སད་མི།
<<ཧོང་ཁུང་རྒྱལ་ཁབ་བདེ་འཇགས་བཅའ་ཁྲིམས >> འབོད་པ་འདི། རྒྱ་ནག་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན 162 ཡིས་སྤྱི་མོས་སྒོས་གཏན་ལ་ཕབ་པ་དང་། ཁྱོན་ལེའུ 6 དང་། དོན་ཚན 66 བདག་ཉིེད་ཅན་དུ་གྲུབ།
རྒྱལ་ཁབ་ཁ་བྲལ་གཏོང་བ་དང་། རྒྱལ་ཁབ་སྲིད་དབང་མགོ་རྟིང་སློག་པ། འཇིགས་སྐུལ་བྱེད་སྒོ་སྤེལ་བ། ཕྱི་རྒྱལ་དང་ངན་འབྲེལ་བྱེད་པའམ་ཕྱི་ལོགས་སྟོབས་ཤུགས་ལ་བརྟེན་ནས་རྒྱལ་ཁབ་བདེ་འཇགས་ལ་ཉེན་ཁ་བཟོ་བ། བཤད་མ་ཐག་པའི་དོན་ཚན་འདི་བཞི་བཅའ་ཁྲིམས་སུ་བཙུད་ཡོད་པ་རེད།
ད་དུང་བཀོད་དོན། གལ་ཏེ་ཧོང་ཁུང་ས་གནས་ཁྲིམས་གཞི་དང་བཅའ་ཡིག་འདིར་མི་མཐུན་ཕྱོགས་མཆིས་ཚེ། བཅའ་ཡིག་འདི་ཉིད་ཚད་འཛིན་བྱ་དགོས་ཟེར། དེས་ན། བཅའ་ཁྲིམས་འདི་ཧོང་ཁུང་ས་གནས་ཀྱི་ཁྲིམས་གཞི་མཐའ་དག་གི་སྒང་ལ་བཞག་ཡོད་པ་དེ་རེད། དེས་མི་ཚད། བཅའ་ཁྲིམས་འདིའི་འགྲེལ་བརྗོད་བདག་དབང་པེ་ཅིང་གི་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལ་ཡོད་ཟེར།
ལྷག་པར་དུ། དོན་ཚན་སོ་བརྒྱད་ལས། ཧོང་ཁུང་དམིགས་བསལ་ས་ཁུལ་དུ་གནས་སྡོད་ཆོག་པའི་ཐོབ་ཐང་མེད་པ་ཚོས་ཀྱང་། གལ་ཏེ་ཧོང་ཁུང་གི་ཕྱི་ལོགས་ས་ཁུལ་ནས་བཅའ་ཁྲིམས་འདི་དང་འགལ་བའི་ལས་ཀ་བྱས་ཚེ། ཁྲིམས་གཞི་འདི་ལག་བསྟར་བྱ་རྒྱུ་ཡིན་ཟེར། དེ་ཡིན་དུས། དོན་དུ་ཧོང་ཁུང་རྒྱལ་ཁབ་བདེ་འཇགས་བཅའ་ཁྲིམས་འབོད་པ་འདི། ཧོང་ཁུང་ཙམ་དུ་མ་ཟད། འཛམ་གླིང་གི་འགྲོ་མི་ཐམས་ཅད་ཁྲིམས་སུ་བཅས་པའི་གདོན་ཡིག་ཅིག་ཡིན་པ་རེད།
