ཧྥ་རན་སིའི་སྲིད་འཛིན་གྱི་འོས་བསྡུ་ནི་ཡོ་རོབ་ཀྱི་ལས་དབང་ལ་འབྲེལ་ཡོད། 

ཨ་ནུ་ཐང་བསོད་ནམས།

 

རང་ལོ ༤༨ ལ་སོན་པའི་མ་རེས་ལི་ཕིན་ལ་འོས་གྲངས ༢༡% ༤༣ དང་། ཁ་གཏད་རང་ལོ་༣༩ སོན་པའི་མ་ཁི་རོན་ལ་འོས་གྲངས ༢༣% ༨༦ ཐོབ་པས། ཁོ་གཉིས་སྔོན་འགྲོའི་འོས་མི་ལྔ་ཡི་ནང་ནས་དངོས་གཞི་ལ་རྒྱལ་ཁ་ཐོབ་འདུག འོན་ཀྱང་། ཁོ་གཉིས་ཀྱི་ལངས་ཕྱོགས་ནི་མེ་ཆུ་བཞིན་དུ་ཐ་དད་ཡིན་ཁར། སྔོན་ལྟར་དཔལ་འབྱོར་གྱི་དཀའ་ངལ་གཅིག་བུ་ཙམ་མིན་པ། ཧྥ་རན་སིའི་རྩ་བའི་ཆབ་སྲིད་ཀྱི་སྒྲོམ་གཞི་ལ་འགྱུར་བ་བཏང་མིན་དང་། ཧྥ་རན་སི་ཡོ་མནའ་ནས་འདུག་མིན། ཡོ་མནའ་གནས་དགོས་མིན་ལ་ཐད་ཀར་འབྲེལ་བ་ཆགས་ཡོད། དེ་བརྟེན། ད་ལྟའི་ཧྥ་རན་སིའི་འོས་བསྡུ་ནི་ཧ་ཅང་གི་གནད་འགག་ཡིན་པས། ཡོ་མི་རྣམས་དང་། གོ་ལ་གཅིག་གྱུར་གྱི་དཔལ་འབྱོར་ལགས་ལུགས་འདོད་མཁན་ཀུན་ལ་སེམས་ཁྲལ་འབྱུང་གཞི་ཞིག་དང་། དོ་སྣང་བྱེད་ཡུལ་དུ་ཆགས་ཡོད།

 

• འོས་མི་མ་ཁི་རོན། 

མ་ཁི་རོན་ནི་ཡོ་རོབ་མནའ་འབྲེལ་དང་གོ་ལ་གཅིག་གྱུར་གྱི་དཔལ་འབྱོར་ལམ་ལུགས་ལ་རྒྱབ་སྐྱོར་བྱེད་མཁན་ཡིན་ལ། ཁ་གཏད་ལི་ཕིན་ནི་གོ་ལ་གཅིག་གྱུར་གྱི་དཔལ་འབྱོར་ལ་ཁ་གཏད་གཅོད་མཁན་དང་། ཡོ་རོབ་མནའ་འབྲེལ་ལ་མཐའ་གཅིག་ཏུ་ངོ་རྒོལ་བྱེད་མཁན་ཡིན། མོས་ཡོ་རོབ་ཀྱི་དར་ཆ་ནི་ཧྥ་མི་རྣམས་ལ་སྡུག་པོ་དང་ཉམས་རྒུད། ཚད་བཀག་བཟོ་མཁན་དེ་ཡིན་པས་དེའི་མདུན་དུ་བཅར་འདྲི་དང་། གཏམ་བཤད་གནང་རྒྱུ་མོས་མཐུན་གང་ཐུབ་ཀྱིས་གནང་གི་མེད་ལ། གཅར་འདྲི་ཁག་ཅིག་བྱེད་སྐབས་སུ་ཡོ་རོབ་ཀྱི་དར་ཆ་ལེན་དུ་བཅུག་ཡོད།

