ཀུན་མཚོ།
དཔའ་མོ་ཞིག་རྗེས་དྲན་བྱེད་སྟངས་ཤིག
ད་ནངས་ཞོགས་པ་མལ་ལས་ལངས་དུས།།
དྲིན་ལྡན་མ་ལོ་བརྩེ་འཛུམ་ཤིག་ཤིག།
བདག་གི་མགོ་ལ་བྱིལ་བྱིལ་བྱས་ནས།།
ཨ་མའི་མ་ལོ་སློབ་གྲྭར་སོང་ཟེར།།
ཨ་མ་མ་གཅེས་མི་འགྲོ་ཟེར་བཞིན།།
ཨ་མའི་འགྲམ་ནས་ལྷོད་པར་བསྡད་དུས།།
བྱམས་ལྡན་ཨ་མའི་མིག་ཟུང་དེ་ནས།།
ཆར་ཆུ་ཐིགས་པ་སྙིལ་སྙིལ་བབས་བྱུང་།།
རེབ་ཐོག་མདའ།
ཆར་ཆུ་བསིལ་མ་དགུང་ནས་བབས་ཏེ་ས་གཞིའི་ངོ་གདོང་རླན་གྱིས་ཟིན་ཐལ།།
སྤྲིན་པ་དཀར་པོ་ཁ་དོག་འགྱུར་ནས་ཡར་ཁའི་རི་ཡི་རྩེ་མོ་བཀླུབས་སོང་།།
ཉི་མའི་འཛུམ་མདངས་རེ་ཞིག་བོར་བའི་རྒྱང་རིང་ནམ་མཐའི་མཁའ་དབྱིངས་དེ་ན།།
གློག་ཞགས་དམར་པོའི་སྨུག་སྤྲིན་ཀློང་ན་རང་དབང་འཁྱུག་རྩལ་ངོམས་འདི་མཚར་བ།།
ས་ཆེན་སྐྱོ་བའི་མྱ་ངན་མིག་ཆུ་ཉིན་དང་མཚན་ལ་ཤག་ཤག་བབས་ནས།།
ལམ་ཆེན་དཀྱིལ་ན་དལ་གྱིས་བཞུར་བའི་རྐ་ཆུ་དེ་ཡང་ཀུ་ཅོས་ཁེངས་འདུག།།
ཁྲོམ་དང་སྲང་ལམ་ཁུ་སིམ་ཀློང་ན་གཉིད་དུ་ཡུར་བའི་རྨི་ལམ་རིང་མོ།།
རྒྱང་རིང་འགྲུལ་བའི་རླངས་འཁོར་དུང་སྒྲས་སྐྱ་རེངས་བུ་མོ་མཉམ་ཏུ་དཀྲོག་སོང་།།
བསམ་གླིང་ཚེ་རིང་ལྷ་མོ།
ཀ་ཅོག་ཞང་གསུམ་ལ་སོགས་སྔོན་དུས་མཁས་པའི་སྐྱེ་བོ།།
ཁ་བ་གངས་ཅན་གྱི་ཡུལ་ལ་ཇི་ལྟ་ཇི་སྙེད་ཅིག་བྱོན་ཞིང་།།
གང་ནས་གང་དུ་སོང་ཡང་སྐྱེ་བོ་དམ་པ་ཡིས་ཁེངས་ན།།
ང་ཚོའི་རྒྱལ་ཁབ་འདི་ལ་རྒྱ་མིའི་བཙན་དབང་དེ་ཨེ་ཡོང་།།
ཅ་དངོས་དཔལ་འབྱོར་རིག་པ་ང་ཚོའི་རྒྱལ་ཁབ་ཏུ་དར་ཞིང་།།
ཆ་ཚང་ཚན་རིག་དངོས་རྫས་རང་མགོ་རང་ཐོན་སུ་ཡོད་པ།།
ཇ་ལ་དགའ་བའི་བོད་མིས་ཇ་ཡང་བཟོ་སྟངས་མ་འཇོན་པའི།།
