-གྲོལ་ཧེ་རུ་ཀཿ
གཅིག ད་ལྟའི་རྒྱ་ནག་གི་ཁྱོན་ཡངས་ཀྱི་གནས་སྟངས། རྒྱལ་སྤྱིའི་བོད་དོན་རྒྱབ་སྐྱོར་གྱི་ཤུགས་ཚད། བོད་པ་རང་གི་ནུས་ཚད་བཅས་ལ་བལྟས་ན། དབུ་མ་དང་རང་བཙན་གང་གིས་ཀྱིས་ཀྱང་བོད་དོན་བདེན་མཐའ་སེལ་ཐུབ་པའི་རེ་བ་ནི་བརྒྱ་ཆའི་བཅོ་ལྔ་ཉི་ཤུ་ཙམ་རེད། རང་བཙན་བཅོ་ལྔ་དང་དབུ་མ་ཉི་ཤུ་ཙམ་རེད། ང་ཚོས་ཕར་བལྟས་ཚོད་ལ་རང་བཙན་ཧ་ཅང་ཁག་པོ་དང་དབུ་མ་ཅུང་ལས་སླ་བོར་མཐོང་སྲིད་མོད། དེ་ནི་རང་བཙན་བློ་གཏོང་བྱས་ཡོད་སྙམས་པའི་བོད་པ་རང་གི་བསམ་ཤེས་ཀྱིས་ལྟ་སྟངས་ཤིག་རེད་མ་གཏོགས། རྒྱ་གཞུང་གིས་དེ་ལ་ཁྱད་པར་ཆེན་པོ་བཀར་མི་སྲིད། རྒྱ་གཞུང་གིས་རང་ཉིད་ཨུ་ཐུག་ཐབས་ཟད་བྱུང་ན་མ་གཏོགས་དབུ་རང་གཉིས་གང་ཡང་སྤྲད་འདོད་མེད་པ་གསལ་བོ་རེད། འོན་ཀྱང་དབུ་མ་རྩོད་མཁན་རྣམས་ཀྱིས་དབུ་ལམ་གྱིས་བོད་དོན་བདེན་མཐའ་སེལ་ཐུབ་པར་ཡིད་ཆེས་བྱེད་གི་ཡོད་རེད། ཡིད་ཆེས་དེའི་ངང་ནས་ལོ་ངོ་ལྔ་བཅུ་མ་ཟིན་ཙམ་ཡང་འགྲོ་ཚར་རེད། ཆབ་སྲིད་འཐབ་རྩོད་ཅིག་ལ་མཚོན་ན། རེ་བ་ལ་མཐའ་མེད་ན་ཆོག་ཀྱང་དུས་ཚོད་ལ་ངེས་པར་དུ་མཐའ་ཡོད་དགོས་རེད། དེ་བས་བདག་གིས་དོན་ངོ་མར་དབུ་ལམ་གྱིས་བོད་དོན་བདེན་མཐའ་སེལ་ཐུབ་བམ་མི་ཐུབ་གསལ་བོར་བྱེད་པའི་གྲོས་འཆར་ཞིག་བཏོན་ནས་བོད་པའི་མཐོ་རིམ་མི་སྣ་གཙོས་བོད་འབངས་ཡོངས་ལ་སྤྱན་བསྟར་དུ་འབུལ་བསམ་པ་ཡིན་ནོ།།
གཉིས། ཉེ་ཆར་སྲིད་སྐྱོང་གིས་འཛམ་གླིང་རྒྱལ་སྤྱིའི་སྒང་། ལོ་རྒྱུས་ཐོག་བོད་འདི་ནམ་ཡང་རྒྱ་ནག་གི་ཆ་ཤས་ཆགས་མྱོང་མི་འདུག་ཅེས་གསུང་བ་རེད། ཚིག་འདི་གསུང་བས་གསུང་མཁན་ཁོང་ལ་རེ་བ་གསར་རྙིང་གཉིས་འགོ་རྩོམ་ཐུབ་