ཀླུ་སྨྱོན། —མཚན་མོ་ཞིག་ལ་ཁེར་རྐྱང་དུ་འཆམ་འཆམ་ལ་ཕྱིན་དུས་བླངས་པའི་འདྲ་པར། མུན་ཁྲོད་ལམ་འགྲམ་གློག་སྒྲོན་དག ། བར་དོའི་ཁམས་ཀྱི་མཆོད་མེ་བཞིན། ། ཁེར་རྐྱང་རྒྱུ་བའི་རྣམ་ཤེས་ཚོར། ། སེམས་གསོ་ཙམ་ཞིག་ཅིས་ཀྱང་ཡིན། །
གྲིབ་གཟུགས་ནས།
འཇིག་རྟེན་གྱི་འཁོར་སྐྱོད་ལ་གཤོག་པ་ཐོགས་ཤིང༌།
བསམ་བློའི་ངོ་གདོང་གློག་རླབས་ནས་ཐུག་དུས།
གྲྭ་རྐྱང་ཚོ།
མི་ལོ་ཉིས་སྟོང་སྔོན་གྱི་འགུལ་སྐྱོད་དང༌།
གོམ་འགྲོས་ལ་བྱང་ནས་ཡོད།
འཚོ་བ་ལ་རྔུལ་ཁྲག་གི་རི་མོ་ཕབ་ཅིང༌།
ངལ་རྩོལ་གྱི་གོམ་ཁ་ས་ནག་སྟེང་ནས་བཙུགས་དུས།
གྲྭ་རྐྱང་ཚོ།
ལྷུང་འོང་བའི་ཤིང་འབྲས་ཁྱོར་བས་བཟེད་ཅིང༌།
ཆེས་རྒྱང་རིང་གི་འཇིག་རྟེན་ཞིག་ལ་མགོ་བོ་བསྔས།
ཀླུ་སྨྱོན།
—མཛའ་བོའི་དུས་ཆེན་ལ་ཕུལ་བའི་ཤིས་ཚིག
སྟག་ཤར་གཞོན་པའི་བྲང་གི་ཤ་རྒོད་དང་། །
སྨན་ཆུང་བུ་མོའི་བྲང་གི་མྱོས་བུམ་གཉིས། །
འཇིག་རྟེན་སྣང་བས་གཅིག་ཏུ་འདྲེས་པ་ཡི། །
མཛའ་བོའི་དུས་ཆེན་བསྐལ་པའི་མཐར་ཡང་དྲན། །
གསེར་གྱི་རྣ་རྒྱན་ཐག་པ་མི་འཆད་ཅིང་། །
དངུལ་དཀར་མཛུབ་དཀྲིས་ས་རུ་མི་ལྷུང་བར། །
འདོད་ལྡན་ཕོ་མོའི་འདོམ་གྱི་སྦྲང་རྩི་ཡི། །
རོ་མངར་སྐྱེ་བོ་ཀུན་གྱིས་མྱོང་བར་ཤོག །
གློག་སྒྲོན་དམར་པོའི་འོད་སྣང་ཟ་ཟིའི་ངོགས། །
རྣམ་གྲོལ་གླིང་།བསོད་ནམས་ནོར་བུ།
ཕ་ས་ལྷ་ཡུལ་འདྲ་དེ་པགས་པ་བཤུས།།ཕ་རྒན་ཉི་མ་འདྲ་དེ་རྒྱང་ལ་བསྐྲད།།
ཕུ་ནུ་སྟག་གཟིག་འདྲ་དེ་དོང་ལ་བཙུད།།མ་འདུག་བོད་ཕྲུག་གཞོན་ནུ་ད་ལོངས་ཤིག།
རང་གི་རྩ་དོན་རང་གི་མི་རིགས་ཀྱིས།།མ་རྩོད་ཕན་ཆད་མི་རིགས་གཞན་ཞིག་ལ།།
