ཨ་རིའི་སྲིད་འཛིན་གྱི་བསྟོད་བསྔགས་རྒྱང་རིང་བོང་བུའི་མགྲིན་བཟང་།

འདབ་པ་ཚེ་དབང་མགོན་པོ།

 
ཀྱེ། ལས་ཀྱིས་བཀོད་པའི་ཨ་རིའི་ཞིང་མཆོག་ན།།
ཁྲོ་ལྡན་བདམས་ཐོན་སྲིད་འཛིན་ཌོར་ནག་ཊྲོམ།།
སྐྲ་ལོ་འཕྱང་འཕྱང་ཁམ་སེར་གཉིས་འདྲེས་པ།།
འདྲེན་བྱེད་བཟོ་དབྱིབས་སྤྱང་ཀི་ཙཀྵུ་ལྟར།།

ལུས་ཀྱི་བོངས་ཚད་གླང་ཆེན་གཟུགས་བཞིན་དེ།།
སྲིད་ཀྱི་ཁྲི་སྟེང་བཞུགས་དུས་མངོན་པར་འཕགས།།
གོམ་པའི་འདེགས་འཇོག་དྲེད་མོང་འགྲོས་དང་མཚུངས།།
དལ་ལྷོད་སྡིངས་ཆར་ལངས་ན་བརྗིད་ཉམས་ཅན།།

ཞལ་ནས་བྱུང་བའི་འབེལ་མཆིད་ཚིག་གཅིག་གིས།།
གོ་ལ་ཟླུམ་པོར་གཡོ་འགུལ་ལེན་གསུམ་བྱས།།
སྲིད་ཀྱི་ཁྲི་སྟེང་སླེབས་པའི་ཉིན་གསུམ་སྐབས།།
ཁ་ཆེ་ཡེ་མིན་དྲག་སྤྱོད་ཆམ་ལ་ཕབ།།

རྒྱ་ནག་སྐམ་ས་ཐེ་ཝན་གཞུང་འཛིན་གཉིས།།
རྒྱལ་ཁབ་གཅིག་ལ་ངོས་འཛིན་ཐ་དད་འོག །
རེ་ཞིག་གཉུག་མའི་ཚུལ་དུ་ལྷག་པའི་སྐབས།།
ཁ་པར་ཐེངས་གཅིག་དགྲ་ངོར་ཡོངས་སུ་བསྒྱུར།།

སྲིད་འཛིན་ལས་འཁུར་བགྱིས་པའི་ཉིན་བདུན་ནང་།།
ས་རྟགས་གཉིས་གསུམ་ཙམ་ཞིག་བཀོད་མཛད་པས།།
ཨ་རིའི་རྒྱལ་ཁམས་མཐའ་དག་འུར་སྒྲས་བརྒྱངས།།
སྲིད་ཟུར་ཨ་བྷོམ་བཟའ་ཚང་གཉིད་སྟོང་ཕུད།།

ཡང་བསྐྱར་ས་རྟགས་འགའ་ཞིག་བསྐྱར་སྣོན་གྱིས།།
ཨ་ལ་ཞིང་ཁམས་ཆེན་པོ་བདུན་ཙམ་གྱི།།
ལས་ཀྱིས་བསྐོས་པའི་འགྱུར་མེད་ཞལ་སློབ་རྣམས།།
འགྲོ་འོང་མཚམས་ནག་དགུ་བཅད་ཆེན་པོར་མཛད།།

དེ་ཡི་ནུས་པས་ཨ་རིའི་གནམ་ཐང་འགར།།
ཁ་ཆེ་བཟའ་ཟླ་བུ་ཕྲུག་མཛའ་བཤེས་ཀུན།།
སེམས་ཀྱི་སྡུག་བསྔལ་མཐའ་དག་ཕྱིར་མངོན་ནས།།
ཉིན་མཚན་ཁྱད་མེད་ངུ་སྒོ་ཕྱོགས་བཞིར་འབྱེད།།

