ཁ་བརྡ།

ཁ་བརྡ།

Archive for August, 2008


༧གོང་ས་མཆོག་སྨན་ཁང་ནས་ཕེབས་ཐོན་གནང་གི་ཡིན་པ་རེད།


དེ་རིང་དྲ་རྒྱའི་ནང་འཁོད་པའི་གནས་ཚུལ་ཁག་ལྟར་ན། ༧རྒྱལ་བ་རིན་པོ་ཆེ་ཚང་སྐུ་ཁམས་བདེ་མིན་གྱིས་རྒྱ་གར་མུམ་བྷེའི་སྨན་ཁང་ཞིག་ཏུ་ཉིན་བཞིའི་རིང་བཞུགས་མོད། ད་ཆ་དྲག་སྐྱེད་ཀྱིས་སང་ཉིན་རེས་གཟའ་ཟླ་བ་ཉིན་སྨན་ཁང་ནས་ཕེབས་ཐོན་གནང་གི་ཡོད་པའི་གཏམ་བཟང་གི་གནས་ཚུལ་འདུག

ཉི་མ་འདི་ཚོ།

ཉི་མ་ལྔའི་རིང་མི་དང་ཐུག་ཕྲད་མེད་ལ་གློག་ཀླད་དང་ཁ་པར་ལ་ལག་པ་མ་འཆང་བར་ནང་ལ་འཛུལ་ནས་སེམས་པ་ལྷོད་ལྷོད་བྱས་ཏེ་བསྡད་པས་དངོས་གནས་འཇིག་རྟེན་གཞན་ཞིག་ཏུ་བསླེབས་པ་ལྟ་བུ་བྱུང་། ཡིན་ན་ཡང་། ད་ལྟ་གཞི་ནས་གློག་ཀླད་ཀྱི་སྒོ་ཕྱེ་དུས། དྲ་གྲོགས་ཚོ་དང་ཁ་བརྡ་གཉིས་ཀ་མཉམ་དུ་དགའ་རབ་ཅིག་ཇེ་བཙན་དུ་སོང་འདུག
དེ་ནས་དུས་བབ་ལ་ཅིག་བལྟས་པ་ན། ཉིན་འགའི་སྔོན་གོང་ས་མཆོག་སྐུ་ཁམས་ཅུང་མ་བདེ་བར་སྨན་ཁང་དུ་ཕེབས་ཚུལ་འདུག་པས། རང་དབང་མེད་པར་ཁོང་འདར་ཞིག་ཤོར། ཡིད་བཞིན་ནོར་བུ་སྐུ་ཚེ་བརྟན་པར་སྨོན།
དེ་ནས་རྒྱ་མི་ཞིག་གིས་བྲིས་པའི་གོང་ས་ཏྰ་ལའི་བླ་མ་མཆོག་གི་སྙན་དྲུང་དུ་ཞེས་པ་དེ་ཀློག་ཞོར་དང་ངུ་ཞོར་བྱས། གལ་སྲིད་རྒྱ་རྒན་འདི་ཚོ་རྩོམ་ཡིག་འདི་འབྲི་མཁན་ལྟ་བུ་རེ་ཡིན་ན་བོད་ལ་རང་སྲིད་རང་སྐྱོང་སང་ཉིན་རང་འཐོབ་རྒྱུ་ངེས་ཅན་རེད། ཅིའི་ཕྱིར་རྒྱ་མི་འདི་ཚོ་ཀྲུའུ་རིའུ་ལྟ་བུའི་བོད་མིའི་སེམས་ཁོང་གི་སྡུག་བསྔལ་ཚོར་ཐུབ་མཁན་ཞིག་མིན་པ་རེད། གལ་སྲིད་རྒྱ་མི་མང་པོ་ཞིག་ཀྲུའུ་རིའུ་ལྟ་བུ་ཞིག་ཡིན་ན་ཡང་དེ་དག་ལས་སུ་ཞིག་གིས་རང་ཉིད་ཀྱི་འཚོ་གནས་བློས་བཏང་སྟེ་སྤུན་ཟླ་མི་རིགས་ཀྱི་བདེ་སྡུག་གོ་ཤེས་མེད་པའི་སྲིད་གཞུང་ཞིག་ལ་བརྗོད་ཀྱི་རེད། འདི་ལ་ངོ་མ་ཀློག་རིན་འདུག
རྒྱ་མོ་སི་ཕི་རིན་ཞེས་པ་ཞིག་གིས་ས་གནས་འདིའི་བོད་པ་ཚོ་དང་རྒྱ་རྒན་འགའ་མཉམ་དུ་བསྡུས་ནས་བོད་རྒྱའི་གྲོས་མོལ་ཞིག་བྱེད་རྩིས་འདུག་པས། རྒྱ་རྒན་དེ་ཚོའི་ཁྲོད་དུ་ཡང་གོང་གི་ཀྲུའུ་རིའུ་ལྟ་བུ་རེ་ཡོད་ན་མ་མཐའ་ཡང་ཕན་ཚུན་གོ་བརྡ་འཕྲོད་ཙམ་ཞིག་ཡོང་གི་རེད།
གཞན་རྒྱ་ནག་ཏུ་འགས་གཏོར་དང་བོད་དུ་ས་ཡོམ་བརྒྱབ་པ་འདི་དག་ཀྱང་ཉིན་འགར་གྲགས་མེད་ཚོར་མེད་དུ་བསྡད་པའི་ང་ལ་མཚོན་ན་གསར་འགྱུར་རེད། འདི་ལོར་ས་འོག་ས་སྟེང་གང་ས་ནས་ཅིག་མ་གཏོར་ན་འདུག་ཐུབ་ཀྱིན་མེད་པ་འདྲ། སྙིང་རྗེ། སེམས་ཅན་ཉེས་མེད་མང་པོ་ཞིག་དོན་མེད་ས་ནས་གཅེས་པའི་ཚེ་སྲོག་དང་བྲལ་འགྲོ་གིན་འདུག
ཨོ། ཤག་མཚེས་སེམས་བཟང་དེས་ཕིས་ཙ་སྡེར་མ་གང་ཁྱེར་ནས་བསླེབས་བྱུང་བས་སང་ཉིན་མཇལ་ཡ། ཕིས་ཙ་ལ་བོད་སྐད་དུ་ཇི་ལྟར་འབོད། ངས་བག་ཚལ་ཞེས་བོད་སྐད་ཡིན་པ་ལ་དབྱིན་སྐད་དང་ཡང་སྒྲ་ཉེ་བ་ཞིག་བཏགས་པ་ཡིན།

སྐྱིད་པོ་ཡོད་མེད་བཤད་ན།

སྤོབས་པ་མཐའ་ཡས།
དེ་རིང་རང་རེའིཁ་བརྡ་གླེང་སྟེགས་ཀྱི་རྩོམ་སྒྲིག་པས་བོད་མིའི་དད་མོས་མངོན་འདོད་དང་འགལ་བའི་གཏམ་བཤད་རྒྱལ་བ་རིན་པོ་ཆེར་སྐྱོན་བརྗོད་ཀྱི་རིགས་ལྟ་བུ་སྤེལ་ན་ཀློག་མཁན་མང་པོའི་སེམས་ཁམས་ལ་ཕོག་ཐུག་འགྲོ་བས་བསུབ་གང་ཐུབ་བྱ་རྒྱུ་ཡིན་ཚུལ་དང་ད་དུང་གཏམ་བཤད་གང་དང་གང་རིགས་བསུབ་དགོས་ཚུལ་ཤོད་དགོས་ཞེས་སྤེལ་འདུག རང་གི་སྤྱི་ཚོགས་འདིའི་ཕན་བདེའི་བཙས་སུ་འགྱུར་བ་གང་ཞིག་མཆིས་ཀྱང་དེ་དང་དེ་ནིརྗེས་སུ་ཡི་རང་གི་གནས་སུ་གྱུར་པ་ལགས་སྟབས་དེ་དེ་བཞིན་ནོ་ཞེས་ཞུ་བ་ལགས།
ང་ལྟ་བུར་མཚོན་ན་དྲྭ་སྟེགས་འདིར་བཀླགས་ན་ཆེས་མི་སྐྱིད་པ་ཞིག་ནི་མི་ལ་ལས་རང་ཉིད་ཀྱིས་དང་བ་སྟོན་མི་འདོད་པ་ཞིག་བྱུང་མ་ཐག་ཏུ་མངོན་ལྐོག་བརྒྱུད་གསུམ་ནས་ཤུགས་ལྡན་ཚོགས་མི་དང་རྒྱ་དམར་གྱི་གསང་ལས་པ་སོགས་ཀྱི་བསྙོན་འཛུགས་ཀྱིས་རབ་ན་བོད་མིའི་གྲལ་ནས་ཕུད་ཐབས་དང་དེ་མ་བྱུང་ན་ཡང་ཁ་བརྡ་གླེང་སྟེགས་ཀྱི་ནང་ནས་ཕུད་ཐབས་བྱེད་བཞིན་པ་དེ་རེད། བསམ་བློ་ལེགས་པོ་ཞིག་བཏང་ན་ཤུགས་ལྡན་ཚོགས་མི་དང་རྒྱ་དམར་གྱི་གསང་ལས་པ་ཡིན་པའི་དཔང་རྟགས་ཁུང་འཁྱོལ་ཞིག་མེད་ན་དེ་ལྟར་གླེང་རྒྱུ་ནི་ལས་སླ་པོ་ཞིག་མིན། གལ་ཏེ་རྩེད་མོ་བྱེད་བཞིན་ཡོད་ཟེར་ཡང་རྩེད་མོ་ལ་ཡང་མཚམས་དང་ཚད་ཅིག་ལོས་ཡོད། རྒྱ་དམར་གྱི་གསང་ལས་པ་དང་ཤུགས་ལྡན་ཚོགས་པ་གཉིས་ནི་རང་རེའི་སེམས་ནང་ན་ཆེས་མི་སྡུག་པའི་དངོས་པོ་གཉིས་ཡིན་སྟབས་ཁྱེད་ལ་མི་ཞིག་གིས་་དེ་ལྟར་བསྙོན་འཛུགས་བྱེད་ན་དེ་ཁྱེད་རང་གི་སེམས་ལ་གནོད་དམ་མི་གནོད། Read the rest of this entry »

