༢༠༢༡ ལོའི་སྲིད་སྐྱོང་ཐད་ཀྱི་བསམ་ཚུལ་དམར་རྗེན་མ།

གཡུ་སྒང་དགེ་འདུན།
 
ཕྱི་ལོ་ ༢༠༢༡ ལོའི་སྲིད་སྐྱོང་དང་སྤྱི་འཐུས་ཀྱི་འོས་མི་ལ་མི་མང་པོ་ཞིག་ལང་ཡོང་གི་ཡོད་པ་རེད། ཡིན་ནའང་། སྤྱི་འཐུས་ནི་ཆོལ་ཁོངས་སོ་སོ་ནས་འདེམས་ཡོང་དུས་དེ་ལ་ཡག་ན་ཉེས་ན་ཆོལ་ཁ་རང་ལས་གཞན་སུ་ལའང་བཤད་རྒྱུ་ལྷག་མེད། སྲིད་སྐྱོང་ལ་མཚོན་ན། ད་ལྟ་ང་ཚོ་བཙན་བྱོལ་ཁྲོད་ཀྱི་ཆོལ་ཁ་གསུམ་གྱི་མིའི་མང་ཉུང་ལ་མ་ལྟོས་པར་ཚང་མར་གཅིག་གྱུར་གྱིས་འདེམས་ཆོག་པའི་ཐོབ་དབང་དེ་རེད། འདི་ནི་འདས་མ་ད་གསུམ་གྱི་གནད་འགག་ཆེ་བའི་གཞི་རིམ་མི་མང་གི་འགན་ཆེ་ཤོས་དེ་རེད། བྱས་ཙང་། ཕྱི་ལོ་ ༢༠༢༡ ལོའི་སྲིད་སྐྱོང་ཐད་ཀྱི་བསམ་ཚུལ་དམར་རྗེན་ཞིག་བརྗོད་འདོད་བྱུང་། མང་ཚོགས་མང་པོ་ཞིག་གི་ངོས་ནས་ཀྱང་སེམས་ནང་ལ་འགྲིག་རྟགས་རེ་རེ་བཀོད་ཀྱི་ཡོད་པ་རེད། འགྲིག་རྟགས་དེ་ཕྱོགས་ཞེན་རིང་ལུགས་ཀྱིས་ལྟ་བའི་སྨག་རུམ་ལ་མི་འཐིམ་པའི་སྨོན་ལམ་ཡོད། དོན་དངོས་ཐོག་ང་ཚོ་དགོས་ངེས་ཀྱི་སྲིད་སྐྱོང་ནི། རང་རིགས་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་སོགས་འཛིན་སྐྱོང་གི་ཐད་ལ་ཕྱིའི་རྣམ་པ་ཙམ་མིན་པར་དོན་དངོས་ཀྱི་ཐོག་ནས་ལྷག་བསམ་ཁུར་བསྐྱེད་བྱེད་པ། དབུས་བོད་མིའི་སྒྲིག་འཛུགས་ཀྱི་སྲིད་བྱུས་དབུ་མའི་ལམ་ལ་ཤར་སྐྱོད་དང་། དབུ་མའི་ལམ་གྱི་རྩ་དོན་གཞིར་བཟུང་གིས་བོད་རྒྱ་ཞི་མོལ་ཡོང་བ་ལ་གང་ཐུབ་ཅི་ཐུབ་བྱེད་པ། དབུས་བོད་མིའི་སྒྲིག་འཛུགས་སྲ་བརྟན་དུ་གནས་པ་ལ་ཐུགས་བསམ་རྣལ་མ་གཏོང་བ། སྐྱབས་བཅོལ་བའི་གནས་སྟངས་འོག་ཚད་ལྡན་དམངས་གཙོའི་སྒྲིག་འཛུགས་ཡང་དག་པ་ཞིག་བཙུགས་གནང་ཡོད་པ་འདིའི་ཁྲིམས་བཟོ་ལྷན་ཁང་གིས་བཟོས་གནང་བའི་ཁྲིམས་སྒྲིག་གི་དགོངས་དོན་བྱང་ཆུབ་ཅིང་། དེའི་ནང་དོན་ལས་མི་འགལ་བ། གལ་ཏེ་ཆེས་མཐོའི་ཁྲིམས་ཞིབ་ཁང་གིས་ཁྲིམས་སྒྲིག་ལྟར་ལག་བསྟར་གནང