ཡོ་རོབ་མནའ་འབྲེལ་གྱི་མཐུན་ཕྱོགས་ཀུན་གྱིས་མ་ཁི་རོན་ལ་རྒྱབ་སྐྱོར་བྱེད་ཀྱི་ཡོད་ལ། བྱེད་དགོས་དོན་ཡང་ཁོས་ཡོ་རོབ་མནའ་འབྲེལ་སྲ་བརྟན་དུ་བཏང་ཞིང་། དེ་དང་མཉས་ལས་ཀྱིས་ཧྥ་རན་སི་དང་ཡོ་རོབ་ཀྱི་དཀའ་ངལ་སེལ་རྒྱུ་ལ་འབད་མཁན་ཞིག་ཡིན་པས་རེད།

མ་གཞི་ཁོ་ནི་དངུལ་ཁང་གི་དཔལ་འབྱོར་རིག་པ་བ་དང་། སྒྱུ་རྩལ་བ་ཞིག་ཡིན། འོན་ཀྱང་། ཁོ་ལ་ལོ་རྒྱུས་ཀྱི་ཅུང་ཞན་ཆའམ་རྟོགས་དཀའ་བ་ཞིག་ཡོད་པ་ཡོད་ནི་ཁོ་རང་ལས་ལོ་ན ༢༥ ཡི་ཆེ་བའི་ཁོའི་དགེ་རྒན་དང་ཆང་ས་བརྒྱབས་འདུག་ཅིང་། ཁོ་ལོ་ན ༡༥ ཡིན་དུས་ནས་མོ་དང་ཐུག་ཅིང་དེ་ནས་བཟུང་མོས་ཅི་ཞིག་བྱེད་ཀྱང་། ཁོ་མོོ་དང་བཟའ་ཚང་བྱེད་རྒྱུ་ཡིན་ཞེས་ནས་ཁོས་དམ་བཅའ་བཞག་པས་ཡིན་ཚུལ་སྨྲ་བཞིན་ཡོད།

ཆང་ས་བརྒྱབས་པ་དེས་འོས་ཤོག་བླུགས་མཁན་ལ་དེ་ཙམ་ཤུགས་རྐྱེན་ཐེབས་མི་སྲིད་པ་མང་པོས་ཚོད་དཔགས་བྱེད་ཀྱི་འདུག་ཅིང་། འདུག་དགོས་དོན་ཡང་ཆབ་སྲིད་ཀྱི་གལ་ཆེའི་གནད་དོན་ལ་ཐུག་ན། ཧྥ་མི་རྣམས་ཀྱིས་གནད་དོན་ཆུང་ངུ་ལ་དེ་ཙམ་གྱིས་དོ་སྣང་མི་བྱེད་པས་རེད། གང་ལྟར་ཁོ་ལ་རྒྱལ་ཁ་ཐོབ་རྒྱུ་ནི་ཡོ་མནའ་ཡི་བླ་སྲོག་དང་འབྲེལ་བ་ཆགས་ཡོད། མི་མང་ལ་བསམ་ཚུལ་དྲིས་བའི་མང་ཉུང་ལྟར་ན་མ་ཁི་རོན་རྒྱབ་སྐྱོར་བྱེད་མཁན ༢༠% ཡིས་ལི་ཕིན་གྱི་མང་དུ་ཆགས་ཡོད་པས། ཁོ་ལ་རྒྱལ་ཁ་ཐོབ་རྒྱུའི་རེ་བ་ཧ་ཅང་གི་ཆེན་པོ་ཡོད་འདུག

 

