བོད། ལྷ་ཀླུ་གཉན་གསུམ།
བྱིས་པའི་གོམ་འགྲོས་ལྟ་བུའི་བརྩེ་དུང་།

མི་སུ་ཞིག་ཕར་ལ་དགའ་དུས་སུ། དང་བོ་ནི་གླེན་པ་དང་ལྐུགས་པ་ལྟ་བུ་ཞིག་ཡིན་ཟེར་བ་ལྟར། ཉིན་མཚན་ཀུན་དུ་དྲན་རྒྱུ་དང་བསམ་རྒྱུ་དེ་ལས་མེད་པ་ལྟ་བུའི་ངང་ཚུལ་ཞིག་བྱུང་ནས། དེ་ལ་བརྟེན་ནས་སྐད་ཆ་བཤད་ཚུལ་དང་དྲན་ཚུལ་ཚང་མ་ནི། མི་དེ་ཕར་དགའ་སའི་ཡུལ་དེ་ཁོ་ན་ཆགས་ཀྱི་ཡོད། དེ་དུས་ཀྱི་སྐད་ཆ་དག་ནི་གློ་བུར་བ་དང་ཐོལ་བྱུང་། སྣང་ཚུལ་རབ་རིབ། ཁ་ནས་ཐོན་ཚུལ་དུ་ང་རང་ཁྱེད་ལ་དགའ། ངས་ཁྱེད་རང་དྲན། ང་ཁྱེད་རང་མ་གཏོགས་མི་དགོས། དེ་ལྟར་མ་བྱུང་ན་ངའི་ལོ་ཟླ་ལ་སྙིང་བོ་མི་འདུག དེ་ལས་སྐྱེ་བ་འདི་ནས་ཤི་ན་རེད། ཁྱེད་མ་ཐོབ་ཚེ་ང་རང་ཤི་རྒྱུ་ཡིན། འདི་དག་ནི་ངའི་རང་ཉིད་ཀྱི་རྒྱུད་ལམ་ཁྲོད་ནས་བྱུང་ཟིན་པའི་ལེའུ་དེ་དག་ལ་ཕྱིར་འདང་ཞིག་བརྒྱབས་དུས། དེ་ལ་ངས་བྱིས་པའི་གོམ་འགྲོས་ལྟ་བུའི་བརྩེ་དུང་བཏགས་པ་ཡིན།

དེ་ལས་མང་བ་། “བརྩེ་དུང་། ཐ་སྙད་འདི་མི་རྣམས་འཆིང་བྱེད་ཡིན།” »

མི་ནག་ཚང་ལུང་རིགས་རྒྱལ།

སང་ཉིན་ཐའེ་ཝན་གྱི་རྒྱ་མི་ཞིག་ལ་རྒྱ་ནག་གི་ཁུང་ཙིའི་ཞི་བདེའི་རྟགས་མ་རག་རྒྱུ་རེད། གནངས་ཉིན་པེ་ཅིན་གྱི་རྒྱ་མི་ཞིག་ལ་ནོ་སྦེལ་ཞི་བདེའི་གཟེངས་རྟགས་འབུལ་རྒྱུ་རེད།
བར་སྐབས་ཤིག་ནས་བཟུང་རྒྱ་ནག་གིས་རྩ་བ་ཉིད་ནས་ཉན་འདོད་བྱེད་གི་མི་འདུག བསམ་བློ་དང་བསམ་བློ་བརྩད། འདུ་ཤེས་དང་འདུ་ཤེས་འགྲན། མཚོན་ཆ་དང་མཚོན་ཆ་གཏུགས། ཁྲོམ་རའི་ཁ་གཏད་ལ་ཁྲོམ་ར་བཤམས། དཔུང་རོགས་ཀྱི་མདུན་ལ་དཔུང་རོགས་ཁྲིད། རྟགས་མ་དང་རྟགས་མ་ངོམ། ཐ་ན་ས་སྒང་འདིའི་སྟེང་གི་མི་རེ་རེའི་ཁ་གཏད་ལ་མི་རེ་རེ་མི་སློང་བའི་ངེས་པ་མི་འདུག

དེ་ལས་མང་བ་། “ཁུང་ཙི་ཞི་བདེ་རྟཌ་མ་དང་ནོ་སྦེལ་ཞི་བདེ་རྟཌ་མ།” »

