བཞག་ལྡོམ་ལྗང་ལོ།
སྲོལ་རྒྱུན་ལྟར་ན་དམངས་ཚོགས་ཀྱི་གསར་འགྱུར་ཡོང་ཁུངས་ནི་རླུང་འཕྲིན་ཁང་ཚད་ལྡན་དང་། གསར་ཤོག་ཚད་ལྡན། བརྙན་འཕྲིན་གསར་ཁང་ཚད་ལྡན་དག་ཡིན་ཡང། དེ་རིང་བརྡ་འཕྲིན་དུས་རབས་འདི་ལ་གྲངས་ལས་འདས་བའི་གསར་འགྱུར་སྣ་ཚོགས་ཤིག་སྐར་ཆ་རེ་ལ་ཆུ་བོའི་རྦ་རླབས་ཅི་བཞིན་མི་བུ་ཚོའི་མིག་ལམ་ལ་འཕྱོ་བཞིན་ཡོད་ལ། འཕྱོ་བཞིན་པའི་གསར་འགྱུར་དེ་རྣམས་ལས་ཁུངས་ལུང་འཁྱོལ་དཀའ་བའི་གསར་འགྱུར་དང་། ཆེད་དུ་སྤེལ་བའི་གསར་འགྱུར་རྫུན་མ། ད་དུང་བརྙན་འཕྲིན་གསར་ཁང་སོགས་ལས་བསམ་ཚུལ་དཔྱད་བརྗོད་པའི་མིང་ཐོག་ནས་རང་གི་འདོད་པའམ་ལྟ་བ་དང་མི་བཐུན་པའི་གསར་འགྱུར་དངོས་སྦ་གསང་བྱེད་པ་བཅས་ལ་བརྟེན་ནས་གྲངས་ལས་འདས་བའི་མི་དམངས་ཚོའི་མགོ་་བོ་རྨོངས་ཀྱི་ཡོད་ལ། མགོ་རྨོངས་བ་དེ་ལ་བརྟེན་ནས་སྤྱི་ཚོགས་སུ་ཉིན་དང་མཚན་བཅས་སུ་ཆག་སྒོ་སྣ་ཚོགས་སློང་གི་ཡོད། རྒྱུ་མཚན་དེ་དག་ལ་བརྟེན་ནས་མི་བུ་ཚོའི་རང་གི་དགའ་ཕྱོགས་དང་། ལྟ་བ་ལ་མཐུན་མིན་མ་ལྟོས་བར་གསར་འགྱུར་གང་ཞིག་ལ་བལྟས་ཀྱང་། རླུང་འཕྲིན་ཅི་ཞིག་ལ་ཉན་ཀྱང་རིག་པ་རྩལ་དུ་བཏོན་ཏེ། སེམས་ཁམས་མཐོ་རུ་བཏེག་དེ་གསར་འགྱུར་དེ་དག་གི་འབྱུང་རྐྱེན་དངོས་དང་རྒྱབ་ལྗོངས་ཀྱི་ལྟ་བ་དངོས་འཚོལ་དགོས། གལ་སྲིད་དེ་དག་མ་བྱས་པར་རང་གི་དགའ་ཕྱོགས་ཡོད་ཚད་གསར་འགྱུར་ཡང་དག་པ་དང་། མི་དགའ་ས་ཡོད་ཚད་གསར་འགྱུར་རྫུན་མ་རུ་རློམ་ན་རང་ཉིད་རང་གིས་ཕོངས་བ་དང་རང་ཡོད་སའི་སྤྱི་ཚོགས་ལ་རྙོག་དྲ་བསླང་བའི་རྒྱུ་ལས་མེད། དེ་ཕྱིར། འུ་ཚོས་རང་གིས་རིག་རྩལ་ལ་བརྟེན་ནས་དེ་དག་གི་བདེན་རྫུན་གང་ཡིན་ངོ་ཤེས་དགོས་ཤིང། དེ་དག་ལ་དབྱེ་ན་བདེན་པ་གཞིར་བཟུང་བ་དང་། རྫུན་ཁོ་ན་ལ་བརྟེན་པ་དང་། བདེན་རྫུན་མཉམ་བསྲེས་བྱས་བ་བཅས་རིགས་གསུམ་ཡོད་པའི། ངས་གཉིས་པ་དང་གསུམ་པའི་སྐོར་ནས་ཅུང་ཙམ་བཤད།
རྫུན་ཁོ་ན་ལ་བརྟེན་པའི་གསར་འགྱུར།