རེ་ནས་སྐྱབས་པའི་ལོ་རྒྱུས་མ་མཆིས་ན།།ད་ཡང་མ་འོངས་སྐྱོབ་མཁན་ཨེ་ཡོང་སྙམ།།
མེ་དཔུང་།
ལུས་ཕུང་མེར་བསྲེགས་པར་རིན་ཐང་ཨེ་འདུག
བོད་མི་རིགས་གླེང་མཁན་ཞིག་གིས་ཚོར་ཤུགས་བོར་སོང་བ་ཨེ་ཡིན
དྲ་ཐོག་གི་སྨྱུག་འཛིན་པའི་སེམས་ཚོར་ཆེ་དྲག་པ་ཨེ་ཡིན
ང་ཚོས་བསམ་བློས་དཔྱད་པ་མ་འདང་བས་ཨེ་ཡིན
ཚེ་སྲོག་གི་འགྲོ་གྲོན་ལ་རིན་ཐང་མི་ལྡན་ནི་ཨེ་ཡིན
བསམ་བློ་ཅི་ཡང་མི་གཏོང་བར་ཁ་རྕོད་ཀྱིས་ཨེ་ཕན
སྙན་ངག་པ་ཡིན་ན་སྙན་ངག་བཞུར་རན་རེད་ལ
རྩོམ་པ་པོ་ཞིག་ཡིན་ན་རྩོམ་ཡིག་འབྲི་རན་རེད
ཚངས་སྲས
ཡ་གའི་ནཊ་ཀྱི་ལྗོན་ཤིང་རྩེ་ནས་ཁུ་བྱུག་གསུང་ལས་འདི་སྐད་ཐོས།།
རྟག་ཅིང་བརྟན་པའི་གཤིས་སུ་མ་གྲུབ་འདུ་བྱས་རྒྱུ་མའི་གར་དང་འདྲ།།
ལོངས་སྤྱོད་འབྱོར་བའི་ཕུན་ཚོཊ་རྒྱས་ཀྱང་སྤྲིན་རིམ་གློག་གི་ངང་ཚུལ་འཛིན།།
དུས་བཞིའི་མཛེས་སྡུག་རི་ལུང་ཁེབས་ཀྱང་ཟློས་གར་མཁན་པོའི་ཉམས་འགྱུར་བཞིན།།
ལྷན་འཛོམས་སྐྱིད་པའི་དགའ་སྟོན་དེ་ཡང་འབྲལ་བ་ལས་ཀྱི་ཆོས་ཉིད་ཟེར།།
ལྗང་མདོག་ལོ་མར་སེར་མདའ་ལྷུང་སྟེ་འཛིན་མར་ཁ་བ་བཞིན་དུ་འབབ།།
སྣུམ་ཞིང་བརྗིད་པའི་ནཊ་ཚལ་སྟུག་པོ་སྡུག་གིས་བཟད་པའི་སྐྲ་ལོ་གྱུར།།
དལ་འབབ་ཆུ་བོའི་བཞུར་སྒྲ་དེ་ཡང་ཟུངས་ཟད་འཆི་ཁའི་ཁ་ཆེམས་བཞིན།།
བསམ་གྱིན་བསམ་གྱིན་སྐྱོ་བ་འཕེལ་བའི་སྟོན་མཇུག་འདི་ལ་རེ་ཐག་ཆད།།
རྔ་བ་རྒྱལ་ཁམས་པ།
གནམ་དམག་གིས་མཁའ་དབྱིངས་བཀབ་ཅིང་།
རྐང་དམག་གིས་ས་གཞི་གཡོགས་པའི་དུས་དེ་ནས་བཟུང་།
མཐོ་སྒང་ན་དབུགས་ལྷེམ་ལྷེམ་དུ་འཚོ་བའི་གསོན་སྙིང་དྲོན་མོ་ཞིག
མི་འདོད་བཞིན་དུ། དབང་མེད་དུ། འདི་ལྟར་ཕྱོགས་གཉིས་སུ་གྱེས་དགོས་བྱུང་།
སྙིང་དེ་ནི་དཀྱུས་མའི་སྙིང་ཞིག་མ་ཡིན་པར།