• འོས་མི་མ་རེས་ལི་ཕིན། 

མ་རེས་ལི་ཕིིན་གྱིས་དེ་ལས་ལྡོག་སྟེ་ཧྥ་རན་སི་གང་ཐུབ་ཀྱིས་ཡོ་རོབ་མནའ་འབྲེལ་གྱི་ནང་ནས་ཕྱི་འཐེན་གནང་ཞིང་། དེ་གནང་ཐབས་ལ་མོས་དང་པོར་ཡོ་མནའ་དང་གྲོས་མོལ་བྱས་ཤིང་། གྲོས་ཁ་མ་འགྲིག་པ་ཡིན་ན། ཧྥ་རན་སིའི་མི་མང་ལ་དབྱིན་ཇི་ལྟར་ཡོ་རོབ་ཀྱི་ནང་དུ་འདུག་མིན་གྱི་འོས་ཤོག་འཕེན་བཅུག་ནས་ཡོ་སྣ་དང་ཁ་བྲལ་དུ་བཅུག་རྒྱུ་དེ་རེད་འདུག གལ་སྲིད་འོས་བསྡུ་ལས་ཡོ་རོབ་དང་འབྲལ་རྒྱུར་རྒྱལ་ཁ་མ་ཐོབ་པ་ཡིན་ན། མོ་རང་སྲིད་འཛིན་གྱི་ལས་གནས་ནས་དགོངས་བ་ཞུ་རྒྱུ་ཡིན་ཞེས HameTV ལ་བརྗོད་འདུག

ལི་ཕིན་གྱིས་ཧྥ་རན་སིའི་ས་མཚམས་ཀུན་གནའ་ལྟར་ཧྥ་གཞུང་གིས་བདག་བཟུང་བྱེད་རྒྱུ་དང་། རྩ་ཁྲིམས་ཀུན་གནའ་བཞིན་ཧྥ་མིས་བཟོ་རྒྱུ་ལས། ཡོ་མནའ་ཡིས་མི་བཟོ་རྒྱུ། རབས་བྱུང་ན་ཁ་ཆེའི་ཆོས་ཁང་མང་པོ་ཡི་སྒོ་རྒྱག་རྒྱུ་དང། ལྷག་པར་དུ་ཧྥ་རན་སིའི་ནང་དུ་ལོ་རེ་བཞིན་ཡུལ་མི་གནས་སྤོ་བ་ཁྲི་གཅིག་ལས་བརྒལ་བ་ལེན་རྒྱུ་མིན་ཚུལ། ཡུལ་དེའི་དངུལ་ལོ་རྙིང་བ་སྐྱར་གསོ་བྱེད་རྒྱུ་དང་། ཡོ་སྒོར་མེད་པ་བཟོ་རྒྱུ་སོགས་ཡིན་འདུག དེ་ལྟར་བྱུང་བ་ཡིན་ན། ཡོ་རོབ་མནའ་འབྲེལ་ཧ་ཅང་གི་གནས་རྒྱུ་དཀའ་བས་ཁག་ཅིག་གིས་མོ་ལ་འོས་ཤོག་ཐོབ་པ་ནི་ཡོ་མནའ་ཡི་ཚེ་སྲོག་ཆད་པའི་སྔ་ལྟས་སུ་འདོད་ཀྱིན་ཡོད། གལ་སྲིད་དེ་ལྟར་མིན་ཡང་། ཡོ་རོབ་ནི་ཚོང་འབྲེལ་ཁོ་ན་ཡི་མནའ་འབྲེལ་གྱི་མཐུན་ཚོགས་ཤིག་ཏུ་འགྱུར་རྒྱུ་རེད་འདུག

 

• དབྱིན་ཇི་དང་ཧྥ་་རན་སིའི་འོས་བསྡུ། 

ད་ལྟ་དབྱིན་ཇི་བ་ཡོ་རོབ་ནས་ལོགས་སུ་ཐོན་གླ་རུ་ཡོ་རོབ་ཀྱིས་ཡོ་སྒོར་ཐེར་འབུམ ༦༠ ཡི་བར་དུ་སྤྲོད་དགོས་ཚུལ་བརྗོད་ཀྱི་ཡོད། རྒྱུ་མཚན་ནི། ལོགས་སུ་ཐོན་རྒྱུ་ཡིན་ཟེར་མཁན་དབྱིན་ཇི་བ་ཡིན་པ་
ལས་ཡོ་རོབ་པ་མིན་པས་ཡིན་ཚུལ་འགྲེལ་ཁར། དེ་ལྟར་བྱས་ནས་ཐོན་དགོས་བའང་ཡོ་རོབ་ཀྱི་རྩ་ཁྲིམས་ཡིན་ཚུལ་སོགས་བརྗོད་ཀྱི་ཡོད། འོན་ཀྱང་། དབྱིན་ཇི་བས་དེ་ནི་གནས་ལུགས་དང་མི་མཐུན་པས་སྐར་གཅིག་ཀྱང་སྤྲད་ཀྱི་མིན་ཚུལ་བརྗོད་ཀྱིན་ཡོད། ཡིན་ཡང་། གནས་ཚུལ་དེས་དབྱིན་ཇི་བ་ཡོ་རོབ་ནས་ལོགས་སུ་ཐོན་འདོད་བྱེད་མཁན་རྣམས་མགོ་ན་རུ་བཅུག་བཞིན་ཡོད།

