འཇིགས་མེད་བློ་གྲོས།
འཇིག་རྟེན་ཡང་རྩེ་སྲིད་པའི་གངས་ཁྲོད་དུ།།
བཅུ་ཕྲག་རིག་པའི་གད་རྒྱངས་དང་པོ་ཡིས།།
གདོད་མའི་འབྲོང་གཡག་གཉིད་ལས་སློང་བ་པོ།།
འཕྲོག་བྱེད་གདོང་ལྔའི་དབང་པོ་ས་པཎ་རྒྱལ།།
བོད་ཡུལ་ཁ་བ་ཅན་གྱི་ལྗོངས་སུ་སྔོན་གྱི་བྱུང་བ་རིང་མོའི་ནང་ཆོས་སྲིད་རིག་གནས་གང་ལ་ཡང་བྱས་པ་དང་བཀྲིན་གྱི་ཕུང་པོ་རགས་ལ་སྦོམ་ཞིང་། དུས་འགྱུར་གྱི་ཆོས་ཉིད་ལས་གངས་ཅན་བསྟན་སྲིད་སྲོག་གི་ཀ་བ་རྨང་ནས་འགྱེལ་ཏེ་རྒྱལ་འབངས་སྤྲང་ལ་འཁྱར་བའི་དུས་སུ་ཡང་། སྤྱི་དོན་དམ་ཚིག་དང་ལར་ཞེན་གྱི་བརྟུལ་ཞུགས་གཅིག་ཏུ་རྣམ་པར་དཀར་ལ། འཇིགས་ཞུམ་དང་འགྱུར་བ་མེད་པར་༸གོང་ས་རྒྱལ་བའི་དབང་པོའི་དབུ་འོག་དཔུང་འདེགས་ཀྱི་ཁུར་ཆེན་སྙིང་སྟོབས་ཀྱི་ཕྲག་གོང་བརྟན་པོ་རུ་འཁྱེར་བའི་ཐེག་པ་ཆེན་པོ་བ་གཅིག་ནི་དཔལ་ས་སྐྱ་པའོ། །
དེ་ལྟ་བུའི་ཆོས་བརྒྱུད་ཆེན་པོ་འདིས་ནི་གང་ལ་བརྟེན་ནས་རྣམ་མཁྱེན་བླ་ན་མེད་པའི་གོ་འཕང་དམ་པར་བགྲོད་པའི་ལམ་བསྟན་པའི་གཞི་མ་སོ་ཐར་གྱི་སྡོམ་རྒྱུན་དང་བསྟན་པའི་གཞུང་ཤིང་མདོ་ཕ་རོལ་ཏུ་ཕྱིན་པའི་ལྟ་བ། བསྟན་པའི་སྙིང་པོ་གསང་སྔགས་ལམ་འབྲས་ཀྱི་ཆོས་སྐོར་སོགས་མདོ་རྒྱུད་གདམས་པའི་ཁུངས་འཕགས་ཡུལ་གྱི་པཎ་གྲུབ་དངོས་མ་ལ་ཐོད་གཏུགས་ཏེ་གཏན་ལ་ཕབ་ཅིང་། ལོ་ངོ་བརྒྱ་ཕྲག་དུ་མའི་བྱུང་རབས་ནང་ཡུལ་གངས་ཅན་གྱི་ཕྱོགས་ཀྱི་མཁས་པ་ཁྲི་སྟོང་མང་པོའི་མདོ་བསྟན་ལུང་རིགས་ཀྱི་རྒོལ་རྡུང་དྲག་པོའི་གྲུབ་མཐའི་གཡུལ་ས་ནས་དཔུང་བརྡར་ཏེ་འཆི་མེད་སྲོག་གི་རྒྱལ་མཚན་གངས་ཅན་གྱི་སྤོ་ལ་འཛུགས་པར་མཛད་ཕྱིར། གཞི་ལམ་འབྲས་བུའི་ཆ་གང་ལ་ཡང་ལུང་རིགས་ཀྱིས་གཞོམ་གཞིག་མི་ནུས་པའི་རྡོ་རྗེའི་གཟེར་རྣོན་ཐེབས་པའི་རིང་ལུགས་འདིར་ཐོས་བསམ་གྱི་གོ་སྐབས་ཅུང་ཞིག་ཐོབ་པའི་དགའ་བ་ནི་སྲིད་པའི་རྙེད་པ་ཅི་ཞིག་ཐོབ་པའི་དགའ་བས་ཀྱང་མཚོན་པར་མི་ནུས།
རྫོང་གསར་མཁྱེན་བརྩེ་རིན་པོ་ཆེ་འཇམ་དབྱངས་ཐུབ་བསྟན་ཆོས་ཀྱི་རྒྱ་མཚོའི་ཞལ་སྔ་ནས་དང་ཞིང་གཤེགས་དམ་པ་ངེས་དོན་གྱི་མཁས་གྲུབ་ཆེན་པོ་མཁན་ཆེན་ཀུན་དགའ་དབང་ཕྱུག་སོགས་བསྟན་འཛིན་དམ་པ་དུ་མའི་གཞལ་མེད་ཐུགས་བསྐྱེད་དང་བསོད་ནམས་ལས་བསྐྲུན་ཅིང་སྣོད་བཅུད་ཀྱི་བཀོད་པ་བཟང་པོས་ཀུན་ནས་མཛེས་པའི་རྫོང་གསར་བཤད་གྲྭ་ཆོས་ཀྱི་བློ་གྲོས་སུ། ངེད་ཅག་རིགས་སློབ་ཀྱི་སློབ་གཉེར་བ་ཁག་ཅིག་སྤྱི་ཟླ་ ༧ ཚེས་ ༤ ལ་ཞབས་གཅར་ཞུས་ཤིང་། དཔལ་ས་སྐྱ་པའི་བཤད་སྒྲུབ་ཀྱི་ཆོས་སྡེ་ཆེན་པོ་འདིའི་མཁན་བླ་འདུས་མང་ཡོངས་ཀྱི་བླ་མེད་གཟིགས་པ་དམ་པའི་ཐུགས་འཁུར་དང་གྱ་ནོམ་ཕུན་སུམ་ཚོགས་པའི་མཐུན་རྐྱེན་འོག་༸གོང་ས་མཆོག་གི་འཁྲུངས་ཚེས་ཀྱི་དུས་བཟང་དགེ་བའི་ཉིན་འཇམ་དབྱངས་ས་པཎ་གྱིས་བརྩམས་པའི་བསྟན་བཅོས་ཐུབ་པའི་དགོངས་གསལ་སོགས་ལ་ཐོས་བསམ་བྱེད་པའི་བྱ་བའི་དབུ་བརྩམས་སོ།།
འཇམ་མགོན་ཀོང་སྤྲུལ་བློ་གྲོས་མཐའ་ཡས་ཀྱིས་བསྟན་བཅོས་ཤེས་བྱ་ཀུན་ཁྱབ་ཏུ། དེས་ན་ཀར་ལུགས་ཀྱི་བཤད་སྲོལ་འདི་དག་གི་ཁུངས་ཕལ་ཆེར་ས་ལུགས་དང་དེ་ལས་རོང་སྟོན་ཆེན་པོའི་བཤད་སྲོལ་ཡིན་ལ། ཕྱིས་ནས་རང་ལུགས་འབུར་དོད་ཀྱི་བཤད་སྲོལ་བཏོད་པ་ཡིན་པའང་ཤེས་པར་བྱའོ། །ཞེས་དང་། མང་ཐོས་ཀླུ་སྒྲུབ་རྒྱ་མཚོས་རྟོགས་བརྗོད་དཔལ་གྱི་འཁྲི་ཤིང་ལས། རེད་འདའ་བ་ཞེས་རྣམ་དཔྱོད་ཨུཏྤ་ལའི། །ཟེ་འབྲུའི་དཔལ་ལས་བློ་བཟང་ཚངས་པའི་གདོང་། །རིག་བྱེད་དང་འགྲོགས་མཐའ་བྲལ་ལྟ་བ་ཡི། །རྔ་དབྱངས་ཟེགས་མ་དཔལ་གྱི་དགའ་ཆར་འབེབས། །ཞེས་དང་། རིས་མེད་བསྟན་པའི་བདག་པོ་རྫོང་གསར་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ཀྱིས། ཐེག་པ་མཐའ་དག་གི་སྙིང་པོ་མདོ་ཙམ་བརྗོད་པ་ཆོས་ཀྱི་སྒོ་འབྱེད་ལས། བུ་ལུགས་ཇོ་ནང་བོ་དོང་ཞེས་གྲགས་རྣམས། །རྟེན་གཞིའི་རྩ་བ་ས་སྐྱ་པ་ལས་གྱེས། །མདོ་སྔགས་བཞེད་པ་ཅུང་ཟད་འབུར་དོད་ཡོད། །ཞེས་སོགས་གསུངས་པ་ལྟར་དཔལ་ས་སྐྱ་པ་ནི་ཀར་དགེ་བུ་ཇོ་སོགས་གངས་ཅན་གྲུབ་མཐའ་ཕལ་ཆེར་ཞིག་དང་། མང་ཐོས་མཁས་གྲུབ་ཀྱི་སྐྱེ་བོ་གྲངས་ལས་འདས་པའི་གཞུང་བཤད་བསྟན་པ་རྒྱ་མཚོའི་ཁུངས་གཏུགས་ཡུལ་དུ་གྱུར་ཅིང་། དཔལ་ན་ལེནྜའི་པཎ་གྲུབ་དམ་པ་རྣམས་ཀྱིས་བྱས་པའི་བསྟན་པ་སྤྱིའི་གཞུང་འགྲེལ་ཁག་ལ་ངེས་དོན་གྱི་བཀུར་སྟི་ཞབས་ཏོག་སྒྲུབ་པའི་བཀའ་བབ་ཀྱི་ཆོས་བརྒྱུད་ཅིག་ཀྱང་ཡིན་པར་སྙམ། དེ་ཡང་། འཇམ་མགོན་ཆོས་ཀྱི་བློ་གྲོས་ཀྱིས། བཤད་པའི་བཀའ་བབ་ས་སྐྱ་དགེ་ལྡན་གཉིས། །སྒྲུབ་པའི་བཀའ་བབ་བཀའ་རྙིང་ཞེས་གྲགས་ཀྱང་། །ཞེས་གསུངས་པ་ལྟར་སྔོན་གྱི་ས་སྐྱ་དང་ཕྱིས་ཀྱི་དགེ་ལྡན་པ་གཉིས་ལ་གཞན་གྱིས་འགྲན་པར་མི་ནུས་པའི་བཤད་པའི་བསྟན་པ་བླར་འདེགས་ཀྱི་མཐུ་སྟོབས་གྲུབ་པའི་ཉེར་ལེན་ནི་འཇམ་དབྱངས་ཡི་དམ་དུ་བསྙེན་པ་ལས་ཡིན་པ་འཇམ་མགོན་མི་ཕམ་པས་གསུངས་པ་ཤིན་ཏུ་མད།
ཁོར་ཡུག་གི་གནས་སྟངས་ལས་སྔོན་དུས་སྟག་ཚང་ལོ་ཙཱ་བ་དང་གོ་རམས་པ་ཟེར་བའི་མཚན་ཐོས་པའི་ཚེ་ན་དགེ་ལྡན་པའི་མཁས་པ་དང་གྲུབ་མཐའི་འཁོན་རྩོད་གྱི་བསམ་པ་ཤུགས་དྲག་མངའ་བའི་རྟོག་གེ་བ་དེ་འདྲ་ཞིག་ཨེ་ཡིན་ནམ་སྙམ་པ་ཡུན་དུ་དྲན་མྱོང་། དེ་ཡང་ཀུན་མཁྱེན་བསོད་ནམས་སེངྒེའི་མཚན་གྱི་དང་པོ་དགེ་ཆོས་ཀྱི་གསེར་ཐང་ལས་མཇལ་ཞིང་། དེ་ཡང་དགེ་ཆོས་ར་ཧུལ་པཎྜི་ཏ་དང་མཉམ་ངོར་ཨེ་ཝྃ་ཆོས་ལྡན་དུ་ཕེབས་སྐབས་ཀྱི་ཚོར་སྣང་ཞིག་ལ་དགོན་པ་དེར་གོ་རམས་པའི་ཁ་ཤུགས་ད་དུང་ཡང་གསོན་པ་ལྟ་བུར་ལྷག་འདུག་གསུངས་པ་མཇལ་སྐབས། གོ་རམས་པ་ཟེར་དུས་ཐུགས་རྒྱུད་གཏུམ་པོ་ཡིན་པའི་མཁས་པ་ཞིག་མིན་ནམ་བསམ་པའི་ཐེ་ཚོམ་ཡང་འཆང་དགོས་པར་གྱུར་མོད། ད་དུས་སྔོན་གྱི་མཁས་པ་ཀློ་བོ་མཁན་ཆེན་དང་ཨའུ་གཞོན་ནུ་བཟང་པོ། ཀོང་སྟོན་དབང་ཕྱུག་གྲུབ་པའི་དཔལ་སོགས་ཀྱིས་བྱས་པའི་ཀུན་མཁྱེན་གྱི་རྣམ་ཐར་གསེར་གྱི་ཕྲེང་བ་ལྟ་བུ་དང་། ཀུན་མཁྱེན་དེ་ཉིད་ཀྱི་གསུང་གི་བདུད་རྩིའི་གཟེགས་མ་ཙམ་ཞིག་མཇལ་བའི་སྐལ་ཆུང་དུ་གྱུར་པ་ཙམ་གྱིས་ཀྱང་། མུས་ཆེན་སེམས་དཔའ་ཆེན་པོས་ས་སྐྱ་པའི་མི་གཅིག་པུར་བསྔགས་པའི་མཁས་གྲུབ་གང་དེ་མ་བཅོས་དད་འདུན་ངང་གིས་སྐྱེ་བའི་ཡུལ་དམ་པར་གྱུར་ཅིང་། གཟན་ཤམ་དམར་པོ་གྱོན་པའི་བདག་རྐྱེན་ལས་ཡོན་སྐལ་སྒོར་རྡོག་རེ་འགས་མ་བཏང་ཙམ་གྱི་འཁོས་ཆུང་གི་བརྟུལ་ཞུགས་ལ་གནས་མོད། ཀུན་མཁྱེན་བསོད་ནམས་སེངྒེའི་གསུང་འབུམ་ཡོངས་རྫོགས་མེད་ན་འགྲིག་ཐབས་མེད་པའི་ངེས་པ་བརྟན་པོ་ཞིག་གིས་བླུ་ཡོན་ཞུ་བའི་སྤོབས་པ་བསྐྱེད།
ལྷག་ཏུ་དྲོད་རླངས་མ་ཡལ་བའི་ཀུན་མཁྱེན་བསོད་ནམས་སེངྒེའི་ཞལ་རྒྱུན་དང་གདམས་པ་གསོས་པ་ཐུགས་ཀྱི་གཅེས་ནོར་དུ་རུམ་ཞིང་། ངོར་ཨེ་ཝྃ་ཆོས་ལྡན་སོགས་དཔལ་ས་སྐྱའི་ཆོས་སྡེ་ཆེན་པོ་དག་གི་ཐོས་བསམ་ཕྱག་སྲོལ་གྱི་རྒྱུན་བཟང་ཉམས་མེད་དུ་སྐྱོང་བཞིན་པའི་ས་ལུགས་ཀྱི་འདུས་སྡེ་དངོས་མའི་ནང་ཆོས་དང་ཟང་ཟིང་གི་མཐུན་རྐྱེན་ལ་མཉམ་གཅིག་ཏུ་སྤྱད་དེ་མྱོང་བ་རང་རྒྱུད་ཀྱི་ཚོར་བ་དྭངས་མར་བསྟེན་པའི་གོ་སྐབས་ཐོབ་པའི་ཚེ། རྗེ་བཙུན་ཙོང་ཁ་པས། ཉིན་མཚན་དུས་ནི་ཐམས་ཅད་དུ། །བསྟན་པ་འབའ་ཞིག་དགོངས་པ་ཁྱོད། །སྙིགས་དུས་འགྲོ་བ་སྐྱབས་མེད་ལ། །རྒྱལ་བ་བས་ཀྱང་ཐུགས་རྗེ་ཆེ། །ཞེས་འཇམ་དབྱངས་ས་པཎ་ལ་བསྔགས་པའི་བསྟོད་ཚིག་འདིའི་ཡུལ་དུ། ༸གོང་ས་ལྔ་པས། ཤེས་བྱར་སྲིད་ཀུན་མང་ཐོས་གསེར་སྒོང་དུ། །རྣམ་དཔྱོད་དྲོད་ཀྱིས་སྨིན་པ་ཚངས་པའི་སྤུན། །འཇིག་རྟེན་མིག་གཅིག་སྟག་ཚང་ལོ་ཙཱ་བ། །ངེས་པ་དོན་ལྡན་མཧཱ་པཎྜི་ཏ། །ཞེས་མཧཱ་པཎྜི་ཏའི་མཚན་སྙན་གསོལ་བའི་གཙང་གི་སྟག་ལོ་ཤེས་རབ་རིན་ཆེན་དང་། རྫོགས་ཆེན་གཞན་དགའ་རིན་པོ་ཆེས། རབ་འབྱམས་གཞུང་ལུགས་སྟོང་གི་གངས་རིའི་སྤོར། །སྒྲ་ཚད་དངོས་སྟོབས་རིགས་པའི་མཆེ་ཟུང་དང་། །དཔྱད་གསུམ་དག་པའི་རྩལ་རྫོགས་གདོང་ལྔ་པ། །ཕས་རྒོལ་གླང་ཆེན་མགོ་བོ་འགེམས་པར་བྱས། །སྔོན་དུས་སྤྲུལ་པའི་ལོ་པཎ་གཤེགས་པའི་ཤུལ། །འཇམ་མགོན་ཆོས་རྗེ་བླ་མའི་དགོངས་པའི་མཐིལ། །དཔལ་ལྡན་ས་སྐྱ་པ་ཡི་གྲུབ་པའི་མཐའ། །ཁྱེད་གཅིག་ཁོ་ནས་འཛིན་གྱི་གཞན་གྱིས་མིན། །ཞེས་དཔལ་ས་སྐྱའི་བསྟན་འཛིན་གྱི་དམ་པ་གཅིག་པུར་བསྔགས་པའི་ཁམས་ཀྱི་གོ་རམས་བསོད་ནམས་སེངྒེ་སོགས་ས་ཕྱོགས་ཀྱི་ཕྱིས་བྱུང་མཁས་གྲུབ་ཆེན་པོ་དེ་དག་ཀྱང་གཟི་བྱིན་ཁྲ་ལེར་བཞུགས་སུ་རུང་བའི་དད་སེམས་མ་བཅོས་པ་ཐོབ།