ཉོབ་ཏོ་དེ་འདྲ་མེད་ན་རང་བཙན་ཤོར་བ་རང་ཨེ་ཡོང་།།
བསོད་ནམས་རྒྱལ།
ལྗོན་ཤིང་འཆི་སྟེ་ལོ་མ་ས་ལ་ལྷུང་།།
འོད་ཟེར་ཉམས་པ་དར་གྱི་ཀློང་དང་འདྲ།།
སྲོག་གི་བམ་རོས་བརྫིས་བའི་ས་སྟེང་ལ།།
མཛེས་སྡུག་དཔལ་གྱིས་སྟོང་བས་ཉམས་རེ་སྡུག།
གསད་དང་འཆི་བའི་སྨྲེང་བ་སྟོད་ན་འཕྱོ།།
སོག . སྨོན་ལམ།
ཟུར་མིག་ཅིག་འུ་གཉིས་དབར་ནས་འབར་སོང་།
སྐད་ཆ་ཞིག་མིད་པའི་འགག་ནས་ལུས་སོང་།
རེ་བ་ཞིག་བར་དོའི་འཕྲང་ལ་འཕུར་སོང་།
དྲན་སྣང་ཞིག་ད་དུང་ཡོད་ཡོད་འདྲ་ཨང་།
ཞེ་འདང་ལ་སེར་ག་གས་སོང་མི་ཟེར།
དྲན་སྣང་འདིས་སླར་ཡང་མཇལ་འཛོམས་གནང་སྲིད།
མི་ཚེ་ལ་སྙིང་བོ་མི་འདུག་མི་བསམ།
འཁོར་བ་འདི་ཁབ་ཀྱི་རྩེ་མོ་མ་རེད།
འབའ་སྲས།
དེ་རིང་འབར་བའི་མེ་འདི་རུས་པས་བསྒྲོན།།
དེ་རིང་འཐིབས་པའི་དུ་བ་ཁྲག་གིས་དཀྲིགས།།
དེ་རིང་ཁྱེད་ཀྱི་ཚེ་སྲོག་བོད་ལ་ཕུལ།།
ཁྱེད་ཀྱི་དོན་དུ་མ་ཎི་པདྨེ་ཧ྄ཱུཾ།།
གདོང་དམར་བོད་པའི་སེམས་ཀྱི་མིག་ཀོང་དུ།།
མནར་གཅོད་མཆི་མ་ལྷུང་ལ་ཕྱིས་པའི་རས།།
ཚེ་སྲོག་གསེར་གྱིས་ཕུལ་ལ་ཐུགས་རྗེ་ཆེ།།
ཁྱེད་ཀྱི་དོན་དུ་མ་ཎི་པདྨེ་ཧཱུཾ།།
ཀྱེ་མ་ཧོ། །
དུང་དཀར་པོའི་ཕ་མེས་རྫོང་ཆེན་དུ། །
གསེར་སེར་པོ་ལས་ལྷག་རིན་ཆེན་ལུས། །
མེ་དམར་པོ་ཀློང་དུ་མཆོངས་བ་དེ། །
གནམ་སྔོན་པོས་བཞག་པ་མ་ཡིན་ནམ། །
ལོ་མང་པོར་མྱོང་བའི་སྡུག་བསྔལ་དང་། །
སེམས་འཁྲུལ་བ་འཐུག་པོའི་རེ་སྒུག་གིས། །
དོན་རང་ངོ་མ་ཤེས་འཁྱམས་པ་ལ། །
རྗེ་བླ་མས་སྐྱོབ་ཐབས་ཨེ་ཡོད་དམ།
ཨོ་རྒྱན་ཉི་མ།
རང་དོན་མི་དགེ་བཅུ་པོ་བྱེད་ཕོད་ལ། །གཞན་དོན་དགེ་བ་བཅུ་ཡང་མི་ཕོད་ཅིང་། །
