འཇམ་དབྱངས་ཤེས་རབ།
དུས་ཚོད་གང་འཚམས་འདས་པའི་དེང་དུས་ལ།།
དགའ་སྐྱོ་ཚོར་བ་རེ་མོས་སེམས་པ་བསྣན།།
དེ་ཡིན་བསམ་པའི་ཡིད་ཆེས་བརླགས་པ་ནས།།
དེ་ཐོབ་བསམ་པའི་རེ་བ་བག་ལ་ཡལ།།
འཚོ་བའི་རོལ་སྟངས་མི་གཅིག་མི་བརྒྱུད་ཁྲོད།།
རང་གི་མདུན་ལམ་བཟོ་བའི་སློབ་བུ་ཞིག།
སློབ་གླིང་ནང་དུ་དུས་ཚོད་འདས་ན་ཡང་།།
རང་མཁོ་སྐད་རིགས་རྐང་པ་ཆགས་ཚར་འདུག།
ཆོས་སྲིད་གཉིས་ཀ་རྩ་ནས་དོར་སེམས་ཀྱང་།།
ཉེ་འཁོར་ཆོས་སྲིད་ཟུང་གིས་དབང་ཚར་བས།།
འཆི་འདོད་བསམ་པ་ཡོད་ན་མ་གཏོགས་པར།།
ཟ་བཏུང་ཆེད་དུ་ཐེས་བྱུས་དགོས་ངེས་རེད།།
སྤྱི་ཚོགས་ཁྲ་ཁྲ་ཟིང་ཟིང་དཀྱིལ་དབུས་ན།།
ཡོད་ཚད་དེར་མཁོ་སློབ་གསོས་མགྲིན་པ་འདེགས།།
ངག་ལྐུགས་ང་ནི་བག་མ་གསར་པ་བཞིན།།
ངོ་ཚས་བསླུས་ཞིང་ཤི་བ་མ་ཡིན་ནམ།།
འཇིག་རྟེན་མཐུན་འཇུག་རོལ་བའི་མི་ཚེ་མེད།།
འོན་ཀྱང་ཆོས་ལུགས་ཞིག་གི་གར་སྟབབས་ཁྲབ།།
འདམ་ཁ་ནོར་དང་མ་ནོར་མ་ཤེས་ཀྱང་།།
ང་རང་ཐེ་ཚོམ་འོག་ཏུ་རྒ་བཞིན་ཡོད།།
ང་ཡང་བྱ་ཞིག་ཡིན་ན་འཕུར་ལ་ཁད།།
དུས་ཡིན་བསམ་ན་བརྗེ་བོ་ཆགས་ཉེ་དུས།།
རྐྱེན་ངན་བཟང་ངན་གང་ཡིན་མ་ཤེས་ཀྱང་།།།
དེ་འཕྲད་ཉིན་ནས་སྐྱོན་བརྗོད་ཁས་ལེན་ཡོད།།
འབྱོར་ཚེ་གཉེན་ལ་མཁོ་བའི་མི་ཚེ་དེ།།
རྒུད་ཚེ་གཅིག་པུ་འཁྱམ་དགོས་ལས་དབང་ལ།།
བསམ་ནས་རང་གི་འདོད་པའི་འཚོ་བ་ལ།།
སུ་ཡིས་བཀག་ཀྱང་འགྲོ་རྒྱུ་ཉག་གཅིག་ཡིན།།
དེ་ནས་མུན་པས་འགྲོ་ལམ་བཀག་ན་ཡང་།།
གཉེན་པོ་འཚོལ་ཕྱིར་ཤར་ནུབ་མྱུལ་བ་ལས།།
རང་སྐྱོན་གཞན་ལ་སྤོ་ལ་ནགས་གནས་པའི།།
སྤྲེའུ་བཞིན་མི་གཙང་འཐོར་ལ་ང་མི་དགའ།།
ང་ལ་ཤ་ཚ་ཡོད་པའི་མི་བུ་རྣམས།།
མིག་ནས་འཆི་མ་ལྷུང་བའི་རིན་པ་ལ།།
སྨོན་ལམ་རྣམ་དག་མཆོག་གསུམ་ངོར་བཏབ་པས།།
རྣམ་ཏོག་ན་བུན་བཞིན་དུ་སྐྱེས་དགོས་མེད།།
བྱས་རྗེས་དེ་ཡིན་ལབ་ནས་གྲོགས་སོགས་ལ།།
གསུན་པོ་མི་བཟོ་གཅེར་བུ་མིན་ཙམ་ཆེད།།
གྱོན་ཆས་འགྲིག་ཙམ་གྱོན་ནས་ས་གནས་གཞན།།
ཆས་ནས་སྐྱིད་སྡུག་གསར་ལ་བློ་གཏད་ཙམ།།