རི་སྤྱང་ཁེར་འགྲོ

སྔོན་ཆད་ང་ཚོའི་ཁོར་ཡུག་ལ་དཀའ་ངལ་འཕྲད་སྟངས་དང་དེར་གདོང་ལེན་བྱེད་སྟངས་དང༌། དེ་རིང་གི་དུས་འདིར་ཁོར་ཡུག་ལ་ཉེན་ཁ་འབྱུང་ཚུལ་དང་དེ་ལ་གདོང་ལེན་བྱེད་སྟངས་གཉིས་ཇི་ལྟར་འདྲ་སྟེ་མི་འདྲའོ།
འདིར་བདག་གིས་དེང་དར་སོ་ཆེ་བའི་བརྗོད་གཞི་སའི་གོ་ལར་ཚ་ཆེན་འཕར་ནས་སྲིད་པའི་གངས་རི་ཞུ་བ་དང༌། རྒྱ་མཚོའི་རྦ་རླབས་འཁྱོམ་ནས་འཇིག་རྟེན་རྒུད་ཚུལ་སོགས་༢༠༡༢་ཞེས་བའི་གློག་བརྙན་ནང་གི་ཆག་སྒོ་དང་ཆ་འདྲ་བ་དག་གླེང་མི་སྤྲོ་བར། ས་ཁུལ་ཆུང་ཆུང་ཞིག་ནང་འབྱུང་བའི་དོན་དག་དང་ང་ཚོར་དེ་འདྲ་དོ་སྣང་མེད་པའི་ཁོར་ཡུག་གི་ན་ཚ་ཞིག་གླེང་བར་སེམས།

འཕྲུལ་ཆས་དང་བཟོ་ལས་ཤུགས་ཆེར་མ་དར་གོང༌། ང་ཚོས་ཁོར་ཡུག་ལ་བྱེད་སྟངས་དེ་བུང་བས་ཟེ་འབྲུ་ལེན་པ་དང་འདྲ་ལབ་ནའང་མི་ཆོག་པ་མེད་པ་འདྲ་ལ། སྐབས་དེར་ང་ཚོས་ཁོར་ཡུག་ལ་འཛིན་པའི་རྣམ་འགྱུར་དེའང་ཧམ་སེམས་ཆེན་པོ་མ་རེད་ལ། དེང་སང་ནང་བཞིན་ཁོར་ཡུག་ལ་བཤུ་གཤོག་དང་བཙན་གཡེམ་བྱེད་སྤྱད་ཀྱི་འཕྲུལ་ཆས་ཀྱི་མཐུན་རྐྱེན་ཡང་ང་ཚོར་ལྡན་མེད།
དཔེར་ན། ང་སྐྱེས་སའི་གྲོང་སྡེ་དེར་མཚོན་ན། སྔོན་ཆད་རྫ་ངོས་རི་ངོས་ཚང་མར་ནགས་ཀྱིས་ཁེངས་ཡོད་ལ། སྡོད་ཁང་གསར་རྒྱག་དང་ལབ་ཙེ་བསྟོད་པ། དར་ཤིང་བསློང་བ་སོགས་ཡིན་ན་ཡུལ་ལྷ་གཞི་བདག་གི་གནང་བ་ཐོབ་ཐོག་གྲོང་སྤྱིའི་མོས་མཐུན་ཡོད་ན་ཤིང་ནགས་བཅད་ཆོག་ལ། འབུད་ཤིང་དང་སླེ་བོ་བསླས་སྤྱད་ཀྱི་ལྕུག་ཕྲན་ཡང་སྒྲུག་ཆོག་གི་རེད། དེ་དུས་ལག་ཆ་ནི་སྟ་རེ་དང་སོག་ལེ། ཟོར་བ་ཙམ་མ་གཏོགས་མེད་ལ། ཤིང་ཆ་དང་འབུད་ཤིང༌། ལྕུག་ཕྲན་སོགས་བོང་དྲེལ་དང་མིས་རྒྱབ་ཏུ་འཁུར་ནས་སྐྱེལ་འདྲེན་བྱེད་ལ། བྱེད་སྟངས་དེ་སྦྲང་མས་མེ་ཏོག་གི་ཟེ་འབྲུ་ལེན་སྟངས་དང་འདྲ་སེ་ཡོད།
དེ་ནས་ཆིག་སྟོང་དགུ་བརྒྱ་བརྒྱད་ཅུ་དང་དགུ་ཅུའི་ནང་ཁོར་ཡུག་གི་གཤེད་མ་རྣམས་སླེབས་ནས། གློག་སྒུལ་ཟོག་ལེ་རང་འཁོར་མ་དེས་ཤིང་ནགས་ཚང་མ་སྐྲ་འབྲེག་འབྲེག་བྱས་ནས༌། ཤིང་གཏུན་རླངས་འཁོར་ཆེན་པོའི་ནང་གནམ་ལ་སྙོབ་པ་རེ་བརྩིགས་ནས་ནང་ལོགས་སུ་དབོར་འདྲེན་བྱས།

