལ་ཞུས་པ་དེ་དུས་བབ་ནང་སྤེལ་གནང་འདུག་ཀྱང་། ངོས་ཀྱི་འཚམ་ཤིང་འོས་པའི་རྒྱུ་མཚན་བཅུ་གླེང་པ་དེ་ཕྱོགས་ཞེན་ལས་བརྒྱན་པ་ལས་དངོས་དང་མི་མཚུངས་པའི་ལན་འདེབས་གཤམ་དུ་ཞུས་ཡོད་པ་དེ་དུས་བབ་ནང་སྤེལ་མ་སོང་། དེ་སྔ་ཡང་སྤེན་ཚེ་ལགས་སྐོར་གསལ་བཤད་ཅིག་ཞུས་ཡིན་པའང་སྤེལ་མེད་སྟབས་ད་རེས་ལྟར་ཁ་བརྡའི་ནང་སྤེལ་ཡིན། གསར་ལམ་ཞིག་ཡིན་པའི་ཆ་ནས་ཡང་ན་ཚང་མ་དང་དེ་མིན་གཅིག་མཚུངས་ཀྱིས་ཚང་མ་སྤེལ་རྒྱུ་མེད། ལྷག་དོན་འོས་བསྡུ་དང་འབྲེལ་བའི་གལ་ཆེའི་གནད་དེ་སྤྱི་པའི་གནད་དོན་ཡིན་པའི་གཅིག་མཚུངས་ཞུ་དགོས་གལ་ཀྱང་དུས་བབ་སྤེན་པ་ཚེ་རིང་ལགས་སུ་ཞེན་པའི་གསར་ཤོག་ཅིག་ཡིན་མིན་འདུག་གམ། དུས་བབ་ནང་ཐོན་པའི་རྩོམ་དང་དེར་མོས་གུས་ཀྱི་མཆན་གཉིས་པོ་དེ་ཡང་ཕལ་ཆེར་དུས་བབ་རང་ནས་མཆེད་མངགས་བྲིས་ནས་སྤེལ་མིན་ནམ་སྙམ་པའི་དོག་གནས་ཞིག་ཀྱང་མིན་འདུག་གམ། ཚང་མའི་དཔྱད་ནས་དགོངས་ཚུལ་ཞིག་གནང་དང་། བོད་གཞུང་བརྒྱུད་ནས་བོད་ཡིག་གསར་སྤེལ་ཆེད་རོགས་རམ་ཡོད་ན་སྒྲིག་བཅོས་དགོས་པའམ་དེ་མིན་རོགས་རམ་གནང་ན་ཕན་ལས་གནོད་ཆེ་བ་ངས་བསམ་ཚུལ་ཡིན།། ད་འཚམ་ཤིང་འོས་པའི་རྒྱུ་མཚན་བཅུ་གླེང་པའི་ལན་འདེབས་ལ།
༈ ཨ་མའི་བུ་ཆུང་ལགས་ནས་ཁོང་གི་བསམ་ཚུལ་རྣམས་ཕྱོགས་ཞེན་མེད་པའི་རྒྱུ་མཚན་མང་པོ་གནང་འདུག་ཀྱང་དངོས་སུ་སྲིད་སྐྱོང་སྤེན་ཚེ་ལགས་སུ་ཕྱོགས་པའམ་ཞེན་པ་ལས་དྲང་པོའི་བསམ་ཚུལ་ཞིག་མི་འདུག་ཞུས་ན་འགྲིག་ཆེ། དང་ཐོག་ཏུ་བསམ་ཚུལ་མངོན་བརྗོད་ནང་མཁས་དབང་དང་མི་རྗེས་བརྒྱན་པར་གཟིགས་དང་། སྤེན་ཚེ་ལགས་ལ་མཁས་དབང་གི་ཆ་རྐྱེན་གང་འདུག མཁས་པའི་ཆ་འཛིན་ཐུབ་པའི་ཕྱག་འཁྱེར་གང་འདུག