(སུ་ཇ་སློབ་གྲའི་བོད་དགེ་བཀྲ་ཤིས་ཚེ་རིང་འདས་གྲོངས་སུ་ཕྱིན་པ་གོ་རྗེས།)
རིག་འབྱུང་དོན་གྲུབ་བཀྲ་ཤིས།
ནེའུ་ཡོག་ནས་སློབ་གྲར་མ་ལོག་སྔོན་ལ། རྒན་ལགས་ཁོང་འདས་གྲོངས་སུ་ཕྱིན་འདུག་ཟེར་བའི་གཏམ་དེ་ཐོས། གཏམ་དེ་བདེན་ནམ་བསམ་བཞིན་གྲོགས་པོ་འགར་སྐད་ཆ་དྲིས་བ་ཡིན། དེ་བདེན་པ་རེད་ཟེར་ནས་གྲོགས་པོའི་གློག་འཕྲིན་སླེབས་སོང་། ཉིན་འགའ་ལ་སེམས་འདི་སྐྱོ་བས་མནན། ངེད་ཀྱི་སེམས་པ་སྐྱོ་བས་གཟིར་དོན་ནི། རྒན་ཁོང་ཕ་ཡུལ་རྒྱབ་ཏུ་བསྐྱུར་བའི་གསར་འབྱོར་ཞིག་ཡིན། རྒན་ཁོང་སློབ་ཕྲུག་ལ་ཤ་ཚ་བྱེད་མཁན་ཞིག་ཡིན། ད་དུང་། རྒན་ཁོང་ལོ་ན་བཞི་བཅུར་སླེབས་ཡོད་མེད་ཙམ་གྱི་མཚམས་ན་ཡོད་། ད་། འདི་རུ་རྒན་ལགས་ཁོང་གི་སྐོར་ལ་ཚིག་འགའ་ཞུ་འདོད་སྐྱེས། འོན་ཀྱང་། ངེད་རང་རྒན་ལགས་ཁོང་ལ་ཆ་རྒྱུས་གཏིང་ཟབ་ཡོད་མཁན་དེ་འདྲ་མིན། ངེད་ནས་གང་བྲིས་བ་དེ་རྒན་ལགས་ཁོང་ལ་རྗེས་དྲན་གྱི་ཆ་ཤས་ཕྲ་མོ་ཙམ་ཡིན།