་དགོས་བྱུང་ནའང་བརྩི་སྲུང་བྱེད་པ། སྒེར་གྱི་ཁ་དབང་གི་ཆེད་དུ་གཞུང་དབང་བེད་མི་སྤྱོད་པ། བཀའ་ཤག་ལྷན་རྒྱས་ཀྱི་དབང་ཚད་གཅིག་སྡུད་མི་བྱེད་པ། ཆོལ་ཁའི་ཞེན་ཁོག་གིས་གྲུབ་པ་དག་གི་རྗེས་སུ་མི་འབྲངས་པར་རང་ཚུགས་བརྟན་ཞིང་ཆོལ་གསུམ་རྡོག་རྩ་གཅིག་ཏུ་སྒྲིལ་བར་བློ་གཅིག་སེམས་གཅིག་གིས་འབད་འབུངས་བྱེད་པ། ཕྱི་རྫིག་ནང་སྟོང་གི་ལས་ཀ་མི་བྱེད་པ། ༸གོང་ས་མཆོག་ལ་མཚན་སྨོད་ཞུ་མཁན་དང་དབུས་བོད་མིའི་སྒྲིག་འཛུགས་ཀྱི་ལམ་ཕྱོགས་ལ་བསྙོན་འཛུགས་བྱེད་མཁན་གྱི་རང་རིགས་དག་ལ་ལམ་ནོར་ལྡོག་ཤེས་བྱེད་འཇུག་པའི་ནུས་པ་གང་ཐོན་བྱེད་པ། དབང་ཆ་དང་གོ་མིང་ལ་དགའ་བའི་རིགས་བསྡུ་རུབ་ཀྱིས་ལས་དོན་འཐུས་ཤོར་དུ་མི་གཏོང་བ། བཅའ་ཁྲིམས་རིན་པོ་ཆེའི་དགོངས་དོན་ལྟར་གང་ལའང་བཤད་ཕོད་སྒྲུབ་ཕོད་ཅིག་དང་། ཕྱག་ལས་གནང་ཕྱོགས་ལ་ནོར་འཁྲུལ་ཤོར་ན་ཡོ་བསྲང་དང་མེད་ན་དོགས་ཟོན་བྱེད་པ། སྤྱི་པའི་ལས་དོན་གྱི་འཐུས་ཤོར་དང་གནོད་རྐྱེན་གྱི་གནད་འགག་དང་འཕྲད་སྐབས་སུ་གདོང་མཆོངས་བྱེད་པ་ལས་ཕྱི་ནུར་མི་བྱེད་པ། ལས་དོན་ཆེ་འབྲིང་ཆུང་གསུམ་གང་ལའང་ཕུགས་རྒྱང་རིང་པོའི་ཐུགས་བསམ་གཏོང་བ་ལས་ཁ་རུ་ཁ་ཐུག་ལྟ་བུ་མ་ཡིན་པ་དང་། ལས་དོན་ཕུགས་བརྟན་མིན་དང་བཅའ་ཁྲིམས་རིན་པོ་ཆེར་འགལ་ཡོད་མེད་བཅས་ལ་ཐུགས་ཞིབ་ནན་པོ་གཏོང་བ། བཙན་བྱོལ་ཁྲོད་ཀྱི་གཞིས་ཆགས་ཁག་དང་ཁ་འཐོར་མང་ཚོགས་ཀྱི་སྐྱིད་སྡུག་དང་ལྷག་པར་ཉམ་ཆུང་དཀའ་ངལ་ཅན་གྱི་རིགས་ལ་ལྟ་སྐྱོང་ཁ་ཡོད་ལག་ཡོད་བྱེད་པ་ཞིག་འདེམས་དགོས། སྲིད་སྐྱོང་གི་འགན་འཁྲི་སུ་ཞིག་གི་ཕྲག་ཏུ་བླངས་པ་ནས་མང་ཚོགས་ཀྱི་འདོད་པ་ཡོངས་སུ་གང་བ་ཞིག་བསྒྲུབ་ཐུབ་རྒྱུ་ཁག་པོ་ཡིན་པས་མཚམས་རེར་ལས་དོན་འགྲུབ་མ་འགྲུབ་དེ་འདྲ་ཡོང་སྲིད་ཀྱང་། ལས་རྒྱུ་འབྲས་དང་དྲང་པོ་དྲང་བཞག ཕྱི་གསལ་ནང་གསལ་གྱིས་ཕྱག་ལས་གནང་བ་ཡིན་ན་མི་མང་གི་ངོས་ནས་ཀྱང་བསམ་ཤེས་གུ་བཤངས་བྱེད་རྒྱུ་གལ་ཆེན་དོན་ཆེན་དུ་ཆགས་ཡོད།

