ཆབ་བྲག་ལྷ་མོ་སྐྱབས།

སྐུ་ཞབས་ཀྲུའུ་ཝེ་ཆོན་ལགས་ཀྱི་སྐད་ཆ་འདི་རིགས་སྒེར་ངོས་ཀྱི་སེམས་གཏམ་ངོ་མ་ཞིག་ཡིན་མིན་བཤད་དཀའ་ན་ཡང་། རྒྱ་ནག་གཞུང་གི་རྒྱུག་ཁྱི་ཡག་པོའི་ཁྱི་སྐད་ངོ་མ་དེ་ཡིན་པར་ཐག་བཅད་ཆོག

ཁོ་པས་ཏཱ་ལའི་བླ་མར་འཚེ་མེད་ཞི་བའི་མིང་འདོགས་པ་ནི་དགོད་གཏམ་ཁོ་ན་ཙམ་རེད་ཟེར་བ་འདི་ཁོ་ནས་ཁོས་མངོན་སུམ་ལ་བསྙོན་གྱིན་མེད་ན་ཡང་ལོག་ལྟ་བ་ཞིགཡིན་པ་ཚང་མས་ཤེས་ཐུབ། ཏཱ་ལའི་བླ་མར་འཚེ་མེད་ཞི་བའི་དེད་དཔོན་དང་ཞི་བའི་དབུ་ཁྲིད་དོན་དམ་པ་ཞིག་ཡིན་ཚུལ་ཁོང་གིས་ ༡༩༥༡ ལོར་བོད་གཞུང་གི་ཆབ་སྲིད་དབང་ཆ་ཡོངས་སུ་བཞེས་པ་ནས་ད་ལྟའི་བར་དུ་དགྲ་ལ་གྲོགས་ཀྱི་འདུ་ཤེས་བཟུང་ནས་བོད་རྒྱའི་ཞི་བདེའི་ཆེད་ཙམ་མ་ཟད་འཛམ་གླིང་ཞི་བདེར་སྨན་པའི་མཛད་འཕྲིན་ཅི་ཙམ་ཞིག་བསྐྱངས་ཡོད་པ་འཛམ་གླིང་ཡོངས་གྲགས་ཡིན་པས་ངས་འདིར་ཞིབ་བརྗོད་མི་དགོས། དེའི་དཔེ་མཚོན་ཙམ་གཙོ་བོ་ཞིག་ནི་བོད་རྒྱ་ཞི་མོལ་གྱི་དབུ་མའི་ལམ་ཆེན་གསར་གཏོད་གནང་ནས་བོད་ཕྱི་ནང་གཉིས་ཀྱི་མི་དམངས་ཀྱིས་བོད་དོན་ལས་འགུལ་གང་སྤེལ་ཚང་མ་འཚེ་མེད་ཞི་ལམ་ཁོ་ནར་སྐྱོད་དགོས་པར་པའི་བཀའ་སློབ་ལམ་སྟོན་རྒྱུན་མར་གནང་བ་མ་ཟད་གལ་ཏེ་དྲག་པོའི་འཐབ་རྩོད་ཀྱི་ལམ་དུ་འགྲོ་ན་ཁོང་གིས་བོད་ཀྱི་དབུ་ཁྲིད་གནང་མི་ཐུབ་ཚུལ་ཡང་དང་བསྐྱར་དུ་གསུངས་ལ། ཐ་ན་ ༢༠༠༨ ལོའི་རྒྱལ་སྤྱིའི་རྩེད་འགྲན་མོ་རྒྱ་ནག་ཏུ་འཚོག་རྒྱུར་ཡང་ཁོང་གིས་རྒྱབ་སྐྱོར་གནང་ཡོད།

དེ་ལས་མང་བ་། “ཀྲུའུ་ཝེ་ཆོན་གྱི་ཁྱི་སྐད།” »

རེབ་གོང་ཤེས་རབ།

བོད་ནང་རང་ལུས་མེར་བསྲེགས་བྱུང་བའི་གནས་ཚུལ་རྒྱ་ནག་གིས་སྦས་སྐུང་མ་ཐུབ་པས། གནས་ཚུལ་དེ་རིགས་ཕྱི་ཕྱོགས་ནས་རྒྱུད་སྐུལ་དང་མགོ་བསྐོར་འོག་ཚུད་རབ་ཀྱི་སྐད་ཆ་དག་བོད་ལྗོངས་རླུང་འཕྲིན་ཁང་ཟེར་བ་ནས་མཚོ་སྔོན་རླུང་འཕྲིན་ཁང་གི་བར་དུ་ཁྱབ་ཡོད། སྤྱིར་བཏང་བོད་ཀྱི་ལྷ་ས་ནས་ཨ་མདོར་མ་ཐོན་པའི་རྒྱ་ནག་གི་བོད་ཐོག་སྤེལ་བའི་བསྒྲགས་གཏམ་ཡོད་ལ། དེ་བཞིན་ཨ་མདོ་ནས་ལྷ་སར་མི་གཏོང་བའི་གནས་ཚུལ་དང་གསར་འགྱུར་སྣ་ཚོགས་འབྱུང་གི་ཡོད། དེ་དག་ནི་རྒྱ་ནག་གི་དྲག་མཚོན་གྱིས་བརྟན་བརླིང་སྲུང་སྐྱོབ་ཐད་ཀྱི་ཚོད་བགམ་ཡིན་པར་ངོས་འཛིན་ཞུས་ན་ཆོག་མོད།
ཉེ་བའི་འཆར་མདོ་སྨད་ཀྱི་ས་ཁུལ་ཁ་ཤས་ནས་བླ་སྤྲུལ་ཁ་ཤས་བཙན་གྱིས་ལྗོངས་རྒྱུར་ཁྲིད་ཡོད་ཅིང་། སྐབས་དེར་ཁོང་ཚོར་རང་རྒྱལ་གྱི་འཛུགས་བསྐྲུན་དང་རིག་གནས་ཀྱི་དཔལ་ཡོན་རོལ་མྱོང་བྱ་ཐུབ་རྒྱུའི་ཡག་བཤད་བྱས་འདུག རྒྱ་ནག་གི་གྲོང་ཁྱེར་ཁ་ཤས་ནང་ལྟ་སྐོར་ཕྱིན་ནས་ཕྱིར་ཕེབས་འཕྲལ། བླ་སྤྲུལ་ཚོར་བཙན་གྱིས་བོད་དུ་འབྱུང་བཞིན་པའི་རང་ལུས་མེར་བསྲེགས་ཐད་རྒྱ་ནག་གི་རྫུན་གཏམ་དང་མཐུན་པའི་གསུང་བཤད་གནང་རྒྱུར་བཙན་འགེལ་བྱས་ཡོད་འདུག་ལ། གསུང་བཤད་ནང་རང་ལུས་མེར་བསྲེགས་ནི་ཆོས་ཀྱི་དགོངས་དོན་དང་འགལ་ཞིང་འཇིག་རྟེན་ཡ་རབས་ཀྱི་སྤྱོད་ཚུལ་མིན་པ། དེ་བཞིན་ཕྱི་ཕྱོགས་ནས་སྤྱི་ཚོགས་གཏོར་བཤིག་གཏོང་བའི་འཆར་ཇུས་སིམ་འཛུལ་བྱེད་ཀྱི་ཡོད་ཚུལ་སོགས་བཤད་དགོས་རྒྱུའི་དམ་བསྒྲགས་གནང་འདུག

དེ་ལས་མང་བ་། ““བླ་སྤྲུལ་གྱིས་གཏན་འཇགས་གླེང་བ་”ཟེར་བའི་གཡོ་འཁྲབ།” »

