གྲོས་ཚོགས་གསར་བརྗེའི་ཐབས་ལ་བརྟེན་ནས་མང་གཙོའི་ཀ་བ་གསུམ་རྒྱུན་གནས་ཐུབ་པ་བྱ་དགོས།

འོད་དཀར་ཅན།

བོད་མི་མང་སྤྱི་འཐུས་གྲོས་ཚོགས་ཀྱི་འཐུས་མི་ཁག་གཅིག་གིས་བཙན་པོ་རིམ་བྱུང་ནས། ས་ཕག ། བཀའ་རྒྱུད། གཙང་པ་བར་དང་། དགའ་ལྡན་ཕོ་བྲང་ནས་མང་གཙོ་ཡང་དག་པའི་སྒྲིག་འཛུགས་བར་གྱི་ཁྲིམས་ལུགས་ཁྱབ་སྒྱུར་གྱི་དབང་རྒྱུན་དེ་རྩ་མེད་དུ་གཏོང་རྒྱུའི་དམིགས་འབེན་བཟུང་ནས་ཆབ་སྲིད་ཀྱི་རླུབ་འཚུབས་ཤིག་འཕྱུར་བཞིན་ཡོད།

དེ་ཡང་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པའི་ལས་ཚབ་གཅིག་རང་ལྷག་ཡོད་པ་དེ་ཉིད་བཅའ་ཁྲིམས་དོན་ཚན་ ༦༣ པའི་ནང་གསལ་ ༣ པ་བཞིན་ངོས་འཛིན་མེད་པར་བསྒྱུར་རྒྱུའི་མངོན་འདོད་དེ་བཞིན་དོན་དངོས་སུ་གྱུར་བ་ཡིན་ན། དུས་དེ་ནས་གཟུང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་མདུན་ནས་ཁྲིམས་ཞིབ་པ་ཐོག་མ་ཞེ་བོ་བློ་དར་གྱིས་ཁས་བླངས་བའི་ཁྲིམས་ལུགས་ཁྱབ་བསྒྱུར་གྱི་དབང་རྒྱུན་དེ་ཡང་ཡོངས་སུ་ཆད་པ་ཡིན། ཁག་གཅིག་གིས་མང་གཙོ་དང་། རང་དབང་ལ་ཁ་གཡར་ནས་ད་ལྟའི་དམ་འབུལ་གྱི་ལམ་ལུགས་དེ་མེད་པར་བཏང་སྟེ་ཡི་ཤུའི་གསུང་རབ་ལྟ་བུ་ཞིག་གི་སྟེང་དུ་ལག་པ་འཇོག་འདོད་ནས་བསྒུག་ཡོད་ཀྱང་། བོད་ནང་གི་བོད་མིའི་ཤི་བོའི་ཁ་ཆེམས་དང་། གསོན་པོའི་རེ་བ་བཅོལ་ས་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁོ་ན་ཡིན་པ་ལས་གཞན་སུ་ཡང་མིན་པའི་ལས་དོན་གང་ཞིག་བྱས་ཀྱང་བོད་ནང་གི་བོད་མིའི་རེ་བ་དང་། བཙན་བྱོལ་བོད་མི་སྤྱི་ཡོངས་ཀྱི་མངོན་འདོད་དང་མཐུན་མིན་ལྟ་དགོས་པ་ལས་རལ་གྲི་གནམ་གཡུག་ལྟ་བུ་བྱ་མི་རུང་།

གྲོས་ཚོགས་ཀྱི་འཐུས་མི་ཁག་གཅིག་གིས་བཙན་བྱོལ་བོད་མིའི་བཅའ་ཁྲིམས་དོན་ཚན་དང་པོའི་ནང་གི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རང་ཆས་སུ་ཡོད་པའི་སྐུ་དབང་དེ་ལ་ངན་ཇུས་སྣ་ཚོགས་ཀྱི་སྦྱོར་བ་རྩོམ་བཞིན་པ་ནི་ཉིན་རེ་བཞིན་ཇེ་གསལ་དུ་འགྲོ་བཞིན་ཡོད་པའི་བློ་དཀར་གཞུང་དྲང་གྱི་སྤྱི་འཐུས་ཚོས་དེ་ངོས་ཟིན་པའི་ཐོག་ནས་ལངས་ཕྱོགས་ཀྱང་གསལ་བོར་གཟུང་དགོས་པའི་དུས་ལ་བབ་ཡོད།

སྦྲུལ་ཀྱི་མདུད་པ་སྦྲུལ་གྱིས་བཤིག་ནུས་པའི་དཔེ་ལྟར། གྲོས་ཚོགས་ཀྱི་ནང་གི་ལས་དོན་ནི་གྲོས་ཚོགས་ཀྱི་འཐུས་མི་རང་གིས་བྱེད་ཐུབ་པ་ལས་གཞན་སུ་ཞིག་ལའང་གོ་སྐབས་མེད། དེས་ན་བློ་དཀར་གཞུང་དྲང་གྱི་བཀུར་འོས་སྤྱི་འཐུས་རྣམས་ཀྱིས་བཅའ་ཁྲིམས་ཀྱི་ཚང་ཐིག་ལ་བརྟེན་ནས་དགོས་ངེས་ཀྱི་ཐག་གཅོག་ཅིག་གནང་དགོས་པ་ནི་བཟང་སྤྱོད་ཀྱི་ལས་འགན་ཡིན། དེ་ལས་ལྡོག་སྟེ་རང་སྲུང་དང་། བཟང་བརྫུས་ཀྱི་རྣམ་པ་ཁོ་ན་བསྟན་ནས་བསྡད་པ་ཡིན་ན་ཁྲིམས་ཞིབ་པར་གནས་དབྱུང་བཏང་སྟེ་དམ་འབུལ་གྱི་ལམ་ཁ་བཀག་པ་ནི་གོམ་པ་དང་པོ་ཡིན་ཞིང་། ད་དུང་ཆུ་མོ་རྙོག་ནས་ཉ་ཆུང་འཛིན་འདོད་པའི་མངོན་རྟགས་མང་པོ་མཐོང་རྒྱུ་ཡོད།

དཔེ་མཚོན་ཙམ་ཞུས་ན། སྤྱི་ལོ་ ༢༠༢༡ ལོའི་སྲིད་སྐྱོང་སྐབས་དང་པོའི་དུས་ཡུན་རྫོག་ལ་ཉེ་བའི་སྐབས་དེར། བཅའ་ཁྲིམས་ཀྱི་ཚངས་ཐིག་ལས་བརྒལ་ཏེ་ཁྲིམས་ཞིབ་པ་གསུམ་ཀ་ཕྱིར་འབུད་དང་། ཁྲིམས་ཞིབ་པ་གསར་པ་བསྐོ་གཞག་མ་ཐུབ་པ།  གྲོས་ཚོགས་མཇུག་སྐྱོོང་ཚད་ལྡན་མ་བྱས་པ། མཐར་ཚོགས་འདུ་འཕར་མ་ཡང་ཚོགས་མ་ཐུབ་པ། སྐབས་༡༦ པའི་གྲོས་ཚོགས་དུས་ཡུན་བརྫོག་པར་ཉིན་ཤས་ལས་མེད་པའི་སྐབས་དེར་རྒྱུན་ལས་ཀྱང་གཅིག་རྗེས་གཉིས་མཐུད་དུ་དགོངས་པ་ཞུས་ནས་ཐེ་ཚོམས་མེད་པར་མང་གཙོའི་ཀ་བ་གསུམ་ཀ་རྩ་གཏོར་གཏོང་རྩིས་བྱས་པ་སོགས་སྐྱིད་གཡའ་བའི་ལོ་རྒྱུས་ཀྱི་རྡོ་རིང་ནག་པོ་ཞིག་ནམ་ཡང་གསུབ་ཐབས་མེད་པར་ལྷག་ཡོད་པ་འདི་དག་སྟབས་ཁེལ་བ་ཞིག་གཏན་ནས་མིན།