སྐུ་སྒེར་ཡིག་ཚང་གི་གསལ་བཤད།

སྤྱི་ཟླ་བརྒྱད་པའི་ཚེས་༢༩ཉིན་སྐུ་སྒེར་ཡིག་ཚང་གིས་གསར་འགོད་གསལ་བཤད་ཤིག་སྤེལ་འདུག འདིའི་ནང་། གོང་ས་མཆོག་མོམ་སྦི་ཡི་སྨན་ཁང་ཞིག་ལ་བརྟག་དཔྱད་གནང་བར་ཕེབས། སྨན་པས་བརྗོད་དོན་ལ། སྐུ་ཐང་ཆད་པ་ལས་དེ་མིན་གྱི་ནད་ཅི་ཡང་མིན་འདུག་ཅེས་གསལ་བཤད་བྱས་འདུག ༧གོང་ས་༧མཆོག་སང་ཉིན་ཚེས་༣༠ཉིན་བོད་མི་ཀུན་དང་མཉམ་དུ་ཆུ་ཚོད་༡༢རིང་སྙུང་གནས་ལ་ཞུགས་ནས་བོད་མིའི་ཆེད་སྨོན་ལམ་དང་བསྔོ་བ་གནང་རྒྱུ་རེད་འདུག གསལ་བཤད་ཞིབ་ཕྲ་དབྱིན་ཡིག་ནང་འཁོད་པ་འདི་གཤམ་ལ་བཀོད་ཡོད།
Read the rest of this entry »

ཁ་བརྡའི་གསལ་བཤད།

དེ་རིང་མཆན་གཅིག་ཏུ། “ཁྱེད་ཅག་གི་དྲ་ཐོག་ཏུ་སྨྱོས་གཏམ་རེ་གཉིས་འབྱུང་བཞིན་ལ། ༧ གོང་ས་མཆོག་ལ་ཟུར་ཟའི་འཆལ་ཚིག་འགའ་ཡང་ཐོན་བཞིན་པ་འདིར་དགའ་རྒྱུ་ཞིག་གཏན་ནས་མེད་ཀི། དམངས་གཙོ་ཟེར་ན། དེར་ཡང་མཚམས་ཚིགས་ཡོད་པ་ཞིག་ཡིན་ལོས་དགོས། གཞན་དུ་ན། འཇིག་རྟེན་འདིར་འགལ་སྤྱོད་ཅན་གྱིས་ཁེངས་ན་ཅི་བྱ།” ཞེས་བཀོད་འདུག ༧གོང་ས་མཆོག་ནི་བོད་མིའི་བླ་མ་དང་རྒྱལ་པོ་རེད། བོད་མི་ཚོས་ཁོང་ལ་བཅངས་པའི་བརྩེ་དུང་དང་གུས་ཞབས་ནི་བླ་ན་མེད་པ་ཞིག་རེད། ཁ་བརྡ་ཡང་བོད་མིའི་ཁ་བརྡ་ཞིག་ཡིན། དེ་བས། ཁ་བརྡ་ཡིས་༧གོང་ས་མཆོག་ལ་མཚན་སྨད་ཀྱིས་མཚོན་པའི་ཚིག་མཚོན་འཕེན་རིགས་ལ་དགའ་བསུ་མི་ཞུ་ལ། ཐ་ན་དགོས་གལ་དང་ཚིག་མཚོན་གྱི་ཚབས་ཆེ་ཆུང་ལ་དཔག་ནས་ཚིག་མཚོན་དེ་ཚོ་གསུབ་ཀྱིན་ཡོད། ཟུར་ཟ་འདི་དང་ཚིག་མཚོན་འདི་ནི་འགོད་མི་འོས་ཞེས་ཀློག་མཁན་གྱིས་གསལ་འདོན་བྱས་ཚེ། ཀློག་མཁན་དང་བོད་མིའི་སེམས་ཁམས་ལ་གུས་ཞབས་ཀྱི་ཆེད་དུ་ཚིག་མཚོན་དེ་རིགས་གསུབ་ངེས་ཡིན།

བརྟག་དཔྱད་བྱས་ན་འབྲས་བུ་འདུག

 

གུས་པར་ལོ་འགའ་ཤས་རིང་བོད་ཀྱི་སྤྱི་ཚོགས་ནང་མི་འདང་བའི་ཆ་གང་ཡིན་པ་དེར་བརྟག་དཔྱད་བྱ་རྒྱུར་གོམས་གཤིས་ཤིག་སླེབས། སྤྱི་ཚོགས་ཕུལ་དུ་བྱུང་བ་གཞན་རྣམས་དང་བསྡུར་ན། མི་གཅིག་པ་དང་མི་འདང་བ་མང་པོ་ཡོད་མོད། ཡིན་ནའི་གཙོ་བོ་གཅིག་ནི་ངེད་ཚོའི་སྤྱི་ཚོགས་ནང་བརྟག་དཔྱད་བྱེད་པའི་གོམས་གཤིས་དེ་ཤིན་དུ་ཞན་པ་རེད། དེའི་རྒྱུ་མཚན་གཙོ་བོ་གཅིག་ནི་ལེ་ལོ་ཁོ་ན་རེད།

 

བརྟག་དཔྱད་བྱ་བའི་གོམས་གཤིས་དེ་ཕ་མ་ལ་ཡང་མིན་འདུག ཕྲུ་གུ་ལ་ཡང་མིན་འདུག དེ་བཞིན་སྤྱི་ཚོགས་ཁྱོན་ལ་ཡང་ཤིན་དུ་ཉུང་།

 

དེར་བརྟེན་གཞན་གྱི་རྗེས་བྲངས་འགྲོ་རྒྱུར་དགའ་ལ། རྣམ་རྟོག་དང་དངོས་ཡོད་གཉིས་མཉམ་དུ་སྦྲེལ་ནས་དགོས་མེད་ཀྱི་སྡུག་བསྔལ་སྣོན་མ་མང་པོ་ཞིག་བཟོ་བཞིན་འདུག དཔེར་ན་ཕྲུ་གུ་ཞིག་ནང་ལ་ལོག་ནས། ཕ་མར་རྒན་ཕུན་ཚོགས་ལགས་ཨ་རིར་འགྲོ་མཁན་རེད་ལབ་སོང་ཟེར་། ཨ་མས་ལམ་གསེང་ཁ་པར་བཏང་ནས་ཁྱིམ་མཚེས་ལ། ཤེས་རབ། ཁྱེད་ཤེས་སོང་ངས། སློབ་གྲྭའི་རྒན་ཕུན་ཚོགས་ལགས་ཨ་རིར་འགྲོ་མཁན་རེད་འདུག་ཟེར། སང་ཉིན་ཤེས་རབ་ཀྱི་ཨ་མ་རྒན་མོ་དེས་རོགས་པ་ཚོར། རྒན་ཕུན་ཚོགས་ལགས་ཨ་རིར་མགྱོགས་པོ་འགྲོ་མཁན་རེདའདུག་ཟེར། གང་ལྟར་སྐད་ཆ་འདི་ལྟར་ཁྱབ་ནས་བརྟག་དཔྱད་བྱེད་མཁན་མེད།

Read the rest of this entry »

དེབ་ཐེར་ནག་པོ།-གྷོལ་ཌི་སི་ཐེན་དང་བོད་ཀྱི་རྒྱལ་རབས་མེད་པར་བཟོ་བ། ཆ་དང་པོ།

http://www.jamyangnorbu.com/
འཇམ་དབྱངས་ནོར་བུས་བརྩམས།
དགེ་འདུན་རབ་གསལ་གྱིས་བསྒྱུར།

ཨོ་སི་ཀར་ ཝེལ་ཌེ་(Oscar Wilde) ཡིས་ “ང་ཚོས་རྒྱལ་རབས་ལ་འགན་འཁྲི་གཅིག་འཁྱེར་དགོས་པ་ནི་དེ་བསྐྱར་འབྲི་བྱེད་རྒྱུ་དེ་རེད།”ཅེས་གསུངས་པའི་སྐབས་དེར་ཁོང་གིས་ཧྥ་རན་སིའི་མིའི་བཤད་སྲོལ་དུ་ཡོད་པ་ལྟར་ épater les bourgeois ཅེས་པ་འདི་བརྒྱུད་བཤད་བྱེད་ཐབས་བྱེད་ཀྱི་ཡོད་སྲིད། ཝེལ་ཌེ་ནི་འགན་ལེན་དང་བློ་གདེང་གི་དུས་ཏེ་དུས་རབས་བཅུ་དགུ་བའི་ཕྱེད་ཕྱི་མའི་ནང་འཚོ་གནས་བྱས་ཡོད། དེང་རབས་ཀྱི་རྒྱལ་རབས་མཁན་དཔེར་ན་འཇར་མན་གྱི་དངོས་ཡོད་རིང་ལུགས་པ་ ལིའུ་པོལ་ཌི་ བོན་ ཪཱན་ཀེ་ (Leopold Von Ranke) ཡིས་ཁོང་ཚོའི་ལས་ཀ་ལ་བརྟེན་ནས་ “དངོས་འབྲེལ་ཇི་ཞིག་བྱུང་ཡོད་པ་”དེ་སྟོན་ཐུབ་ཀྱིན་རེད་བསམས་ཡོད་པ་རེད་ལ། དབྱིན་ཇིའི་ཁེ་ཐོ་ལིག་གི་རྒྱལ་རབས་མཁན་ ལོར་ཌི་ ཨེག་ཤོན་ (Lord Acton) གྱིས་ “ཡང་དག་པའི་རྒྱལ་རབས་”དེ་སྒྲུབ་ཐུབ་པའི་ཉི་མ་གཅིག་ཡོང་གི་རེད་ཅེས་ཡིད་ཆེས་བྱས་པ་རེད།