པའི་རྟེན་འབྲེལ་ཡོད་པར་བདག་གིས་སེམས་བཞིན་མཆིས། གོང་གི་ཚིག་འདིས་ཡིན་པ་ནི་དབུ་མའི་ལམ་ལ་ངར་ལྡུད་པ་ཡིན་མོད། ཞོར་དུ་རང་བཙན་རྩོད་པར་ལམ་ཁའང་ཕྱེས་ཡོད་པ་རེད། འོན་ཀྱང་ད་ལྟའི་རང་བཙན་རྩོད་མཁན་ཡིན་ཟེར་མཁན་ཚོའི་བསམ་བློ་ཁུར་སྟངས་ལ་བལྟས་ན། རང་བཙན་ལེན་རྒྱུ་ཟེར་ན་ཉིན་མོའི་སྐར་མ་རེད། ཁོང་ཚོར་རང་བཙན་བརྩད་པའི་གྲུབ་འབྲས་ལ་རེ་བ་དང་ཡིད་ཆེས་མི་འདུག ཆེས་མ་མཐའ་ཡང་དབུ་མ་རྩོད་མཁན་ཚོར་དབུ་ལམ་ལ་རེ་བ་དང་ཡིད་ཆེས་ཡོད་པ་ནང་བཞིན་ཞིག་དགོས་ངེས་རེད། དེ་ཙམ་ཡང་མེད་ན་རང་བཙན་རང་བཙན་ཇི་ཙམ་ལབ་ཡང་ཁ་སྟོང་ནང་གི་ཚིག་སྟོང་ཙམ་རེད། དེ་བས་དང་པོ་རང་བཙན་ཕར་ལ་བཞག་ནས། དབུ་རང་གཉིས་ཀྱིས་མཉམ་དུ་དབུ་མའི་ལམ་གྱིས་བོད་དོན་བདེན་མཐའ་སེལ་ཐུབ་མིན་ལ་ལོ་ལྔ་ཡིས་དུས་ཚོད་ཅིག་སྤྲད་ནས་བལྟས་ན་ཧ་ཅང་བདེ་སྙམ་མོ།།
གསུམ། དབུ་མའི་ལམ་ནི་བོད་རྒྱའི་དཀའ་རྙོག་སེལ་བའི་ཆབ་སྲིད་ཀྱི་ལངས་ཕྱོགས་ཤིག་ཡིན་པ་ཀུན་གྱིས་མཁྱེན་གསལ་རེད། ནང་དོན་ནི། བོད་རྒྱ་གཉིས་ལ་ཁེ་གྱོང་མཉམ་གནས་བྱེད་པའི་དཀྱུལ་ལམ་ཟེར་ནས་འགྲེལ་བཞིན་ཡོད་རེད། ད་ལྟའི་བཙན་བྱོལ་བོད་གཞུང་གིས་རྒྱ་གཞུང་ལ་བོད་དོན་འཐབ་རྩོད་བྱེད་པའི་ལམ་ཡིག་ཀྱང་རེད། གོང་ས་༧ཏཱ་ལའི་བླ་མ་ནི་ལམ་དེའི་སྲོལ་འབྱེད་པའམ་ལམ་དེར་ཐོག་མར་རེ་བ་རྒྱག་མཁན་ཁོང་རེད། དུས་རབས་ཉི་ཤུའི་ལོ་རབས་བདུན་ཅུའི་ནང་ནས་འགོ་བརྩམས་པ་རེད། སྤྱིའི་ཆ་ནས་ལོ་དུས་དེ་ནི་འཛམ་གླིང་ཧྲིལ་བོས་ཁེ་གྱོང་མཉམ་བགོ་བྱེད་པའི་དུས་ཚོད་ཡག་ཤོས་ཤིག་ལ་ཁེལ་ཡོད་མོད། འོན་ཀྱང་རྒྱ་གཞུང་གིས་ད་ལྟའི་བར་དབུ་མའི་ལམ་གྱི་རྩ་བའི་དགོས་འདུན་ལ་རེ་བ་ཡོད་པའི་ལན་གང་ཡང་རྒྱབ་མེད། མ་ཟད་རེ་བ་མེད་པའི་བརྡ་ཤུགས་ཆེར་བསྟན་ཡོད། དེ་ལྟར་ལོ་ཡི་འཁོར་ལོ་བཅུ་ཕྲག་འགའ་འཁོར་རྗེས། གོང་ས་༧ཏཱ་ལའི་བླ་མ་ནི་དགུང་གྲངས་གྱ་སྟོད་ལ་སོན་པའི་བགྲེས་སོང་རྒན་པོ་ཞིག་ཏུ་གྱུར་བ་རེད་ལ་དབུ་མའི་ལམ་ཡང་བག་མར་མ་ཐོན་པའི་བུ་མོ་གོ་རྒས་མ་ཞིག་དང་འདྲ་བོ་ཆགས་པ་རེད།
བཞི། རྩ་བའི་ཆ་ནས་ད་ལྟའི་དབུ་མའི་ལམ་ལ་རེ་བ་བྱེད་མཁན་ཚོས་ཀྱང་དབུ་མའི་ལམ་ནི་འཆི་རྒྱུ་རྒས་རྒྱུ་མེད་པའི་ལྷ་མོ་དབྱངས་ཅན་མ་ལྟ་བུ་ནམ་ཡང་གཞོན་ཤ་དོད་སེ་ཡོད་པ་ཞིག་ལ་ངོས་བཟུང་ན་ནོར་བ་རེད། དབུ་མའི་ལམ་གྱི་དུས་ལའང་ཚེ་དང་ཚད་ཡོད་དགོས་ངེས། དུས་ལ་ཚད་མེད་ན་རང་རྒས་རོགས་རྒས་ཆགས་ནས་གྲུབ་འབྲས་ཐོན་པ་ཕར་ཟད་རང་མེད་རོགས་མེད་ཆགས་རྒྱུར་གཏན་ཁེལ་རེད། གྲུབ་འབྲས་མེད་པའི་ལས་ལ་ཨུ་ཚུགས་རྒྱག་པ་ནི་མ་གཞི་ནས་བྱེད་ཐབས་ཡག་པོ་མ་རེད། དེས་ན་འདིར་གང་བཤད་པར་བྱ་བ་ཡོད་ལབ་ན། གོང་ས་༧ཏཱ་ལས་བླ་མ་གཙོ་བྱས་མཐོ་རིམ་དཔོན་རིགས་ཡོངས་ཚང་འཛོམས་ཐོག་དབུ་མའི་ལམ་གྱི་ནུས་པའི་སྐོར་ལ་བསྐྱར་ཞིབ་ཅིག་དགོས་ངེས་རེད། བརྗོད་གཞི་དབུ་མའི་ལམ་གྱི་ཆེས་མཐའ་མའི་དུས་ཚོད་རྫོགས་མཚམས་དེ་གཏན་ཁེལ་དགོས་པ་འདི་རེད། གལ་ཆེ་ཤོས་མཐའ་མའི་ས་མཚམས་ཆུ་མཚམས་གསལ་བོ་མ་བཟོས་ན། དབུ་མའི་ལམ་ནི་རེ་བ་རྐྱང་རྐྱང་བྱེད་སའི་ལྷའི་ཞིང་ཁམས་ལྟ་བུ་རེད། དངོས་ཡོད་ལ་ཕན་ཐོག་མེད་རེད།
