མི་རིགས་ཞིག་གསོན་གནས་ཐུབ་དགོས་ན་མི་རིགས་དེའི་སྐད་ཡིག་དང་རིག་གཞུང་གསོན་པོར་གནས་དགོས་པ།
གཞུང་པ་ཚེ་དབང་བསོད་ནམས། འཛམ་གླིང་གི་ས་ཆེན་པོ་འདི་ཆགས་པ་ནས་མི་གི་འགྲོ་བ་འཕེལ་བའི་བརྒྱུད་རིམ་ལ་ཕྱི་མིག་བལྟ་སྐབས་ང་ཚོར་ངོ་འཕྲོད་པ་དེ་མི་རིགས་ཞིག་ཟུར་དུ་འཚོ་དགོས་ན་མི་རིགས་དེའི་སྐད་ཡིག་དང་རིག་གཞུང་གསོན་པོར་གནས་དགོས་པ་དེ་གལ་ཆེའི་ནང་གི་གལ་ཆེན་ངོ་མ་དེ་ཡིན་པ་ནས་ང་ཚོ་བོད་མི་རིགས་འདི་ཡང་སྤྱི་ལོ་༡༩༥༩ བར་བོད་མི་རིགས་འདི་འཛམ་གླིང་གི་ལུང་པ་གཞན་གྱིས་སྐད་ཡིག་དང་རིག་གཞུང་སོགས་འདྲེས་ལྷད་མེད་པ་ནས་བོད་ཀྱི་སྐད་ཡིག་དང་རིག་གཞུང་བོད་མི་རིགས་དང་བཅས་པ་འཛམ་གླིང་འདིའི་སྟེང་འཚོ་བཞིན་པ་ནས་སྤྱི་ལོ་ ༡༩༥༩ ལོར་རྒྱ་མིས་བོད་བཙན་བཟུང་གིས་བོད་མི་གཞིས་བྱེས་གཉིས་སུ་ཁ་གྱེས་ནས་བོད་ནང་ཡོད་པའི་བོད་མི་ཚོ་རྒྱ་མིའི་བཙན་གནོན་འོག་སྒོ་གསུམ་རང་དབང་དང་བཅས་པ་ཤོར་ནས་མི་ལོ་བཅུ་ཕྲག་དྲུག་འགྲོ་བཞིན་པ་དང་ང་ཚོ་བཙན་བྱོལ་དུ་ཡོད་པའི་བོད་མི་རྣམས་འཛམ་གླིང་གི་ལུང་པ་མང་པོའི་ནང་བོད་མི་ཁྱིམ་ཚང་རེ་ཙམ་གཉིས་ཙམ་བྱས་ནས་སྒེར་གྱི་འཚོ་བ་ལ་འགན་སྲུང་འོག་འཚོ་བཞིན་པ་ནས་ཕ་མེས་ནས་བརྒྱུད་པའི་བོད་མིའི་སྐད་ཡིག་དང་རིག་གཞུང་ལ་བདག་ཉར་བྱ་སའི་འཁོར་ཡུག་མེད་པ་ནས་འདས་པའི་ལོ་ངོ་བཅུ་ཕྲག་དྲུག་ལྷག་ཙམ་ནང་བོད་མི་རིགས་ཀྱི་སྐད་ཡིག་དང་རིག་གཞུང་ལ་ཉམས་ཆགས་ཆེན་པོ་ཐེབ་ཡོད་པ་ནས་ད་དུང་ལོ་དྲུག་བཅུ་ལྷག་ཙམ་བོད་མི་གཞིས་བྱེས་གཉིས་ད་ལྟའི་གནས་སྟངས་འདི་མུར་ལྷག་ཚེ་བོད་མིའི་སྐད་ཡིག་དང་རིག་གཞུང་ཕར་བཞག་བོད་མི་རིགས་འདི་ཆགས་འཇིག་གི་མཚམས་སུ་མི་སླེབ་པའི་ངེས་པ་མེད་པ་ནས་གལ་ཆེ་ཤོས་དེ་སྐད་ཡིག་དང་རིག་གཞུང་ལ་བདག་པོ་རྒྱབ་མཁན་གྱི་མི་རིགས་དེ་མི་རིགས་གཞན་དང་མ་འདྲེས་པ་ཟུར་དུ་འཚོ་དགོས་པ་ནས་མི་རིགས་སྲུང་སྐྱོབས་ཀྱི་ལས་འཆར་དེ་སྐད་ཡིག་དང་རིག་གཞུང་སྲུང་སྐྱོབས་ཀྱི་སྔོན་དུ་འགྲོ་དགོས་པ་དེ་གལ་ཆེན་ཞིག་ཡིན་པའི་ངོས་འཛིན་ཞུ་གི་ཡོད། བོད་ཀྱི་སྐད་ཡིག་དང་རིག་གཞུང་ནི་འགྲོ་བ་མིའི་ཚེ་སྲོག་སྐྱོབས་ཐུབ་པའི་སངས་རྒྱས་ཀྱི་གསུང་བཀའ་བསྟན་ཡོངས་རྫོགས་ལ་བདག་ཉར་ཐུབ་པའི་སྐད་ཡིག་ཞིག་ཡིན་པ་མ་ཟད་ཚེ་འདི་ཕྱི་གཉིས་ལ་ལམ་སྟོན་ཐུབ་མཁན་གྱི་སྐད་ཡིག་ཞིག་ཡིན་པ་ནས་བོད་ཀྱི་སྐད་ཡིག་དང་བོད་མིའི་རིག་གཞུང་ལ་བདག་ཉར་བྱ་རྒྱུའི་འགན་དེ་བོད་མི་རང་ཉིད་ལ་ཡོད་པ་ལས་གཞན་མི་རིགས་སུ་གཅིག་ལའང་མེད་པ་དེ་ཤེས་པའི་ཐོག་ནས་སོ་སོའི་སྐད་ཡིག་ལ་བདག་ཉར་བྱ་རྒྱུ་དང་རྒྱུན་དུ་ཉིན་རེ་ཉིན་རེའི་ཁྱིམ་ཚང་སོ་སོའི་འཚོ་བའི་ནང་བེད་སྤྱོད་གཅོད་གནང་དགོས་པ་ལས་ཚེས་བཟང་དང་དུས་བཟང་ལ་བོད་ཟས་ཟ་རྒྱུ་དང་། བོད་སྐད་བཤོད་རྒྱུ། བོད་ཡིག་འབྲི་རྒྱུ། བོད་གོས་གྱོན་རྒྱུ་དང་བོད་པའི་གླུ་གཞས་ཁྲབ་རྒྱུ་སོགས་དེ་ཙམ་གྱིས་བོད་པའི་སྐད་ཡིག་དང་རིག་གཞུང་ལ་དུས་ནམ་ཡང་སྲུང་སྐྱོབས་མི་ཐུབ་པ་ནས་ཉིན་རེ་ཉིན་རེའི་འཚོ་བའི་ནང་རྒྱུན་དུ་བོད་ཟས་ཟ་རྒྱུ་དང་། བོད་སྐད་བཤོད་རྒྱུ། བོད་ཡིག་འབྲི་རྒྱུ། བོད་ཆས་གྱོན་རྒྱུ་སོགས་བརྒྱུད་ནས་བོད་མི་རིགས་གསོན་གནས་དགོས་པ་དེ་ཡང་སྐད་ཡིག་དང་རིག་གཞུང་སྲུང་སྐྱོབས་བྱ་རྒྱུའི་སྔོན་དུ་བོད་མི་རིགས་ལ་སྲུང་སྐྱོབས་བྱ་རྒྱུའི་ལས་འཆར་དེ་སྔོན་འཐོན་བྱས་ནས་འགྲོ་དགོས་པ་དེ་གལ་ཆེན་དོན་ཆེན་ཞིག་ཡིན་པའི་ངོས་འཛིན་ཞུ་གི་ཡོད། ད་ལྟའི་བོད་ཕྱི་ནང་གཉིས་སུ་ཡོད་པའི་བོད་མི་ཚོའི་གནས་སྟངས་དེ་ཛ་དྲག་ངང་ཡོད་པ་དེ་བོད་མི་ཚང་མས་མཁྱེན་པ་གནང་ནས་བོད་མིའི་ངོ་བོ་མ་རླགས་པའི་ཆེད་བོད་མི་རང་ཉིད་ཀྱི་ཕ་མེས་ནས་བརྒྱུད་པའི་སྐད་ཡིག་དང་རིག་གཞུང་གསོན་གནས་བརྒྱུད་ནས་བོད་མི་རིགས་འདི་འཇིག་རྟེན་འདིའི་སྟེང་འཚོ་ཐུབ་པའི་འགན་དེ་བོད་མི་མི་རེ་ངོ་རེར་ཡོད་པ་དེ་དུས་ནམ་ཡང་བརྗེད་མི་ཉན་ནོ།
