གཞུང་པ་ཚེ་དབང་བསོད་ནམས།
ཐེ་ཝན་ནི་རྒྱ་ནག་སྐམ་ས་དང་རྙོགས་གཞི་ཅན་གྱི་མཚོ་གླིང་གི་རྒྱལ་ཁབ་ཆུང་ཆུང་ཞིག་ཡིན་པ་དང་། ཨ་རྒྱ་གཉིས་མི་མཐུན་པའི་ཕྱོགས་མང་པོ་ཡོད་པ་ནས་གཅིག་ཐེ་ཝན་གྱི་སྐོར་དེ་ཡིན་པ་དང་། ང་ཚོ་བཙན་བྱོལ་དུ་འབྱོར་རྗེས་ལོ་རབས་དྲུག་བཅུའི་ནང་ཐེ་ཝན་བོད་སོག་ལས་ཁུངས་ཟེར་བའི་མིང་སྦྱང་གི་འོག་ནས་བཙན་བྱོལ་བོད་མི་ནང་ཁུལ་དཀྲུགས་ཐབས་མང་པོ་བྱས་པའི་ལོ་རྒྱུས་མང་པོ་ཡོད་ན་ཡང་དབུས་བོད་མིའི་སྒྲིག་འཛུགས་ཀྱིས་ངོས་ནས་ཐེ་ཝན་དང་འབྲེལ་བ་དེ་ལོ་རབས་དགུ་བཅུའི་ནང་འབྲེལ་ལམ་གསར་དུ་བཙུགས་པ་དེ་ནི་ཆོས་དང་། རིག་གཞུང་། སྤྱི་ཚོགས་ཀྱི་འབྲེལ་པ་ཙམ་ལས་ཆབ་སྲིད་ཀྱི་འབྲེལ་བ་མིན་པ་དང་། རྒྱལ་ཁབ་ག་འདྲ་ཞིག་ཡིན་ཀྱང་རྒྱལ་ཁབ་དེའི་སྲིད་འཛིན་དང་། སྲིད་བློན། གཞུང་གསར་པ་བརྗེ་ལེན་སྐབས་མགྲོན་བརྡ་ཕུལ་ནས་རང་གི་མཐུན་ཕྱོགས་རྒྱལ་ཁབ་ཚོའི་སྲིད་འཛིན་དང་། སྲིད་བློན། གྲོས་ཚོགས་ཀྱི་ཚོགས་གཙོ་སོགས་གནད་ཡོད་མི་སྣ་ལ་མགྲོན་བརྡ་ཕུལ་ནས་གདན་ཞུ་བྱེད་པའི་ལམ་ལུགས་ཡོད་པ་དང་། ཐེ་ཝན་དང་རྒྱ་ནག་བར་རྩོད་གཞི་ལོ་རེ་ནས་ལོ་རེ་བཞིན་ཆེ་རུ་འགྲོ་བཞིན་པ་ནས་དེང་སྐབས་ཐེ་རྒྱ་གཉིས་དྲག་པོའི་གདོང་ཐུག་ག་དུས་བྱས་ཡོང་བསམ་པའི་འཛམ་གླིང་གི་མི་མང་པོ་ཞིག་སེམས་ཚབ་བྱེད་བཞིན་པའི་སྐབས་འདིར་ང་ཚོའི་ཐེ་ཝན་དང་ཆབ་སྲིད་ཀྱིས་འབྲེལ་བ་བྱ་རྒྱུ་དེ་དུས་ཚོད་རན་ལོད་ག་འདྲ་ཞིག་ཡིན་མིན་དེ་ཡང་བསམ་བློ་སྐྱར་ཞིབ་གནང་དགོས་པ་ནི་དབུ་མའི་ལམ་གྱིས་སྲིད་ཇུས་འོག་ནས་བོད་རྒྱའི་འབྲེལ་ལམ་ལ་མ་འོངས་ནུས་པ་ག་ཚོད་ཐོན་གྱི་ཡོད་དེ་ཡང་གསལ་པོ་ཤེས་མ་སོང་ལ་དབུས་བོད་མིའི་སྒྲིག་འཛུགས་ཀྱིས་མཐོ་རིམ་མི་སྣ་ཐེ་ཝན་གྱི་སྲིད་འཛིན་གསར་པའི་ཁྲི་འདོན་མཛད་སྒོ་ལ་མཉམ་ཞུགས་གནང་བ་དེ་ཐེ་རྒྱ་གཉིས་དྲག་དམག་དཔུང་ངོམས་བྱེད་པའི་དུས་ཚོད་ངན་པ་དང་གདོང་ཐུག་འཁེལ་བ་འདིའི་བོད་དོན་བདེན་མཐའ་སེལ་ཐབས་ལ་བར་ཆད་བཏང་བ་མ་རེད་དམ། གཉིས་སྨན་དབུ་མའི་ལམ་གྱི་དགོས་འདུན་ནི། ༼ རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་ས་གནས་མི་རིགས་རང་སྐྱོང་གི་བཅའ་ཁྲིམས་ནང་གསལ་བའི་རང་སྐྱོང་གི་གནས་བབ་ཚད་ལྡན་ཞིག་གི་དགོས་འདུན་སྟོན་ཡོད་པ་དང་། ༽ རྒྱ་ནག་དང་རྩོད་གཞི་ཆེ་བའི་ཐེ་ཝན་མཚོ་གླིང་ལ་ང་ཚོའི་ཆབ་སྲིད་ཀྱི་འབྲེལ་བ་བྱ་རྒྱུ་དེ་ང་ཚོའི་རྩ་དོན་སྒྲུབ་པ་ལ་ཕན་དང་གནོད་ག་འདྲ་ཞིག་ཡོང་གི་ཡོད་དེ་ཡང་ཐེ་ཚོམ་ཆེན་པོའི་ནང་ལྷག་པ་དང་། ང་ཚོའི་རང་བཙན་རྩོད་ཀྱི་ཡོད་ན་ཐེ་ཝན་ཙམ་མིན་པ་འཛམ་གླིང་ཤར་ནུབ་ཀྱི་རྒྱལ་ཁབ་ཚང་མར་འབྲེལ་ལམ་བཟོས་ནས་བོད་ཀྱི་རྩ་དོན་ལ་རྒྱབ་སྐྱོར་ཐོབ་པའི་རོགས་རམ་ཞུས་ནས་ང་ཚོའི་རྒྱ་ནག་ལ་ཁ་གཏད་གཅོག་དགོས་པ་དང་། སྤྱི་ལོ་ ༡༩༩༧ སྤྱི་ཟླ་ ༩ པའི་ཚེས་ ༡༨ ཉིན་བོད་མི་མང་གི་སྐུ་ཚབ་སྤྱི་འཐུས་གྲོས་ཚོགས་ནས་དབུ་མའི་ལམ་ལ་སྤྱི་མོས་ཀྱི་གྲོས་ཆོད་བཞག་པ་ནས་ང་ཚོའི་རྒྱ་ནག་དང་མཉམ་གྲོས་མོལ་སྐུ་ཚབ་ཚོགས་ཆུང་རིམ་པར་ཕེབས་ནས་སྤྱི་ལོ་ ༢༠༡༠ ནས་བཟུང་ད་ལྟ་བར་བོད་རྒྱའི་འབྲེལ་ལམ་སླར་གསོ་མ་ཐུབ་འདི་ཡང་ཞིབ་ཏུ་དཔྱད་ན་ང་ཚོའི་ཕྱོགས་ནས་དབུ་མའི་ལམ་མི་མང་ལས་འགུལ་ཁང་ཟེར་བའི་གཞུང་འབྲེལ་མ་ཡིན་པའི་སྒྲིག་འཛུགས་ཞིག་དང་། བོད་ཀྱི་གཞོན་ནུ་ཚོགས་པ་སོགས་རང་བཙན་གྱི་ལངས་ཕྱོགས་འཛིན་མཁན་ཁག་གཅིག་བཅས་བཙན་བྱོལ་བོད་མིའི་བཅའ་ཁྲིམས་དོན་ཚན་བཅོ་ལྔ་ནང་འཁོད་པའི་བོད་དོན་བདེན་མཐའ་སེལ་ཐབས་ལ་མདུང་རྩེ་ཁ་གཉིས་ལ་གྱེས་པ་འདིས་ཡང་རྒྱ་ནག་ལ་དོགས་པ་རྣམ་་རྟོག་ཞིག་ཤར་མེད་དམ་བསམ་པ་ནི་རྒྱ་དོགས་པས་འཕུང་ཟེར་བ་དང་བོད་རེ་བས་འཕུང་ཟེར་བའི་གཏམ་དཔེ་དེ་ཡང་དོན་དང་མཐུན་མི་འདུག་གམ། བཅའ་ཁྲིམས་དོན་ཚན་བཅོ་ལྔ་ནང་འཁོད་པའི་བོད་དོན་བདེན་མཐའ་སེལ་ཐབས་ལ་ང་ཚོའི་ངོས་ནས་བརྒྱུད་ལམ་གཅིག་དང་། དགོས་འདུན་གཅིག འབོད་སྒྲ་གཅིག་དང་། དར་ཆ་གཅིག ལངས་ཕྱོགས་གཅིག དམིགས་ཡུལ་གཅིག འགོ་ཁྲིད་གཅིག་གི་འོག་ཏུ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་འགོ་ཁྲིད་དང་། ང་ཚོའི་འགོ་ཁྲིད་བར་མི་དང་མི་གདོང་ཐུག་ནས་ཕར་བཤད་ཚུར་ཉན་དང་། ཚུར་བཤད་ཕར་ཉན་བརྒྱུད་ནས་བོད་རྒྱ་གཉིས་ས་འབྲེལ་ཆབ་སྲིད་ལ་འགན་འཁུར་ནས་བོད་རྒྱ་མི་རིགས་གཉིས་འཆམ་མཐུན་མཉམ་གནས་ཀྱི་སྤྱི་ཚོགས་གསར་པ། ༼ Harmonious Coexistence Modern Society ༽ ཞིག་འཛམ་གླིང་མི་མང་གི་མདུན་འཛུགས་ཐུབ་པའི་མཐུན་མོང་གི་འགན་དེ་བོད་རྒྱ་གཉིས་ནས་བཞེས་དགོས་པ་ལས་ཁ་དམག་ལ་འགན་འཁུར་ནས་བརྒྱུད་ལམ་འདྲ་མིན་དང་མི་སྣ་འདྲ་མིན་ལ་འགན་བསྐུར་ནས་དུས་ཚོད་ནམ་ཡང་འཕྲོ་ལྷག་གཏོང་མི་ཉན་པ་བཅས་རེ་ཞིག་འདིར་འཇུག་བསྡུས་པའོ།