གཞུང་པ་ཚེ་དབང་བསོད་ནམས།
སའི་གོ་ལ་འདིའི་སྒང་དུ་འཚོ་བའི་མི་གི་སྤྱི་ཚོགས་ག་འདྲ་ཞིག་ཡིན་ཀྱང་སྤྱི་ཚོགས་དེ་འཚོོ་གནས་ཐུབ་པ་ལ་སྐད་དང་ཡིག་གེ། ཆོས་དང་རིག་གཞུང་བརྒྱུད་ནས་སྤྱི་ཚོགས་འཚོ་དགོས་པ་ལས་སྐད་ཡིག་དང་རིག་གཞུང་ལ་མ་བསྟེན་ནས་སྤྱི་ཚོགས་ཞིག་ཟུར་དུ་ནམ་ཡང་འཚོ་མི་ཐུབ་པ་དང་། དེང་སྐབས་ནུབ་ཕྱོགས་ལུང་པ་མང་པོའི་ནང་མི་རིགས་འདྲེས་ནས་དེ་སྔའི་སོ་སོའི་ཕ་མེས་ནས་བརྒྱུད་པའི་སྐད་དང་ཡིག་གེ་རིག་གཞུང་སོགས་བཀོལ་སྤྱོད་བྱེད་སའི་འཁོར་ཡུག་མེད་པ་ནས་མངོན་གསལ་དོད་པོའི་ངང་ནས་ཡལ་འགྲོ་པ་མ་ཟད་ནམ་ཞིག་མི་རིགས་ཀྱི་ངོ་བོ་ཡང་ཡལ་རྒྱུ་ཡིན་པ་ནི་ད་ལྟའི་མི་རིགས་མཉམ་འདྲེས་ཀྱི་གནས་བབས་ནས་ང་ཚོའི་མཐོང་ཐུབ་པ་དང་ཤེས་ཐུབ་པ་ཞིག་མ་རེད་དམ། མི་རིགས་ཞིག་ཟུར་དུ་འཚོ་དགོས་ན་དང་པོ་མི་རིགས་སྲུང་སྐྱོབས་ཀྱི་ལས་འགུལ་དེ་སྐད་ཡིག་དང་རིག་གཞུང་སྲུང་སྐྱོབས་ཀྱི་ལས་འགུལ་ལས་བརྒྱ་འགྱུར་སྟོང་འགྱུར་གྱི་གལ་ཆེར་རྩིས་ནས་སྔོན་ཐོན་བྱ་དགོས་པ་ནི་གལ་ཆེའི་ནང་གི་གལ་ཆེན་ཞིག་ཡིན་པ་དང་། མི་རིགས་སྲུང་སྐྱོབས་ཀྱི་ལས་འགུལ་དེ་སྔོན་དུ་ཕྱིན་ནས་
སྐད་ཡིག་དང་རིག་གཞུང་སྲུང་སྐྱོབས་ཀྱི་ལས་འགུལ་དེ་རྗེས་ནས་འགྲོ་དགོས་པ་ནི་མི་རིགས་ཞིག་ཟུར་དུ་འཚོ་གནས་ཐུབ་པའི་ཐབས་ལམ་བཟང་ཤོས་དེ ཡིན་པ་དང་། མི་རིགས་ཞིག་ཟུར་དུ་འཚོ་ཐུབ་དང་མ་ཐུབ་དེ་མི་རིགས་དེའི་སྐད་ཡིག་དང་རིག་གཞུང་ལ་རག་ལས་པ་དང་། ལྷག་པར་དུ་ང་རང་ཚོ་བོད་མི་རིགས་འདི་ཐོག་མ་ནས་མི་འབོར་ཉུང་བའི་མི་རིགས་ཞིག་ཡིན་པ་དང་སྤྱི་ལོ་ ༡༩༥༩ ལོར་རྒྱ་མིའི་བོད་ལ་བཙན་གནོན་གྱིས་ད་ལྟའི་ཆ་ལ་བོད་མི་གཞིས་བྱེས་གཉིས་ལ་གནས་ཡོད་པ་ནས་བོད་ནང་ཡོད་པའི་བོད་མི་ཚོ་རྒྱ་མིའི་བཙན་དབང་འོག་ཕ་མེས་ཀྱི་སྐད་ཡིག་དང་རིག་གཞུང་སོགས་བེད་སྤྱོད་བྱེད་སའི་འཁོར་ཡུག་མེད་པ་ནས་བོད་མིའི་སྐད་དང་ཡིག་གེ་རིག་གཞུང་སོགས་འཛམ་གླིང་མི་མང་གི་མདུན་མངོན་གསལ་དོད་པོའི་ངང་ཉམས་ཆགས་འགྲོ་བཞིན་པ་དང་། ང་ཚོ་བཙན་བྱོལ་དུ་ཡོད་པའི་བོད་མི་ཚོ་རང་དབང་ལུང་པའི་ནང་སོ་སོའི་ཆོས་དང་རིག་གཞུང་སྐད་ཡིག་སོགས་༸གོང་ས་མཆོག་གི་བཀའ་དྲིན་ཉག་ཅིག་ལ་བརྟེན་ནས་ད་ལྟ་བར་མི་ལོ་དྲུག་བཅུ་ལྷག་ཙམ་རིང་མི་སྨོན་རང་སྐྱིད་དུ་གནས་ཐུབ་ཡོད་ན་ཡང་དེང་སྐབས་གཞིས་ཆགས་ནང་གཞིས་མི་ཉུང་དུ་འགྲོ་བཞིན་པ་དང་སློབ་གྲའི་ནང་སློབ་ཕྲུག་ཉུང་དུ་འགྲོ་བཞིན་པ་དང་ཆོས་སྒར་ཁག་ནང་གྲ་བརྩུན་གསར་པ་འཛུལ་མཁན་ཉུང་དུ་འགྲོ་བཞིན་པ་འདི་དག་ལ་དཔྱད་པ་བྱས་ཚེ་བཙན་བྱོལ་སྤྱི་ཚོགས་ནང་ཡོད་པའི་མི་འབོར་གྱི་བརྒྱ་ཆ་བཞི་བཅུ་ཙམ་ནུབ་ཕྱོགས་ལུང་པའི་ནང་ཁྱིམ་ཚང་སྒེར་གྱི་ལྟོ་གོས་ཚོལ་སྒྲུབ་ལ་བརྩོན་བཞིན་པ་ནས་སོ་སོའི་ཕ་མེས་ནས་བརྒྱུད་པའི་ཆོས་དང་རིག་གཞུང་སྐད་ཡིག་སོགས་ལ་སྣང་མེད་ཤོར་ནས་ལུང་པ་དེའི་སྐད་ཡིག་དང་རིག་གཞུང་ལ་གོམས་འདྲིས་བརྒྱུད་ནས་སོ་སོའི་ཕ་མེས་ཀྱི་སྐད་ཡིག་དང་རིག་གཞུང་ལ་ཉམས་ཆགས་ཆེན་པོ་འགྲོ་བཞིན་པ་སོགས་ལ་བལྟས་ཚེ་ང་ཚོའི་ཕ་མེས་ནས་བརྒྱུད་པའི་ཆོས་དང་རིག་གཞུང་སྐད་ཡིག་སོགས་ཧ་ཅང་གི་ཉེན་ཁའི་ནང་ཡོད་པ་ནས་གལ་ཆེ་ཤོས་དེ་རྒྱ་བལ་འབྲུག་གསུམ་ནང་ཡོད་པའི་ད་ལྟའི་གཞིས་ཆགས་ཁག་གིས་གཞིས་མི་ཚོའི་འཚོ་བའི་མདུན་ལམ་དེ་གཞིས་ཆགས་དེ་གའི་ནང་ནས་འཚོ་ཐུབ་པའི་འགན་དེ་དབུས་བོད་མིའི་སྒྲིག་འཛུགས་དབུས་ས་གཉིས་ནས་བཞེས་ནས་གཞིས་མི་རྣམས་ཕྱིའི་རྒྱལ་ཁབ་ནང་བོད་མི་ཁྱིམ་ཚང་རེ་ཙམ་གཉིས་ཙམ་བྱས་ནས་འཚོ་བ་སྐྱེལ་མ་དགོས་པ་གཞིས་ཆགས་རང་དུ་འཚོ་བ་སྐྱེལ་སའི་འཁོར་ཡུག་བསྐྲུན་ནས་ཡོང་འབབ་ལས་གཞི་ཁྱིམ་ཚང་སོ་སོ་ནས་བཟོོ་ལས་ཆུང་ཙག་རིགས་སྤེལ་ཐུབ་ན་བོད་མི་རིགས་སྲུངས་སྐྱོབས་ཐུབ་ནས་སོ་སོའི་ཕ་མེས་ནས་བརྒྱུད་པའི་ཆོས་དང་རིག་གཞུང་སྐད་ཡིག་སོགས་མི་ཉམས་རྒྱུན་འཛིན་དང་ཉམས་པ་སླར་གསོ་ཐུབ་ནས་རྒྱུན་གནས་ཐུབ་དགོས་པ་ལས་ད་ལྟའི་བཙན་བྱོལ་སྤྱི་ཚོགས་ཀྱི་གནས་སྟངས་ལ་བལྟས་ཚེ་ནམ་ཞིག་ང་ཚོའི་ཆོས་དང་རིག་གཞུང་སྐད་ཡིག་སོགས འགྲེམས་སྟོན་ཁང་ནང་ངོ་སྤྲོད་བྱ་དགོས་པའི་ཚོང་ལས་ཀྱི་ངོ་བོར་ལྷག་མི་སྲིད་པའི་ངེས་པ་མེད་ན་བསམ་ཡོད་བོད་མི་ཚང་ནས་རྣོ་བསམ་ཞིབ་ཏུ་བཏོང་དགོས་པའི་དུས་ལ་བབ་མི་འདུག་གམ།
ཀོ་ལི་གྷལ་གཞིས་ཆགས་གཞུང་པ་ཚེ་དབང་བསོད་ནམས་ནས་སྤྱི་ལོ་ ༢་༠༢༢ སྤྱི་ཟླ་ ༧ པའི་ཚེས་ ༢༠ ཉིན་རང་ཁྱིམ་དུ་ཟིན་བྲིས་དུ་བཏབ།