རྗེས་དྲན་ཡིད་ཀྱི་རང་མདངས།

རྒྱང་མིག

བཙན་པོའི་གདུང་རྒྱུད་དྭངས་གཙང་རིགས་ལས་སྐུ་ཡི་མེ་ཏོག་ཤར་ནས་བཞད།།
རང་རིགས་སྤུན་ཟླ་ས་ཡ་དྲུག་ཆེད་དཀའ་ངལ་འབུམ་ཕྲག་ཁྱད་དུ་བསད།།
བོད་དོན་བདེན་པའི་ང་རོ་མཐོར་བསྒྲགས་གངས་རིའི་བུ་རྒོད་རྩོད་མེད་པོ།།
ཀུན་གཟིགས་པན་ཆེན་སྐུ་ཕྲེང་བཅུ་པར་རྗེས་དྲན་ཚིག་གིས་གུས་ཕྱག་བརྩེགས།།

གངས་རིའི་བུ་རྒོད་ཁྱེད་དང་ཁྱེད་མཚུངས་ད་དུང་གངས་རིར་འཚོ་གཞེས་ཚེ།།
དགྱ་དམར་སྤྱང་ཁྱུས་མཆེ་རྣོན་གཅིགས་ཀྱང་བོད་ལ་དེ་ཙམ་གནོད་ནུས་མིན།།
རང་ཡུལ་གངས་རིར་དུངས་སེམས་ཟབ་པའི་སེང་ཆེན་ཉིན་བྱེད་གཏན་ནུབ་ཚུལ།།
བསམ་ཞིང་བསམ་ན་བཟོད་དཀའི་མྱ་ངན་གང་འདྲ་བྱས་ཀྱང་སངས་དུས་བྲལ།།

ཁྱེད་ནི་ཆེས་མཐོའི་བླ་མ་ལགས་པས་གྲགས་སྐམ་མིང་སྙན་འཚོལ་དགོས་མེད།།
སྐྱེས་སྦྱངས་རིག་སྟོབས་ཁྱེད་ལ་མངའ་བས་རྒྱ་གཞུང་ཕོགས་དངུལ་རེ་དགོས་མེད།།
བོད་མིའི་ཁྱད་ནོར་ཁྱེད་ལ་འཛོམས་པས་ཐོབ་དང་དབང་ཆར་བརྩོན་དགོས་མེད།།
དེ་ལྟ་ལགས་ཕྱིར་གངས་རི་བསྐྱུར་ནས་འཇིག་རྟེན་གཞན་དུ་གཤེགས་པ་སྔ།།

རང་དོན་སྤངས་ཏེ་གཞན་ཕན་འབའ་ཞིག་ལྷུར་བཞེས་མཛད་པའི་ཁྱད་ཆོས་མཆོག །
ཁྱད་འཕགས་སྐྱེས་བུ་ཉིད་ལ་མ་གཏོགས་གང་ཟག་ཕལ་བར་འབྱུང་མིན་པས།།
འདྲེན་ཁྱེད་སྐུ་འཚོ་གཞེས་པའི་དུས་སུ་དཔག་དཀའི་མཛད་རྗེས་མ་མཐོང་བར།།
ནོར་བུ་ཤོར་རྗེས་ནོར་ཉམས་ཆོད་ལྟར་ང་ཚོ་བོད་རྣམས་ཅི་ཡིས་ནོངས།།

ཁྱེད་ནི་གངས་རིར་མཛད་རྗེས་མཐོ་བའི་རྒྱལ་གཅེས་དཔའ་བོ་རྨ་མེད་ཅིག །
ཁྱེད་ནི་ཐུབ་པའི་བསྟན་པར་ཕན་མཛད་དེ་འཛིན་སྐྱེས་བུ་བླ་མེད་ཅིག །
ཁྱེད་ནི་རང་རིགས་ལྷག་བསམ་ཆེ་བའི་ཁྱད་འཕགས་གངས་སེང་རྩོད་མེད་ཅིག །
ད་དུང་འཛམ་གླིང་ཞི་བདེར་སྨན་པའི་ཀུན་ཕན་བྱམས་བརྩེའི་བདག་ཉིད་ཅིག །

དེང་སྐབས་འཛམ་གླིང་ཡུལ་གྲུ་གང་སར་བོད་ཀྱི་རིག་གཞུང་རྩ་ཆེར་འཛིན།།
དྲང་བདེན་བོད་ཀྱི་ལོ་རྒྱུས་དག་ལ་ཚོད་དཔག་ཉམས་ཞིབ་ཆེན་པོ་བྱེད།།
ཐོག་མར་དགྱ་འདྲེས་བོད་ནང་དྲག་གནོན་གདུག་རྩུབ་ཚད་མེད་བྱས་ཚུལ་དང་།།
གངས་རིར་ཚབས་ཆེའི་རྩ་གཏོར་བྱུང་སྟངས་ཀུན་གཟིགས་ཁྱེད་ཀྱི་དྲིན་ལས་རྟོགས།།

