གཅན་འོད་འབར།
༡་
མུན་ནག་གི་ལོ་ཟླ་རིང་མོ་དེའི་རྗེས་སུ།
བདག་པོ་མེད་པའི་ཕ་ས་མེ་རུ་འབར་སོང་ལ།
མནར་གཅོད་ཀྱི་ཉིན་མཚན་གྲངས་མེད་དེའི་གཞུགས་ནས།
ཁ་ཐག་རིང་བའི་མ་ཡུལ་ཡང་མེ་རུ་འབར་སོང།
མེ་རུ་འབར་སྟངས་དེ་ནི།
མཐོ་བ་གངས་རིའི་རྩེ་དང།
དམའ་བ་འཇམ་པོའི་སྤང་།
ཟབ་པ་དྭངས་མོའི་མཚོ་ལས་འབར་བྱུང།
གངས་རིའི་དཔའ་རྒོད།
སོག་ཤོད་དར་རྒྱས།
གནམ་ས་རལ་བའི་འབོད་སྒྲའི་འོག་ན།།
རང་དབང་མེད་པའི་ཚོར་བ་རྣོན་པོས།།
བདེན་རྒྱབ་དཔུང་ལངས་ཁས་སུ་འཆེ་བའི།།
སྐྱེ་བོ་རྣམས་ཀྱི་རྣ་བ་དཀྲོགས་སོང།།
རྩ་ཆེའི་ཤ་ཁྲག་ཕུང་པོའི་ལུས་ལ།།
དམར་པོ་མེ་ཡི་ལྭ་བ་བསྒྲོན་ནས།།
མཁྲེགས་འཛིན་ཅན་གྱི་དམར་པོའི་གཞུང་ལ།།
དྲང་བདེན་སྐྱོང་བའི་གོ་བརྡ་སྤྲད་སོང།།
གངས་རིའི་དཔའ་རྒོད་སུམ་བཅུ།
ནམ་མཁའ།༢༩/༣/༢༠༡༢ལ་ཡོ་རུབ་ནས།
མཚོན་གྱིས་བསྣུན་ཅིང་མི་ཆོད་སེམས་པ་ལ།།
ཐབས་ཤེས་ཟུང་གིས་འཐབ་མོ་བྱས་བའི་འབྲས།།
མཚན་དཔེ་རི་མོ་ཞབས་ཀྱི་འཁོར་ལོ་ཡིས།།
དཔའ་བོ་འཇམ་དཔལ་ལ་སོགས་རྟག་ཏུ་སྐྱོང་།།
སྐྱེ་འཆི་གང་ཡིན་འགྲོ་འོང་གྲོགས་མེད་ཀྱང་།།
གཞན་སྡུག་སྐྱོབ་ལ་རང་ལུས་སྦྱིན་པའི་ཚེ།།
སྡུག་ལྡན་གདོང་དམར་ཚོགས་ཀྱི་མིག་ཆུ་ཡིས།།
མི་མཐོང་ཕྱི་མའི་ཡུལ་དུ་སྐྱེལ་མ་མཛོད།།
མེ་ལྕེ་གསོན་པོ།
(སློབ་གྲོགས་དམ་པ་རྟའུ་འཇམ་དཔལ་ཡེ་ཤེས་མཆོག་གཙོ་བྱས་རྒྱལ་གཅེས་དཔའ་བོ་དཔའ་མོ་རྣམས་ལ་ཆེད་དུ་གུས་ཕུལ།)
བོད་པ་ཚང་གིས།
ཚེ་སྲོག་མེ་རུ་འབར་ཐལ།།
ཐལ་བ་ས་ལ་ཟག་ཐལ།།
ས་ཆེན་ཁད་ཀྱིས་ངུས་ཐལ།།
མིག་ཆུ་ཁྲག་ལས་མེད་ཐལ།།
མེ་དཔུང་ཤུགས་ཀྱིས་འཕྱུར་ཐལ།།
ལང་ཚོའི་ནང་ཕྱི་འབར་ཐལ།།
མཆོངས་རྒྱུག་གོམ་པ་ཆད་ཐལ།།
གློ་བུར་ས་ལ་འགྱེལ་ཐལ།།
མིག་དམར་མཐོང་བྱུང་ངམ།
མེ་ཏོག་དཀར་པོ།
༡ ཀེ་ལ་ཤ་ཡི་ཡུལ་དུ་མ་སྐྱེས་ཀྱང་། །
ཁ་བ་ཅན་གྱི་ཁྲག་རྒྱུན་བཞུར་བའི་བུ།།
