དགེ་བཤེས་གྲགས་པ་དོན་ལྡན།
འབུམ་རམས་པ་རིག་འཛིན་ལྷུན་གྲུབ་ལགས་ནི་སྐབས་བཅུ་བདུན་པའི་དབུས་གཙང་དམ་པ་ཆོས་ཀྱི་ཆོལ་ཁའི་སྤྱི་འཐུས་ཀྱི་དངོས་གཞིའི་འོས་མིར་འོས་གྲངས་ཚད་མཐོ་པོས་ཚུད་པའི་གནའ་དེང་ཤེས་ཡོན་ཟུང་ལྡན་གྱི་འབུམ་རམས་པ་གཅིག་པོ་དེ་ཡིན་ལ། ཁོང་ནི་ཤེས་སྤྱོད་གང་ལ་གཞིགས་ཀྱང་ད་རེས་དབུས་གཙང་དམ་པ་ཆོས་ཀྱི་ཆོལ་ཁའི་སྤྱི་འཐུས་ཀྱི་འོས་ཆོས་ཡོངས་སུ་ཚང་པའི་གཞོན་སྐྱེས་ཤེས་ལྡན་པ་ཞིག་ཡིན་པས་ད་རེས་ཕྲན་གྱིས་ཁོང་སྤྱི་འཐུས་སུ་འོས་པའི་རྒྱུ་མཚན་དྲུག་གཤམ་དུ་འགོད་རྒྱུ་ཡིན།
༡༽ཁོང་ནི་གནའ་དེང་གི་ཤེས་ཡོན་གྱིས་ཕྱུག་པས་ད་བར་ཆེད་རྩོམ་དང་འགྱུར་རྩོམ་སོགས་མི་ཉུང་བ་ཞིག་བཙན་བྱོལ་སྤྱི་ཚོགས་ཀྱི་དུས་དེབ་དང་ཚགས་ཤོག་ཁག་ལ་སྤེལ་ཡོད་ལ།<<བདེན་པ་དང་འཚེ་བ་མེད་པའི་སྦྱོར་བ་ཕྱག་བཞེས>>ཞེས་པའི་༧རྒྱལ་བའི་མཛད་པ་དང་འབྲེལ་བའི་དཔེ་དེབ་གྲགས་ཅན་ཞིག་ཀྱང་དབྱིན་ཡིག་ནས་བོད་སྒྱུར་གནང་ཡོད་པས་ཁོང་ནི་རྩོམ་པ་པོ་ཞིག་ཡིན་ལ་ལོ་ཙཱ་བ་ཞིག་ཀྱང་ཡིན།ཁོང་གིསའདས་པའི་མི་ལོ་བཅོ་ལྔ་ལྷག་ནང་དོན་རིག་པ་གཙོ་འགྱུར་གྱི་སྲོལ་རྒྱུན་རིག་གནས་ཆེ་ཁག་ལ་སློབ་སྦྱོང་མཐར་ཕྱིན་གནང་ཡོད་ལ། མ་ཟད་ཁོང་ནི་སྲིད་དོན་ཚན་རིག་གི་སློབ་མཐར་ཡང་ཕྱིན་པས་ཆབ་
སྲིད་ཀྱི་འགོ་ཁྲིད་བྱེད་རྒྱུའི་ཤེས་འཇོན་ནུས་གསུམ་འཛོམས་པའི་གཞོན་སྐྱེས་ཞིག་ཡིན་པར་བརྟེན་ད་རེས་བོད་མི་མང་སྤྱི་འཐུས་ནང་ཁོང་ལྟ་བུ་ངེས་པར་དུ་ཕེབས་དགོས་འདུག།
