ཆབ་མདོ་ངག་ཕུན་གྱིས།
བོད་མི་རིགས་ལ་བཀའ་དྲིན་ཆེ་བའི་མེས་པོ་དམ་པ་ཁོང་རྣམས་ཀྱིས་ངལ་བ་ཁྱད་དུ་བསད་ནས་ད་ལྟའི་ལོངས་སུ་སྤྱོད་བཞིན་པའི་ཡི་གེ་འདི་ཉིད་གསར་བསྐྲུན་གནང་ནས་འོད་སྟོང་འབར་བའི་ཤེས་རིག་བསྐྲུན་གནང་མཛད་ཡོད་པ་དེ་རེད། ང་ཚོས་ཁོང་རྣམ་པའི་བཀའ་དྲིན་ནམ་ཡང་བརྗེད་ཐབས་མེད་པ་ཞིག་རེད་ལ། རང་རེའི་ཕ་ཡུལ་གཞན་འོག་ཏུ་ཤོར་ནས་མི་ཡུལ་ལུང་པར་སྐད་ཡིག་དང་གོམས་གཤིས་མི་གཅིག་པའི་མི་རིགས་ཤིག་དཀྱིལ་ལ་གནས་དགོས་དུས་ཕྱི་ནང་གིས་ང་ཚོའི་སྐད་ཡིག་ཐོག་ཉམས་ཆག་འགྲོ་བཞིན་ཡོད་པ་ནི་’འབྲེལ་བརྗོད་མ་དགོས་པ་ཞིག་རེད། ཡིན་ནའང་ང་ཚོ་ཚང་མས་རེ་བ་བཟང་ས་དང་། གྲ་སྒྲིག་སྡུག་ས་བཟུང་སྟེ་མདུན་སྐྱོད་གནང་དགོས་པའི་ཡང་ཡང་བཀའ་སློབ་རིན་ཐང་བྲལ་དེ་དག་སེམས་དབུས་སུ་བཟུང་ནས་མདུན་སྐྱོད་གནང་དགོས་ཤིང་།
དེར་བརྟེན་ང་ཚོའི་འབྲེལ་ཚོས་ཐུགས་བསམ་ལེགས་པ་ཤིག་བཞེས་ནས་བོད་ཀྱི་སྐད་ཡིག་མི་ཉམས་གོང་འཕེལ་ཡོང་བར་འབོད་བརྩོན་གནང་དང་གནང་བཞིན་པ་ནི་དགའ་འོས་པའི་གནས་སྟངས་ཤིག་རེད། ད་དུང་ཡིན་ནའང་ཡར་རྒྱས་ལ་མཐའ་མེད་དུས་སྔ་ལྷག་འབད་བརྩོན་གནང་དགོས་པར་སེམས། ད་རེས་རང་རིགས་ན་གཞོན་རྣམས་སོ་སོ་སྐད་ཡིག་ལ་དོ་སྣང་ཡོང་རེ་དམིགས་ནས་དེ་སྔོན་བྲིས་ནས་དུས་དེབ་དང་ཚགས་ཤོག་ཁག་ཏུ་བཀོད་ཟིན་པ་དང་། མ་འཁོད་པའི་རྩོམ་ཡིག་ཐར་ཐོར་རྣམས་ཕྱོགས་བསྒྲིགས་བྱས་ཤིང་། ཆེད་རྩོམ་འདི་དག་ནི་ལས་ཀའི་སྔ་དགོང་ལ་བྲིས་པ་ཤ་སྟག་ཡིན་དུས་ཕུན་སུམ་ཚོགས་པ་ཞིག་ཡོང་རེ་བྲལ་ཡང་། རང་རེའི་ན་གཞོན་ལས་དང་པོ་རྣམས་རྩོམ་ཡིག་འབྲི་རྒྱུར་སེམས་ཤུགས་འཕར་ཆེད་དུ་བརྩམས་པ་ཞིག་ལས་གཞན་པའི་དམིགས་ཡུལ་རྒྱ་ཆེན་པོ་དང་གཏིང་ཟབ་པོ་དེ་འདྲའི་གང་ཡང་མེད། རྣམ་པ་ཚོས་ཐེངས་གཅིག་ཀློག་གནང་བ་ཡིན་ན་ངས་འདོད་དོན་དེ་ག་རང་གིས་འགྲུབ་པ་ཡིན།