རྒྱལ་ཁབ་གཞན་ལ་ཕྱིར་འཇོག་མ་དངུལ་རྣམས།།
རང་གི་ཡུལ་ལ་ནང་འདྲེན་བྱ་བའི་ཕྱིར།།
སླར་ཡང་སེམས་ཐག་གཙང་མ་རྦད་བཅད་ནས།།
སྤྱན་གཉིས་བཙུམས་ཏེ་ས་རྟགས་གཡོ་ཐེངས་ཀྱིས།།

ཨ་རིའི་ཕྱུག་བདག་སྟོང་ཚོ་འགའ་ཞིག་གི །
སྙིང་རྡོག་ཁ་ནང་དབང་མེད་ཤར་ཤར་བཏོན།།
དེ་མིན་ཕྱུག་བདག་རྒྱ་ཕྲག་འགའ་ཞིག་གི །
ཡིད་ལ་མ་འབད་དགའ་བ་འབུམ་ཕྲག་སྤེལ།།

ཕ་བསད་བུ་ཡིས་ཞེན་འཁོན་འཛིན་པ་ལྟར།།
ཡུན་རིང་སྙིང་ལ་གནག་པའི་ཨ་རིའི་དགྲ །
ཨུ་སུའི་གཞུང་གི་སྲིད་འཛིན་ཕོ་ཏྲན་དང་།།
སྙིང་གཏམ་བཅོལ་སའི་སྲོག་གི་གྲོགས་སུ་བསུས།།

ཕ་མེས་ཡང་མེས་དུས་ནས་འགོ་བཟུང་སྟེ།།
འབྲལ་མེད་གྱུར་པའི་ཁྱིམ་མཚེས་མེད་སེ་ཁ།
ཆོས་དང་ཟང་ཟིང་འབྲེལ་བ་རབ་བཅད་དེ།།
ལྕགས་རི་ཐོག་བརྩེགས་ཆེན་པོ་དགུ་གཅོད་བརྩིགས།།

འཛམ་གླིང་གནས་ཚུལ་རབ་ཏུ་གསལ་འདེབས་པའི།།
ཚད་མར་གྱུར་པའི་གསར་འགྱུར་ཆེ་ཁག་རྣམས།།
ཁུངས་མེད་འཆལ་གཏམ་སྤེལ་བྱེད་འབའ་ཞིག་ལ།།
ནན་གྱིས་བརྩིས་ནས་ཐད་ཀར་དགྲ་ལ་བསླངས།།

དྲང་པོའི་དོན་རྣམས་དྲང་ཕྱོགས་བསྲུང་མཁན་ལ།།
ཁྲིམས་ཀྱི་རྩེ་མོར་འཁོད་པའི་ཁྲིམས་ཞིབ་པ།།
མངོན་པར་མི་གསལ་རྒྱལ་ཁབ་འཕུང་མཁན་ལ།།
སྙོན་འཛུགས་ཐེངས་གཅིག་ས་མཐར་གནས་དབྱུང་བཏང་།།

ཟླ་ངོ་མ་ཚང་དུས་ཚོད་ཐུང་ངུ་ན།།
སྲིད་འཛིན་ཉིད་ཀྱི་ཤེས་འཇོན་བྱིན་རླབས་འོག །
རྒྱལ་ཁབ་བདེ་སྲུང་སློབ་སྟོན་རྩ་དགོངས་སུ།།
མི་ཞུ་ཐབས་མེད་གདམས་པའི་དབང་ཆེན་བསྐོར།།

འོས་བསྡུ་ལས་རིམ་རྩོད་རར་འགྲིམ་པའི་སྐབས།།
རྒྱ་ནག་བརྒོལ་པའི་འབྲུག་སྐད་ཐལ་བ་འཕེན།།
ཉེ་འཆར་ཁ་པར་ཐད་ཀར་མདའ་ཐོགས་བཞིན།།
གཏང་བར་བསྙེངས་ནས་ཚོད་བགམ་འཕྲིན་ཅིག་བསྐུར།།

རང་གི་སྙིང་རྡོག་འཕར་བ་འཇམ་རྗེས་སུ།།
རྒྱ་ནག་གཅིག་གི་སྲིད་ཇུས་འཛིན་ཕྱོགས་ཐད།།
མཇུག་དང་མ་རྔ་གཡོ་རྒྱུ་ཡིན་ཟེར་ཏེ།།
རྡོ་རྗེ་བྲག་བཞིན་འགྱུར་མེད་ཁས་འཆེ་བླངས།།