རི་ལུང་ཐང་གསུམ་ལ་ཚ་བ་འཕར་ཞིང་ཡུལ་གང་བོར་ཐན་པ་བྱུང་ནས། དུས་དུས་སུ་སྤྲིན་འཁྲིགས་པ་དང༌། དུས་དུས་སུ་འབྲུག་སྒྲ་སྒྲོག་པ། དུས་དུས་སུ་ཆར་བ་འབེབབ་པ་ཟེར་བ་སོགས་གནའ་གཏམ་འདྲ་ཞིག་ཏུ་གྱུར། ས་བཅུད་ཟུངས་འཛིན་གྱི་རྟེན་ཕུར་རྨང་ནས་ཕྱུང་ནས། ང་ཚོའི་ཕ་ཡུལ་གྱི་མི་ཚང་མ་ངུ་ན་མིག་ཆུ་མི་ཐོན་པ་ཞིག་བཟོས། མཚོ་བོད་མཐོ་སྒང་ནས་ཤིང་ནགས་བསྐྱར་གསོ་བྱེད་རྒྱུ་དཀའ་བ་འདི་ཚང་མར་གསལ་ཐང་ཐང་བཞིན།
ཕྱིས་སུ་རྒྱ་ནང་དུ་ཆུ་ལོག་རྒྱུག་པ་མཚོ་བོད་མཐོ་སྒང་གི་ཤིང་ནགས་གཅོད་འབྲེག་དང་གནག་ཕྱུགས་ཀྱིས་རྩ་ཟ་རྒྱུ་ཐལ་དྲག་པའི་རྐྱེན་རེད་ཟེར་ནས། ཞིང་ཁར་རྩ་འདེབས་སུ་བཅུག འབྲི་གཡག་དང་བཞོན་རྟ་སོགས་གནག་ཕྱུགས་གཟུགས་བོང་ཆེ་བའི་རིགས་ཉུང་དུ་འཕྲི།འབྲོག་པ་རྣམས་གདོད་མའི་ཕ་ས་འབྲོག་ཐང་ནས་དེད་དེ་གནའ་གོར་མོ་བྱེ་ཐང་སོགས་སུ་སྤྱུགས་ཤིང༌།ཞིང་བ་རྣམས་ཀྱི་ཕ་ནས་བུར་བརྒྱུད་པའི་འབྲུ་རིགས་འདེབས་ལས་རང་ཁ་རང་གསོའི་འཚོ་ལས་བོར་ནས་ཆ་རྒྱུས་མེད་པའི་གྲོང་ཁྱེར་དག་ཏུ་ཟ་ཁང་དང་ཨར་ལས་ཀྱི་གཡོག་ལས་ཙམ་ལ་བརྟེན་ནས་ཁྱིམ་ཁ་གསོ་ཐུ བ་ཙམ་ཡ་ང་བའི་སྐྱོ་གནས་སུ་བཙན་འདེད་བྱས།

དེ་ལས་མང་བ་། “རང་བྱུང་ཁོར་ཡུག་གི་ན་ཚ་ཞིག་གླེང་བ” »