མདོ་འདུམ་ཚང་།
ཉེ་ཆར། རྡ་ལམ་ས་ལའི་འཆར་འགོད་ལྷན་ཁང་གིས་སྤྱི་ལོ་༢༠༠༩ལོའི་མི་འབོར་ཞིབ་བཤེར་གྱི་སྙན་ཐོ་དེ་བཏོན་འདུག ཐོག་མའི་འཆར་གཞི་ལྟར་ན། འཆར་འགོད་ལྷན་ཁང་གིས་སྙན་ཐོ་དེ་སྤྱི་ལོ་༢༠༠༨ལོར་འདོན་དགོས་ཀྱི་ཡོད། རྒྱུ་རྐྱེན་ཅི་ཞིག་གིས་དལ་འགྱངས་བྱས་བ་ངེད་ཀྱིས་མི་ཤེས།
ཞིབ་བཤེར་སྙན་ཐོ་དེ་ལྟར་ན། ད་ལྟའི་བཙན་བྱོལ་གྱི་མི་འབོར་ནི། ༡༢༧༩༣༥ཙམ་རེད། དེ་ནི། ཕྱི་ལོ་༡༩༩༨དང་བསྡུར་ན། མི་གྲངས་༡༦༩༡༥ཙམ་གྱིས་འཕར་སྣོན་བྱུང་འདུག འོན་ཀྱང་། བཙན་བྱོལ་བོད་མིའི་སྐྱེ་འཕེལ་གྱི་གྲངས་དེ་མར་ཆགས་བཞིན་ཡོད། འདས་བའི་ལོ་སུམ་ཅུའི་ནང་ལ་བརྒྱ་ཆ་༢༨ཆགས་འདུག་ཟེར། སྐྱེ་འཕེལ་གྱི་འཕར་ཚད་ལས་མར་ཆགས་ཚད་མགྱོགས། འཆར་འགོད་ལྷན་ཁང་གི་འགན་འཛིན་དཀོན་མཆོག་བརྩོན་འགྲུས་ཀྱིས་གསུངས་ན། ང་ཚོའི་འཕར་ཚད་ཧ་ཅང་དམའ་བོ་རེད། དེ་ནི་ཕྱི་སྡོད་བོད་མི་མང་དུ་ཕྱིན་དང་བཙན་བྱོལ་བོད་མི་ཉུང་དུ་ཕྱིན་སྟབས་རེད་ཟེར། འདི་ལ་དོགས་དཔྱོད་ཞིག་བྱེད་གི་ཡིན། མི་འབོར་གྱི་འཕར་ཚད་དམའ་རུ་ཕྱིན་པ་དེ། ཕྱི་སྡོད་བོད་མི་མང་དུ་ཕྱིན་པ་བརྟེན་ནས་མ་རེད། དེ་ནི་ཐད་ཀར་ཤེས་ཡོན་སློབ་སྦྱོང་དང་འབྲེལ་བ་ཆགས་ཀྱི་ཡོད་རེད། སྤྱི་ཚོགས་ཚན་རིག་གི་ཐོག་ནས། ལུང་པ་གང་ཞིག་ཡིན་རུང་། ལུང་པ་དེའི་ཤེས་ཡོན་ཡར་རྒྱས་ཕྱིན་ན། ཡིག་རྨོངས་བའི་གྲངས་ཉུང་དུ་ཕྱིན། བུ་ཕྲུག་གི་སྐྱེ་འཕེལ་དལ་དུ་དང་ཉུང་དུ་འགྲོ་གི་ཡོད་རེད། དེའི་རྒྱུ་རྐྱེན་ལྟེ་བ་ཡང་བུད་མེད་ཚོར་འབྲེལ་ཆགས་ཀྱི་ཡོད་རེད། བུད་མེད་ཀྱི་ཡིག་རྨོངས་སེལ་ན།

དེ་ལས་མང་བ་། “མི་འབོར་གྱི་གནད་དོན་འདི་རྙོད་དྲ་ཚ་བོ་རེད།” »

ཧོར་གཙང་འཇིཊ་མེད།
འདས་པའི་ལོ་ངོ་དུ་མའི་ནང་རང་རེའི་སྤྱི་ཚོགས་ཁྲོད་ཀྱི་མི་མང་བོ་ཞིག་གི་གཏམ་སྤྱོད་ལ་འགྱུར་བ་ཐེབས་ཀྱིན་འདུག་ལ། ཚོགས་པ་ཁག་ཅིག་ཀྱང་འགྱུར་ཚབས་ཆེ། འགྱུར་བ་དེ་ལ་བསྟན་བྱ་གཙོ་བོ་གཉིས་ཡོད་པ་ལས་གཅིག་ནི་བོད་འདི་སྔར་རང་བཙན་རྒྱལ་ཁབ་ཅིག་ཡིན་ཞིང་། དེ་ཉིད་བསྐྱར་གསོ་བྱ་དགོས་པ་དེ་ཡིན་ལ། ཅིག་ཤོས་ནི་རྒྱལ་བ་རིན་པོ་ཆེས་མེས་འཚིག་མེར་གཏུགས་ཀྱིས་བོད་རྒྱ་ཞི་འགྲིག་མཉམ་གནས་བྱ་རྒྱུའི་དགོངས་གཞིི་དང་། དེ་ཉིད་ལག་བསྟར་བྱེད་བཞིན་པའི་བོད་གཞུང་གི་ཆབ་སྲིད་ཀྱི་སྲིད་ཇུས་ལ་འདོད་མོས་མེད་པའི་རྣམ་འགྱུར་སྟོན་བཞིན་ཡོད་པ་དེ་གཉིས་ཡིན། འདི་དག་བརྒྱུད་ནས་རྒྱལ་བ་རིན་པོ་ཆེ་སྐུ་སྒེར་དང་འབྲེལ་བའི་དོན་དག་མང་བོའི་ཐོག་ལའང་དངོས་ཤུགས་ཅི་རིགས་ནས་ཟུར་ཟ་བྱེད་མཁན་འབྱུང་གིན་ཡོད།

དེ་ལས་མང་བ་། “མི་གླེང་མཐུ་མེད་ཀྱི་དོན་གནད་གཉིས།” »