དེ་རིང་ནས་བཟུང་། ཧོང་ཁུང་གི་ཡུལ་མི་ཁྲི་ཚོ་བདུན་བརྒྱ་བོ་རང་དབང་དང་དམངས་གཙོ་ཁ་ཕྲལ་བ་རེད་ལ། ད་ནས་བཟུང་། བོད་དང་ཡུ་གུར་ལྟར་དུ། འཇིགས་དངངས་དང་ཞེད་སྣང་ཞིག་གི་སྤྱི་ཚོགས་ཤིག་ནས་འཚོ་དགོས་པ་རེད། བོད་དང་ཡུ་གུར་ལྟར་དུ། རྒྱལ་ཁབ་གཞན་དང་གཞན་དུ་སྐྱབས་བཅོལ་མ་སོང་ཐུ་མེད་ཆགས་ཚར།
ད་གལ་ཏེ། རྒྱ་ནག་གིས་དབྱིན་ཇི་བཙན་རྒྱལ་བ་དང་མཉམ་དུ་གན་རྒྱ་བཞག་ལ། འཇོག་སའི་ཁ་གཏད་ཀྱང་རྒྱ་ནག་པ་རང་ཉིད་དང་སྐད་ཡིག་རིག་གནས་ཆུ་ལ་ཆུ་བཞག་གི་སྤུན་ཟླ། དེས་མི་ཚད་ཀྱི་ཧོང་ཁུང་ནི་འཛམ་གླིང་ན་འཐེན་ཤུགས་ཡོད་པའི་ཚོང་རྭ་དང་ཤར་ཕྱོགས་ཀྱི་མུ་ཏིག་འོད་པོ་ཅན་རྡོག་གཅིག་པུ་དེ་རེད། དེའི་སྟབས་ཀྱིས་དབྱིན་ཇི་བ་ཙམ་དུ་མ་ཟད། ཨ་རི་བཙན་རྒྱལ་རིང་ལུགས་ཚང་དང་ཡོ་རོབ་མནའ་འབྲེལ་ཚང་། མདོར་ན་ང་ཆེ་ང་བཙན་གྱི་རྒྱལ་ཁབ་ཚོགས་སྡེ་ཐམས་ཅད་ཀྱི་མིག་འོག་ན། ཅི་མི་སྙམ་པར་ཆིངས་གན་རྩ་གཏོར་གཏོང་ཐུབ་གི་ཡོད་ན། བཙན་བྱོལ་བོད་པ་འདྲ་བོ་དག་གིས་རྒྱ་ནག་དང་གྲོས་ཁ་གཏམ་རྒྱུ་དང་། རྒྱ་ནག་པོས་གྲོས་དོན་དེ་དག་བརྩི་སྲུང་བྱེད་པའི་ཡིད་ཆེས་དང་གདེང་སྤོབས་ཤིག་ཡོང་སའི་གཞི་མེད་གནས་མེད་དོ།
དེའི་ཕྱིར། བོད་པ་ཚོ་ལ་སྲིད་དོན་རིག་པའི་ཕྱོགས་ནས་མཁྱེན་རྒྱ་ཡངས་པའི་སློབ་སྟོན་པ་ཡོད་མེད་མི་ཤེས་ལ། དགོས་ཀྱང་མི་དགོས། ང་ཚོས་ནི། ང་ཚོ་དང་ལས་དབང་ཧ་ཅང་གཅིག་པའི་ཧོང་ཁུང་བ་ཚོའི་གནས་བབ་ལ་ཅེར་ཏེ་བལྟས་འོངས་ན། དེ་གས་ཆོག ཧོང་ཁུང་འདི་བོད་ཀྱི་མ་འོངས་བལྟ་སའི་སྐར་ཁུང་ཆེས་གསལ་ཤོས་དེ་ཡིན་ལ། བོད་ཀྱི་མ་འོངས་རྒྱ་ལྟ་བྱེད་པའི་རྒྱང་ཤེལ་སྤུས་ཀ་ལེགས་ཤོས་དེའང་ཡིན།