ད་ཆ་རྒྱལ་རབས་པ་ཚོ་ནི་སྤྱིར་བཏང་གིས་ཧ་ཅང་བློ་གདེང་ཞན་པའི་ལྟ་ཚུལ་ཞིག་གི་མཐའ་སྐོར་ལ་སླེབས་ཡོད་དེ། ཁཱེམ་བྷི་རེ་ཇི་ཡི་ ཨི་ ཨེ་ཆི་ ཁཱར་ (E. H. Carr) གྱིས་བཤད་པ་ལྟར། “རྒྱལ་རབས་ནི་འགྲེལ་བཤད་ཅིག་རེད་”ལ། དགོས་དབང་ལ་བསྟུན་པའི་དུས་སྐབས་ཅན་གྱི་འགྲེལ་བཤད་ཅིག་དང་། དེ་ལ་བརྟེན་པའི་བསྐྱར་འབྲི་དང་བསྐྱར་བཅོས་ཤིག་རེད། རྒྱལ་རབས་བསྐྱར་བཅོས་རིང་ལུགས་ནི། གསར་དུ་རྙེད་པ་དང་བདེན་པ་མང་བའི་ལོ་རྒྱུས་ཀྱི་ཡིག་ཆ། ཡང་ན་ཕྱོགས་ལྷུང་ཉུང་བའི་གནས་ཚུལ་དེ་ཚོ་སྣོན་པ་བྱེད་པའི་དམིགས་ཡུལ་འཛིན་པ་དང་ཆབས་གཅིག ལོ་རྒྱུས་ཀྱི་བདེན་པ་དེ་ཚོ་ལ་བསྐྱར་ཞིབ་བྱས་ནས་འདས་པ་ལ་གོ་བ་ཡག་ག་ཞིག་སླེབས་པའི་འབད་བརྩོན་ཞིག་རེད། ཡང་ད་དུང་གུས་ཞབས་ཉུང་ང་ཞིག་ཀྱང་ཡོད་དེ། ཁ་ཤས་ཀྱིས་ཐ་ན་རྗུན་བཟོ་བྱས་པ་རེད་བརྗོད་སྲིད་ལ། དེ་འདྲའི་བསྐྱར་བཅོས་རིང་ལུགས་པ་ལ་ “ཞི་འགྲིག་རིང་ལུགས་པ་”ཟེར་ཞིང་། ཚིག་དེ་ཐོག་མར་ཧྥ་རན་སིའི་དམག་ཆེན་གཉིས་པའི་ཐོག་ལ་མཁས་པ་ (Le Syndrome De Vichy, སོགས་) ཧེན་རཱེ་ རཱོའུ་སཱོ་ (Henry Rousso) ཡིས་ངོ་སྤྲོད་བྱས་ཤིང་། དེས་རྒྱལ་རབས་བསྐྱར་འབྲི་བྱེད་པའི་བརྒྱུད་རིམ་དེ་ནི་རང་ཉིད་ཀྱི་འདོད་ཕྱོགས་ལ་རྒྱབ་སྐྱོར་བྱེད་པའི་དོན་དེ་ཚོ་ལ་སྒྲོ་འདོགས་དང་། ཐལ་ཆེར་བརྗོད་པ་དང་ཆབས་གཅིག་གལ་ཆེའི་བདེན་དོན་མང་པོ་སྣང་མེད་དུ་འཇོག་པའམ་ཡང་ན་ཁས་མི་ལེན་པ། ཇེ་ཉུང་དུ་གཏོང་བ་བཅས་བྱེད་པ་ཡིན་པར་བརྗོད།

དགེ་རྒན་ཆེན་མོ་ མེལ་ཝན་ གྷོལ་ཌི་སི་ཐེན་གྱི་ ༡༩༡༣ ནས་ ༡༩༥༡ བར་གྱི་བོད་ཀྱི་དེང་རབས་རྒྱལ་རབས། བླ་མའི་རྒྱལ་ཁབ་ཤི་བ། ཞེས་པ་དེ་ ༡༩༨༩ ལོའི་ཐོན་སྐབས། བོད་ཀྱི་འཇིག་རྟེན་ནང་གི་མང་པོ་ཞིག་ཡར་ལངས་དགོས་པ་དང་དོ་སྣང་སྤྲོད་དགོས་པའི་རྒྱུ་མཚན་ནི། དེབ་དེས་བཞག་པའི་བསམ་ཚུལ་ནོར་ས་མེད་པ་ཞིག་སྟེ་ཐ་ན་ཐོག་མར་ཤོག་ངོས་དག་བམ་ཀློག་བྱས་པ་ཙམ་གྱིས་ཀྱང་། འདི་ན་བོད་ཀྱི་རྒྱལ་རབས་སྐོར་ལ་ཡང་བསྐྱར་གནད་ཆེ་བའི་འགྲེལ་བཤད་ཅིག་འདུག་ཅེས་པ་དེ་རེད། བསམ་ཚུལ་འདི་ནི་བོད་ཀྱི་སྲིད་དོན་རྒྱལ་རབས་ཐོན་རིམ་ནང་གི་ཅུང་རིང་བའི་དུས་ཚོད་ཀྱི་སྟོང་ཆ་ཞིག་ཡོད་པ་དེ་ལ་བརྟེན་ནས་ཇེ་ཆེར་ཕྱིན་པ་རེད། དོན་དངོས་ལ། རྩིས་དཔོན་ཞྭ་སྒབ་པའི་བོད་ཀྱི་རྒྱལ་རབས་ཐད་ཀྱི་གལ་ཆེའི་ལོ་རྒྱུས་ཏེ། བོད་ཀྱི་སྲིད་དོན་རྒྱལ་རབས་ཐོན་པ་ནས་ལོ་ཉི་ཤུ་རྩ་གཉིས་འདས་ཟིན་པ་དང་། ཧཱུ་ རི་ཆར་ཌི་སཱོན་ (Hugh Richardson) གྱི་འདོད་རྔམ་ཆུང་མོད་བེད་སྤྱོད་ཆེ་བའི་ བོད་དང་དེའི་རྒྱལ་རབས་ ཅེས་པ་ཐོན་པ་ནས་ལོ་ཉི་ཤུ་རྩ་བདུན་ཕྱིན་ཡོད་པ་རེད། ང་ཚོ་ལ་ ཧཱུ་ རི་ཆར་ཌི་སཱོན་དང་སི་ནེལ་གྷ་རོབ་ (Snellgrove) ཀྱི་ ༼འགྲན་ཟླ་ད་དུང་མེད་པ་ལྟར་༽བོད་ཀྱི་རིག་གནས་ལོ་རྒྱུས་ ཅེས་པ་དེ་ ༡༩༦༨ ལོར་ཐོབ་ཀྱི་ཡོད་ལ། བོད་ཀྱི་སྔ་མོའི་རྒྱལ་རབས་ཐད་ཀྱི་རྩོམ་དང་ཆེད་རྩོམ་ཐར་ཐོར་ཡོད་པ་མ་གཏོགས་རྒྱ་ཆེ་བའི་སྲིད་དོན་རྒྱལ་རབས་ཤིག་མེད་པ་རེད།
Read the rest of this entry »

མགོ་ལོག་སྨིན་ཐང་ཕྱོགས་ཀྱི་ཡ་ང་བའི་གནས་ཚུལ།

བོད་འབྱོར་གནས་ཚུལ།
བོད་མདོ་སྨད་མགོ་ལོག་ཨ་སྐྱོངས་ཁང་སར་སྨིན་ཐང་ཡུལ་ཚོ་༼ཤང་།༽ལ་མཚོན་ན། ཕྱི་ལོ་༡༩༥༨ལོར་མགོ་ལོག་ཁ་གསུམ་གྱི་ནང་ནས་དང་པོ། ཁྲ་ཤུལ་བསོ་མོ་དང་། ཕ་ཚེ་ཐར་གཉིས་གྱིས་དམག་དཔོན་མཛད་དེ་རྒྱ་དམག་ལ་འཐབ་འཛིང་བྱས་ནས་རྒྱ་དམག་གསུམ་བསད་ཅིང་། རྫོང་མདའ་ཆེ་བ་ཞིག་དང་མེ་མདའ་གསུམ་བླང་བ་རེད། ཐེངས་གཉིས་པ་སྐོང་གསེར་ནས་དམག་དཔོན་ཧོར་ཤེར་བཟང་དང་། མགོ་ལོག་དཀོན་མཆོག་སྐྱབས། ཐང་བ་བསོ་པོ་སོགས་ཀྱིས་གཅེས་སྲོག་བཏང་ཞིང་ཁང་སར་དམག་མང་ཡོངས་ཀྱིས། རྒྱ་དམག་སུམ་རྒྱ་ཙམ་དམར་གསོད་བྱས་པའི་མཐར་མང་སྣེ་ཉུང་གིས་མ་བརྟེན་པར་རྒྱ་དམག་གིས་བོད་མི་༨༠ ཙམ་འཛིན་བཟུང་བྱས་པའི་ནང་ནང་ཕར་ཆེར་མུ་གེས་ཤི ཁྲ་བསོ་དང་ཕ་ཚེ་སོགས་མི་བཅུ་མ་གཏོགས་རང་ཡུལ་ལ་མ་ཐོན། ཕྱི་ལོ་༡༩༦༨ལོར་དོམ་ཙ་བླ་མ་རྡོར་ལོ་དང་། ཁྲོ་ཤུལ་བློ་རྣམ། ཁྲ་ཤུལ་བསོ་མོ། ཕ་ཚེ་ཐར་སོགས་གྱིས་བོད་མིའི་བདེ་སྡུག་གི་ཆེད་དུ་གཅེས་སྲོག་བཏང་། ཤུལ་དུ་ལྷག་པ་གཙང་སྐོར་གྲུབ་ཆེན་ཨོ་རྒྱན་རིག་འཛིན། སྤྲུལ་བསྟན་པའི་དབང་ཕྱུག་གཉིས་ཚེ་བཙོན་བྱས། ཧོར་བསམ་རྒྱམ་དང་། མགོ་ཚེ་མ་གཉིས་ལ་ལོ་ ༡༥ ཁྲིམས་ཐག་བཅད། གཞན་ཡང་ཁྲིམས་པ་ལྔ་དྲུག་ཙམ་ཡོད།
ཕྱི་ལོ་ ༢༠༠༨ ཟླ་༣པའི་ཚེས་ ༡༤ ཉིན་བོད་ལྗོངས་ལྷ་ས་གྲོང་ཁྱེར་ནས་ཞི་བའི་ཡར་ལང་བྱས། ཚེས་ ༡༦ ཉིན་རྔ་བ་རྫོང་ནས་ཡར་ལང་བྱས་ཤིང་མི་ ༢༠ ལྷག་དམར་གསོད་བྱས། མི་མང་པོ་ཁྲིམས་ཁང་དུ་བཅུག་ནས་རྡུང་རྡེག་དྲག་པོ་བྱས་ཏེ་བསད་པ་ཡང་བཅུ་ཕྲག་ཙམ་ཡོད་ཟེར། དེ་མིན་ཁྲིམས་ཐག་བཅད་པ་ཡང་མང་པོ་ཡོད་ཀྱང་མིང་ད་དུང་གསལ་བོར་ཤེས་མེད། ཚེས་ ༡༧ ཉིན་གྱི་ཆུ་ཚོད་དྲུག་གི་སྟེང་མགོ་ལོག་གཅིག་སྒྲིལ་རྫོང་གི་སོག་རུའི་ཨ་ཏི་གཟའ་ཟླ་མགོ་གཙོ་བྱས་ཏེ། སྨིན་ཐང་ཁྲ་ཤུལ་ཆོས་མཛོད། ཁྲ་ཤུལ་དོན་ཡོད། ཁྲ་ཤུལ་དཔལ་འབྱོར། ལམ་སྐོར་ཕུར་ཐར། མགོ་ལོག་ལེ་ཚོགས། དགེས་སྐོར་བློ་བཟང་། འདོད་ལྷ། ཝ་འགྲོ་འདུལ། གླིང་ཆོས་གྲགས། གླིང་བློ་བཟང༌། གླིང་འཇམ་དབྱངས། ཆོ་རྗེ་དཀོན་མཆོག་སོགས་མི་གསུམ། ཁང་སར་རིག་འཛིན། དྲག་རས། གླུ་བ་རྟ་མགྲིན་ཕ་བུ་སོགས་ཀྱིས་ཡར་ལང་བྱས་ནས་ཉེན་རྟོགས་པའི་རླངས་འཁོར་གཉིས་བཅག་ཅིང་། ལམ་གྱི་བཞི་མདོའི་ཉེན་རྟོགས་པའི་ཁང་ཆུང་མེར་བསྲེགས་བཏང་། དེའི་ཕྱི་དྲོ་ཚོད་བདུན་པའི་སྟེང་སྨིན་ཐང་ཡུལ་ཚོའི་༼ཤང་།༽ན་གཞོན་འགས་མགོ་འཛིན་བྱས་ནས། ཧི་ར་ཤེས་རབ་དང་། ཁྲ་ལིའི་གཡང་སྒྲུབ། ལམ་སྐོར་བློ་གྲོས། ཕ་བསྟན་འཛིན་མགོན་པོ། མགོ་ལོག་སྒྲོན་ཚེ། ཁྲ་ཤུལ་བདེ་ལེགས། འཇུ་སྐུ་གསུམ། དམེ་སྐྱ་པེ། ཁྲ་ཤུལ་བག་རྩེ། ཆོས་སྐོར་མགོན་པོ་སྐྱབས། ཁྲ་ལུའི་གསེར་ཐུབ། ལམ་སྐོར་སྐལ་ལྡན། ཁྲ་ལུའི་ཡར་འཕེལ། ཁྲ་ལུའི་འགྲོ་དོན། ཁྲ་ལུའི་བློ་བཟང༌། ཆོས་སྐོར་བློ་བསམ། ཨེ་འུ་པད་མགོན། ཨེ་འུ་རས་ཆུང༌། ལམ་གོང་ཡོང་འགྲུབ། ཤ་བསམ་འགྲུབ། མཆུག་ཨོ་རྒྱན་དང་དབང་སྟོབ། མཆུག་ཡོང་འདུས་སྐྱབས། ཨ་རིག་བསོད་ནམས་རྡོ་རྗེ། ཧི་ར་འཛམ་གླིང་དང་ལྷས་གསར། དམེ་མགོན་ནེ། དགོ་ནང་ཟླ་བ། སྒོ་ནང་རྡོར་པེ། ལམ་གོང་ཐེག་མཆོག བུར་བཟའ་མུ་ནུ། ཆོས་སྐོར་རྒྱ་མཚོ། ཤ་ཚོས་རས། གླིང་ཀུར་པེ། ཧི་ར་དོན་སྟོབ། གཡག་གཡུལ་རྒྱལ། རྔ་བ་ཨ་གར། རྔ་བ་གཏེར་པོ་རྣམས་ཀྱིས་ཁྲོམ་སྐོར་བྱས་ནས་ཡུལ་ཚོའི་ཉེན་རྟོགས་ཁང་བ་མེ་ལ་བསྲེག་ཅིང་། རྒྱའི་དར་དམར་མར་ཕབ་ནས་ཁྲ་ལིའི་གཡང་སྒྲུབ་ཀྱིས་བོད་གྱི་རྒྱལ་དར་ཡར་བསྒྲེངས། Read the rest of this entry »

