སྤོབས་པ་མཐའ་ཡས།
ང་བོད་ལ་དགའ། ང་བོད་ལ་དུང་། གཞན་གྱི་སྤྱི་ཚོགས་དང་འགྲོགས་ཀྱིན་འགྲོགས་ཀྱིན། གཞན་གྱི་རིག་གནས་འདི་སྦྱོང་གིན་སྦྱོང་གིན། གཞན་གྱི་བསམ་བློ་ལ་བསྟུན་གྱིན་བསྟུན་གྱིན། ང་རང་གི་སྤྱི་ཚོགས་ལ་ཡིད་ཆེས་ཇེ་བརྟན་རེད།
ང་ནི་རང་ཡུལ་བོད་ཀྱི་ནས་རྩམ་ཞིབ་མོ་དང་། འབྲི་མར་སེར་པོའི་རོ་བཅུད་ལ་བརྟེན་ནས་འཚར་ལོངས་བྱུང་བའི་བོད་མི་ཞིག་ཡིན། ངའི་གྲོགས་པོ་བརྒྱ་ཆ་དགུ་བཅུ་བོད་མི་ཡིན། ངས་གཞན་སྐད་ཤེས་རུང་རང་སྐད་བརྗེད་མེད། ངས་གཞན་ཡུལ་འགྲིམ་རུང་རང་ཡུལ་དྲན་ཡོད།
ཁྲོ་གཏུམ།
ཡུལ་སྐོར་ལ་འགྲོ་བ་ནི་ལས་སླ་བོ་ཞིག་མ་ཡིན་ལ་ཡུལ་སྐོར་ཁྲོད་དུ་ཟིན་བྲིས་འབྲི་བ་དེ་ལས་ཀྱང་དཀའ་ངལ་ཆེ་བ་ཞིག་རེད་འདུག
༢༠༡༤།༠༥།༡༢ཉིན་གྱི་ཕྱི་དྲོ་རྡ་ས་དང་གྱེས་པ།
ཕྱི་དྲོ་དེར་གྲོགས་པོ་ཚེ་དབང་རིག་འཛིན་གྱིས་ཆར་བའི་འབབ་ཞོལ་ལ་མ་འཛེམ་པར་ང་རང་སྐྱེལ་མ་བྱས་སོང་། རྡ་ཞོལ་གྱི་རླངས་སྣུམ་ས་ཚིགས་སུ་སྐར་མ་ ༣༠ ལྷག་རིང་Snow rigoion ཅེས་པའི་འགྲུལ་སྐྱེལ་རླངས་འཁོར་ལ་སྒུག་ཞིང་། འགྲུལ་འཁོར་ནང་གི་རྐུབ་རྟགས་ཨང་༢༡ ལ་བསྡད་ནས་ཕྱོགས་བསྐྱོད་ཀྱི་མགོ་འཛུགས་བྱས་པ་ཡིན།