མགར་རྡོར།
སངས་རྒྱས་སྒྲོལ་མས། མི་ལོ་ཉིས་སྟོང་ལྔ་བརྒྱའི་ཡར་སྔོན་ཞིག་ལ། སངས་རྒྱས་གོའུ་ཏ་མ།
ས་འདི་ནས་འཁྲུངས་པ་རེད་ཟེར། ལོས་ཡིན། སྐྱབས་སུ་མཆི།
སངས་རྒྱས་གོའུ་ཏ་མ་འཁྲུངས་སྟངས་དེ། ཁྱོད་སྐྱེ་སྟངས་དང་མི་འདྲ་ཟེར།
དེ་ཡང་ལོས་བདེན། ཁོང་སངས་རྒྱས་རེད་མོད། སྐྱབས་སུ་མཆི།
སངས་རྒྱས་གོའུ་ཏ་མ་མོ་མཚན་ནས་སྐྱེས་པ་མ་རེད། མཆན་ཁུང་ནས་འཁྲུངས་པ་རེད་ཟེར།
དང་པོ་ང་རྦད་དེ་མགོ་འཐོམ་སོང་། ཡང་ཅུང་ཙམ་རྗེས་ལ།
ཅིག་བྱས་ན་མི་ལོ་ཉིས་སྟོང་ལྔ་བརྒྱའི་སྔོན་ལ། མི་ཆེན་སྐྱེས་ཆེན་དེ་ཚོ་མཆན་ཁུང་ནས་འཁྲུངས་གི་ཡོད་ན་ཐང་བསམ་སོང་།
མཆན་ཁུང་ན་མི་ཞིག་སྐྱེ་སའི་ཁུང་བུ་ཞིག་ད་སྔ་མཐོང་མྱོང་མེད་པས། ཡང་ང་རྦད་དེ་མགོ་འཐོམ་སོང་།
འོན་ཀྱང་མཆན་ཁུང་གཉིས་སུའང་མོ་མཚན་དང་འདྲ་བར། སྤུ་རིང་པོ་ནག་སོབ་སོབ་ཏུ་སྐྱེས་ཡོད་པ་མཐོང་མྱོང་ཡོད་པས།
ཅིག་བྱས་ན་ངས་མ་མཐོང་བ་མ་གཏོགས་སྤུ་གསེབ་ཏུ་ཁུང་བུ་ཆུང་ཆུང་རེ་ཡོད་ན་ཐང་བསམ་ནས།
སྤུ་ཚོགས་ཀྱིས་ཁེངས་པའི་སངས་རྒྱས་སྒྲོལ་མའི་མཆན་ཁུང་གཉིས་ལ་ཡང་ཡང་བལྟ་དགོས་ཐུག་སོང་།
སངས་རྒྱས་སྒྲོལ་མའི་མཆན་ཁུང་གཉིས་ན་མི་ཞིག་སྐྱེས་སའི་ཁུང་བུ་ཞིག་ཤིག་བཙལ་བཙལ་བྱས་ཀྱང་རྙེད་མ་སོང་།
འོན་ཀྱང་ད་རུང་སྣང་བ་འཁྲུལ་བར་སྲིད་པས་མྱོང་བ་མངོན་སུམ་ལ་ཡིད་མ་ཆེས་པར།
ཚུལ་གསུམ་རྟགས་ཡང་དག་གིས་ཤ་གཙབ་གཙབ་ཅིག་བྱས་ནའང་། མཇུག་འབྲས་གཅིག་པ་རེད།
ཡང་བསམ་བློ་གཞན་ཞིག་བཏང་ན། ཅིག་བྱས་ན་སངས་རྒྱས་གོའུ་ཏ་མ་འཁྲུངས་དུས་འགྲམ་གྱི་མི་དེ་ཚོས།
མོ་མཚན་དང་མཆན་ཁུང་ནོར་བ་ཡིན་ན་ཐང་བསམ་སོང་མོད།
འོན་ཀྱང་སངས་རྒྱས་སྒྲོལ་མས་དེ་ནི་གཏན་ནས་ནོར་མི་སྲིད་པ་ཞིག་རེད་ཅེས་རྦད་དེ་ཁས་བླངས་མ་སོང་།
སངས་རྒྱས་སྒྲོལ་མས། གང་ཚེ་རྐང་གཉིས་གཙོ་བོ་ཁྱོད་བལྟམས་ཚེ།། ས་ཆེན་འདི་ལ་གོམ་པ་བདུན་བོར་ནས།། ཞེས་སྔོན་ལ་བཏོན་སོང་།
ང་ནི་འཇིག་རྟེན་འདི་ན་མཆོག་ཅེས་གསུང་།། དེ་ཚེ་མཁས་པ་ཁྱེད་ལ་ཕྱག་འཚལ་ལོ།། ཞེས་ངེད་གཉིས་མཉམ་དུ་བཏོན་ཡིན།
སངས་རྒྱས་གོའུ་ཏ་མ་མ་གཏོགས་སྐྱེས་མ་ཐག་ཡར་ལངས་ནས་འགྲོ་ཐུབ་མཁན་ཞིག་ཡོད་རྒྱུ་མ་རེད་ཟེར།
ད་རུང་ང་ལ་ཁྱོད་ལོ་གཅིག་འགོར་ནའང་ད་རུང་ཡར་ལངས་མི་ཐུབ་ནི་ཅན་པོ་ཡིན་ན་ཐང་ཟེར།
སངས་རྒྱས་སྒྲོལ་མས། ང་ལ་ཁྱོད་དང་སངས་རྒྱས་གོའུ་ཏ་མ་གཉིས་འདྲ་གི་མ་རེད་ཅེས་ཡང་ཡང་བསྙད་བསྐོས་སོང་བས།