མཁས་པའི་རྩོམ་ཡིག་གང་འདུག མཁས་པའི་གསུང་འཕྲིན་གང་འདུག ངས་མཇལ་མ་སོང་། མི་རྗེ་སུའི་མི་རྗེ་རེད། དམངས་གཙོའི་དུས་སུ་མི་རྗེ་ཞིག་སུས་ཕུལ་རེད། ད་དུས་ཀྱི་སྲིད་སྐྱོང་རང་སླར་འདེམས་དགོས་པའི་ཆེ་བའི་ཡོན་ཏན་བཅུ་ལ་ངས་ལན་འདེབས་སུ།
དང་པོ། ཁྲིམས་ལུགས་ལ་གུས་བརྩི་ཆེ་ཞིང་དུས་རྟག་ཏུ་ཁྲིམས་ཀྱིས་དབང་བསྒྱུར་སྲོག་ཏུ་གཟུང་སྟེ་དྲང་པོ་དྲང་གཞག་དང་བདེན་པ་བདེན་ཐུབ་ཀྱི་སྒོ་ནས་གནད་དོན་ཐག་གཅོད་གནང་བཞིན་པའི་འགོ་ཁྲིད་ཅིག་ཡིན་པར་ཀུན་ཀྱིས་མཁྱེན་ཅེས། རྒྱན་ཙམ་རེད། ད་བར་མཛད་གཙོ་ཚང་མ་ལ་དེ་ལྟར་རྒྱན་པ་ལས་དམིགས་གསལ་མིན་འདུག གལ་གནད་ཆེ་བའི་གནད་དོན་ལ་ཐག་གཅོད་གནང་རྒྱུའི་དུས་གཅིག་དང་འགོ་འཁྲིད་ཀྱི་བྱ་ལམ་ཞིག་དཀོན་པས་ལོ་གཉིས་གསུམ་ནང་གྲོས་ཚོགས་མཉམ་རུབ་ཀྱི་དུས་ཤིག་དཀོན་མི་སོང་ངམ། ད་དུང་ལོ་ལྔ་མུ་འཐུད་ན་རྒྱལ་ཁབ་བམ་འཐབ་རྩོད་ཀྱི་ལམ་ཕྱོགས་སུ་མི་ཉམས་གོང་འཕེལ་ཞིག་དགོས་པ་ཐོབ་བསམ།
གཉིས་པ། ལོ་མང་ཉམས་མྱོང་ཡོད་པ་བདེན། ང་རང་ཚོར་མི་ཆ་དཀོན་པའི་གནས་འདིར་གང་ཡོད་བེད་སྤྱོད་ཐུབ་ན་དགེ་གནས་ཀྱང་ཡར་རྒྱས་ཀྱི་ནུས་སྟོབས་སམ་ནུས་སྤེལ་དཀོན་ན་སྔར་སོང་ད་གནས་མ་རེད་དམ། དྲན་ཡུལ་དུ་ཡོད་དགོས་པ་ཞིག་ལ་སྲིད་ཟུར་བློ་སེང་ལགས་སུ་རང་གཞུང་སྐྱོང་བའི་ཉམས་མྱོང་མེད་པའི་བློ་ཚབ་ཡོད་ནའང་ལས་དོན་གསར་སྤེལ་དང་མུ་འཐུད་གང་ལེགས་གནང་སོང་བསམ་ནས་ཐེངས་གཉིས་པའི་སྐབས་འོས་འཕེན་ཡིན། རྒྱས་བཤད་ཞུ་རྒྱུ་ཡོད་མང་པོ་མི་ཞུ། དེར་སོང་ཉམས་མྱོང་མཉམ་གསར་གཏོད་དགོས་པ་མེད་ན་ད་མུས་ཀྱི་གཞུང་འཛིན་པ་ལྟར་གྱུར་ན་ཡོང་རྒྱུའི་མི་ལོ་ལྔ་དེ་མི་ཕང་ངམ། ང་ནི་འགྲོ་བཞིན་པའི་ལོ་ལྔ་དེ་ཡང་ཕང་གི་འདུག་ཀྱང་ཚུར་ཤོག་ལབ་ཡུལ་མིན་འདུག