ཨ་རིའི་གཅིག་དྲུག་གི་དོན་རྐྱེན།

དམིགས་བུ།
 
ཉེ་ཆར་ཨ་རིའི་སྲིད་འཛིན་ཞེ་ལྔ་བ་དགྲ་གནོན་ཁྲོ་ཕུར་(Donald Trump)དང་ཆབ་སྲིད་ཤོག་ཁག་ཆེན་པོ་གཉིས་ཀྱི་འོས་བསྡུའི་མཇུག་འབྱས་དང་འབྲེལ་ནས་སྤྱི་ལོ་༢༠༢༡ལོའི་ཟླ་༡ཚེས༦ཉིན་ཨ་རིའི་རྒྱལ་ས་ཝ་ཤིན་ཊོན་དུ་བྱུང་བའི་གཅིག་དྲུག་གི་དོན་རྐྱེན་དེ་ཆབ་སྲིད་ཀྱི་རླུང་འཚུབ་ཆེན་པོ་ཞིག་གི་ངོ་བོར་གྱུར་ནས། ཤར་ནུབ་ཀྱི་རྒྱལ་ཁབ་ཆེ་ཆུང་ཚང་མ་བྱང་རླུང་དེའི་ཤུགས་རྐྱེན་གྱིས་དེད་དེ་ཚ་ཚ་འུར་འུར་གྱིས་འཛམ་གླིང་ཡོམ་ཡོམ་བསྒུལ། ལྷག་པར་དུ་རྒྱ་ནག་དང་ཨི་རན་གཙོས་པས་ཨ་རི་འགལ་ཟླའི་ཕྱོགས་ན་ལངས་ཡོད་པའི་རྒྱལ་ཁབ་ཁག་གི་གསར་འགྱུར་དང་དྲ་ལམ་ཡོད་ཚད་ན་ཨ་རིའི་སྲིད་གཞུང་སྲིད་གཞུང་མགོ་རྟིང་སློག་ཚུལ་དང་། འཇིགས་སྐུལ་རིང་ལུགས་པའི་བྱ་སྤྱོད་དང་གཏོར་བཅོམ་ཚབས་ཆེན་བྱས་ལུགས། སྲིད་འཛིན་དགྲ་གནོན་ཁྲོ་ཕུར་དང་ཁོང་གི་རྒྱབ་རྩར་ཡོད་པའི་གྱེན་ལངས་མི་མང་གི་ཨ་རིའི་སྲིད་གཞུང་ལ་དཔུང་འཛུལ་གྱིས་གྲོས་ཚོགས་གོང་འོག་གི་མི་ཆེན་དཔོན་ཆེན་ཡོད་ཚད་མདུན་ཅོག་དང་རྐུབ་སྟེགས་འོག་ཏུ་བཙུད་སོང་། དེ་ནི་རླབས་ཆེ་བའི་ཨ་རི་བའི་ཞབས་འདྲེན་དང་། ཨ་རི་བའི་ལོ་རྒྱུས་ནང་བྱུང་མ་མྱོང་བའི་མུན་ནག་གི་ཉིན་མོ་ཞིག་རེད་ཅེས་ཕྱི་ནང་གི་གསར་ལམ་ཡོད་ཚད་འུར་གྱིས་བཀང་སོང་།

དྲང་པོར་བཤད་ན་དམངས་གཙོའི་དཔེ་འཞིར་འཛིན་འོས་པའི་ཨ་རི་རྒྱལ་ཁབ་ཀྱི་མི་མང་གི་རང་དབང་དང། མི་མང་གི་ཐོབ་ཐང་ཚད་མཐོ་ས་ཞིག་ནས་འཛམ་གླིང་མི་མང་ལ་མིག་དཔེ་བསྟན་སོང་། མི་མང་གིས་སྲིད་གཞུང་ལ་འདི་ལྟར་རྒོལ་ཆོག་ལ། མི་མང་གི་སྲིད་འཛིན་དང་གྲོས་ཚོགས་ལའང་རྣམ་འགྱུར་འདི་ལྟར་སྟོན་ཆོག་པ་རེད། འདི་དམངས་གཙོའི་གཟི་བརྗིད་དང་མི་མང་གི་རང་དབང་རེད།