རི་སྤྱང་ཁེར་འགྲོ

ཁོར་ཡུག་དང་སྲོག་ཆགས་ལ་ལྟ་ལྟངས

ཡང་། ཨིན་ཊི་ཡན་རྣམས་ཀྱིས་གནམ་ནི་འཇིག་རྟེན་སྲུང་བའི་ཕ་དང་ས་གཞི་ནི་ཚེ་སྲོག་སྦྱིན་པའི་ཨ་མར་བརྩིས་ལ། རི་དང་ཆུ་དང་། ལྗོན་ཤིང་དང་ནགས་ཚལ་སོགས་ན་ལྷ་གནས་གནས་བར་འདོད་ཅིང་དེ་རྣམས་ལ་བརྩི་་མཐོང་ཆེན་པོ་བྱེད། རི་སྐྱེས་སྲོག་ཆགས་དང་ཆུ་གནས་སྲོག་ཆགས།འདབ་ཆགས་ཁྲོད་ལ་ལ་ལྷ་ཡི་ཕོ་ཉ་དང་ལ་ལ་ལྷ་ཡི་འཁོར་རུ་བགྲང་། དཔེར་ན་བྱ་གླག་ནི་འདབས་ཆགས་ཀུན་ཀྱི་རྒྱལ་བོ། གཡེལ་བ་མེད་པའི་གནམ་ས་སྲུང་མཁན། མཁའ་དབྱིངས་མཐོན་པོ་ན་འཕུར་བའི་ཡ་མེད་རྒོད་པོ། དཔའ་དང་རྩལ་གྱི་་བདག་ཉིད་ཆེན་པོ། ཉི་མིའི་མིག་ཀོང་ལ་ཐད་ཀར་ལྟ་ཞིང་ཉི་མ་དང་སའི་གོ་ལའི་བར་བརྡ་འཕྲིན་སྐྱེལ་མཁན་གྱི་ལྷའི་ཕོ་ཉ་རུ་བཀུར་ནས་ཨིན་ཊི་ཡན་རྣམས་ཀྱི་ཕུགས་བསམ་མཚོན་བྱེད་དང་རེ་འདུན་བཅོལ་ཡུལ། དཔའ་ངར་སློང་བྱེད། ནད་གེགས་འཇོམས་བྱེད། དགྲའི་གནོད་པ་བཟློག་བྱེད་སོགས་ བྱེད།
བྱ་གླག་རྒོད་པོའི་སྒྲོ་ནི་སྒྲོ་ཀུན་གྱི་མཆོག་དང་བྱ་གླག་གི་རུས་པའི་གླིང་བུ་དང་སྲུང་རྟེན་སོགས་མཆོག་ཏུ་བརྩི། དེང་སང་ཡིན་ཡང་ཨིན་ཊི་ཡན་གྱི་ཁྱིམ་ཚང་ཞིག་ནང་བྱ་གླག་གི་སྤུ་སྒྲོ་ཐང་ལ་འདྲིལ་བ་ཡིན་ན་ཁྱིམ་གང་བོས་ཟས་བཟའ་བའང་རེ་ཞིག་སྐྱུར་ནས་ལམ་སེིང་རྒོད་པོའི་སྒྲོ་དེ་སླར་མཐོ་སར་བཞག་ནས་བརྩི་བཀུར་བྱེད། བྱ་གླག་གི་སྒྲོ་འདི་དཔའ་བོའི་སྐྱེས་སུ་འབུལ་བ་གཅིག་པུ་མ་ཡིན་པར། མི་རྩ་ཆེན་དང་གཞན་ཕན་གྱི་དགེ་ལས་སྒྲུབ་མཁན་བྱས་རྗེས་ཅན་ལའང་སྟེར་སྲོལ་འདུག ད་དུང་གླག་གི་སྒྲོ་ལས་གཞན་འདབ་ཆགས་གཞན་གྱི་སྤུ་སྒྲོ་ཡང་གཙུག་རྒྱན་དང་འཚམས་སྐྱེས་སུ་སྤྱོད་ལུགས་ཡོད་འདུག ཉེ་རབས་ཨ་རི་སྲིད་གཞུང་གིས་སྟོངས་ལ་ཉེ་བའི་བྱ་གླག་སྲུང་སྐྱོབ་ཀྱི་ཁྲིམས་བཅོས་པ་ནས་བཟུང་། ཨིན་ཊི་ཡན་གྱི་ལྷ་ཆོས་ཆོ་གའི་ཆེད་དུ་མ་གཏོགས་གླག་སྒྲོ་བེད་སྤྱོད་གཏོང་མི་ཆོག་ལ། དེ་ཡང་ཆོས་འབྲེལ་གྱི་ཆོ་གའི་ཆེད་གླག་སྒྲོ་ལག་ལེན་བྱེད་མཁན་ཡིན་ན་ཨིན་ཊི་ཡན་གྱི་མི་རྒྱུད་རྣལ་མ་ཡིན་པའི་ལམ་འཁྱེར་སྟོན་དགོས།

