ལ་མོ་ཚུལ་ཁྲིམས།
ཨ་རིའི་བོད་དོན་སྲིད་བྱུས་དང་རྒྱབ་སྐྱོར་ཁྲིམས་འཆར ༢༠༢༠ པ་འདི་ནི་ཨ་མེ་རི་ཀས་བོད་དོན་ཐད་བཞག་པའི་ལོ་རྒྱུས་ཐོག་གི་ཁྲིམས་འཆར་གལ་ཆེས་ཤོས་ཤིག་ཡིན། ཁྲིམས་འཆར་འདི་ལོ་གཉིས་ཀྱི་སྔོན་ལ་ཨ་མེ་རི་ཀའི་གྲོས་ཚོགས་འཐུས་མི་འཇམ་མེ་ཁཱེ་ཝས་James P. McGovern (D-MA) དང་། གྲོས་ཚོགས་འཐུས་མི་མར་ཁའོ་རོའོ་རྦེའོ་ Senator Marco Rubio (R-FL) རྣམ་གཉིས་ཀྱིས་ཨ་རིའི་གྲོས་ཚོགས་ལ་ངོ་སྤྲོད་གནང་ཞིང་། ཁ་སང་གཞི་ནས་ཨ་རིའི་སྲིད་གཞུང་གི་ཁྲིམས་སུ་བྱས་པ་རེད། ཨ་རིའི་གཞུང་གི་ཁྲིམས་སུ་བྱས་པ་འདིས་ཁྲིམས་འཆར་འདིའི་ལས་དོན་མཐའ་དག་ཨ་རིའི་སྲིད་གཞུང་གི་གཞུང་འབྲེལ་ལས་དོན་ཏུ་གྱུར་ཞིང་། ལས་དོན་འདི་ལེགས་འགྲུབ་ཡོང་བ་ལ་ཨ་རི་གཞུང་གིས་རྒྱུ་དངོས་དང་དབང་ཤུགས་གཉིས་ཀྱི་ལམ་ནས་ལེགས་འགྲུབ་ཡོང་བ་བྱེད་རྒྱུ་རེད།
ཁྲིམས་འཆར་འདིའི་ལས་དོན་གལ་ཆེན་ཁག་ནི།
• ༧གོང་ས་སྐྱབས་མགོན་ཆེན་པོ་མཆོག་ཐེ་བའི་བོད་ཀྱི་བླ་སྤྲུལ་རྣམས་ཀྱི་ཡང་སྲིད་ངོས་འཛིན་བྱེད་ཕྱོགས་ཐད་ལ་བོད་ཀྱི་ནང་བསྟན་ཁོ་ན་ལས་རྒྱ་ནག་གཞུང་གིས་ཐེ་ཇུས་བྱེད་མི་ཆོག
• གཞུང་འབྲེལ་མ་ཡིན་པའི་ཚོགས་པ་ཁག་གིས་བོད་ནང་གི་སྤྱི་ཚོགས་ལ་ཞུ་ཞབས་སྒྲུབ་བཞིན་ཡོད་པ་ལ་རོགས་སྐྱོར་བྱེད་རྒྱུ་ཡིན།
• ལྷ་སར་ཨ་མེ་རི་ཀའི་གཞུང་ཚབ་གསར་འཛུགས་བྱེད་དུ་མ་བཅུག་ཚེ་རྒྱ་ནག་གཞུང་གིས་ཨ་རིར་གཞུང་ཚབ་གསར་རྒྱག་བྱེད་མི་ཆོག
• ཨ་རིའི་ཕྱི་སྲིད་ལས་ཁུངས་ཀྱི་དམིགས་བསལ་འབྲེལ་མཐུད་པ་ལ་བོད་ཀྱི་གནད་དོན་དང ༧གོང་ས་མཆོག་གི་ཡང་སྲིད་ངོས་འཛིན་བྱེད་པའི་ཐད། གཞུང་འབྲེལ་ཐོག་རྒྱབ་སྐྱོར་དང་རོགས་རམ་བྱེད་རྒྱུའི་དབང་ཆ་ཡོད་པ།
• ཨ་རིའི་ཕྱི་སྲིད་ལས་ཁུངས་ནས། རྒྱལ་མཚམས་བརྒལ་བའི་བྱ་ཐབས་སྤྱད་དེ་བོད་ཀྱི་ཁོར་ཡུག་དང་ཆུ་བོ་བཅས་ལ་སྲུང་སྐྱོབ་བྱེད་རྒྱུ་ཡིན་པ།
