གཞུང་པ་ཚེ་དབང་བསོད་ནམས།
རྒྱ་ནག་གི་བརྟན་ལྷིང་དེ་མི་རིགས་ལྔ་བཅུ་ལྔ་བདུན་གྱི་འཚོ་གནས་གཅིག་པོ་མིན་པ་སྐད་ཡིག་དང་རིག་གཞུང་སོགས་དང་འབྲེལ་བ་གཏིང་ཟབ་ཡོད་པ་ནས་སྤྱི་ལོ་ ༡༩༥༩ ལོར་བོད་རྒྱ་མིའི་བཙན་འོག་ཏུ་ཚུད་ནས་བོད་མི་རིགས་ཀྱིས་མི་རབས་མང་པོའི་གཅེས་ནོར་བོད་ཀྱི་ནང་བསྟན་ཆོས་ལུགས་ཀྱི་དགོན་པ་གྲ་ཚང་དྲུག་སྟོང་ལྷག་ཙམ་རྩ་མེད་བཟོས་པ་དང་ཞི་བའི་ཞིང་འབྲོག་མི་མང་ས་ཡ་གཉིས་ལྷག་ཙམ་གྱིས་ཚེ་སྲོག་ཤོར་བ་དང་། བོད་མིའི་འཚོ་བའི་གནས་སྟངས་དེ་སྔའི་འཛམ་གླིང་གི་བྲན་གཡོག་འཚོ་བའི་དུས་རབས་ལས་ཀྱང་ཡིད་སྐྱོ་བའི་གནས་སྟངས་ཆགས་ནས་བོད་མི་ཚོ་སོ་སོའི་ལུང་པའི་ནང་དབུལ་ཕོངས་ཁྱུ་གཅིག་བཟོས་ནས་བོད་ཀྱི་ཞིང་འབྲོག་ས་ཁུལ་མང་པོར་བོད་མི་མང་པོ་ལྟོག་ཤི་ཐེབས་པ་དང་། ཆུ་ལ་མཆོང་པ་དང་། རང་ཤི་རྒྱབ་པ་སོགས་དམྱལ་བ་མི་ཡུལ་དུ་དངོས་སུ་མྱོང་བཞིན་པའི་གནས་སྟངས་འོག་ལོ་རབས་བདུན་བཅུའི་ནང་རྒྱ་ནག་གི་འགོ་ཁྲིད་ཏིང་ཞ་འོ་ཕིང་གི་རྒྱ་ནག་གིས་དཔལ་འབྱོར་སྲིད་བྱུས། ༼ Economic Policy ༽ དེ་ཁྲོམས་རའི་དཔལ་འབྱོར། ༼ Market Economic ༽ ལ་ཁ་ཕྱོགས་ནས་རྒྱ་ནག་གཞུང་མང་གི་དཔལ་འབྱོར་འཕེལ་རྒྱས་དེ་འཛམ་གླིང་ཤར་ནུབ་ཀྱི་ལུང་པ་མང་པོ་ལས་སྔོན་དུ་སླེབས་ནས་རང་རེ་བོད་ནང་ལ་ཡང་མང་ཚོགས་ཀྱི་འཚོ་བའི་གནས་སྟངས་དེ་སྔོན་རིག་གནས་གསར་བརྗེའི་སྐབས་དང་བསྡུར་ན་དེང་སྐབས་གནམ་ས་ལྟབུའི་ཁྱད་པར་ཆེན་པོ་ཕྱིན་ཡོད་ན་ཡང་མི་གི་མི་ཚེའི་མཐར་ཐུག་གི་བདེ་སྐྱིད་དེ་འཚོ་གོས་གཅིག་པོ་མིན་པ་མི་རིགས་དེ་འཚོ་གནས་ཐུབ་པའི་རང་གི་ཕ་མེས་ནས་བརྒྱུད་པའི་རིག་གཞུང་བཟང་པོ་དེའི་འོག་ཏུ་མི་རིགས་འཚོ་དགོས་པ་ལས་ལྟོ་གོས་གནས་མལ་གྱི་འཚོ་བ་གཅིག་པོས་མི་རིགས་ཞིག་དུས་ནམ་ཡང་འཚོ་གནས་མི་ཐུབ་པ་ནས་བོད་ནང་བོད་མི་ཚོ་སོ་སོའི་ཕ་མེས་ནས་བརྒྱུད་པའི་མི་རིགས་རང་ཉིད་ཀྱི་སྐད་ཡིག་དང་རིག་གཞུང་ལ་བདག་པོ་རྒྱག་རྒྱུའི་གོ་སྐབས་མེད་པ་དང་། བོད་ཕྲུག་ཚོར་རྒྱ་ཡིག་ལས་བོད་ཡིག་སྦྱོང་སའི་འཁོར་ཡུག་ཉུང་བ་དང་། བོད་ཕྲུག་མང་པོ་རྒྱ་ནག་གི་གཏན་འཇགས་སློབ་གྲ་ནང་བཅུག་ནས་བོད་མིའི་ངོ་བོ་རྩ་རླག་ཏུ་གཏོང་རྒྱུའི་འཆར་གཞི་ངན་པ་འདིའི་ནམ་ཞིག་བོད་ཡུལ་རྒྱ་ཡུལ་དུ་རྒྱུར་རྒྱུ་དང་། བོད་ཕྲུག་རྒྱ་ཕྲུག་ལ་རྒྱུར་ནས་བོད་ཟེར་བའི་ནང་བསྟན་ཆོས་ལུགས་ཀྱི་ལུང་པ་དེ་ཆོས་མེད་ཀླ་ཀློ་གུང་ཁྲན་དམར་པོ་དམར་ཀྱང་ལ་རྒྱུར་རྒྱུ་ཡིན་པ་ད་ལྟ་ནས་ཟུར་ལྟས་ལེབས་མཐོང་ལ་སོང་ད་ལམ་རྒྱ་ནག་གི་སྲིད་འཛིན་ལྷ་སར་འབྱོར་སྐབས་བོད་མི་ཚོའི་དགའ་བསུའི་རྣམ་འགྱུར་སྟོན་སྟངས་ནས་བོད་ནང་རང་དབང་ག་ཚོད་ཡོད་དེ་ནས་རྟོགས་ཐུབ་པ་དང་། བོད་ནང་ཕྱིའི་འཛུགས་བསྐྲུན་ཡར་རྒྱས་ཕྱིན་ཡོད་ན་ཡང་བོད་མི་ཚོར་བསམ་སྤྱོད་རང་དབང་མེད་པ། འགྲོ་འདུག་ལ་རང་དབང་མེད་པ། སྨྲ་བརྗོད་ལ་རང་དབང་མེད་པ། འཁོར་ཡུག་སྲུང་སྐྱོབས་ལ་རང་དབང་མེད་པ་སོགས་ལ་བརྟེན་ནས་བོད་མི་ཚོས་སེམས་ནང་རྨ་ཁ་ཆེན་པོ་བཟོས་ཡོད་པ་ནས་སྔ་ཕྱི་མ་གཏོགས་རྒྱ་ནག་ལ་ངོ་རྒོལ་སྒེར་ལངས་བྱས་ཡོང་བསམ་པའི་དོགས་པ་དང་རྣམ་རྟོག་ལ་འགན་འཁུར་ནས་ད་ལམ་རྒྱ་དཔོན་ཞི་ལྷ་སར་ཡོང་རྒྱུ་དེ་ཡང་གཅིག་དེ་ཡིན་སྲིད་པ་དང་། གཉིས་ནས་བོད་རང་སྐྱོང་ལྗོངས་བཙུགས་ནས་ལོ་དྲུག་ཅུ་འཁོར་བའི་མཛད་སྒོའི་སྐུ་མགྲོན་དུ་ཡོང་བ་ཞིག་ཀྱང་ཡིན་ཆོག