ལྔ། བོད་གཞུང་ནས་དབུ་མའི་ལམ་ལ་མཐའ་མའི་དུས་ཚོད་ངེས་བཅད་བཟོ་དགོས། དཔེར་ན་དེ་རིང་ནས་བཟུང་ལོ་ལྔའི་རིང་གཏན་ཁེལ་བྱས་ཏེ། རྒྱ་གཞུང་གིས་དུས་བཅད་དེའི་ནང་ཚུད་དུ་དབུ་མའི་ལམ་གྱི་དགོས་འདུན་ལ་འགྲིག་མིན་གྱི་བརྡ་ལན་གསལ་བོ་ཞིག་མ་སྤྲད་ན། དུས་བཅད་རྫོགས་མཚམས་དེ་མ་ཐག་བོད་གཞུང་དམངས་གཉིས་ནས་དབུ་མའི་ལམ་རྩིས་མེད་བཏང་བ་ཡིན་པའི་གྲོས་ཆོད་སྤྱི་བསྒྲག་བྱེད་དགོས་རེད། དེ་ནས་བཟུང་བོད་གཞུང་གིས་ལམ་ཁ་གཞན་ཞིག་མི་འདམས་རང་འདམས་རེད་ཅེས་འཛམ་གླིང་རྒྱལ་སྤྱིའི་སྒང་ལ་ས་བསྒྲག་གནམ་བསྒྲག་བྱེད་དགོས་རེད། དེ་དེ་བཞིན་དུ་ལག་སྟར་ཡང་བྱེད་དགོས་ངེས་རེད། མ་གཏོགས་ཁྲེལ་གཞུང་མེད་པའི་རྒྱ་གཞུང་སྐྱག་ལང་ལ་ཤོར་ཏེ་དུས་ཚོད་མང་པོ་བརླག་འགྲོ། སྤྱིར་ན་བོད་གཞུང་གིས་དབུ་མའི་མལ་གྱིས་རྒྱ་གཞུང་ལ་དུས་ཚོད་རིང་ཙམ་སྤྲད་དེ་འབྲས་བུ་ཐུང་ཙམ་ལ་དམིགས་པ་ཡིན་མོད། རྒྱ་གཞུང་ལ་མཚོན་ན་དུས་ཚོར་ནར་འགྱང་བྱེད་པའི་གོ་སྐབས་ཡག་ཤོས་ཤིག་ཏུ་འགྱུར་བཞིན་ཡོད།
དྲུག དུས་བཅད་དེ་ལ་༧གོང་ས་མཆོག་གི་མོས་མཐུན་ཧ་ཅང་གལ་ཆེན་རེད། སྲིད་སྐྱོང་ནི་བོད་གཞུང་གི་དཔོན་རིགས་མཐོ་ཤོས་ཡིན་པས་ཁོང་གིས་ལས་འཆར་དེའི་འགོ་ཁྲིད་དེ་ཆབ་སྲིད་ལངས་ཕྱོགས་གསར་བ་དེ་༧གོང་ས་མཆོག་ལ་ཐོག་མར་སྙན་གསང་འབུལ་དགོས་རེད། ཁོང་ལ་དེ་འབུལ་ཐུབ་པའི་སྤོབས་པའང་ཡོད་དགོས་ངེས། ཆབ་སྲིད་ལངས་ཕྱོགས་གསར་བ་དེ་ནི་དབུ་ལམ་གྱིས་བོད་དོན་བདེན་མཐའ་སེལ་ཐུབ་མི་ཐུབ་གསལ་བོར་བྱེད་པའི་ལམ་གཅིག་པུ་དེ་རེད། སེལ་ཐུབ་ན་རབ་རེད། གལ་སྲིད་བོད་དོན་བདེན་མཐའ་སེལ་མ་ཐུབ་ནའང་དབུ་མའི་ལམ་ལ་རེ་བ་ཡོད་མེད་གསལ་བོ་ཆགས་པ་རེད། མུ་མཐུན་ནས་དབུ་མའི་ལམ་ལ་རེ་སྟོང་འཆང་ནས་འདུག་མ་དགོས་པ་རེད། བོད་ཕྱོགས་ལ་ཕན་ཐོགས་ཆེན་པོ་རེད། དབུ་མའི་ལམ་ཁ་གསལ་བོ་ཆགས་ན་