རྒྱལ་སྤྱི་གཉིད་ལས་དཀྲོག་ཆེད་གོམ་བགྲོད་མཁན། །
ང་ཚོའི་མིག་དམར་མཐོང་མཁན་ཨ་ཡོད་དམ། །
ཀ་རྩོམ་རྒྱ་ནག་བསྲེགས་པའི་མེ་དཔུང་།
འབའ་སྲས།
ཀ་དག་ཆོས་ལ་སྤྱོད་པའི་གདོང་དམར་བོད།།
ཁ་རོགས་མ་འདུག་ཚང་མ་ཡར་ལ་ལོངས།།
ག་ས་གང་ནས་སྲོག་གི་མེ་ལྕེ་སྒྲོན།།
ང་ཚོ་ཚང་མ་དུས་གཅིག་ཉིན་གཅིག་འབར།།
དཔལ་རྒོད་ལགས
བློ་བཟང་གྲགས་པ། ཚ་བསྲེགས་ཀྱི་མེ་ལྕེ་དེས ཁྱེད་ཀྱི་ཤ་རུས་བཟས་ཀྱང ཁྱེད་ཀྱིས་མི་རིགས་ལ་བཅངས་བའི་བརྕེ་སེམས་དང་ལ་རྒྱ་ནི དུས་ནང་ཡང་དམར་རྗེན་དུ་གནས ཁྱེད་འདི་ལྟར་བཞུད་སོང་མོད ཁྱེད་ཀྱི་བཞུད་ལམ་དུ ད་དུང་ཡང་ཚེ་སྲོག་གྲངས་མེད་ཀྱིས་རྗེས་འདེབས་ཞུ་ངེས་ལ ཁྱེད་ཀྱི་དགོས་འདོད་དེ ང་ཚོས་ཅིས་ཀྱང་དགུང་ལ་འཕྱར་ནས མི་རིགས་འདིའི་འཐབ་རྩོད་མུ་མཐུད་བྱེད་ངེས་ཡིན ཁྱེད་ཀྱི་སྣང་གཟུགས་དེ་ དུས་ད་ནས་འཇིག་རྟེན་ནས་ཁ་བྲལ་ཀྱང ཁྱེད་ཀྱི་རྣམ་ཤེས་ནི་དུས་ནམ་ཡང་ཡལ་མི་སྲིད ཁྱེད་སོང་དང…
ཁྱོད་ཀྱི་དཔའ་ཉམས་མིག་གིས་མཐོང་ཡོད། ཁྱོད་ཀྱི་དཔའ་སྐད་རྣ་ཡིས་གོ་ཡོད།
གཡུ་དྲུག་དཀར། རྡ་ས།
ནངས་མོ་དེར་ང་རང་ཕ་ཡུལ་དང་ཧ་ཅང་རྒྱང་ཐག་རིང་བའི་ས་མཐའ་འདིར། རང་དོན་ཆུང་ཆུང་ཞིག་གི་སླད་དུ་རྒྱུག་བཞིན་ཡོད། འདུར་བཞིན་ཡོད། གློ་བུར་དུ། གློ་ཁུག་ལས་ཁ་པར་གྱི་སྒྲ་དབྱངས་སྐྱོ་ལྷང་ངེ་བ་དེ་འདར་བཞིན་འགུལ་གྱིན་གྲགས་བྱུང་ལ། ཁ་པར་ལག་ཏུ་བླངས་ཏེ་ཁ་ཕྱེས་དུས། ཁྱེད་ཀྱིས་ཕ་ཡུལ་ནས་རང་ལུས་མེ་རུ་སྦར་ཏེ། འབར་བཞིན་འགད་ཀྱིན་གཞན་དོན་ཆེན་པོ་ཞིག་གི་ཆེད་དུ་གཤེགས་སོང་ཟེར།
དེ་མ་ཐག་ཏུ་རང་གི་རྣ་བ་གཉིས་ལ་ཡིད་མི་ཆེས་ཤིང་། རློམ་མི་ཐུབ་པ་ཞིག་ཏུ་སྣང་ཡང་། ཉེ་སྔོན་ཕ་ཡུལ་དུ་འབྱོར་དུས་འབར་ཆོག་ཆོག་ཏུ་སྣང་བའི་ཕ་ཡུལ་དེ་སླར་ཡང་ཡིད་ལ་བསམ་ཞིང་། སེམས་ལ་དྲན་ན། ཁ་པར་ནང་གི་སྐད་ཆ་དེ་ཡིས་སྙིང་འདར་དུ་འཇུག་གི སེམས་འཚབ་ཏུ་འཇུག་གི