གལ་སྲིད་དབྱིན་ཇི་ཡིས་དེ་ལྟར་དངུལ་མ་སྤྲད་པ་ཡིན་ན། ཡོ་རོབ་དང་གྲོས་མོལ་བྱེད་རྒྱུ་འགོར་འགྱང་བྱེད་ངེས་ཤིང་། ཅི་ཙམ་གྲོས་མོལ་འགོར་འགྱང་བྱས་ན། དེ་ལྟར་གྲོས་མོལ་གྱི་འཇུག་མ་སྒྲིལ་བས། འཇུག་མ་སྒྲིལ་ན་དབྱིན་ཇི་ཡོ་རོབ་ནས་ལོགས་སུ་ཐོན་མི་ཐུབ་ཅིང་། མ་ཐོན་པ་ཡིན་ན། མ་ཐོན་བར་དུ་དབྱིན་ཇི་ཡིས་རྒྱལ་ཁབ་སུ་ལའང་ཚོང་འབྲེལ་གྱི་གན་རྒྱ་བཞག་མི་ཆོག་པས། ད་ལྟ་དབྱིན་ཇི་བ་རྣམས་གཟེབ་ཏུ་ཚུད་པའི་བྱའུ་ལྟར་གནས་སྐབས་ཀྱི་རིང་དུ་ཅི་བྱ་གཏོལ་མེད་ཀྱི་གནས་སུ་བརྫངས་བཞིན་ཡོད།

ཡོ་མནའ་ཡིས་དབྱིན་ཇི་བ་རྣམས་ཀྱིས་འགན་མི་འཁུར་བ་ཁེ་ཕན་ཁོ་ན་བསམ་ན་དྲང་བོ་མིན་ཁར། དབྱིན་ཇི་ཕྱི་རོལ་ཏུ་ཐོན་ཡང་ཁེ་ཕན་ནང་དུ་འདུག་མཁན་ལྟར་སྤྲད་པ་འམ། ལྷག་པ་ཞིག་སྤྲོད་དགོས་ན། དེ་ནི་ཡོ་མནའ་ཡི་ནང་དུ་འདུག་མཁན་རྣམས་ལ་མ་དྲང་བ་འགྱུར་བ་མ་ཟད། མ་འོངས་བར་འདུག་མཁན་རྣམས་ཀྱིས་ཀྱང་དབྱིན་ཇི་ལ་མིག་དཔེ་ལྟོས་ནས་ཕྱི་རོལ་ཏུ་ཐོན་ངེས་ཡིན་པས། དབྱིན་ཇི་ལ་འདུག་མཁན་ལྟར་ཁེ་ཕན་སྤྲད་མི་ཐུབ་ཅིང་། གལ་སྲིད་སྤྲད་དགོས་ན་དེ་ལྟར་འགྲོ་འོང་གི་རང་དབང་སོགས་ཡོ་མནའ་ཡི་རྩ་བའི་ཆ་རྐྱེན་རང་དབང་བཞི་དབྱིན་ཇི་ཡིས་ངོས་ལེན་བྱེད་ཚུལ་བརྗོད་བཞིན་ཡོད། དེ་ལྟར་རང་དབང་བཞི་ངོས་ལེན་བྱས་བ་ཡིན་ན་དབྱིན་ཇི་ཕྱི་རོལ་ཏུ་ཐོན་པར་སྙིང་བོ་མེད་པ་འགྱུར་བས། དབྱིན་གཞུང་གིས་ངོས་ལེན་བྱེད་དཀའ་བར་ཆགས་ཀྱི་ཡོད།