ཁོ་བོ་རྨོངས་པའི་སེམས་ཀྱི་འཆར་སྣང་ལ། གངས་ཅན་སྒྲུབ་བརྒྱུད་ཤིང་རྟ་བརྒྱད་ཆར་གྱི་མཐར་ཐུག་གི་དགོངས་པའི་གཏད་སོ་ཀུན་གྱི་མགྲིན་དབྱངས་གཅིག་པ་ཡིན་པའི་མཐུན་སྣང་གི་ཆོས་ཅན་གཅིག་ཐོག་ཏུ་འབབ་རྒྱུ་ཤིན་ཏུ་དཀའ་ཞིང་། དེ་ལྟར་འབབ་ཀྱང་མི་དགོས་མོད། འོན་ཀྱང་ཤིང་རྟ་བརྒྱད་ཆར་གྱི་ལུགས་འཛིན་མཁས་གྲུབ་ཀྱི་དམ་པ་རྗེས་འབྲངས་དང་བཅས་པར་དད་པ་དང་འདུན་པའི་འཁྱེར་སོར་རིང་ཐུང་མ་གྱུར་པ་ཅིག་ནི་འོང་དུ་བཏུབ་ལ་འོང་དགོས་པ་ཞིག་ཀྱང་སྣང་། དེ་ཡང་པཎ་ཆེན་ཤཱཀྱ་མཆོག་ལྡན་དྲི་མེད་ལེགས་པའི་བློ་གྲོས་ཀྱིས། སྲོལ་འབྱེད་གསུམ་པོ་དེ་དག་ནི་ཕན་ཚུན་དུ་དགོངས་པ་མཐུན་མི་མཐུན་ཅི་རིགས་པར་བྱུང་ཞིང་། རྩ་བའི་གཞུང་ཐད་སོར་འཇོག་མི་འཇོག་དང་འཕགས་ཡུལ་གྱི་འགྲེལ་པ་ཚད་ལྡན་དུ་གྲགས་པ་དག་ལ་དགག་བཞག་སྣ་ཚོགས་པར་མཛད་མོད། གསུམ་པོ་དེ་དག་བོད་ཀྱི་འགྲེལ་མཛད་ཚད་ལྡན་དུ་བྱེད་དགོས་ཏེ། ཐུགས་རྒྱུད་བྱང་ཆུབ་ཀྱི་སེམས་ཀྱིས་ཕྱུག བདེ་བར་གཤེགས་པའི་གསུང་རབ་རབ་འབྱམས་ཐུགས་སུ་ཆུད། དངོས་བརྒྱུད་ཀྱི་སྒོ་ནས་མཛད་པ་འཕྲིན་ལས་བསམ་གྱིས་མི་ཁྱབ་པའི་ཕྱིར་རོ། །ཞེས་གསུངས་པ་ལྟར། སྒྲུབ་བརྒྱུད་ཤིང་རྟ་བརྒྱད་ཀྱི་སྲོལ་འཛིན་རྗེས་འབྲངས་མཁས་གྲུབ་དམ་པ་རྣམས་ནི་མཐར་ཐུག་གི་ལྟ་བ་རང་སྟོང་དང་གཞན་སྟོང་། མེད་དགག་དང་མ་ཡིན་དགག ཁས་ལེན་ཡོད་མེད་སོགས་རིང་ཐུང་དང་ཉེ་འགྱངས་སྣ་ཚོགས་སུ་གྱུར་འདུག་པ་དངོས་དོན་དེ་ལྟ་ནའང་། ཐུགས་དམ་གྱི་མཐིལ་ཉིད་དུ་འཆང་རྒྱུའི་དོན་པོ་ཅིག་ཡོད་པ་ནི་སེམས་ཅན་གྱི་བདེ་སྐྱིད་དང་སངས་རྒྱས་ཀྱི་བསྟན་པ་འབའ་ཞིག་ཏུ་སྣང་བས། དགོངས་པའི་ཆུ་བོ་བསྟན་པ་རྒྱས་ཤིང་འགྲོ་བ་བདེ་བའི་ངེས་དོན་གྱི་རྒྱ་མཚོ་ཆེན་པོར་ཕྱམ་གཅིག་ཏུ་གཞོལ་བར་མི་མཚུངས་པ་མེད་པ་དེ་ལྟ་ན། སྣ་ཚོགས་སུ་སྣང་བའི་ལྟ་བའི་ཡོ་ལང་ནི་ཇི་ལྟར་ཆེ་ཞིང་འཇགས་པར་དཀའ་ཡང་། དཔལ་ལྡན་ཟླ་བས། དེ་ཕྱིར་མཁས་པ་རིན་པོ་ཆེ་ཡི་གླིང་དུ་ཆས་པའི་སྐྱེ་ཚོགས་ཀྱི། །ངལ་བ་ཉེར་སེལ་གྲོང་ཁྱེར་ཡིད་འོང་བར་དུ་རྣམ་པར་བཀོད་པ་ལྟར། །ཞེས་གསུངས་པའི་དཔེ་ཡིས་མཚོན་པར་བྱ་བའི་དོན་གཅིག་པུ་ཉིད་དུ་གྱུར་པ་ལགས་ན། ཀུན་ལ་དད་པའི་བསམ་པ་གཡག་རྭ་གཡས་གཡོན་ལྟར་རིང་ཐུང་མེད་པའི་ཚད་མཉམ་ཅིག་བསྐྱེད་དུ་བཏུབ་པའི་གནད་མཐོང་ངོ་།།
ད་ནས་བརྩིས་པའི་ལོ་ངོ་གཅིག་དང་ཉིན་ཞག་བཅུ་གསུམ་ཙམ་གྱི་ཡར་སྔོན་ཏེ། སྤྱི་ལོ་ ༢༠༡༢ ལོའི་སྤྱི་ཟླ་ ༨ ཚེས་ ༣ ཉིན། ཁོ་བོས་མཚུངས་མེད་དྭགས་པོ་བཀའ་བརྒྱུད་པའི་གདན་ས་ཆེན་པོ་དཔལ་སྤུངས་ཤེས་རབ་གླིང་ནས་རང་གི་མ་བཅོས་པའི་སེམས་ཚོར་ཡི་གེར་ཕབ་སྟེ། དེང་གི་སློབ་གཉེར་བ་སྒེར་པ་དང་ཆོས་སྡེ་ཁག་གིས་རང་ལུགས་ཀྱི་ལྕགས་རི་སྲ་མཁྲེགས་དེའི་ནང་རོལ་འབའ་ཞིག་ཏུ་གུ་དོག་གི་བརྟུལ་ཞུགས་ལ་གནས་པ་ཙམ་མིན་པར་ལུགས་གཞན་དང་གཞན་གྱི་ཆོས་སྡེ་ཁག་ཏུ། བྱུང་ན་ལྟ་བའི་འགངས་སྟོན་པའི་བསྟན་བཅོས་ཁག་ལ་ཐོས་བསམ་སློབ་གཉེར་བྱེད་པའི་ལམ་སྲོལ་ཞིག་དང་། མ་བྱུང་ཡང་ཆོས་བརྒྱུད་དེ་དང་དེའི་དམ་པ་གོང་མ་དག་གིས་བསྟན་པ་སྤྱི་སྒོས་ལ་བསྐྱངས་པའི་མཛད་པ་དང་རྣམ་ཐར་གྱི་རིགས་དག་མཁྱེན་རྟོགས་ཀྱི་ཕྱིར། ཉིན་ཞག་དང་ལོ་ཟླའི་དུས་བཅད་ཀྱིས་ཆོས་ཀྱི་རྙེད་པ་སྒྲུབ་ཕྱིར་ཕེབས་ཐུབ་ན། རང་གཞན་ཀུན་ཕན་གྱི་གོ་སྐབས་བཟང་པོ་ཞིག་ངེས་པར་འདུག་པས་དེ་ལུགས་རྣམ་དཔྱོད་དང་ཕུགས་རྒྱང་གི་བསམ་པ་མངའ་བའི་སྤྱི་སྒེར་དག་གིས་དགོངས་པར་མཛོད་ཅེས་སེམས་གཏམ་རླུང་ལ་བསྐུར་མྱོང་བ་དེ་རིང་ཡང་དྲན་གསོ་ཞུ་བཞིན་ཡོད།