ལོ་ངོ་བཞི་ཙམ་གྱི་ཡར་སྔོན་ལ་ཨ་རི་ན་ཆབ་སྲིད་པ་ཚོས་ང་བཟང་དང་ཁྱོད་ངན། ང་རྒྱལ་དང་ཁྱེད་ཕམ་བཅས་རང་ལ་སྲིད་འཛིན་དང་དེ་མ་ཡིན་པའི་ཆབ་སྲིད་ཀྱི་རྐུབ་བཀྱག་ཐོབ་ཆེད། རང་གི་ལྟ་བ་དང་ལངས་ཕྱོགས་ས་གནས་འདྲ་མིན་ན་གཡས་བསྒྲགས་དང་གཡོན་བསྒྲགས་བྱས་ཀྱིན་ཡོད་ལ། སྐབས་རེ་ཀུན་སྤྱོད་དང་མི་མཐུན་པའི་ཚིག་ངན་ཀྱང་བཤད་རེ་བྱས་ཀྱི་ཡོད། དེ་ལ་བརྟེན་ནས་ཨ་རི་བ་ཚོའོ་སེམས་ཀྱི་ཚོར་བ་མེ་རི་ཅི་བཞིན་ཤུགས་ཀྱིས་འབར་ཀྱི་ཡོད་པས། སྐབས་འཚོལ་བ་ཚོས་མི་མང་གི་སེམས་ཚོར་དང་བསྟུན་ནས་གསར་འགྱུར་རྫུན་མ་གྲངས་ལས་འདས་བ་སྤེལ་ཀྱི་ཡོད། དེ་དག་ལས་དཔེར་མཚོན་ཡག་ཤོས་ཤིག་བཤད་ན། Pizzagate་ཞེས་བའི་འཆལ་གཏམ་ཞིག་ཆེས་ཐོག་མ་4chan་ཟེེ་བ་དེ་ནས་ Hillary Clinton་དང་གཞན་ཨ་རིའི་མང་གཙོ་ཚོགས་པ་འགས་བྱིས་པའི་ནག་ཚོང་Washington DC ན་ཡོད་པའི་Comet Ping Pong ཟ་ཁང་ནང་དུ་བྱེད་ཀྱི་ཡོད་སྐོར་བསྒྲགས་སོང་ཤིང། རྫུན་གཏམ་དེ་ལ་དགའ་མཁན་ཚོས་སྤྱི་ཚོགས་འབྲེལ་མཐུན་དྲྭ་བ་འདྲ་མིན་ལས་ས་ཡ་མང་པོ་ཡར་བསྐུར་དང་མར་བསྐུར་བྱས་འབྲས་སུ། North Carolina་ནས་ཡིན་པའི་ལོ་ན་༢༨ དང་མིང་ལ་Edgar Maddison Welch,ཟེར་བ་ཞིག་གིས་སེམས་ཀྱི་ཚོར་བ་འགོ་གནན་མ་ཐུབ་པར་ཟ་ཁང་དེར་སོང་ནས་མེ་མདའ་བརྒྱབས་པ་དང་། དེའི་བྱས་འབྲས་སུ་རང་ཉིད་བརྩོན་ཁང་དུ་འགྲོ་དགོས་བྱུང་བ་རེད།
གསར་འགྱུར་བདེན་རྫུན་མཉམ་སྲེས།
སྐབས་རེ་གསར་འགྱུར་ཁང་རེ་འགའ་དང་ཆབ་སྲིད་པ་རེ་འགས་དམིགས་ཡུལ་ངེས་ཅན་ཞིག་བཟུང་ནས་ཆེད་དུ་ཉིན་རེ་གསར་འགྱུར་དང་བསྟུན་ནས་དངོས་ཡོད་མ་ཡིན་པའི་གསར་འགྱུར་རྫུན་མ་བཤད་དེ་མང་ཚོགས་འགོ་འཐོམ་དུ་འཇུག་གི་ཡོད། དཔེར་ན། ད་ལོ་ཨ་རིའི་མངའ་སྡེ་ཡོད་ཚད་ནས་མི་རིགས་དབྱེ་འབྱེད་དང་ཨ་རིའི་བྲན་གཡོག་ལམ་ལུགས་སྐབས་སུ་ཆེས་མཐོའི་བྲན་བདག་སྐུ་འདྲ་གང་མང་ཞིག་གཞུང་གི་ས་ཐོག་ན་ཡོད་པའི། མི་མང་གིས་