གཉན་འཕྲེང་ཆེ་བའི་དུས་ཚོད་འཕྲོ་བརླག་ཏུ་གཏོང་མ་དགོས་པ་རེད། ཆབ་སྲིད་ལངས་ཕྱོགས་གསར་བ་གཞན་ཞིག་འགོ་བརྩམ་པར་སྟབས་བདེ་བཟོས་པ་རེད། ལམ་ཁ་གཞན་དེ་ནི་རེ་བ་ཡོད་ན་མེད་ན་རང་བཙན་མ་གཏོགས་འགྲོ་ས་མེད་རེད།
བདུན། རང་བཙན་བརྩད་པ་ནས་བཟུང་མགྱོགས་པོར་གྲུབ་འབྲས་ཐོན་ཁག་པོ་རེད། ཅིག་བྱས་ན་ད་ཡོད་བོད་དོན་རྒྱབ་སྐྱོར་བའང་ཇེ་ཉུང་དུ་འགྲོ་སྲིད། མ་ཟད་ང་ཚོར་དཀའ་ངལ་ཆེན་པོ་དེ་འདྲའང་འཕྲད་སྲིད་པ་རེད། དེ་ནི་འགྲོ་སྟངས་ཤིག་རེད། ང་ཚོས་ཕྱོགས་ཡོངས་ནས་གདོང་་ལེན་ཆེན་པོ་བྱེད་པར་གྲ་སྒྲིག་ཨང་གསར་དགོས་ངེས། རང་བཙན་ནི་ང་ཚོའི་ཆེས་ཆེ་བའི་མངོན་འདོད་ཡིན་པས་དེའི་ཆེད་དུ་སྡུག་དཀའ་ལས་ཅི་ཞིག་འཕྲད་ཀྱང་ང་ཚོས་དང་ལེན་བྱེད་ཐུབ་ངེས་ཡིན།
བརྒྱད། རང་བཙན་བརྩད་པས་བཟང་ཕྱོགས་བཤད་ན། རང་བཙན་ཐོབ་ན་ཆེས་བླ་ན་མེད་པ་རེད། འོན་ཀྱང་སྐབས་ཐོག་རིང་མ་ཐོབ་ནའང་ཁ་ཕྱོགས་ནོར་མེད་རེད། མ་ཟད་བོད་པ་ནང་ཁུལ་གྱི་རྩོད་རྙོག་རྣམས་མེད་པར་ཆགས་ནས་བོད་འབངས་ཡོངས་ཁ་ཕྱོགས་གཅིག་ལ་རང་བཞིན་གྱིས་བསྒྲིལ་འགྲོ། རྒྱལ་སྤྱིའི་སྒང་གི་བོད་དོན་རྒྱབ་སྐྱོར་བ་ཚོས་ཀྱང་བསམ་ཤེས་བྱེད་པའི་གོ་སྐབས་ཡོད་པར་ཆགས་རེད། མ་གཞི་སྤྱིར་ན་ང་ཚོས་རང་བཙན་རྩོད་འོས་པ་རེད། རྒྱུ་མཚན་བོད་འདི་ལོ་རྒྱུས་ཐོག་རང་བཙན་གཙང་མའི་རྒྱལ་ཁབ་ཅིག་ཡིན་པ་མ་ཟད། སྔོན་ཆད་ཡ་གླིང་དཀྱུལ་མའི་ནང་འགྲན་ཟླ་བྲལ་བའི་བཙན་རྒྱལ་གཅིག་པུ་དེ་ཡིན་པས་ཕྱིར་རོ།།
