བོད་ཀྱི་སྐད་དང་ཡི་གེའི་ཉམ་རྒུད།

མི་ཉག་སྐལ་བཟང་།
 
དང་པོ། དཀོན་མཆོག་དཔང་དུ་བཙུགས་ཏེ་དྲང་བདེན་དང་གནས་ལུགས་ལ་གཞི་འཛིན་ནས་བོད་ཀྱི་སྐད་དང་ཡི་གེ་ལ་རྒྱུས་མངའ་དང་དུང་བ་ཡོད་པའི་མི་ཆུང་ཆུང་ཞིག་གིས་སྡུག་སྐད་ཆེན་པོ་མ་རྒྱག་ཐབས་མེད་རེད།  བོད་ཀྱི་སྐད་དང་ཡི་གེ་གཉིས་པོ་ནི་རྒྱ་མཚོ་དང་རྒྱ་མཚོའི་ནང་གི་ཉ་མོ་བཞིན་གཅིག་ལ་གཅིག་སྦྲེལ་དང་། ནང་པའི་ཆོས་ལུགས་ལ་དད་པ་ཡོད་མཁན་ཞིག་གིས་བལྟས་ན་ཡང་རྟེན་འབྱུང་གི་འབྲེལ་བ་ཡོད་པ་ལྟ་བུ་ཞིག་ཀྱང་འདོད། རྒྱ་མཚོ་སྐམ་ནུས་ན་ཉ་མོ་འཆི་མི་ནུས་པ་མེད་ཅེས་པའི་དཔེ་ལྟར། གལ་ཏེ་ནམ་ཞིག་བོད་ཀྱི་སྐད་དང་ཡི་གེ་གཉིས་བརླག་པའི་ཉེན་ཁའི་མཚམས་ཐིག་ལས་བརྒལ་པ་ཡིན་ན་ང་ཚོ་ནི་སྐམ་སོང་བའི་རྒྱ་མཚོ་དང་། ཤི་སོང་བའི་ཉ་མོ་ལྟ་བུ་ཞིག་གནས་རྒྱུ་རེད། དེ་ལྟ་བུའི་སྐད་དང་ཡི་གེ་མེད་པའི་མི་རིགས་ཤིག་འཚོ་གནས་ཐུབ་པའི་དབང་དུ་བཏང་ན་ཡང་ཡོད་ཚད་སྟོང་ལྷང་ངེར་དང་། གཟུངས་གཞུག་མེད་པའི་སྐུ་འདྲ་དང་ཡང་ན་ལྷ་ཁང་སྟོང་པ་ལྟ་བུ་ཞིག་ཆགས་རྒྱུ་ཉག་ཅིག་རེད།

གཉིས་པ། བོད་གཞིས་བྱེས་གཉིས་སུ་ཁ་གྱེས་བའི་ཉིན་དེ་ནས་བཟུང་བོད་ཀྱི་སྐད་དང་ཡི་གེ་གཉིས་ཉམ་ཆགས་སུ་འགྲོ་བར་འགོ་བཙུགས་པ་ནི་མི་མཐོང་ལག་ཟིན་ཡིན་པ་དང་།སྡུག་ཐོག་སྡུག་བརྩེགས་བྱུང་སྟེ་ད་ཆར་ཕམ་ཁའི་གྱོང་གུན་ཆེ་ཤོས་ནི་བོད་ཀྱི་སྐད་དང་ཡི་གེ་ཉམས་ཆགས་སུ་འགྲོ་བཞིན་པ་དེ་རེད། མི་རིགས་ཤིག་འཚོ་གནས་དགོས་པ་དང་།འགྲོ་བ་མིའི་རིན་ཐང་འཇལ་དགོས་ན་སྐད་དང་ཡི་གེ་གཉིས་ནི་མི་རིགས་ཀྱི་སྲོག་རྩ་དང་། རང་རང་གི་ཚེ་སྲོག་ངོ་མ་ཡང་སྐད་དང་ཡི་གེ་རེད། མི་རིགས་ཤིག་ལ་སྲོག་རྩ་དགོས་དང་མི་དགོས་ནི་མི་རིགས་ག་གེ་མོར་རག་ལས་པ་དང་། རང་རང་སོ་སོར་ཚེ་སྲོག་དགོས་དང་མི་དགོས་ནི་མི་ཆེ་གེ་མོར་རག་ལུས་པ་ཞིག་རེད། རང་གིས་ཚེ་སྲོག་ལ་གཅེས་སྤྲས་བྱེད་པ་བཞིན་སྐད་དང་ཡི་གེར་ཆེ་མཐོང་དང་། མ་ཉམས་རྒྱུན་འཛིན་བྱེད་ཐུབ་པ་བྱ་རྒྱུ་ནི་རང་སྲོག་རང་གིས་གཅེས་པ་དང་མཚུངས། དེ་ལས་བཟློག་པ་ནི་རང་གི་སྐེ་ལ་རང་གིས་འཆི་ཞགས་བསྐོན་པ་ཡིན།

གསུམ་པ། ཡག་རྟགས་ཡིན་ནམ་སྡུག་རྟགས་ཡིན་ངས་མི་ཤེས། དེང་སང་བོད་ཕྱི་ནང་གཉིས་ཀར་བོད་ཀྱི་སྐད་དང་ཡི་གེར་ཤི་འཐམ་རོ་འཐམ་བྱེད་མཁན་ནི་བོད་སྐད་སྨྲ་ཤེས་ཤིང་། བོད་ཡིག་ལ་བྱང་ཆུབ་པའི་མཁས་པ་རེ་ཟུང་དང་། བླ་སྤྲུལ་དགེ་བཤེས་རེ་ཟུང་གི་འོས་འགན་ལྟ་བུ་ཞིག་ཆགས་ཡོད། འོན་ཀྱང་མི་རྣམས་མི་འགྱུར་དུས་ནི་འགྱུར་དང་།ཡང་ན། དུས་ནི་མི་འགྱུར་མི་རྣམས་འགྱུར་བའི་འགྱུར་བ་ཞིག་གིས་བོད་ཀྱི་སྐད་དང་ཡི་གེར་བྱང་ཆུབ་པའི་མཁས་པའི་དཔའ་བོ་དཔའ་མོ་ནི་ཇེ་ཉུང་ནས་ཇེ་ཉུང་རེད། བོད་ཀྱི་སྐད་དང་ཡི་གེ་བརླག་པའི་ཉེན་ཁ་ནི་ཇེ་ཆེ་ནས་ཇེ་ཆེ་རེད། ཁ་བཤད་ཆུ་ཡི་ལྦུ་བ་དང་། ལག་ལེན་གསེར་གྱི་ཐིགས་པ་འབབ་ཚུགས་སུ་ང་ཚོ་གཟི་བརྗིད་ཁོང་སྟོང་གི་མི་རིགས་ཤིག་ཆགས་པ་ཡིན་ན་མི་ཚེ་གང་བོར་འགྱོད་པ་སྐྱེས་ཀྱང་ཅི་ལ་ཕན། གྲ་སྒྲིག་སྡུག་ས་ནས་བྱེད་དེ་རེ་བ་བཟང་ས་ནས་བརྒྱབ་ཆོག་མོད། འོན་ཀྱང་ང་ཚོས་ཡོད་ཚད་གཞན་དབང་སྟབས་བསྟུན་དང་། གཞན་རྟེན་སྲིན་འབུའི་འཚོ་བ་དང་ཁ་བྲལ་ཐབས་མེད་པས་ངན་ཁག་ངན་དཀྲིགས་ཀྱིས་དུས་འདའ་བ་བྱེད་པ་ནི་མིག་ལྡན་གཡང་གཟར་དུ་མཆོང་བའི་ངང་ཚུལ་རེད།