དེ་དག་ལ་ངོ་རྒོལ་དང་རེ་འགའ་སྟོར་བཅོམ་ཡང་བྱས་བ་བརྟེན། དེ་ལ་མི་འགའ་མཁན་ཚོས་དེ་སྐོར་ནས་གསར་འགྱུར་རྫུན་མའམ་ཕྱེད་རྫུན་མ་སྣ་ཚོགས་ཤིག་སྤྱི་ཚོགས་སུ་སྤེལ་སོང་། དཔེར་ན། ངོ་དེབ་བེད་སྤྱོད་བྱེད་མཁན་བོད་པ་ཞིག་གིས(International Business Times)ཟེར་བའི་གསར་ཁང་གིས་མི་རིགས་ནག་པོ་དང་དེའི་ལས་དབང་ལ་སེམས་ཁུར་ཡོད་མཁན་ཚོས་ཨ་རིའི་ལོ་རྒྱུས་ལྡན་པའི་མང་གཙོའི་མཚོན་དོན་འདྲ་སྐུ་དག་སྟོར་ཡང་Seattle WA ན་ཡོད་པའི་དམར་ཕྱོགས་པ་ལེ་ཉིན་གྱི་Lenin)སྐུ་འདྲ་བདེ་ཐང་ངང་བཞག་འདུག གལ་སྲིད་དེ་ཚོའི་ལག་དུ་དབང་ཆ་ཤོར་ན་ཨ་རི་བ་མང་གཙོ་ལས་སྤྱི་ཚོགས་རིང་ལུགས་དང་དམར་ཕྱོགས་ལམ་ལུགས་སུ་ཁྲིད་ཀྱི་རེད་ཟེར་བའི་གསར་འགྱུར་དེ་བདེན་པར་འདོད་དེ་མི་ནག་ཚོར་བོད་ཡིག་ལམ་ནས་སྐྱོན་བརྗོད་བྱས་སོང་ལ། ཁོའི་ངོ་དེབ་རྗེས་འཇུག་བ་གང་མང་ཞིག་གིས་ཞིབ་དཔྱོད་གང་ཡང་མེད་པར་ཚིག་མཛོད་ནང་གི་ཚིག་ངན་ཡོད་ཚད་བཤད་སོང་། ཞིབ་དུ་མ་དཔྱད་ན་གསར་འགྱུར་དེ་བདེན་པ་ལྟ་བུ་ཡིན། རྒྱུ་མཚན་ནི། ངོ་རྒོལ་བ་ཚོས་སྐུ་འདྲ་སྟོར་ཡང་དམར་ཕྱོགས་པ་ལེ་ཉིན་གྱི་སྐུ་འདྲ་མ་སྟོར་བ་བདེན་པ་ཡིན། འོན་ཀྱང་དེའི་སྐོར་ཞིབ་དཔྱད་བྱས་ན་གསར་འགྱུར་དེ་ནི་དོན་དངོས་དང་ནམ་ཡང་མི་མཐུན། རྒྱུ་མཚན་ནི། ༡༽མི་ནག་པ་དང་ཁོའི་ཚོས་རྒྱབ་སྐྱོར་བ་ཚོས་མི་མང་གིས་འོས་འཕེན་ཞིང་དཔྱ་ཁྲལ་སྤྲད་པའི་གཞུང་ནི། མི་མང་གི་མངོན་འདོད་སྒྲུབ་མཁན་ཡིན་པ་ལས་རིགས་རུས་དབྱེ་འབྱེད་དང་། འདས་ཟིན་པའི་བྲན་བདག་རྣམས་ཀྱི་ལྟ་བའི་ཚབ་མཚོན་མིན་པས་སྐུ་འདྲ་དེ་རྣམས་ལོ་རྒྱུས་ཀྱི་འགྲེམ་སྟོན་ཁང་ཞིག་ལ་བསྐྱལ་དགོས་ཟེར་བ་དེ་ཡིན། ༢༽ ཨ་རི་ན་ཡོད་པའི་ལེ་ཉིན་འདྲ་སྐུ་མི་སྟོར་བའི་སྐོར་ཤེས་དགོས་ན་དེའི་ལོ་རྒྱུས་རགས་ཙམ་ཤེས་དགོས་པའི། དང་བོ་ཨ་རིའི་ས་གནས་ཨེསིཁའ་Issaquah དབྱིན་ཡིག་དགེ་རྒན་Carpenter་ཟེར་བ་ཞིག་གིས