• བཙན་བྱོལ་ནང་གི་དམངས་གཙོའི་སྲིད་གཞུང་ལ་རྒྱབ་སྐྱོར།
• ཨ་རི་སྲིད་གཞུང་ནས་འོས་ཤིང་འཚམས་པའི་བྱེད་ཐབས་སྤྱད་དེ། རྒྱ་ནག་སྲིད་གཞུང་དང་ཡང་ན་གུན་ཁྲན་ཏང་ཡོན་སུ་ཡིན་གྱིས་ ༧གོང་ས་མཆོག་གི་ཡང་སྲིད་ལ་ཐེ་ཇུས་བྱས་ན། གང་ཟང་སྒེར་ངོས་ཀྱིས་ལས་དོན་ཇི་བྱུང་གི་མཇུག་འབྲས་ལ་འགན་འཁུར་དགོས་པའི་སྲིད་ཇུས་གཏན་འབབ་ཟིན་པ་བཅས་ཡིན་པ་རེད།
དེ་བཞིན་ཏུ་ལོ་རེར་ཨ་སྒོར་ས་ཡ ༢༧ གྲོན་དངུལ་བཏང་སྟེ་ཁྲིམས་འཆར་འདི་ལེགས་འགྲུབ་ཡོང་བ་བྱེད་རྒྱུ་རེད།
གྲོན་དངུལ་གཏོང་སའི་ལས་གཞི་ཁག་ནི།
ཨ་མེ་རི་ཀའི་དམིགས་བསལ་འབྲེལ་མཐུད་ལས་ཁུངས་ལ་ལོ་རེར་ཨ་སྒོར་ས་ཡ ༡
བོད་པའི་སློབ་ཡོན་ཐད་ལ་ལོ་རེར་ཨ་སྒོར ༥༧༥༠༠
བོད་རང་སྐྱོང་ལྗོངས་ཐེ་བའི་བོད་ཁུལ་ཀྱི་སྤྱི་ཚོགས་ཡར་རྒྱས་ཐད་ལ་ལོ་རེར་ཨ་སྒོར་ས་ཡ ༨
རྒྱ་གར་དང་བལ་ཡུལ་དུ་སྡོད་པའི་བོད་པའི་སྤྱི་ཚོགས་ལ་ཨ་སྒོར་ས་ཡ ༦
རྒྱ་གར་དུ་ཡོད་པའི་བོད་མིའི་སྒྲིགས་འཛུགས་ལ་ལོ་རེར་ཨ་སྒོར་ས་ཡ ༣
ཨ་རི་རླུང་འཕྲིན་ཁང་ལ་ལོ་རེར་ཨ་སྒོར ༣༣༤༤༠༠༠
ཨེ་ཤེ་ཡ་རླུང་འཕྲིན་ཁང་ལ་ལོ་རེར་ཨ་སྒོར ༤༠༦༠༠༠༠
བཅས་ཁྱོན་བསྡོམས་ཨ་སྒོར་ས་ཡ ༢༧ སྤྱི་ལོ ༢༠༢༡ ནས་སྤྱི་ལོ་ ༢༠༢༥ བར་ལ་ལོ་རེ་རེར་གཏོང་རྒྱུ་ཡིན་པ་གཏན་འཁེལ་ཟིན་ཡོད།
ཁྲིམས་སུ་གྲུབ་སྟངས།
ཨ་མེ་རི་ཀའི་ལས་དོན་མཐའ་དག་ནི་གྲོས་ཚོགས་གོང་འོག་གང་གི་བཏོན་པའི་ཁྲིམས་འཆར་ལ། སྲིད་འཛིན་གྱིས་མཚན་རྟགས་འཁོད་རྗེས་ཁྲིམས་སུ་འགྱུར་བ་ཡིན། ཐེངས་འདིའི་ཨ་མེ་རི་ཀའི་བོད་དོན་སྲིད་བྱུས་དང་རྒྱབ་སྐྱོར་ཁྲིམས་འཆར ༢༠༢༠ ལ་མཚོན་ནའང་། སྤྱི་ལོ་ ༢༠༡༩ ལོའི་སྤྱི་ཟླ ༩ བའི་ཚེས ༢༤ ཉིན། གྲོས་ཚོགས་འོག་མའི་འཐུས་མི་འཇམ་མེ་ཁཱེ་ཝས་James P. McGovern (D-MA) དང་། གྲོས་ཚོགས་གོང་མའི་འཐུས་མི་མར་ཁའོ་རོའོ་རྦེའོ་ Senator Marco Rubio (R-FL) རྣམ་གཉིས་ཀྱིས་ཨ་རིའི་གྲོས་ཚོགས་ལ་ངོ་སྤྲོད་གནང་ཞིང་།