ད་ཆར་རྡ་སའི་གཞུང་དང་ཐེ་ཝན་གཉིས།།
ཆབ་སྲིད་མི་སྣས་འཛིན་པའི་ཕུགས་བསམ་ཏེ།།
ཁྱི་རྒན་རྒྱ་བོ་གཙང་བོའི་རབ་ཁ་ལ།།
ལང་བཞིན་ཚུལ་ལ་ཉིད་ཀྱིས་དེ་མར་བསྒྱུར།།

མཚན་སྙན་ལྡན་པའི་ཨ་རིའི་སྲིད་འཛིན་ཁྲིར།།
བདམས་ཐོན་ལམ་ལྷོང་བྱུང་བའི་སྲིད་འཛིན་མཆོག །
སྒོ་གསུམ་བྱ་སྤྱོད་ལ་ཁའི་དར་ཅོག་བཞིན།།
ནུབ་མོའི་དམ་བཅའ་སང་ཉིན་ཐོ་རངས་ཤོར།།

ཕྱིན་ཆད་དོན་ལ་རྒྱལ་ཁ་མ་ཐོབ་ཀྱང་།།
ཕོ་བྲང་དཀར་པོའི་ཕྱི་ནང་ཁོར་ཡུག་ཀུན།།
མཛེས་ལྡན་ལང་ཚོ་བཞད་པའི་ན་ཆུང་ཚོར།།
བྱི་ཕྲུག་མང་ཙམ་སྤེལ་བའི་རེ་སྐུལ་ཞུ།།

གནས་ཚུལ་འདི་དག་ཚིག་ངོར་བསྒྲིལ་པའི་དོན།།
སྲིད་འཛིན་ལས་འཁུར་བགྱིས་པའི་དུས་ཚོད་ནང་།།
མཛད་པ་འཕྲིན་ལས་གནམ་འོག་གཤོང་དཀའ་ཁག །
མདོར་བསྡུས་ཙམ་ཞིག་ཟིན་ཐོར་ཕབ་པ་དགེའོ། །

ཨ་རིའི་སྲིད་འཛིན་ཌོར་ནག་ཊྲོམ་ལ་བསྟོད་བསྔགས་རྩོམ་ཡིག་རྒྱང་རིང་བོང་བུའི་མགྲོན་བཟང་ཞེ་བྱ་བ་འདིས། ཆབ་སྲིད་པའི་མི་སྣ་རྣམས་ཀྱི་སེམས་ཁམས་དང་བྱ་སྤྱོད་ཡོངས་སུ་དམར་རྗེན་མ་ལ་མཚོན་གྱིན་ཡོད་པའི་ཕྱིར་ན། ཕྱིན་ཆད་བློ་གསར་པ་རྣམས་ཀྱིས། སྐྱ་སེར་ཕོ་མོ་ཁྱད་མེད་ཀྱིས་སྒོ་ནས་ཆབ་སྲིད་པ་ཞིག་ཡིན་ནས་བཟུང་། དེ་དག་ལ་ནམ་ཡང་ཡིད་ཆེས་དང་བློས་འཁེལ་མི་རུང་བ་དང་། ལྷག་པར་ཁོང་ཚོས་སྐད་ཆ་བཟང་ངན་གང་ཞིག་བཤད་ཀྱིན་ཡོད་ན་ཡང་དེ་ནི་བསླུ་བའི་ཆོས་ཅན་རང་བཞིན་ལས་མ་འདས་ཕྱིར། དེ་ལ་བརྟག་པ་ནན་ཏན་བགྱིད་དགོས་པའི་ཉེན་བརྡ་ཐོའི་ཚུལ་དུ་རྩོམ་ཡིག་སྤེལ་བའོ། །
ཤར་ནུབ་ཀྱི་ཡུལ་ཁམས་པ། སྙན་ངག་མཁན་འདབ་པ་ཚེ་དབང་མགོན་པོས་ལམ་ཌོན་གྲོང་ཁྱེར་དབུས་ན་སྤེལ་བའོ། །