ཀླུ་སྨྱོན།
>
ཞོགས་པའི་ཆུ་ཚོད་བརྒྱད་པ་ཙམ་ལ་ཡར་ལངས་ནས་མགྲོན་ཁང་གི་ཁ་གཏད་དུ་ཡོད་པའི་འཚིག་ཇ་འཚོང་ཁང་དེར་སོང་སྟེ་མེ་ཏོག་གི་ཇ་ཞིག་དང་བག་ལེབ་ཅིག་ཉོས་ཏེ་ཐག་ཉེ་ས་རུ་ཡོད་པའི་ཨ་རིའི་གྲོས་ཚོགས་ཁང་ཆེན་གྱི་མདུན་ཐང་དེར་གོང་ས་མཆོག་གིས་འཛམ་གླིང་ཞི་བདེའི་སྐོར་གྱི་བཀའ་སློབ་གནང་ས་དེར་སོང་། ལམ་ཁ་རུ་ཉི་འོད་ཇེ་ཚ་རུ་འགྲོ་བཞིན་པ་དང་མི་ཚོགས་སྐོར་དང་སྐོར་བྱས་ནས་ཐང་ཆེན་དེར་སྐྱོད་བཞིན་འདུག་ལ་དང་བླངས་ཞབས་ཞུ་བ་དག་གིས་ཆུ་གྲང་མོ་དག་རིན་མེད་དུ་སྟེར་བཞིན་འདུག སྡོད་ས་ཞིག་བདམས་ཏེ་ཆུ་ཚོད་གཅིག་ལྷག་ལ་སྒུག་རིང་ཨ་རིའི་མི་ནག་བུད་མེད་སྐད་གྲགས་ཆེན་པོ་ཅན་མིང་མི་དྲན་པ་ཞིག་གིས་གོང་ས་མཆོག་ལ་ཆེ་བསྟོད་དང་འབྲེལ་གཏམ་བཤད་དང་། དེ་རྗེས་གཞས་མ་ཞིག་གིས་བོད་ཀྱི་ཆེད་དུ་བཏང་པའི་གཞས་ང་ཚོ་ཁྱིམ་དུ་ལོག་འགྲོ་ཞེས་པ་ཞིག་ལ་ཉན་བཞིན་པའི་དུས་དེར་རྒྱལ་བ་ཀརྨ་པ་ཡང་དེར་ཕེབས་སོང་། གསར་འགྱུར་སྙན་སྒྲོན་པ་དང་སྙན་ངག་མ་ཆུ་མིག་གིས་ཀྱང་བཤད་སྦུག་ཅིག་ལག་ཏུ་བཟུང་ཞིང་བརྙན་འཕྲིན་འཕྲུལ་ཆས་ཁུར་བའི་སྐྱེས་པ་ཞིག་རོལ་ཏུ་ཁྲིད་ནས་ཁོ་བོ་སྡོད་ས་དེ་བརྒྱུད་ནས་ཕར་ཕྱོགས་ཤིག་ཏུ་སོང་སྟེ་བོད་པའི་ཨ་ཅག་ཅིག་ལ་བཅར་འདྲི་བྱེད་བཞིན་འདུག་པ་མཐོང་། ཁོང་དེ་སྡ་མཇལ་མ་མྱོང་ཞིང་དྲ་ལམ་ནས་དངོས་བཏགས་ཀྱི་ཁ་བརྡ་དཀར་དམར་གང་མང་ཞིག་་བྱས་ཀྱང་དངོས་སུ་མཐོང་སྐབས་གཞན་དང་མི་འདྲ་བའི་ཚོར་བ་ཆུང་ཆུང་ཞིག་ལས་སྐྱེས་མ་སོང་། མི་ཚོགས་རིམ་བཞིན་མང་དུ་སོང་སྟེ་ཕལ་ཆེར་མི་ཁྲི་གཅིག་ལྷག་ལོས་ཡོད་བསམས་པ་ཞིག་གི་སྐབས་སུ་གོང་ས་མཆོག་ལྡིངས་ཆའི་སྒང་ལ་ཆིབས་སྒྱུར་བསྐྱངས་ཤིང་མཐོང་གྲོལ་ཞལ་རས་མི་དམངས་ལ་སྟོན་གནང་མཛད་རྗེས་ཞབས་སྟེགས་སྟེང་དུ་བཞུགས་ནས་འཛམ་གླིང་ཞི་བདེའི་སྐོར་བཀའ་སློབ་རིན་ཐང་བྲལ་བ་གནང་སོང་ལ། དེའི་ཁྲོད་ནས་ནད་པ་གཉིས་ཀྱི་ནད་གཞི་གཅིག་ཡིན་ཡང་སྙིང་རྗེས་རྒྱུད་བརླན་པའི་ནད་པ་དེའི་སེམས་ཀྱི་ཞི་བདེ་གཞན་པ་དེ་ལས་ཆེ་ལུགས་གསུངས་པ་དེ་སེམས་ནང་འཇུག་བདེ་བོ་ཞེ་དྲགས་བྱུང་། ད་དུང་དེང་དུས་ཀྱི་བུད་མེད་ལོ་ཆུང་ཚོས་ཕྱིའི་རྣམ་པ་མཛེས་པོ་བཟོ་བ་དེ་བཞིན་ནང་སེམས་པ་མཛེས་པོ་བཟོས་པ་ཡིན་ན་རང་གི་གྲོགས་པོ་དང་མི་ཚེ་རྒྱུན་རིང་བར་སྐྱེལ་ཐུབ་རྒྱུ་ཡིན་ལུགས་ཀྱང་གསུངས། མཇུག་ཏུ་ཨ་རིའི་མི་ནག་བུད་མེད་དེས་གོང་ས་མཆོག་བོད་ལ་ཕེབ་ཐུབ་པའི་ཉི་མ་ཞིག་ཡོད་མེད་བཀའ་འདྲི་ཞུས་སོང་བར། གོང་ས་མཆོག་གིས་རྒྱ་ནག་ལ་ལོ་ངོ་ལྔ་བཅུའི་རིང་འགྱུར་བ་ཆེན་པོ་ཞིག་སོང་ཡོད་པས་མ་འོངས་པར་ཁོང་བོད་ལ་ཕེབ་ཐུབ་ལུགས་གསུངས་པར་མི་དམངས་ཀྱིས་དགའ་བསུའི་ཐལ་མོ་ཤུགས་ཆེན་བརྡབས། ད་དུང་ཁོང་གིས་གལ་སྲིད་མའོ་ཙེ་ཏུང་དེ་རིང་ཕྱིར་རྒྱ་ནག་ཏུ་ལོག་པ་ཡིན་ན་རྒྱ་ནག་གི་འགྱུར་བ་འདིས་ཁོ་ལ་འདར་སིག་རྒྱག་ཏུ་འཇུག་རྒྱུ་རེད་ཅེས་ཀྱང་གསུངས། 
ཆུ་ཚོད་བཅུ་གཉིས་པར་ཁོང་གི་བཀའ་སློབ་གསུངས་གྲུབ་ཅིང་རང་ཉིད་ཀྱང་ཡར་ལངས་ནས་སྦྱིན་བདག་མར་དུས་ཆད་བཟོས་པ་བཞིན་མོ་དང་མཉམ་དུ་ཨ་རིའི་གདོད་མིའི་འགྲེམས་སྟོན་ཁང་དེར་སོང་ནས་ཟ་མ་ཞིག་ཟོས་སྐར་མ་ཁ་ཤས་རིང་དེའི་ནང་དུ་ལྟ་སྐོར་དང་འདྲ་པར་རེ་བརྒྱབ་རྗེས་གླ་འཁོར་ཞིག་ལ་བསྡད་དེ་གསུང་ཆོས་ཚོམས་ཆེན་དུ་བསྐྱོད། ཉིན་གུང་ཆུ་ཚོད་དང་པོ་དང་ཕྱེད་ཀ་ཙམ་ནས་གོང་ས་མཆོག་གིས་དབྱིན་སྐད་སྟེང་ཡེ་ཤུ་དང་རྗེའུ། ཧིན་རྡུ་དང་ནང་པའི་ལྟ་གྲུབ་མི་འདྲ་བའི་སྐོར་དང་། སྒོམ་རིམ་བར་བ་ལས་བརྩམས་པའི་བདེན་བཞི་དང་བྱང་ཕྱོགས་སོ་བདུན་སོགས་ཀྱི་བཀའ་ཁྲིད་བསྩལ། རང་ཉིད་སྡོད་ས་དེ་ནས་གོང་ས་མཆོག་གི་ཞལ་རས་མཐོང་གྲོལ་རིན་པོ་ཆེ་བརྙན་འཕྲིན་བརྒྱུད་དེ་ཧ་ཅང་གསལ་བོར་མཇལ་ཐུབ་པས། ཁོང་གི་སྐུ་གསུང་ཐུགས་ཀྱི་ཡོན་ཏན་དྲན་བཞིན་རང་དབང་མེད་པར་མིག་ལས་མཆི་མའི་རྒྱུན་དྲག་ཏུ་བཞུར། ཆུ་ཚོད་བཞི་པ་ཙམ་ལ་གསུང་ཆོས་གྲོལ་རྗེས་ཚོམས་ཆེན་བར་ཁྱམས་སུ་འབྲུག་པ་བཀའ་བརྒྱུད་པའི་བླ་ཆེན་གྱི་གྲས་ཆོས་མགོན་རིན་པོ་ཆེ་དང་མཇལ་ཞིང་། དེ་ནས་ཨེ་རླུང་སྙན་སྒྲོན་པ་ཤེས་རབ་ལགས་དང་དུས་ཆད་བཟོས་ཡོད་པ་ལྟར་ཁོང་དང་ཐུག་ནས་འཁྱག་སྤྲི་ཟ་ཁང་དེར་སོང་ནས་ཁ་བརྡ་ཏོག་ཙམ་ཞིག་བྱས་ཤིང་། དེ་ནས་ཁོང་གི་གྲོགས་པོ་གྲྭ་པ་ཞིག་དང་མཉམ་དུ་ཝི་ཐི་ནམ་གྱི་ཟ་ཁང་ཞིག་ཏུ་སོང་ནས་ཐུག་པ་ཞིམ་པོ་དཔེ་མེད་ཅིག་བཏུངས་རྗེས་གྲྭ་པ་དེ་དང་འགྲོགས་ནས་ཕྱིར་མགྲོན་ཁང་དུ་ལོག་སྟེ་གཟུགས་པོ་བཀྲུས་རྗེས་གློག་ཀླད་བཟུང་ནས་ཤོད་དུ་བབས་ཏེ་ཉིན་ཐོ་འདི་བྲིས།