དེ་ལས་མང་བ་། “ཁྱོད་ཀྱི་དཔའ་ཉམས་མིག་གིས་མཐོང་ཡོད། ཁྱོད་ཀྱི་དཔའ་སྐད་རྣ་ཡིས་གོ་ཡོད།” »
ཁ་ལས་རྒུད་པའི་ལོ་རྒྱུས་སྟོང་གི་སྟོབས།
རང་རྟོན།
རྒྱལ་ཚོགས་གཉིད་ལས་དཀྲོགས་པའི་གཏམ་བཟང་དེ་མཐོང་རྗེས་བྲིས།
གཞན་སྐུལ་དྲི་མས་མ་སྦགས་ཁེར་ཚུགས་བརྟན།།
རང་བློ་གཙང་མས་རང་ནུས་ཡོད་ཚད་སྤྲུགས།།
བོད་པ་ཚང་གི་བུ་རབས་ཚ་རྒྱུད་སླད།།
རྒྱལ་ཚོགས་སྒོ་ཁར་མ་བོས་མགྲོན་བཞིན་བཞུགས།།
ཆུ་ལ་རོལ་ནས་འཚོ་བཞིན་ཟླ་གཅིག་འགོར།།
དུས་ཚོད་བདུན་བརྒྱ་ཉི་ཤུ་དེ་བཞིན་འདས།།
གྲང་རླུང་ངར་མས་ཉིན་མཚན་གཉིས་ལ་གཙེས།།
ལྟོགས་སྐོམ་ན་ཟུག་དེ་དང་དེ་བཞིན་མྱངས།།
མེ་བཤད་ནོར་བུ་མེ་འབར།
སོག་རྫོང་བཀྲ་ཤིས་རྒྱལ་པོ།
མེ་སོགས་རང་དབང་ཐོབ་པའི་བླ་མ་དང་།།
མེ་འབར་རལ་གྲི་ཐོགས་པའི་ཤེས་རབ་ལྷ།།
མེ་སྤུངས་ཁྲོད་ན་བཞུགས་པའི་ཡི་དམ་ཚོགས།།
མེ་ཡི་རིན་ཐང་གླེང་ལ་གྲོགས་དན་མཛོད།།
མེ་འདི་དང་པོ་མེ་ཟླུམ་དབང་པོས་བསྐྱེད།།
མེ་འདིས་གྲང་རེག་འཇོམས་ཤིང་མུན་པ་སེལ།།
མེ་འདི་གཅན་གཟན་གཏུམ་པོར་རྒོལ་ཕྱིར་སོགས་།།
མེ་འདི་མི་ལ་མེད་ཐབས་མེད་པར་གྱུར།།
འདྲ་མཉམ་ཡིན་ས་མ་རེད།།
རང་རྟོན།
ཟས་བཅད་གནང་ནས་ཉིན་༢༨འགོར་བར་བྲིས།
ཤ་མེད་རུས་པར་ཐུག་ཀྱང་།།
རྒྱུ་མ་སྒལ་ངོར་འབྱར་ཡང་།།
ཉམ་ཆུང་མི་ཞིག་ཡིན་ན།།
བྷན་(Ban Ki Moon)གྱིས་མཐོང་ས་མ་རེད།།
ཉི་མ་ནུབ་དུས།
རྨེ་རུ།
ཉི་མ་ནུབ་འགྲོ་བའི་དུས་ཚིགས་དེར།
ང་ལ་བརྗོད་མི་ཤེས་པའི།
ཚོར་བ་ཞིག་འབྱིན་གྱིན་འདུག
ང་རང་གི་ལུས་སེམས་ངལ་དུབ་ཀྱིས་གནོན་གྱིན་འདུག
ལོ་འདི།
ཐེ་བོ་ཤེས་རབ་རྒྱ་མཚོ།
(ད་ནངས་བསྐྱར་དུ་རེབ་གོང་དང་རྔ་བ་ནས་རང་ལུས་མེ་བསྲེགས་གནང་བ་གོ་རྗེས་བྲིས།)
ཨོཾ་མ་ཎི་པདྨེ་ཧཱུཾ།