སྐབས་༡༧པའི་འཐུས་མི་བདམས་ཐོན་བྱུང་མ་ཐག་ཏུ་ཡང་ཆོས་བརྒྱུད་སྤྱི་འཐུས་དང་མདོ་སྟོད་སྤྱི་འཐུས་ཀྱིས་ཆུ་མོོ་འགོ་ནས་བརྙོགས་ཏེ་ལྗོན་ཤིང་རྩ་ནས་བཅད། བཅའ་ཁྲིམས་དོན་ཚན་ ༤༧ པ་ལྡོག་རོལ་གྱི་གསལ་བསྒྲགས་དོན་ཚན་ལྔ་ཅན་ཞིག་སྤྱི་ལོ་ ༢༠༢༡ ཟླ་ ༦ ཚེས་ ༡༢ ཉིན་ཡོངས་བསྒྲགས་སུ་སྤེལ་ཏེ་དམ་འབུལ་མ་ཞུས་པར་སྤྱི་ལོ་ ༢༠༢༡ ཟླ་ ༡༠ བར་ཟླ་བ་བཞི་མ་ཟིན་ཙམ་དུ་ལྷག དོན་ངོ་མར་སྐབས་དེ་རང་ནས་སྤྱི་འཐུས་ཀྱི་འོས་ཆོས་ཏེ་བཅའ་ཁྲིམས་དོན་ཚན་༣༨ པའི་ནང་གསལ་ ༨ པ་དང་དངོས་འགལ་ཆགས་ཡོད་པའི་བཙན་བྱོལ་བོད་མིའི་བཅའ་ཁྲིམས་ལྟར་ན་སྐབས་དེ་རང་ནས་སྤྱི་འཐུས་ཀྱི་ཐོབ་ཐང་བྲལ་བ་ཡིན་ཡང་ཁོང་ཚོར་འགན་འཁྲི་ཕྲག་ཐོག་ཏུ་འཇོག་ཐུབ་མཁན་ཞིག་བྱུང་མེད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མང་གཙོའི་ཀ་བ་གསུམ་གྱི་སྒྲིག་འཛུགས་ཆ་ཚང་བ་ཞིག་བཞེངས་སྐྲུན་གནང་སྟེ་མི་མང་ལ་བརྩིས་སྤྲོད་གནང་ཡོད་ཀྱང་། སྤྱི་འཐུས་ཀྱི་མིང་ཁུར་ཁག་གཅིག་གིས་ཇ་ལན་ཆུ་འཇལ་དང་། དགྲ་དགའ་གཉེན་སྡུག་སྟེ་ཆེས་མཐོའི་ཁྲིམས་ཞིབ་ཁང་དུ་ཁྲིམས་དཔོན་བཀག་འགོག བཀའ་ཤག་ནང་བཀའ་བློན་བཀག་འགོག གྲོས་ཚོགས་ཀྱི་ནང་དུ་བཅའ་ཁྲིམས་ལྡོག་རོོལ་བཅས་གནས་ལུགས་དང་རྒྱུ་མཚན་རིང་དུ་དོར་ནས་མང་ཉུང་དང་དཔུང་ཤེད་བཟང་ངན་ཁོ་ནས་ཐག་གཅོད་བྱེད་བཞིན་ཡོད་པ་འདི་དག་ནི་གོད་ཆག་གི་རྩ་བ་ཡིན།

