ཀ་བཙན་བླ་མ་སྐྱབས།
ཨ་མདོའི་ཡུལ་ནས་འཁྲུངས་པའི་སྐྱེས་ཆེན་གྱི་དམ་པས།།
ཨ་ཞང་ཚང་གི་སྲིད་སྟེགས་མཐོན་པོ་རྣམས་བཞག་ནས།།
ཨ་རིའི་ཡུལ་དུ་བདེན་པ་ར་སྤྲོད་ལ་ཕེབས་པའི།།
ཨ་ཀྱཱ་ཚང་གི་ཟླ་མེད་སྙིང་སྟོབས་དེ་ངོ་མཚར།།
།།འོག་མིན་ཨོ་རྒྱན་སྨིན་གྲོལ་གླིང་གི་རྟེན་དང་བརྟེན་པར་བསྔགས་པའི་སྙན་ངག་གཏེར་ཆེན་བཞད་པའི་སྒྲ་དབྱངས་ཞེས་བྱ་བ་བཞུགས་སོ།།
ཆོས་དབྱིངས་ཀློང་ན་སྤྲོས་པའི་མཐའ་བརྒྱད་མཚན་འཛིན་རྡུལ་བྲལ་འོད་ལྔའི་ཐིག་ལེ་ཆོས་སྐུ་ཀུན་ཏུ་བཟང་པོ་མཆོག། འོག་མིན་ཞིང་ན་ངེས་པ་ལྔ་ལྡན་མིག་འཕྲུལ་ཇི་བཞིན་རོལ་བ་འབྱམས་ཀླས་ལོངས་སྐུ་འོད་མཐའ་ཡས་པ་དང་།། རིག་འཛིན་དཔའ་བོ་དཔའ་མོའི་ཚོགས་རྗེ་ཞི་ཁྲོའི་དཀྱིལ་འཁོར་སྤྲོ་བསྡུའི་བྱེད་པོ་སྤྲུལ་སྐུ་ཨོ་རྒྱན་ཆེན་པོ་ཞེས།། མཚན་སྙན་གདུགས་དཀར་གཡས་སུ་འཁོར་བའི་གཟི་བྱིན་ཉི་ཟླའི་འོད་རླབས་སྤྲོ་མཛད་ཁྱབ་བདག་བླ་མའི་བླ་མར་འདུད།། རྒྱལ་ཀུན་གསང་གསུམ་ཚངས་པའི་མཚོ་ཆེན་སྲིད་ཞིའི་མཛེས་སྡུག་མཎ་ད་རས་བསྲུབས་དབྱངས་ཅན་དཔལ་གྱི་འཇོ་སྒེག་མས།། ཤེས་བྱའི་དཀྱིལ་འཁོར་གཞི་ཡི་ཁྱོན་ཀུན་ཤེལ་དཀར་ཏམ་བུ་ར་ཡི་རྒྱུད་དུ་ལེགས་དྲངས་སྙན་ངག་ཆེན་པོའི་རྒྱན།། དེ་རིང་བྱིན་རླབས་སྦྲང་རྩིའི་ཟུར་མིག་འཇམ་དཔལ་དཔའ་བོའི་ཡིད་ཀྱི་བརྟན་འཕྲོག་རིག་བྱེད་དབྱངས་བདུན་རྫོགས་པའི་གླུ།། བདག་གི་མགྲིན་པ་ལོངས་སྤྱོད་འཁོར་ལོར་ཤིས་པའི་མེ་ཏོག་ཕང་ཕུང་རབ་བརྩེགས་རྩ་གསུམ་མཆོད་པའི་སྤྲིན་དུ་སྤྲོས།། གངས་རིའི་མུ་ཁྱུད་བསྟར་ལ་བརྒྱུས་པས་སྲིད་ཞིའི་ཕྱ་གཡང་མགྲོན་དུ་འགུག་པའི་བསིལ་ལྡན་ཁ་བའི་འཇིག་རྟེན་ཆེར།། རྒྱལ་བསྟན་ཡོངས་རྫོགས་མདོ་སྔགས་ལམ་བཟང་ནག་ཕྱོགས་བདུད་སྡེའི་གྲོང་ཁྱེར་འཇིག་བྱེད་ལུས་སྲོག་ལོངས་སྤྱོད་ཡོངས་བཏང་སྟེ།། འདྲེན་མཛད་ཆོས་རྒྱལ་མེས་དབོན་རྣམ་གསུམ་སྤྲུལ་པའི་ལོ་པཎ་མཛད་རྗེས་དྲན་ཚེ་དད་གུས་སྙིམ་པའི་མེ་ཏོག་ཕྲེང་།། རྗེས་དྲན་སོར་མོའི་རྒྱན་དུ་དཔྱངས་ཏེ་ཉིན་མཚན་རྣམ་དཀར་ཆོས་ཀྱི་བགྱི་ཞེས་དམ་བཅའི་རི་མོ་སྙིང་ལ་འབྲི།། རིག་འཛིན་བྱེ་བའི་རལ་བའི་མེ་ཏོག་ཞབས་པད་མཛེས་པའི་རྒྱན་དུ་ལེན་མཁས་རྒྱལ་དབང་པདྨ་ཀ་ར་ཡི།། ཟབ་གཏེར་སྦྲང་རྩིའི་བཅུད་ལ་འཐུངས་པའི་སྤྲུལ་པའི་གཏེར་སྟོན་ར་ཡིག་གཉིས་པའི་ཚོགས་ཆེན་རྒྱུན་མི་ཆད་པའི་དབུས།། མངོན་མཐོའི་མཚན་སྙན་སྤྲིངས་ཡིག་དམར་པོ་སྲིད་ཞིའི་ཁོར་ཡུག་ཀུན་ཏུ་འཕུར་བའི་གཏེར་ཆེན་ཆོས་ཀྱི་རྒྱལ་པོ་ཞེས།།…