ྋགོང་ས་མཆོག་དང་། བོད་ཀྱི་ཡང་དག་པའི་མང་གཙོ།

༼བཀའ་ཁྲི་གསར་པའི་མཛད་སྒོ་ལ་ངོས་སུ་སོང་རྗེས་བྲིས།༽

ཚྭ་རུ་མ་ཐབས་མཁས་ཀྱིས།

༡༽ཡང་དག་མང་གཙོ་ྋརྒྱལ་བའི་ཕྱག་གིས་གནངས།།
ཚད་ལྡན་དག་ཐེར་ཟམ་གདོང་མཁས་པས་མཛད།།
ཁྲིམས་ལུགས་དབང་སྒྱུར་མང་གཙོའི་སྒྲིག་འཛུགས་ཤིག།
གངས་ཅན་བོད་ཀྱི་སྲིད་གཞུང་ཉིད་དུ་གྱུར།།

༢༽བོད་མི་རེ་ཡིས་རྒྱལ་གཅེས་རྒྱལ་དར་འཕྱར།།
སེང་དར་གྲུ་བཞིས་སྲིད་སྐྱོང་སེངྒེ་བཏེགས།།
སེངྒེས་སེངྒེ་བཏེགས་པའི་རྒྱལ་ཁ་ཞིག།
གངས་ཅན་ྋམགོན་པོས་འཛམ་བུ་གླིང་ལ་བསྒྲགས།།

༣༽སྐུ་དྲག་སྐུ་ངོའི་ལེའུ་འདི་ནས་རྫོགས།།
ལམ་ལུགས་རྙིང་བའི་གོམས་སྲོལ་འདི་ནས་ལྟེབས།།
ཡང་དག་མང་གཙོའི་ལམ་ལུགས་གསར་བའི་ནང་།།
ཆོལ་གསུམ་བོད་མིས་ཆིག་སྒྲིལ་འཕག་འཚག་གལ།།

༤༽ཚད་མཐོའི་མང་གཙོའི་ཆ་ཤས་ཡོངས་རྫོགས་ཆེད།།
ྋརྒྱལ་དབང་མཆོག་གིས་ཡོད་ཚད་ཡོད་ཚད་བསྐྲུན།།
འཆི་ལ་ཁད་ཀྱི་བོད་ཡོད་ཚད་ལ།།
འཆི་མེད་ཚེ་ཡི་རིལ་བུ་འདི་ལྟར་གནངས།།

༥༽བོད་ཀྱི་ལོ་རྒྱུས་དཀྱོགས་མཚམས་ཆེན་པོ་འདི།།
བོད་ཀྱི་བདག་པོ་ྋཏཱ་ལའི་བླ་མས་བྱས།།
བོད་རིགས་ཡོངས་ལ་འདྲ་མཉམ་ཐོབ་ཐང་དང་།།
བོད་ཀྱི་འཕྲལ་ཕུགས་ཡུན་རིང་བརྟན་པར་མཛད།།

༦༽རྒྱ་ནག་དཔོན་པོའི་བསམ་བློར་མ་འཁོར་བའི།།
ྋརྒྱལ་དབང་མཆོག་གིས་སྒྱུར་བཅོས་མཛད་པ་ན།།
རྒྱ་ནག་གཞུང་གི་ལས་འཆར་སྟོང་བར་གྱུར།།
འཛམ་གླིང་རྒྱལ་སྤྱིས་དོན་མཐུན་གཟེངས་བསྟོད་བྱས།།

༧༽ྋཡིད་ནོར་བུས་ཡོད་ཚད་སྤྲད་ཟིན་པས།།
རང་རེའི་སྤྱི་ཚོགས་ཁྲོད་ན་འུར་སྒྲོག་པའི།།
ཡོད་ཚད་གཞན་གྱིས་བཀག་པར་འདོད་མཁན་ཚོས།།
འཇོན་པའི་ནུས་མཐུ་ད་ནི་སྤྲུག་སྤྲུག་བྱོས།།

༨༽བོད་ཀྱི་མང་གཙོའི་སྲོལ་འབྱེད་སྟོན་པ་མཆོག།
འཇིག་རྟེན་ཞི་བདེའི་དེད་དཔོན་སྐུར་བཞེངས་པ།།
རྒྱལ་ཁབ་གཞན་ལ་མེད་པའི་ྋརྒྱལ་བའི་དབང་།།
ྋབསྟན་འཛིན་རྒྱ་མཚོའི་སྐུ་ཚེ་བརྟན་པར་ཤོག། །།
༢༠༡༡ ༨ ༡༠