ཉེ་སྔོན་སྤྱི་ཟླ་དགུ་པའི་གྲོས་ཚོས་ཀྱི་སྐབས་སུ་ཡང་ཆོས་བརྒྱུད་དང་མདོ་སྟོད་སྤྱི་འཐུས་ཁག་གཅིག་གྲོས་ཚོགས་ནས་ཐོན་ཏེ་སླར་ཡང་གྲོས་ཚོགས་ཡོངས་སུ་འཐོར། བྱེད་ཕྱོགས་འདི་དག་གི་རྒྱབ་ཏུ་རྒྱ་དམར་གྱི་ལག་པ་དངོས་སུ་བསྲིངས་ཡོད་པ་ཡང་གྲོས་ཚོགས་ཀྱི་ནང་དུ་གསར་ཁ་ཐོན། ད་དུང་གསེར་རྟ་ཚུལ་ཁྲིམས་ཀྱིས་སྤྱི་ཟླ་གསུམ་པའི་གྲོས་ཚོགས་ཀྱི་སྐབས་སུ་མུ་མཐུད་རྙོག་གྲ་ཆགས་སྲིད་པ་དང་། དེ་ལ་བརྟེན་ནས་མ་འོངས་བར་སྤྱི་ཡོངས་ལ་དཀའ་ངལ་འཕྲད་རྒྱུའི་ཉེན་ཁ་ཆེན་པོ་ཡོད་བཅས་ཡོངས་ཁྱབ་ཏུ་བསྒྲགས་པ་དང་མཉམ་དུ་ངའི་གྲི་དམིགས་གསལ་ཞིག་ཉོས་ཡོད་བཅས་ཀྱང་བཤད། གསེར་རྟ་ཚུལ་ཁྲིམས་ཀྱིས་བསྒྲགས་པའི་ཐ་ཚིག་དེ་དག་ལ་བརྟེན་ནས་གྲོས་ཚོགས་ཚོགས་ཐུབ་མིན་གྱི་བསམ་ཚུལ་ཀྱང་ཡོང་བཞིན་ཡོད་ལ། སྐེ་བསྲིང་ནས་ཞགས་པ་ཉོ་མི་རུང་བར་འདོད་མཁན་ཡང་མང་པོ་ཡོད།

གསེར་རྟ་ཚུལ་ཁྲིམས་ཀྱི་སྐད་ཆ་ལས་ང་ཚོས་གོ་ཐུབ་པ་ནི། ཡོང་རྒྱུའི་སྤྱི་ཟླ་གསུམ་པར་ཡང་རང་ཉིད་གྲོས་ཚོགས་ནས་མ་བུད་ཙམ་དུ་འབྱོར་ཐོ་ཞིག་འགོད་རྒྱུ་ལས་སྔར་བཞིན་གྲོས་ཚོགས་མཇུག་སྐྱོང་བྱེད་བསམ་མེད་པ་ནི་ཁོའི་སྐད་ཆ་དང་། ཁོང་གི་རྒྱབ་སྐྱོར་བས་གླེང་ཕྱོགས་ལས་ཚོད་དཔག་བྱེད་ཐུབ།

བཅའ་ཁྲིམས་ཀྱི་དགོངས་དོན་ལྟར་ན་ལོ་གཅིག་གི་ནང་དུ་གྲོས་ཚོགས་ཐེངས་མ་གཉིས་ཚོགས་དགོས་ཀྱང་ ༢༠༢༣ ལོར་གྲོས་ཚོགས་ཐེངས་གཅིག་ལས་ཚོགས་ཐུབ་མེད་པ་དང་། གཞུང་དངུལ་འབུམ་བརྒྱ་ཕྲག་ལས་བརྒལ་བ་དོན་མེད་ཆུས་ཟོས་སུ་བཏང་ཡོད་པས། གྲོས་ཚོགས་ནས་ཐོན་ཏེ་འགྲོ་མཁན་གྱི་སྤྱི་འཐུས་དེ་དག་གྲོས་ཚོགས་ནས་རང་བུད་སུ་འགྲོ་དགོས་ངེས་ཡིན། གྲོས་ཚོགས་ཀྱི་འཐུས་མི་ཅིག་གིས་དགོངས་ཞུ་བརྒྱུད་ཀྱང་ཐེངས་གཉིས་ཚོགས་བཅར་མ་ཐུབ་པའི་རྐྱེན་གྱིས་གྲོས་ཚོགས་ནས་བུད་པ་བྱུང་ཡོད་པ་འདིའི་ཐད་ཚོགས་གཙོ་ཚོགས་གཞོན་གྱི་དབུས་པའི་འཐུས་མི་ཡོངས་ཀྱིས་གཅིག་གྱུར་གྱིས་འགན་ཁུར་ཞིག་མེད་པ་ཡིན་ན། ཁྲིམས་ཀྱི་མདུན་སར་འདྲ་མཉམ་ཟེར་བ་ཡང་ཤོགས་ཐོག་གི་རི་མོ་ཙམ་ཡིན།