ཁོ་བོ་ཐོས་པ་ཆུང་བས་བློ་ཡུལ་དུ་མ་གྱུར་པས་ཡིན་སྲིད། ད་ལྟ་བར་མཐོང་ཤིང་ཐོས་པའི་མཁས་གྲུབ་ཀྱི་གྲས་ནས་རིས་མེད་པའི་བསྟན་པར་དག་སྣང་སྣང་བ་དཀར་པོས་གཅིག་ཏུ་ཞུགས་སྟེ་རང་དོན་མཁས་བཙུན་བཟང་པོའི་རིས་མེད་པའི་རྟོགས་པའི་ཡོན་ཏན་གྱིས་ཕྱུག་ཅིང་། གཞན་དོན་འཆད་རྩོད་རྩོམ་པའི་རིས་མེད་པའི་ལུང་ཆོས་ལ་གསན་གཟིགས་ཀྱི་མཁྱེན་པ་རྒྱས་པའི་མཁས་གྲུབ་ཅིག་ལ་དཔལ་ས་སྐྱ་པའི་ཆོས་བརྒྱུད་ནང་བྱུང་བ་འདྲ་བ་ཅིག་སྒྲུབ་བརྒྱུད་ཤིང་རྟ་བརྒྱད་པོ་གང་གི་ལུགས་ལ་ཡང་མ་བྱུང་བར་སྣང་། ས་ལུགས་ཀྱི་རིས་མེད་པའི་མཁས་པ་རྣམས་ནི་རང་ཉིད་རིས་མེད་ཀྱི་ཉམས་ལེན་ཐུགས་དམ་གྱི་མཐིལ་ཉིད་དུ་མཛད་པ་ཙམ་མིན་པར། བུ་སློབ་ཡང་སློབ་དང་བཅས་པ་ཡང་སྲོལ་བཟང་དེ་ཉིད་ལ་འགོད་པའི་མཛད་པ་དང་གདམས་པ་ནན་ཏན་གྱིས་འདོམས་བཞིན་ཡོད་པར་སྣང་སྟེ། མཁྱེན་བརྩེ་ཆོས་བློས་ས་སྐྱ་མཁན་ཆེན་རིན་ཆེན་བཟང་པོར། ཆོས་ཡང་ཟབ་རྫོགས་པ་ཆེན་པོ་ཡི། །གནད་ཟབ་མོ་བླ་མའི་དྲིན་རྙེད་དང་། །དཔལ་བིར་ཝ་པ་ཡི་སྙན་རྒྱུད་ཀྱི། །ཆོས་གསུང་ངག་ཡིད་བཞིན་ནོར་བུ་གཉིས། །ཁྲིད་ཚུལ་དེ་རིམ་དང་ཅིག་ཆར་གྱི། །ཁྱད་ཙམ་ལས་དོན་གནད་གཅིག་ཏུ་བབས། །ལར་གྲུབ་མཐའ་ཀུན་ལ་ཕྱོགས་རིས་སྤང། །ཞེས་གདམས་ཤིང་། ཡང་མཁན་ཆེན་དེ་ཉིད་ཀྱིས་བླ་མ་དེ་ཉིད་ལ་ཐུགས་དམ་བརྟག་ཞུ་ཕུལ་བའི་ལྗགས་ལན་ཞིག་ཏུ། ཕྱག་རྫོགས་དབུ་གསུམ་གཅིག་སྒྲིལ་གྱིས་ཉམས་སུ་ལེན་དགོས་པའི་བཀའ་ཕེབས་པ་ལྟ་བུ་ཡིན།
གྲུབ་བརྒྱའི་སྤྱི་མེས་རྗེ་བཙུན་བཞད་པའི་རྡོ་རྗེས། ཕྱག་རྒྱ་ཆེན་པོས་མདུན་ནས་བཙིར། །རྫོགས་པ་ཆེན་པོས་རྒྱབ་ནས་བཙིར། །ཁ་ནས་གདམས་ངག་ཁྲག་ཏུ་བསྐྱུག །གསུངས་པ་ལྟར། ཉམས་ལེན་པ་གཅིག་གིས་ཕྱག་རྫོགས་ཀྱི་གདམས་པ་འགལ་མེད་ཟུང་སྦྲེལ་དུ་སྟན་ཐོག་གཅིག་ལ་གྲུ་བཞི་ལམ་འཁྱེར་མཛད་པའི་བརྟུལ་ཞུགས་མཐོན་པོའི་ཉམས་ལེན་ནི་རྟོགས་པ་མཆོག་གི་གོ་འཕང་ལ་གནས་པའི་དམ་པའི་སྐྱེས་བུ་འབའ་ཞིག་གི་སྤྱོད་ཡུལ་ཡིན་གྱི། མི་དགེ་བཅུ་སྤོང་གི་ཉམས་ལེན་ཙམ་ཡང་ཚུལ་མཐུན་དུ་སྤྱོད་དུ་མི་ནུས་པའི་རང་ཅག་འདྲ་བའི་གོ་སྐལ་དུ་ག་ལ་རུང་སྟེ་མི་རུང་ཞིང་། ཀཿཐོག་དབུ་འོད་ཡེ་ཤེས་འབུམ་གྱིས་འཇམ་དབྱངས་ས་པཎ་ལ། བགེགས་སྐྲོད་པ་དེ་ངེད་རྙིང་མ་བས་བྱེད། ཡེ་ཤེས་པ་ཞུགས་པ་ལ་ཁྱེད་གསར་མ་བས་མཛོད། ཅེས་ཞུས་པ་ལྟར། ཆོ་ག་ཕྱག་ལེན་གྱི་ཆོས་སྤྱོད་བྱེད་པའི་ཚེ་ནའང་གང་ལ་བསྔགས་པ་དེ་ཉིད་ལེན་པ་ལྟ་བུའི་གསར་རྙིང་ལེགས་ཆ་བསྡུ་ལེན་གྱི་རྣམ་ཐར་དེ་དག་ཀྱང་རང་ཅག་གིས་མི་འཁྱོངས་མོད། འོན་ཀྱང་བྱང་སེམས་ཆེན་པོ་ཁུ་ནུ་བླ་མ་རིན་པོ་ཆེ་བསྟན་འཛིན་རྒྱལ་མཚན་ཞབས་ཀྱིས་ཉིད་ལ་གསུངས་པའི་གསོལ་འདེབས་ནང། ཐུབ་བསྟན་དྲི་མ་མེད་པ་བདུད་རྩིའི་དཔལ། །ལེགས་པར་གཏམས་པ་དམ་པ་དུ་མའི་ཞབས། །སྒོ་གསུམ་གུས་པས་གཙུག་གི་རྒྱན་དུ་བསྟེན། །བསྟན་འཛིན་རྒྱལ་མཚན་ཞབས་ལ་གསོལ་བ་འདེབས། །ཞེས་དང་། འཇམ་དབྱངས་མཁྱེན་བརྩེ་རིན་པོ་ཆེའི་རྣམ་ཐར་ཞལ་གསུང་མ་ལས། མདོར་ན་ཡོངས་འཛིན་བརྒྱད་ཅུ་ལྷག །བསྟེན་ནས་དམ་ཆོས་རྒྱ་ཆེར་ཐོབ། །བོད་ཡུལ་ཤིང་རྟ་ཆེ་བརྒྱད་པོ། །ཀུན་ལ་དག་སྣང་ཆེར་བསྐྱེད་ཅིང་། །ལོག་རྟོག་སྒྲིབ་པས་མ་གོས་ཤིང་། །གཤེ་སྐུར་གྲུབ་མཐའི་ཕྱོགས་འཛིན་སྤངས། །དབང་ཁྲིད་མན་ངག་རྒྱུད་ལུང་རྣམས། །རྒྱུན་བཞུགས་ཐམས་ཅད་འབད་པ་ཆེས། །ཉན་དང་མཉན་པར་འགྱུར་བར་སྨོན། །གསུངས་པ་ལྟར་ཕྱོགས་དང་མཚམས་སུ་བཞུགས་པའི་དམ་པའི་སྐྱེས་བུ་རིས་སུ་མ་ཆད་པར་སྒོ་གསུམ་གུས་པས་བསྟེན་ཏེ་ལུགས་སོ་སོའི་བརྒྱུད་པ་གོང་མ་ལས་བྱུང་བའི་གཞུང་བཤད་ཀྱི་འཆད་ཉན་ལ་བརྩོན་པའི་བརྟུལ་ཞུགས་བཟུང་ནས་རིས་མེད་འབྲིང་གི་རྣམ་ཐར་གྱི་ཆ་ཤས་ཙམ་སྐྱོང་བའི་གོ་སྐབས་ནི་རང་ཅག་རྣམས་ལ་ཡང་འབྱུང་དུ་རུང་ཞིང་། བསྒྲུབ་ནུས་པ་ཞིག་ཀྱང་ཡིན་པས། སྙིགས་མ་ལྔའི་ནམ་ལངས་ཤིང་བསྟན་པའི་ཉི་རྒས་རྒྱང་དུ་བཞུད་པའི་དུས་མཐའ་འདི་འདྲར་བརྟུལ་ཞུགས་འདི་ལྟ་བུ་བདག་གིར་བྱེད་པའི་གོ་སྐབས་ཀྱང་ཨུ་དུམ་ཝ་རའི་མེ་ཏོག་ལས་ཀྱང་གཙིགས་ཆེ་བར་འཛིན་དགོས་པར་མཐོང་ངོ་།།