༢༽ཁོང་ནི་བོད་པའི་ཆབ་སྲིད་ཐོག་ཡུན་རིང་ནས་དོ་སྣང་ཡོད་ཁར་ད་བར་རྩ་དོན་ལ་སྨན་པའི་ལས་འགུལ་སྣ་མང་སྤེལ་མྱོང་བས་ལས་འགུལ་བ་ཞིག་ཡིན་ལ།ཆབ་སྲིད་ལྟ་གྲུབ་དབུ་མ་དང་རང་བཙན་མེ་སྤུ་བཞིན་དུ་མི་འཛིན་པར་ལོ་རྒྱུས་ཀྱི་བདེན་དཔང་དང་བཅས་བོད་རང་བཙན་རྩོད་དགོས་པ་དང་།ཡང་བོད་མི་རིགས་དང་རིག་གཞུང་བསྟན་སྲིད་བཅས་འཕྲལ་མར་སྐྱོབ་སླད་དབུ་མའི་ལམ་གྱི་སྲིད་བྱུས་ལ་ཁ་ཞེད་གཉིས་མེད་ཀྱིས་ཡིད་ཆེས་བློ་འགེལ་གྱིས་ཆར་པ་ཆུ་གྲོགས་དང་ཉི་མ་མེ་གྲོགས་སུ་འགྱུར་ཐབས་ཡོད་དགུ་བཏོན་ཏེ་ཆོལ་གསུམ་ཆོས་བརྒྱུད་དང་བཅས་པ་དམ་ཚིག་གོང་བུ་ཆིག་སྒྲིལ་ཡོང་བར་འབད་སྤུང་རང་ནུས་གང་ལྕོགས་གནང་དང་གནང་མུས་ལགས་པས་ཁོང་སྤྱི་འཐུས་ནང་ངེས་པར་དུ་སླེབས་དགོས་འདུག
༣༽ཁོང་ནི་༧རྒྱལ་བའི་བཀའ་དགོངས་ཐོག་ཁ་ཞེ་གཉིས་མེད་ཀྱིས་ཤར་སྐྱོད་བྱེད་མཁན་ཞིག་ཡིན་ལ།ལྷག་དོན་༧རྒྱལ་བའི་བཀའ་དང་དགོངས་པ་ལོག་འགྲེལ་བྱེད་མཁན་སུ་ཡིན་ཡང་དེ་དག་ལ་གདོང་ལེན་མཐའ་གཅིག་ཏུ་གནང་རྒྱུའི་ཆོད་སེམས་རི་ལྟར་བརྟན་པ་མ་ཟད་དེ་ལྟར་གནང་ཐུབ་པའི་བློ་སྟོབས་དང་ཤེས་ཡོན་ལྡབ་གཤོག་གཉིས་ལྡན་ཞིག་ཀྱང་ཡིན་པས་དབུས་གཙང་ཆོལ་ཁའི་སྤྱི་འཐུས་ནང་ཁོང་ད་རེས་མེད་ཐབས་མེད་པ་ཞིག་ཡིན།
༤༽ཁོང་གིས་༸གོང་ས་མཆོག་གིས་གནང་བའི་བླང་དོར་ལམ་སྟོན་དང་བོད་པའི་སྤྱི་ཚོགས་གནས་བབ་དབར་ལ་སྟོང་ཆ་ཆེན་པོ་ལུས་ཡོད་པ་གཟིགས་ཤིང་།ལྷག་པ་མི་རབས་གསར་པ་ཚོས་ད་ལྟའི་ཆར་སྤྱི་ཚོགས་ཀྱི་འགན་འཁུར་བྱེད་ཕྱོགས་ལ་གནའ་དེང་ཟུང་འབྲེལ་གྱི་ལེགས་ཆ་ཤེས་པར་བྱེད་དུ་བཅུག་ཏེ་བོད་པའི་ཐུན་མིན་གྱི་རིག་གཞུང་སྔར་ལས་ལྷག་པའི་སྒོ་ནས་འཛིན་སྐྱོང་སྤེལ་གསུམ་དང་སྦྲགས་དེང་རབས་གཞོན་སྐྱེས་ཚོར་དེང་དུས་དང་འཚམ་པའི་སྒོ་ནས་རང་གི་རིག་གཞུང་ལ་སྤྲོ་བ་དང་བཅས་བའི་སྒོ་ནས་འགན་འཁུར་རྒྱུར་གོ་རྟོགས་སྤེལ་རྒྱུའི་ལས་འཆར་ཚད་ལྡན་ཡོད་པའི་སྤྱི་འཐུས་འོས་མི་ཞིག་ཡིན་པའི་ཆ་ནས་ཁོང་སྤྱི་འཐུས་སུ་འདེམས་རོགས།