མེ་དམར་པོ་གདུག་རྩུབ་ཀྱིས་འུར་འུར་མཆེད་པའི་ལོ་འདི།།
སེམས་སྐྱ་མོ་སྡུག་བསྔལ་གྱིས་ཡང་ཡང་གཟིར་བའི་ལོ་འདི།།
སྤུན་ན་ཟླ་བློ་སྟོབས་ཀྱིས་ལམ་ལམ་འབར་བའི་ལོ་འདི།།
བོད་ཁ་བ་བླ་སྲོག་གིས་ཡོམ་ཡོམ་སྒུལ་བའི་ལོ་འདི།།
ལུས་ལྷུ་དྲུག་པྲ་ཚིལ་ལྟར་ཚིར་ཚིར་སྒྲོན་པའི་ལོ་འདི།།
སེམས་བསམ་པ་ཆུ་ཁོལ་ལྟར་ལྷོག་ལྷོག་གདུ་བའི་ལོ་འདི།།
མིག་མཆི་མ་དྲག་ཆར་ལྟར་ཤག་ཤག་འབབ་པའི་ལོ་འདི།།
ཞེ་འཁོན་འཛིན་གློག་ཞགས་ལྟར་འཁྱུག་འཁྱུག་གཡོ་བའི་ལོ་འདི།།
དཔལ་གྱི་ལྷ་མོ།
རོང་བོ་དགེ་འདུན་ལྷུན་གྲུབ།
ཨ་མདོ་བྱམས་པའི་བྲིས་པའི་སྒྲོལ་སྐུ་ཞིག་ལ་མཇལ་རྗེས།
མཚར་བའི་ངོ་གདོང་དུད་པའི་ཉམས་ཀྱིས།།
སུ་ཞིག་འཛིན་པའི་ཟུར་མདའ་འཕེན་མཁན།།
དཔལ་གྱིས་དགེ་བ་དབྱངས་ཀྱི་བུ་མོ།།
གང་ལ་བཙུགས་པའི་འོད་དེ་རྣོ་བ།།
ཡིད་ལ་བརྐོས་པའི་ལྡེབས་རིས་ངོས་སུ།།
ཨུཏྤལ་ཞལ་ཁ་བག་ཙམ་གྲོལ་བའི།།
ཚེ་རབས་སྔོན་གྱི་བསགས་སྦྱངས་སད་མ།།
སྐྱེ་རྒུའི་གཙུག་ནོར་ཁྱེད་ལས་གང་ཡིན།།
སྐྱབས་རྗེ་ཤིང་བཟའ་ཚང་ལ་ཕུལ་བའི་གུས་ཕྱག
འབའ་སྲས།
གངས་ཅན་མདོ་སྨད་ཡུལ་གྱི་ཤཀྱའི་ཏོག །
ནང་རིག་བསྟན་པ་འཛིན་པའི་རྒྱལ་བའི་སྲས།།
བློས་གཏོང་ཐུགས་རེ་ཟབ་པའི་སེམས་དཔའ་ཆེ།།
སྐྱབས་རྗེ་ཤིང་བཟའ་ཀུན་ཏུ་རྒྱལ་གྱུར་ཅིག །
གུས་ཕྱག་མགོ་བོས་བཏེགས་པའི་ཁྲི་ཐོག་ནས།།
ཞབས་ཟུང་རྡོ་རྗེ་སྐྱིལ་ཀྲུང་འཁོར་ལོ་ཡིས།།
རིན་ཆེན་ཡོན་གྱི་དབང་ཐང་མ་བཟུང་བར།།
འགྲོ་བ་སྡུག་ལས་སྐྱོབ་མཛད་ཨེ་མ་རྨད།།
སྟོན་པ། ངའི་གཟན་སྣེ་མེ་རུ་འབར་སོང་།
ཀླུ་སྨྱོན།
སྟོན་པ། ངའི་གཟན་སྣེ་མེ་རུ་འབར་སོང་།
ཁྱོད་འཇིག་རྟེན་དུ་བཞུགས་དུས།
གྲྭ་པ་རེ་རེའི་གཟན་སྣེ་རུ་ཞི་བདེའི་རླུང་བུ་རེ་རེ་ལྡང་བཞིན་ཡོད་ལ།
བླ་མ་རེ་རེའི་སྤྱན་ལམ་ན་གྲྭ་ཤག་རེ་རེར་ཆོས་དབྱངས་འཕུར།
ཁྱོད་འཇིག་རྟེན་ན་བཞུགས་དུས།