དེ་ལྟ་མིན་པར་ཇོ་ནང་ཀུན་མཁྱེན་སྒྲོལ་མགོན་ཞབས་ཀྱི་རང་རྣམ་དུ། རང་ཉིད་ལྟ་བ་མཆོག་ཏུ་འཛིན། སངས་རྒྱས་པའི་གྲུབ་མཐའ་གཞན་རྣམས་ལ་དགྲར་ལྟ། མུ་སྟེགས་ལ་སོགས་པའི་མིང་ཡང་ཐོས་སུ་མི་རུང་བ་སྐད་བྱེད་དེ། བློ་ཆུང་ཤེས་རབ་ཅན་དུ་རེ་བ་ཡ་རེ་ཆ། གསུངས་པ་ལྟ་བུ་ཞིག་ཆགས་ན་ནི་རང་ཉིད་གནས་སའི་ཁྲོན་ཆུང་གི་ནང་དུ་ནི་མཛེས་པ་ཙམ་འོང་སྲིད་ཀྱི། བསྟན་པ་སྤྱིའི་མཛེས་རྒྱན་དུ་འགྱུར་བའི་གོ་སྐབས་ནི་གཏན་ནས་མེད་པ་གསལ་བར་མཐོང་ངོ་། །དེ་བས་རང་ཅག་སློབ་གཉེར་བ་གཞོན་ནུ་རྣམས་ཀྱིས་ཆོས་བརྒྱུད་གཞན་དང་གཞན་གྱི་མཁས་གྲུབ་དམ་པ་རྣམས་ཀྱི་གསུང་གི་བདུད་རྩིའི་ཐིགས་ཕྲན་ཙམ་ཞིག་ཀྱང་མ་མྱངས་ཤིང་། མཛད་སྤྱོད་རྣམ་ཐར་གྱི་ཆ་ཤས་ཕྲ་མོ་ཙམ་ཞིག་ཀྱང་མ་མཐོང་བའི་སྔོན་ནས། མཁས་གྲུབ་དེ་དག་གིས་རང་ཅག་གང་གི་རྗེས་སུ་ཞུགས་སའི་མཁས་པ་དེ་དག་དང་ལྟ་གྲུབ་ཀྱི་རྩོད་པ་མཛད་ཅིང་རྩོད་ཚིག་མི་མཛེས་པ་ཅུང་ཟད་རེ་འཕེན་རེས་མཛད་པའི་གཏམ་ཙམ་ཐོས་པ་རྐྱེན་དུ་སོང་ནས། རང་གི་གྲུབ་མཐའི་ཕྱོགས་སྔར་སོང་བའི་མཁས་པ་དེ་དག་ལ་གཤེ་བ་དང་སྐུར་བར་བྱེད་ཅིང་། མཁས་གྲུབ་དེ་དག་ལ་རང་བཞིན་དུ་ཐོབ་པའི་མཚན་གྱི་དབུའི་ཀུན་མཁྱེན་དང་རྗེ་བཙུན། མཁས་དབང་། པཎ་ཆེན་ཞེས་པ་ལྟ་བུའི་ཆེ་བརྗོད་ཙམ་ཞིག་ཀྱང་ཁ་ནས་བརྗོད་མི་ཕོད་པ་ལྟ་བུས། རྟ་ནག་གོ་བོ། བློ་བཟང་གྲགས་པ། ཟི་ལུང་ཤཱཀ་མཆོག ལྕང་ར་དགེ་ལེགས་པ་ཞེས་པ་ལྟ་བུར་འབོད་པར་བྱེད་པ་ནི། དོན་དམ་དུ་མཁས་པ་དེ་དག་གི་བྱས་པའི་མཚོ་འགྲམ་གྱི་གད་པ་ལྟར་རྔམས་མཐོ་བའི་བསྟན་བཅོས་ཁག་མཐོང་བ་ལྟ་ཅི་རྣ་ཐོས་ཙམ་ཡང་མེད་པའི་རང་རྟགས་གསལ་བར་བསྟན་པ་ཡིན་པས། རང་ཅག་སློབ་གཉེར་བ་རྣམས་ཀྱིས་དམ་པ་ཐུགས་ཁྲེལ་བའི་ལས་འདི་རིགས་རིང་དུ་སྤངས་ཏེ། རིས་མེད་པའི་མཁས་གྲུབ་དམ་པ་རྣམས་ཀྱི་གསུང་རབ་རྣམས་ལ་ཁོམ་པ་ནམ་བྱུང་གི་དུས་སུ་ཕྱོགས་རིས་ཀྱི་བསམ་པ་སྤངས་ཏེ་མཇལ་རྟོག་ཞུ་བའི་སྨོན་ལམ་ཞུའོ།།
གཞུང་ཆེན་མོར་སློབ་གཉེར་མཛད་པའི་དཔྱོད་ལྡན་རྣམས་ཀྱིས་ལམ་སྲོལ་འདི་འདྲ་བར་ཞུགས་དགོས་པ་༸གོང་ས་རྒྱལ་བའི་དབང་པོའི་ཐུགས་ཀྱི་དགོངས་པ་ཡང་ཡིན་ཏེ། ༸གོང་ས་མཆོག་ནས་ ༢༠༠༣ ལོར་ལ་དྭགས་ཞི་བའི་ཚལ་དུ་བཀའ་གནང་བར། “རྒྱ་གར་ལ་འདས་པའི་ལོ་བཞི་བཅུ་ཞེ་གྲངས་ཤིག་གི་རིང་ལ་རིས་མེད་གནང་མཁན་ངས་ངོ་ཤེས་པ་ཁོང་༼ས་སྐྱ་མཁན་ཆེན་རིན་ཆེན་བཟང་པོ།༽གཅིག་པུ་ཡིན། བཀའ་བརྒྱུད་ཀྱི་ཕྱོགས་ལ་དེ་ཙམ་གསན་རྒྱ་ཆེ་བ་མི་འདུག་མ་གཏོགས། ས་སྐྱ་དང་རྙིང་མ། དགེ་ལུགས་གསུམ་གྱི་ལམ་སྲོལ་ལམ་སོ་སོའི་སྙིང་པོ་དེ་ཐུགས་རྒྱུས་དཔྱིས་ཕྱིན་པ་ཡོད་པ་ཧ་ལས་པ་ཡོད། ང་རང་ཚོའི་མཁས་པའི་ནང་ནས་ཁོང་ལྟ་བུ་ཞིག་ཐོན་ཐུབ་ན་བསམས་ནས་ངས་རྟག་པར་དྲན་གྱི་ཡོད། དེ་འདྲ་ཞིག་བྱུང་ན་དངོས་གནས་བསྟན་པ་ལ་ཕན་པ་ཡིན། དེས་དེང་སང་ཕྱི་རྒྱལ་དང་། བོད་ནང་ཁུལ་ལ་ཡང་ཏན་ཏན་ཕན་ཐོགས་ཆེན་པོ་འོང་བར་འདུག ལྷག་པར་མ་འོངས་པར་ང་ཚོ་གཞིས་བྱེས་མཉམ་འཛོམས་བྱུང་བའི་སྐབས་སུ་ཏན་ཏན་ཕན་ཐོགས་ཆེན་པོ་ཡིན།” ཞེས་དང་། ཡང་སྤྱི་ལོ་ ༢༠༠༧ ལོར་ཝཱ་ཎ་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་དུ། “སྔ་མོ་ཡིན་ན་ལྟ་མཁན་པོ་རིན་ཆེན་གྱི་བཟོ་འདྲ་པོ་ཅིག་དངོས་གནས་ངོ་མཚར་སྐྱེ་ཡག་རེད། རིས་སུ་མ་ཆད་པ་གསུང་ཡ་ཡོད་རེད། ད་དེའི་བཟོ་འདྲ་པོ་ཞེ་དྲག་དཀོན་པོ་རེད། ཞེ་དྲག་དཀོན་པོ་རེད།” ཅེས་གསུངས།
འདི་ལྟར་རིས་མེད་ཀྱི་གཞུང་ལུགས་ལ་ཐོས་བསམ་གྱི་རྩལ་ལག་རྫོགས་པའི་མཁས་པ་མང་དག་ཅིག་བྱུང་ན་དགོངས་པའི་༸གོང་ས་རྒྱལ་བའི་དབང་པོའི་ཐུགས་ཀྱི་དགོངས་པ་ཡོངས་སུ་རྫོགས་པ་ཅིག་དང་། གཙུག་ལག་གཞུང་ལུགས་རྒྱ་མཚོ་གུས་རྟག་བརྩོན་པས་བརྒལ་བའི་ཐོས་བསམ་ལ་བྱ་བྲལ་མི་མཛད་པའི་སློབ་གཉེར་བ་གཞོན་ནུ་ཁྲི་སྟོང་མང་པོས་ས་ཆེན་པོའི་སྟེང་གི་བཤད་སྒྲུབ་ཀྱི་ཆོས་སྡེ་ཁེངས་པར་གྱུར་ཅིག་པའི་སྨོན་ལམ་བཅས། དཔལ་ས་སྐྱ་པའི་བཤད་སྒྲུབ་ཀྱི་ཆོས་སྡེ་ཆེན་པོ་རྫོང་གསར་བཤད་གྲྭ་ཆོས་ཀྱི་བློ་གྲོས་ནས། འཇིགས་མེད་བློ་གྲོས་ཀྱིས།
བོད་རྒྱལ་ལོ་ ༢༡༤༠ ཆུ་སྦྲུལ། གྲོ་བཞིན་ཟླ་བའི་ཚེས་ ༡༠། སྤྱི་ལོ་ ༢༠༡༣ ཟླ་བ་ ༨ ཚེས་ ༡༦ ཉིན་བྲིས་པ་དགེ་བར་གྱུར་ཅིག
སྔོན་ཚེ་ཤེས་བྱ་ཀུན་མཁྱེན་མཁས་གྲུབ་ཀྱི་གདོང་ལྔ།།
ཐུབ་བསྟན་གངས་རི་སྐྱོང་བའི་མཛེས་རྒྱན་དུ་བཞུགས་ཀྱང་།།
ད་ལྟ་དུས་མཐའ་འགྲིམས་པའི་ཤུལ་འཛིན་གྱི་བུ་སློབ།།
གཉིས་མེད་སེངྒེར་འགྱུར་བའི་ངང་ཚུལ་འདི་སྐྱོ་བ།།
རིས་སུ་མ་ཆད་མདོ་རྒྱུད་བཤད་སྒྲུབ་ཀྱི་ནོར་བུ།།
སྲིད་པའི་མཐོངས་སུ་འདེགས་པའི་ཐེག་ཆེན་གྱི་དཔུང་ལྡན།།