ད་དུང་ལོ་ལྔ་དེ་ལྟར་འགྲོ་ངེས་ལ་སོང་བོད་མིའི་རྩ་དོན་ལ་མི་ཉམས་གོང་འཕེལ་ཤིག་ཡོང་ཨེ་གདའ། དེ་ན་དགོངས་པ་གཟབ་གཟབ་གནང་རོགས།
གསུམ་པ་དབུ་མའི་ལམ་ནི་བོད་མི་དམངས་ཀྱིས་མངོན་འདོད་དེ་ཡིན་དུས་དེར་རྒྱབ་སྐྱོར་ཞུ་མ་ཤེས་ན་སྲིད་སྐྱོང་ཐོབ་རེ་མེད། དེ་ཤེས་ནས་བྱ་ལམ་དགོས་རྒྱུ་ཡང་རྒྱ་དམར་ནས་ད་བར་བློ་ངེད་ཐུབ་པའི་བྱ་བཞག་ཞིག་བསྟན་མེད། རང་བཙན་རྩོད་ན་དབུ་ལམ་དུ་ཕྱོགས་པའི་ལམ་རོགས་ཡག་ཤོས་དང་རྒྱའི་ད་ལྟའི་སྲིད་བྱུས་དང་མཐུན་ཤོས་སུ་ངས་བསམ་བཞིན་ཡོད། སྲིད་སྐྱོང་སྤེན་ཚེ་ལགས་ནས་ཀྱང་རང་བཙན་སྐོར་ཕྲན་ཙམ་ཕྲན་ཙམ་གསུང་གི་འདུག
བཞི་པ། ཁྱེད་ལ་ཕྱོགས་ཞེན་མེད་གསུང་ནའང་དོན་དུ་ཞེན་གྱི་བསླུས་པའི་གཏམ་ནི་སྲིད་སྐྱོང་མི་གཅིག་གིས་ལས་འགན་མང་པོ་ཞུ་དགོས་ཆག་པའམ། གཞན་བཀའ་བློན་ལས་རོགས་སུ་ཡིད་ཆེ་མེད་པའི་འཛོན་ནུས་མེད་པ་ཧ་གོ་བཞིན་དུ་སོ་སོས་ལས་འགན་མང་པོ་ལེན་དགོས་བཟོས་པ་ཡག་ངོར་མཐོང་གནས་ནས་ཤེས་ཐུབ། བཀའ་མོལ་འདི་འཛམ་གླིང་འགྲོ་སྟངས་དང་མི་མཐུན། སྤེན་ཚེ་ལགས་སྔོན་གྱི་རང་གཞུང་གི་མཛད་གཙོ་ཡོངས་དང་ཕྱོགས་འགལ། མཐའ་དོན་ཁྱེད་ཀྱི་དགོང་པ་དེ་སོ་སོའོ་གཞུང་གི་ཁྲིམ་ཡིག་ལའང་ཆེ་མཐོང་གོ་ཤེས་མེད་པ་མིན་ནམ།
ལྔ་པ་ནས་བརྒྱད་པ་བར་གནས་དོན་ཁག་ལ་རེ་རེ་བྱས་ལན་རྒྱབ་རྒྱུའི་གནད་མི་མཐོང། དབུ་ལམ་གྱི་ལྷ་སྲས། དུས་ཚོད་རིང་པོར་ལས་ཁུང་དུ་བཞུགས་གནས། མི་དམངས་ལ་བསྟུན་མཁས་སོགས་ཁོང་གི་དམིགས་བསལ་གང་མ་རེད། ད་བར་དེ་འདྲ་གནང་ཡོད་རེད། སྤྱི་ཚོགས་ནང་སྲིད་སྐྱོང་གིས་བཀའ་སློབ་གོ་སྐབས་མང་པོ་ཞུ་མྱོང་ཀྱང་མི་གཞན་བོད་ཀྱི་རྒྱལ་རབས་མི་ཤེས་མཁན་དུ་རྩིས་ནས་དྲི་ཞིབ་གནང་མཁན་སྤེན་ཚེ་ལགས་ལས་གཞན་མཐོང་མ་མྱོང་ངོ་།
