མཚོ་པདྨ་ཅན་གྱི་གནས་མཇལ་ལས་ འཕྲོས་པའི་གཏམ།

ཆབ་མདོ་ངག་ཕུན།

ཨོ་རྒྱན་ཡུལ་གྱི་ནུབ་བྱང་མཚམས།།
པདྨ་གེ་སར་སྡོང་པོ་ལ།།
ཡ་མཚན་མཆོག་གི་དངོས་གྲུབ་བརྙེས།།
པདྨ་འབྱུང་གནས་ཞེས་སུ་གྲགས།།

ཞེས་གསུངས་དོན་ལྟར་ཚིག་གི་སྔོན་བསུས་ཏེ། ཕྱི་ལོ་ ༢༠༡༨ ལོའི་ཟླ་ ༤ ཚེས་ ༡༤ བདུན་ཕྲག་གཉིས་པའི་དགུང་སེང་དང་སྟབས་བསྟུན་ནས་ཞོགས་པ་སྔ་པོ་ལངས་ཏེ་ཞོགས་བཟས་ཚར་བ་དང་། ཆུ་ཚོད་བདུན་པ་ཙམ་ལ་འཕྲུལ་རྟ་བཞོན་ནས་གནས་མཆོག་ཟ་ཧོར་མཚོ་པདྨ་ཅན་ལ་གནས་སྐོར་ལ་ཕྱིན། མཚོ་པདྨ་ཅན་ལ་རྒྱ་གར་སྐད་དུ་ར་ཝལ་སར་ (Raealsar) ཞེས་ཟེར། ཧི་མ་ཅལ་(Himachal) མངའ་སྡེའི་མཎ་ཌིའི་ཁོངས་སུ་གཏོགས། དེ་ཉིན་གནམ་གཤིས་ཧ་ཅང་མདངས་ཤིང་། ལམ་ཁའི་གཡས་གཡོན་ལ་ལྗོན་ཤིང་ཡིད་དུ་འོང་བ་དེ་དག་མཐོང་དུས་སེམས་ནང་ལ་ཧ་ཅང་གི་དགའ་སྣང་ཚད་མེད་རེ་སྟེར་འོང་གི་འདུག །ལམ་ལ་དཀའ་ངལ་ཅི་ཡང་མེད་པའི་མཚོ་པདྨ་ཅན་ལ་ཉིན་དགུང་ཆུ་ཚོད་བཅུ་གཉིས་ལ་འབྱོར་བ་དང་། མཚོ་ཟུར་ལ་རྙིང་པ་དགོན་པའི་མགྲོན་ཁང་ཞིག་གླས་ཏེ་ཉིན་རེར་ཧིན་སྒོར་༣༠༠ རེད་འདུག །

དེ་ཡང་”ཟ་ཧོར་མཚོ་པདྨ་ཅན་ནི་སློབ་དཔོན་ཆེན་པོ་པདྨ་འབྱུང་གནས་ཀྱིས་ཟ་ཧོར་སྲས་མོ་མན་དྷ་ར་བ་སོགས་རྗེས་སུ་བཟུང་ནས་ཆོས་ཀྱི་འཁོར་ལོ་བསྐོར་བཞིན་པ་ཟ་ཧོར་རྒྱལ་པོས་གསན་མ་ཐག་སློབ་དཔོན་ཡབ་ཡུམ་གྱིས་འདོད་ལོག་བྱེད་པར་མཐོང་ནས་སློབ་དཔོན་གསོན་བསྲེག་བཏང་། འབྱུང་བ་མེ་ཡིས་མ་ཚིགས་པར་མེ་དཔུང་མཚོ་རུ་བསྒྱུར་བའི་སྐབས་གུ་རུ་པདྨ་སམ་བྷ་”ཞེས་གྲགས་སོ། གནས་རྩ་ཞིག་ཏུ་ངོས་འཛིན་བྱེད།