སྤྱི་དོན་བསྟན་དོན་ཐུག་དུས་བགས་འཁུམ་པའི། །སྐྱེ་བོ་དེ་ནི་ཁྲེལ་མེད་སྤྱང་གུ་ཞིག །
རང་དོན་ཐུག་ན་མི་ཡང་གསོད་ཕོད་ལ། །གཞན་དོན་ཐུག་དུས་ནུས་མེད་སྡར་མ་འགའ། །
བརྟུལ་ཕོད་ཆེ་བའི་གང་ཟག་མཆོག་རྣམས་ལ། །མི་འདོད་ཚིག་མཚོན་འདེབས་པ་ཉུང་ཉུང་མིན། །
རིན་ཆེན་སྒྲོལ་མ།
ལོ་མང་རིང་ ཆེས་འཐུག་པོའི་རེ་སྒུག
ཕྱོགས་བཞིར་བསྐུར་ཀྱང་
རླུང་བས་ཕྱིར་བསྐྱལ་བ མྱ་ངན
ཁྲག་མདོག་གི་ཚོར་འདུ་ཁོ་ན
མི་ཉག་དུང་ཟླ།
༼ཨ་མའི་ཁ་པར་ལ་ཉན་རྗེས་མིག་ཆུ་ཞིག་གི་ཚུལ་དུ་བྲིས།༽
ས་རྡུལ་ཁྲི་མ་འབུམ་གྱི་བར་བརྒལ་ལས་བསྲིངས་བའི།
གོམ་སྟབས་ཤིག་ལ་ཚད་གཞི་ཡོད་རུང་།
ཕྲ་ཕུང་བྱེ་མ་དུང་གིས་བཞེངས་པའི།
གསེར་ཆེན་མེ་ཏོག་ཅིག་ལ་གཙི་འདང་ཡོད་རུང་།
ཨ་མ་རྒན་མོ་ཁྱེད་ཀྱིས་ཁྱོགས་ལ་བཏེགས་པའི།
སྡུག་ཡུས་ཀྱིས་ལྕི་བའི་རི་རྒྱལ་ལྷུན་པོ་དང་།
མཁོ་འདོན་པཿ བསྟན་འཛིན་དགེ་ལེགས།
ནང་ཆོས་ཀྱི་གོ་རྟོགས་མ་སད་རུང་།།
རྒྱལ་རབས་ཀྱི་གོ་རྟོགས་སད་པར་བྱོས།།
རབས་བྱུང་གི་སྡོམ་མཐའ་མ་འཁྱོལ་ཀྱང་།།
མི་རིགས་ཀྱི་འཕེལ་ཁ་གོང་མཐོར་གཏོང་།།
གཞན་ཡུལ་གྱི་རྒྱལ་ཁམས་མ་བགྲོད་ཀྱང་།།
རང་ཡུལ་གྱི་བདག་དབང་དམ་པོར་བཟུང་།།
ཕྱི་གླིང་གི་མཛེས་མ་མ་འཐོབ་ཀྱང་།།
རིགས་མཐུན་གྱི་དམན་ཤར་རུམ་དུ་འཛུད།།
སྤྲུལ་སྐུ་དབང་ཆེན།
ཉིས་སྟོང་ལོ་ཡི་ལོ་འགོ་ཞིག་ལ།
རྡོར་གདན་སྨོན་ལམ་གྲོལ་བའི་མཇུག་དུ།
བྱང་ཆུབ་ཤིང་དྲུང་ཕྱག་འབུམ་བསགས་ནས།
གཅིག་པུར་ཟླ་འགར་ལྷོད་ཡངས་བསྡད་ཡིན། །
ཉིན་ཞིག་དགོང་མོ་ནང་ལ་ལོག་ཁར།