ཁང་གསར་རྡོ་རྗེའི་ངོ་དེབ་ནས་བླངས།
དབུས་གཙང་སྤྱི་འཐུས་ཀརྨ་ཆོས་འཕེལ་གྱིས་ཉེ་ལམ་གྲོས་ཚོགས་ཀྱི་ཚོགས་གཙོ་གནང་སྐབས་དང། སྤྱི་འཐུས་གནང་སྐབས་དབུ་མའི་ལམ་ལ་བསྐྱར་ཞིབ་ཀྱི་རྙོག་དྲ་དང་གཅིག ༸གོང་ས་མཆོག་ཉི་ཧོང་དུ་མི་དཀྱུས་མའི་གནས་བབ་ཐོག་ཕེབས་ཀྱི་ཡོད་པའི་འཆལ་གཏམ་དང་གཉིས། ནོར་རྒྱས་གླིང་གཞིས་ཆགས་སུ་ཆང་འཐུང་ར་རོས་གཞུང་དོན་རས་བོར་བྱས་སྟབས་ཉེས་རྡུང་གཟེད་པ་དང་གསུམ། ཆང་འཐུང་བག་མེད་ཀྱིས་གནམ་ཐང་དུ་ལུས་ནས་གལ་ཆེའི་ཚོགས་འདུར་བཅར་མ་ཐུབ་པའི་བྱ་ངན་དང་བཞི། གྲོས་ཚོགས་ནང་དཔུང་སྒྲིག་གིས་ཚོགས་གཙོའི་རྐུབ་སྟེགས་ལ་ཧབ་ཐོབ་བརྒྱབ་པ་དང་ལྔ། མ་འོངས་ཚོགས་གཙོ་ཐོབ་རེ་དང་རང་གི་ཁ་གཏད་ཚོགས་གཙོ་སྤེན་པ་ཚེ་རིང་ཕམ་ཉེས་སུ་གཏོང་ཐུབ་རེས་གྲོས་ཚོགས་ནང་དཔུང་བསྒྲིགས་འར་བཤད་ཀྱིས་གྲོས་ཚོགས་འཐོར་བཅུག་པ་དང་དྲུག་སོགས་ཀྱི་རྐྱེན་ལས། དབུས་གཙང་མི་དམངས་ཁོ་པར་ཞེ་གཏིང་ནས་ལོག་སྟེ། ཐེངས་འདིའི་སྔོན་འགྲོའི་འོས་བསྡུའི་ནང་ཁོ་པར་འོས་འཕངས་མེད་ཀྱང། ཁམས་ཕྱོགས་ཀྱི་སྲིད་དོན་པ་འགས་དེ་ནི་ཁོ་པས་ཁམས་ཞེན་བྱས་སྟབས་དབུས་གཙང་གིས་ངན་བྱས་པར་བསམས་ཏེ། གདན་ས་ཁག་ཏུ་ས་འོག་དར་འཐག་གི་འབྲེལ་བ་བརྒྱུད་དེ་ངན་སྐུལ་བྱས་འབྲས་སུ། སྔོན་འགྲོའི་འོས་བསྡུའི་ནང་ཁོ་པ་དགེ་ལུགས་སྤྱི་འཐུས་ཨང་བཞི་པ་དང་། བཀའ་བརྒྱུད་སྤྱི་འཐུས་ཨང་གཉིས་པར་སླེབས་ཡོད། ཁོ་པས་དེ་གཉིས་ལས་བཀའ་བརྒྱུད་སྤྱི་འཐུས་ལ་རེ་བ་ཡོད་པ་མཐོང་སྟེ་ཕྱི་མ་བདམས་ཡོད།

དེ་ལས་མང་བ་། “རྙོག་དྲ་ཞིག་གི་འགོ་འཛུགས།” »

(རྒྱང་རིང་གི་དུས་རབས་གསར་བའི་རྩོམ་རིག་གི་རྒྱལ་བོ་ཞིག་ལ།)
བོད། ལྷ་ཀླུ་གཉན་གསུམ།

ངས་ཁྱེད་ལ་ཞུ་བ་འཐེན། ཁྱེད་རང་ནི་བོད་ཕྱི་ནང་གཉིས་སྙན་གྲགས་རྒྱས་ཤིང་། མང་བོ་ཞིག་གི་རེ་སྒུག་བྱེད་སའི་རྩོམ་པ་པོ་ཞིག་ཡིན། ཁྱེད་ཀྱིས་རང་གི་སེམས་ཁོང་དམའ་སར་མ་ཕབ་རོགས། མ་གཞི་ནས་ངས་ཁྱེད་ལ་དེ་ལྟར་མ་ཞུས་ཀྱང་། ཉིད་ཀྱིས་ཤེས་གསལ་རེད། འོན་ཀྱང་། ང་རང་ཁྱེད་རང་གི་རྩོམ་ཡིག་ལ་དགའ་མཁན་དང་ཁྱེད་རང་སེམས་་གཏིང་ནས་བརྩི་མཁན་ཞིག་ཡིན་པས་ཆ་ནས། ངས་དེ་རིང་འདི་ནས་ཁྱེད་རང་ལ་ཞུ་བའི་ཚུལ་དུ་སྐད་ཆ་པ་ཤས་ཤིག་ཞུས་ཀྱང་མ་འགྲིག་པ་མེད་པར་སྣང་།