༥༽བཙན་བྱོལ་སྤྱི་ཚོགས་ནང་དབུས་གཙང་ཆོལ་ཁ་ནི་མི་འབོར་མང་ཤོས་ཡིན་པ་དང་སྔོན་བྱོན་མེས་པོ་གོང་མ་ཚོས་དཀའ་སྡུག་བཟོད་བསྲན་གྱིས་རྒྱལ་བའི་བཀའ་དགོངས་ལྷག་བསམ་རྣམ་དག་བསྒྲུབས་སྟེ་རྒྱལ་བ་དགྱེས་པའི་མཆོད་པར་ཕུལ་ཡོད་པར་ངོས་འཛིན་གཙང་མ་ཞུ་མཁན་ཞིག་ཡིན་ལ།ད་ལྟའི་སྐབས་ལའང་རྒྱལ་གཅེས་མི་མང་ཚོས་མི་འབོར་ལ་གཞིགས་པའི་འགན་ཆེ་བ་ཞིག་མེས་པོ་གོང་མ་ཚོ་ནང་བཞིན་འཁུར་དགོས་པ་དང།འགན་འཁུར་དེ་དང་འབྲེལ་ནས་བཙན་བྱོལ་སྤྱི་ཚོགས་ཀྱི་ཡོ་ལངས་ཙམ་མ་ཡིན་པ་༸གོང་ས་མཆོག་ལ་མཛད་དཀའ་མི་ཡོང་བ་དང་སྤྱི་ཚོགས་བབ་ལྷིང་བརྟན་གསུམ་ཡོང་ཐབས་སུ་གང་དགའ་ཅི་དྲག་སྔར་ལས་ལྷག་པར་འབད་བརྩོན་བྱེད་དགོས་པའི་དུས་ཚོད་གལ་ཆེ་ཞིག་ལ་ངོས་འཛིན་གྱིས།གནད་དོན་དེ་ཡི་ཐོག་ཤུགས་གནོན་རྒྱག་རྒྱུའི་བསམ་བློ་དང་ཐབས་ཇུས་གྲབ་བསོག་བྱེད་མཁན་ཡིན་པའི་ཆ་ནས་ཁོང་ལ་འོས་ངེས་པར་དུ་འཕེན་རོགས།
༦༽ཁོང་ནི་ཁ་ཙམ་ཚིག་ཙམ་མིན་པར་བོད་པའི་འཐབ་རྩོད་ཀྱི་བརྒྱུད་རིམ་ནང་༸གོང་ས་མཆོག་ནི་འཐབ་རྩོད་ཀྱི་བླ་སྲོག་ལྟ་བུར་ཡིན་པ་ངོས་འཛིན་གཙང་མ་གནང་མཁན་ཞིག་ཡིན་ལ།༧རྒྱལ་བའི་བཀའ་ལ་བརྩི་བཀུར་དང་བཀའ་གང་ཐུབ་སྒྲུབ་རྒྱུ་དེ་བོད་པའི་འཐབ་རྩོད་ནང་ནས་མཆོག་ཏུ་འགྱུར་བ་ཞིག་དང་དགྲ་བོ་རྒྱ་དམར་ལ་རྒོལ་ལན་ཆེ་ཤོས་དང་།བོད་མི་ནང་ཁུལ་མཐུན་ལམ་གྱི་ཟམ་པར་ངོས་འཛིན་གྱིས་མི་དམངས་ཚོ་ཡང་ལམ་དེར་ཁྲིད་ཐབས་ལྷོད་མེད་བྱེད་དགོས་པ་མཐོང་མཁན་རེད་ལ་ཁོང་རང་ཉིད་ཀྱང་འབད་ཐབས་བྱེད་མཁན་ཡིན་པའི་ཆ་ནས་ཁོང་སྤྱི་འཐུས་སུ་ངེས་པར་ཕེབས་དགོས་ངེས་ཤིག་ཡིན་པར་སོང་།དབུས་གཙང་རྒྱལ་གཅེས་མི་མང་གིས་ཁོང་ལ་རྒྱབ་སྐྱོར་ཅི་ནས་ཀྱང་གནང་སྐྱོང་ཡོད་པ་ཞུ།། །།