དེ་ཉིན་ནི་ཡུལ་དེའི་ཁྲོམ་འདུའི་དུས་ཆེན་རེད་འདུག་ན། མཚོའི་མཐའ་སྐོར་ཁྲོམ་སྟོན་མཁན་གྱིས་ཁེངས་ཤིང་མི་ཚོགས་ཧ་ཅང་མང་། མཚོ་ནི་སྔོན་ལྟར་སྔོ་འཐིམ་འཐིམ་གནས་འདུག་ཀྱང་མཚོ་ཟུར་ལ་ཉ་རྐང་གཅིག་ཀྱང་མཐོང་རྒྱུ་མི་འདུག་པས་སེམས་ནང་གཅིག་མ་ཚང་བ་ལྟ་བུའི་བློ་སེམས་མ་བདེ་བ་ཞིག་ཏུ་གྱུར། དེ་སྔོན་ཡིན་ན་མཚོ་ཟུར་ནས་མིའི་རྐང་སྒྲ་གོ་མ་ཐག་ཉ་རྣམས་ཚང་ཁ་ཤིག་ཤིག་གིས་འཕག་མཆོང་བྱེད་འོང་ཞིང་། དེ་རིང་ནི་ཉ་རྐང་གཅིག་ཀྱང་མཐོང་སའི་ཡུལ་ལ་མེད་ཅིང་མིས་སྒྲ་ལས་ཉ་ཡི་སྒྲ་མེད་ཅིང་ཁུ་སིམ་སིམ་གྱིས་གནས་སུ་གྱུར་ལ། གཞན་ལ་སྐད་ཆ་དྲིས་དུས་ཉ་ཚང་མ་ཤི་བ་རེད་ཟེར་བ་ལས་གཞན་ག་རེ་བྱས་ནས་ཤི་བ་ཡིན་པ་སྐད་ཆ་གསལ་པོ་ཤེས་མཁན་མི་འདུག་ལ། དེ་བཞིན་དེ་སྔོན་ཡིན་ན་མཚོ་པདྨ་ཅན་སྲུང་སྐྱོབ་གནང་མཁན་དྭང་བླངས་པ་གཞོན་སྐྱེས་འགའ་ཤས་མཐོང་མྱོང་ཡང་དེ་རིང་ནི་གཅིག་ཀྱང་མཐོང་རྒྱུ་མི་འདུག་ཅིང་། ད་ལོ་མེད་པ་ག་རེ་བྱས་པ་ཡིན་ན་སྙམ་པ་བྱུང་ཡང་སྐད་ཆ་དྲིས་ས་ཞིག་མ་རགས།

དེ་ལས་ཀྱང་མཚོ་ནང་དུ་ཆུ་རྐྱལ་རྒྱག་མཁན་འགའ་ཤས་འདུག་ན་དེ་དག་མཐོང་དུས་དེ་ལས་ཀྱང་ངའི་སེམས་ནང་མི་བདེ་བའི་ཚོར་སྣང་ཟབ་མོ་ཞིག་སྦྱིན། དེ་ནི་གཅིག་བྱས་ན་ང་རང་ཆུང་དུས་མི་ཚེའི་འཚར་ལོངས་བྱུང་སའི་ཁོར་ཡུག་གི་ཁྱད་པ་ཡིན་སྲིད་པ་རེད། ང་འཚར་ལོངས་བྱུང་སའི་བོད་ལྟ་བུར་ཆ་མཚོན་ན་གནས་མཚོ་ཙམ་དུ་མ་ཟད། ཆུ་མིག་ཙམ་ལའང་བཙོག་པ་མི་བཟོ་བའི་གོམས་གཤིས་བཟང་པོ་ཞིག་ཡོད་པ་རེད། གལ་སྲིད་གནས་མཚོ་ནས་སྦྱིན་རླབས་ལེན་དགོས་པའི་དབང་དུ་བཏང་ན་སྣོད་གཙང་མའི་ཁ་བཅོད་ཀྱིས་བཅུས་པ་ལས་ལག་པ་ཙམ་ཡང་ཆུ་མིག་ནང་ལ་རེག་མི་དགོས་པའི་དང་དོན་བྱེད་ལ། གལ་སྲིད་ཆུ་མིག་བཙོག་པ་ཆགས་ན་ཀླུའི་གནོད་པ་ཡོང་དྭོགས་སོགས་ཀྱི་དོགས་གཟོན་བྱེད།