ང་ཚོ་གཞོན་རབས་པ་དག་གིས་ཁྱེད་རང་ལྟ་བུའི་རྩོམ་པ་པོ་རྒན་རབས་པ་དག་ལ་ཁ་མིག་ཡར་བལྟ་བྱེད་དགོས་ལ། ཁྱེད་རང་འགྲིམ་མྱོང་བའི་རྩོམ་རིག་གི་ཞིང་ས་དག་ལ་ཤེད་ཤུགས་ཅི་ཡོད་ཀྱི་བགྲོད་ཐབས་བྱེད་དགོས་དུས། ཁྱེད་ཀྱིས་ཨ་ཐང་ཆད་པའི་དབུགས་རིང་དང་སེམས་ལ་ཟུག་པའི་ན་ཟུག་དེ་དག་གི་བྲོ་བ་དངོས་སུ་ཤེས་དགོས་ལ། དེ་དག་ཤེས་པའི་སྟེང་ནས་ང་ཚོས་དཀའ་ངལ་ལ་གདོང་ལེན་བྱེད་ཐབས་ཀྱི་ཉམས་མྱོང་ལེན་དགོས་པ་ཡིན།

དེ་ལས་མང་བ་། “ཁྱེད་ལ་སྡང་མཁན་ལས་དགའ་མཁན་མང་གི་རེད།” »