གྲྭ་པ་ལ་གྲྭ་པའི་ཚོད་ཀྱི་སྡོམ་པ་ཡོད་ཅིང་།
གྲྭ་པ་ལ་སྤྱི་ཚོགས་སྟེང་ན་གུས་ཞབས་ཡོད།
གླིང་ཚ་མ་བུ་གསུམ་ལ་ཕུལ་བའི་ཤིས་ཚིག
འབའ་སྲས།
ཆེས་ཆེར་གུས་པར་འོས་པའི་གླིང་ཚ་མ་བུ་གསུམ།།
སྐྱེས་པ་བླ་ན་མཐོ་བའི་གླིང་ཚ་མ་བུ་གསུམ།།
འཐབ་རྩོད་གཟི་བརྗིད་ཆེ་བའི་གླིང་ཚ་མ་བུ་གསུམ།།
ནང་མི་དཔའ་བོ་གསུམ་པོ་ནམ་ཡང་བདག་གིས་གུས།།
གདོང་དམར་བོད་པ་ཚང་ལ་ཤ་ཁྲག་རུས་གསུམ་བསྟི།།
སྒང་བ་བོད་པ་ཚང་ལ་ལྷ་ཀླུ་གཉན་གསུམ་གནས།།
གངས་ཅན་ཁ་བ་རི་ལ་མི་འགྱུར་གངས་ཕྲུག་མང་།།
ཁ་ཚ་དགོས་གཏུགས་སྐབས་སུ་ཁྱེད་ཅག་མ་བུ་གསུམ།།
མི་འགྱུར་གངས་ཕྲུག་ལ་རྒྱབ་བཤད་བརྒྱབ་པ།
(མིག་ཆུའི་ཕེབས་སྐྱེལ་དེ་ཡོངས་སུ་གྲུབ་རྗེས།)
ཐོར་རྒོད་པ་སྤྱན་ཆབ།
དཔའ་བོའི་ཞལ་ཆེམས་བོར་བའི་དུས་ཚོད་དེར
མ་དང་སྲིང་མོའི་ཞལ་རས་ལས་རྔུལ་ཆུ་མང་པོ་ཁོལ་སོང
མིག་ཆུ་མང་པོ་བསྐྱིལ་བའི་ཞོགས་པ་དེར
ཡིད་སེམས་ཀྱི་ཟབ་ས་རུ་ན་ཟུག་མང་པོ་བསླངས་བྱུང
གོམ་པ་རེ་རེས་བདེན་པ་གཞལ་ཅིང
ངལ་དུབ་རེ་རེས་གནས་ལུགས་བཤད་དུས
ཁྱོད་ཅག་གི་ནམ་མཁའ་ན་ཉི་མ་ཞིག་ཡོད་ངེས
ཁྱོད་ཅག་གི་ས་གཞི་ན་རྐང་ལམ་ཕྲ་མོ་དེ་ཡོད་ངེས
ཐོལ་བྱུང་གི་གླུ།
མྱི་ལྟིག
མི་ཡིས་མི་ཤ་ཟ་ཞོར།། མི་དོན་གླེང་ཁུལ་བྱེད་པ།།
གཤིས་ཡོད་མེད་ཕྱོགས་ནས།། མིག་ཅིག་ཡོད་ན་ལོས་ཤེས།།
དྭ་ཕྲུག་ཅིག་གི་ངུ་འབོད།
(དཔའ་མོ་རིན་ཆེན་གྱི་བུ་ཆུང་བའི་ཚབ་ཏུ།)
འབའ་སྲས།
ཁ་སང་ནུས་པའི་ཨ་མའི་འོ་མ་ཞིམ་པོ།།
ད་ནས་བཟུང་སྟེ་མེད་ཅེས་མཆི་མ་གཏོང་ཞོར།།
གཅེན་མོས་ཆུ་འཁྱག་ཁྱོར་གང་བདག་ལ་བླུད་སོང་།།
དོན་གྱིས་ཨ་མ་ཐག་རིང་གང་དུ་ཆས་སམ།།
གཅེན་མོའི་མིག་ཆུ་བཞུར་བ་ཆད་པ་མི་འདུག །
གཅེན་པོ་ངུ་བའི་སྐད་ལ་བར་མཚམས་མ་ཆད།།
ང་ཡང་ངུ་བཞིན་ཨ་མའི་འོ་མར་སྒུག་ཡོད།།
དྲིན་ཆེན་མ་ལོ་མ་འགྱངས་ཕྱིར་ལ་ལོག་ཤོག །