བོད་ལ་དུས་འགྱུར་གྱི་རླུང་འཚུབ་དྲག་པོ་ལངས་ཏེ་བོད་མི་རིགས་ཀྱི་སྲོག་ལས་གཅེས་པའི་སྐད་ཡིག་ལ་ཉམས་ཆག་ཆེན་པོ་བཏང་བ་དང་། ཆེས་རིན་ཐང་ལྡན་པ་དགོན་སྡེ་དྲུག་སྟོང་ལྷག་ཙམ་གཏོར་བཤིགས་བཏང་བ། སྐྱེས་ཆེན་དམ་པ་དུ་མ་ཞིག་ཉེས་མེད་བཙོན་ཁང་ལ་བཅུག་སྟེ་དཀའ་སྡུག་བསམ་ཡུལ་ལས་འདས་པ་མྱོང་དགོས་བྱུང་ཡོད། གཞིས་ལུས་བོད་མི་རྣམས་ལ་དཀའ་སྡུག་ག་ཚད་མྱོང་དགོས་བྱུང་ནའང་དཀའ་སྡུག་ཁག་ལ་གདོང་ལེན་གནང་ནས་བོད་མི་རིགས་ཀྱི་སྐད་ཡིག་སྲུང་སྐྱོབ་ལ་སྐུ་ངལ་ཚད་མེད་མཛད་བཞིན་ཡོད། རྒྱུ་མཚན་དེ་དག་ལ་བརྟེན་ནས་བོད་མི་རིགས་ཀྱི་སྐད་ཡིག་མ་ཤི་བར་གསོན་པོར་གནས་ཐུབ་པ་བྱུང་ཡོད།
ལྷག་དོན་བོད་མི་རིགས་ལ་བཀའ་དྲིན་བླ་མེད་དུ་ཆེ་བའི་༸རྒྱལ་བ་རིན་པོ་ཆེ་མཆོག་གིས་གྲ་སྒྲིག་སྡུག་ས་དང་། རེ་བ་བཟང་ས་ནས་སྐྱོན་གནང་མཛད་པའི་དབང་གིས་བོད་མི་རིགས་ཀྱི་སྐད་ཡིག་མི་ཡུལ་ལ་གསོན་པོར་གནས་ཐུབ་པ་བྱུང་ཡོད་ཅིང་། དེར་བརྟེན་ང་ཚོས་ཁོང་གི་བཀའ་སློབ་ལམ་སྟོན་གང་གནང་བ་དེ་དག་རྡོ་ལ་རི་མོ་བྲིས་པ་ནང་བཞིན་འབད་བརྩོན་ལྷོད་མེད་བྱེད་དགོས་པ་ཞིག་པ་ཞིག་ཡིན། རང་རིགས་རྒན་གཞོན་འགའ་རེས་བོད་ཀྱི་སྐད་ཡིག་ད་ལྟའི་དུས་སྐབས་ལ་བེད་སྤྱོད་མི་འདུག་སྙམ་པའི་དགོངས་པ་འཁོར་མཁན་ཡོད་ལ། དགོངས་པ་འཁོར་སྲིད་པ་ཞིག་ཀྱང་རེད།
བོད་མི་རིགས་ཀྱི་སྐད་ཡིག་བཀོལ་སྤྱོད་མི་འདུག་སྙམ་ནས་གཡུག་བཞག་ན་མི་འགྲིགས་པ་ཞིག་རེད། ང་ཚོ་ཆེས་ངོམས་རིན་ཡོད་པ་དེ་ནི་ནང་དོན་རིག་པ་ཡིན་གཤིས་དེ་དག་ནི་བོད་ཀྱི་སྐད་ལས་གཞན་གྱི་ཐོག་ཏུ་མེད་པ་རེད། རྒྱུ་མཚན་དེ་དག་ལ་བརྟེན་ནས་བོད་མི་རིགས་ཀྱི་སྐད་ཡིག་སྦྱང་ན་སྦྱོང་རིན་ཡོད་པ་ཞིག་རེད་སྙམ། མི་རིགས་གནས་དང་མ་གནས་ནི་མི་སོ་སོའི་སྐད་ཡིག་ཡིན་ཞིང་། སྐད་ཡིག་བརླག་པའི་ཉིན་མོ་དེ་ནས་བོད་མི་རིགས་བརླག་ཚར་བ་རེད་ཅེས་མཁས་པ་ཚོས་བརྗོད་ཀྱི་ཡོད་པ་ལྟར། ང་ཚོས་ཀྱང་ངེས་པར་ཡིད་གཟབ་གནང་དགོས་པ་ཞིག་ཏུ་སེམས།