བོད་ནང་གི་གནས་ཚུལ།

ཀླུ་འབུམ་བཀྲིས།

ཉེ་བའི་ནང་བོད་ནང་ཟིན་བྲིས་བོར་སོང་བ་མང་པོ་བྱུང་ཡོད་པ་མ་ཟད་མི་བུ་རང་ཉིད་བོར་སོང་བ་ཡང་མི་ཉུང་བ་ཡོད་པ་ངོ་མ་གྱོང་ཁུལ་ཆེན་པོ་རེད་ཟེར། བོད་ནས་གྲོགས་པོ་ཞིག་གིས་བཤད་རྒྱུར། ད་ལྟ་དགོན་པོ་སོ་སོ་ནས་གྲྭ་མང་པོ་བོར་ནས་ཟླ་རེ་གཉིས་ནང་ད་དུང་གར་སོང་མི་གོ་གི ཉེ་ལམ་མདོ་སྨད་སྐུ་འབུམ་དགོན་པའི་གྲྭ་བ་ཁྲི་སྐལ་བཟང་བརྩོན་འགྲུས་དང་དཀོན་མཆོག་བསམ་གཏན་(མི་ཁོམ་པའི་རྒྱལ་སྲས་)མདོ་སྨད་དཀའ་སྦྱིན(སྦྱིན་པ་རྒྱ་མཚོ)བློ་བཟང་ཚེ་རིང་སོགས་མི་བཞི་སྤྱི་ཟླ་༤པའི་༡༦ནས་༥བའི་༡༥བར་ཟླ་གཅིག་གི་རིང་ལ་གར་སོང་མ་ཤེས་ཟིག རྗེས་སུ་དགོན་པའི་གྲྭ་བ་དག་གིས་དགོན་བདག་སོགས་ལ་རེ་བ་ཡང་ཡང་ཞུས་ཏེ་ཁོ་ཚོས་གོང་རིམ་ལ་ཞུ་བ་ཡང་ཡང་ཞུས་མཐར་ཟླ་༥བའི་༡༥ཉིན་གང་ཡིན་མ་ཤེས་བར་གློད་གྲོལ་བཏང་ཡོད་ནའང་ ཡིད་སྐྱོ་བ་ཞིག་ལ་ཁོ་ཚོས་མི་འདོད་པའི་དངོས་པོ་དག་གཞུང་བཞེས་གནང་བ་མ་ཟད་གྲྭ་རྐྱང་གི་ཆ་རྐྱེན་ལ་མ་ལྟོས་པར་ཁྲི་སྐལ་བརྩོན་གྱི་གདན་འོག་ནས་དམངས་སྒོར་སྟོང་དྲུག་ལྷག་གི་ནང་ནས་སྒོར་༢༨༠༠དང་སྒོར་ཁུག་ཏུ་སྒོར་བདུན་བརྒྱ་ཡས་མས་ཡོད་པའི་ནང་ནས་སྒོར་༢༡༠མ་གཏོགས་ཕྱིར་སྤྲད་མེད་པའི་གནས་ཚུལ་བཤད་བྱུང་།

སྲིད་དབང་སྒེར་འཛིན་ལམ་ལུགས་ནས་མང་གཙོའི་ལམ་ལུགས་བར།

སྲིད་དབང་སྒེར་འཛིན་ལམ་ལུགས་ནས་མང་གཙོའི་ལམ་ལུགས་བར། -བཅིངས་གྲོལ་གྱི་ཆེད་རྟོག་འཆར་གྱི་སྒྲོམ་གཞི་ཞིག །
From Dictatorship to Democracy: A Conceptual Framework for Liberation
ཨེལབྷཊ་ཨེནཊིན་ལྟེ་གནས་ཁང་གི་མཁས་དབང་ཇཱིན་ཤཱརྤ་ཡིས་བརྩམས།
པདྨ་ཚེ་དབང་ཤཱསྟྲིས་གངས་ལྗོངས་བོད་ཀྱི་སྐད་དུ་བསྒྱུར།
” …ངས་མང་ཚོགས་ལ་སྲོག་སྐྱོན་དང་སྡུག་བསྔལ་ཉུང་བའི་ཐོག་ནས་སྲིད་དབང་ སྒེར་འཛིན་ལམ་ལུགས་དེ་ལམ་ལྷོངས་ལྡན་པའི་སྒོ་ནས་འཐོར་ཞིག་གཏོང་བར་ཆེས་ནུས་པ་ལྡན་པའི་ཐབས་ལམ་གྱི་སྐོར་ལ་བསམ་བློ་ཞིབ་ཚགས་གཏོང་རྒྱུའི་འབད་རྩོལ་བྱས་པ་ཡིན། འདིར་ངས་ལོ་མང་རིང་ལ་སྲིད་དབང་སྒེར་འཛིན་ལམ་ལུགས་དང་། འགོག་རྒོལ་ལས་འགུལ། གསར་བརྗེའི་ལས་འགུལ། སྲིད་དོན་གྱི་ལྟ་བ། སྲིད་གཞུང་གི་ལམ་ལུགས། དམིགས་སུ་བཀར་ཏེ་དངོས་དོན་གྱི་འཚེ་བ་སྤངས་པའི་འཐབ་རྩོད་བཅས་ཀྱི་ཐོག་ལ་སློབ་སྦྱོང་བྱས་པའི་ཉམས་མྱོང་ལ་གཞི་བཞག་ཡོད། དེབ་འདི་དེའི་འབྲས་བུ་རེད།…”
གཤམ་གསལ་འབྲེལ་ཐག་ལ་བསྣུན་ནས་དེབ་ཐེར་འདི་ཆ་ཚང་ཀློག་རོགས།
dictatorship_to_democracy-final