སྤྱི་ལོ་ ༢༠༢༠ ལོའི་སྤྱི་ཟླ ༡ བའི་ཚེས ༢༨ ཉིན། ཁྲིམས་འཆར་འདི་ལ་ཨ་རིའི་གྲོས་ཚོགས་འོག་མ་ནས་མང་མོས་གྲོས་ཆོད་བཞག་ཡོད་པ་དང་།
སྤྱི་ལོ་ ༢༠༢༠ ལོའི་སྤྱི་ཟླ་ ༥ བའི་ཚེས་༡༤ ཉིན། ཨ་རིའི་གྲོས་ཚོགས་གོང་མའི་གྲོས་ཚོགས་རྭ་བའི་་ནང་་བགྲོ་གླེང་གནང་།
སྤྱི་ལོ་ ༢༠༢༠ ལོའི་སྤྱི་ཟླ་ ༡༢ བའི་ཚེས ༢༢ ཉིན། གྲོས་ཚོགས་གོང་མ་ནས་སྤྱི་མོས་ལྟར་གྲོས་ཆོད་བཞག
སྤྱི་ལོ་ ༢༠༢༠ ལོའི་སྤྱི་ཟླ་ ༡༢ བའི་ཚེས ༢༧ ཉིན། སྲིད་འཛིན་ཁྲོམ་ཕུ་ཡིས་མཚན་རྟགས་བཀོད་དེ་ཁྲིམས་སུ་བྱས་པ་རེད།
ཁྲིམས་སུ་བྱས་བའི་བོད་དོན་སྲིད་བྱུས་དང་རྒྱབ་སྐྱོར་ཁྲིམས་འཆར་འདི་ནི་སྤྱི་ལོ་ ༢༠༢༡ ལོ་ནས་སྤྱི་ལོ་ ༢༠༢༥ ལོའི་བར། ལོ་ངོ་བཞི་ཡི་རིང་ལ་མུ་མཐུད་དུ་ཁྲིམས་སུ་གནས་ཏེ་དངོས་ཤུགས་གཉིས་ཀྱི་ལམ་ནས་བོད་དོན་ལ་རོགས་རམ་བྱེད་རྒྱུ་ཡིན་པ་རེད།
ལས་དོན་འདིར་ཁྲིམས་འཆར་འདོན་མཁན་གྲོས་ཚོགས་འོག་མའི་འཐུས་མི་འཇམ་མེ་ཁཱེ་ཝས་James P. McGovern (D-MA)
སྐད་ཆ་འདི་འདྲ་ཞིག་བཤད་ཡོད། གྲོས་ཚོགས་ནས་བོད་དོན་སྲིད་བྱུས་དང་རྒྱབ་སྐྱོར་ཁྲིམས་འཆར་ལ་གྲོས་ཆོད་ཐུབ་པར་ང་རང་ལ་སྤོབས་པ་བྱུང་། གནས་སྟངས་འདི་ལས་ཨ་མེ་རི་ཀས་བོད་མི་རིགས་ཀྱིས་དཀའ་སྡུག་ལ་སྔར་ལས་ལྷག་པའི་རྒྱབ་སྐྱོར་བྱེད་བཞིན་ཡོད་པ་བསྟན་ཡོད་ཅེས་དང་། ཡང་ཁོང་གིས། ཨ་མེ་རི་ཀས་འགྲོ་བ་མིའི་ཐོབ་ཐང་ལ་བཞག་པའི་ཁས་ལེན་དམ་བཅའ་ནམ་ཡང་བོར་བ་མེད་ཅིང་། གཉའ་གནོན་མྱོང་བཞིན་པའི་མི་རིགས་ལ་དོ་འཁུར་དང་། ཁོང་ཚོའི་རང་དབང་ལ་རྒྱབ་སྐྱོར་བྱེད་བཞིན་ཡོད་ལ། ཐེངས་འདིའི་བོད་དོན་སྲིད་བྱུས་དང་རྒྱབ་སྐྱོར་ཁྲིམས་འཆར་འདིས། ཨ་མེ་རི་ཀ་མི་དམངས་རྣམས་བློ་བརྟན་འགྱུར་མེད་ཀྱི་བོད་མི་རིགས་ཀྱི་ཕྱོགས་སུ་མུ་མཐུད་ལངས་རྒྱུ་ཡིན་པ་གསལ་བོར་བསྟན་ཡོད། ཅེས་གསུངས་ཡོད་པ་རེད།