དགུ་པ། ཨ་རིའི་རོགས་དངུལ་སྔར་བཞིན་སླར་གསོ་ཐུབ་མེད་ནས་ཕྲན་བུ་རག་པའི་སྐོར་སྲིད་སྐྱོང་སྤེན་ཚེ་ལགས་ཁོང་རང་ཞལ་ནས་གསུངས་པ་མི་མང་བས་ཧ་གོ་ཡང་ཁྱེད་ནས་ཕ་ལས་བུ་རྫིག་པའི་གསུང་ཕེབས་པ་གང་གིས། ཨ་རིར་བོད་དོན་ཞུ་གཏུག་ལས་འགུལ་དེ་གཙོ་པོ་འཛམ་གླིང་བོད་དོན་ཞུ་གཏུག་ལས་ཁང་( ICT ) དང་མཉམ་ཨ་རི་སྐུ་ཚབ་དོན་གཅོད་ལས་ཁུང་། ལྷག་དོན་ཨ་རིའི་མངའ་སྡེ་གང་ནང་ཡོད་པའི་བོད་རིག་སྤྱི་མཐུན་ཚོགས་པའམ་བོད་མི་སྒེར་མང་པོ་ཞིག་མཉམ་འདུས་ཀྱི་མངའ་སྡེ་སོ་སོའི་གྲོས་ཚོགས་གོང་འོག་འཐུས་མི་དང་། ས་གནས་གྲོས་ཚོགས་ཀྱི་ཚོགས་འཐུས་རྣམས་ངོ་མཇལ་གྱིས་བོད་དོན་ཞུ་གཏུག་ཞུས་པར་དགའ་བསུ་ཡིད་སྨོན་མེད་པར་སྤྱི་ཡོངས་འགྲུབ་འབྲས་དེ་སྲིད་སྐྱོང་གིས་བྱས་རྗེས་སུ་གང་གིས་བཞག ཁྱེད་ཀྱི་མ་ཤེས་པ་ལས་ ༢༠༢༥ བོད་དོན་ཞུ་གཏུག་ཏུ་བོད་ཀྱི་རྩ་དོན་དང་ཡན་ལག་དཀའ་སྡུག་དཔེ་ན། བོད་མིར་ཨ་རིའི་རོགས་དངུལ་མུ་འཐུད་གནང་གལ་ཐོག་ཏུའང་རེ་འདུན་ཞུས་ཡོད། དེར་སོང་གཟེངས་བསྟོད་ཞུ་དགོས་ན་ཞུ་གཏུག་པ་ཚོར་ཞུས་ན་མི་ལེགས་སམ་རན་མི་ཆེའམ། སྒེར་སོ་སོའི་དུས་དང་དངུལ་གཏང་། གྲོས་ཚོགས་འཐུས་མི་རྣམས་ཉིན་གཉིས་ནང་མཇལ་ཐུབ་ཐབས་སུ་ཟས་ཀྱང་ལྷོད་ཟ་མེད་མཉམ་གོམ་ཆེན་རྒྱབ་ནས་མ་རྙོབ་སར་རྒྱུག་དགོས་ཀྱང་རྒྱུག་ཡོང་། འདི་ལོ་རྒྱུས་ཞུས་པ་ལས་ངོ་གསོ་གང་ནས་ཡིན་དགོས། རང་དོན་