དགེ་འདུན་རབ་གསལ་གྱིས།
(རྩོམ་འདི་ནི་བོད་ཀྱི་དུས་བབ་གསར་ཤོག་ཏུ་བཀོད་པ་ལས་ཟུར་འདོན་བྱས་པ་ཡིན།)
ཏྲེ་ཧོར་མེད་ན་ཀྲོག་ཀྲོག་མེད། ཅེས་དང་། ཡང་ཏྲེ་ཧོར་ཁམས་པའི་ཀྲོག་ཀྲོག་ཅེས་ང་ཚོའི་སྤྱི་ཚོགས་ནང་བཤད་སྲོལ་ཡོད་པ་རེད། འོན་ཀྱང་ངས་འདིར་བཤད་པ་ནི་ཀྲོག་ཀྲོག་གི་སྐོར་མིན། འདི་ནི་དངོས་བྱུང་གི་ལོ་རྒྱུས་ཤིག་སྟེ། ཁམས་ཤོར་དུས་དབུས་ལ་བྲོས་པ་དང་། དབུས་ཤོར་དུས་རྒྱ་གར་ལ་བྲོས་པ། ཕ་ཆུ་བཞི་སྒང་དྲུག་ནས་གློ་སྨོན་ཐང་དུ་སྤོས་པ་དང་། བུ་སློབ་གྲྭ་ནས་དམག་སྡེ་ཨང་ ༢༢ རྟགས་ཅན་དུ་ཞུགས་པ། མ་གསོན་བྲལ་ནས་ཕ་གསོན་བྲལ། ཕ་གསོན་བྲལ་ནས་སྤུན་གསོན་བྲལ་བཅས་འདུས་པའི་ཏྲེ་ཧོར་ཁམས་པའི་ལོ་རྒྱུས་ངོ་མ་ཞིག་ཡིན། ལོ་རྒྱུས་འདི་ནི་མི་སྒེར་པའི་ལོ་རྒྱུས་ཡིན་ལ་བོད་མི་སྤྱིའི་ལོ་རྒྱུས་ཤིག་ཀྱང་ཡིན།
རེས་གཟའ་སྤེན་པ་ཉིན་ངེད་ཨིན་ཌཱི་ཡཱ་ན་མངའ་སྡེའི་བྷི་ལིམ་མིན་ཊོན་ཁུལ་དུ་ཡོད་པའི་ཨ་མྱེས་ཚང་བོད་ཀྱི་ཟ་ཁང་ཟེར་བའི་ཟ་ཁང་དེར་ཕྱིན། དེ་ནི་ངེད་ཀྱིས་ཟ་ཁང་གི་བདག་པོ་ཨ་མྱེས་ཚང་ཐུབ་བསྟན་ལ་བཅར་འདྲི་འདི་བྱེད་རྒྱུའི་ཆེད་ཡིན། ཟ་ཁང་འདིའི་ཕྱི་རོལ་དུ་བོད་ཀྱི་གཡག་དང་འབྲིའི་རི་མོ་བྲིས་ཡོད་ལ། སྟེང་དུ་བོད་དང་ཨ་རིའི་དར་ཆ་འཕྱར་ཡོད། མཐའ་འཁོར་དུ་རླུང་རྟ་དང་དར་ལྕོག་འཐེན་པ་བཅས་དང་། ནང་དུ་བོད་ཟས་གཙོས་པའི་ཟས་རིགས་སྣ་ཚོགས་ཡོད། ཟ་ཁང་འདི་ནི་གྲོང་ཁྱེར་ནང་གྲགས་ཆེ་བའི་ཟ་ཁང་ཞིག་རེད། ངེད་ཀྱི་དྲི་བ་ནི་ཐུབ་བསྟན་ལགས་ཀྱི་ཁྱིམ་མི་ནས་མགོ་བཙུགས།