ཁྲིམས་ཆོག་འདི་འཇོག་དགོས་བའི་རྒྱུ་མཚན།
ཨ་མེ་རི་ཀས་འདི་ལྟར་བོད་ལ་ལོ་རྒྱུས་རང་བཞིན་གྱི་རྒྱབ་སྐྱོར་བྱེད་བཞིན་ཡོད་པ་ནི། བོད་ཀྱི་འགྲོ་བ་མིའི་ཐོབ་ཐང་དང་ཆོས་ལུགས་དད་མོས་རང་དབང་གི་གནས་སྟངས་དེ། འཛམ་གླིང་སྟེང་ཆེས་མངོན་གསལ་དང་། ཡ་ང་བ། རྒྱུན་རིང་བའི་གནས་སྟངས་ཤིག་ཡིན་ཞིང་། ཨ་རིའི་མི་དམངས་ལ་མཚོན་ན་ཆོས་ལུགས་དད་མོས་རང་དབང་ནི། ཨ་མེ་རི་ཀའི་རྩ་ཁྲིམས་བསྐྱར་བཅོས་ཀྱི་ལེའུ་དང་པོའི་ནང་གསལ་བོར་བཀོད་ཡོད་ཅིང་། ཆོས་ལུགས་དད་མོས་རང་དབང་ལ་རྒྱབ་སྐྱོར་བྱེད་རྒྱུ་ནི་ཨ་རི་རྒྱལ་ཡོངས་ཀྱི་དགོས་འདུན་ཞིག་ཏུ་གྲུབ་ཡོད་པ་དང་། ཆོས་ལུགས་དད་མོས་རང་དབང་གི་ཐད་ལས་དོན་ཞིག་སྤེལ་དགོས་ན། བོད་པའི་གནས་སྟངས་འདི་རང་བཞིན་གྱི་བདམ་བྱ་ཨང་དང་པོར་ཆགས་ཡོད།
དེ་བཞིན་དུ་དེང་སང་རྒྱ་ནག་གི་རླུང་རྟ་ཆག་བཞིན་པའི་སྒང་ཡིན་པ་དང་། རྒྱ་ནག་དང་ཨ་རི་གཉིས་ཕན་ཚུན་དགྲ་ཟླའི་མདུང་རྩེ་ཁ་སྤྲོད་དུ་ལངས་ཡོད་པའི་སྐབས་འདིར། བོད་པར་རོགས་རམ་བྱས་པ་འདིས་རང་བཞིན་གྱིས་རྒྱ་ནག་ལ་གདོང་ལེན་བྱས་ཡོད་ལ། འདི་ལྟ་བུའི་རོགས་རམ་འདི་ནི་སུས་བལྟས་ཀྱང་འོས་ཤིང་འཚམས་པའི་བྱེད་སྟངས་ཤིག་ཡིན་པ་མ་ཟད། དབུ་མའི་ལམ་གྱི་སྲིད་བྱུས་དང་ཡོངས་སུ་མཐུན་པ་ཞིག་ཀྱང་ཡིན།
ཨ་རིའི་བོད་དོན་སྲིད་བྱུས་དང་རྒྱབ་སྐྱོར་ཁྲིམས་འཆར ༢༠༢༠ འདིའི་འགྲོ་གྲོན་ཆ་ཚང་ནི། ས་གནས་གང་ཞིག་ན་འགྲོ་བ་མིའི་ཐོབ་ཐང་རྡོག་རོལ་ཏུ་གཏོང་བ་དང་། ཆོས་ལུགས་དད་མོས་རང་དབང་ལ་འགོག་རྐྱེན་བཟོ་བཞིན་ཡོད་ན་ས་ཕྱོགས་དེར་གཏོང་དགོས་པ་ཞིག་ཡིན་ལ། གནས་སྟངས་དེ་དག་བྱུང་ཡུལ་ནི། དངོས་གནས་བཤད་ན་བོད་ནང་དུ་མ་གཏོགས་བོད་ཕྱི་ལོགས་སུ་མེད། རེད་དེ། ཐེངས་འདིའི་འགྲོ་གྲོན་གྱི་བརྒྱ་ཆའི་སུམ་ཅུ་མ་གཏོགས་བོད་ནང་དུ་འགྲོ་བཞིན་མེད་པས་གནས་སྟངས་དེ་ག་འདྲ་ཡིན་ན། ཁ་སང་ད་དུང་སྲིད་སྐྱོང་སེང་གེ་ཡིས་ད་ནས་བཟུང་སྟེ་བོད་མིའི་སྒྲིགས་འཛུགས་ལ་ལོ་རེར་ཨ་སྒོར་ས་ཡ ༩ རེ་ཡོང་རྒྱུ་ཡོད། ད་ང་ཚོ་བློ་བདེ་བོ་བྱས་ཆོག་ཅེས་སྤོབས་པ་ཆེན་པོས་གསུངས་སོང་། དོན་ལ་ཨ་སྒོར་འདི་དག་དཀའ་སྡུག་མྱོང་བཞིན་པའི་བོད་ནང་དུ་གཏོང་དགོས་པ་རེད་དམ། ཡང་ན་རང་དབང་ལུང་པའི་ནང་ཡོད་པའི་བོད་པ་ཚོར་གཏོང་དགོས་པ་རེད།
བོད་པ་ཚོས་སྒྲུབ་འོས་པའི་ལས་དོན།
ཐེངས་འདིའི་ལོ་རྒྱུས་རང་བཞིན་གྱི་རྒྱལ་ཁ་འདི་ལ་རྒྱལ་སྤྱིའི་བོད་དོན་ལས་འགན་ཁང་གཙོས་བའི། ཨ་རིར་ཡོད་པའི་བོད་པའི་ཚོགས་སྡེ་ཁག་གིས་རོགས་རམ་གང་ལེགས་གནང་ཡོད། འདི་ནི་ང་ཚོའི་སྒྲུབ་འོས་བའི་ལས་དོན་ཞིག་ཀྱང་ཡིན།
བོད་པ་ཚོས་ད་དུང་མུ་མཐུད་ཨ་རིའི་གཞུང་གི་རྒྱབ་སྐྱོར་ཐོབ་ཕྱིར། རང་རང་སོ་སོའི་མངའ་སྡེའི་གྲོས་ཚོགས་ལ་བོད་དོན་འབོད་སྐུལ་མུ་མཐུད་ཞུ་རྒྱུ་ནི་ཧ་ཅང་གལ་ཆེ་ལ། ཁོང་ཚོའི་འོས་ཤོག་གི་ཐད་ལ་སོ་སོ་ཉམས་ཞུགས་བྱེད་རྒྱུ་ནི་དེ་བས་ཀྱང་གལ་ཆེ། འཇམ་མེ་ཁཱེ་ཝས་James P. McGovern (D-MA) མཚོན་ན། ཁོང་ནི་མཱད་སད་ཆོད་སའི་དམངས་གཙོ་ཚོགས་པའི་ཚོགས་མི་ཡིན་པ་དང་། མར་ཁའོ་རོའོ་རྦེའོ་ Senator Marco Rubio (R-FL) ལ་མཚོན་ན། ཁོང་ནི་ཧྥོ་ལོ་རེ་རྡའི་སྤྱི་མཐུན་ཚོགས་པའི་ཚོགས་མི་ཡིན། མངའ་སྡེ་འདི་གཉིས་ཀྱི་ནང་དུ་བོད་པ་དང་བོད་པའི་མཐུན་གྲོགས་གང་ལ་གང་འཚམ་ཡོད། ཁོང་ཚོ་ལ་མུ་མཐུད་འོས་ཤོག་འཕེན་ཐུབ་ན་དེ་ནི་ཁ་ཡོད་ལག་ཡོད་ཀྱི་རྒྱབ་སྐྱོར་ཞིག་ཡིན་ལ་འདིས་རང་བཞིན་གྱིས་བོད་དོན་ལའང་ཕན་ཐོག་ཡོད་པ་མངོན་གསལ་རེད།