མང་དང་དམངས་ལ་དཔྱད་པའི་གཏམ།

གཞུང་པ་ཚེ་དབང་བསོད་ནམས།

༡    མང་ནི་གྲངས་ཀྱི་གསལ་འབྱེད་ཡིན་པ་ནས་་མང་པོའི་བཀུར་བའི་མང་བཀུར་གྱི་རྒྱལ་པོ་ལྟ་བུ་དང་།

༢    དམངས་ནི་གྲལ་རིམ་གྱི་གསལ་འབྱེད་ཡིན་པ་ནས་སྔོན་སངས་རྒྱས་ཞལ་བཞུགས་པའི་སྐབས་རྒྱ་གར་ནང་རིགས་བཞི་ཡོད་པ།

༡   རྒྱལ་རིགས།   ༢   རྗེ་རིགས།    ༣   བྲམ་ཟེའི་རིགས། 

༤  དམངས་རིགས་བཅས་རིགས་བཞི་ཡོད་པ་ནས་དམངས་རིགས་ནི་རིགས་བཞིའི་ནང་ནས་མཐའ་མ་དེ་ཡིན་པ་དང་།   ང་ཚོའི་ཁ་རྒྱུན་ལའང།   དམངས་ཙམ་དང་དམངས་ཆང།  དམངས་གཞས་དང་དམངས་བྲོ་ལྟབུ་དང་།

༣    གྲངས་མང་འདུས་པའི་སྟོབས་ཤུགས་འོག་གྲངས་ཉུང་ལ་ཕམ་ཉེས་ཕོག་བཞིན་པ་ནི་དེང་སྐབས་འཛམ་གླིང་གི་ལུང་པ་མང་པོའི་ནང་ང་ཚོའི་མཐོང་ཆོས་སུ་ཡོད་པ་ནས་གསལ་པོ་ཤེས་ཐུབ་པ་དང་།

༤     མི་མང་བའི་བསམ་ཚུལ་དང་།   མངོན་འདོད།   ལངས་ཕྱོགས་ཀྱི་རྗེས་སུ་མི་ཉུང་བ་འགྲོ་བའི་ཆབ་སྲིད་ལམ་ལུགས་ལ་མང་གཙོ་ (  Democracy  ) ཟེར་བ་དང་།

༥     མི་ཉུང་བའི་ཁ་ཤུགས་དང་།   དཔུང་ཤུག་དང་།  དབང་ཤུགས།   རྒྱུ་ཤུགས།    གནོན་ཤུགས་སོགས་ཀྱིས་འོག་མི་མང་བ་འགྲོ་བའི་ཆབ་སྲིད་ཀྱི་ལམ་ལུགས་ལ་གྲལ་རིམ་དམངས་གཙོ་

(  Proletarian  ) ཟེར་བ་དང་།

༦    ཨིན་ཇིའི་ཚིག   Democracy  འདི་བོད་སྐད་ནང།   མི་མང་གི་དབང་ཆ་ལ་གོ་དགོས་པ་དང་།   དབང་ཆ་ཆ་ཚང་མི་མང་གི་ལག་ཏུ་ཡོད་པ་ནས་མི་མང་ནི་མང་གཙོའི་ཀ་བ་ངོ་མ་དེ་ཡིན་པ།  (  Pillar of Democracy  )

༧    ཨིན་ཇིའི་ཚིག  Proletarian   འདི་བོད་སྐད་ནང།   གྲལ་རིམ་ལ་གོ་དགོས་པ་དང་།   དབང་ཆ་ཆ་ཚང་གྲལ་རིམ་གྱི་ལག་ཏུ་ཡོད་པ་དང་།

༨      མང་གཙོ་ཁྲིམས་ཀྱི་དབང་བསྒྱུར།   Democracy is ruled by Law.

༩    དམངས་གཙོ་གྲལ་རིམ་གྱི་དབང་བསྒྱུར།  Proletarian  is ruled by Class.

༡༠    འཛམ་གླིང་འདིར་མི་གི་འགྲོ་བ་འཕེལ་བའི་བརྒྱུད་རིམ་ལ་ཕྱི་མིག་བལྟ་སྐབས་ང་ཚོའི་བློ་ལ་འཆར་ཐུབ་པ་དང་།  ཤེས་ཐུབ་པ་དང་།  རྟོགས་ཐུབ་པ་ནི་དུས་སྔ་མོ་གདོད་མའི་སྤྱི་ཚོགས་ནས་རིམ་བཞིན་ཡར་རྒྱས་ཀྱི་ཕྱོགས་སུ་ཁ་ཕྱོགས་ནས་མི་མང་གི་འཚོ་བ་ལ་འགན་འཁུར་ཐུབ་པའི་རྒྱལ་པོ་དང་།  བློན་པོ།    དཔོན་པོ།   དམག་དཔོན་སོགས་མིང་ཚིག་དང་།  གོ་གནས་འདྲ་མིན་བེད་དཔྱད་ནས་སྤྱི་ཚོགས་ཀྱི་ཆབ་སྲིད་ལ་འགན་སྲུང་བྱས་པའི་ཆབ་སྲིད་ཀྱི་ལོ་རྒྱུས་མང་པོ་འཛམ་གླིང་གི་ཤར་ནུབ་ལུང་པ་མང་པོའི་རྒྱལ་རབས་དང་ལོ་རྒྱུས་ནང་མཐོང་རྒྱུ་ཡོད་པ་བཞིན་ང་ཚོ་བོད་ཡུལ་འདི་ཡང་འཛམ་གླིང་གི་ལུང་པ་གཞན་ལྟར་རྒྱལ་པོའི་དུས་རབས་ནས་དཔོན་པོའི་དུས་རབས་དང་།   དཔོན་པོའི་དུས་རབས་ནས་ཆོས་ལུགས་མི་སྣའི་སྲིད་དབང་འཐབ་རྩོད་འོག་བོད་ཀྱི་ཆབ་སྲིད་འཕེལ་རིམ་ལ་བཀག་རྡོ་མང་པོ་བརྒྱུད་ནས་མཐར་ཕྱིའི་རྒྱལ་ཁབ་སོག་པོའི་དཔུང་རོགས་འོག་ནས་༸གོང་ས་ལྔ་པ་ཆེན་པོའི་དགའ་ལྡན་ཕོ་བྲང་ཕྱོགས་ལས་རྣམ་པར་རྒྱལ་བའི་གཞུང་བཙུགས་ནས་སྤྱི་ལོ་   ༡༦༤༢   ནས་སྤྱི་ལོ་ ༡༩༦༠ བར་མི་ལོ་ ༣༡༨  རིང་དགའ་ལྡན་ཕོ་བྲང་ནས་གཞུང་སྲིད་སྐྱངས་པ་འདི་ཡང་མང་གཙོ་དང་།    དམངས་གཙོ།  གང་གི་ལམ་ལུགས་སུ་མ་གཏོགས་པ་བླ་སློབ་ཆོས་ཡོན་གྱིས་ཤུགས་རྐྱེན་འོག་མི་མང་གི་འཚོ་བ་ལ་འགན་སྲུང་གནང་པའི་ཆོས་སྲིད་ཟུང་འབྲེལ་གྱི་སྲིད་གཞུང་ལ་ངོས་འཛིན་བྱེད་ཆོག་པ་དང་།