ཞི་གྲོལ་ནགས་ཀློང་མྱུལ་བའི་གླང་པོ་ཡི་ཁྱུ་ཚོགས།།
ཐུབ་བསྟན་སྐྱེས་ཚལ་འགྲིམས་པ་སྔོན་རབས་ཀྱི་བྱུང་བ།།
ཐོས་པའི་ལང་འཚོ་ཡོལ་བའི་ངེས་དོན་གྱི་ཁྱུ་མཆོག །
ཕལ་ཆེར་ནགས་མའི་ཀློང་དུ་སྒོམ་པ་ལ་ཕྱིན་ཀྱང་།།
གསུང་རབ་ཞི་བསིལ་བདུད་རྩིའི་ཆུ་མོ་ལ་རྩེ་བའི།།
རི་དྭགས་ང་ཚོ་ཨེན་ཙམ་མཚོ་མཐའ་ལ་འདུག་གོ །
གསུང་རབ་པོད་ཆེན་བརྩིགས་པའི་གད་པ་ཡི་ངོགས་སུ།།
རྣམ་དཔྱོད་ར་རྩེ་བརྡར་བའི་བྲེ་སེར་གྱི་འབྲོང་ཆུང་།།
མདོ་ཕྱོགས་དགུན་རིའི་ལོགས་ནས་བདུད་རྩི་ཞིག་བཏུངས་ཏེ།།
སྔགས་ཕྱོགས་དབྱར་རིའི་ལོགས་ནས་སྨན་རྩ་ཞིག་བཟས་ཆོག །
འཇགས་མེད་མཁའ་ལ་འཕྱུར་བའི་རྣམ་རྟོག་གི་ཚང་ཚིང་།།
ཤེས་རབ་རལ་གྲི་རྣོན་པོས་དུམ་བུ་རུ་བཏུབས་ཏེ།།
སྐྱེ་འགག་བློ་ལས་འདས་པའི་བརྗོད་བྲལ་གྱི་ཐང་ལ།།
གཏན་དུ་ལྡང་བ་མེད་པའི་ངལ་གསོ་ཞིག་བྱུང་ན།།
སྲིད་གསུམ་ཧྲུལ་པོར་གཏོང་བའི་རྟེན་འབྱུང་གི་སྒྲ་དབྱངས།།
སྨྲ་མཁས་དམ་པ་དག་གི་ལྗགས་རྩེ་ལས་ཉན་པའི།།
རྫོགས་ལྡན་ས་འཕོས་པའི་སྐལ་བཟང་གི་དགའ་སྟོན།།
ཅིས་ཀྱང་ཟད་པ་མེད་པའི་དུས་མཐའ་ལ་ཐུག་ཤོག །
འཇིགས་མེད་བློ་གྲོས་ལགས་ནས་རྫོང་གསར་བཤད་སྒྲུབ་སྤྱི་དང་ཡང་གོས་དཔལ་ས་སྐྱའི་མཁས་གྲུབ་སྐྱེས་ཆེན་དམ་པ་མང་པོ་ཞིག་གི་ངོ་སྤྲོད་གནང་བར་སྙིང་དབུས་ནས་ཐུགས་རྗེ་ཆེ་ཞུ།།
སྔ་དུས་སུ་དཔལ་ལྡན་ས་སྐྱ་བ་ནི་བོད་ཀྱི་མཁས་གྲུབ་དུ་མའི་སྐྱེད་བསྲིང་བྱེད་སའི་སྟི་གནས་ཞིག་ཡིན་པར་མ་ཟད་བོན་ཕྱོགས་ཀྱི་མཁས་གྲུབ་མང་པོས་དཔལ་ཎ་ལཎཌ་ནས་དཔལ་ལྡན་ས་སྐྱ་བའི་ཕྱི་མདོ་རྒྱུད་ཚད་མའི་རིག་པར་སྦྱངས་བརྩོན་གནང་མཁན་མང་དུ་བྱུང་བས་བཀའ་དྲིན་བསམ་ཤེས་བྱེད་བཞིན་ཡོད། ལྷག་པར་དུ་རོང་སྟོན་ཤེས་བྱ་ཀུན་རིག་དང་མཉམ་མེད་ཆེན་པོ་ཤེས་རབ་རྒྱལ་མཚན་ཀུན་མཁྱེན་ཉི་མ་བསྟན་འཛིན་ལས་སོགས་མཁས་གྲུབ་འགྲན་ཟླ་དང་བྲལ་བ་མང་པོར་ཐོན་ཡོད། སྐབས་དེ་དུས་མཁས་པ་མང་པོའི་མཚན་གྱི་ཟུར་དུ་་་་སྟོན་པ་ཞེས་གསལ་བ་ནི་དེང་སྐབས་ཀྱི་དགེ་བཤེས་ཞེས་པའི་མཚན་གྱི་ཅོད་པན་དང་ཀུན་ནས་མཚུངས་པ་ཞིག་རེད་འདུག སྔ་དུས་སུ་བོན་ཕྱོགས་སུ་་་་སྟོན་པ་ཞེས་མང་དུ་ཡོད་པ་ནི་་་གཡས་རུའི་སྟོན་པ་བཅོ་བརྒྱད་ཅེས་པ་ལྟ་བུ་རེད། དེང་སང་ས་སྐྱ་བས་དེའི་དོད་དུ་མཁན་པོ་ཞེས་བཏགས་པ་དང་མཚུངས། དཔལ་ས་སྐྱ་བའི་བཤད་སྒྲུབ་ཀྱི་བསྟན་པ་ཕྱོགས་ཀུན་ཏུ་རྒྱས་ཤིང་འཕེལ་ཏེ་འགྲོ་བའི་གསོས་སུ་བསྐལ་བརྒྱར་བརྟན་གྱུར་ཅིག
མཁན་པོ་ཀུན་དགའ་དབང་མཆོག་ངོས་ནས་ཡང་ཡང་མཇལ་མྱོངས་བར་མ་ཟད་རྫོང་གསར་ཆོས་ཀྱི་བློ་གྲོ་དགོན་ལ་ཐེང་གཉིས་ཙམ་ཀྱང་བསྐྱོད་མྱོངས། གོ་ཐོས་ལ་མཁན་པོ་ཀུན་དགའ་དབང་ཕྱུག་མཁས་ཤིང་གྲུབ་པར་བརྙེས་པའི་སྐྱེས་མཆོག་ཞིག་ཡིན་པ་ནི། འཇིག་རྟེན་ཟང་ཟིང་གི་ཆོས་ལ་མི་བརྙེས་ཤིང་རྟག་ཏུ་དམན་སར་བཟུང་ནས་བཞུགས་མཁན་ཞིག་དང་གཟིམ་ཁང་ཀྱང་ས་ཁང་གྲུ་བཞི་ཆོག་ཤེས་དམ་པའི་བཞུགས་ཚུལ་ལ་ངོས་རང་ཧ་ཅང་གིས་དད་མོས་སྐྱེས་བྱུང། བོད་ཀྱི་བླ་ཆེན་བཞུགས་སྟངས་དེ་འདྲ་ངས་ཕལ་ཆེར་མཐོང་བ་དཀོན་པོ་ཡིན། སྤྱིར་སྟངས་བྱས་ན་ངོས་ལ་གྲོགས་པོ་ས་སྐྱའི་མཁས་པ་མང་པོ་ཡོད་པ་ནི་་་བྱམས་པ་བློ་གསལ་དང་་་ཞིང་གཤེགས་དམ་པ་མཁན་པོ་མིག་དམར་ལགས་དང་ད་བཞུགས་མཁན་པོ་རྒྱ་མཚོ་ལགས་དང་མཁན་པོ་འཇམ་དབྱངས་ལས་སོགས་མང་དུ་ཡོད་དེ་ཡིས་ནང་ནས་ཀྱང་་་བྱམས་པ་བློ་གསལ་ཞུ་བ་ནི་ཕྱི་ནང་གི་སྐད་ཡིག་ལས་སོགས་ལ་མཁྱེན་པ་ཡངས་ཤིང་རྟག་ཏུ་དམན་སར་བཟུང་ཞིང་ཡོན་ཏན་གྱིས་ཕྱུག་པ་ཞིག་ཏུ་མཐོང།
ས་སྐྱའི་ལྟ་བ་དེ་གཞན་སྟོང་རེད་པས།
རྫོང་གསར་བཤད་གྲྭའི་མཁན་རིན་པོ་དམ་པ་གང་གི་སྐུ་དྲིན་ལ། བཤད་གྲྭ་འདིར་ཡིད་སེམས་འགུགས་པའི་ཐོས་བསམ་གྱི་སྲོལ་འདུག་པ་མ་ཟད། མཁས་བཙུན་བཟང་གསུམ་གང་རུང་ངམ། ཡོངས་རྫོགས་ཚང་བའི་དགེ་འདུན་པ་མང་དུ་མཆི་བས་དད་པའི་ཡུལ་ཏུ་མཆིས་སོ།།
ཨ་ལ་ལ། ཨེ་མ་ཧོ།
ལྟ་བ་ལ་རང་སྟོང་དང་གཞན་སྟོང་གང་ཡང་མེད། བདེན་འཛིན་གྱི་དགག་བྱ་བཀག་ཙམ་གྱི་ལམ་ལ་ལྟ་བ་རྣམ་དག་ཟེར་བ་རེད།
ང་ལ་ནི་ས་སྐྱ་པ་ཟེར་དུས། གོ་ཤག་མ་གཏོགས་འཆར་གྱི་མི་འདུག
ལེགས་སོ།
སྤྱན་གྱིས་གཟིགས་ཕྱོགས་འདི་ནོར་མི་འདུག་ག
