འཆམ་ར་དྲི་མེད་རྒྱལ་མཚན།
—————–
༄། །མདུན་བསྐྱོད་དགོས་ན་བློས་གཏོང་གྱིས།།
༈ གཡག་ཀོ་རྙིངཔའིི་ཡོལ་ལའི་རྒྱབ་ནས་རུལ་སུངས་ཀྱི་དྲི་ངད་འཐུལ་དུས་རྟོགས་སད་པ་གང་ན་ཡོད།
ཁ་བྱང་གི་འགྲེལ།
༡། ཡར་རྒྱས་ཀྱི་ཚེ་སྲོག་ནི་སྐྱོན་འཚང་ཐེར་འདོན་ཡིན་ལ། སྐྱོན་འདོན་གྱི་ཕོད་པ་ནི་ལྷག་བསམ་ཀྱི་སྟོབས་ཤུགས་ལ་རག་ལས་ཡོད།
དེ་ཡང་རྒྱ་ཁྱོན་གྱི་ངོ་གདོང་ལ་མ་ལྟོས་པའི་ཚོགས་པ་ཞིག་དང་སྒྲིག་འཛུགས་གཅིག་གི་རྩ་བའི་དམིགས་ཡུལ་གྱི་འདེལ་ཁ་ནི། མེད་པ་ནས་ཡོད་པ་དང་། མཐུས་ཚང་ནས་འཕེལ་རྒྱས། གསར་གཏོད་ནས་སྲ་བརྟན་ཏེ། མདོར་ན་ཡོད་ཚད་ཀྱི་དམིགས་འདུན་མཐའ་ཐུག་ནིི་ཁེ་ཕན་བསྒྲུབ་རྒྱུར་གཏད་ཡོད། དེ་འདྲའི་འཛུགས་བསྐྲུན་གྱི་ཐོག་མའི་ཆ་རྐྱེན་ནི་ལྟོས་གྲུབ་ཀྱི་ལས་གཉེར་བའི་མི་སྣ་རེ་རེའི་ངོས་ནས་ཚད་བཟུང་མེད་པའི་བྱ་སྤྱོད་ལ་གལ་ཆེན་རང་བཞིན་ལྡན་པའི་འགན་ཁུར་དགོས་པ་དེ་རེད། ལྡོག་ཕྱོགས་ནས་བཤད་ན་སྤྱི་ཚོགས་ཚང་མའི་ནང་ལ་ནང་སྙིང་ནས་གསོན་ཤུགས་ཀྱི་ཟུང་ཁྲག་འཇིབ་པའི་ལྐོག་གཡེང་པ་དང་། ཕྱི་ཤུན་འཐུག་པའི་རུལ་སུངས་ཅན་ཡོང་དང་ཡོང་བཞིན་པ་ལྟར། དེ་འདྲའིམི་མངོན་པའི་ཚུལ་གྱི་གཏོར་བཅོམ་རིངས་ལུགས་པ་དེ་ཚོ་ཕམ་ཉེས་བཏང་བ་ལ། གོ་རིམ་ལྡན་པའི་རྒོལ་རྡུང་ནི་སྤྱི་ཚོགས་དེ་མཐོར་འདེགས་ལ་ཕྱོགས་པའི་བྱ་བ་རླབས་ཆེན་ཞིག་ཡིན།
ཞབས་རྗེས་ལགས།རུས་པ་ཅན་གྱི་སེམས་ཁོང་ནས་ནམ་ཡང་རྒྱལ་མི་སྲིད་པ་བྱི་ལའི་རྗུན་ཚིག་ཡིན་ལ་།ནམཡང་ཕམ་མི་སྲིད་པ་བདེན་པའི་རང་སྒྲ་ལགས།རུས་པ་ཅན་གྱི་མིག་དབང་གིས་དྲངས་འོངས་པ་གང་ཞིག་མི་སེར་དཀྱུས་མའི་མིག་ཆུ་རྡོག་གཅིག་ཡིན་ལ།བསུས་འོངས་པ་གང་ཞིག་གསུབ་དཀའ་བའི་རྨ་ཁ་དང་དྲན་ཤིང་ལགས།རུས་པ་ཅན་གྱི་སྨྲ་སྒོ་ནས་ང་རྒྱལ་གྱིས་སྨྲ་འདོད་པ་གང་ཞིག་རིགས་རྒྱུད་གཅིག་གི་བདེ་སྡུག་དང་ཁེ་དབང་ཡིན་ལ།སྤོབས་སེམས་ཀྱིས་བརྗོད་འདོད་པ་གང་ཞིག་གདུང་རྒྱུད་གཅིག་གི་རེ་དོགས་དང་སྙན་གྲགས་ལགས།རུས་པ་ཅན་གྱི་སྨྱུག་འོག་ནས་ཆུ་མིག་བཞིན་བརྡོལ་བྱུང་བ་རིགས་རུས་གཙང་མའི་འགོ་ཁུངས་དབོར་མི་ཉན་པའི་བདེན་ལུགས་དེ་ཡིན་ལ།འོད་ཐིག་བཞིན་ཕོག་ཡོང་བ་དེ་རིང་གི་གསར་འགྱུར་ནི་བདེན་པའི་བླ་སྲོག་བོར་བའི་རལ་གྲི་ངོ་གཉིས་ཤིག་ཡིན་ན་སང་ཉིན་གྱི་ལོ་རྒྱུས་ནི་ཕྱི་སྲོག་ནང་སྲོག་ཆད་པའི་བཤན་པའི་བེམ་རོ་ཞིག་ཏུ་མི་འགྱུར་གྲང་སྙམ་པའི་སེམས་ཁྲལ་དང་དེ་དག་ལས་ཐོབ་པའི་བསླབ་བྱ་དང་སྐུལ་ལྕག་ལགས།