གོང་འཁོད་ཆ་རྐྱེན་དེ་དག་ཀློག་རྗེས་དྲི་བ་ཞིག་རང་བཞིན་གྱིས་ཡོང་། ད་འོ་ན་སྲིད་སྐྱོང་འོས་མི་ལ་སུ་འདྲ་ཞིག་འཚམས་པོ་འདུག་ཅེས་པ་དེ་རེད། འདས་པའི་ལོ་ངོ་བཅུའི་རིང་གི་ལེགས་པའི་ཆ་གང་ཡོད་པ་རྣམས་མུ་མཐུད་རྒྱུན་འཁྱོངས་དང་། ལེགས་པའི་ཆ་གང་དག་འཐུས་ཤོར་དུ་ཕྱིན་པ་གང་ཡོད་པ་རྣམས་བསྐྱར་གསོ་བྱེད་རྒྱུ་དེ་རེད། སྤྱིར་རྒྱུན་སྐྱོང་བ་ལས་ཉམས་ཆག་བྱུང་ཟིན་པའི་ལས་དོན་ཞིག་བསྐྱར་གསོ་བྱེད་དགོས་ན། དེ་ནི་ལས་གཞི་གསར་འཛུགས་ལས་ཀྱང་དཀའ་ངལ་ཆེ་བ་ཡོད་པ་ཚང་མའི་ཤེས་གསལ་རེད། དེ་འདྲ་ཡིན་དུས་དབུས་བོད་མིའི་སྒྲིག་འཛུགས་ཀྱི་བཅའ་ཁྲིམས་རིན་པོ་ཆེའི་དགོངས་དོན་ངེས་ཤིང་དེའི་དོན་ལྟར་ཤར་བསྐྱོད་བྱེད་ཐུབ་པ་ཞིག་དང་། དེའི་དགོངས་དོན་ལག་བསྟར་གནང་ནས་ཕེབས་ཐུབ་པ་ཞིག་ཡིན་ན། བཙན་བྱོལ་ཁྲོད་ཀྱི་བོད་མི་རྣམས་རྡོག་ལ་སྒྲིལ་པོ་གནང་ཐུབ་པར་ཕན་ནུས་ཆེ་བ་ཡོད། ཡིན་ནའང་། ནམ་རྒྱུན་རང་གི་འདོད་པ་གཅིག་པུ་ལས་གཞན་སུ་ལའང་བསྟུན་འདོད་མེད་མཁན་དག་ལ་ཐབས་བྱུས་མེད་མོད། འོན་ཀྱང་མི་སེམས་རྡོ་ལས་གྲུབ་མེད་པ་ཡིན་ཙང་། ནམ་རྒྱུན་ཕྱག་ལས་ལྷོད་མེད་ལྷག་བསམ་རྣམ་དག་གིས་གནང་ན་ཁོང་ཚོ་ཁག་ཅིག་གི་སེམས་ལ་འགྱུར་བ་ཏན་ཏན་འབྱུང་ངེས། གང་ལྟར་ང་ཚོ་གལ་གནད་ཆེ་བའི་འགག་འཕྲང་དག་ནས་ཐར་འཇུག་པའི་སྐྱེ་བོ་རླབས་ཆེན་ཞིག་ཡར་འཇོག་དང་མི་འཇོག་གཙོ་བོ་ཆོལ་ཁ་གཉིས་རེད། དབུས་གཙང་མི་མང་དང་མདོ་སྟོད་མི་མང་ལ་རག་ལས་ཡོད་པ་རེད། ཆོལ་ཁ་འདི་གཉིས་ལ་མི་འབོར་མང་སྟབས་འདི་གཉིས་ཀྱིས་འདེམས་ཀ་མ་ནོར་བར་དམངས་སེམས་རྡོག་ལ་སྒྲིལ་པོ་ཞིག་བཟོ་ཐུབ་པའི་གང་ཟག་ཅིག་འབུར་ཐོན་བྱུང་ན་ང་ཚོའི་ལས་དོན་གང་ལའང་འཇིགས་ཞུམ་སྐྱེ་དགོས་དོན་མེད། གཞན་རྣམ་གྲངས་མང་པོ་ཞིག་དང་གབ་ཚིག་ལྟ་བུའི་ཐ་སྙད་འདྲ་ཆགས་པོ་སྙིང་རྗེ་པོ་གསུངས་པ་ཙམ་གྱིས་ཕན་ནུས་ཆུང་།