རང་གཅེས་ཡིན། བུ་བསྟན་འཛིན་ཚེ་རིང་ལགས་ཁྱེད་གནས་ཡུལ་ཕརན་སི་ལ་ཞུ་གཏུག་འདི་འདྲ་ཡོད་རེད་དམ། ཡོད་ན་ངེས་པར་དུ་ཕེབས་དགོས་གལ་དེ་མི་རྒན་ངས་རེ་འདུན་ཡིན། དམའ་མཐར་ཡང་། མང་པོའི་གྲངས་ཀྱི་དཔུང་གཉེན་དེ། དེ་འདི་རུ་གཡང་ལ་བྱོན། ཅེས་པའི་དོན་དེ་རེད། གཞི་ནས་ཞུ་གཏུག་འདི་དམའ་མཐར་ཡང་སྲིད་ཟུར་བློ་སེང་སྐབས་སམ་དེའི་གོང་ནས་འགྲོ་བཞིན་ཡོད་ཙང་ད་ཡོད་སྲིད་སྐྱོང་ལ་ལེགས་གསོལ་ཞུ་དགོས་མེད་པའི་ཞེན་རྒྱན་རེད། ལྷག་དོན་ཨ་རིས་བོད་གཞུང་དང་མི་དམངས་ལ་དམིགས་བསལ་དགོངས་བཞེས་གནང་དགོས་དོན་དེ་༧ གོང་ས་མཆོག་ལ་གུས་བཀུར་དུ་ཞུས་པ་ལས་དེ་མིན་ང་ཚོས་འཇོན་རྒྱས་པའི་ཕལ་ཆེར་མིན་ནོ།།
བཅུ་བ་མང་གཙོའི་གཟེངས་རྟགས་ཕུལ་ཡོད་ན་དེ་བོད་མིའི་ཐབས་རྩོད་དང་བོད་མིར་དམིགས་ནས་ཕུལ་ཡོད་དགོས་པ་གོ་དགོས་པ་ལས་གཞན་འཛམ་གླིང་ནང་མི་སྲིད་སྐྱོང་སྤེན་ཚེ་ལགས་ལས་འཇོན་ཆེར་ཆེ་བ་མང་པོ་ཡོད་དགོས། གོ་སྐབས་ཤིག་ཐོབ་རེད། དེ་མིན་སོ་སོའོ་འདོད་ཞེན་ལས་རྒྱན་འདྲ་མིན་དང་སོ་སོ་མི་འདོད་པའི་ཕྱོགས་ལ་དེ་སྔ་ཕུལ་པའི་རྒྱན་འགའ་ཡང་ལེབ་ཤུས་སུ་ཕུལ་འདུག་པའི་དག་དེར་ཞུས་ནས་ཆི་ཕན།
མཐར་དོན་ངས་ཞུ་རྩོད་དགོས་དོན་གཙོ་བོ་དེ་ནང་བཀྲ་ཤིས་་ན་ཕྱི་དོན་འགྲུབ་ཅེས་དགོས་གནད་ཀྱང་སྲིད་སྐྱོང་སྤེན་པ་ཚེ་རིང་ལགས་སུ་ནང་འཁུལ་མཐུན་ལམ་དེ་རག་རེ་དཀའ་བའི་གནད་ལས་ཁོང་གི་ལོ་ལྔའི་དུས་ཚོད་ནང་ད་བར་བྱུང་མ་མྱོང་བའི་གྲོས་ཚོགས་མཚམས་འཇོག་ཞུ་བའམ་མུ་མཐུད་སྐྱོང་མ་ཐུབ་པའི་དཀའ་གནད་ཐེངས་མང་བྱུང་ཡོད། དེ་ཡང་གྲོས་ཚོགས་ནང་ཆོལ་གསུམ་ཆོས་ལུགས་མཉམ་རུབ་ཞུ་མ་ཐུབ་པའི་གནད་ལས་བྱུང་། དེའི་རྐྱེན་ལས་རྒྱལ་སྤྱིའི་ཁོར་ཡུག་ནང་བོད་ཀྱི་རྩ་དོན་ལ་ཞན་ཆའི་གྲིབ་གཡོ་ཕོག