དགུ། རང་བཙན་ཇི་ལྟར་རྩོད་པའི་ཐབས་ལམ་ནི་ང་མི་གཅིག་གིས་བཤད་ཐུབ་པ་ཞིག་མ་རེད། འོན་ཀྱང་ཤེས་དགོས་ངེས་ཤིག་ནི་ང་ཚོ་བཙན་བྱོལ་ནང་ཡུན་རིང་ལྷག་ངེས་པ་དང་། ལྷག་པའི་རིང་དེར་ཡང་ང་ཚོ་ཆེ་མཐོང་དང་གཟི་བརྗིད་ལྡན་པའི་ངང་གནས་ཐུབ་པར་བྱ་དགོས་པ་ནི་རྩ་བའི་ཆ་རྐྱེན་གཙོ་བོ་རེད། གཞན་རྣམས་མང་མང་གི་མཐུ་ལ་བརྟེན་ནས་ཡོང་དགོས་པ་ཞིག་ལ་བདག་གིས་འདོད་དོ།།
བཅུ། རྩོམ་ཡིག་འདི། དབུ་མའི་ལམ་གྱི་གདུལ་བྱ་གཤའ་མ་ཞིག་གིས་བྲིས་པ་ཡིན་པས་ཀུན་སློང་ལྷད་མེད་དྭངས་གཙང་ཡིན། དབུ་མའི་ལམ་གྱིས་བོད་དོན་བདེན་མཐའ་སེལ་ཐུབ་ན་སྙམས་པའི་དབུ་མ་བ་ཞིག་གིས་བྲིས་པ་ཡིན་པས་བརྗོད་དོན་གཙང་མ་གཙང་རྐྱང་ཡིན། བདག་གིས་དོན་ངོ་མར་དབུ་ལམ་གྱིས་བོད་དོན་བདེན་མཐའ་སེལ་ཐུབ་བམ་མི་ཐུབ་གསལ་བོར་བྱེད་ཐུབ་པའི་གྲོས་འཆར་ཞིག་བོད་འབངས་ཡོངས་ལ་སྤྱན་བསྟར་དུ་ཕུལ་བ་དང་། དེ་བཞིན་དབུ་མའི་ལམ་གྱི་དུས་བཅད་གྲོས་འཆར་འདིས་རང་འགན་རང་ཐག་རང་གཅོད་ཡོང་བའི་སྨོན་འདུན་སྙིང་ནས་ཞུའོ།།
2022.9.15
དབུ་མའི་ལམ་གྱི་དགོས་འདུན་ནང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་མི་རིགས་ས་གནས་རང་སྐྱོང་གི་བཅའ་ཁྲིམས་ནང་འཁོད་པའི་རང་སྐྱོང་གི་གནས་བབས་ཚད་ལྡན་ཞིག་གི་དགོས་འདུན་སྟོན་ཡོད་ན་ང་ཚོའི་རྒྱ་མིའི་མཉམ་སྐད་ཆ་བཤད་ནས་དབུ་མའི་ལམ་གྱི་དགོས་འདུན་ཐོབ་དགོས་པ་ལས་རྒྱ་ནག་གི་རྩ་ཁྲིམས་ནང་འཁོད་པའི་ཆ་རྐྱེན་དེ་རྒྱ་མིའི་ལག་ནས་ང་ཚོར་ཐོབ་དགོས་པ་ལས་རྒྱ་མིའི་རྩ་ཁྲིམས་ནང་འཁོད་པའི་ཐོབ་ཐངས་དེ་ཕྱིའི་རྒྱལ་ཁབ་སུ་གཅིག་གི་ང་ཚོར་སྤྲོད་ཐུབ་ཀྱི་མ་རེད་ལ་ང་ཚོ་དང་རྒྱ་མིའི་བར་སྐད་ཆ་བཤད་སྐབས་ཕར་བཤད་ཚུར་ཉན་དང་ཚུར་བཤད་ཕར་ཉན་བརྒྱུད་ནས་བོད་རྒྱའི་དཀའ་རྙོགས་སེལ་ཐུབ་དགོས་པ་མ་རེད་དམ་།