ནམ་རྒྱུན་ཟ་ཁང་སྟབས་བདེ་དེ་ནས།
བྱ་ཤ་ཐུག་སྐམ་བརྔོས་མ་ཟ་སར།
དབྱིན་མོ་དུངས་ཤ་ཅན་ཞིག་མཇལ་བྱུང་། །
མདའ་ཆབ་བྲག་པས།
གོ་ལ་ཟླུམ་པོ་གནས་ཚང་བསམ་ན་ཡུན་རིང་གསོན་པའི་རེ་ཐག་ཆད་ཀྱང་།།
རྩེད་གྲོགས་བུ་མོའི་བྱམས་བརྩེ་དྲན་ན་ཡུན་རིང་འཚོ་བའི་འདུན་པ་འཁོར་ཡོང་།།
ད་ནངས་ཞོགས་པ་ཤར་བའི་ཉི་མ་ད་ལྟ་ནུབ་རིའི་ཕག་ཏུ་ཡལ་པས།།
བྱ་ཚོགས་རྣམས་ཀྱིས་གཤོག་ཟུང་རྡེབ་བཞིན་སོ་སོའི་གནས་སའི་ཚང་ལ་འཕུར་ན།།
ཟམ་པ་རིང་པོ་ཞིག་གི་སྟེང་ན་གྲོགས་མེད་ཁེར་རྐྱང་ཉབ་བེ་ཉོབ་བེས།།
ལྟེ་ཁྲག་འཕོ་སའི་ཕྱོགས་སུ་ཅེར་པའི་མིག་མཐའ་མཆིལ་མས་བརླན་པར་འདུག་གོ།
སྐད་ཅིག་སྐད་ཅིག་གཉེན་གྲོགས་འདས་ཚེ་སེམས་པའི་འཕར་ལྡིང་འཇོག་མཚམས་མི་འདུག།
མ་མཇལ་ཨ་ཁུ་ཞིང་ལ་གཤེགས་པས་སྙིང་གི་རུས་པ་དུམ་བུར་ཆག་སོང་།།
མྱི་ལྟིག
གཅིག
ནམ་རྒྱུན་གྱི་ཕྱག་སྲོལ་ལྟར་དུ།།
ངག་བདེ་མོས་སྒྲོལ་མ་གྱེར་ཞོར།།
ལུས་མཉེན་མོས་བརྐྱངས་ཕྱག་འཚལ་དུས།།
ལག་ཁ་པར་སིལ་སིལ་གྲགས་བྱུང་།།
ཆ་མ་འཚལ་རྣ་རྩར་བརླན་དུས།།
སྐད་འཇམ་པོས་ཁམས་འདྲི་བྱས་སོང་།།
སེམས་འཚབ་ཞོར་སུ་ཡིན་དྲིས་དུས།།
ལན་མ་བཏབ་གཞན་ཞིག་བཤད་ཀི།
འབའ་སྲས།
༼གུས་པས་ནམ་ཡང་བསྐུར་བཞིན་པའི་ཁ་བརྡ་དྲ་བ་དང་ཆང་ས་དྲ་བ་གཉིས་ལ༽
ཁ་བརྡ་ཚང་ལ་མ་ཡོང་ཡུན་རིང་འགོར།།
ཁ་སྒང་བསམ་གཏན་ན་ཆུང་རྩེད་རར་ཞུགས།།
ཁ་མཚར་ལ་གཞས་ལངས་ནས་སྐད་གྲགས་བཞག །
ཁ་བའི་ལྗོངས་ཀྱི་ན་ཆུང་བུ་མོ་བཀུགས།།
སྤྲིན་པ་རབ་རུབ་གསེབ་ཀྱི་ཆབ་རྒྱུན་དྲོན་མོས།
ལྗང་མདོག་ལྡི་ལིར་དབྱར་གྱི་འཛུམ་ཞིག་གནང་སོང་།