ནང་ཁུལ་མི་དགོས་མི་སྙན་པའི་ལབ་གླེང་ལས་དམ་ཚིག་རྡོག་རྩ་གཅིག་བསྒྲིལ་དུ་གནོད། སྲིད་སྐྱོང་གི་གོ་མཐོང་དང་སྒེར་སོ་སོའི་དཔའ་ཡང་ཞུམ་ནས་ལས་དོན་དུ་ཞུ་བཤེད་ལའང་དམན་ཆའི་གནད་དུ་གྱུར་བའམ་གྱུར་རྒྱུ་སོགས་ལས་སྤྱི་དོན་དུ་བར་ཆད་ཀྱིས་གོམ་པ་མདུན་བསྐྱོད་དཀོན་པའི་སྔར་བྱས་མི་ཉམ་དུ་འབད་དགོས་གནད་ལས་དུས་ཀྱི་དཔལ་ཡོན་དང་། ༧གོང་ས་མཆོག་གིས་མཛད་འཕྲིན་རྒྱས་པའི་བྱིན་མཐུ་དག མཛད་གཙོ་གོང་མ་རྣམས་ཀྱིས་མི་ཉམ་སླད་གང་གཟབ་གང་འཇོན་ཞུས་འབྲས་ཀྱང་རྒྱུན་མཐུད་དཀའ་གནས་སུ་གྱར་གནས་སོགས་ལས་བོད་སྤྱི་བའི་རྩ་དོན་ལ་འཕྱར་གྲུ་མཉམ་འདེགས་ཀྱི་གོ་སྐབས་ཤོར་བ་མི་གཟིགས་སམ། མི་མངོན་ནམ། མི་འཚོར་རམ། ཆོལ་གསུམ་གོང་བུ་གཅིག་སྒྲིལ་དེ་སྤེན་པ་ཚེ་རིང་ལགས་སྐབས་ཁག་པོ་ཡིན་བརྡ་ཁོང་སྲིད་སྐྱོང་དུ་བཞེངས་དུས་ཞུས་ཡིན་པ་ཕལ་ཆེར་ནོར་མེད་འདྲ། མངོན་ཤེས་མེད་ཀྱང་ལོ་གང་མཚམས་རིང་གིས་ཉམས་མྱོང་ལས་ཞུས་ཡིན། ད་དུང་ཡོན་ཏན་རང་དུ་གཟིགས་ན་སོ་སོའི་ཐུགས་འདོད་རེད། སྒེར་ཞེན་རེད། ང་ནི་བྱུང་ན་ད་རེས་སུ་དབུས་གཙང་པར་རྡོག་རྩ་གཅིག་སྒྲིལ་གྱི་ནུས་པ་ཆེ་པའི་འོས་ཅན་ཞིག་ཡོད་ན་དེ་འདེམས། བུད་མེད་འོས་མི་ཞིག་ཡོད་ན་༧གང་ཉིད་ཀྱི་ཐུགས་རེ་རྒྱས་ཕྱིར་འབུལ་ཐབས་ཞུ། ད་གནས་སུ་བུད་མེད་ཅིག་འོས་མིར་ཕལ་ཆེར་མིནའདུག འོས་མ་ཐོབ་ན་ཅི་ཤོར། ཤོར་རང་ཤོར་ན་༧གོང་ས་མཆོག་གི་ཐུགས་རེ་འགྲུབ་ཐབས་སུ་མ་བརྩོན་པའི་འབད་པ་དེ་ཤོར་རེད། དེ་མིན་འོས་མིན་གཞན་འདུག་ལགས་སོ།། །།