རྩོམ་པ་པོ། ཤར་ཕྱོགས་ཁུག་རྟ། སྡོད་གནས གངས་སྐྱིད།
བོད་རིག་པ་ཞིབ་འཇུག་ལྟེ་གནས་ཀྱི་ལས་བྱེད་ལིའུ་པིང་གིས་ ༢༠༡༠ ཀྲུང་གོའི་བོད་རིག་པ་དུས་དེབ་འདོན་ཐེངས་གཉིས་པའི་སྟེང་། དུས་སྐབས་གསར་བའི་བོད་ཁུལ་གྱི་འཐབ་ཕྱོགས་གཅིག་གྱུར་ལས་དོན་ཐད་ལ་བསམ་གཞིགས་ཅེས་པའི་རྩོམ་ཡིག་ཅིག་བྲིས་ཡོད་ལ། རྩོམ་ཡིག་འདི་ལིའུ་པིང་གི་མིང་ཐོག་རྒྱ་ནག་གཞུང་གིས་སྤེལ་ཡོད་པ་གསལ་བོ་ཡིན་ནའང་། རྒྱ་ནག་གཞུང་གི་འཇབ་ལ་རྒྱུགས་པའི་བྱེད་ཕྱོགས་དེར་ང་རང་དོ་སྣང་གསར་བ་ཞིག་བྱུང་ཞིང་། རྩོམ་ཡིག་དེའི་ཚན་པ་གཉིས་པའི་ནང་ཆོས་ལུགས་ཀྱི་བྱེད་སྒོ་ཚང་མ་ངེས་པར་དུ་རྒྱལ་ཁབ་ཀྱི་བཅའ་ཁྲིམས་དང་མ་འགལ་བའི་སྔོན་འགྲོའི་ཆ་རྐྱེན་འོག་སྤེལ་དགོས་ཞེས་བྲིས་ཡོད། དེ་ནི་རྒྱལ་ཁབ་ཆོས་ལུགས་ལས་དོན་ཅུས་ཀྱི་བཀའ་རྒྱ་ཨང་ལྔ་པ་ཞེས་པ་དེ་བསྒྲགས་ནས་ལོ་གསུམ་ལྷག་ཕྱིན་པའི་རྗེས་ཏག་ཏག་ལ་སྒེར་བའི་མིང་ཐོག་ནས་འཇབ་ལ་རྒྱུགས་པའི་ཚུལ་གྱིས་ཐོན་ཡོད་ཅིང་། དེ་ནི་ཁོང་ཚོས་བོད་ཁུལ་དུ་བསམ་ཚུལ་དེ་རིགས་འགྲེམས་སྤེལ་དང་མཉམ་ཏུ་ཆོས་ལུགས་མི་སྣ་རྒྱལ་ཁབ་ཀྱི་ལས་དོན་ནང་ཆ་ཤས་ལེན་དུ་འཇུག་དགོས་ཞེས་པའི་གཏམ་ཡན་རླུང་སྤུར་གྱིས། དོན་དམ་ཆོས་ལུགས་བྱེད་སྒོ་ཚང་མར་སྟངས་འཛིན་བྱེད་རྒྱུ་ངོས་ལེན་ཡོང་ཐབས་དང་ཆོས་ལུགས་མི་སྣའི་བསམ་ཚོད་ལ་ལྟ་ཐབས་ཉག་གཅིག་ཡིན་པ་གསལ་བོ་རེད།
རྒྱ་རིགས་ཤེས་ཡོན་ཅན་ཁྲེན་ཝུས་ཅན་གྱིས་ཕྱི་ལོ་༢༠༠༨ལོའི་བོད་ས་ཡོངས་སུ་ཞི་རྒོལ་ཆེན་མོའི་དོན་རྐྱེན་བྱུང་རྗེས་སུ། རྒྱ་ནག་གཞུང་གིས་བོད་ཀྱི་རིག་གནས་རྩ་སྟོང་བཟོ་བའི་གོམ་སྟབས་མགྱོགས་སུ་བཏང་ཚུལ་གསུངས་བ་ནི་གཡོལ་ཐབས་བྲལ་བའི་དངོས་དོན་རང་རེད། བོད་བརྒྱུད་ནང་བསྟན་གྱིས་སྲོག་དབང་བྱས་པའི་བོད་ཀྱི་རིག་གནས། སྐད་ཡིག ལེགས་བྱང་བཅས་པ་རྩ་སྟོང་བྱེད་འདོད་ཀྱི་འཆར་གཞི་མགྱོགས་ལ་མྱུར་བོའི་ངང་སྤེལ་གྱི་ཡོད་ལ། ཉེ་འཆར་བྱུང་བའི་མཚོ་སྔོན་ཞིང་ཆེན་བོད་རྒྱ་སྐད་གཉིས་དུས་ཡུན་འབྲིང་རིང་གི་བཅོས་བསྒྱུར་ཐད་ཀྱི་སྲིད་བྱུས་ནི་དཔེ་མཚོན་གསལ་བོ་ཞིག་ཡིན། དེར་རྒྱའི་སྐད་ཡིག་གཙོ་བོར་བཞག་པ་དང་བོད་ཀྱི་སྐད་ཡིག་ཕལ་བར་བཞག་སྟེ་རྒྱའི་སྐད་ཡིག་སློབ་ཁྲིད་ཀྱི་སྐད་ཡིག་ཏུ་བདམས་ཡོད་པ་མ་ཟད། ༢༠༡༥ ལོའི་བར་སློབ་ཆུང་དུ་རྒྱལ་ཁབ་ཀྱི་ཐུན་མོང་དུ་སྤྱོད་པའི་སྐད་དང་ཡི་གེ་གཙོ་བོ་དང་། མི་རིགས་རང་གི་སྐད་དང་ཡི་གེ་ཕལ་བར་བྱས་པའི་སྐད་གཉིས་སློབ་གསོ་མངོན་དུ་འགྱུར་དགོས་ཞེས་བོད་མི་རིགས་ཀྱི་ངོ་བོ་རིམ་བསྒྱུར་གྱིས་རྩ་སྟོང་འགྲོ་ཐབས་ཀྱི་དམིགས་ཡུལ་ཉག་ཅིག་བཟུང་ཡོད། ཡིན་ནའང་སྲིད་བྱུས་འདིས་གྲངས་ཉུང་མི་རིགས་ཀྱི་གཞི་རིམ་མང་ཚོགས་ཁྲོད། མི་རིགས་ས་ཁོངས་རང་སྐྱོང་བཅའ་ཁྲིམས་ལག་ལེན་བསྟར་གྱི་མེད་པའི་ཤེས་རྟོགསཤུགས་ཆེན་པོ་སྤེལ་ཡོད་པ་མ་ཟད། ༸གོང་ས་མཆོག་གིས་དབུ་ཁྲིད་པའི་བཙན་བྱོལ་གཞུང་གི་བོད་སྐྱོབ་ལས་རིམ་གྱི་མངོན་འདོད་རྣམས་དངོས་ཐོག་བདེན་འཚོལ་ཡིན་པ་འཛམ་གླིང་ཀུན་གསལ་ཆགས་པ་རེད།
འདིའི་ཐད་རྒྱ་རིགས་སྐུ་ཞབས་ཁྲེན་ཝུས་ཅན་གྱི་དགོད་བྲོ་བའི་མཚར་གཏམ་ཞིག་གསུངས་འདུག། དེ་ནི་ངང་ལག་གི་མི་ཞེས་པ་དེ་རེད། ངས་བསམ་བློ་ལྟར་བྱས་ན། རྐང་ལག་བྲལ་བའི་ངང་ལག་གི་གཟུགས་ཅན་ཞིག་ནམ་ཡང་འགྲེངས་ཚུགས་སུ་གནས་མི་ཐུབ་པ་ལྟར། བོད་མི་བོད་ཀྱི་སྐད་ཡིག་རིག་གནས་མི་ཤེས་པ། ངང་ལག་གི་མི་མང་པོ་གསོ་སྐྱོང་བྱེད་ཀྱི་འདུག་པ་ཁོང་གིས་མཚར་གཏམ་དང་སྦྲགས་ནས་ཉེན་བརྡ་བཏང་བ་རེད། སེམས་ཀྱི་ཚོར་ཤེས་དང་ཡང་ན་ཤ་ཁྲག་གི་རྒྱུན་ཙམ་ལ་བརྟེན་དགོས་པའི་མི་རིགས་ཤིག་དང་མི་རབས་ཤིག་བྱུང་དུས། མི་རིགས་དེ་འཇིགས་ཟིན་པར་བསྒྲགས་མི་ཆོག་པ་གང་ཡང་མེད།

དེ་ལས་མང་བ་། “བཅའ་ཁྲིམས་ལ་ཁ་གཡར་ཏེ་ཆོས་ཕྱོགས་ཀྱི་བྱེད་སྒོར་བཀག་འགོག་བྱས་མི་ཆོག།” »

