སྙན་བཟང་གཡུང་དྲུང་ཚེ་རིང་།
སྡུག་བསྔལ་རྒྱ་མཚོར་བྱིང་བའི་ལུས་ཅན་འགྲོ།།བདེ་ཆེན་ལམ་དུ་འགོད་པའི་འདྲེན་པ་རྗེ།།ཤར་གདོང་བློ་བཟང་བཤད་སྒྲུབ་རྒྱ་མཚོ་ལ།།མི་ཕྱེད་དད་པའི་ལན་མང་གསོལ་བ་འདེབས།།མདོ་ཁམས་གཡར་མོ་ཐང་གི་འགྲོ་རྣམས་ཀྱིས།།བསོད་ནམས་ཡོལ་གོར་བསྐྱིལ་བའི་ལྷ་ཡི་མཚོ།།རྟེན་འབྱུང་རླུང་ཤུགས་དཀར་པོའི་ཉེར་བསྲུབས་པས།།གང་སྐུ་ཟླ་གཞོན་ལྗོངས་འདིའི་རྒྱན་དུ་བཞད།།ཟླ་བཞིན་དཀྱིལ་འཁོར་རྫོགས་པའི་བཞིན་རས་ལ།།སྔོན་སྨོན་སྟོང་གི་ཆབ་ཀྱིས་ཁྲུས་བྱས་པའི།།སྙིང་རྗེའི་འཛུམ་དཀར་གཡོ་བའི་རྣམ་འཕྲུལ་གྱིས།།ས་གསུམ་སྐྱེ་དགུའི་སྙིང་ལ་བདེ་དགའ་བསྐྲུན།།ཁ་གྱ་འཇམ་དབྱངས་དཔལ་གྱི་བཞུགས་ཁྲི་ལ།།བྱས་བསགས་གནམ་གྱི་རྒྱལ་མོའི་རྒྱས་བཏབ་པས།།གང་སྐུ་མཛེས་པའི་རྒྱན་དུ་མངོན་བཞུགས་ཏེ།།རྒྱལ་བསྟན་གདུགས་ཆེན་དཀར་པོ་མཁའ་ལ་བསྒྲེངས།།འདྲེན་མཆོག་བློ་བཟང་བསྟན་པའི་ཞབས་སྐྱེས་རྡུལ།།