དུས་རབས་འགྱུར་བག་ཁྲོད་ཀྱི་ཡར་རྒྱས་འདི་ཡིས།
རྒྱ་གར་རྒྱལ་ཁམས་འཇིག་རྟེན་གསར་བར་གྱུར་སོང་།
མན་ཇུ་ཀྲི་ལིའི་སྲང་བར་དོག་མོ་དེ་རུ།།
བརླ་ཤ་གཅེར་བུར་བུད་པའི་བོད་མོ་མང་སོང་།།
ཨ་གསར་བཅོས་མར་དགའ་བའི་གོམས་གཤིས་འདི་ཡིས།།
སྐྲ་རིང་བོད་མོ་ཚོ་ལ་ཡིད་ཅིག་ཆད་སོང་།།
སོག . སྨོན་ལམ། ཁྱོད་ལ་འབར་ཆོག་ཆོག་གི་རང་གཤིས་ཤིག ང་ལ་སྡོད་མི་ཚུགས་པའི་ལག་པ་ཞིག གང་ལྟར ངས་ཁྱེད་ལ་ཙག་སྒྲ་སྦར་ཆོག
རིན་ཆེན་སྒྲོལ་མ།
ཕུགས་བསམ་ནུབ་ཕྱོགས་རི་ཡི་ཕྲག་གོང་ནས།།
སྟོང་འདང་འཇའ་འོད་སྣ་ལྔའི་གུར་ཁྱིམ་ཕུབ།།
ཅི་ཞིག་ཐོབ་འདོད་རེ་བའི་སྣེ་མོ་རུ།།
མུན་པར་ལག་སྙོབ་ཙམ་གྱི་རི་མོ་གསལ།།
རྨེ་རུ།
ང་དང་ང་ཚོ་ཆ་རེད།།
གངས་ཅན་བོད་མི་ཆ་རེད།།
མཐོ་སྒང་གངས་རིའི་ཡུལ་གྱི།།
ཁྱིམ་བདག་ཡིན་པ་ཆ་རེད།།
ང་དང་ཁྱེད་གཉིས་ཆ་རེད།།
སྐད་དང་ཡི་གེ་ཆ་རེད།།
དབྱངས་དང་གསལ་བྱེད་སུམ་ཅུའི།།
གླུ་དབྱངས་ལེན་མཁན་ཆ་རེད།།
ཤེས་དགས།།
སྐྱིད་ན་སྐྱིད་པོ་དེ་ཡང་མི་གོ་ད་དུང་སྡུག་བསྔལ་ཆེ་མདོག་བཤད།།
སྡུག་བསྔལ་རང་གི་ཐོག་ཏུ་བབས་ན་ལས་རེད་ཟེར་ནས་བསམ་པ་བདེ།།
གོ་ལྡོག་འཇིག་རྟེན་འདི་ཡི་ཆོས་ཉིད་རིམ་པས་རང་གིས་མྱོང་པ་རྣམས།།
བསམ་པའི་ཚེ་ན་གཅིག་པུ་ཡིན་ཡང་དབང་མེད་གད་མོ་དི་རིར་འཆོར།།
མ་འཆོལ་དོན་རྣམས་དཀའ་བ་བརྒྱ་ཡིས་བསྒྲུབས་དགོས་ཤ་རྟག་ཉིད་དུ་མཆིས།།
ཅི་ཕྱིར་གོལ་དང་འཁྲུལ་བ་འདི་ཚོ་མི་དཀའ་བྱེད་སྙིང་འདོད་པ་ཨང་།།
བྱིས་པ་མིན་ཡང་བྱིས་བ་ལྟ་བུར་རང་ཐོག་འབབ་ན་མགོ་བོ་འཐོམས།།
གཞན་གྱིས་དེ་འདྲ་བྱས་པ་མཐོང་ན་མ་འདོད་ཁྲེལ་གད་ཁོང་ནས་འཆོར།།