ཨ་རིག་འགྱུར་མེད།
བཀུར་འོས་པའི་བཀའ་བློན་ཁྲི་པ་བློ་བཟང་སེང་གེ་ལགས། ངས་ཐེངས་མང་བོར་སེམས་གནད་དུ་ཕབ་ནས་མུན་ནག་གིས་བསྐྱལ་བའི་ལོ་རྙིང་དང་མིག་ཆུས་བསུས་པའི་ལོ་གསར་བའི་ནང་བྱུང་བའི་དོན་དག་རྣམས་ལ་བསམ་གཞིག་གང་མང་བགྱིས་པར་མ་ཟད། ཐེངས་མང་བོ་མང་བོ་ཞིག་ལ་རྒྱ་ནག་གི་སྲིད་འཛིན་ཧུ་ཅིན་ཐོའི་མིང་ཐོག་ཏུ་འཕྲིན་ཡིག་ཅིག་བསྐུར་རྒྱུར་བསམ་བློ་བཏང་། མ་མཐར་ཡང་འུ་ཐུག་པའི་རེ་འབོད་ཅིག་བྱས་ན་བསམ། དེ་ལྟར་ནའང་། བོད་ནང་གི་གཞིས་ལུས་བོད་མི་རྣམས་ཀྱི་ཚེ་སྲོག་གི་འབོད་སྒྲར་མི་ཉན་པའི་ལག་དམར་ཞིག་གིས་ངས་རང་དབང་གི་ལུང་པ་ནས་ཀི་ཞིག་བཏབས་པ་ནི་རྟུག་དྲི་ཞིག་ཏུའང་སེམས་མི་སྲིད་པས། ཇི་ལྟར་བཤད་ཀྱང་ཕར་དཀར་པོ་སེམས་བསྟན་ན་ཚུར་ནག་པོ་སོ་མི་སྟོན་པ་ནི་བཀུར་འོས་པའི་བཀའ་ཁྲི་ཁྱེད་ཡིན་ཐོག དགའ་ལྡན་ཕོ་བྲང་མཇུག་བསྡུས་པ་དང་༸གོང་ས་མཆོག་གིས་ཕྱག་དབང་ཡོངས་རྫོགས་སྐུ་ཉིད་ལ་རྩིས་སྤྲོད་གནང་ཟིན་པའི་དུས་འདིར། སྐུ་ཉིད་ནི་མཛུབ་མོས་གང་བསྟན་ཤར་དང་བླ་མས་ཅི་གསུང་ཆོས་ཟེར་བའི་དཔེ་ལྟར་དུ་ལགས་པས། མི་ཆུང་ངས་སེམས་བསམ་པའི་སྐད་ཆ་འདི་དག་ཀྱང་རེ་འབོད་ཅིག་གི་ཚབ་ཏུ་ཁྱེད་ཀྱི་སྙན་ལམ་དུ་བསྒྲོན་ན་འདོད།

དེ་ལས་མང་བ་། “བཀའ་བློན་ཁྲི་པར་སྤྲིངས་པའི་འཕྲིན་ཡིག་ཐོག་མ།” »

མི་ལའི་རྣམ་ཐར་མཛོད་ནག་མ་ནི་ད་དུང་ཡང་དཔེ་རྒྱུན་མ་ཆད་པར་བོད་ཀྱི་གདུལ་བྱ་གླང་འདྲ་བ་རྣམས་ཀྱི་བློ་མུན་སེལ་བའི་གཉེན་དུ་འོད་ཟེར་ལམ་ལམ་ཕྱོགས་དུས་ཀུན་ཏུ་འཕྲོ་བཞིན་མཆིས།
མཛོད་ནག་མའི་མཇུག་ཏུ། གླེགས་བར་འདི་ཉིད་ཆོས་རྗེ་རང་བྱུང་རྡོ་རྗེས་གདན་དྲངས་ནས། ཀོང་པོ་རྩེ་ལ་སྒང་གི་མཛོད་ནག་ནང་དུ་བཞུགས་པ་ལ། ཆོས་རྗེ་མཐོང་བ་དོན་ལྡན་པ་ལ་ནང་སོ་ཀུན་དགའ་རྒྱལ་མཚནགྱིས་གདན་འདྲེན་བྱས་པའི་དུས་སུ། མཛོད་ནག་ནང་ནས་མགུར་འབུམ་འདི་ཡང་གདན་དྲངས་ནས་ལྷོ་རྒྱུད་འདིར་ཕེབས་ནས་དད་ལྡན་རྣམས་ཀྱིས་མང་དུ་བཞེངས་པས་ཕྱོགས་ཐམས་ཅད་དུ་དར་ཞིང་རྒྱས་པར་གྱུར་ཏོ་ཞེས་གསལ་བ་ལས་མཛོད་ནག་མའི་མིང་ཐོགས་དོན་ཡང་གསལ། ད་ལྟ་སི་ཁྲོན་མི་རིགས་དཔེ་སྐྲུན་ཁང་ནས་པར་སྐྲུན་ཞུས་པའི་དེབ་རྒན་སྟོད་སྨད་གཉིས་བོད་ནང་གི་དཔེ་ཚོང་ཁང་འགའ་རེའི་ནང་བཙོང་རྒྱུ་འདུག
མཛོད་ནག་མ་འདི་ནི། རྗེ་བཙུན་དགུང་ལོ་བརྒྱད་ཅུ་གྱ་གཉིས་པ་ཆུ་མོ་གླང་གི་ལོ་ལ། ངན་རྫོང་རས་པ་དང་རས་པ་ཞི་བ་འོད་གཉིས་ཀྱིས་གཙོས་རས་པ་རྣམས་ཀྱིས་ཕྱོགས་ཕྱོགས་ནས་ཀྱང་བསྡུས།