གོང་འཁོད་སྤྱི་འཐུས་དེ་དག་གིས་ཆེས་མཐོའི་ཁྲིམས་ཞིབ་ཁང་ངོས་ལེན་མེད་པའི་ཐ་ཚིག་བསྒྲགས་ཟིན་པས་ཕྱིས་འབྱུང་ཁྲིམས་ཞིབ་པ་ཞིག་བསྐོ་འཇོག་ཐུབ་སྲིད་ཀྱང་དམ་འབུལ་གྱི་ཕྱོགས་ནས་སླར་ཡང་གྲོས་ཚོགས་ཁ་འཐོར་དུ་འགྲོ་རྒྱུ་ལས་ཐབས་གཞན་མེད། ལྷག་པར་དུ་ཆེས་མཐོའི་ཁྲིམས་ཞིབ་ཁང་ནི་ཁྲིམས་འཛིན་གོང་ན་མེད་པ་དེ་ཡིན་པས།  དེ་ཉིད་ངོས་ལེན་མེད་པ་བསྒྲགས་པ་ནི་རྒྱལ་ཁབ་གང་ཞིག་ལ་མཚུངས་ན་ཡང་ངོ་ལོག་གི་ཉེས་པ་འདག་ཐབས་མེད་པ་ཞིག་ཡིན། ཡིན་ནའང་ང་ཚོའི་དམིགས་ཡུལ་ནི་བོད་མིའི་སྒྲིགས་འཛུགས་འདི་ཉིད་སྲུང་སྐྱོབ་ཇི་ལྟར་བྱ་རྒྱུ་དེ་ཁོ་ན་ཡིན་པས། རྟ་ལ་བྱམས་པ་དང་། རྒ་ལ་མཛེས་པའི་ཐབས་ཤིག་ཡོད་པ་ནི། བཅའ་ཁྲིམས་དོན་ཚན་༦༣ པའི་ནང་གསལ་༣ པའི་དགོངས་དོན་བཞིན་ཁྲིམས་ཞིབ་པ་ཆེ་བའམ་ལས་ཚབ་ཀྱི་མདུན་དུ་ཁྲིམས་ལུགས་སུ་གཏན་འབེབས་བྱས་པའི་ཚིག་གཞི་ལྟར་ལས་འཁུར་དམ་བཅའམ་ཁས་ལེན་བྱེད་དགོས་ཞེས་སོགས་ཀྱི་འབྲུ་དོན་དང་མཐུན་པར་ཤར་སྐྱོད་ཐུབ་པར་བྱ་དགོས་པ་དེ་རང་ཡིན།