དགེ་འདུན།
——————–
ངག་དབང་ཆོས་འཕེལ་ལགས་ཀྱིས་ ཉེ་ཆར་བཟོས་གྲུབ་པའི་གློག་བརྙན་ “དབྱངས་ལ་ཐིམ་པའི་བོད་”ཅེས་པ་དེ་ང་སྡོད་སའི་ཨིན་ཌི་ཡཱ་ནཱ་སློབ་གྲྭ་ཆེན་མོར་སླེབས། དེ་ནི་འདི་གའི་བོད་རིག་པའི་སློབ་ཕྲུག་ཚོགས་པ་སོགས་ཀྱིས་གློག་བརྙན་བཟོ་མཁན་དང་གློག་བརྙན་གཉིས་ས་གནས་སུ་གདན་འདྲེན་ཞུས་པ་ཞིག་རེད། གློག་བརྙན་སྐབས་ས་གནས་ཀྱི་བོད་རིགས་དང་། སློབ་གྲྭའི་སློབ་མ་དང་དགེ་ལས་སོགས་མི་སྣ་མང་པོ་འཛོམས་འདུག
གློག་བརྙན་འདི་ནི་སྒྲུང་གིས་ཁེངས་པའི་སྒྲུང་ཞིག་རེད་ལ། ལོ་རྒྱུས་ཀྱིས་ཕྱུག་པའི་ལོ་རྒྱུས་ཤིག་རེད། འདི་ནི་གློག་བརྙན་བཟོ་མཁན་ངག་དབང་ཆོས་འཕེལ་ལགས་ཆུང་དུས་ཕ་དང་བྲལ། མ་དང་ལྷན་དུ་རྒྱ་གར་ལ་འབྱོར་བ་དང་། ཕྱིས་སུ་བཙན་བྱོལ་དུ་འཚར་ལོངས་བྱུང་རྗེས་སླར་ཡང་ བོད་དུ་ བོད་ཀྱི་རོལ་དབྱངས་གླུ་གར་འཚོལ་ཞིབ་ཏུ་སོང་རྗེས། རྒྱའི་བཙོན་འོག་ཏུ་ཚུད་པ་དང་། དེ་ནས་ཁོང་གི་གཅེས་པའི་མ་ཡུམ་གྱིས་སྣེ་དྲངས་ཏེ་འཛམ་གླིང་བོད་མིས་ཁོང་གློད་གྲོལ་དགོས་པའི་སྐད་འབོད་དང་། རྒྱལ་སྤྱིའི་གནོན་ཤུགས་འོག་ཁོང་གློད་གྲོལ་ཐོབ་པ་བཅས་འཁོད་པའི་མི་ཚེའི་ལོ་རྒྱུས་ཤིག་རེད།

དེ་ལས་མང་བ་། “བོད་དབྱངས་ལ་ཐིམ། དབྱངས་བོད་ལ་ཐིམ།” »

སྙན་བཟང་གཡུང་དྲུང་ཚེ་རིང་།

ངས་སྐད་ཆ་ཞིག་བཤད་འདོད་བྱུང་། ༸རྒྱལ་བ་རིན་པོ་ཆེས་བོད་གཞིས་ལུས་མི་དམངས་ནི་བོད་ཀྱི་དོན་གྱི་བདག་པོ་ཡིན་ཞེས་གསུངས་པ་རེད། ཁོང་གི་གཤམ་དུ་ཡོད་པའི་མཐོ་རིམ་མི་སྣ་ཡིན་ནའང་འདྲ། བྱེས་འབྱོར་བོད་མི་ཚོའི་ངག་ཏུའང་གོང་གི་ཚིག་དུམ་འདི་གོམ་ལོབས་སུ་སོང་ཡོད། བོད་ནང་དུ་དོན་རྐྱེན་ཆེ་ཆུང་ཇི་འདྲ་ཞིག་བྱུང་ནའང་། བྱེས་འབྱོར་བོད་མི་ཚོའི་དོན་རྐྱེན་དེ་དག་ལག་མཐིལ་དུ་སྐྱུ་རུ་ར་བཞག་པ་བཞིན་གསལ་པོ་མཐོང་གི་ཡོད། དོན་རྐྱེན་དེ་དག་བརྩེ་བའི་ཨ་ལོང་ནང་དུ་བསུས་ཏེ་གདུང་སེམས་མཉམ་སྐྱེད་དམ། ཡང་ན། དོན་རྐྱེན་དེ་དག་རྡ་རམ་ས་ལ་ནས་བསྒྲགས་བསྒྲགས་ནས་འཛམ་གླིང་མི་དམངས་ཀྱི་རྣ་ལམ་དུ་བསྐྱལ་ཐུབ་ཡོད། འོན་ཀྱང་། ༸རྒྱལ་བ་རིན་པོ་ཆེས་དབུ་འཁྲིད་པའི་བཙན་བྱོལ་བོད་གཞུང་གིས་ཕྱག་ལས་ག་རེ་གནང་གི་ཡོད་པ་དང་། ལས་འགུལ་གང་འདྲ་ཞིག་སྤེལ་གྱིན་ཡོད་པ་བོད་གཞིས་ལུས་མི་དམངས་ཀྱིས་ཚོར་གྱི་ཡོད་དམ། འདི་ནི་དྲི་བ་ཞིག་རེད། འདི་དྲི་བ་གལ་ཆེན་ཞིག་ཡིན་ནམ།