ཤ་རུས་ཁྲག་རྒྱུད་ཀྱི་མགོ་ཁུངས་ཡོད་ཅིང་།
སྐད་ཡིག་རིག་གཞུང་གི་མ་ལག་འཛོམས་པའི་མི་རིགས་ཤིག་གི་སྙིང་རེད།
སྙིང་འདི་ཇི་ལྟར་ཁ་སོ་སོར་འཐོར་རུང་།
སྙིང་འདིའི་སྲོག་རྩ་ཨ་ཕའི་སྨྲ་བརྗོད་ཀྱི་ཁ་སྐད་གཙང་མ་དང་།
སྙིང་འདིའི་ཟུང་བཅུད་ཨ་མའི་སླད་མེད་ཀྱི་དད་འདུན་ཞིག་དང་།
ཤ་འདྲེས་ལྤགས་འདྲེས་སུ་གནས་ཡོད་པས།
ད་གདོད། ང་ཚོ་སྟེ་བོད་དང་། བོད་མི་རིགས།
བོད་རིགས་སྤུན་ཟླ། ཕུ་ནུ་མིང་སྲང་ཞེས།
སྐྱིད་སྡུག་མཉམ་མྱོང་གི་གནས་ལུགས་བཟློག་ཏུ་མེད་པ་དེ་བྱུང་བ་རེད།
ངའི་སྙིང་ནས་བརྩེ་བའི་ཕུ་ནུ་སྤུན་ཟླ་རྣམ་པ།
ངའི་སེམས་ནས་དུང་བའི་དཔའ་བོ་དཔའ་མོ་རྣམ་པ།
འདི་འདྲའི་དཀའ་སྡུག་ཅིག་ང་ཚོས་ཅིའི་ཕྱིར་མྱོང་དགོས་བྱུང་བ་རེད།
ཅིག་ཐེངས་ན། ང་ཚོས་ད་དུང་གནའ་བོའི་ཐང་བོད་དམག་འཁྲུགས་ཀྱི་ལས་འཕྲོ་ཞིག་སྐྱོང་བཞིན་པའམ།
ཡང་ན། མཇུག་བསྡུ་བཞིན་པ་ཞིག་ཀྱང་ཡིན་ལས་ཆེ།
ཌཱཀིམ།
སྲིན་མོ་ལ་ཕུལ།
ཁྲག་འབར་བཞིན། ཆུ་བོ་འབབ་པ་བཞིན།
མེ་བཞུར་ཟིན། གློག་ཞགས་འཁྱུག་པ་བཞིན།
བྱེ་བ་དུང་ཕྱུར་གྱི་ཕྲ་ཕུང་རྣམས་འབར་བཞིན།
ས་ཡ་མང་པོའི་རྣམ་ཤེས་ཀྱང་འབར་ཟིན།
ནམ་མཁའ་དམར་པོ་དེ།
འབར་བའི་མེ་ཡིན་ནམ། དམར་མོ་དེ།
བཞུར་བའི་ཁྲག་མིན་ནམ། དམར་པོ་དེ།
མེ་སཱོར་ཁྲིམས་ལུགས་སློབ་མ་བློ་བཟང་གྲགས་པ།
<གཅིག>
ཁ་བ་ཆེས་མཐུག་ས་ནས
གནམ་གཤིས་ཆེས་གྲང་ས་ནས
ལོ་རྒྱུས་ཀྱི་དྲག་རླུང་འཚུབ་ཞིང་།
ཐལ་རྡུལ་གྱིས་རི་ལུང་བཀང།
ད་དུང་ས་གཞི་ཡོངས་སུ་དམར་མདོག་ཏུ་བསྒྱུར་དུས།
ཁྲག་རྣག་གི་བང་རིམ་བརྟུལ་ཏེ།
བཟོད་སྒོམ་གྱི་སྒང་བུ་འཐོར་ནས།