Slovakia ནས་སྐུ་འདྲ་དེ་ཉོས་བ་ཡིན་ཞིང་། ཁོས་བསམ་པར་སྐུ་འདྲ་དེ་རང་ཉིད་ཡོད་སའི་གནས་དེ་ནས་(Slovak restaurant) ཟ་ཁང་ཞིག་སྒོ་ཕྱེ་སྟེ་མདུན་དུ་རི་མོའི་སྒྱུ་རྩལ་གྱི་ཚུལ་དུ་འཇོག་འདོད་ཀྱང་། ས་གནས་མང་ཚོགས་ཀྱི་ངོས་ལེན་མ་བྱས་ཤིང་མཐའ་མ་ཁོ་ཤི་འདུག དེ་རིང་འདས་བོ་དེའི་ནང་མིས་ལེ་ཉིན་སྐུ་འདྲ་ཉོ་མཁན་འུ་རོགས་ལྟ་བཞིན་ཡོད་འདུག དེའི་ཕྱིར་ལེ་ཉིན་འདྲ་སྐུ་དེ་ནི་ཁྱིམ་ཚང་སྒེར་བ་ཞིག་ལ་བདག་པ་ལས་མི་མང་དང་གཞུང་གཉིས་ཀྱི་མཚོན་དོན་མ་རེད་ལ། དེ་བས་མི་མང་ངོ་རྒོལ་བའི་དམིགས་ཡུལ་ནི་མི་རིགས་དབྱེ་འབྱེད་དང་བྲད་གཡོག་ལམ་ལུགས་ཡིན་པ་ལས་དམར་ཕྱོགས་པའི་ལྟ་བ་ལ་དགའ་ཞེན་ནམ། ལེ་ཉིན་ལ་གུས་ཞབས་བྱས་བ་མིན་པས་གསར་འགྱུར་དེ་རིགས་ནི་རྫུན་མ་ཡིན་ལ་མི་མང་གིས་ཧ་ཅང་གཟབ་གཟབ་བྱ་དགོས་བའི་རིགས་ཡིན།
མཐའ་མ་འུ་ཚོའི་བཙན་བྱོལ་སྤྱི་ཚོགས་འདི་ཆུང་ཆུང་ཡིན་མིན་ལ་ལྟོས་བར་སྤྱི་ཚོགས་ཤིག་ཡིན་པས། རང་རང་དང་མཚམས་པའི་༢༠༢༡་ལོའི་སྲིད་སྐྱོང་དང་སྤྱི་འཐུས་སྐོར་ལ་ཚ་ཚ་འུར་འུར་གྱིས་སྤྱི་ཚོགས་འབྲེལ་མཐུན་སྣ་ཚོགས་ན། རང་ཉིད་དགའ་སར་བསྟོད་པ་དང་མི་དགའ་སའི་ཉེས་བ་བརྗོད་ཀྱི་ཡོད་པ་བརྟེན། འུ་ཚོའི་གསར་འགོད་པ་ཚོས་འགན་དང་དུ་ལེན་དེ་ཡིད་བརྟན་འཕེར་བ་དང་། ཕྱོགས་ལྷུང་མེད་པ་དང་། གསར་འགྱུར་ཆ་ཚང་བ་ཞིག་མི་མང་གི་མིག་ལམ་དུ་སྟོན་ཅི་ཐུབ་བྱ་དགོས་ལ། ལྷག་པར་གསར་འགོད་པའི་ལས་འགན་ནི་གཞུང་དང་མི་མང་བར་གྱི་དོན་དངོས་བསམ་བློའི་ཟམ་པ་དང་། བདེན་རྫུན་དབྱེ་བ་ཕྱེ་བའི་སྨྱུག་ཐོགས་བ་ཞིག་ཡིན་དགོས་བ་ལས་གཞུང་ཞབས་པ་ཚོའི་སྐད་སྐུར་མར་སྤྱི་ཚོགས་སུ་སྐྱེལ་ནི་མ་ཡིན་ལ། དེ་བས་སྐད་རིགས་གཞན་པའི་གསར་འགྱུར་བོད་དང་འབྲེལ་བ་ཡོད་ཚད་བདེན་པ་ཡིན་དཀའ་བའི། དེའི་སྐོར་རང་ཉིད་ལ་ཚད་ལྡན་ཡིན་པའི་ར་སྤྲོད་ཆ་ཚང་བ་མེད་ན་ཚད་ལྡན་ཡིན་མདོག་གིས་སྤེལ་མ་ཡོང་ན་བཟང་ངོ། །