ང་ད་དུང་མྱི་གསོན་པོ་ཡིན།

གཡུ་ཚང་ལྷ་མོ་དོན་གྲུབ། ཨ་རི།
མཁྱེན་ལྡན་དྲ་གྲོགས་རྣམ་པ་ལགས།
ཐེངས་འདིར་ཡང་ངས་ཐོག་མར་མ་བསམ་ས་ནས་ཁ་བརྡ་ལ་དགོངས་སེལ་ཞུ་དགོས་བྱུང་སོང་། རྒྱུ་མཚན་ནི་རྒད་པོ་ངས་འཆི་ཁར་ཁ་ཆེམས་ལྟ་བུའི་ཁ་བརྡ་ཐུང་ཐུང་ཞིག་བྱས་པའི་རྗེས་ནས་ཁ་བརྡ་དྲ་ཐོག་ཏུ་ཉོག་བཤད་བྱེད་མཁན་ཆར་ཤུལ་གྱི་ཤ་མོ་བཞིན་བརྡོལ་ནས་དྲ་ངོས་ཀྱི་ཁོར་ཡུག་ལ་བརྡབ་གསིག་ཚོད་མེད་འཐེབས་སོང་པས་ཡིན། ངོ་མ་བཤད་ན་ངས་རང་གི་བསམ་ཚུལ་ཞིག་གམ། དྲན་ཕྱོགས་ཤིག་གམ། རྨོངས་འཆར་ཞིག་ལྷག་བསམ་ཟོལ་མེད་དང་དྲང་པོ་དྲང་བཞག་གིས་རང་ཉིད་ལྟར་འཆི་ལ་ཉེ་བའི་བོད་མི་རིགས་ཀྱི་རྩ་དོན་ལ་བསམ་ནས་འདིར་ཀུན་པོའི་སྤྱན་ལམ་དུ་བསྟར་བ་ཡིན་ཏེ། དྲ་གྲོགས་འགས་བོད་ཀྱི་དབུ་འཁྲིད་ཏཱ་ལའི་བླ་མ་དང་རྒྱ་གར་གྱི་གཱན་དྷི། འབར་མའི་ཨན་སང་སོ་སྐྱིད། ཨ་ཧྥུ་རི་ཁའི་ནེལ་སོན་མན་ད་ལཱ་སོགས་ཀྱི་གནས་སྟངས་མི་འདྲ་བས། བོད་ཀྱི་དབུ་འཁྲིད་ཁོང་བོད་མི་དམངས་དང་མཉམ་དུ་ཕེབས་ནས་བོད་དོན་འཐབ་རྩོད་བྱེད་པ་ཡོང་ཐབས་མེད་པའི་སྐོར་གྱི་ལྟ་ཚུལ་ཞིག་བརྗོད་པ་མ་གཏོགས། གཞན་མང་པོ་ཞིག་གིས་སུ་ཞིག་འཇིགས་སྐུལ་རིང་ལུགས་པ་ཡིན་པ་དང་། སུ་ཞིག་གི་མིང་ཚིག་གུང་ཁྲན་ཏང་གི་མིང་ཚིག་ཡིན་པ། སུ་ཞིག་སོ་བ་ཡིན་པ་སོགས་ཀྱི་འབྲེལ་མེད་དོན་གཞན་རྐྱང་གླེང་ནས། ང་ཚོར་སྔར་ནས་ཡོད་པའི་མྱི་མ་ཤི་གོང་ལ་མིག་རིལ་འབྲུ་བའི་ངན་རྟགས་ད་དུང་ཡང་ཐོན་ཡོང་པས། ྐློག་པ་པོ་ཡོངས་དང་ཁ་བརྡའི་བདག་པོ་ཚོར་ཉོབ་སྣང་ཚད་མེད་སྐྱེས་ཡོད་ངེས་རེད་ལ། ཁོང་ཚོའི་ངན་རྟགས་འདི་ལས་ང་ཚོས་སྔར་བོད་མི་བསམ་མེད་དག་གིས་མཁས་དབང་དགེ་འདུན་ཆོས་འཕེལ་དང་དོན་གྲུབ་རྒྱལ། ལུང་ཤར་རྡོ་རྗེ་ཚེ་རྒྱལ་བཅས་ལ་མ་ཉེས་ཁག་གཡོགས་བྱས་པའི་རླུང་ནག་འཚུབ་མའི་འཁོར་སྟངས་དེ་གསལ་ལྷང་ངེར་མཐོང་ཐུབ་པ་མ་ཡིན་ནམ། Read the rest of this entry »

བཤད་འདོད་པའི་སྐད་ཆ་འདི་ཡིན།༼སློབ་བུ་ཆོས་འབྱོར་ལ་བྲིས་པ།༽

ལྷ་ལུང་རྒྱལ།
རིགས་ཚུལ་གློག་གི་འདྲིས་མཐུན་སློབ་གྲོགས་ཚོ་བསྐྱུར་ཅིང༌།།
ཤེས་བྱའི་འོ་མ་འཐུང་མཚམས་ཕོར་ཁ་རུ་བཞག་ལ།།
རབ་མཛེས་སློབ་གྲྭའི་མཛའ་གཅུགས་ཡིད་མཐུན་མར་བྲལ་ནས།།
མི་གཅིག་གླིང་ལ་རི་ཆུས་བསྐལ་བ་འདི་ཅིས་ལན།།

འདུ་འབྲལ་སྒྱུ་མའི་རོལ་སྒེག་འཇའ་འོད་ཀྱི་ཕྱོགས་ལ།།
སྐྱོ་དགས་འཐམ་འཁྱུད་རེ་བའི་འབྲས་བུ་དེ་དབེན་ཡང༌།།
མི་སྐྱིད་དངན་པའི་རླུང་བུ་བྱང་ཁོག་ཏུ་ལྡིང་བ།།
ཕྱི་དབུགས་ལ་འདྲེས་གོ་ལར་འཁོར་བསྐྱོད་ཅིག་བྱས་སོང༌།། Read the rest of this entry »

ཧི་མ་ལ་ཡའི་རི་འདབས་ནས།

ལྷ་ལུང་རྒྱལ།
རིའི་བར་སྐེད་ལོང་ལོང་སྨུག་སྤྲིན་གྱིས་བཟུང་ཞིང༌།།
ཆར་སིམ་བུའི་དངོས་གྲུབ་ཉི་འོད་ཀྱིས་ལྕིབས་པ།།
འོད་འཚེར་རེར་འཇོ་བའི་ཕྱི་དྲོ་ཡི་དུས་ཤིག།
སེམས་རྒྱག་ཕྱོགས་ཤིག་གིས་ཞེ་མཐུན་ཁྱོད་དྲན་འོང༌།།

བྱ་རྒོད་པོའི་གཤོག་པས་འཁྱོག་ཐབས་རང་མེད་ལ།།
ཆུ་གཙང་པོ་རླབས་ཀྱིས་འཁྱེར་ཐབས་ཀྱང་དབེན་པ།།
ལུས་ནམ་མཁའ་དྲན་གདུང་སྤྲིན་ནག་གིས་གཡོགས་ཏེ།།
ས་འདི་ནས་ཉི་མ་འཁྱོལ་ཐབས་ཅིག་མི་འདུག།

ཕྱིའི་འབྱོར་བ་གདོན་གྱི་བསླུ་བྲིད་ཀྱིས་ཡིན་ནམ།།
དུས་འགྱུར་ལྡོག་མི་ཡི་ཁ་དོག་ཀྱང་བསྒྱུར་རམ།།
ཕྱི་ཐག་རིང་མཛའ་གཅུགས་མེ་ཏོག་དང་འཇའ་སྤྲིན།།
མིག་ལོངས་སྤྱོད་མ་ཐོབ་སེམས་པ་དེ་ལྟོགས་ཡོད།། Read the rest of this entry »

དུད་ནག་ལྟ་བུའི་བོད་ཀྱི་བླ་སྤྲུལ་འདི་ཚོ།

བྲག་སྣ་བ།
དུས་རབས་བཅུ་གཉིས་པའི་དུས་མགོ་ནས་བཟུང་བོད་འདིར་ཡང་སྤྲུལ་ལམ་ལུགས་ཀྱི་གོམས་སྲོལ་གསར་པ་ཞིག་འགོ་ཚུགས་ཤིང༌། གོམས་སྲོལ་འདི་རིམ་པས་བོད་ཀྱི་ནང་བསྟན་རིག་གནས་ལ་འབྲེལ་འདྲིས་དམ་པའི་རིག་གནས་བྱེ་བྲག་པ་ཞིག་ཏུ་གྱུར་ཏེ། ད་བར་བོད་སྤྱི་ཚོགས་ཁྲོད་དུ་ཆོས་སྲིད་གཉིས་ཐད་ཀྱི་གོ་གནས་འགངས་ཆེན་ཤིག་ཟིན་ཡོད་པ་དང༌། བོད་མི་ཚོའི་ངོས་ནས་ཁོང་ཚོ་ནི་སངས་རྒྱས་བྱང་འཕགས་ཆེ་གེ་མོ་ཞིག་གི་སྤྲུལ་བ་ཤ་སྟག་སྟེ། འགྲོ་བ་སེམས་ཅན་སྤྱི་དང་ལྷག་དོན་བོད་མིའི་བདེ་སྡུག་ཁོ་ནའི་ཕྱིར་མི་ཡི་ཤ་ཚུགས་སུ་བྱོན་པ་ཁོ་ནར་སྙམ་གྱི་ཡོད་ཕྱིན། བླ་མ་ཚོ་ནི་བོད་སྤྱི་ཚོགས་འདིའི་དབང་སྒྱུར་སྟོབས་ཤུགས་ཀྱི་གོང་བུ་ཆེས་བླ་ན་མེད་པ་ཞིག་སྟེ། བོད་མི་རིགས་འདིའི་བླའམ་སྲོག་ལྟ་བུ་ཞིག་ལ་གྱུར་ཡོད་པ་ནི་འགྲེལ་བརྗོད་ཞུ་ཐུབ་པ་ཞིག་མིན།
རྒྱུ་མཚན་དེས་མི་རིགས་འདིས་གནའ་ནས་ད་བར་ཟས་ཀྱི་ཞིམ་ས་དང༌། གོས་ཀྱི་ཡག་སས་མཚོན་རང་ལ་དབང་བའི་མཆོག་དང་ཕུལ་གྱི་གྱ་ནོམ་དངོས་པོ་མཐའ་དག་བླ་མར་ཕུལ་ཡོད་པ་དང༌། བླ་མ་ཚོ་ནི་ཚེ་འདི་དང་ཕྱི་མའི་མགོན་སྐྱབས་དཔུང་གཉེན་དམ་པ་སྟེ། ཁོང་ཚོའི་སྤྱན་གྱིས་མི་མཐོང་བ་དང༌། ཐུགས་ཀྱིས་མི་མཁྱེན་ྭཔ། སྙིང་རྗེས་མི་སྐྱོབ་པའི་ཉམས་ཐག་སེམས་ཅན་ཞིག་འཇིག་རྟེན་འདིར་མེད་པར་སྙམ་སྟེ། སྐྱིད་སྡུག་གི་དུས་ནམ་ཡང་བླ་མར་རེ་ཞིང་གསོལ་བ་འདེབས་རྒྱུ་ནི་དབུགས་ཀྱི་འབྱིན་རྔུབ་དང་གཏན་ཏུ་ཁ་བྲལ་མྱོང་མེད་པ་ལྟ་བུ་ཞིག་ཡིན།
ཡིན་ནའང༌། ཡིད་སྐྱོ་བ་ཞིག་ལ། འདས་ཟིན་པའི་ལོ་རྒྱུས་ཀྱི་འགག་འཕྲང་རེ་ནས། མི་རིགས་འདི་ཆེས་སྡུག་བསྔལ་དང་ཛ་དྲག ཆེས་ཉམས་ཐག་དང་ཉེན་ཁར་ལྷུང་ཐེངས་རེར། རྒྱལ་བ་པཎ་ཆེན་ལྟ་བུ་རེ་འགའ་མ་གཏོགས་པའི་བོད་ཀྱི་བླ་མ་གཞན་དག་ཚོས་མི་རིགས་འདིས་ཁོ་ཚོར་བཅངས་པའི་ཡིད་ཆེས་བློས་གཏོད་ལ་དཔག་པའི་རིན་འབབ་ཅིག་རྩ་བ་ཉིད་ནས་སྤྲོད་ཐུབ་མེད་པར་མ་ཟད། ད་དུང་སྐབས་འགར་བོད་མི་རིགས་འདི་སྣང་བ་ལས་མུན་པར་འཕེན་པའི་མཐུན་འགྱུར་རོགས་རམ་ཡང་ཞུས་མྱོང་ཡོད། Read the rest of this entry »