བཞི་པ། བརྡ་འཕྲིན་གྱི་དུས་རབས་འདི་ནི་བོད་མི་རིགས་ལ་ཆ་མཚོན་ན་གཞིས་བྱེས་གཉིས་ཀྱི་བར་ན་འབྲེལ་ལམ་གྱི་ཟམ་པ་ལྟ་བུ་ཞིག་ཆགས་ཡོད། འབྲེལ་ལམ་དེ་བརྒྱུད་ནས་གནས་ཚུལ་ཇེ་མང་དང་ཁ་བརྡ་ཇེ་མང་བའི་རྒྱབ་མདུན་ལ་བསམས་ན་གཞིས་པ་གཞིས་ན་སྐྱིད་པ་དང་། བྱེས་པ་བྱེས་ན་སྐྱིད་ཀྱང་ལྷོ་བྱང་ཀོ་རི་ཡ་ལྟ་བུར་མི་འགྱུར་བའི་སྨོན་ལམ་རྒྱག་གིན་ཡོད། གཞིས་པ་ཚོས་བོད་སྐད་དང་བོད་ཡིག་སྤྱོད་པ་ལས་རྒྱ་ཡིག་འབྲི་བ་དང་། རྒྱ་སྐད་རྒྱག་པ་ཡིན་ན་རང་ཉིད་མིའི་མཆོག་གོ་སྙམ་པ་དང་། བྱེས་པ་ཚོས་དབྱིན་ཡིག་འབྲི་ཤེས་པ་དང་། དབྱིན་སྐད་རྒྱག་ཤེས་པ་ནི་རང་ཉིད་ཟླ་བའི་གྲོང་ཁྱེར་ནང་བསྡད་དེ་ལྷོ་འཛམ་བུ་གླིང་ལ་རྒྱང་བལྟ་བྱེད་བཞིན་ཡོད་སྙམ་སྟེ་བོད་ཀྱི་སྐད་དང་ཡི་གེར་སྣང་ཆུང་དང་ཁྱད་གསོ་བྱེད་བཞིན་པ་ནི་རྟ་ལས་བབས་ཏེ་བོང་བུ་བཞོན་འདོད་པ་རང་རེད།

ལྔ་པ། ད་དུང་བོད་མི་མི་ཉུང་བ་ཞིག་གི་རང་གི་མིང་ཙམ་ཡང་བོད་ཡིག་ནང་འབྲི་མི་ཤེས་པ་དང་། བོད་སྐད་གཙང་མ་ཞིག་ཀྱང་རྒྱག་མི་ཤེས་པར་མིང་བྱང་རྫིག་པོ་ཞིག་གི་འོག་ཏུ་རང་ཉིད་འཐབ་རྩོད་པ་དང་། ཆབ་སྲིད་པ་ཡིན་ཞེས་ས་མཆོང་གནམ་མཆོང་བྱས་རུང་གང་གི་ཆེད་དུ་མཆོང་གིན་ཡོད་པ་ནི་ཤིན་ཏུ་ལྐོག་གྱུར་ཙམ་རེད། ང་ཚོས་བོད་ཀྱི་སྐད་དང་ཡི་གེའི་ཆེད་དུ་ས་མཆོང་གནམ་མཆོང་དགོས་ལ། གལ་ཏེ་ང་ཚོས་བོད་ཀྱི་སྐད་དང་ཡི་གེའི་ཆེད་དུ་ས་མཆོང་གནམ་མཆོང་བྱ་འདོད་མེད་ན། རང་སྐྱོང་གི་མིང་ཙམ་ལས་མེད་ན་ཡང་རྒྱའི་ལག་འོག་ཏུ་བསྡད་ན་དེ་བས་དགའ། ཆབ་སྲིད་པ་དང་འཐབ་རྩོད་པ། མཁས་པ་དག་དང་དཔོན་པོ་ཚོ། མདོར་ན། རང་ཉིད་རྩམ་པ་བཟའ་མཁན་དང་རྩམ་པར་དགའ་མཁན་ཡོད་དོ་ཅོག་གིས་བོད་ཀྱི་སྐད་དང་ཡི་གེའི་ཆེད་དུ་འཕག་འཚག་རྒྱག་རོགས། བོད་ཀྱི་སྐད་དང་ཡི་གེའི་གནས་བབ་དང་། ཁོར་ཡུག་་བཅས་ནི་དཀྱིལ་ཤར་ཡུལ་གྲུའི་གཡུལ་ས་ལྟ་བུར་གནས་ཡོད་པས་བོད་ཀྱི་སྐད་དང་ཡི་གེའི་ཚེ་སྲོག་སྐྱོབ་རོགས།།