སྐར་ཆེན། ཡོ་རོབ།
དེ་རིང་འདི་ནས་ཡར་བརྩིས་ན་དམིགས་བསལ་ཚོགས་ཆེན་ཚར་ནས་ཉིན་གྲངས་ཉི་ཤུ་ལྷག་འགྲོ་གི་ཡོད།འོན་ཀྱང་། ངེད་ཀྱི་རྩོམ་འདི་ཉིན་གྲངས་ཉི་ཤུའི་རྗེས་སུ་བྲིས་བ་ཡིན། ཉིན་གྲངས་ཉི་ཤུའི་དུས་ཡུན་ནི་ངེད་ཀྱིས་དམིགས་བསལ་ཚོགས་ཆེན་གྱི་སྐོར་ལ་བསམ་བློ་བཏང་བའི་དུས་ཡུན་རེད། དུས་ཡུན་འདིའི་ནང་ལ་ངེད་ཀྱིས་དམིགས་བསལ་ཚོགས་ཆེན་གྱི་སྐོར་དང་འབྲེལ་བའི་གཞུང་འབྲེལ་གསུང་བཤད་དང་གསུང་འཕྲིན། ཟིན་བྲིས། གཞན་མི་སྒེར་བའི་གསུང་བཤད་དང་ཚོགས་པ་སྒེར་བའི་གསུང་བཤད། ཕྱིརྒྱལ་བའི་ཚོད་དཔག་དང་རྩོམ་བྲིས། ད་དུང་གསར་འགོད་པ་ཚོའི་གསར་འགྱུར་སོགས་ཕྱོགས་ཡོངས་ཀྱི་གནས་སྟངས་ལ་བསྡུ་ལེན་བྱས། ཉན་ཤེས་བྱས། བསམ་བློ་བཏང་སྟེ་གཞི་ནས་རྨོངས་འཆར་ཆུང་ཆུང་ཞིག་འབྲི་ཁུལ་བྱས་བ་ཡིན།
ད་ལོའི་བོད་ནང་གི་ཛ་དྲག་བྱུང་རྐྱེན་དང་རྒྱལ་སྤྱིའི་གནས་བབ་བཅས་བོད་ཀྱི་རྩ་དོན་ཐོག་གོ་བསྡུར་བགྲོ་གླེང་ཞིབ་ལྷོད་ཅིག་གནང་ཆེད་བཙན་བྱོལ་བོད་མིའི་བཅའ་ཁྲིམས་དོན་ཚན་༥༩བའི་ཆ་རྐྱེན་འོག་དམིགས་བསལ་ཚོགས་ཆེན་ཞིག་འཚོགས་དགོས་ཀྱི་འདུག་ཞེས་ཕྱི་ལོ་༢༠༠༨ལོའི་ཟླ༩ཚེས་༡༡ཉིན་༧གོང་ས་མཆོག་གིས་སྐུ་སྒེར་ཡིག་ཚང་བརྒྱུད་སྤྱི་འཐུས་ལྷན་ཚོགས་ཀྱི་ཚོགས་གཙོ་བགྲེས་གཞོན་དང་བཀའ་ཤག་ལྷན་རྒྱས་ལ་བཀའ་གནང་། དུས་ཚོད་དེ་ནི་ཏག་ཏག་སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་དྲུག་པ་རྡ་རམ་ས་ལར་འཚོགས་བཞིན་པའི་སྐབས་རེད། གྲོས་ཚོགས་ཚོགས་དུས་དྲུག་པ་ཚོགས་བཞིན་པའི་སྐབས་དང་བསྟུན་བཙན་བྱོལ་བོད་གཞུང་བཀའ་ཤག་ནས་ཚོགས་དུས་ཉིན་བདུན་པ་ཕྱི་ལོ་ ༢༠༠༨ ཟླ་ ༩ ཚེས་ ༡༥ རེས་གཟའ་ཟླ་བ་ཉིན་བཙན་བྱོལ་བོད་མིའི་བཅའ་ཁྲིམས་དོན་ཚན་ ༥༩ འོག་དམིགས་བསལ་ཚོགས་ཆེན་ཐེངས་དང་པོ་ཞེས་པའི་ཚོགས་ཆེན་བསྡུ་བསྐོང་གནང་རྒྱུའི་ལས་རིམ་གྲོས་འཆར་ཞིག་སྤྱི་འཐུས་ཚོགས་འདུའི་སྟེང་ཕུལ། གྲོས་ཚོགས་ནང་བཀའ་སྤྱི་གཉིས་ནས་ཚོགས་འདུའི་ལས་རིམ་གྱི་གྲོས་འཆར་ལ་གོ་བསྡུར་སྦྱང་བཤད་གནང་བའི་མཐར་ཚོགས་འདུའི་མིང་ལ། བཙན་བྱོལ་བོད་མིའི་བཅའ་ཁྲིམས་དོན་ཚན་ང་དགུ་པའི་འོག་དམིགས་བསལ་ཚོགས་ཆེན་ཐེངས་དང་པོ་ཕྱི་ལོ་ ༢༠༠༨ ཅེས་དང་། ཚོགས་དུས། ཕྱི་ལོ་ ༢༠༠༨ ཟླ་ ༡༡ ཚེས་ ༡༧ རེས་གཟའ་ཟླ་བ་ནས་ཚེས་ ༢༢ སྤེན་པའི་བར་ཉིན་དྲུག་རིང་སྔ་དྲོ་ཆུ་ཚོད་ ༩་༣༠ ནས་ཕྱི་དྲོ་ཆུ་ཚོད་ ༥་༠༠ བར།ཚོགས་ཡུལ་རྡ་སྟེང་བོད་ཁྱིམ་སློབ་གྲྭ། གཞན་ཚོགས་མིའི་ཡོང་ཁུངས་དང་ཚོགས་མིའི་གྲངས་ཁྱོན་༥༦༠གཏན་འབེབས་དང་དེའི་ཁོངས་སུ་གཞུང་གི་ལས་ཀྱི་སྣེ་མོར་མི་གཏོགས་པའི་གཞུང་འབྲེལ་མིན་པའི་ཚོགས་པ་ཁག་བཅུའི་སྐུ་ཚབ་གྲངས་ཉི་ཤུ་དང་རྒྱུན་ལྡན་བོད་དོན་ཐོག་ཐུགས་ཁུར་དང་འགན་འཁུར་ལས་འགུལ་གནང་མཁན་རྒྱ་བལ་འབྲུག་གསུམ་དང་། དེ་མིན་ཕྱི་རྒྱལ་ཡུལ་གྲུ་ཁག་ནས་དང་བླངས་ཕེབས་མཁན་གྲངས་༤༨བཅས་འདུག ཚོགས་འདུའི་དབུ་འབྱེད་ཀྱི་མཛད་སྒོའི་སྟེང་དུ་། བཀའ་ཤག་གི་བཀའ་བློན་ཚོས་ཚོགས་ཆེན་གྱི་སྐོར་ལ་གསུང་བཤད་ཚིག་རྐྱང་གནང་གི་མིན་གསུངས་འདུག། ད་དུང་གཞུང་ཞབས་ཚོར་གཞུང་གི་སྲིད་བྱུས་དང་ལངས་ཕྱོགས་གླེང་སློང་མི་དགོས་པར་སོ་སོའི་ལྟ་ཚུལ་བཤད་དགོས་ཟེར། འདི་ཕྱི་གསལ་ནང་གསལ་གྱི་སྐད་ཆ་ཞིག་རེད་དམ་མ་རེད། གཞུང་ཞབས་ཚོས་ཚོགས་ཐོག་ཏུ་གཞུང་གི་སྲིད་ཇུས་དང་ལངས་ཕྱོགས་གླེང་མ་དགོས་བར་སོ་སོའི་ལྟ་ཚུལ་བཤད་ཆོག་ན་དམིགས་བསལ་ཚོགས་ཆེན་དབུ་མ་ཚུགས་པའི་སྔོན་ལ་གཞུང་ཞབས་ཚོར་དམིགས་བསལ་ཚོགས་ཆེན་དང་འབྲེལ་བའི་བཅར་འདྲི་བྱས་མི་ཆོག་པ་ཅི་རེད། ངེད་ཀྱི་རྨོངས་