༡༡    ད་ལྟ་ང་ཚོའི་ལག་ལྟར་བྱེད་བཞིན་པའི་བཙན་བྱོལ་བོད་མིའི་མང་གཙོ་འདི་བཅའ་ཁྲིམས་ཀྱི་ལམ་སྟོན་འོག་མི་མང་གི་འཚོ་བ་ལ་འགན་སྲུང་དགོས་པའི་མང་གཙོ་ཁྲིམས་ཀྱི་དབང་བསྒྱུར་ཟེར་བ་དེ་ཡིན་པ་དང་།  Rule of Law.  མང་གཙོ་ཡང་དག་པ་ཁྲིམས་ཀྱི་དབང་བསྒྱུར་འོག་མི་མང་འཚོ་ཐུབ་པ་ལ་མི་མང་གི་འགོ་འཁྲིད་ལ་ཁྱད་དུ་འཕགས་པའི་རྣམ་སྤྱོད་དང་།   ལྷག་བསམ།   དྲང་བདེན།  བཟོད་སྲན་དང་།   སྤྱི་ཚོགས་འཆམ་མཐུན་ལ་ཁོག་ཡངས་ཀྱིས་འགན་འཁུར་ཐུབ་པའི་མི་སྣ་མི་མང་གི་འགོ་འཁྲིད་ལ་སླེབས་དགོས་པ་དེ་མི་མང་རང་གི་ལས་འགན་ཡིན་པ་དང་།   གལ་སྲིད་གོང་གི་ཆ་རྐྱེན་ཚང་བའི་མི་སྣ་མི་མང་གི་འགོ་འཁྲིད་ལ་མི་མང་ནས་བསྐོ་མ་ཐུབ་ཚེ་ཕྱོགས་་གཏོགས་དང་།   འགོ་འདྲེན།   སྐབས་ཚོལ།  ཤོག་སྒྲིལ་བརྒྱུད་ནས་མང་གཙོ་དམངས་གཙོ་ལ་ཁ་མི་ཕྱོགས་པའི་ངེས་པ་མེད་པ་དང་།

༡༢     དུས་ཀྱི་འགྱུར་བ་དང་།  སྤྱི་ཚོགས་ཀྱི་འཕེལ་རིམ།  རྒྱལ་སྤྱིའི་གནས་བབས་སོགས་ལ་འགན་འཁུར་ནས་མང་གཙོ།   ( Democracy  )  དང་།   དམངས་གཙོ།  (  Proletarian ) དེ་གཉིས་ནམ་ཡང་ནོར་མི་ཉན་པ་ནི་བཙན་བྱོལ་བོད་མིའི་བཅའ་ཁྲིམས་ནང་མང་གཙོ་ལས་དམངས་གཙོ་ཟེར་བའི་ད་སྔོན་འཇུག་དང་ས་ཡང་འཇུག་ཡོད་པའི་ ( དམངས་གཙོ་ ) ཟེར་བའི་ཚིག་གཅིག་མཇལ་རྒྱུ་མེད་པ་ནས་མང་དང་དམངས་ཀྱི་གོ་དོན་གསལ་པོ་ཤེས་ཐུབ་པ་བཅས་མང་གཙོ་དང་དམངས་གཙོ་ལ་དཔྱད་པའི་གཏམ་འདི་བཞིན་བཅའ་ཁྲིམས་དོན་ཚན་བཅུ་གསུམ་ནང་གསལ་བའི་བོད་ཀྱི་ཡུལ་མིའི་ལས་འགན་སྒྲུབ་ནས་གང་ཟག་སྒེར་གྱི་བསམ་ཚུལ་གླེང་པ་འདིའི་བརྒྱུད་ནས་  (  མང་གཙོ་  )  དང་  (  དམངས་གཙོ་  ) གསལ་པོ་ངོ་འཕྲོད་ཐུབ་པའི་ཡིད་ཆེས་དང་བཅས་སྤྱི་ལོ་  ༢༠༢༡ / ༩ / ༢༣ ཉིན་རང་ཁྱིམ་དུ་ཟིན་བྲིས་སུ་བཏབ།