བོད་རྒྱའི་བར་གྱི་བོད་དོན།

གཤམ་ལ་རྒྱ་ནག་ཕྱོགས་ནས་བོད་དང་བོད་ཀྱི་གནད་དོན་སྐོར་ལ་རྣམ་འགྱུར་ཅི་ཞིག་བཟུང་ཡོད་པའི་སྐོར་གྱི་ཡིག་ཆ་ཁག་ཅིག་ཟུར་འདོན་ཞུས་ཡོད། འདི་ལྟར་བོད་དོན་གླེང་སྟངས་ཐད། ཁྱེད་རང་ལ་བསམ་ཚུལ་ཅི་ཡོད་དམ། མང་པོའི་བསམ་ཚུལ་སྤེལ་སླད་འདིར་དོན་གནད་ཁག་ཟུར་འདོན་ལས། ཡིག་ཆ་ཆ་ཚང་ཟུར་འདོན་ཞུས་མེད།

༼༡༽ ཕྱི་ལོ་ ༢༠༠༨ ཟླ་ ༣ ཚེས་ ༢༡ ཉིན་གྱི་༼བོད་ལྗོངས་ཉིན་རེའི་ཚགས་པར༽་གྱི་དཔྱད་གཏམ་ནང༌།

¿ཐེངས་འདིར་ལྷ་སར་བྱུང་བའི་རྡུང་བཅོག་འཕྲོག་སྲེག་གི་ཚབས་ཆེའི་དོན་རྐྱེན་དང༌། སྐྱི་གཡའ་བའི་དྲག་སྤྱོད་དེ་དག་གིས་དོན་མེད་དུ་སྐྱེ་འགྲོ་རྣམས་ལ་སྡུག་བསྔལ་ཚབས་ཆེན་མྱོང་དུ་བཅུག་པ་ཡོད་པ་དེས། ཏཱ་ལའི་ནི་ཁོ་རང་གིས་སྒྲོག་པ་ནང་བཞིན་གྱི་ནང་པའི་དགེ་སློང་ཞིག་ཡིན་ཟེར་བ་དེ་ལྟ་བུ་ཞིག་གཏན་ནས་མིན་པ་ར་འཕྲོད་ཡོད། ཁོ་ནི་མིའི་གདོང་ལ་གཅན་གཟན་གྱི་སེམས་དང་ལྡན་ཞིང༌། ཆོས་གོས་གྱོན་པའི་འཕར་སྤྱང་ཞིག་རེད་ཅེས་བརྗོད་ན་ཐལ་ཆ་གང་ཡང་མེད། སྟོན་པ་བཅོམ་ལྡན་འདས་ཡིན་ནའང༌། ཏཱ་ལའི་ནང་བཞིན་ཁ་འཇམ་ཁོག་རྩུབ་ཀྱི་ནང་པའི་ཞབས་འདྲེན་པ་དང༌། མིའི་གདོང་ལ་གཅན་གཟན་གྱི་སེམས་དང་ལྡན་པའི་དྲག་སྤྱོད་པ་སྨྱོ་རྩུབ་ཅན་འདི་བཟོད་བསྲན་བྱེད་ཐུབ་ཀྱི་མ་རེད། ཏཱ་ལའི་ལྟ་བུ་མེས་རྒྱལ་དང་མི་དམངས་ལའང་རྒྱབ་གཏོད་བྱེད་ཕོད་མཁན་མིཞིག་ལ། ད་དུང་མིའི་ཐ་སྙད་སྦྱོར་རུང་ངམ། གྲྭ་པཞིག་ཡིན་པའི་ཆ་ནས། ཏཱ་ལའི་ཡིས་རྫུན་ཤོད་པ་མ་ཟད། ཐེངས་འདི་ཚབས་ཆེའི་རྡུང་གཅོག་འཕྲོག་སྲེག་གི་དོན་རྐྱེན་བཀོད་བྱུས་དང་སྟངས་འཛིན་བྱས་ཏེ། ཁོ་པའི་སྤྱོད་ངན་དེ་ཐོས་པ་ཙམ་གྱིས་ཧང་སངས་དགོས་པ་ཞིག་ཡིན་ལ། གདོན་འདྲེ་ལའང་དེ་ལས་ལྷག་ཅི་ཡོད། གལ་སྲིད་སྟོན་པས་ནང་པའི་རྗེས་འཇུག་འདི་ལྟ་བུ་ཞིག་ཡོད་པ་མཁྱེན་ན། ཁོང་ཡང་ངེས་པར་དུ་ཞལ་སྐྱེངས་པོ་ཡོང་གི་རེད། དེ་ནི་གཏན་འཁེལ་བ་ཞིག་རེད།¿ཅེས་བཀོད་འདུག Read the rest of this entry »

བོད་དོན་འཐབ་རྩོད་དང་སེམས་ཀྱི་དྲན་ཕྱོགས།

བཙུན་ཐར་ཚེ་རིང༌།
ྋགོང་ས་མཆོག་གིས་གཙོས་བོད་མི་སེར་སྐྱ་ཁྲི་ཕྲག་མང་པོ་གཞན་ཡུལ་ལ་སྐྱབས་བཅོལ་དུ་འབྱོར་ཞིང༌། གཞིས་བྱེས་གཉིས་སུ་གྱུར་ནས་དུས་རབས་ཕྱེད་ལྷག་ཕྱིན་པའི་དུས་སྐབས་ཏེ། ཕྱི་ལོ་ཉིས་སྟོང་བརྒྱད་ཀྱི་དེ་རིང༌། ཆོ་འཕྲུལ་སྨོན་ལམ་ཆེན་མོའི་མཆོད་མཇལ་འདུ་འཛོམས་ཀྱི་གོ་སྐབས་དང་བསྟུན་མདོ་སྨད་རེབ་གོང་བ་སྐྱ་སེར་མི་མང་གིས་བོད་མི་རིགས་ཀྱི་རང་དབང་བདེན་དོན་ཆེད་རྒྱ་ནག་གཞུང་ལ་ཞི་བའི་ངོ་རྒོལ་སྐད་འབོད་ཤུགས་ཆེ་བྱས་པ་ལ་རྐྱེན་བྱས། བོད་ཆོལ་ཁ་གསུམ་གྱི་ས་གནས་དྲུག་ཅུ་རེ་དགུ་ནས་རང་འགུལ་གྱིས་ཡར་ལངས་ཏེ་ཞི་བའི་ངོ་རྒོལ་གྱི་ལས་འགུལ་སྤེལ་ནས་ཟླ་གཉིས་ལྷག་འགྲོ་བཞིན་ཡོད་ལ། ཞི་བའི་ངོ་རྒོལ་སྐབས་ཆོས་བྱེད་སེར་མོ་བ་གཙོས་སློབ་གྲྭ་དང༌། ཞིང་འབྲོག་མང་ཚོགས། ས་གནས་ལས་བྱེད་སོགས་ལས་རིགས་མི་འདྲ་བའི་བོད་རིགས་སྤུན་ཟླ་ཕོ་མོ་རྒན་གཞོན་གང་མང་མཉམ་ཞུགས་བྱས་ཡོད་པ་ན་མང་ཆེ་ཤོས་གཞོན་སྐྱེས་མི་རབས་རེད། Read the rest of this entry »

རྨས་སྐྱོན་ཐེབས་པའི་མི་རིགས་ཤིག་གི་ཚེ་སྲོག་སྐྱོབས་པའི་མཐའ་མའི་དམག་འཐབ།

སྐུ་ཞབས་ལུང་རིགས་རྒྱལ་གྱི་གཅིག་གྱུར་ཆེན་པོ་གཉིས་ཞེས་པའི་ཆེད་རྩོམ་བཀླགས་པའི་རྗེས་འབྲེལ་དུ།

