པད་མ་འབུམ།
——————–
(ཁ་རྩང་ངས་རང་གི་གློག་ཀླད་ཀྱི་ནང་ནས་འདྲ་པར་ཁ་ཤས་བཙལ་དགོས་བྱུང་། སྟེས་དབང་གིས་ན་ནིང་དབྱར་ཀར་ལྷ་སར་བསྐྱོད་པའི་འདྲ་པར་རྣམས་ཤར་ཡོང་། དེ་དག་ལ་ལྟ་གིན་ལྟ་གིན་ལྟ་མཚམས་འཇོག་མ་ཐུབ། འདྲ་པར་དེ་དག་གིས་ལྷ་སའི་མཐོང་སྣང་གང་མང་ཞིག་དྲན་གསོ་བཏང་། མཐོང་སྣང་དེ་དག་བརྗེད་དུ་ཕངས་ནས་ཡིག་ཐོག་ལ་ཕབ་མགོ་བརྩམས་པ་ཡིན།)
ང་ན་ནིང་ནས་བརྩིས་པའི་ལོ་ཉེར་དྲུག་གི་སྔོན་ཏེ། ༡༩༨༧ ལོར་ལྷ་སར་སླེབས། ཕར་ལྷ་སར་འགྲོ་དུས་ན་གོར་མོ་བར་དུ་མེ་འཁོར་ལ་བསྡད་ཅིང་། ན་གོར་མོ་ནས་འགྲུལ་འཁོར་ལ་བསྡད་ནས་སོང་། ཚུར་ཡོང་དུས་གནམ་གྲུར་བསྡད་ནས་ཁྲིན་ཏུ་བརྒྱུད་ནས་ཡོང་། དེ་དུས་གནམ་ཐང་དུ་ཅུང་ཙམ་སྒུག་ནས་བསྡད་ཅིང་། གནམ་ཐང་གི་གཡས་གཡོན་ཚང་མ་ཞིང་ཁ་རེད།