ཀླུ་སྨྱོན།
ཨ་ཡེ་སྒྲོལ་མ་ཚེ་ལས་འདས་སོང་། ཁོ་མོ་འཇིག་རྟེན་འདི་དང་ཁ་གྱེས་པ་དེས་གྲོང་བརྡལ་ཆུང་ངུ་འདིའི་ཚེ་སྲོག་གི་གྲུབ་ཆ་གང་ཞིག་ཆག་གྲུམ་དུ་སོང་བ་དང་འདྲ་བར། བྱིས་པ་ཚོར་ཞག་མ་འགའ་ལ་གཉིད་ཀྱང་མ་ཡོང་། རེད་ཡ། ཨ་ཡེ་སྒྲོལ་མ་ཚེ་ལས་མ་འདས་སྔོན་གྱི་ཉིན་འགའི་རིང་ལ་ཡང་བྱིས་པ་ཚོར་གཏམ་རྒྱུད་བཤད་པ་མ་ཡིན་ནམ། ནམ་རྒྱུན་དབྱར་དགུན་སྟོན་དཔྱིད་གང་ཡིན་ཡང་ཉི་མ་དྲོ་སྐབས། གནའ་བོའི་གྲོང་བརྡལ་འདིའི་རྒན་རྒོན་ཚོས་ཕྲེང་བ་དང་མ་ཎི་འཁོར་ལོ་ཁྱེར་ནས་ལོ་ཟླའི་ཁ་ཆར་གྱིས་བརྡུངས་ཏེ་ཞིག་རལ་དུ་གྱུར་པའི་མ་ཎི་ཁང་གི་མཐའ་ལ་སྐོར་བ་རེ་བྱས་རྗེས། སྔ་གཞུག་ཏུ་ཉི་འོད་དྲོ་ས་ཞིག་ཏུ་འཚོགས་ནས་ཕ་མེས་ཡང་མེས་ནས་ཚ་བོ་ཡང་ཚའི་བར་གྱི་བརྗོད་མི་ཚར་བའི་ཉོག་གཏམ་གྱི་མཇུག་སྐྱོང་ཞིང་། ཨ་ཡེ་སྒྲོལ་མ་ལོ་ལོན་ཚོའི་ཁྲོད་དུ་ཡུད་ཙམ་བསྡད་རྗེས། དལ་བུར་ཡར་ལངས་ནས་ནམ་རྒྱུན་བྱིས་པ་ཚོ་རྩེད་མོར་རོལ་སའི་རྭ་སྐོར་ཆུང་ཆུང་ཞིག་ཡོད་སར་ཐོན་ཡོང་། ནམ་རྒྱུན་ཁོ་མོ་དེར་བསླེབས་མ་ཐག་བྱིས་པ་ཚོས་མོའི་མཐའ་བསྐོར་ནས་འཇམ་ཅག་གེར་ཁོ་མོས་བཤད་པའི་གནའ་གཏམ་ལ་ཉན་གྱིན་ཡོད།
“དེ་རིང་གནའ་གཏམ་གསར་བ་ཞིག་བཤད་ན་ཇི་འདྲ་རེད།”
“འགྲིགས་སོང་། འགྲིགས་སོང་།” བྱིས་པ་ཚོ་ཁྭ་སྐྱག་ཁྱུ་ཞིག་དང་འདྲ།

དེ་ལས་མང་བ་། “རི་གྲོང་གི་ཚེ་སྲོག” »