སྡིག་ཅན་རྒྱ་དམར་དཔུང་ཚོགས་ཆེན་པོས་མི་སྤྱོད་ལས་འདས་ཁྲིམས་རྩུབ་འོག །
བོད་ཀྱི་ཤེས་འཇོན་ནུས་གསུམ་ལྡན་པའི་མཁས་གྲུབ་བླ་དཔོན་མི་ཆེན་སོགས།།
རིས་མེད་སེར་སྐྱ་མང་པོ་དུས་གཅིག་སྡེབ་བསད་བཏང་བའི་སྐྱོ་གར་དེ།།
མཐོང་བས་མ་བཟོད་འཕྲལ་དུ་ཁྲག་གི་ཡིག་འབྲུ་ཁྲི་བདུན་སྙན་ཞུ་བརྩམས།།

དེབ་དེ་གཡོ་སྒྱུས་སྙིང་ཁོག་གཏམས་པའི་རྒྱ་དཔོན་ཚོགས་ལ་སྤྲད་པས་ན།།
དངོས་བྱུང་དྲང་བདེན་སྙན་ཞུའི་བརྗོད་དོན་མིག་ནང་ཚེར་ཟུག་ལྟར་གྱུར་ནས།།
དེ་ཡི་ལན་དུ་ཀུན་གཟིགས་མཆོག་གང་ཚབས་ཆེན་ཁྲིམས་འགལ་ཉེས་ཅན་དུ།།
བགྲངས་ནས་མུན་ནག་བཙོན་དོང་ནང་དུ་ལོ་ངོ་བཅུ་ཙམ་སྐུ་རྐྱང་བཞག །

བཙོན་བཞུགས་ལོ་བཅུའི་དུས་ཚོད་དེ་ནི་དངོས་འབྲེལ་ཧ་ཅང་ཡུན་རིང་ཞིང་།།
དེང་གི་ཆབ་སྲིད་བཙོན་པར་རློམ་པའི་ཕྲན་ཚེགས་ཉེས་ཆད་ལ་སོགས་དང་།།
ཕན་ཚུན་བསྡུར་ན་ཀུན་གཟིགས་མཆོག་གི་དཀའ་སྡུག་རི་བས་ཆེས་ལྕི་ཡང་།།
གནམ་སའི་གོ་རིམ་ལྡོག་བསྒྱུར་བྱེད་པའི་ཚུལ་དེར་སེམས་པ་དབང་མེད་སྐྱོ།།

དེ་འདྲའི་སྐུ་ངལ་དཔག་མེད་མྱངས་ཀྱང་བོད་པའི་སེམས་ཤུགས་སྔར་བས་ཆེ།།
བཟོད་དཀའི་སྡུག་ཉེས་སྟོང་ཕྲག་ཕབས་ཀྱང་བོད་ཀྱི་ལར་ཞེན་དགུང་ལས་མཐོ།།
སྲོག་དང་འཕྲད་ཀྱང་ངོ་རྒོལ་གདོང་ལེན་ཆུ་བོའི་རྒྱུན་བཞིན་རྟག་ཏུ་གནང་།།
བོད་དོན་ཉིད་ལ་གཅིག་ཏུ་གཞོལ་བའི་མཛད་རྗེས་གངས་རིའི་སྤོ་ན་བརྗིད།།

ལྷད་མེད་གངས་ཀྱི་མདངས་ལྟའི་ལོ་རྒྱུས་རང་ཞལ་མངོན་པར་གསལ་བའི་ཕྱིར།།
མི་རིགས་ཤིག་གི་སྲོག་རྩའི་དང་པོ་སྐད་ཡིག་བཀོལ་སྤྱོད་སླར་གསོས་ལྷན།།
མ་འོངས་བོད་ཀྱི་སོན་རྩ་བུ་རབས་ཚ་བརྒྱུད་རྣམས་ཀྱི་མཚན་སྙན་ལའང་།།
གནོད་པའི་ཤུལ་རྗེས་ཕྲ་མོ་ཙམ་ཡང་མི་འཇོག་གཡར་དམ་གཉན་པོ་མཛད།།

ཚུལ་དེས་སླར་ཡང་དགྱ་དམར་གཞུང་གི་རུལ་སུངས་མཚང་ངན་བྲུས་དོགས་ནས།།
ཀུན་གཟིགས་མཆོག་ལ་ཕྱི་འཇམ་ཚུལ་གྱིས་ལྐོག་གྱུར་བྱུས་ངན་སྣ་ཚོགས་བརྩམས།།
མཐར་ཐུག་གང་བྱུང་མ་ངེས་གློ་བུར་སྐུ་མཆོག་མྱ་ངན་འདས་བྱུང་བས།།
བོད་མིའི་སྲོག་དང་མཚུངས་པའི་ཁྱད་ནོར་བོར་བརླགས་བྱུང་བའི་སྡུག་བསྔལ་ལྕི།།