དེ་བས་སྲིད་གཞུང་དང་དཔུང་དམག་གིས་མི་མང་ལ་དྲག་རྒོལ་མི་བྱེད། མི་མང་དམར་གསོད་མི་གཏོང་། མི་མང་ལ་གཅར་རྡུང་དང་མནར་གཅོད་དེ་བས་མི་གཏོང་། ད་དུང་མི་མང་གི་ཚེ་སྲོག་ལ་སྲུང་སྐྱོབ་དང་། མི་མང་གི་རང་དབང་དང་མངོན་འདོད་ལ་གོང་བཀུར་བྱེད་ཞོར་རྒྱལ་འབངས་ཀྱི་བདེ་འཇགས་ལ་འགན་སྲུང་ནན་མོ་བྱེད། འདི་ནི་ཁྲིམས་ལུགས་ཀྱིས་དབང་བསྒྱུར་བའི་མང་གཙོའི་རྒྱལ་ཁབ་སྟོབས་ཆེན་ཨ་རི་ལྟ་བུ་ན་མ་གཏོགས་མཐོང་དཀོན་པས་ཆབ་སྲིད་ཀྱི་ལམ་ལུགས་ཚད་མཐོན་པོ་ཞིག་ཡིན། རྒྱལ་ཁབ་མང་པོ་ཞིག་ཚད་གཞི་འདིར་སླེབས་རྒྱུར་ད་དུང་ལོ་ངོ་བརྒྱ་ལྷག་འགོར་སྲིད།

དམངས་གཙོའི་རང་དབང་ལོངས་སུ་སྤྱོད་མ་མྱོང་བའི་རྒྱལ་ཁབ་ཁག་ན། མི་མང་གི་སྨྲ་བརྗོད་རང་དབང་དང་། ཆོས་ལུགས་དད་མོས་རང་དབང་།འགྲོ་བ་མིའི་ཐོབ་ཐང་། མི་མང་འདུ་འཛོམས་ཀྱི་རང་དབང་དང་ཐོབ་ཐང་སོགས་ཡིག་ཐོག་ན་ཡོད་པ་ཙམ་ལས་དངོས་ཡོད་ལ་མེད་པའི་ཁ་གཡང་ལྟ་བུར་གྱུར་ཡོད། རྒྱལ་འབངས་ཁྲིམས་ཀྱིས་སྐྱོང་ཞིང་ཁྲིམས་ལུགས་ཀྱི་སྒང་ན་སུ་ཡང་མེད་པའི་དམངས་གཙོའི་རྒྱལ་ཁབ་ཚད་ལྡན་ཨ་རི་ལྟ་བུ་ནས་དོན་རྐྱེན་འདིའི་རིགས་ལ་ནམ་ཡང་ཧང་སངས་པར་མི་བྱེད།

མི་མང་ཡོངས་ལའང་ཁྲིམས་ལུགས་ཀྱིས་གོ་རྟོགས་ཟབ་ཅིང་དམངས་གཙོའི་ཁེ་དབང་ཡང་དག་པར་ལོངས་སུ་སྤྱོད་པའི་མིག་རྒྱང་རིང་བར་བརྟེན།གཞུང་དམངས་གཉིས་འདྲ་མཉམ་དང་དྲང་ཚུགས་ཀྱིས་ལངས་ཐུབ་ལ་ཁྲིམས་ལུགས་ཀྱི་སྲུང་བྱ་ཕྱོགས་གཉིས་ཀའི་ཕྲག་སྟེང་ན་ལྕི་ཡང་མེད་པར་སྲང་མདའ་བཞིན་དྲང་ངེར་གནས་ཡོད།

གལ་སྲིད་ཝ་ཤིན་ཊོན་གྱི་གཅིག་དྲུག་གི་དོན་རྐྱེན་འདི་རྒྱ་ནག་པེ་ཅིན་དུ་བྱུང་ཡོད་པའི་དབང་དུ་བཏང་ན། ང་ཚོས་མིག་ལམ་དུ་དྲུག་བཞིའི་དོན་རྐྱེན་དང་དེ་ལས་སྐྱི་གཡའ་བའི་དམར་གསོད་ཆེན་མོ་ཞིག་བྱུང་ཡོད་པ་ཐེ་ཚོམ་ཅི་ལ་ཡོད། དཔེར་ན། པེ་ཅིན་ཐེ་ཨན་མིན་གྱི་སྒེའུ་ཁུང་གཏོར་ཏེ་མི་མང་འཐུས་མི་ཚོགས་ཆེན་ཁ་འཐོར་རྒུ་འཐོར་དུ་བཏང་ཡོད་ན། ཞིའི་ཅིན་པེན་གྱིས་སྐད་ཆ་ཚིག་གཅིག་གིས་མི་མང་ཁྲི་སྟོང་མང་པོ་དམར་པོའི་ཁྲག་ལ་བརྫིས་ཤིང་།བཙོན་འཇུག་དང་གནར་གཅོད། གཅར་རྡུང་སོགས་ཀྱིས་དུས་འདའ་ཞིང་མི་མང་ཚོར་ར་ལུག་ཅིག་གི་འདུ་ཤེས་ལས་འགྲོ་བ་མིའི་ཐོབ་ཐང་དང་རང་དབང་སོགས་གླེང་ས་ཞིག་གནམ་འོག་དེར་མེད་པ་ཐག་གིས་ཆོད། ད་དུང་རྒྱལ་ཁབ་མགོ་རྟིང་སློག་པའི་ཉེས་མིང་འོག་ནས་རེ་རེ་བཞིན་ཚར་བཅད་དེ་མིང་ཐོ་ནག་པོའི་ནང་གཡུག་ངེས་ཡིན།

