གཡུང་དྲུང་ཚེ་བརྟན།
དེ་རིང་། གཟའ་ཉི་མ་ལ། “ལ་རྩེ་དཔེ་མཛོད་ཁང་གིས་“འགྱུར་བརྒྱ་རྩ་བརྒྱད་”ཀྱི་ལས་གཞི་དང་། ཡིག་བསྒྱུར་སྐོར་ལ་“འགྱུར་བརྒྱ་རྩ་བརྒྱད་”ཀྱི་ལས་གཞི་གོ་སྒྲིག་བྱེད་མཁན་གྲས་དགེ་འདུན་རབ་གསལ་ལགས་དང་ ། དེ་བཞིན་ལོ་ཙྭ་བ་པད་མ་ཚེ་དབང་ཤཱསྟྲི་ལགས་དང་མཉམ་དུ་ཨེ་ཤེ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གྱི་འགན་འཛིན་གཞོན་པ་དཔལ་ལྡན་རྒྱལ་ལགས་ཀྱིས་གླེང་མོལ་ཞུས་པར་གསན་གཟིགས་གནང་རོགས།།” ཞེས་པའི་གསལ་བཤད་ཅན་གྱི་བརྙན་ཞིག་དྲ་བྱང་ https://fb.watch/4a8ZdPWgda འདི་ན་འདུག་པར་བལྟ་ཉན་བྱས།
དེའི་ནང་། ཡིག་སྒྱུར་བ་པད་མ་ཚེ་དབང་ཤཱསྟྲི་ལགས་ཀྱི་གསུང་སྟངས་གཅིག་ལ་དོ་སྣང་བྱེད་དགོས་པ་ཞིག་བྱུང་། མ་གཞི་ཡིག་སྒྱུར་བ་རྒན་པ་ཞིག་གི་ལྟ་ཚུལ་གསུང་གི་ཡོད་པ་ཡིན་ཙ་ན། བདེན་པ་གང་འཚམ་ཡོད་པ་རེད་དྲན། ཡང་ན། ཁོང་གིས་དེང་སང་གི་ཡིག་སྒྱུར་ལ་ལྟ་སྟངས་འདི་འདྲ་རེད་ཟེར་དགོས་མིན་འགྲོ གཤམ་གྱི་འདི་ནི་ཁོང་གི་གསུང་དུམ་ཉན་ནས་ཡི་གེ་བཀོད་པ་དེ་ཡིན། གསུང་དངོས་དང་མཐུན་མིན་ལ་དོགས་པ་ཡོད་ན། བརྙན་ངོ་མའི་དྲ་བྱང་བརྒྱད་ནས་གསན་བསྡུར་གནང་རོགས།
“འགྱུར་གང་འདྲ་ཞིག་ཡིན་ནའང་སྐད་ཡིག་གཉིས་པ་དེའི་ནང་ལ་སླེབས་ཚར་བའི་རྗེས་ལ། སྐད་ཡིག་དང་པོའི་ནང་ལ་ཡོད་པའི་བྲོ་བ་དེའི་བརྒྱ་ཆ་ལྔ་བཅུ་བརླག་ཚར་བ་རེད། ཡང་སྒྱུར་བ་པོ་དེ་སྒྱུར་རྩལ་ཞེ་པོ་ཡག་པོ་ཡོད་མཁན་དང་། དཔེར་ན། སྐད་ཡིག་ཨ་མ་དེ་དབྱིན་ཇིའི་ནང་བྲིས་ཡོད་པ་དང་། དེ་བོད་ཡིག་ནང་ལ་སྒྱུར་མཁན་དེ་དབྱིན་ཇི་ཞིག་ཡིན་ན། སྐད་ཡིག་དང་པོའི་ནང་ལ་ཡོད་པའི་བྲོ་བ་དང་། དེ་ག་ནང་བཞིན་ཉམས་མྱོང་དང་། འགྲོས་དང་། སྦྱོར་བ་དེ་ཚོ་གང་ལ་གང་འཚམ་ཞིག་ཏན་ཏན་སླེབས་ཀི་རེད་བསམ་གི་འདུག དེ་འདྲ་མ་ཡིན་པར། སྐད་ཡིག་དང་པོ་དེ་དབྱིན་ཇིའི་ནང་ལ་བྲིས། སྒྱུར་མཁན་དེ་བོད་པ་ཞིག་ཡིན་ན། རིག་གཞུང་དེ་རྦད་དེ་མ་འདྲ་བ་ཞིག་ཡིན་དུས། དེ་ནས་སྐད་ཡིག་གཉིས་པ་ལ་བསྒྱུར་ཚར་དུས་ཕལ་ཆེར་བྲོ་བ་བརྒྱ་ཆ་ལྔ་བཅུ་བརླག་ཚར་བ་རེད། དེ་ནས་ད་དུང་སྐད་ཡིག་གཞན་པ་ལ་བསྒྱུར་ན། དེ་ལས་བྲོ་བ་བརླག་གི་རེད།”
ཁོང་གིས་གསུང་བ་ནི་གོང་གི་འདི་རེད། དེང་སང་གི་འགྱུར་ཡིག་ཡག་པོ་མི་འདུག འགྱུར་ཡག་པོ་དགོས་ཀྱི་འདུག་ཅེས་སྐད་རྒྱག་མཁན་མང་། ཡིན་ནའང་། འགྱུར་ཡག་པོ་མི་ཡོང་བའི་གནས་ལུགས་རྒྱུ་མཚན་འདི་ཤེས་མཁན་ཧ་ཅང་ཉུང་། ཡིག་སྒྱུར་བ་པད་མ་ཚེ་དབང་ཤཱསྟྲི་ལགས་ནི་ལ་རྩེའི་འགྱུར་བརྒྱ་རྩ་བརྒྱད་ཀྱི་ཡིག་སྒྱུར་བའི་ནང་གི་རྒན་ཤོས་དང་ཉམས་མྱོང་ཆེ་ཤོས་དེ་ཡིན་ཙ་ན། ང་ཚོས་ཁོང་གི་གསུང་དུམ་འདིར་གནས་ལུགས་ངེས་ཅན་ཡོད་པ་ཤེས་དགོས།
ལྷག་པར་དུ། “སྐད་ཡིག་དང་པོ་དེ་དབྱིན་ཇིའི་ནང་ལ་བྲིས། སྒྱུར་མཁན་དེ་བོད་པ་ཞིག་ཡིན་ན། རིག་གཞུང་དེ་རྦད་དེ་མ་འདྲ་བ་ཞིག་ཡིན་དུས། དེ་ནས་སྐད་ཡིག་གཉིས་པ་ལ་བསྒྱུར་ཚར་དུས་ཕལ་ཆེར་བྲོ་བ་བརྒྱ་ཆ་ལྔ་བཅུ་བརླག་ཚར་བ་རེད།” ཅེས་པའི་གནས་ལུགས་འདི་ཤེས་དགོས། འདི་ཤེས་སོང་བ་ཡིན་ན། ད་གཟོད་ང་ཚོར་འགྱུར་ཡག་པོ་དེ་འདྲའི་རེ་བ་རྒྱག་ས་ལྷག་མེད་པ་དེ་ཤེས་འགྲོ །དེ་ནས་ཡིག་སྒྱུར་བ་ཚོར་སྡིག་དམོད་བྱེད་པ་དང་། འགྱུར་ཡིག་དང་འགྱུར་དེབ་ལ་འཕྱ་ལད་རྒྱག་པའང་རང་བཞིན་གྱིས་འགག་འགྲོ་བ་ཡིན།
ང་ཚོས་ག་དུས་ཡིན་ནའང་། དེང་སང་གི་འགྱུར་ཡིག་ཀློག་དུས། མ་ཡིག་གི་བྲོ་བ་བརྒྱ་ཆ་ལྔ་བཅུ་ཉམས་ཚར་བ་ཞིག་ཀློག་གི་ཡོད་པའི་གནས་སྟངས་འདི་ཤེས་དགོས། ག་རེད་ཟེར་ན། “འགྱུར་གང་འདྲ་ཞིག་ཡིན་ནའང་སྐད་ཡིག་གཉིས་པ་དེའི་ནང་ལ་སླེབས་ཚར་བའི་རྗེས་ལ། སྐད་ཡིག་དང་པོའི་ནང་ལ་ཡོད་པའི་བྲོ་བ་དེའི་བརྒྱ་ཆ་ལྔ་བཅུ་བརླག་ཚར་བ་རེད།” ཅེས་པའི་སྡོམ་ཚིག་འདི་ཡིད་ལ་དྲན་པ་བྱེད་ཐུབ་ན། ཡིག་སྒྱུར་བ་ཚོའི་འགྱུར་ཡིག་ལ་འདོད་པ་མ་ཁེངས་པའི་རྣམ་འགྱུར་སྟོན་པའི་བསམ་བློ་དེ་འགག་འགྲོ དེ་འགག་སོང་ན། དགོས་མེད་ཀྱི་རྩོིད་གླེང་རིགས་བྱེད་པར་རིན་ཐང་མེད་པའང་ཤེས་འགྲོ ། དེ་སེམས་པ་ངེས་པ་བྱེད་དགོས།
སྤྱིར། སྒྲ་སྒྱུར་གྱི་སྐབས་ན། སྐད་ཡིག་གཉིས་ཀྱི་རང་བཞིན་མི་མཚུངས་པ་ལས་བྱུང་བའི་དཀའ་སེལ་ཕྱིར་བོད་འདིར་སྒྲ་སྒྱུར་གཞུང་ལུགས་སྒྲ་སྦྱོར་བམ་གཉིས་བྱུང་བ་ཡིན། དེང་ནི་དེའི་བསྟན་དོན་ཉམས་སུ་བསྟར་བ་ཉིན་སྐར་ཙམ་གྱི་སྐབས་ཡིན། དེ་ཡང་། གང་ཞིག་ལོ་ཙཱ་བའི་ཟླ་ལ་པཎྜིཏ་མེད་པ་དང་། པཎྜིཏའི་ཟླ་ལ་ལོ་ཙཱ་བ་མེད་པར་བསྒྱུར་མི་ཆོག་པའི་བཀས་བཅད་ཀྱི་སྲོལ་ཡང་ནུབ་པར་གྱུར། གང་བསྒྱུར་བ་དེ་དཔྱད་ཞིབ་བརྒྱུད་ནས་དག་པར་བྱེད་པ་དང་དཀར་ཆག་ཏུ་འགོད་པ་སོགས་བརྒྱུད་ནས་འགྲེམས་སྤེལ་གྱི་གནའ་སྲོལ་བཟང་པོ་ཡང་ནུབ། ལྷག་ཏུ་གསར་རྩོམ་ཚིགས་བཅད་སྙན་པོ་ཙམ་རེ་ཡང་མི་འཁྱོངས་པ་འགའ་རེ་ཡང་ཡིག་སྒྱུར་ལ་ཞུགས་པའི་གནས་སྟངས་ལས་བརྒྱ་ཆ་ཕྱེད་ཀྱི་བྲོ་བ་ཅན་གྱི་འགྱུར་ལས་ཐོན་གྱིན་མེད་པ་ཡིན་གདའ།
གནས་ལུགས་འདི་ཤེས་པ་བྱས་ཏེ། ཡིག་སྒྱུར་བ་ཚོར་དངོས་ཤུགས་བརྒྱུད་གསུམ་ནས་སྡིག་རྒྱུ་མཚམས་འཇོག་རོགས། འགྱུར་ཡིག་ལ་འཕྱད་ལད་རྒྱག་པའི་བྱ་སྤྱོད་རིགས་མཚམས་འཇོག་རོིགས། སོ་སོས་གང་ཀློག་གི་ཡོད་པའི་འགྱུར་ཡིག་དེ་ནི་མ་ཡིག་གི་བྲོ་བའི་བརྒྱ་ཆ་ལྔ་བཅུ་ལ་ལོངས་སུ་སྤྱོད་བཞིན་པ་ཡིན་པའི་དྲན་ཤེས་བསྟེན་ནས་ཀློག་དགོས། འདི་ལ་མ་འདོད་པ་བྱེད་དགོས་མ་རེད། འཇོན་ན་སོ་སོས་བརྒྱ་ཆ་བརྒྱའི་བྲོ་བ་ཡོད་པ་རེ་བསྒྱུར་ནས་སྣེ་ཁྲིད་གནང་རོགས།