དེ་ལས་མང་བ་། “མི་ལའི་རྣམ་ཐར་མཛོད་ནག་མའི་ངོ་སྤྲོད་མདོར་བསྡུས།” »

ཨོ་རྒྱན་ཉི་མ།
མཐོ་སྒང་གངས་ཅན་པའི་ལུགས་གཉིས་ཀྱི་དོན་ལ་མཁྱེན་པ་རྒྱས་པའི་མཁས་པའིི་དབང་པོ་དག་དང་། གཞན་ཡང་རང་གི་རིགས་ལ་ཞེན་པ་དཀར་བའི་སྐྱེ་བོ་རྒན་གཞོན་རྣམ་པ་སེམས་ལྷོད་ལ་བབས་ཏེ་གཅིག་གསོན་དང་། ང་ཚོར་སྔོན་ཞིག་ལ་འཛམ་གླིང་སུམ་གཉིས་དབང་དུ་བསྡུས་ཞེས་པའི་མཚན་གྱི་སྙན་པས་ཁེངས་ཏེ། སུ་ལ་ཡང་མགོ་མི་དགུར་བསམ་ནས་རང་སྲོག་བློས་བཏང་གིས་རྒྱ་ནག་གཞུང་ལ་ངོ་རྒོལ་དང་། ཡང་བོད་མི་རིགས་དང་རིག་གཞུང་ཞེས་པ་དེ་མི་དགོས་ཞེས་མདོ་ཤོར་གྱི་གཏམ་ཡང་མ་ཡིན་པར། དེ་གཉིས་ཀའི་ཟུར་ཞིག་ནས་སྤྱིར་འཛམ་བུ་གླིང་གི་སྐྱེ་འགྲོ་ལ་སྨན་པ་དང་། དགོས་ཁ་བ་གངས་ཅན་པའི་ཡོད་དགུ་ལ་གསོན་ཤུགས་རྒྱས་ནུས་པ་ནི་ཆོས་དང་རིག་གཞུང་རྙིང་པ་དག་རང་བློར་ཆུད་པའི་ཐོག་ནས། རིག་གཞུང་གསར་བའི་ཉིང་བཅུད་ལེགས་ཚོགས་ནང་འདྲེན་གྱིས་གཞོན་སྐྱེས་དག་གི་མདུན་ལམ་གཟེངས་སུ་ཐོན་པ་བཟོ་ཐུབ་པ་དེ་རེད།

དེ་ལས་མང་བ་། “བོད་ཀྱི་འབྱུང་འགྱུར་ལ་རྒྱང་ལྟ།” »