དེ་ལས་མང་བ་། “ཨིན་ཊི་ཡན་མི་རིགས་ཀྱི་སྐོར་ཕྲན་ཙམ་གླེང་བ་གཡུ་ཡི་རྣ་རྒྱན།(2)” »

རི་སྤྱང་ཁེར་འགྲོ

ཨ་མི་རི་ཀའི་གླིང་ཆེན་འདིའི་སྟེང་མི་རིགས་དཀར་པོ་དང་མི་རིགས་ནག་པོ་སོགས་མ་སླེབས་སྔོན་ས་འདིའི་ས་བདག་དང་གནས་འདིའི་གནས་བདག་ངོ་མ་ནི་དེང་སང་དབྱིན་སྐད་ནང་ཨིན་ཊི་ཡན་(རྒྱ་གར་བ་ཞེས་བའི་དོན། གྲུ་དཔོན་གླེན་རྒན་ཀ་ལམ་སྦི་སི་དང་ཁོའི་ལག་དམར་འཁོར་བཅས་༡༤༩༢་ལོར་ཨ་རི་གླིང་ཆེན་གྱི་རྐེད་མཚམས་མཚོ་གླིང་སྦ་ཧ་མ་སི་ཟེར་བར་འབྱོར་སྐབས་ཁོང་རྣམས་རྒྱ་གར་གྱི་ས་ཐོག་ཏུ་སླེབས་བར་རྨོངས་ནས་གནས་འདིའི་ཡུལ་མི་ཚོར་རྒྱ་གར་བ་ཞེས་ཁོང་གི་ཉིན་ཐོ་དང་བྲིས་འདུག)་ཞེས་འབོད་པའི་གདོད་མའི་མི་རིགས་ཤ་མདོག་སྨུག་པོ་ཅན་འདི་ཡིན་འདུག
མཁས་པ་མང་ཆེ་བས་མི་རིགས་འདི་ལོ་ངོ་སྟོང་ཕྲག་བཅུ་ཚན་གཅིག་གམ་ཡང་ན་བཅུ་ཕྲག་ཁ་ཤས་ཡར་སྔོན་ཞིག་ནས་ཤར་གླིང་ཨེ་ཞི་ཡའི་སོག་ཡུལ་བྱང་རྒྱུད་ཀྱི་འབྲོག་ཐང་སེ་སྦུར་རི་ཡ་ནས་མཆེད་པར་བཞེད་ལ། སྐབས་དེར་ཨ་རིའི་ནུབ་བྱང་གི་མཚམས་ཨ་ལ་སི་ཀ་དང་སོག་པོའི་བྱང་ཐང་གི་ཡུལ་སེ་སྦུར་རི་ཡའི་བར་དེང་སང་ནང་བཞིན་རྒྱ་མཚོས་བར་ཆོད་མེད་པར་སྐམ་སའམ་ཡང་ན་ཤིན་ཏུ་མཐུག་པའི་འཁྱག་རོམ་གྱིས་སྦྲེལ་ཡོད་པ་ཚན་རིག་དང་མཐུན་པའི་ཚོད་དཔག་བྱེད ། དུས་སྐབས་དེ་ཙམ་ཞིག་ལ་ཨིན་ཊི་ཡན་མི་རིགས་ཀྱང་ཁོང་ཚོའི་འཚོ་བའི་འཁར་རྟེན་གནག་ཕྱུགས་ཀྱི་རྗེས་འདེད་བྱེད་ཀྱིན་དང་ཐོག་ཨ་རིའི་གླིང་ཆེན་འདིའི་ནུབ་བྱང་གི་མཐའ་སྣེར་ཡོད་པའི་ཡུལ་ཨ་ལ་སི་ཀ་ལ་འབྱོར། དེ་ནས་ཨ་རིའི་གླིང་ཆེན་འདིའི་ཡུལ་གཞན་དག་ཏུ་ཁྱབ་འདུག། ཁོང་རྣམས་སྐབས་དེར་ཚོ་ཁག་ཆེན་པོ་ཁྱུ་གཅིག་བྱས་ནས་སླེབས་པའི་བཤད་ཚུལ་ཡོད་ལ། ཚོ་ཁག་ཆེན་པོ་གསུམ་སྔ་ཕྱི་བྱས་ཏེ་སླེབས་པའི་འདོད་ཚུལ་ཡང་མཆིས། དེ་ནས་རིམ་གྱིས་ལོ་རྒྱུས་ཀྱི་་ཆུ་རྒྱུན་རིང་མོའི་ཁྲོད་ཨིན་ཊི་ཡན་མི་རིགས་འདི་ཚོ་ཁག་བརྒྱ་ཕྲག་ཁ་ཤས་སུ་གྱེས་ནས་སྐད་རིགས་དང་ཡུལ་གོམས་ཀྱང་སྣ་ཚོགས་སུ་གྱུར་ཡོད་འདུག
ཡང་མི་རིགས་འདིའི་འབྱུང་ཁུངས་ཐད་བཞེད་ཚུལ་གཞན་དག་ཀྱང་མཆིས་ཏེ། མཁས་པ་ཁག་ཅིག་གིས་ལྷོ་ཨ་མི་རི་ཀར་འཚོ་སྡོད་བྱེད་པའི་ཨིན་ཊི་ཡན་གྱི་ཤེས་རིག་དང་རྒྱ་ནག་གི་་གནའ་བོའི་སྒྱུ་རྩལ་ཤེས་རིག་བར་འདྲ་ས་ཡོད་པས་རྒྱ་ནག་གམ་ཉི་ཧོང་ནས་གྲུ་གཟིངས་ལ་བསྡད་དེ་ཡོང་ཞེས་དང་། ད་དུང་ཨེ་བཟི་རལ་གྱི་ཡུལ་ནས་གདོད་མའི་དུས་ཤིག་ལ་བོར་བརླག་ཕྱིན་པའི་མི་རིགས་ཚོ་བ་བཅུ་ཅན་ཞིག་ཡོད་པ་དེའི་བུ་རྒྱུད་དུ་སྨྲ་མཁན་ཡོད་ལ། ཡོ་རོབ་དང་ཨ་ཧྥུ་རི་ཀའི་གླིང་ནས་མཆེད་པའི་བསམ་ཚུལ་འདོད་མཁན་སོགས་ཀྱང་མཆིས་མོད་ད་བར་ཚན་རིག་དང་མཐུན་པའི་དཔང་རྟགས་ཡིད་ཆེས་རུང་བ་གསར་རྙེད་བྱུང་མི་འདུག ཨིན་ཊི་ཡན་ཁོ་བ་ཚོའི་ངག་རྒྱུན་ལོ་རྒྱུས་ནང་གླིང་གཞན་ནས་ཡོང་བ་མི་འདོད་པར་ཁོང་ཚོའི་ཡབ་མེས་ཀྱི་འབྱུང་ཁུངས་ངོ་མ་དང་ཕ་ཡུལ་འཁྲུལ་མེད་ནི་ཨ་རིའི་གླིང་ཆེན་འདི་རང་ཡིན་པའི་བཤད་རྒྱུན་འདུག ཡང་ཁ་ཤས་ཀྱིས་ཨིན་ཊི་ཡན་མི་རིགས་ཤར་གླིང་ནས་ཚུར་ཡོང་བ་མིན་པར་ཨ་རིའི་གླིང་ཆེན་ནས་ཕར་སོག་པོའི་བྱང་ཐང་སེ་སྦུར་རི་ཡའི་ཕྱོགས་ལ་མཆེད་ཀྱང་ཟེར། གང་ལྟར་ཨན་ཊི་ཡན་མི་རིགས་ཀྱི་གདོང་དབྱིབས་དང་ཤ་མདོག གཟུགས་བྱད། གཤིས་སྤྱོད་སོགས་བོད་སོག་བྱང་ཐང་གི་འབྲོག་པ་དང་འདྲ་ས་མང་པོ་འདུག ཞུང་ནུའུ་ འམ ་ཧུང་སི་ ཞེས་བའི་ ཤར་གླིང་གི་གདོད་མའི་འབྲོག་པ་དེ་ཚོའི་གདུང་རྒྱུད་དུ་ཚོད་དཔག་བྱེད་མཁན་ཡང་མཆིས།

