སྐད་ཡིག་གི་ཆུ་ལོག

བོད་ཀྱི་སྐད་ཡིག་དང་དེང་རབས་ཀྱི་འཇིག་རྟེན་གཉིས་བར་ཧ་ལམ་སྐྱེ་བ་སྔ་ཕྱི་དང་འདྲ་བའི་ཁྱད་པར་ཞིག་ཡོད་པ་འདྲ། ད་དུང་ང་མ་ཉལ་གོང་དེར། བོད་གཞུང་གིས་ བོད་ཀྱི་སྐད་ཡིག་རིག་གནས་དང་བཅས་པ་ཆག་འཇིག་ལ་ཐུག་ཡོད་ཅེས་གསུངས། ཡང་ཡང་གསུངས། ལོ་ནས་ལོ་བསྟུད་དེ་གསུངས། སུམ་ཅུའི་དུས་དྲན་རེ་རེ་ནས་དེ་ཐོས། བཀའ་སློབ་གསུང་ཆོས་རེ་རེ་ནས་དེ་ཐོས། ངའི་སེམས་ལ་དེའི་བག་ཆགས་མཐུག་པོ་ཞིག་བཞག་ཡོད། ང་དེ་ལྟར་ཉལ། མ་ཉལ་གོང་དེར་བོད་ཀྱི་སྐད་ཡིག་ལ་སེམས་ཁྲལ་བྱེད་བཞིན་ཉལ། སྐད་ཡིག་དང་འབྲེལ་བའི་རྩོམ་ཡིག་ཅིག་འབྲི་ཞོར་ཉལ། སྔས་མགོ་ན་ས་པཎ་གྱི་གསུང་འབུམ་ཡང་ཡོད། དེབ་དམར་པོ་པོད་གསུམ་ཅན་པ་དེ་ཡོད། ང་གཉིད་མཐུག་པོ་ཞིག་ཁུག

སང་ཞོགས་ཡར་ལངས་སྐབས་ ཆུ་ཚོད་དགུ་པ་ཏག་ཏག་རེད། ཁྲུས་ཁང་དུ་འཛུལ། ང་ཡང་རང་ཉིད་ལ་ཡིད་མི་ཆེས་པ་ཞིག་ཏུ་གྱུར། ངའི་མིག་འདི། འདི་ངོ་མ་ཡིན་ནམ། ང་ལ་སྐྲའི་ལན་བུ་རིང་པོ་ཞིག་སྐྱེས་འདུག་ལ། དེ་དག་ནི་དཀར་པོ་དཀར་རྐྱང་རེད། ངའི་གདོང་ལ་སྙེར་མས་གང་འདུག ང་རང་ལ་ཡིད་མི་ཆེས་པར་གྱུར། ལོ་ཐོ་ལ་བལྟས། ལོ་འདི་ ༢༠༡༠ ལོ་རེད། ཨོ་ཙི། ང་ཉལ་ནས་ད་བར་མི་ལོ་སུམ་ཅུ་ཏག་ཏག་འགོར་འདུག ངའི་གཉིད་མཐུག་པོ་དེ་མི་ལོ་སུམ་ཅུའི་ཡུན་ལ་བསྡད་འདུག ད་ངའི་སྐད་ཡིག་དེ་ཤི་ཟིན་ཡོད། ཏན་ཏན་ཤི་ཟིན་ཡོད།

ང་ཁྲུས་ཁང་ནས་ཐོན་ཏེ་ཅོག་ཙེར་བསྡད། གློག་ཀླད་དེ་ཁ་ཕྱེས། ཨོ་ད་ཡིན་ན་འདུག འདྲ་མི་འདྲ་བཅོ་བརྒྱད་འདུག དྲ་རྒྱ་ཟེར་བ་ཞིག་སླེབས་འདུག དེའི་ནང་ན་ད་ཡོད་ཚད་ཚང་མ་འདུག ལམ་རིམ་ཆེན་མོ་འདུག བཀའ་འགྱུར་བསྟན་འགྱུར་འདུག གསུང་འབུམ་མང་པོ་འདུག ད་ཡིན་ན་ཆུ་ལོག་རྒྱུགས་པ་ནང་བཞིན་འདུག ནང་དོན་ལ་མི་དགའ་ན་ཡང་སྐད་ཡིག་ལ་དགའ་སོང་། སྐད་ཡིག་གི་ཆུ་ལོག་རྒྱུགས་འདུག ཆུ་ལོག་དེ་མདོ་དབུས་ཁམས་གསུམ་ཡོད་ཚད་ལ་རྒྱུགས་འདུག དགའ་བ་ལ། ད་ཡིན་ན་ཉན་རྒྱུ་འདུག ད་ཡིན་ན་ཀློག་རྒྱུ་འདུག ད་ཡིན་ན་མིག་སྟོང་གིས་བཀླགས་ཀྱང་མི་ཚར་བ་ཞིག་འདུག ད་ཡིན་ན། འདུག གཟིགས་དང་། འདི་ཚོ་ལ་གཟིགས་དང་།