བོན་རྒྱ་བསྟན་འཛིན་རབ་རྒྱས།

སྲིན་པོ་འབྲུག་གི་ལོའི་ཆིག་བཤད་ཐོག་མ།

སྲིན་འབྲུག་གི་ཁ་ཆུ་ནག་པོས་ཨེན་ཙམ་ཡང་བརླན་པར་མ་གྱུར་ལ།ཟུར་གསུམ་གྱི་སྤྲིན་པ་ནག་པོ་གདུག་རྩུབ་ཀྱིས་བརྒྱུགས་ནའང་རལ་བར་མ་གྱུར་བའི་ནམ་མཁའ་འདི།འབྲོང་རྒོད་ཀྱི་རུ་ཐུར་ཁོ་ནས་འདེགས་དགོས་པ་རྟེན་འབྲེལ་གྱིས་དེད་པའི་བཀའ་དབང་འབའ་ཞིག་ལ་གྱུར་ཡོད་ནའང་།གནམ་འོག་འདི་སྲིན་འབྲུག་དང་གྲོག་མ་སྔོན་པོའི་ཁྲོམ་ར་རྒྱ་ཆེན་ཞིག་ལ་གྱུར་བས། བོད་ཀྱི་གནམ་འོག་འདི་སུ་ཞིག་གི་རྒྱ་མཚོའི་གཏིང་ཡིན་ལ་དམྱལ་བའི་མཁར་ཡང་ཡིན་ནོ།། ངས་བོད་ཀྱི་ནམ་མཁའ་ལ་ཅེར་ནས་ཕོ་ལོ་ཉི་ཤུ་བརྒལ་བའི་དེ་རིང་།ང་དངོས་གནས་ངུ་སྙིང་སྤྲོ་ལ་ཤི་འདོད་ཀྱང་འདུག དེ་ནི་གཞན་ཅི་ཡང་མིན་ཏེ།བོད་པ་རེ་རེ་བཞིན་ཚོར་བ་ཅན་གྱི་མེ་རྡོ་རུ་གྱུར་ཅིང་།ཤེད་བུ་གསོན་ཚུགས་ཅན་རེ་རེ་ཡིས་གནམ་འོག་གི་མུན་པའི་ངོ་གདོང་ལ་ཁྲམ་རྟགས་དམར་ཙར་བ་རེ་རྒྱག་བཞིན་ཚེ་སྲོག་གི་གཉུག་སེམས་སད་བཞིན་པ་དེས་སོ། ། ཡང་གཅིག་བཤད་ན།

དེ་ལས་མང་བ་། “བོད་ཀྱི་ནམ་མཁའ།” »

(ཁག་གཉིས་པ།)
སྦྲ་རིགས་ཐོགས་མེད།

ཕྱི་ལོ་༡༩༤༨ ལོར་རྒྱལ་ཁབ་འདིས་ཨ་རིའི་རྒྱབ་སྐྱོར་འོག་ཀོ་རི་ཡ་མི་དམངས་སྤྱི་མཐུན་རྒྱལ་ཁབ(People’s Republic of Korea)དངོས་སུ་དབུ་བརྙེས་པའི་ཁྱབ་བསྒྲགས་བྱས་པ་མ་ཟད། སེག་མན་རེས་(SyngmanRhee)ཐེངས་དང་བོར་སྲིད་འཛིན་དུ་བསྐོ་བཞག་ཀྱང་བྱས་འདུག་ལ།ལོ་དེར་མཉམ་འབྲེལ་རྒྱལ་ཚོགས་ཀྱིས་ཀྱང་ལྷོ་ཀོ་རི་ཡ་དེ་ཁྲིམས་མཐུན་གྱི་གཞུང་ཡིན་པར་ངོས་འཛིན་བྱས་འདུགའོན་ཀྱང་།སྟབས་མ་ལེགས་པར་སྲིད་འཛིན་དང་བོ་དེ་གཅིག་སྡུད་དབང་འཛིན་པར་གྱུར་ནས་ལོ་ངོ་བཅུ་ལྷག་ལ་མི་མང་གཉའ་གནོན་ཤུགས་ཆེར་བྱས་འདུག དེར་བརྟེན། ཕྱི་ལོ་༡༩༦༠ ལོར་ཐོག་དང་བོར་ཀོ་རི་ཡར་སློབ་མའི་སྒེར་ལངས་སྐད་གྲགས་ཅན་(“4.19Revolution”)དེ་བྱུང་འདུག་ལ།དེ་འདྲའི་ཁྱོད་ཤི་ང་གསོན་གྱི་དབང་ཤུགས་འཐབ་རྩོད་ཁྲོད་ནས་རྒྱལ་ཁབ་འདི་སླར་ཡང་དམག་སྤྱི་ཆེན་མོ་ཕར་ཁུ་ཆང་ཧེས(ParkChung-hee)ཀྱིས་སྣེ་ཁྲིད་པའི་དམག་མིའི་དབང་འཛིན་འོག་ཤོར་ནས་ཕྱི་ལོ ༡༩༧༩ ལོ་སྟེ་དམག་སྤྱི་ཆེན་མོ་ཁོང་གློ་བུར་དུ་ལྐོག་གསོད་མ་བྱས་བར་དུ་ལོ་ངོ་ཉི་ཤུ་ཙམ་ཕྱིན་འདུག ལྐོག་གསོད་དོན་རྐྱེན་དེའི་ཁྲོད་ནས་རྒྱལ་ཁབ་འདིའི་དབང་ཤུགས་སླར་ཡང་ཕྱི་ལོ་༡༩༨༩ བར་དུ་དམག་སྤྱི་ཇོན་རྡོས་ཧན(JeonDoo-hwan)གྱི་གཅིག་སྡུད་དང་དབང་ཤུགས་འོག་བཅུག་འདུག ལོ་རྒྱུས་ལ་ཕྱིར་མིག་ཅིག་བལྟས་ན། བཙན་བྱོལ་བོད་གཞུང་གི་དམངས་གཙོ་དང་ལྷོ་ཀོ་རི་ཡའི་དམངས་གཙོ་གཉིས་ལོ་ངོ་བཅུ་ཕྲག་གཅིག་ལྷག་མ་གཏོགས་ཆེ་ཆུང་མེད་པའི་གཅེན་གཅུང་གཉིས་དང་འདྲ་ལ། གཅེན་པོ་དེ་སྔ་ཕྱིར་དཀའ་ངལ་གང་མང་བརྒྱུད་མཐར་ད་ལྟ་ན་ཚོད་ཡོངས་སུ་སྨིན་པའི་ཕོ་གཞོན་མཚན་ཉིད་ཚང་བ་ཞིག་ཏུ་ཆགས་ཟིན་མོད། གཅུང་བོ་དེ་དཀའ་ངལ་དེ་འདྲ་གང་མང་བརྒྱུད་དགོས་མ་བྱུང་བས་ལན་པ་འདྲ་ད་དུང་སྨིན་ལ་མ་སྨིན་གྱི་མཚམས་དེར་ལྷག་འདུག་ཨང་།