ཨ་འབྲུག་དཀོན་མཆོག

༸གོང་ས་མཆོག་གིས་བོད་ཀྱི་གནད་དོན་འདི་རྒྱལ་སྤྱིའི་ཆབ་སྲིད་ཀྱི་འགྱུར་ལྡོག་ཆེན་པོ་ཞིག་གི་འོག་ནས་བྱུང་བ་དང་འདི་ཉིད་ཐག་གཅོད་ཀྱང་རྒྱལ་སྤྱིའི་ཆབ་སྲིད་འགྱུར་འགྲོས་ཀྱི་རྒྱབ་ལྗོངས་དང་མཐུན་པར་བྱེད་དགོས་པ་དེ་དུས་རབས་སྔོན་མའི་དུས་དཀྱིལ་ནས་དཔྱོད་དཔག་གིས་ལམ་སྟོན་དང་འཆར་སྣང་གི་དགོངས་ཚུལ་བཏོན་ཡོད་ལ། རྒྱང་བཀྱེད་ནས་བལྟས་ན་དབུ་མའི་ལམ་གྱི་སྲིད་བྱུས་ལ་དེ་ལྟ་བུའི་དུས་རབས་ཀྱི་རྒྱབ་ལྗོངས་ཡོད་པ་རེད། འོན་ཀྱང་༸གོང་ས་མཆོག་གིས་དགོངས་པ་བཞེས་ཕྱོགས་དང་དབུ་མའི་ལམ་གྱི་སྲིད་བྱུས་རང་སྟེང་ནས་བཤད་ན་དེའི་ཆེ་བ་རྒྱས་བཤད་བྱེད་རྒྱུ་ལས་ཀྱང༌། དེ་ཉིད་འགལ་ཟླ་འདུམ་འགྲིག་གི་ལམ་ནས་སེལ་ཐུབ་པའི་ལག་ལེན་གྱི་རང་བཞིན་ལྡན་པའི་ཐོག་མའི་ཡིད་ཆེས་དེ་མངོན་གྱུར་ཡོང་ཐབས་ལ་འབད་པ་བྱས་ཡོད་པ་རེད། དབུ་མའི་ལམ་གྱི་སྲིད་བྱུས་དེ་རྒྱལ་སྤྱིའི་འགལ་རྩོད་སེལ་ཕྱོགས་ཀྱི་༸གོང་ས་མཆོག་གི་སྤྱིར་བཏང་གི་དགོངས་པ་ལས་བྱུང་ཡང་ཆེད་དམིགས་ཀྱི་ཆ་ནས་དེ་ཉིད་བོད་ཀྱི་གནད་དོན་ཐག་གཅོད་བྱེད་པའི་ཐབས་ལམ་ཞིག་ཡིན་ལ། སྲིད་བྱུས་འདི་༸གོང་ས་མཆོག་གི་དགོངས་གཞི་ཙམ་ལས་བོད་གཞུང་གི་ཁྲིམས་ཐོག་ནས་གཏན་འབེབས་བྱས་པའི་སྲིད་བྱུས་ཤིག་ཏུ་མ་གྱུར་བའི་ཡར་སྔོན་དེར་༸གོང་ས་མཆོག་གིས་བོད་ཀྱི་རྩ་དོན་ནི་བོད་མི་ས་ཡ་དྲུག་གི་བདེ་སྐྱིད་ཀྱི་ཆེད་ཡིན་ཞེས་བོད་ཀྱི་རྩ་དོན་དེ་བོད་མིའི་བདེ་སྐྱིད་ཀྱི་ཆེད་ཅེས་པར་ངོས་འཛིན་གནང་མྱོང་ཡོད། ཉེ་བའི་ཆར་༸གོང་ས་མཆོག་གིས་བོད་མིའི་སྡུག་བསྔལ་སེལ་ཆེད་ཅེས་པའི་ཚིག་འདི་བེད་སྤྱོད་གནང་གི་འདུག་ཅིང༌། དམིགས་བསལ་སྐུ་ཚབས་རྒྱ་རི་བློ་གྲོས་རྒྱལ་མཚན་ལ་༸གོང་ས་མཆོག་གིས་བཀའ་མངགས་ནན་པོ་བྱས་པའི་སྙིང་དོན་ཡང་བོད་མིའི་སྡུག་བསྔལ་སེལ་བའི་ཆེད་དུ་ཐབས་ཤེས་ག་རེ་ཡིན་ནའང་བྱེད་དགོས་ཞེས་པ་དེ་རེད། ༸གོང་ས་མཆོག་གིས་བོད་མིའི་བདེ་སྐྱིད་ཀྱི་ཆེད་ཅེས་པ་ནས་འགོ་བརྩམས་ཏེ་བོད་ཀྱི་གནད་དོན་ཐག་གཅོད་བྱེད་པའི་ཐབས་ལམ་དང་ཇུས་གཞི་གསལ་འདོན་གནང་བའི་གནས་ཚུལ་དེ་དཔེ་མཚོན་དུ་བཞག་ནས་ད་ལྟ་བོད་མིའི་སྡུག་བསྔལ་སེལ་ཆེད་དུ་ཐབས་ཤེས་ག་རེ་ཡིན་ནའང་བྱེད་དགོས་ཞེས་པ་དེ་ཁོང་གི་དགོངས་པ་དང་ཐབས་ཇུས་ལ་རྩ་བའི་ཆ་ནས་འགྱུར་ལྡོག་ཅིག་འགྲོ་བཞིན་པ་དང༌། བདེ་སྐྱིད་བསྒྲུབ་ཆེད་དང་སྡུག་བསྔལ་སེལ་ཆེད་དུ་ཞེས་པ་གཉིས་ལ་ཁྱད་པར་ཆེན་པོ་ཞིག་ཡོད་པ་ཡང་ངས་ངོས་འཛིན་བྱེད་ཀྱི་མེད། ཡིན་ནའང་བོད་མི་རིགས་འདི་གསོན་གནས་ཡོང་བ་ལ་ཕན་པའི་ཆེས་མཐའ་མཇུག་གི་གོ་སྐབས་ཀྱི་ཆེད་དུ་ཁོང་གིས་ག་རེ་ཡིན་ནའང་གནང་གི་རེད། ཁོང་ནི་ཐབས་ཤེས་དང་གདམ་ག་གཅིག་གིས་ནུས་པ་མ་ཐོན་པ་མངོན་གསལ་དུ་གྱུར་རུང་རང་ཉིད་ཀྱི་ལ་རྒྱ་སྲུང་སྐྱོབས་ཀྱི་ཆེད་དུ་གདམ་ག་གསར་བ་དང་ལེན་བྱེད་མི་ནུས་མཁན་དེ་འདྲ་གཏན་ནས་མ་རེད། དེང་སང་གི་བོད་ཀྱི་གནས་བབ་ལ་བསམ་ན་ང་ཚོས་ལ་རྒྱ་ལས་ཀྱང་དོན་དངོས་ལ་མཐོང་ཆེན་བྱེད་དགོས་པ་ཧ་ཅང་གལ་ཆེན་པོ་རེད། དོན་དམ་པའི་ང་ཚོ་ལ་ལ་རྒྱ་ཞིག་ཡོད་ན་ང་ཚོའི་གཞན་དང་གཞན་ལ་ངོ་རྒོལ་བྱེད་རྒྱུ་ལས་ཀྱང་རང་དང་རང་རིགས་དར་སྤེལ་གཏོང་བའི་གོ་སྐབས་དང་ཐབས་ལམ་ལ་བསམ་བློ་གཏོང་རན་རེད། Read the rest of this entry »

གནས་སྟངས་ཛ་དྲག་དང་སྣང་བ་སྐྱིད་པོ།

ཨ་འབྲུག་དཀོན་མཆོག

རྡ་རམ་ས་ལ་འདི་ས་འགུལ་ཆེན་པོ་ཞིག་གི་རྗེས་ཀྱི་ས་ཁུལ་དང་འདྲ་བོ་འདུག གང་ཡིན་ཟེར་ན་འདི་ནས་དངོས་པོ་སྣ་མང་མཉམ་བསྲེས་དང་སྙིགས་རོའི་རྣམ་པའི་འོག་ནས་ཕྱི་རུ་མངོན་ཡོང་གི་འདུག དེ་སྔོན་རྒྱ་གར་འགྲུམ་འགྲིལ་ལས་རིགས་པ་ཞིག་གི་རྡ་རམ་ས་ལ་ནི་འཛམ་གླིང་རིག་གནས་ཀྱི་བསྣོལ་མཚམས་ཤིག་རེད་ཅེས་ཚད་མཐོ་བོའི་གདེང་འཇོག་བྱས་འདུག་མོད།དེ་ལ་ཡང་ངོས་གཞན་ཞིག་གི་གནས་ལུགས་ཡོད་རྒྱུ་རེད།འོན་ཀྱང་ཚད་རིམ་གཞན་ཞིག་གིས་བཤད་ན་རྡ་རམ་ས་ལའི་ཁྱད་ཆོས་གཙོ་བོ་ཞིག་ནི་རིག་གནས་བསམ་བློའི་སྟེང་གི་སྣ་མང་འབྲེལ་གཏུགས་དེ་མ་ཡིན་པར།བསམ་གཞིགས་ཀྱི་སྣ་འདྲེན་མེད་པའི་གང་བྱུང་གི་བྱ་སྤྱོད་དེ་ཡིན་པ་དང༌།ལྷག་པར་དུ་བོད་པ་མང་པོ་ཞིག་ནི་དེ་ལྟར་རེད།ངའི་མཐོང་སྣང་ལ་གནས་འདི་ནས་མི་མང་པོ་ཞིག་གི་ཉི་མ་འཁྱོལ་གྱི་མེད་པ་འདྲ།ཉིན་ལྟར་ང་ཡར་འགྲོ་མར་འགྲོ་བྱེད་སའི་ལམ་བར་དུ་ཕར་མ་བལྟས་ཀྱང་མཐོང་ཡོང་བའི་དཔུང་ཁག་ཆེན་པོ་གཉིས་ཡོད་པ་ནི་ཀེ་རུམ་རྩེ་མཁན་གྱི་དཔུང་ཁག་དང༌།ཏཱ་སེ་རྩེ་མཁན་གྱི་དཔུང་ཁག་གཉིས་ཡིན།ཆེད་དུ་མ་ཉན་རུང་ཐོས་ཡོང་བ་ནི་ཧབ་ཆ་དང་འགྲོགས་པའི་མནའ་ཚིག་ཆེན་པོ་དག་ཡིན།ཁོང་ཚོའི་རྩེད་གདན་གྱི་ཟུར་སོ་སོ་ན་ཧིིན་སྒོར་བརྒྱ་ཤོག་དང་ལྔ་བཅུ་ཤོག་འགའ་རེ་བརྩེགས་ཡོད་ཅིང༌།ཉེ་འཁྲིས་ཀྱི་ཕོ་གསར་སྐྲ་རིང་ཞིག་གིས་་“མ་ཎི་དུང་དེ་རིང་ཡིན་ན་པཱ་མགོ་པཱ་རྐྱང་ལ་བུད་མ་བུ་ཐལ་ན་”ཞེས་ངོམས་སོའི་རྣམ་པས་བཤད་ཀྱི་འདུག ང་ཁང་པ་ཞིག་འཚོལ་ཆེད་ཟློས་གར་ཉེ་འཁྲིས་ཀྱི་གཞུང་ལམ་དུ་འགྲོ་སྐབས་ཆུ་ཤོག་ཀྱིས་ཆར་ཁེབས་བརྒྱབ་ཏེ་རྒན་པོ་ཁ་ཤས་ཀྱིས་ཤཱོ་རྩེད་རྒྱག་བཞིན་འདུག་ལ།ད་དུང་ལག་ཏུ་འཕྲེང་བ་འདྲེན་བཞིན་པའི་རྒད་པོ་མང་པོ་ཞིག་གིས་རུབ་རུབ་བྱས་ཏེ་མཐའ་ནས་བལྟས་འདུག གཙུག་ལག་ཁང་གི་ཉེ་འཁྲིས་ཀྱི་ཇ་ཁང་དག་ལ་ཕྱི་རྒྱལ་པ་ཚོས་ཇ་འཐུང་ཞོར་དུའང་གསར་ཤོག་དང་དཔེ་ཀློག་བྱེད་ཀྱི་འདུག་མོད།བོད་མི་ཚོས་ཇ་དང་ཧབ་ཆ་མཉམ་འགྲོགས་ཀྱི་སྤྲོ་སྐྱིད་ལ་རོལ་གྱི་འདུག་གཙུག་ལག་ཁང་གི་མདུན་ཐང་ན་ལཱ་སྒྲོན་གྱི་འོད་སྣང་དང་མཉམ་དུ་ཧ་ཅང་སེམས་བསྐྱེད་ཆེན་པོའི་ནང་དོན་ཡོད་པའི་དབྱངས་རྟ་མང་པོ་གྱེར་བཞིན་འདུག་ལ།བོད་ཀྱི་གནས་སྟངས་དངོས་གནས་ཛ་དྲག་ལ་སླེབ་ཡོད་ཅེས་པའི་གཏམ་བཤད་ཀྱང་རྒྱུན་སྲོལ་ལྟར་བྱེད་ཀྱི་འདུག་འོན་ཀྱང་བལྟས་ཚོད་ལ་རྡ་སའི་གནས་སྟངས་ཀྱང་ཧ་ཛ་དྲག་ལ་བསླེབས་ཡོད་མེད་གང་ལྟར་ཡང་འཕེལ་རྒྱས་དང་ཉམས་དམས་གཉིས་ཀྱི་ཕྱོགས་གཏོགས་སུ་བསྡུར་གཤིབས་བྱེད་སྐབས་འདི་ཡང་ཛ་དྲག་གི་ཁོངས་སུ་འགྲོ་ངེས་པ་ཞིག་མ་རེད་དམ།བོད་མི་ཚོ་གནས་སྟངས་སྐྱོ་བོ་ཞིག་གི་སྐབས་སུའང་སྤྲོ་སྣང་མ་བརླག་པར་གནས་པ་དེ་བོད་མིའི་དཔལ་ཡོན་གྱི་ཁྱད་ཆོས་ཤིག་ཏུ་ངོས་འཛིན་གནང་མཁན་ཡོད་པ་དེ་ངས་ཤེས་ཀྱི་ཡོད་མོད།རྒྱུན་གཏན་སློབ་སྦྱོང་གི་གཤིས་ཀ་མེད་པ་དང༌།འཚོ་བའི་གནས་སྟངས་དང་ཧུར་བརྩོན་གྱི་གནས་སྟངས་གཉིས་ལ་ཧེ་བག་ཆེ་བ་དེ་མ་མཐའ་ཡང་དཔལ་ཡོན་ཞིག་ཡིན་རྒྱུ་མ་རེད།དགོད་བྲོ་བ་ཞིག་ལ་ཉིན་རྒྱུན་རྩེད་མོར་ཞུགས་པའི་གསར་བུ་འགའ་ཤས་ཀྱིས་ཐ་ན་རང་གི་གདོང་ཡང་བཀྲུས་མི་འདུག གནས་སྟངས་ཛ་དྲག་ཡིན་པའི་སྐབས་སུའང་ང་ཚོ་དངོས་གནས་སྣང་བ་སྐྱིད་པོ་ཡིན་པ་འདྲ། Read the rest of this entry »