རིས་མེད་བསྟན་པའི་གཙུག་རྒྱན་ལྷར་བཅས་འགྲོ་བའི་མགོན་པོ་སྤྱི་ནོར་༸གོང་ས་ཏཱ་ལའི་བླ་མ་མཆོག་གི་ཞལ་སྔ་ནས།
འཁོར་འདས་ཆོས་ཀུན་ལྷན་སྐྱེས་སེམས་ཀྱི་མདངས། །
སེམས་ཉིད་སྤྲོས་བྲལ་ཆོས་སྐུའི་ངོ་བོར་རྟོགས། །
སྣང་སྲིད་འཁོར་འདས་ཀུན་ཁྱབ་ཕྱག་རྒྱ་ཆེ། །
གངས་ལྗོངས་རྒྱལ་བསྟན་ཡུན་རིང་འབར་གྱུར་ཅིག །
ཕྱི་ནང་རིགས་གནས་མདོ་སྔགས་གཞུང་བརྒྱའི་གནད། །
འཆད་རྩོད་རྩོམ་པས་ཐུབ་བསྟན་སྐྱོང་མཁས་པ། །
ལྷ་རིགས་འཁོན་སྟོན་བརྩེ་ཆེན་ས་སྐྱ་པ། །
གངས་ལྗོངས་རྒྱལ་བསྟན་ཡུན་རིང་འབར་གྱུར་ཅིག །
གསུང་ངག་སྙན་བརྒྱུད་ཚད་མ་བཞི་ལྡན་གྱི། །
རྒྱུ་ལམ་འབྲས་བུའི་ཉམས་ལེན་ཆེས་ཟབ་གནད། །
རྣལ་འབྱོར་དབང་ཕྱུག་ཁྱད་ཆོས་གདམས་པའི་སྲོལ། །
གངས་ལྗོངས་རྒྱལ་བསྟན་ཡུན་རིང་འབར་གྱུར་ཅིག །
ཅེས་འགྲོ་མགོན་དཔལ་ལྡན་ས་སྐྱ་པའི་ཐུན་མིན་གྱི་ཁྱད་ཆོས་རྣམས་སླར་ཡང་དད་པ་དང་གུས་ཕྱག་གི་ཡུལ་དྲན་པར་བྱས་ཤིང་། ཤིས་པར་བརྗོད་པ་དང་སྨོན་ལམ་རྣམ་དག་གིས་མཚམས་སྦྱར་ཏེ་རང་ཉིད་འཁོས་ཀ་དང་ཁ་ཐབས་ཤིན་ཏུ་ཞན་རུང་ལོ་མང་རིང་རིས་མེད་རྒྱལ་བའི་བསྟན་པར་ཚུལ་བཞིན་དུ་ཐོས་བསམ་སྒོམ་གསུམ་སྤྱི་དང་ཁྱད་པར་དུ་སྙིགས་ལྔའི་རང་མདངས་ཆེ་ཆེར་བདོ་བའི་དུས་ཀྱི་སྨག་རུམ་སྟུག་པོའི་མཐར། འགྲོ་མགོན་དཔལ་ལྡན་ས་སྐྱ་པའི་གཞུང་བཤད་མན་ངག་ཞལ་རྒྱུན་དང་བཅས་པར་སློབ་གཉེར་ཅུང་ཟད་རེ་བྱེད་པའི་བསྐལ་བཟང་རང་ཉིད་ཀྱི་ལེགས་བྱས་བགོ་སྐལ་དུ་ཐོབ་པའི་མྱོང་ཚོར་ཅུང་ཟད་རེ་ཙམ་བགོ་བཤའ་བགྱིད་པར་སྤྲོའོ། །
སྤྱིར་ན་མཁས་དབང་དགེ་ཆོས་ཀྱིས། གཏམ་རྣམས་ཐམས་ཅད་འདོད་པའི་ཕྱོགས་སུ་བཤད། ། ཆུ་རྣམས་ཐམས་ཅད་ཀླུང་གི་མདོ་རུ་འབབས། ། ཅེས་གསུངས་པ་དང་། ཡང་བཤད་སྲོལ་ཞིག་ལ། ” ཁྱེད་ཀྱིས་འགྲེལ་བརྗོད་མང་དག་ཅིག་བྱས་ནས་དུས་ཚོད་འཕྲོ་བརླག་ལ་མ་གཏོང་། མི་རྣམས་ཀྱིས་རང་ཉིད་ཀྱིས་གང་ཞིག་ཉན་འདོད་པ་དེ་ཁོ་ན་ཉན་གྱི་རེད། ” ཅེས་པ་ལྟར་དང་། ད་དུང་རང་རེའི་བཤད་སྲོལ་ཞིག་ལ་ལུང་པགས་པ་གཉིས་ཀ་གར་འཐེན་རེད། ཅེས་པ་ལྟར་རང་རང་ལུགས་ལ་རང་རང་དབུ་མ་པར་ཁས་འཆེས་པ་ནི་མི་རྣམས་ཀྱིས་དུས་རྒྱུན་བྱེད་སྟངས་མཐར་ཐུག་ཅིག་རེད་སྙམ། དེ་བས་བདེན་གྲུབ་བཀག་པའི་མེད་དགག་རྟེན་འབྱུང་གི་དེ་ཁོ་ན་ཉིད་དེ་མཐའ་གཉིས་དང་བྲལ་བའི་དབུ་མའི་ལམ་ངོ་མ་དེ་ཡིན་ནམ། མཐའ་བཞི་ག་དང་བྲལ་བའི་སྤྲོས་བྲལ་དེ་བཞིན་རྟག་ཆད་ཀྱི་མཐའ་ཐམས་ཅད་དང་བྲལ་བའི་དབུ་མའི་ལམ་ངོ་མ་དེ་ཡིན་མིན་ནི་ལུང་རིགས་ཀྱི་སྤྲོས་པ་བཀྱེ་སྟེ་དགག་བཞག་གི་ངལ་བ་བྱར་དོན་ནི་འདིར་ཅང་མ་མཐོང་བས་བཞག་གོ
དེས་ན་གནད་འགག་ནི་མཉམ་མེད་ཇོ་བོ་ལྷ་གཅིག་དི་བམ་ཀ་རས། ཚེ་ནི་ཡུན་ཐུང་ཤེས་བྱའི་རྣམ་གྲངས་མང་། །ཚེ་ཡི་ཚད་ཀྱང་ཇི་ཙམ་མི་ཤེས་པས། །ངང་པའི་ཆུ་ལས་འོ་མ་ལེན་པ་ལྟར། །རང་གི་འདོད་པ་དང་དུ་བླང་བར་བྱ། །ཞེས་ཐུགས་བརྩེ་བས་གདམས་པ་ལྟར་རང་ཉིད་ལྟ་གྲུབ་དང་ཉམས་ལེན་གང་ཞིག་ལ་མོས་པ་དང་ཡིད་ཆེས་བརྟན་པོ་ཡོད་ན་དེ་ནི་རང་ཉིད་ལ་ལྟོས་པའི་ཟབ་ཤོས་དང་དགོས་མཁོ་གཅིག་བུ་དེ་ཡིན་པས་ལག་ཏུ་ལེན་རྐྱང་བྱེད་དགོས་པ་ནི་སྨོས་ཅི་ལ་དགོས།
འོན་ཀྱང་དེ་ལྟར་ཡོང་བ་ཡང་དཔྱོད་ཤེས་དང་བསམ་ཤེས་ཅན་གྱི་མི་བུ་ཞིག་ཡིན་ན་རང་དགར་དད་པ་སྤུ་སད་ཙམ་དང་ཞར་ལྐོག་ཙམ་གྱིས་གང་ཡང་མི་ཡོང་བས་འཕགས་བོད་ཀྱི་རིས་སུ་མ ་ཆད་པའི་མཁས་གྲུབ་དག་གིས་མདོ་རྒྱུད་བསྟན་བཅོས་ལ་འགྲེལ་ཇི་ལྟར་བརྒྱབ་མིན་དང་གོ་བ་ཇི་ལྟར་བླངས་མིན་ཉམས་ལེན་དུ་ཇི་ལྟར་ཕྱག་བཞེས་གནང་མིན་བཅས་ལ་ཉམས་ཞིབ་མཐིལ་ཕྱིན་པ་གཏིང་ཐུག་པ་རྡོ་རུས་ཐུག་པ་ལྟ་བུ་ཞིག་ཅིས་ཀྱང་བྱེད་དགོས་པ་ནི་དཔྱོད་པ་ལ་ཞུགས་པའི་རྟོག་ལྡན་ཞིག་གིས་ཅི་ཞིག་བགྱི་བའི་ལས་དམ་པ་དེ་ཅི་ལ་མ་ཡིན་ཏེ་ཡིན་ནོ། །