ང་ཡང་འདུག་མ་བཟོད་པར། འདྲ་གི་རེད། ཕལ་ཆེར་ཕལ་ཆེར་འདྲ་གི་རེད། འོན་ཀྱང་ཚང་མ་འདྲ་གི་མ་རེད།
སངས་རྒྱས་གོའུ་ཏ་མ་སྐྱེས་མ་ཐག་ཡར་ལངས་པ་རེད། ང་སྐྱེས་ནས་ལོ་གཅིག་འགོར་རྗེས་ཡར་ལངས་པ་རེད།
ངེད་གཉིས་ལ་ལོ་གཅིག་གིས་ཁྱད་པར་མ་གཏོགས་མེད་གི།
སངས་རྒྱས་གོའུ་ཏ་མ་སྐྱེས་མ་ཐག་ཡར་ལངས་པ་བདེན་མོད། འོན་ཀྱང་ཡར་ལངས་ནས་གོམ་པ་བདུན་མ་གཏོགས་བོར་ཐུབ་མེད།
ང་ནི་སྐྱེས་མ་ཐག་ཡར་ལངས་མ་ཐུབ་པ་བདེན་མོད། འོན་ཀྱང་ལོ་གཅིག་གི་རྗེས་ཡར་ལངས་ནས་གོམ་པ་བདུན་ལས་མང་བ་བོར་ཐུབ་ཡོད།
དེ་བས་སངས་རྒྱས་གོའུ་ཏ་མ་དང་ངེད་གཉིས་གཅིག་པ་མིན་ཡང་འདྲ་བོ་འདྲ་བོ་རེད།
ད་རུང་སངས་རྒྱས་གོའུ་ཏ་མས་ས་ཆེན་ལ་གོམ་པ་བདུན་བོར་དུས་ཞབས་རྗེས་ནས་མེ་ཏོག་བདུན་ཆེད་དུ་སྐྱེས་པ་རེད་ཟེར།
འོན་ཀྱང་སངས་རྒྱས་གོའུ་ཏ་མ་ཆེན་པོ་ཆགས་དུས། དོན་དེ་དྲན་གི་ཡོད་མེད་གང་ཤེས།
ངས་ནི་ས་ཆེན་ལ་གོམ་པ་མང་པོ་བོར་དུས། ཆེད་དུ་སྐྱེས་པ་ཡིན་མིན་གང་ཤེས་ཏེ། མེ་ཏོག་བདུན་ལས་མང་བ།
སྣ་བརྒྱའི་མེ་ཏོག་རྣམ་པར་བཞད་ཡོད་པ་གསལ་བོར་དྲན་གི།
ལིམ་བིའི་ཚལ་ནས་ཤཱཀྱའི་གྲོང་ཁྱེར་ལ་ཐག་མི་རིང་བ་ཤེས་མོད། ས་ཆ་གང་ཡིན་ཏག་ཏག་ཅིག་སུས་ཀྱང་མི་ཤེས།
གལ་སྲིད་ཏག་ཏག་ཅིག་ཤེས་ན། གནའ་བོའི་གྲོང་ཁྱེར་དེ་ལ་འཆམ་འཆམ་ཞིག་བྱེད་ན་འདོད་སོང་།
ལྷག་ཏུ་བདུད་ལྷས་བྱིན་དང་སངས་རྒྱས་གོའུ་ཏ་མ་གཉིས་མཉམ་དུ་ཡང་ཡང་སོང་མྱོང་བའི་ས་ཆ།
སྐྱེ་རྒ་ན་འཆིའི་སྡུག་བསྔལ་གཏན་ནས་མཐོང་ཡ་མེད་པའི་གནས་ཆེན།
འཇིག་རྟེན་དགའ་བའི་དཔལ་ལ་རོལ་སའི་གནས་མཆོག་མེ་ཏོག་གླིང་ལའང་མཇལ་འདོད་ཆེན་པོ་ཞིག་སྐྱེས་སོང་།
སངས་རྒྱས་སྒྲོལ་མས། ངེད་གཉིས་ཤཱཀྱའི་གྲོང་ལ་མི་འགྲོ་ཟེར། གྲོང་ཁྱེར་གྱི་ཕྱོགས་བཞིའི་སྒོ་བཞི་ལ་ལྷག་ཏུ་མི་འགྲོ་ཟེར།
རྒྱུ་མཚན། མི་ལོ་ཉིས་སྟོང་ལྔ་བརྒྱའི་སྔ་གཞུག་ལ་ཁྱད་པར་མེད་པར།
སྐྱེ་རྒ་ན་འཆིའི་སྡུག་བསྔལ་ཁུར་བའི་མི་ནི་ད་རུང་སྔར་ལས་མང་མིན་ན་ཉུང་མ་རེད་ཟེར།
ཁྱོད་ལ་འཁོར་བའི་སྡུ་བསྔལ་མཐོང་ནས་ནེ་ར་ཇྱ་ནར་འབྲོ་འདོད་རེ་སྐྱེས་བཞག་ན། ཅིག་བྱས་ན་བུད་འགྲོ་ཐང་མོད།
འོན་ཀྱང་ང་ནི་འཇིག་ཟིན་པའི་མཁར་ཤུལ་རྙིང་ཀོག་འདི་བསྲུངས་ནས་ཁེར་འདུག་བྱེད་མི་འདོད་ཁོ་ཁག་ཡིན་ཟེར་རོ།།
2024.12.11 ཉིན་ལིམ་བིའི་ཚལ་དུ་སྦྱར་རོ།།