ལྷག་དོན་བོད་ལྟ་བུ་ལོ་ངོ་བརྒྱ་ཕྲག་མང་པོ་དུས་ནས་རང་བཞིན་གྱིས་ཁོར་ཡུག་ལ་གཅེས་སྐྱོང་བྱེད་པའི་གོམས་སྲོལ་བཟང་པོ་ཞིག་ཡོད་པ་ད་གཟོད་གཞི་ནས་རྟོགས་ལ། སྐབས་དེ་དུས་ཁོར་ཡུག་སྲུང་སྐྱོབ་ཅེས་པའི་མིང་མ་རྟགས་པ་མ་གཏོགས་བོད་མིས་སྔ་དུས་ནས་ལག་ལེན་བསྟར་བཞིན་པའི་གནས་སྟངས་ཤིག་ཏུ་གྱུར་འདུག་སྙམ། གནས་རི་དང་། ལྷ་མཚོ། ཤིང་ནགས། ས་རྐོ་རྡོ་རྔོག་བྱས་ན་ཆར་ཆུ་དུས་སུ་མི་འབབ་པ་དང་། ལོ་ལེགས་མི་འབྱུང་བ། ལུང་པར་བཀྲ་མི་ཤིས་པའི་རྐྱེན་ངན་གོད་ཆག་སོགས་ཡོང་གི་རེད་ཅེས་བརྗོད་སྲོལ་ཡོད་པ་རེད་ལ། ཤིང་ནགས་གཅོད་བྲེག་སོགས་གང་ཐུབ་སྤང་བླངས་ཀྱི་ལག་ལེན་བསྟར་གྱི་ཡོད་པ་རེད།

རྙིང་པ་དགོན་པའི་ར་བའི་ནང་ལ་ཕྱི་ལོ་ ༡༩༥༣ ལོའི་ ཟླ་ ༡ ཚེས་ ༥ ཉིན་མོར་མཚོ་པདྨ་ཅན་ལ་ཧི་མ་ཅལ་མངའ་སྡེ་གཞུང་གིས་༸རྒྱལ་བ་རིན་པོ་ཆེ་དང་། པཎ་ཆེན་རིན་པོ་ཆེ་རྣམ་གཉིས་གནས་གཟིགས་ལ་གདན་འདྲེན་ཞུས་དོན་ལྟར་ཕེབས་ནས་བྱང་ཆུབ་ལྗོན་ཤིང་བཙུགས་གནང་མཛད་པ་དང་། ལྗོན་ཤིང་བཙུགས་ནས་ལོ་ངོ་ ༦༡ ཙམ་ཕྱིན་འདུག་ཅིང་ལོ་འདབ་ཧ་ཅང་རྒྱས་འདུག་ཅིང་། ལྗོན་ཤིང་དེ་ཉིད་མཇལ་བ་དང་། བོད་མི་རིགས་ལ་༸རྒྱལ་པཎ་རྣམ་གཉིས་བཀའ་དྲིན་བླ་ན་མེད་པ་ཡིན་པ་དྲན་ནས་རང་དབང་མེད་པའི་མིག་ཆུ་ཤོར་སོང་།