དེ་ཡང་རང་ཅག་གིས་གང་ཐག་བཅད་པ་དང་མཐོང་ཐོས་ཀྱི་ཡུལ་དུ་གྱུར་པ་རྣམས་ལ་རང་རང་གིས་བློས་བྱས་ཀྱི་རྒྱུ་མཚན་ཙམ་རེ་དང་ཨུ་ཚུགས་ཀྱི་ཞེན་ཁོག་ལ་རང་ལྟ་མཆོག་འཛིན་བྱེད་བྱེད་བྱེད་པ་དག་ནི་གང་བྱས་ཀྱང་མཐར་གཏུགས་ན་ང་དང་ངའི་བླ་མའམ་སློབ་དཔོན་གྱི་ཁ་ཕོར་གཙིགས་ཆེར་བྱེད་དགོས་ཟེར་ནས་ཀླད་རྙིང་བཙའ་ལྗང་ཁུ་ལྗང་ནག་བརྒྱབ་པ་དག་ནི་ཞལ་མཇལ་ཙམ་དང་གསུང་ཐོས་ཙམ་ནས་ཞེ་མེར་བ་དང་སུན་སྣང་སྐྱེ་ཡོང་བའི་རྒྱུ་ཞིག་ལས་མ་འདས་པས་ན་ཡོངས་གྲགས་ཀྱི་རིགས་སྨྲ་སྤྱི་ལ་གྲགས་པའི་པོད་ཆེན་ལྔ་དང་གཞུང་ཆེན་བཅུ་གསུམ་མམ་གཞུང་ཆེན་བཅོ་བརྒྱད་མདོར་ན་མདོ་སྔགས་ཐམས་ཅད་ལ་ཕྱོགས་དང་རིས་སུ་མ་ཆད་པའི་སྒོ་ནས་དངོས་བསྟན་ཤུགས་བསྟན་ཟུར་གྱིས་བསྟན་པ་སོགས་ཆ་ཚང་བའི་སྒོ་ནས་དམ་པའི་ཆོས་ཀྱི་འབྱུང་ཁུངས་འཕགས་ཡུལ་གྱི་པཎ་གྲུབ་བཅུ་བདུན་རྣམས་ཀྱིས་གཙོས་པའི་རིས་མེད་མཁས་གྲུབ་དག་གི་གསུང་ལ་གོ་ལོ་དང་ཐོས་ལོ་ཙམ་གྱིས་མི་ཆོག་པར་སློབ་སྦྱོང་ངམ་ཉམས་ཞིབ་རྡོ་རུས་ཐུག་པ་ཞིག་བྱེད་པ་ནི་ཅིས་ཀྱང་གལ་ཆེ་བར་སོང་གཤིས་གུས་ཕྲན་བདག་ཀྱང་དབུགས་ཀྱི་རྒྱུ་བ་མ་ཆད་ཙམ་དུ་རྣམ་དཔྱོད་དང་སྙིང་རྗེས་ཕྱུག་པའི་གྲོགས་ཚངས་པ་ཚངས་པར་སྤྱོད་པ་རྣམས་དང་ལྷན་ཅིག་ཏུ་དཔལ་ལྡན་ས་སྐྱ་པའི་བཤད་གྲྭ་ཆེན་མོ་རྫོང་སར་ཆོས་ཀྱི་བློ་གྲོས་སུ་བསླེབས།
མཐོང་ཐོས་དྲན་རེག་གི་སྒོ་ནས་བསྟན་འགྲོའི་དོན་སྤྱི་བྱེར་སྨན་པའི་མཛད་འཕྲིན་བཟང་པོ་བྱིན་བརླབས་ཀྱི་དྲོད་མ་ཡལ་བར་མཛད་བཞིན་པའི་རིས་མེད་ཆོས་སྡེ་ཆེན་པོ་རྫོང་སར་བཤད་གྲྭ་ཆོས་ཀྱི་བློ་གྲོས་ནི་མཇལ་པ་ཙམ་གྱིས་དད་པའི་སྤུ་ལོངས་དབང་མེད་དུ་གཡོས་ཤིང་། མདོ་སྡེ་རྒྱན་ལས་གསུངས་པའི་ས་བཟང་པ་དང་གྲོགས་བཟང་དང་སོགས་ཞི་ལྷག་གིས་བསྡུས་པའི་རྟོགས་པའ་ཡོན་ཏན་སྤྱི་དང་དེ་སྐྱེ་བའི་ཉེ་རྒྱུ་ཕུན་སུམ་ཚོགས་པ་ཐོས་བསམ་སྒོམ་གསུམ་ཡ་མ་བྲལ་བ་བྱེད་སའི་བསྟི་གནས་བཟང་པོ་ནི་འདི་འདྲ་ཞིག་ལོས་ཡིན་སྙམ་པའི་ཚོར་སྣང་ངང་གིས་སྟེར། བསླབ་གསུམ་འཕགས་ནོར་བདུན་གྱིས་རབ་ཏུ་ཕྱུག་ཅིང་མཁས་བཙུན་བཟང་གསུམ་འཛོམས་པའི་མཁན་རིན་པོ་ཆེ་རྣམས་པ་དང་ཆོས་གྲོགས་མཆེད་པོ་རྣམས་ནི་ཕྱོགས་གང་ནས་མཇལ་ཡང་བསྔགས་བརྗོད་ཀྱི་ཡུལ་དང་དད་པའི་ཡུལ་འབབ་ཞིག་ཏུ་མཇལ།
ཇི་ཙམ་གྱིས་དཔྱད་གཞིའི་ཡིག་ཆ་དང་གོ་རིགས་སོགས་མང་དུ་ཐོས་པ་དེ་ཙམ་གྱིས་གོང་ནས་གོང་དུ་་དད་པ་དང་རྣམ་དཔྱོད་ཇེ་མཐོ་ནས་ཇེ་ཟབ་ཏུ་གྱུར་ཏེ་གཞུང་ལུགས་ཐམས་ཅད་འགལ་མེད་དང་མཁས་གྲུབ་དག་གི་དགོངས་པ་གང་ཞིག་གཙོར་འདོན་བྱས་ནས་རྩལ་དུ་འདོན་མིན་དང་གཞུང་ལུགས་གང་ཞིག་བཤད་བྱའི་གཞིར་བཟུང་སྟེ་གཙོར་འདོན་གནང་བ་ཙམ་ལས་གོང་འོག་དངོས་བསྟན་ཤུགས་བསྟན་ཟུར་བསྟན་ཁོང་ན་གནས་པ་མདོར་ན་ཆ་ཚང་པ་ཞིག་སྦྱངས་ན་ད་གཟོད་གཞི་ནས་རིས་མེད་རིས་མེད་ཅེས་པའི་མིང་ཚིག་ལྗིད་པོ་འདིའི་བྲོ་བ་ཞིག་གཞི་ནས་ཁ་བར་གྱུར།
ལར་ནས་གཞུང་ལུགས་ལྟ་ཅི་སྤྱིར་བཏང་གི་མི་ཞིག་ལ་ཉམས་ཞིབ་ཞིག་བྱེད་སྐབས་ཀྱང་གོང་འོག་སྔ་ཕྱི་དངོས་ཤུགས་ཆ་ཚང་པ་ཞིག་བྱས་རྗེས་གཞི་ནས་འདི་འདྲ་ཞིག་ལ་འབབ་ཀྱི་འདུག་ཅེས་བརྗོད་བཏུབ་པམ་བརྗོད་པའི་ཐོབ་ཐང་དང་དབང་ཚད་རང་གིས་ལག་པར་གཞི་ནས་འོངས་པ་ཡིན་སྙམ་པ་ལས་གཞན་ཚིག་དུམ་བུ་རེ་བསྒྲིགས་ཏེ་འདི་དང་དེ་ཞེས་ལམ་སེང་དེ་གར་ཁ་ཚོན་གཅོད་པ་དང་ད་དུང་སྡུག་ཐུག་ན་སོ་སོས་འདོད་དབང་གིས་སྦྱར་བའི་གནས་སྐབས་ཀྱི་ལྟ་ཚུལ་ལ་ཆགས་ཞེན་དྲག་པོ་བཅས་བྱེད་པ་ནི་དུས་ནམ་ཡང་རང་གཞན་གཉིས་ཕུང་གི་རྒྱུ་འབའ་ཞིག་ཏུ་མཐོང་ངོ་།
སླར་ཡང་མཁས་དབང་དགེ་ཆོས་ཀྱིས། བྱིས་པའི་དུས་ནས་རྒས་ཤིང་འཁོགས་པའི་བར། །སེམས་ཀྱི་འཁྱེར་སོ་ཇི་ཙམ་བརྗེས་གྱུར་པ། །རང་གིས་མྱོང་བས་དཔྱད་ནས་ཤེས་ནུས་པས། །ད་ལྟའི་འཆར་སྒོ་འདི་ལ་ཡིད་བརྟན་ཅི། ། ཞེས་པ་ལྟར་མདོར་ན་འུ་ཅག་གིས་བློས་གང་ཐག་བཅད་ཀྱང་རང་ཅག་གིས་ཁྲིམས་དང་སྲོལ་ལྟ་བུར་བཙུགས་པའི་ར་བ་ཞིག་ལ་ནམ་ཡང་འགོངས་པར་མ་ནུས་པ་དེའི་ཕྱིར་ང་ཚོའི་བློ་འདི་སྤྱིར་ན་ཚད་མའི་བརྒྱབ་རྟེན་ཡོད་པའི་བློ་ཡི་རིགས་རྣམས་ནི་གོམས་པ་བསྟེན་ན་མཐའ་མེད་དུ་འཕེལ་ནུས་པ་ལོས་ཀྱང་ཡིན་མོད་ཀྱང་དེ་མིན་པའི་ཚོད་དཔག་ཙམ་དང་གནས་སྐབས་ཀྱི་གོ་བ་ཐན་ཐུན་རེ་ལ་ནམ་ཡང་སྐྱབས་བཅོལ་བཞིན་ཡིད་ཚིམས་ཏེ་སྡོད་མི་ཉན་པར་ཞིབ་མོའི་བློས་ཚད་ཐུབ་ཀྱི་གཞུང་ལུགས་དག་དང་སྦྱར་ཏེ་སུམ་སྒྲིལ་ཏུ་མུ་མཐུད་བརྩོན་དགོས་པར་མཐོང་ངོ་། །
བཀའ་དྲིན་ཆེ་ཨ།