འཆར་ལྟར་ན། ཚོགས་ཆེན་ཐོག་ཏུ་གཞུང་གི་སྲིད་ཇུས་དང་ལྟ་བ་བཤད་མི་བཤད་དེ་སྐད་ཆ་གཞན་ཞིག་རེད། གལ་སྲིད་ད་རེས་དངོས་གནས་དྲང་གནས་༧གོང་ས་མཆོག་གི་ཐུགས་རེ་ནང་བཞིན་མང་ཚོགས་ཀྱི་བསམ་ཚུལ་བསྡུས་ཡོད་ན། ཚོགས་ཐོག་ཏུ་གཞུང་གི་སྲིད་ཇུས་དང་ལྟ་བ་གླེང་རྒྱུའི་གཞི་མེད། དེ་ལྟར་བྱུང་མེད་ན་ནི། ཚོགས་ཐོག་ཏུ་གཞུང་གི་སྲིད་ཇུས་དང་ལྟ་བ་མ་གླེང་རུང་ཚོགས་ཐོག་གི་སྐད་ཆ་དེ་གཞུང་གི་སྲིད་ཇུས་དང་ལྟ་བའི་སྣེ་ནས་འདུག་གི་རེད། ཕར་བཤད་ཚུར་བཤད་ཅི་ཞིག་བྱས་རུང་གཞུང་གི་དཀྱིལ་འཁོར་དེ་ལས་ཕར་བརྒལ་ཐུབ་ཀྱི་མ་རེད།
ཁྱོད་འགྲོ་དུས ང་ལ་མ་གསུངས་རོགས།
རས་པ ——- ནམ་ཞིག ཁྱེད་རང་བཞུད་འགྲོ་ཁའི་སྐད་ཅིག་མའི་དུས་དེར་ཡང༌། བདག་གི་སྣང་བ་གཙང་མ་འདི་ལ་ཕྱིར་ལྟོས་ཡང་ཡང་གནང་རོགས་ཞུ། སྲོད་ཁའི་རླུང་བུ་ཕྲ་མོས་སྐྲ་ལོ་སིལ་སིལ་སྒུལ་བའི་ངང་ཚུལ་དེ་ནི་ཞི་འཇམ་གྱི་སེམས་དོན་ལ་ཡང་ཡང་འགྲེལ་རོགས་ཞུ། ཁྱེད་རང་བཞུད་འགྲོ་དུས། དུས་སྐར་གྱི་ཆ་ཤས་རེ་རེས་བདག་ཉིད་ཀྱི་ཡོད་ཚད་སྟོང་བར་བཟོ་ངེས་ཀྱང༌། ནམ་མཁའི་དབྱིངས་ཀྱི་ཟླ་ཟེར་ཕྲ་མོ་ཞོགས་རྩྭའི་ཟིལ་ཐིགས་བཞིན་ཁྱོད་ཀྱི་མིག་མཐའ་རུ་མ་ལེན་རོགས། བདག་ཉིད་འགྲུལ་བཞུད་ལ་གོམས་པའི་རྐང་ལམ་ཕྲ་མོའི་ཟུར་དུ། ལྗོན་པའི་རྩེ་མོ་ནང་དུ་བཀུག་སྟེ་ང་ལ་བརྩི་བཀུར་མེད་པའི་བཟོ་ལྟ་རེ་སྟོན་སྲིད་ཀྱང༌། ཟླ་འོད་གཙང་བོར་བཞུར་བའི་གཅེས་སེམས་ཁོ་ནས།ངས་ཁྱེད་ཀྱི་སྐྲ་ལོ་ལས་མང་པའི་རང་ཉིད་ཀྱི་མདུན་ཕྱོགས་སུ་ཡང་ཡང་ལྟ་སྲིད། ཁྱེད་ཀྱི་གཅེས་ངག་ལས་མངོན་པའི་གཞས་དབྱངས་ཕྲ་མོའང་སྣང་བ་གཙང་མའི་བསིལ་གདུགས་སུ་འཁྱེར་ངེས་ལགས། ཁྱེད་རང་ཕེབས་རྗེས་སུ། བདག་གི་གཉིད་ལམ་ནི་སྟོང་ཁམས་ཆེན་པོ་ཞིག་ཏུ་ཅིས་ཀྱང་འགྱུར་བར་ཤོག…