གལ་སྲིད་དབྱིན་བ་རྣམས་ཀྱིས་ཡོ་མནའ་དང་གྲོས་མོལ་མ་བྱེད་པ་པ་ཕྱི་རོལ་ཏུ་ཐོན་ཆོག་ཀྱང་དེ་ལྟར་ཐོན་པ་ཡིན་ན། ངན་ཐོར་ཡིན་པས་ཡོ་རོབ་དང་དབྱིན་ཇི་ཡི་ཚོང་འབྲེལ་དང་། རྒྱལ་དོན་གྱི་འབྲེལ་བར་ལ་ཧ་ཅང་གི་གནོད་སྐྱོན་ཚབས་ཆེན་འགྲོ་ཁར། ལྷག་པར་དུ་ད་ལྟ་ཡོ་རོབ་ཏུ་གནས་སྡོད་བྱེད་མཁན་དབྱིན་མི་དང་། ཡོ་མི་དབྱིན་ཇི་རུ་གནས་སྡོད་བྱེད་མཁན་རྣམས་ལ་ཁ་ཐུག་གིས་གྱོང་གུད་ཕོགས་པ་མ་ཟད། དབྱིན་ཇི་ཡི་ཚོང་ཟོག ༤༤% ཡོ་རོབ་ཀྱི་རྒྱལ་ཁབ་ཉེར་བདུན་ལ་བཙོང་བཞིན་ཡོད་པས། དབྱིན་ཇི་ལ་ཚོད་མེད་ཀྱི་གྱོང་གུད་ཕོགས་ངེས་རེད། དེ་བརྟེན།་སི་ཁོ་དྲི་ལན་དྲི་དང་། དབྱིན་ཇིའི་ནང་ཁུལ་གྱི་ཚོགས་པ་དང་། སྒེེར་བ་མང་པོས་དེ་ལྟར་ངན་ཐོར་བྱེད་རྒྱུ་ལ་མཐའ་གཅིག་ཏུ་ངོ་རྒོལ་བྱེད་ཀྱིན་ཡོད་ཁར། སྲིད་བློན་མཱེ་ཡིས་ཀྱིས་ང་ཚོ་མགོ་སྐོར་བཏང་སོང་ཞེས་ནས་སྐྱོན་བརྗོད་ཤུགས་ཆེན་བྱེད་ཀྱི་ཡོད།

ཁག་གཅིག་གིས་དབྱིན་ཇི་ཡོ་རོབ་ནང་དུ་འདུག་མིན་གྱི་འོས་བསྡུ་གཉིས་པ་ཞིག་འགྲོ་དགོས་བའི་འདོད་ཚུལ་བཏོན་བཞིན་ཡོད་ཁར། གལ་སྲིད་དབྱིན་ཇི་ཡོ་རོབ་ནས་ཐོན་པ་ཡིན་ན། སི་ཁོ་ལན་དྲི་ཡིས་ཁོ་ཚོ་དབྱིན་ཇི་ནས་ལོགས་སུ་ཐོན་རྒྱུ་ཡི་འོས་བསྡུ་བྱེད་དགོས་ཚུལ་བརྗོད་ཀྱིན་ཡོད། དེ་བརྟེན། དབྱིན་བློན་ཅི་བྱ་གཏོལ་མེད་དུ་གྱུར་ཞིང་། དཀའ་ངལ་དེ་དག་སེལ་ཆེད་དུ་ཉེ་ཆར་ལོ་འདིའི་ཟླ ༦ ཚེས ༨ ཉིན་ཛ་དྲག་གིས་དབྱིན་བློན་གསར་བ་འདེམས་རྒྱུའི་འོས་ཤོག་བསྡུ་རྒྱུ་ཡི་གསལ་བསྒྲགས་གནང་ཡོད། དེ་བརྟེན། ད་ལྟ་འོས་མི་ལ་ཞུགས་མཁན་གྱི་ཆབ་སྲིད་ཚོགས་པ་ཆུང་ཆུང་ཞིག་གིས་གལ་སྲིད་ཁོ་ཚོ་མི་མང་གིས་སྲིད་བློན་དང་། གཞུང་འཛིན་པར་འདེམས་པ་ཡིན་ན། དབྱིན་ཇི་ཡོ་རོབ་ནས་འདུག་མིན་གྱི་འོས་བསྡུ་གཉིས་པ་ཞིག་འགྲོ་རྒྱུའི་གོ་སྐབས་སྤྲད་རྒྱུ་ཡིན་ཚུལ་བསྒྲགས་འདུག