དོན་དངོས་བོད་ནང་གི་བོད་མི་ཚོའི་འཚོ་བའི་གནས་སྟངས་ལ་རྒྱུས་ལོན་མ་ཡིན་པ་བོད་ནང་གཞི་རིམ་མི་མང་གི་ཆབ་སྲིད་བདེ་འཇགས་ལ་རྒྱུས་ལོན་ཆེད་དུ་ཡིན་པ་ནི་སྲིད་འཛིན་ཞི་གི་ལྷ་སར་གཏམ་བཤད་མ་བྱས་པ་ནས་ཤེས་ཐུབ་པ་དང་། གཏམ་བཤད་བྱེད་མཁན་རྒྱ་ནག་གི་མཐོ་རིམ་འགོ་ཁྲིདགཉིས་ཀྱི་གཏམ་བཤད་བྱས་པའི་ནང་དོན་ནས་ང་ཚོའི་ཤེས་ཐུབ་པ་དེ་རྒྱ་ནག་གུང་ཁྲན་དམར་པོའི་བོད་དབང་བསྒྱུར་བྱས་ནས་མི་ལོ་དྲུག་ཅུ་ལྷག་ཕྱིན་ཡོད་ན་ཡང་ད་དུང་བོད་མིའི་བསམ་བློ་ལ་དབང་བསྒྱུར་བྱེད་ཐུབ་མེད་པ་གསལ་སྟོན་བྱས་པ་ནི་ཁ་བྲལ་ཟེར་བའི་ཐ་སྙད་དེ་ཡང་ནས་ཡང་དུ་སླེང་ཡོང་བ་ནས་ཤེས་ཐུབ་པ་དང་། རྒྱ་ནག་ནང་མི་རིགས་ལྔ་བཅུ་ང་བདུན་ཡོད་པ་དེ་དག་གིས་འཚོ་བ་ཡར་རྒྱས་གཏོང་ཐུབ་ན་མི་རིགས་དེ་ཚོ་འདོད་པ་ཁེངས་ནས་ཞི་བདེ་ལྷིངས་འཇགས་དུ་གནས་ཐུབ་པར་ངོས་འཛིན་བྱས་པ་དེ་དག་ད་ཆ་རྩིས་ནོར་ཐེབས་ནས་ད་ལྟའི་ཆ་ལ་གྲངས་ཉུང་མི་རིགས་བོད་དང་ཤིང་ཅང་སོགས་ནས་འཛམ་གླིང་གི་ལུང་པ་མང་པོའི་ནང་རྒྱ་ནག་ལ་ངོ་རྒོལ་རྣམ་འགྱུར་སྟོན་མཁན་གྱིས་གྲངས་ཚད་དེ་ལོ་རེ་ནས་ལོ་རེ་བཞིན་མང་དུ་འགྲོ་བཞིན་པ་དང་། རྒྱ་ནག་གི་མི་མང་ཁྲོད་ནང་ཆོས་ལ་དད་གུས་དང་སློབ་གཉེར་བྱེད་མཁན་དེ་ལོ་རེ་ནས་ལོ་རེ་བཞིན་གྲངས་ཚད་མང་དུ་འགྲོ་བཞིན་པ་ནས་རྒྱ་ནག་གི་བརྟན་ལྷིང་དེ་མི་རིགས་ལྔ་བཅུ་ང་བདུན་གྱིས་འཚོ་གོས་གཅིག་པོ་མིན་པ་མི་རིགས་སོ་སོའི་ཕ་མེས་ནས་བརྒྱུད་པའི་མི་རིགས་དེའི་སྐད་ཡིག་དང་རིག་གཞུང་སོགས་ལ་ཐུག་ཡོད་པ་ནས་རྒྱ་ནག་གི་འགོ་ཁྲིད་ཚོའི་མི་རིགས་སོ་སོའི་ཕ་མེས་ནས་བརྒྱུད་པའི་སྐད་ཡིག་དང་རིག་གཞུང་དེ་མི་རིགས་སོ་སོར་འགན་བཀུར་ནས་ཡར་རྒྱས་དང་སྲུང་སྐྱོབས་བརྒྱུད་འཛིན་ཐུབ་པའི་ཆེད་རྒྱ་ནག་གི་རྩ་ཁྲིམས་ནང་གསལ་བའི་མི་རིགས་ས་གནས་རང་སྐྱོང་གི་གནས་བབས་ཚད་ལྡན་ཞིག་སྤྲོད་མ་ཐུབ་ཚེ་རྒྱ་ནག་ནང་དུས་ནམ་ཡང་ཞི་བདེ་དང་བརྟན་ལྷིང་མི་ཡོང་བ་ངས་ཚིག་ཐག་བཅད་ནས་བཤད་ཐུབ།