དེར་བརྟེན་གོང་ཞུས་ལྟར་གུས་པས་ལས་ཀའི་སྔ་དགོང་ལ་དལ་ཁོམ་དུ་མ་བསྡད་པ་རྩོམ་ཡིག་ཐར་ཐོར་བྲིས་པ་རྣམས་ཕྱོགས་བསྒྲིགས་ཀྱིས་འགྲེམས་སྤེལ་བྱས་ཡོད་ཅིང་། དེ་ཡང་མི་ཡུལ་གྱི་འཁྲུལ་སྣང་གསོན་པོ། ཞེས་པ་ནང་དུ་ཉིན་རེ་སེམས་ནང་དུ་དགའ་སྐྱོའི་གནས་ཚུལ་གང་ཞིག་བྱུང་བ་རྣམས་ཚིག་བཅད་ཀྱི་ལམ་ནས་བྲིས་པ་ཞིག་དང་།
དཔག་བསམ་ལྗོན་ཤིང་ཞེས་པ་ནི་རང་རེའི་ན་གཞོན་རྣམས་ཀྱི་ཆེད་དུ་དམིགས་ནས་སྒྲུང་ཐུང་ཕྱོགས་བསྒྲིགས་བྱས་པ་ཞིག་ཀྱང་ཡིན། བསམ་གཞིག་གི་འཁྲུལ་སྣང་། ཞེས་པ་ནི་སོ་སོའི་སེམས་ནང་དུ་གང་ཞིག་དྲན་པ་རྣམས་དཔྱད་གཏམ་གྱི་ཚུལ་དུ་བྲིས་ཁུལ་བྱས་པ་ཞིག་ཀྱང་ཡིན། ལྷག་པར་རང་རེའི་བློ་གསར་ན་གཞོན་རྣམས་བོད་ཀྱི་སྐད་ཡིག་ཐོག་ལ་ཕྲན་བུ་ཞིག་ཕན་ཐོགས་ཡོང་ན་བསམ་ནས་འགྲེམས་སྤེལ་བྱས་པ་ལས་གཞན་དམིགས་ཡུལ་གཉིས་པ་གང་ཡང་མེད།
མཐའ་དོན་རྩོམ་ཡིག་འདི་དག་ནི་སྐབས་དུས་སུ་སེམས་ངོགས་སུ་གང་ཤར་བ་རྣམས་ཡིག་ཐོག་ཏུ་ཕབ་སྟེ་བྲིས་པ་ཞིག་ཡིན་ན། བརྗོད་བྱ་དང་། རྗོད་བྱེད་མ་འགྲིགས་པ་གང་ཞིག་མཆིས་ཚེ་དེ་དག་ནི་མི་འདོ་མེད་པ་ཞིག་གིས་སྨྲས་པར་ངོས་འཛིན་པ་ལས་དཔར་སྐྲུན་བྱེད་པོ་ལ་འཁང་ར་གཏན་ནས་མ་གནང་རོགས་ཞེས་ཀློག་པ་པོ་རྣམས་ལ་རེ་སྐུལ་ཞུ་རྒྱུ་ཡིན།
ལྷག་དོན་བསམ་གཞིག་གི་འཁྲུལ་སྣང་གི་རྩོམ་ཡིག་ནང་དུ་ལོ་ཚིག་འགའ་ཤས་ནོར་འདུག་པས་རྒྱ་ཆེ་ཀློག་པ་པོ་རྣམས་ལ་བཟོད་གསོལ་ཞུ་རྒྱུས་ལས་མ་འདས། དེ་བཞིན་པར་སྐྲུན་བྱེད་པོ་འབྲེལ་ཡོད་ཡོངས་ལ་བཀའ་དྲིན་ཆེ་ཞུ་རྒྱུ་དང་། དེ་བཞིན་རང་རེའི་ན་གཞོན་བློ་གསལ་བ་རྣམས་བོད་ཀྱི་སྐད་ཡིག་ཐོག་ཐོག་ལ་དོ་སྣང་ཡོང་བ་དང་། རང་རེའི་ན་གཞོན་ཤེས་རིག་གོང་འཕེལ་ཡོང་བའི་སྨོན་འདུན་ཤུགས་དྲགས་དང་བཅས། ཆབ་མདོ་ངག་ཕུན་གྱིས། ཕྱི་ལོ་ ༢༠༢༢ ཟླ་ ༢ ཚེས་ ༩ ཉིན་མོར།