དེ་ལས་མང་བ་། “ཨིན་ཊི་ཡན་མི་རིགས་ཀྱི་སྐོར་ཕྲན་ཙམ་གླེང་བ་གཡུ་ཡི་རྣ་རྒྱན།(1)” »

རི་སྤྱང་ཁེར་འགྲོ་ནས

༡༩༡༩ ལོར་མིའི་རིགས་ཞིབ་འཇུག་པ་དང་ཕྱི་གླིང་གྲུབ་ཆེན་མ་སྦི་ལ་བ་ཏི སི་ཀིའི་རྗེས་སུ་འཇུག་མཁན་ཨི་ཝམ་སི དབེན་འཛི་ལགས་འབྲས་ལྗོངས་སྒང་ཏོག་ཏུ་ལྗོངས་རྒྱུའི་སྐབས་ཤིག རྙིང་ཧྲུལ་དུ་ཕྱིན་པའི་བོད་ཡིག་གི་གླེགས་བམ་སྣ་རིང་ཞིག བོད་དུ་འགྲུལ་བསྐྱོད་དུ་ཕྱིན་ནས་ཕྱིར་ཕེབས་མ་ཐག་པའི་དབྱིན་ཇིའི་དམག་མི་ཞིག་གི་ས་ནས་ལག་སོན་བྱུང་འདུག། ཨ་རི་བ་ཁོས་བོད་སྐད་མི་ཤེས་ལ་བོད་ཡིག་ལ་དེ་བས་ཀྱང་རྒྱུས་མངའ་མེད། ཡིན་ནའང་ཁོས་ལག་སོན་བྱུང་བའི་བོད་ཡིག་གི་གླེགས་བམ་དེ་བོད་གྱི་གསང་སྔགས་ཀྱི་དཔེ་ཆ་རྩ་ཆེན་ཞིག་ཡིན་པ་ཤེས་རྟོགས་བྱུང་འདུག།

དེ་ནས་ཁོང་འབྲས་ལྗོངས་མ་ཧ་ར་ཛ་བུ་ཆུང་སློབ་གྲའི་སློབ་སྤྱི་ཀ་རྫི་ཟླ་བ་བསམ་འགྲུབ་ཡོད་སར་བཅར་ནས་གླེགས་བམ་དེ་ཡང་སྙིང་གང་ཡིན་བཀའ་འདྲི་ཞུས་འདུག ཟླ་བ་བསམ་འགྲུས་གླེགས་བམ་དེ་མཇལ་མ་ཐག་དེ་ནི་རང་ལ་རྒྱུས་མངའ་ཡོད་པ་ཟད་རང་གིས་བླ་མ་དམ་པའི་དྲུང་ནས་ཟས་ཆོས་གང་དེའི་སྐོར་དབང་ལུང་ཁྲིད་གསུམ་གྱི་གདམས་ངག་ཞུས་མྱོང་བའི་ཟབ་ཆོས་ཞི་ཁྲོ་དགོངས་བ་རང་གྲོལ་སྟེ་མིང་གཞན་ཀར་གླིང་ཞི་ཁྲོ་འམ་བར་དོ་ཐོས་གྲོལ་ཆེན་མོ་ཡིན་པ་མཁྱེན་ནས་ཨ་རི་བ་ལ་དེ་ལུགས་ངོ་སྤྲོད་བྱས་པར། ཨ་རི་བ་ཁོང་འདོད་ཐོག་ལ་རྟ་རྒྱུག་པ་ལྟར་དགའ་སྤྲོ་རབ་ཏུ་འཕེལ་ནས་ཟབ་ཆོས་གང་དེ་དབྱིན་སྐད་ནང་ཡིག་སྒྱུར་རམ་འདེགས་ཡོང་མིན་ཞུས་བར། ཟླ་བ་བསམ་འགྲུབ་ལགས་ཀྱིས་ཁས་ལེན་མཛད་འདུག དེ་ནས་ཟླ་བ་གཉིས་ཙམ་རིང་ཞོགས་རྒྱུན་ལྟར་ཟླ་བ་བསམ་འགྲུབ་ལས་ཤག་ཏུ་མ་ཕེབས་སྔོན་གྱི་དུས་ཚོད་གསེར་ལྟ་བུ་སྤྱད་དེ་ཨ་རི་བ་དང་ལྷན་བར་དོ་ཐོས་གྲོལ་ཆེན་མོ་དབྱིན་ཡིག་ནང་ཡིག་སྒྱུར་མཛད་འདུག ཟླ་བ་བསམ་འགྲུབ་ནི་ནང་ཆོས་ལ་མཁྱེན་རྒྱ་གང་ལེགས་ཡོད་མཁན་ཞིག་ཡིན་ཐོག དབྱིན་ཇིའི་སྐད་ལའང་བྱང་ཆ་མི་དམན་པ་ཡོད་འདུག ཁོང་གིས་བོད་ཀྱི་རྫུ་འཕྲུལ་དང་གསང་བ་ཞེས་བའི་རྩོམ་མཁན་ཧྥ་རན་སའི་བོད་རིག་ཞིབ་འཇུག་བུད་མེད་ཨ་ལི་ཁུ་ རྫན་ཊི་ར སྒྲེ་ཝེ་ཊི ནིལ དང་།རྒྱ་གར་དབྱིན་ཇིའི་སྲིད་གཞུང་གི་ལས་བྱེད་དང་ཧིན་རྡུའི་གསང་སྔགས་ཉམས་ཞིབ་མཁས་བ་ཆེན་པོ་འཇོན ཝོ་སྒྲི་རོ་ཧྥུ་གཉིས་ལའང་དེ་སྔོན་སྐད་བསྒྱུར་རོགས་རམ་བྱས་མྱོང་འདུག་པས།ཁོང་ལ་ཟབ་ཆོས་དབྱིན་སྒྱུར་ཐད་མཁྱེན་ཡོན་ཕུན་སུམ་ཚོགས་པ་ཡོད་འདུག སློབ་དཔོན་ཟླ་བ་བསམ་འགྲུབ་ལགས་ཕྱིས་སུ་ཀ་ལི་ཀ་ཏ་མཐོ་རིམ་སློབ་གླིང་དུ་བོད་རིག་སློབ་དཔོན་དུ་བཞུགས་ནས་སྤྱི་ལོ་༡༩༢༢་ལོར་སྐུ་ཚེའི་འཕེན་པ་རྫོགས་འདུག