སྔོན་ཆད་དྲུག་བཞིའི་དོན་རྐྱེན་སྐབས་དམངས་གཙོ་དོན་གཉེར་བའམ་ན་ཆུང་ཤེས་ཡོན་ཅན་སློབ་ཕྲུག་སྟོང་ཕྲག་མང་པོ་དང་། ཧྥ་ལོངས་ཀོང་གི་ཆོས་དད་མི་མང་དཀྱུས་མ་མང་པོ་ཞིག་གིས་ཞི་བའི་སྐད་འབོད་ཙམ་བྱས་པར། རྒྱ་གཞུང་གིས་དྲག་པོའི་དཔུང་དམག་བཏང་སྟེ་རང་གི་མི་སེར་དང་རྒྱལ་འབངས་ཚོ་ལྕགས་ཁྲབ་འཁོར་ལོའི་འོག་ལ་བཙིར་ཏེ་ཤ་འཐག་རུས་འཐག་གིས་ངན་གསོད་ཚད་ལས་འདས་པ་བྱས་ཚར་བ་རེད། དེ་དག་གི་རྗེས་འབྲེལ་དང་བཅས་པར་ཆབ་སྲིད་ཀྱི་ཞྭ་མོ་ནག་པོ་གཡོགས་ཏེ་བཙོན་འཇུག་ཁྲིམས་ཆད་ཀྱིས་འཚོ་མི་ཐུབ་པའི་མནར་བཅོད་བཏང་བ་རེད། དེ་ནི་ཉམ་ཆུང་མི་མང་དང་འཛམ་གླིང་མི་རིགས་ཀྱི་ནམ་ཡང་ག་ལ་བརྗེད་ཐུབ།

འདི་ལྟར་ཨ་རིའི་ཝ་ཤིན་ཊོན་གྱི་གཅིག་དྲུག་གི་དོན་རྐྱེན་དང་། པེ་ཅིན་གྱི་དྲུག་བཞིའི་དོན་རྐྱེན་གཉིས་བསྡུར་ནས་བལྟས་ན་ད་གཟོད་ང་ཚོས་ཨ་རིའི་དམངས་གཙོའི་རང་དབང་གི་འོད་སྣང་དང་གཟི་བརྗིད་མཐོང་ཐུབ་ལ། ཨ་རིའི་ཁྲིམས་ཀྱི་དབང་བསྒྱུར་གྱི་དགེ་མཚན་དང་མི་མང་གི་རང་དབང་ལ་ཡིད་སྨོན་སྐྱེ་ངེས། ཕྱོགས་གཞན་ནས་རྒྱ་ནག་དམར་ཕྱོགས་ཚོགས་པའི་གཅིག་སྡུད་ལམ་ལུགས་འོག་གི་ཆེས་འཇིགས་སུ་རུང་བའི་གཡོ་སྒྱུའི་ཐབས་ཇུས་དང་ཆེས་མུན་ནག་གི་ཀློང་ན་འགྲོ་འདུག་སྤྱོད་གསུམ་ལ་བག་ཟོན་བྱེད་དགོས་པའི་ལྕགས་རི་སྲ་མོ་དེའང་མིག་ལམ་ལ་ཤར་ཡོང་།སྤྱིར་བཏང། གང་ཟག་གིས་དབང་བསྒྱུར་འོག་ན་གུ་ཡངས་བའི་བར་སྣང་ཆེན་པོ་ཞིག་ནམ་ཡང་མེད།

མདོར་ན། མི་མང་གིས་སྲིད་གཞུང་ལ་རྒོལ་བ་དང་སྲིད་གཞུང་གིས་མི་མང་ལ་རྒོལ་བ་གཉིས་ཁྲིམས་ལུགས་ཀྱིས་དེད་ན། ཨ་རི་བས་སྲིད་གཞུང་གིས་ཁྲིམས་ལུགས་བརྩི་དགོས་ཟེར། རྒྱ་ནག་པས་མི་མང་གིས་ཁྲིམས་ལུགས་བརྩི་དགོས་ཟེར། འདི་ལྟར་བརྗོད་ན་མི་མང་པོ་ཞིག་གིས་གཅིག་དྲུག་གི་དོན་རྐྱེན་དང་དྲུག་བཞིའི་དོན་རྐྱེན་གཉིས་ཀྱི་རྒྱབ་ལྗོངས་དང་རྒྱུ་རྐྱེན་མང་པོ་ཞིག་རྒྱུ་མ་ཕུ་འདེད་བྱེད་ཐུབ་ལ་དངོས་ཡོད་ཀྱི་བལྟ་སྟངས་ཞིག་གསལ་བོར་མཐོང་ངེས་ཡིན།