དེ་ནི་ཕྱི་ཉིན་ཞོགས་པ་སྔ་པོ་ལངས་ཏེ་མཚོ་པདྨ་ཅན་གྱི་རི་རྩེའི་བྲག་ཕུག་ནི་སློབ་དཔོན་ཆེན་པོ་གུ་རུ་པདྨ་འབྱུང་གནས་སྒྲུབ་མཚམས་ལ་བཞུགས་གནས་དང་། དེའི་འཁྲིས་ལ་ལྷ་ལྕམ་མན་དྷ་ར་བའི་སྒྲུབ་ཕུག་ཀྱང་ཡོད་པ་དེ་མཇལ་བར་ཕྱིན། རི་བོ་རྩེ་ལ་འགྲོ་དགོས་འདུག་ཅིང་ལམ་ཁ་ཡག་པོ་འདུག །གུ་རུའི་སྒྲུབ་ཕུག་མ་སླེབས་ཙམ་ལ་རི་སྟེང་ལ་མཚོ་ཆུང་ཡིད་དུ་འོང་བ་ཞིག་ཀྱང་འདུག་པས་ཕྱི་རོལ་པའི་རྩ་ཆེན་ཡིན་རབས་བཤད་སྐད།

དེ་ནས་ཡར་ཙམ་ལ་སྒྲུབ་ཕུག་མཇལ་རྒྱུ་འདུག་ཅིང་། དེ་ཉིན་གནམ་གཤིས་ཧ་ཅང་བཟང་ལ། ཁོར་ཡུག་ཀྱང་ཧ་ཅང་བཀོད་ལེགས་ཡིད་དུ་འོང་བ་ཞིག་ཏུ་སྣང་། གུ་རུའི་སྒྲུབ་ཕུག་ཆེན་མོ་དང་། གུ་རུའི་གསང་ཕུག །གུ་རུའི་ཞབས་རྗེས་བྲག །གུ་རུའི་སྒྲུབ་སྡེ་ལྷ་ཁང་བཅས་བཞི་ཙམ་མཇལ་རྒྱུ་འདུག །གཡས་གཡོན་ཤིང་སྡོང་སྟེང་ལ་རླུང་རྟ་ཧ་ཅང་མང་པོ་བཏགས་འདུག་ཅིང་། བོད་ཀྱི་ས་ཞིག་ལ་སླེབས་པ་ལྟ་བུ་སྣང་བ་སྟེར་འོང་གི་འདུག་ལ། དེ་དག་མཐོང་དུས་སེམས་ནང་སྤྲོ་སྣང་ཞིག་རང་བཞིན་མེད་པ་སྐྱེ་འོང་གི །དེར་གུ་རུའི་སྒྲུབ་སྡེ་ལྷ་ཁང་ལ་ཇོ་མོ་འགའ་ཤས་ཚོགས་ཚོགས་ནས་ཆོས་སྒྲ་ལྷང་ངེར་ཚོགས་བཞིན་མཆིས། གཡས་གཡོན་ལ་ཇོ་མོའི་སྒྲུབ་ཁང་ཡང་འགའ་ཤས་མཆིས། དེ་དག་གནས་མཇལ་ཚར་བ་དང་ཕྱིར་དྷ་ས་ལོག་ཡོང་བ་ཡིན་ནོ། །

སྨྲས་པ།

གནས་མཆོག་གྱུར་པདྨ་མཚོ་ཅན།།
དུས་དེ་རིང་མཇལ་བའི་སྐལ་བཟང་།།
བདག་ལུས་སེམས་གཉིས་ཀྱི་སྟེང་ལ།།
ད་དགའ་བ་ཚད་མེད་སྐྱེས་བྱུང་།།

ད་མི་ལུས་རིན་ཆེན་འདི་ཉིད།།
ད་འཁོར་བ་འདི་ལ་ཇི་གནས།།
ད་དགེ་སྒྲུབ་ལས་ལ་བརྩོན་པའི།།
ད་སྨོན་ལམ་སྙིང་ནས་འདེབས་སོ།།