བར་དོ་ཐོས་གྲོལ་ཆེན་མོ་དབྱིན་སྒྱུར་འགོ་བཙུགས་ནས་ལོ་ངོ་དགུ་ཙམ་གྱི་རྗེས་ཏེ་༡༩༢༧ལོར་དབྱིན་འགྱུར་མ་དེ་ལོན་ཊོན་བ་གླང་ར་ཁ་མཐོ་སློབ་ཁང་གིས་དཔེ་སྐྲུན་གནང་འདུག དབྱིན་འགྱུར་མ་དེའི་ཁ་བྱང་བོད་དེབ་ཀྱི་མིང་དང་ཡོངས་སུ་མི་མཐུན་པར་བོད་དེབ་གཤིན་པོ་རྗེས་འཛིན་ཞེས་གསོལ་འདུག དེ་ཡང་དབྱིན་འགྱུར་བར་དོ་ཐོས་གྲོལ་ལ་མཚན་འདི་ལྟར་གསོལ་དོན་ནི་ཨེ་རྗེབ་གཤིན་པོ་རྗེས་འཛིན་གྱི་དེབ་ཞེས་པ་ཕྱི་གླིང་བའི་ཁྲོད་གྲགས་ཆེ་བ་དང་། དཔེ་དེབ་དེའང་བར་དོ་ཐོས་གྲོལ་དང་ཕྱོགས་མཚུངས་བར་ཚེ་འདས་ལམ་སྟོན་དང་ཤི་བོ་རྗེས་འཛིན་གྱི་དེབ་ཅིག་ཡིན་པ་དང་། གཉིས་ནས་གསང་སྔགས་རྣལ་འབྱོར་མ་སྦི་ལ་བ་ཏི སི་ཀི་ཡིས་མོ་རང་བོད་དུ་ཕེབས་ནས་གསང་བ་སྔགས་ཀྱི་བདག་ཉིད་ཆེན་པོ་དག་གི་ཞབས་ལ་གཏུགས་ནས་ཟབ་ཆོས་ཀྱི་མན་ངག་ཐོབ་ཚུལ་དང་།བདག་ཉིད་ཆེན་པོ་དེ་རྣམས་བོད་རིགས་མ་ཡིན་པར་མི་རིགས་དཀར་པོ་ཡིན་པ་གསུངས་ཡོད་པས། ཨེ་ཝམ་སི དབེན་འཛི་ལགས་ཀྱིས་བར་དོ་ཐོས་གྲོལ་འདི་ཡོ་རོབ་གདོད་མའི་ཟབ་ཆོས་ཤེས་རིག་ནས་མཆེད་པ་ཞིག་ཡིན་རེ་འཆང་ཏེ་མཚན་དེ་འདྲ་ཞིག་བཏགས་འདུག

དེ་ལས་མང་བ་། “བོད་དེབ་གཤིན་པོ་རྗེས་འཛིན།(TIBETAN BOOK OF DEAD)” »