མི་རབས་གསུམ་གྱི་འབོད་སྒྲ།

ངའི་ཕ་མའི་འབོད་སྒྲ།
བོད་ཀྱི་བདག་པོ་བོད་མི་ཡིན། རྒྱ་དམར་བོད་ནས་ཕར་ལ་རྒྱུགས།
བོད་ཀྱི་བདག་པོ་བོད་མི་ཡིན། རྒྱ་དམར་བོད་ནས་ཕར་ལ་རྒྱུགས།
བོད་ཀྱི་བདག་པོ་བོད་མི་ཡིན། རྒྱ་དམར་བོད་ནས་ཕར་ལ་རྒྱུགས། Read the rest of this entry »

༄༅།། ༢༠༠༨ལོའི་རྒྱ་ནག་དང་ཨེ་ཤ་ཡ་མང་གཙོར་བསྒྱུར་རྒྱུའི་རྒྱལ་སྤྱིའི་རྒྱབ་སྐྱོར་ཚོགས་ཆེན་ལ་ཞུགས་པའི་མྱོང་ཚོར།

མང་ར་བ་གདུགས་དཀར་འབུམ།

རྒྱ་ནག་དང་ཨེ་ཤ་ཡ་མང་གཙོར་བསྒྱུར་རྒྱུའི་རྒྱལ་སྤྱིའི་རྒྱབ་སྐྱོར་ཚོགས་ཆེན་ནི། རྒྱལ་སྤྱིའི་ལྡོག་མེད་སྟོབས་ཤུགས་ལ་བརྟེན་ནས། རྒྱ་ནག་དང་ཨེ་ཤ་ཡའི་ས་ཁུལ་ཁག་ལ་རང་དབང་དང་འགྲོ་བ་མིའི་ཐོབ་ཐང༌། མང་གཙོ་བཅས་ཀྱི་རིན་ཐང་ཁྱབ་བརྡལ་དུ་གཏོང་བའི་རྒྱལ་སྤྱིའི་གྲོས་མོལ་གནང་སའི་གླེང་སྟེགས་ཞིག་རེད། ༢༠༠༨ལོའི་རྒྱ་ནག་དང་ཨེ་ཤ་ཡ་མང་གཙོར་བསྒྱུར་རྒྱུའི་རྒྱལ་སྤྱིའི་རྒྱབ་སྐྱོར་ཚོགས་ཆེན་དེ། ཕྱི་ལུགས ༢༠༠༨ ལོའི་ཟླ་ ༨ པའི་ཚེས་ ༤ དང་ ༥ ཉིན་གཉིས་རིང་ཉི་ཧོང་གི་རྒྱལ་ས་Tokyo-ནང་སྐོང་ཚོགས་གནང་སོང་བ་དང༌། ཐེངས་འདིའི་ཚོགས་ཆེན་ལ་འཛམ་གླིང་རྒྱལ་ཁབ་ཁག་ ༢༠ ལྷག་གི་ཚོགས་བཅར་བ་མི་གྲངས་ ༣༠༠ ཉེ་བ་ཚོགས་ཞུགས་ཀྱིས། ཉིན་གཉིས་རིང་ཕྱོགས་ཡོངས་ནས་རྒྱ་ནག་དང་ཨེ་ཤ་ཡ་མང་གཙོར་བསྒྱུར་རྒྱུའི་བརྒྱུད་རིམ་ཁྲོད་ ༢༠༠༨ ལོའི་པེ་ཅིང་ཨོ་ལིམ་པིག་རྩེད་འགྲན་མཇུག་གྲུབ་རྗེས་རྒྱ་ནག་དང་ཨེ་ཤ་ཡ་མང་གཙོ་ཅན་དུ་བསྒྱུར་རྒྱུའི་ཐད་ནུས་པ་ཅི་ལྟར་འདོན་རྒྱུའི་ཐད་ལ་བགྲོ་གླེང་ཟབ་མོ་གནང་སོང་བ་དང་ཆབས་ཅིག་ཚོགས་ཆེན་ཁག་ལ་བསྐྱར་ཞིབ་ཡང་གནང་སོང༌།

གཅིག ཐེངས་འདིའི་ཚོགས་ཆེན་ཀྱིས་འབྲེལ་ཡོད་ཚོགས་ཆེན་སྔ་མ་ཁག་ལ་གཟིགས་ཚུལ།
རྒྱ་ནག་དང་ཨེ་ཤ་ཡ་མང་གཙོར་བསྒྱུར་རྒྱུའི་རྒྱལ་སྤྱིའི་རྒྱབ་སྐྱོར་གྲོས་མོལ་ཚོགས་ཆེན་ཐོག་མ་དེ། རྒྱ་ནག་མང་གཙོ་ཡར་ཐོན་ཚོགས་པ་དང༌། རྒྱལ་མཚམས་མེད་པའི་འགྲོ་བ་མིའི་ཐོབ་ཐང་ཚོགས་པ། ཐེ་ཝན་མང་གཙོ་ཐེབས་རྩ་ཚོགས་པ། ཡོ་རོབ་བྷར་ལེན་ཉམས་ཞིབ་ཚོགས་པ་བཅས་ཀྱིས་མཉམ་འབྲེལ་གཙོ་སྐྱོང་འོག ཕྱི་ལུགས་ ༢༠༠༦ ལོའི་ཟླ་ ༥ པའི་ནང་འཇར་མན་གྱི་རྒྱལ་ས་ Berlin དུ་བསྐོངས་ཚོགས་ཀྱིས། ཐེངས་དེའི་ཚོགས་ཆེན་བརྒྱུད་རྒྱ་ནག་གཅིག་བསྡུ་དབང་བསྒྱུར་སྲིད་དབང་གིས་ཨེ་ཤ་ཡ་དང་དེ་ལས་ཀྱང་གཞི་རྒྱ་ཆེ་བའི་རྒྱལ་སྤྱིའི་ཚོགས་སྡེ་ཁག་གི་ས་ཁུལ་འདྲ་མིན་དང་རྒྱལ་སྤྱིའི་བདེ་འཇགས་ལ་ཉེན་ཁ་ཐོན་བཞིན་པ་གསལ་རྟོགས་བྱུང་སྟེ། སྐབས་དེས་ཚོགས་ཆེན་གྱིས་རྒྱ་ནག་དང་ཨེ་ཤ་ཡ་མང་གཙོར་བསྒྱུར་རྒྱུའི་ལས་འགུལ་དེ་རྒྱལ་སྤྱིའི་མང་གཙོ་ལས་འགུལ་དང་མཉམ་འབྲེལ་གྱིས། ནུབ་ཕྱོགས་མང་གཙོ་རྒྱལ་ཁབ་ཁག་དང་ཨེ་ཤ་ཡའི་ཁུལ་གྱི་གཅིག་བསྡུ་དབང་བསྒྱུར་སྲིད་དབང་ལམ་ལུགས་ཀྱི་རྒྱལ་ཁབ་ཁག་ནང་གི་མང་གཙོ་དོན་གཉེར་ཅན་ཚོའི་བར་མཉམ་འབྲེལ་གནང་རྒྱུའི་ཐད་ནུས་པ་གཙོར་འདོན་གནང་རྒྱུ་དམིགས་སུ་བཟུང་ཡོད་པ་མ་ཟད། གཞན་ཚོགས་ཆེན་དེ་བསྐངས་པ་བརྒྱུད་ད་དུང་ཉི་ཧོང་གི་ཨེ་ཤ་ཡ་དང་རྒྱ་ནག་མང་གཙོར་བསྒྱུར་རྒྱུའི་རྒྱབ་སྐྱོར་ཚོགས་པ་དང༌། Read the rest of this entry »