མི་སུ་འདྲ་ཞིག་ལ་ཐོབ་མིན་ཆོལ་ཁ་འདི་གཉིས་ཀྱི་དཔུང་ཤུགས་ལས་འདའ་མི་ཐུབ་པས། ཕྱོགས་ཞེན་དང་ཡ་ལེ་ཡོ་ལེར་སོང་ན། ང་ཚོའི་སྤྱི་དོན་ཁ་ཆག་སྣ་རལ་དུ་འགྲོ་རྒྱུར་གདོན་མི་ཟ། སྐབས་དེ་དུས་ངུ་ཤོར་ཡང་འཕྱིས་དྲག་པ་རེད། དེར་བརྟེན་ད་རེས་ ༢༠༢༡ ལོའི་སྲིད་སྐྱོང་ལ་མི་མང་པོ་ལང་ཡོང་གི་ཡོད་པ་རེད། དེ་དག་ལས་སྐུ་ངོ་བཀའ་ཟུར་འབྲོང་ཆུང་དངོས་གྲུབ་མཆོག་དང་། སྐུ་ངོ་ཚོགས་ཟུར་སྤེན་པ་ཚེ་རིང་གཉིས་རྩེ་ཕུད་ཆགས་ཡོད་པ་དང་། ཁོང་གཉིས་ལའང་ཁྱད་ཆོས་རེ་རེ་ཡོད་པ་རེད། ཡིན་ནའང་རང་ཉིད་ཀྱི་བསམ་ཚུལ་དམར་རྗེན་དུ་བརྗོད་ན། གོང་འཁོད་ཆ་རྐྱེན་ཡོངས་སུ་རྫོགས་པ་དེ་སྐུ་ངོ་ཚོགས་ཟུར་སྤེན་པ་ཚེ་རིང་མཆོག་ལས་ལྷག་མེད་པར་མཐོང་།

ཡིན་ནའང་སྐུ་ངོ་སྤེན་པ་ཚེ་རིང་ཁོང་ལ་འགན་དེ་འཁུར་བཞེས་གནང་འཇུག་མིན་གོང་འཁོད་ཆོལ་ཁ་གཉིས་ལ་ཐུག་ཡོད་པ་ལས་གཞན་མདོ་སྨད་ཆོལ་ཁ་ལ་བསམ་བློའི་ལྷག་བསམ་གྱིས་རྒྱབ་སྐྱོར་སྟོན་རྒྱུ་ཙམ་ལས་འོས་འདེམས་པའི་མི་འབོར་གྱི་ཆ་ནས་ནུས་པ་གང་ཡང་ཐོན་ཐབས་མེད་པ་དོན་དངོས་སུ་གྲུབ་ཡོད། ཕྱི་ལོ་ ༢༠༡༦ ལོའི་སྐུ་ངོ་སྤེན་པ་ཚེ་རིང་གི་འོས་གྲངས་ཉིས་ཁྲི་བཞི་སྟོང་བདུན་བརྒྱ་བདུན་ཅུ་དོན་དྲུག་དེའི་ནང་གི་སྟོང་ཕྲག་གཅིག་གཉིས་ཙམ་མ་གཏོགས་གཞན་ཆ་ཚང་དབུས་གཙང་དང་མདོ་སྟོད་ཆོལ་ཁ་ནས་བྱུང་བ་རེད། དེར་བརྟེན་ད་ལྟའི་ཆར་ཡང་ཆོལ་ཁ་དེ་གཉིས་ཀྱི་དྲང་བདེན་ལ་དགའ་བའི་མི་བུ་དག་གིས་གཙོས་པའི་རང་རེའི་གཞུང་འདི་ཚགས་ཚུད་ཅིག་དང་། ད་དུང་མི་ལོ་ལྔ་བཅུར་སྡོད་དགོས་ཀྱང་སེམས་ཁྲལ་མེད་པ་ཞིག་གཏོང་འདོད་ཡོད་མཁན་དག་གིས་ཐུགས་བསམ་ནན་ཏན་གཏོང་དགོས་པའི་སོ་མཚམས་ཤིག་དང་། ཀྱོག་མཚམས་འདིར་རང་ཉིད་ཀྱི་རྣམ་དཔྱོད་གཞན་དབང་དུ་མི་འགྲོ་བ་ཧ་ཅང་གནད་འགག་ཅིག་རེད།

ཅེས་གཡུ་སྒང་དགེ་འདུན་གྱིས། ༢༠༢༠ ཟླ་ ༠༨ ཚེས་ ༡༠ ཉིན་བྲིས།