མེ་ལྕེ་ཞིག་ཆེས་གྲང་ས་ནས་འབུད་དུ་ཐོན།
མེ་ལྕེ་དེ་ཆེས་ཚ་ས་རུ་འབར་རུ་སོང་།
འབའ་སྲས།
རྐང་རྗེས་ཆེན་པོ་བདག་ལ་མེད་གྱུར་ཀྱང་།།
ལམ་ཁ་ཆུང་ཆུང་ནམ་ཡང་མི་གཏོང་བར།།
ལུས་དང་གྲིབ་མ་འགྲོགས་པའི་ལམ་ཁ་འདི།།
མ་ཤི་བར་དུ་རང་ཉིད་བགྲོད་པའི་ལམ།།
ཨ་མས་མདུན་ལ་བགྲོད་པའི་ལམ་ཞིག་བསྟན།།
ཕ་ལོས་ལམ་འདི་བཟང་བའི་གཏམ་ཞིག་བཤད།།
ཕ་མ་གཉིས་ཀྱིས་བསྟན་པའི་ལམ་ཁ་འདི།།
དཀའ་སྡུག་ཅི་ཙམ་ཆེ་ཡང་བདག་གི་ལམ།།
སེར་ཤུལ་རིན་ཆེན་དོན་གྲུབ།
ཚག་་་ཚག་་་ཚག་་་མེ་ལྕེས་བཞུར་བའི་དཔའ་རྒོད་ཚོ་དེ་འདྲའི་སྙིང་སྟོབས་ལ།
ཀྱེ་མ་་་ཀྱེ་མ་་་་་ངའི་སྤུན་ཟླ་ཚོ་འདི་ལྟར་བསྲེགས་སོང་།
འབོད་དོ་་་འབོད་དོ་་་། དྲང་བདེན་ལ་དགའ་བའི་འཛམ་གླིང་མི་རིགས།
མེ་རླབས་འོག་གི་འབོད་སྒྲ་འདི་གསན་རོགས།
ཁྲི་ལོ་་་ཁྲི་ལོ་་་ཁྲི་ལོ་་་། ༸གོང་ས་མཆོག་སྐུ་ཚེ་ཁྲི་ལོར་ཤོག
བོད་ལ་་་་བོད་ལ་་་་་་། བོད་ལ་འགྲོ་བ་མིའི་ཐོབ་ཐང་དགོས།
ཕེབས་རོགས་་་་ཕེབས་རོགས་་་་་་་། ༸གོང་ས་མཆོག་བོད་དུ་ཕེབས་རོགས། མེ་ལྕེའི་ཀློང་གི་འབོད་ཚིག་འདི། དཔའ་རྒོད་ཚོའི་ཕུགས་རེ་ཁོ་ན། གངས་ཅན་པའི་བསམ་འདུན་ཁོ་ན།
སྦྲ་རིགས་ཐོགས་མེད།
ཨེ་ལེས་ཟན་གྲིར་གྱིས་དམག་སའི་ཀུན་སྤྱོད་དང་འོས་འགན་གླེང་བཞིན།
ས་ཆེན་པོ་ཁད་ཀྱིས་བསྡུས་ནས་རི་བོ་ཧི་མ་ལ་ཡའི་ཉེ་སར་གཏུགས་ཞིང་།
སོག་པོ་ཇིང་གིར་གྱིས་རྟ་དམག་དང་མདའ་གཞུའི་ཐབས་བྱུས་བཀོལ་ནས།
རི་བོ་ཧི་མ་ལ་ཡའི་སྟོད་བར་དུ་སླེབས་མྱོང་བ་མ་ཡིན་ནམ།
དེ་བཞིན། མོའོ་ཙེ་ཏུང་གིས་ཀྱང་ཁུང་ཙིའི་དམག་འཐབ་བསྟན་བཅོས་ཁུར་ནས།
ཡར་ཀླུང་གཙང་བོ་བརྒལ་ཞིང་ཧི་མ་ལ་ཡར་གཏུགས་སོང་བ་རེད་ཨང་།
ལོ་གསར་པའི་ཐོག་མའི་རྩོམ་ཕུད།
རྩེ་སྐར།
༡ ཁ་བ་དང་ལོ་གསར།
ད་ལོ་ཁ་བ་བབས་བྱུང༌།
མི་རྣམས་ཀྱིས་སྤྲོ་སྣང་ཞིག་རུམ་ནས་བྲེལ་བ་ཧ་ཅང་ཆེ་དུས།
ཡང་ན། མྱ་ངན་ཞིག་མིད་ནས་སེམས་པ་འཁྱག་ཤི་ཐེབས་དུས།
ཁ་བའང་བྲེལ་ཟང་ཟིང་མི་ཡུལ་ལ་ཁད་ཀྱིས་བབས།
ད་ལོའི་ཁ་བ་འབབ་སྟངས་དེ་ནམ་རྒྱུན་དང་མི་མཚུངས་པར།
རོ་ལ་རྔམ་པའི་བྱ་རྒོད་ཀྱི་ཚོགས་བཞིན་བསྙིལ་ཏེ།
དགུན་གཞུང་ན་ཙག་གིས་བསྡམས་པའི་ས་གཞི་དེ་དང༌།
མི་ཚོགས་ཀྱིས་གོས་ཧྲུལ་བཞིན་ཕུད་པའི་ལོ་རྙིང་དེར།
རྐང་བཅག་གིས་དག་ཁྲུས་ཡང་ཡང་མཛད་ཅིང༌།
(ངའི་སེམས་ཁོང་གི་ཉི་མ་རྗེ་མི་ལ་ཐོས་པ་དགའ་བ་ཁྱེད་མཁྱེན་ནོ།།)
འབྲོང་ངུར་ཆོས་རྗེ།
རྗེ་མི་ལའི་ཞབས་ལ་གསོལ་བ་འདེབས།།
གནས་ཆེན་པོ་རྡོར་གདན་ཉེ་འཁོར་ནས།།
དོན་རིག་རིག་མང་པོ་རིག་ཙ་ན།།
དེང་ཁྱེད་ཀྱི་རྣམ་ཐར་ལྷག་ཏུ་དྲན།།
གཞུང་ཆེན་པོ་སློབ་སྦྱོང་མང་དུ་བྱས།།
གཞུང་ཆུང་ཆུང་ཀྱང་ནི་མང་དུ་སྦྱངས།།
གཞུང་སྦྱོང་བཞིན་སྦྱོང་བཞིན་བདག་གི་སེམས།།
གཞུང་དོན་དང་མ་འདྲེས་སྔར་ལས་གྱོང་།།
གཅན་འོད་འབར།
༡་
མུན་ནག་གི་ལོ་ཟླ་རིང་མོ་དེའི་རྗེས་སུ།
བདག་པོ་མེད་པའི་ཕ་ས་མེ་རུ་འབར་སོང་ལ།
མནར་གཅོད་ཀྱི་ཉིན་མཚན་གྲངས་མེད་དེའི་གཞུགས་ནས།
ཁ་ཐག་རིང་བའི་མ་ཡུལ་ཡང་མེ་རུ་འབར་སོང།
མེ་རུ་འབར་སྟངས་དེ་ནི།
མཐོ་བ་གངས་རིའི་རྩེ་དང།
དམའ་བ་འཇམ་པོའི་སྤང་།
ཟབ་པ་དྭངས་མོའི་མཚོ་ལས་འབར་བྱུང།