དེ་འདྲ་ཡིན་སྟབས། གལ་ཏེ་སུ་འདྲ་ཞིག་གིས་རྒྱ་ནག་དང་སྐད་ཆ་བཤད་ནས་ཁ་དན་བཟོ་རྒྱུ་ཡོད་། ས་ཡིག་རྒྱག་རྒྱུ་ཡོད་ཟེར་ན། དེས་ནི་རྒྱ་ནག་ལ་རྩ་བའི་ཆ་རྒྱུས་ཙམ་མེད་རྟགས་ཡིན། ད་བར་དུ། འདས་པའི་ལོ་རྒྱུས་ནང་སུས་ཀྱང་རྒྱ་ནག་དང་གྲོས་གཏམས་རྗེས་ཁ་དན་བརྩི་སྲུང་བྱས་པའི་ལོ་རྒྱུས་ཤིག་ག་ན་ཡོད།
དངོས་གནས་བྱས་ན། རྒྱ་ནག་རྒྱུས་མངའ་ཆེས་ཆེ་ཤོས་ནི་བོད་དང་ཡུ་གུར་སོགས་ཡིན་ལོས་དགོས། ཆིངས་དོན་བཅུ་བདུན་ཅི་བྱས་སོང་། ཧ་ལམ་སྣག་ཚ་ཡང་མ་སྐམ་གོང་ནས་གཏོར་བཤིག་བཏང་ཨེ་སོང་། ཧོང་ཁུང་གི་རྒྱལ་ཁབ་གཅིག་ལ་ལམ་ལུགས་གཉིས་ཅི་འདྲ་བྱས་སོང་། འཛམ་གླིང་མི་དམངས་ཀྱིས་བལྟས་བལྟས་རིག་རིག་ལ་ཁ་དན་ཡོད་ཚད་རྩབས་ཧྲལ་ལ་བཏང་མ་སོང་ངམ། དེ་བཞིན་དུ་མན་ཇུ་དང་རྒྱ་ནག་དབར་གྱི་གོ་གནས་ཕྱིར་བསྡུའི་ཆིངས་ཡིག་རེད། མའོ་ཙེ་ཏུང་དང་ཅང་ཅེ་ཧྲིའི་གྲོས་མོལ་སོགས་རྐང་རྡོག་གཅིག་ཁ་དན་ལྟར་དུ་གནས་སོང་ངམ།
དེ་རིང་ཁ་སང་གི་རྒྱལ་སྤྱིའི་འགྲོ་མིའི་ཐོབ་ཐང་བསྒྲགས་གཏམ། འཛམ་གླིང་ཚོང་དོན་སྒྲིག་འཛུགས WTO རེད། ཁོར་ཡུག་སྲུང་སྐྱོབ་སྐོར་གྱི་གན་རྒྱ་རེད། ཉིང་རྡུལ་མཚོན་ཆ་ཁྱབ་སྤེལ་མི་བྱེད་པའི་གན་རྒྱ་རེད། ཨ་རི་དང་ཉོ་ཚོང་གན་རྒྱ་རེད། མདོར་ན་གན་རྒྱ་ཐམས་ཅད་ནས་ཐམས་ཅད་ཕྱིར་བཤིག་དང་རྩ་གཏོར་བཏང་བ་མ་རེད་དམ།
ཐ་ན། རྒྱ་ནག་ཁོ་རང་ཚོའི་ཏང་རྒན་རྒྱས་འཛོམས་སྒོ་ནས་གཏན་ལ་ཕབ་པའི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཟེར་བ་དེའང་སྲུང་བརྩི་མི་བྱེད། ལག་བསྟར་མི་དགོས་ན། ཅིའི་ཕྱིར་དུ། བོད་དང་ཡུ་གུར་འདྲ་བོ་དག་གི་ཁ་ཆད་ལ་བརྩི་བཀུར་བྱེད་པ་ཡིན།
07.01.2020
ཉིའུ་ཡོག
རྒྱ་གམར་གཞུང་ཁ་དན་ཚིག་ལ་མི་གནས་པ་ཞིག་ཡིན་པ་ང་ཚོ་ཚང་མས་ཤེས་ངེས་ཡིན་མོད།འོན་ཀྱང་ང་ཚོར་གྲོས་མོལ་ལས་གཞན་པའི་གདམ་ཀ་ག་རེ་ཡོད་དམ།