དེ་ལས་མང་བ་། “ལྷོ་ཀོ་རི་ཡ་དང་ཉི་ཧོང་ཡུལ་གྱི་འགྲུལ་བཞུད་ཟིན་ཐོ།” »

སྦྲ་རིགས་ཐོགས་མེད།

ཉེ་ཆར་བདག་རྒྱལ་སྤྱིའི་ན་གཞོན་ཤེས་ཡོན་དར་སྤེལ་ཐེབས་རྩ་ཁང་གིས་འདེམས་བསྒྲིགས་བྱས་པའི་ལས་རིམ་ཞིག་བརྒྱུད་ནས་ལྷོ་ཀོ་རི་ཡ་དང་ཉི་ཧོང་གི་གཙུག་ལག་སློབ་གྲྭ་ཆེན་མོ་ཁག་ཁ་ཤས་སུ་ཟླ་ཤས་རིང་སློབ་སྦྱོང་དང་འགྲུལ་བཞུད་བྱེད་སྐལ་ལྡན་པས། འདིར་བདག་གིས་ཨེ་ཤ་ཡའི་ཡར་ཐོན་ཅན་གྱི་རྒྱལ་ཁབ་འདི་གཉིས་ཀྱི་སྲིད་འབྱོར་རིག་གསུམ་གཙོ་བོར་བྱས་པའི་སྤྱི་ཚོགས་ཀྱི་སྣང་ཚུལ་ཁ་ཤས་རང་གི་མཐོང་ཐོས་མྱོང་གསུམ་དང་སྦྲགས་ནས་ཅུང་ཟད་ཅིག་བཤད་འདོད་བྱུང་། རྩོམ་ཡིག་འདི་ཡང་དྲ་ལམ་གྱི་བོད་ཡིག་ཁྱབ་རྒྱ་ཆེ་རུ་གཏོང་བའི་ལེགས་སྐྱེས་ཀྱི་ཆུ་ཐིགས་ཙམ་ཞིག་དང་བོད་ཡིག་བརྒྱུད་ནས་འཛམ་གླིང་ལ་ལྟ་མཁན་གྱི་ཀློག་པ་བོ་དག་ལ་ཕུལ་བའི་འགྲུལ་བཞུད་པ་ཞིག་གི་ལེགས་སྐྱེས་ཡིན་ཞེས་ཀྱང་བརྗོད་ཆོག

དེ་ལས་མང་བ་། “ལྷོ་ཀོ་རི་ཡ་དང་ཉི་ཧོང་ཡུལ་གྱི་འགྲུལ་བཞུད་ཟིན་ཐོ།” »