ངའི་སྙུག་རྩེ་ན། ནམ་ཡིན་ན་ཡང་ངུས་ནས་མཚམས་མི་འཇོག་མཁན་ཞིག་ཡོད་པ་དེ་བོད་མིའི་མགོ་ཐོག་གི་གནམ་སྔོན་པོ་དེ་རེད། ངའི་སྙུག་རྩེ་ན། སྐད་ཅིག་ཐང་ཅིག་རེ་རེ་བཞིན་སྐམ་རྙིད་དང་རིད་པར་འགྱུར་བཞིན་པ་དེ་བོད་མིའི་རྐང་འོག་གི་ས་གཞི་ལེབ་མོ་དེ་རེད། ངའི་སྙུག་རྩེ་ན། ནམ་ནམ་ཞར་ཞར་ཡལ་རྒྱུ་མེད་པའི་རོ་དྲི་ཞིག་ཁྱབ་བཞིན་པ་དེ་བོད་མིས་རྔུབ་བཞིན་པའི་བོད་ཀྱི་མཁའ་རླུང་དེ་རེད། ངའི་སྙུག་རྩེ་ན། ཆད་པ་མེད་པར་ངུ་འབོད་གསེང་མཐོར་སྒྲོགས་ཀྱང་ཉན་མཁན་གྱི་རྣ་གཤོག་མེད་པ་དེ་བོད་མིའི་ངུ་སྐད་རེད། ངའི་སྙུག་རྩེ་ན། འདི་ཕྱི་གཉིས་མིན་གྱི་བར་དོ་མ་གཏོགས་བདེན་པ་ཞུ་ས་དང་རེ་བ་རྒྱག་ས་མེད་པ་དེ་ལས་ངན་བོད་པ་རྣམས་རེད། ངའི་སྙུག་རྩེ་ན། ཁྲག་དང་མིག་ཆུ་སྡུག་བསྔལ་གསུམ་ངན་པ་སུམ་འཛོམས་ཡིན། ངའི་སྙུག་རྩེ་ན། བོད་ཀྱི་སྣོད་བཅུད་ཀྱི་བཀོད་པའི་ཁྲི་ཐོག་ན་བདེ་དགའ་ལོངས་སྤྱོད་དང་ཚེ་བསོད་སྙན་གྲགས་རྒྱས་པའི་གད་པོ་ལྷང་ལྷང་དགོད་བཞིན་པ་དེ་རྒྱ་གུང་ཁྲན་ཏང་ཡིན། ངའི་སྙུག་རྩེ་ན།…
བསམ་གླིང་ཚེ་རིང་ལྷ་མོ།
གསེར་དངུལ་ནོར་གྱིས་འཇིག་རྟེན་བཀང་ན་ཡང་།།
ཁུགས་པར་དཀའ་བའི་སྐུ་སྲོག་རིན་པོ་ཆེ།།
བདེན་པ་དམ་པའི་ལམ་ཆེན་གསལ་དགོས་ཀྱང་།།
རིན་ཆེན་སྐུ་སྲོག་མེ་རུ་མ་སྒྲོན་རོགས།།
ས་ཡ་དྲུག་གི་ལས་དབང་ཐབས་སྐྱོ་ཡང་།།
མེ་རུ་ཐིམ་པའི་གཏམ་གྱིས་བཟོད་དཀའ་ན།།
དངོས་སུ་གཏོང་བར་བྱེད་པ་ག་ལ་ཞིག །
རིན་ཆེན་སྐུ་སྲོག་མེ་རུ་མ་སྒྲོན་རོགས།།
ཀླུ་སྨྱོན་ཧེ་རུ་ཀ
ན་ནིང་།
གནམ་སྔོན་པོའི་གྲུ་ཟུར་གང་མང་ཞིག་ཏུ་གསར་བརྗེའི་ཁ་གཡང་བསྒྲགས་ཤིང་།
ས་ཆེན་པོའི་སྒང་གཤོང་སྣ་ཚོགས་ཤིག་ཏུ་དམངས་གཙོའི་མེ་ལྕེ་འབར་སོང་།
ན་ནིང་།
སྒེར་གཅོད་ཀྱི་སྐྱེ་བོ་གང་མང་ཞིག་དམྱལ་བའི་འཕྲང་ལ་བརྫངས་ཤིང་།
རླབས་ཆེན་གྱི་སྣེ་འདྲེན་དུ་མ་ཞིག་རང་དབང་གི་སྲིད་ཁྲིར་བཀོད་སོང་།