ཧྥ་རན་སི་དང་འཇར་མན་གཉིས་ནི་ཡོ་མནའ་ཡི་ཀ་བ་གཉིས་ཡིན་ཞིང་། ཧྥ་རན་སིའི་སྲིད་འཛིན་འོས་མི་ལི་ཕིན་ཧྥ་རན་སིའི་སྲིད་འཛིན་ལ་རྒྱལ་ཁ་ཐོབ་པ་ཡིན་ན། ཡོ་རོབ་ཀྱི་ཀ་བ་གཅིག་ལ་ཆག་སྐྱོན་འབྱུང་བས། ཡོ་མནའ་གནས་རྒྱུ་ཧ་ཅང་གི་དཀའ་འཕྲད་ངེས་རེད། གལ་སྲིད་གནས་ཀྱང་སྔ་ལྟར་ཡོ་མནའ་ལ་སྟོབས་ཤུགས་མེད་པས། དབྱིན་ཇི་སོགས་ཡོ་རོབ་ནས་ཐོན་མཁན་རྣམས་ལ་སྔ་ལྟར་གནོད་ཤུགས་སྤྲད་མི་ཐུབ་ཁར། ཡོ་མནའ་ཡི་ནང་དུ་འདུག་མཁན་རྣམས་ལ་སྔ་ལྟར་ཁེ་ཕན་སྤྲད་མི་ཐུབ་པས། དབྱིན་ཇིའི་ཡོ་མནའ་དགྲ་འཛིན་པ་རྣམས་ལ་ཚོ་ལ་མཚོན་ན། ད་ལྟ་ལི་ཕིན་ལ་རྒྱལ་ཁ་ཐོབ་རྒྱུ་ནི་ཁོ་ཚོའི་འདོད་ཐོག་གི་རྟ་དང་། བྱ་བར་ལམ་འགྲོ་ཡོང་བྱེད་དུ་ཆགས་ཡོད།  དེ་བརྟེན། ཁོ་ཚོ་དང་ཨུ་རི་སུས་གང་ཐུབ་ཀྱིས་ལི་ཕིན་ལ་རྒྱབ་སྐྱོར་བྱེད་ཀྱིན་ཡོད་ལ། ཆེ་ཁི་རྒྱལ་ཁབ་ནང་དུ་རྟེན་གཞི་བྱས་བའི་ཨུ་རི་སུའི་དངུལ་ཁང་གིས་ཀྱང་ལི་ཕན་གྱི་སྲིད་འཛིན་འོས་མིའི་དྲིལ་བསྒྲགས་དང་། ལས་འགུལ་གྱི་ཆེད་དུ་མ་དངུལ་གཡར་ཡོད། རྒྱུ་མཚན་ནི། མོའི་ཚོགས་པ་ལ་ཨུ་རི་སུས་མ་གཡར་བ་ཡིན་ན་གཡར་མཁན་དཀོན་པས་རེད།

 