དེ་ལས་མང་བ་། “༸རྒྱལ་བ་རིན་པོ་ཆེ། ཁྱེད་ཀྱི་སྐུ་ཚེ་བརྟན་པར་ཤོག” »

ལོ་ལོན་ནས།

༡༡ཚེས་༡༥ཉིན་གདན་ས་སེར་ར་བླ་སྤྱིའི་ཚོགས་ཁང་དུ།

ཆབ་སྲིད་ནང་ཆ་ཤས་ལེན་པའི་སྐབས་ལ་ཁྱིམ་པ་དང་མི་འདྲ་བར་རབ་བྱུང་ཡིན་པའི་འདུ་ཤེས་གསལ་བོ་ཞིག་མེད་པ་ཡིན་ན།སྐྱེས་བུ་ཕལ་བ་ཉོན་མོངས་རག་པའི་དབང་དུ་སོང་བ་དེ་ཚོས་བྱེད་སྟངས་ནང་བཞིན་བྱས་ནས་འགྲོ་རྒྱུའི་ཉེན་ཁ་ཆེན་པོ་ཡོད་པ་རེད།དེ་འདྲ་བྱས་ནས་ཕེབས་པ་ཡིན་ན་རྗེས་མ་གྲྭ་ཚོགས་ཆེན་པོ་ཡོད་པའི་གདན་ས་དེ་ཚོ་ཆབ་སྲིད་པ་ཚོས་བེད་སྤྱོད་གཏོང་རྒྱུའི་ལག་ཆ་ཆགས་བསྡད་པ།ཆབ་སྲིད་པ་ཚོས་འོས་ཤོག་ལེན་སའི་མཛོད་འདྲ་བོ་བྱས་བསྡད་པ།ནུབ་ཕྱོགས་པའི་སྐད་ལ་ལབ་སྲོལ་ཞིག་ཡོད་པ་དེ་votebankའོས་ཤོག་གི་མཛོད་དེ་འདྲ་རབ་བྱུང་གི་སྡེ་ཡི་ནང་ཆགས་སོང་བ་ཡིན་ན།ཏན་ཏན་ཞབས་འདྲེན་ཆེན་པོ་རེད་བསམ་བསྡད་ཡོད།ཆོས་དང་མ་མཐུན་པ།འདུལ་བ་དང་མ་མཐུན་པ།ཡ་རབས་བཟང་སྤྱོད་དང་མ་མཐུན་པ།དགེ་འདུན་པའི་ནང་ཁྲིམས་དང་མ་མཐུན་པ།རབ་ཏུ་བྱུང་བའི་བཅས་ཁྲིམས་དང་མ་མཐུན་པ་བཅས་ཆགས་འགྲོ་རྒྱུའི་ཉེན་ཁ་ཡོད་པ་རེད།དེ་འདྲ་སོང་བ་ཡིན་ཙང་རབ་ཏུ་བྱུང་བ་དེ་ཚོས་རབ་ཏུ་བྱུང་བའི་འདུ་ཤེས་མ་དོར་བའི་ཐོག་ནས་འོས་ཤིང་འཚམས་པའི་སྤྱི་ཚོགས་དང་ཆབ་སྲིད་ནང་ཆ་ཤས་བཞེས་སྟངས་དེ་མཐའ་གཉིས་སུ་མ་ལྷུང་བ་གནང་དགོས་དེ་གལ་ཆེན་པོ་ཞེ་དྲག་རེད།བར་ལམ་ཞིག་ནས་དེའི་སྐོར་ང་ལ་དམིགས་བསལ་ཚོར་སྣང་ཆེན་པོ་ཞིག་བྱུང་།

དེ་ལས་མང་བ་། “ཆོས་སྲིད་ཟུང་འབྲེལ་ཆགས་ཀྱིན་འགྲོ་ཡོད་དང་ཆོས་འགལ་རང་ལུགས་ཤིག་ཆགས་འགྲོ་ཡོད་ངེས་པ་མི་འདུག” »