ན་ནིང་།
མེ་སྒྱོགས་ཀྱི་དུད་ཞགས་ཀྱིས་གཉའ་གནོན་དང་གདུག་རྩུབ་ལ་ཡ་ཡན་སྤྲད་ཅིང་།
མི་དམངས་ཀྱི་ཁྲག་དྲོན་གྱིས་ཞི་བདེ་དང་དམངས་གཙོ་ཡི་སྐྱ་རེངས་བསུས་སོང་།
རྡོ་རྗེ་ཚེ་རིང་།
…. ཕ་ཡུལ་ཀྱི་ལོ་སར་ལ་གྱེས་སུ་སྟབས་པ།
རྡོར་གདན་གྱི་ཁ་རླངས་དཀར་པོ་དེ་རྔུབ་པར་བསམ་བཞིན་དུ།
རྡོར་གདན་ནས་ཚོར་ཤེས་འཁྱགས་པ་མང་དུ་འཐུང་དགོས་བྱུང་།
ཡིད་ཀྱི་སྐྱོ་བ་དག་གིས་ཀྱང་རང་ཉིད་ཀྱི་མིད་པ་འགག་ཅིང་རྣ་ཁུང་དུ་ཚ་སྦྲིད་བརྒྱབ།
སྔོན་གྱི་ཚེ་ན འདི་ག་ནས་འོད་ཀྱི་མིག་ཟུང་འཐོར་བར་བཤད་ལ།
སྐྱེས་ཆེན་དག་གི་ཞབས་ཀྱིས་བཅགས་པའི་ས་ལེབ་མོ་འདིའང་འོད་ཀྱིས་ཁེངས་པར་གླེང་།
གངས་དུར་ཁྲོད།
བཀྲ་བྷེས་རང་ལུས་མེ་ལ་བསྲེགས་ཏེ་ཁ་ནས་བོད་ཀྱི་རང་དབང་འབོད།།
བློ་བཟང་སེང་གེར་ཁ་ཤོམས་ཆེའང་བཀྲ་བྷེ་ཁ་ནས་བརླག་སོང་བས།།
ཡོ་རོབ་གླིང་གི་མཁས་པ་རེ་འགས་ཡ་མཚན་མགོ་བོ་གཡུག་བཞིན་གདའ།།
པེ་ཅིང་མཁར་གྱི་མཛངས་མ་འོད་ཟེར་མིག་ཆུའི་རླབས་ཀྱིས་ཁུར་ནས་ཐལ།།
བཀྲ་བྷེ་སྔ་ཕྱི་གཉིས་ལ་བོར་ཡང་བཙན་བྱོལ་མི་མང་ནག་འཐོམས་མེར།།
ཅི་ཡང་མ་བྱུང་རི་བོང་རྡོ་བརྗུས་བློ་སེང་ཁོག་ན་གྲིམ་རིག་གེར།།
མཁས་པ་མཁས་མས་དྲི་བ་མོད་ཀྱང་ནོངས་ལ་རེག་པས་ན་ཟུག་གིས།།
རྫུན་མའི་རྣམ་འགྱུར་སྟོན་ལ་མཁས་པ་བོད་ཀྱི་སྲིད་སྐྱོང་བློ་སེང་རེད།།
གངས་ཅན་བོད་ནས་བོད་ཀྱི་ཆེད་དུ་རང་ལུས་མེ་རུ་སྦར་ནའང་།།
འགོ་ཁྲིད་གསར་པས་མེ་སྦར་གྲངས་ཙམ་བློ་ལ་ངེས་རྒྱུར་མ་འབད་དེ།།
སྙིང་སྡུག་བདེ་སྐྱིད་ཡར་མར་ཁྲིད་པའི་ཡོ་རོབ་ཨ་རིའི་མཛད་པ་ལ།།
ད་ནི་རྟེན་ས་གང་ཡང་མེད་པ་འོད་ཟེར་མཛངས་མས་བྲིས་ནས་འདུག།