• ཁྲོ་རྒན་དང་ཧྥ་རན་སིའི་འོས་བསྡུ། དབྱིན་ཇི། 

ཨ་རིའི་ཁྲོ་རྒན་གྱིས་དེ་སྔོན་མངོན་སུམ་འཛེམ་མེད་ཀྱིས་དབྱིན་ཇི་ཡོ་རོབ་ནས་ཐོན་པ་ལ་དགའ་བསུ་མང་དུ་ཞུས་ཡོད་ཀྱང་། ཟླ ༣ ཚེས ༡༧ ཉིན་འཇར་མན་གྱི་སྲིད་བློན་མར་ཁོ་ལ་ཐུག་རྗེས་དང་། ཡོ་རོབ་ཀྱི་སྲིད་འཛིན་ཡོན་ཁོས་ཀྱིས་ཁྲོ་རྒན་གྱིས་ཡོ་རོབ་ཁ་བྲལ་བཏང་རྒྱུ་ལ་རྒྱབ་སྐྱོར་བྱས་བ་ཡིན་ན། ཁོས་ཨ་རིའི་མངའ་སྡེ་ཨོ་ཧཱ་ཡོ་དང་། ཁྲལ་ཁི་གསེ་སི་ཨ་རི་ནས་ལོགས་སུ་འགྲོ་རྒྱུར་རྒྱབ་སྐྱོར་བྱེད་རྒྱ་ཡིན་ཞེས་ནས་དགག་པ་ཚ་ནན་བརྒྱབས་ཁར། ཡོ་མནའ་ཡི་མགོ་གཙོ་དུ་མས་ཀྱང་ཁོ་ལ་དེ་ལྟར་ཉེན་བརྡ་དང་། སློབ་གསོ་བཏང་བས། ད་ལྟ་ཁྲོ་རྒན་གྱིས་དབྱིན་ཇིའི་ཡོ་རོབ་དགྲ་འཛིན་པ་རྣམས་དང་བར་ཐག་རིང་དུ་གང་ཐུབ་ཀྱིས་སྤྱང་པོའི་ལམ་ནས་བཏང་ཞིང་། ཧྥ་རན་སིའི་སྲིད་འཛིན་འོས་མི་མ་རེས་ལི་ལ་དངོས་སུ་རྒྱབ་སྐྱོར་ཤུགས་ཆེན་བྱེད་ཕོད་མེད།

ཁྲོ་རྒན་གྱིས་དེ་ལྟར་གནང་དགོས་དོན་ཡང་ཁོས་ཡོ་རོབ་ཀྱི་རྒྱལ་ཁབ་ཉེར་བདུན་ལ་ཚོང་འབྲེལ་དང་། བདེ་འཇགས་ཀྱི་འབྲེལ་བ་ཡག་པོ་ཞིག་འཇོག་རྒྱུ་ཡིན་ཞིང་། དེ་འཇོག་རྒྱུ་ནི་དབྱིན་ཇི་རྒྱལ་ཁབ་གཅིག་ལ་ལྟོས་ན་གལ་ཆེ་ཁར། མར་ཁོ་ཡིས་ཁོ་ལ་ཚོང་འབྲེལ་དང་། བདེ་འཇགས་ཀྱི་གན་རྒྱ་ཡག་པོ་ཞིག་འཇོག་རྒྱུར་ངོས་ལེན་གནང་འཆར་བྱས་བས། ཁྲོ་རྒན་གྱིས་དབྱིན་ཇི་ཆེད་དུ་ཁེ་ཕན་དེ་དག་བློས་མ་བཏང་ཐུབ་ཅིང་། ཕྱོགས་གཞན་ནས་ཁོས་དབྱིན་ཇི་བེད་སྤྱོད་བཏང་ནས་ཡོ་མནའ་ཡི་ལག་ནས་ཁེ་བཟང་ཡང་ལེན་ཟིན་བཞིན་ཡོད་པས་རེད་འདུག

ད་དུང་ལྐོག་གྱུར་གྱི་རྒྱུ་མཚན་ཞིག་ཡོད་པ་ནི་དབྱིན་ཇི་ཡོ་རོབ་ནས་ནམ་ཐོན་མི་ཤེས་ཤིང་། གལ་སྲིད་ཐོན་ཡང་ཐོན་རྒྱུ་ལ་ལོ་གཉིས་འགོར་བས། ལོ་གཉིས་ནི་ཁྲོ་རྒན་ལ་མཚོན་ན་ཁོའི་སྲིད་འཛིན་གྱི་ལོ་ཡུན་གཉིས་པས་དེ་ལྟར་འདས་བ་ཡིན་ན། ཁོས་ཁས་ལེན་གནང་བཞིན་ཨ་རིའི་དཔལ་འབྱོར་ཡར་རྒྱས་སུ་བཏང་མི་ཐུབ་པས། མ་ཐུབ་ཚེ་རྗེས་མའི་སྲིད་འཛིན་འགྲན་རྩོད་ཀྱི་སྐབས་སུ་ཁོ་ལ་དཀའ་ངལ་འཕྲད་པས་རེད།

ཉེ་ཆར་ཁོས་ཁྲོས་ཁྲར་རྒྱུད་ནས་ལི་ཕིན་ནི་ཡག་པོ་ཡོད་ཚུལ་བརྗོད་ཀྱང་། གསལ་འགོད་པས་ཁོའི་མགྲིན་ཚབ་པ་ཕན་གསའ་ལ་སྐད་ཆ་དེ་ནི་ཁྲོ་རྒན་གྱིས་ཧྥ་རན་སིའི་སྲིད་འཛིན་འོས་མི་ལི་ཕིན་ལ་རྒྱབ་སྐྱོར་བྱས་བ་རེད་དམ་ཞེས་ནས་འདྲི་སྐབས་སུ། མགྲིན་པས་དེ་ནི་མ་རེད། ཁྲོ་རྒན་གཞུང་གིས་ཧྥ་རན་སིས་མི་མང་གི་འདེམས་པའི་འོས་མི་སུ་ལ་ཡིན་ཡང་། འབྲེལ་ལམ་ཡག་པོ་ཉར་རྒྱུར་འབད་པ་ལས། འོས་མི་ལ་དབྱེ་འབྱེད་བྱེད་ཀྱི་མེད་ཅེས་བརྗོད་འདུག གནས་ཚུལ་འདི་ལས་ཁྲོ་རྒན་གྱི་བསམ་བློ་འགྱུར་བ་འམ། ཡང་ན་གནོད་ཤུགས་སམ། ཁེ་ཕན་ཞིག་གི་དབང་གིས་ཁྲོ་རྒན་གྱིས་འོས་མི་སུ་ལའང་། ད་ལྟ་རྒྱབ་སྐྱོབ་བྱེད་ཀྱི་མི་འདུག འོན་ཀྱང་། ཡོ་རོབ་སྲིད་འཛིན་གྱིས་སྔ་གྱི་གོམས་སྲོལ་ལས་ལྡོག་སྟེ་འོས་མི་མ་ཁི་རོན་ལ་རྟེན་འབྲེལ་ཞུས་འདུག འཇར་མན་གྱི་མར་ཁོ་ཡིས་ཀྱང་དེ་ལྟར་ཞུས་འདུག གང་ལྟར་ཟླ ༥ ཚེས ༧ ཉིན་ཁོ་གཉིས་ཀྱི་མཐའ་མའི་རྒྱལ་ཕམ་དབྱེ་དབྱེ་བྱེད་པས་སྔོན་འགྲོའི་རྒྱལ་ཁ་ནས་མཐའ་མའི་ཐག་གཅོད་བར་དུ་བདུན་གཉིས་ཙམ་ལས་མེད་ཕྱིན། དུས་ཡུན་དེ་ནི་ཁོ་གཉིས་ཀྱིས་གང་ཐུབ་ཀྱིས་དམ་འཛིན་གནང་ཞིང་རང་གི་རྒྱབ་སྐྱོར་འཚོལ་བའི་འགྲན་རྩོད་ཀྱི་བྱེད་ཀྱིན་ཡོད་ལ། གཉིས་ཀས་དྲིལ་བསྒྲགས་ཀྱི་ལས་འགུལ་ཤུགས་ཆེ་སྤེལ་མུས་རེད།

http://uk.businessinsider.com/eu-wants-up-to-60-billion-exit-fee-in-brexit-negotiations-article-50-2016-11

http://www.telegraph.co.uk/news/2017/03/17/donald-trump-meet-angela-merkel-white-house-make-break-meeting/