སྨན་པ་དཀོན་མཆོག་ཚེ་བརྟན་གྱིས།
གསོ་བ་རིག་པའི་གཞུང་ལུགས་གང་ཞིག་ཡིན་ཡང་གཞིའམ་རྩ་བར་གྱུར་བ་ནི་མིའི་ལུས་ ཕུང་ཡིན། བོད་ཀྱི་གསོ་བ་རིག་པའི་གཞུང་དུ་རག་པ་ལུས་ཀྱི་རྣམ་གཞག་རྒྱས་པར་བསྟན་ཡོད་ ནའང་། རྡོ་རྗེ་ལུས་ཀྱི་སྦས་བཤད་ལས་གསལ་བའི་ཕྲ་བ་ལུས་ཀྱི་རང་བཞིན་དང་རྣམ་བཞག་གི་ སྐོར་ལ་སོགས་དངོས་བསྟན་བྱས་མེད་མོད ། འོན་ཀྱང་རིག་གཞུང་འདིར་སློབ་གཉེར་དང་ལག་ལེན་བྱེད་མཁན་གྱི་ཚེའི་རིག་འཛིན་པ་ ཞིག་ཡིན་ཚེ་ངེས་པར་དུ་བསྟན་འགྱུར་དུ་གསལ་བའི་དགའ་བོ་མངལ་འཇུག་གི་མདོ་དང་ སྔགས་གཞུང་དུ་བསྟན་པའི་རྡོ་རྗེ་ལུས་ཀྱི་སྦས་བཤད་སོགས་ལ་ངེས་ཤེས་འདྲོངས་ དགོས་པའང་རྩ་བའི་ཆ་རྐྱེན་ཉག་གཅིག་ཏུ་འཁུམས་ལགས་ཤིང་། དེ་མིན་གསོ་རིག་རྒྱུད་བཞིའི་དྲང་དོན་ཁོ་ནར་བློ་རྨོངས་ནས་བསྡད་ན་ལུས་དངོས་ པོའི་གནས་ལུགས་ཀྱི་དེ་བཞིན་ཉིད་གསལ་བོར་རྟོགས་མི་ཐུབ་པས། མཐའ་གཅིག་ཏུ་ཡོད་ཚད་གཟུགས་ཀྱི་སྐྱེ་མཆེད་དང་རྫས་ཀྱི་ནུས་པ་ཁོ་ནར་རློམ་ན་ནི་ རིག་གཞུང་འདིའི་རྩ་བའི་ཁྱད་ཆོས་རྟོགས་པར་མི་འགྱུར་ཅིང་། རིག་གཞུང་འདི་ནི་རིག་གནས་ཆེ་བ་ལྔའི་ཡ་གྱལ་གཞན་རྗེས་སུ་འཛིན་པ་མི་ན་བ་གནས་ བར་བྱ་བ་དང་ན་བ་གསོ་བར་བྱེད་པ། ཆོས་ནོར་ཐར་བ་འདོད་པའི་གང་ཟག་གིས་བསླབ་པར་བྱ་བའི་གནས། མངོན་མཐོ་དང་ངེས་ལེགས་ཀྱི་ཡོན་ཏན་མཐའ་དག་འབྱུང་བའི་གཏེར་ཏུ་ལགས་པས། ནད་ངོས་འཛིན་པ་ཙམ་དང་སྨན་ངོ་སྤྲོད་པ་ཙམ་མ་ཡིན་པར་གཞི་ལམ་འབྲས་བུའི་རྣམ་གཞག་ མཐའ་དག་ཆ་ཚང་བར་འདུས་ཡོད་པ་ནི། བསྟན་པ་འདི་སྤེལ་མཁན་གྱི་སྔ་རབས་བོད་ཀྱི་གསོ་རིག་སྨྲ་བ་དག་གི་རྣམ་ཐར་དང་ གསུང་འབུམ་དག་ལ་མཇལ་ན་ཤིན་ཏུ་ནས་གསལ་བོར་རྟོགས་པར་འགྱུར་ཅིང་། ཁོང་རྣམ་པ་ནི་བཅུ་ཕྲག་རིག་པའི་གནས་ལ་ནང་བྱན་ཆུབ་པ། བསྐྱེད་རྫོགས་ལ་མངའ་བརྙེས་ཤིང་རྒྱུད་ལུང་མན་ངག་གི་བརྒྱུད་པ་ཟམ་མ་ཆད་པ། རྫས་སྔགས་ཏིང་འཛིན་གྱི་ནུས་བ་ལ་དབང་འབྱོར་བ་ཤ་སྟག་ཏུ་གྲུབ་ཡོད་པ་ལགས་པས། ཁོང་རྣམ་པས་གཞུང་འགྲེལ་དང་སྦྱོར་སྡེ། ངོས་འཛིན་ལ་སོགས་ཀྱི་སྐོར་ནི་ཡང་དག་ཚད་མ་དང་། དགོངས་བ་བརྡ། རང་གི་མྱོང་བས་སོགས་ཀྱི་སྒོ་ནས་གཏན་འབེབས་གནང་ཡོད་པ་ལགས་མོད། འོན་ཀྱང་དེང་རབས་བོད་ཀྱི་གསོ་རིག་སྨྲ་བ་ཁག་ཅིག་གི་གནས་སྟངས་ལ་གཞིགས་ན་ཕ་ཤུལ་བུས་མ་ཟིན་པར་གཞན་གྱི་ཟེར་སྒྲོས་ལ་ཡིད་ཆེས་ཀྱིས་རང་གི་ཐུན་མོང་མ་ཡིན་པའི་སྒེར་ཆོས་གང་མང་ཞིག་ལ་རང་བློའི་གང་དྲན་གྱི་འགྲེལ་ལོགས་དང་ཐུན་མོང་མ་ཡིན་པའི་སྒེར་ཆོས་གང་མང་ཞིག་གླེགས་བམ་གྱི་མལ་དུ་ཤོར་དང་ཤོར་བཞིན་པའི་ཚུལ་སོགས་ལ་མ་བཟོད་པར་འདིར་གུས་པས་རང་གི་འདོད་ཚུལ་འགའ་སྤྲོས་བར་འདོད །

དེ་ལས་མང་བ་། “ལེ་ལོ་དང་འཐུས་ཤོར།།” »