དེ་ལྟར་ཐུབ་པར་མི་མང་གིས་བདམས་ཐོན་བྱས་པའི་མི་སྣ་སྟེ་སྒུག་ཐོའི་ནང་གི་སྤྱི་འཐུས་ཀྱི་འོས་མི་རྣམས་ཀྱིས་སྣེ་ཁྲིད་པའི་གྲོས་ཚོགས་གསར་པ་ཞིག་དབུ་འཛུགས་ཐུབ་པ་བྱ་རྒྱུ་ལས་ཐབས་གཞན་མེད། དེ་ལྟར་ཐུབ་པར་བློ་དཀར་གཞུང་དྲང་གི་སྤྱི་འཐུས་ཁག་གིས་རང་ཉིད་ཀྱི་རྐུབ་སྟེགས་བློས་གཏང་སྟེ་རྒྱུད་དགོས་པའི་གནད་འགག་ཅན་གྱི་རྒྱུད་རིམ་ཁག་གཅིག་ལ་གདོང་ལེན་ཐུབ་པ་བྱ་དགོས། དེ་ལྟར་ཐུབ་པ་ཡིན་ན་ད་བཟོད་མང་པོའི་སྟོབས་ལ་བརྟེན་མི་དགོས་པར་བཅའ་ཁྲིམས་ཀྱི་ཚངས་ཐིག་ལ་བརྟེན་ནས་ཐོན་ཐུབ་པའི་ལམ་ཁ་ཞིག་ཡོད། སེམས་ཐག་གཙང་བཅད་དང་ལྷག་བསམ་རྣམ་དག་གིས་མདུན་སྐྱོད་ཅིག་བྱས་པ་ཡིན་ན་ ༢༠༢༤ སྤྱི་ཟླ་ ༤ པའི་བདུན་ཕྲག་དང་པོའི་ནང་དུ་གྲོས་ཚོགས་གསར་བ་ཞིག་དབུ་འཛུགས་ཐུབ་སྒྱུར་ཐེ་ཚོམས་མེད་ལ་གྲོས་ཚོགས་དེས་བཅའ་ཁྲིམས་བསྐྱར་བཅོས་ཀྱིས་མཚོན་བོད་མིའི་སྒྲིག་འཛུགས་ཀྱི་མ་འོངས་བའི་ལས་དོན་མཐའ་དག་ལམ་ལྷོང་དང་ཤར་སྐྱོད་ཐུབ་རྒྱུར་ཡང་ཡིད་ཆེས་ཐུབ་ངེས་སུ་ཡོད། 
          གལ་སྲིད་གྲོས་ཚོགས་ཀྱི་མུ་མཐུད་ལས་དོན་ཚགས་ཚུད་ཐུབ་མིན་བྱུང་ཚེ་དཔལ་ལྡན་སྲིད་སྐྱོང་མཆོག་གིས་ཁྲིམས་སྒྲིགས་གསལ་བཟོ་བྱ་ཐབས་མེད་ཀྱང་། འགན་འཛིན་གྱི་སྐུ་དབང་ཞིག་གི་ཐོག་ནས་བཅའ་ཁྲིམས་ཀྱི་ཁྱབ་ཚད་ལས་མ་འདས་པའི་བཀོད་ཁྱབ་གནང་ཆོག་པ་ཡིན་ལ། འགན་དབང་ལྡན་པའི་མི་མང་གིས་ཀྱང་མང་གཙོའི་ཐུགས་འགན་བཞེས་དགོས། ལྷག་པར་དུ། དཔལ་ལྡན་སྲིད་སྐྱོང་མཆོག་ནི་བོད་མིའི་སྒྲིག་འཛུགས་ཀྱི་འགན་འཛིན་ཡིན་པ་དང་། འགན་འཛིན་གྱི་སྐུ་དབང་ཁྱབ་བསྒྱུར་བྱེད་པའི་དབང་ཚད་ཀྱང་ཁོང་ལ་ཡོད་པ་ནི་བཅའ་ཁྲིམས་ཀྱི་དགོངས་དོན་ཡིན།

ཡང་ཕྱོགས་གཞན་ཞིག་ནས་གཞི་རིམ་མི་མང་རེ་འབོད་ཚོགས་པའི་མི་གྲངས་ ༥༧༠༠ ཕུལ་བའི་སྙན་ཞུ་དོན་ཚན་བཞི་ཅན་དེ་ཡང་སྐྱབས་བཅོལ་ལག་དེབ་ཀྱི་ཨང་གྲངས་ཚད་གཞིར་བཟུང་ཡོད་པའི་བཅའ་ཁྲིམས་ལ་བརྩི་བཀུར་དང་། མང་གཙོའི་རིན་ཐང་ལ་གདེང་འཇོག་ཞིག་གི་ཐོག་ནས་སྙ་ཞུ་དེ་དག་གོ་མེད་ཚོར་མེད་ལྟ་བུར་བསྐྱུར་འཇོག་བྱ་ཐབས་མེད།
མདོར་བསྡུས་ནས་ཞུས་པ་ཡིན་ན། གྲོས་ཚོགས་ཀྱི་དབང་ཚད་ལ་ཁ་གཡར་ནས་བོད་མིའི་སྒྲིག་འཛུགས་ཀྱི་ལར་རྒྱ་དང་། དད་མོས། ཡིད་ཆེས་དང་དག་སྣང་། བྱིན་རླབས་ཀྱི་འདུ་ཤེས་བཅས་པར་དོ་ཕོག་མི་འགྲོ་བ་ཞིག་ངེས་པར་དུ་གནང་དགོས་པ་ཡིན།
སྤྱི་ལོ་༢༠༢༤ཟླ་ ༣ ཚེས་༡ ཉིན།