ཧེ་ཙི་ཅིའི་ཕྱིར་ལྕགས་ལམ་དུ་འཕྲེད་ཀྱིས་ཉལ་ཏེ་རང་སྲོག་དོར་བ་རེད། ༼བོད་འགྱུར་མ༽

རྟ་ནག་སྐལ་བཟང་ལུང་རིགས།

སྤྱི་ ལོ་གཅིག་སྟོང་དགུ་བརྒྱ་གྱ་དགུ་ལོའི་ཟླ་གསུམ་པའི་ཚེས་ཉེར་དྲུག་ཉིན་ཧྲན་ཧེ་ ཀོན་འགག་སྒོ་རུ་ཧེ་ཙི་ལྷིང་འཇགས་ཀྱི་ངང་ནས་ལྕགས་ལམ་དུ་འཕྲེད་ཀྱིས་ཉལ་སོང་ལ། ཁོང་གི་ལུས་སྟེང་དུ༼དམ་པའི་གསུང་རབ༽ཀྱི་ཁ་ཕྱེ་ནས་ཡོད། མེ་འཁོར་ཞིག་ལྡིར་སྐད་དང་བཅས་ཏེ་རྒྱང་རིང་ནས་བསླེབས་སོང་། སྐྱེས་སྟོབས་ཀྱི་ཤེས་རབ་འབར་བའི་སྙན་ངག་པ་ཞིག་འདི་ལྟར་འཇིག་རྟེན་གཞན་ཞིག་གི་ཁམས་སུ་བསྙེགས་སོང་ངོ་།།

ཧེ་ཙིའི་གཉུག་གནས་ཀྱི་མིང་ལ་ཁྲ་ཧེ་ཧྲིན་དང་། ཨན་ཧེ་ཁྲ་ཝན་གྱི་མི་ཡིན་སྐད་དོ།། སྤྱི་ལོ་གཅིག་སྟོང་དགུ་བརྒྱ་རེ་བཞི་ལོའི་ཟླ་གསུམ་པར་སྐྱེས། སྤྱི་ལོ་གཅིག་སྟོང་དགུ་བརྒྱ་དོན་བཞི་ལོ་སྟེ་རང་ལོ་བཅོ་ལྔར་སོན་པའི་ལོ་དེར་པེ་ཅིན་སློབ་ཆེན་གྱི་ཁྲིམས་ལུགས་སྡེ་ཚན་དུ་ཞུགས་ཤིང་། རྗེས་སུ་རྒྱ་ནག་སྲིད་ཁྲིམས་སློབ་གྲྭ་ཆེན་མོའི་དགེ་རྒན་དུ་ལས་བགོས་བྱས། ང་ཚོས་ཁོང་གི་སྐྱེ་འཆིའི་ལོ་ཚིགས་ལ་ཕྱོགས་བསྡོམས་ཤིག་བྱས་ཚེ་འདི་ལྟར་མངོན་འོང་སྟེ། སྤྱི་ལོ་གཅིག་སྟོང་དགུ་བརྒྱ་རེ་བཞི་ལོའི་ཟླ་གསུམ་པར་སྐྱེས་ཤིང་། གཤེགས་པའི་དུས་ཚོད་ནི་ཟླ་གསུམ་པའི་ཚེས་ཉེར་དྲུག་དང་། འཚོ་གཞེས་ཀྱི་དུས་ཚོད་ཀྱང་བགྲང་བྱ་ཉེར་དྲུག་འབའ་ཞིག་ཡིན་པས། མངོན་གྱུར་བའི“ཉེར་དྲུག”འདི་གཉིས་ནི་མ་བགྲོས་རང་འགྲིག་གིས་འཁོར་འོང་བ་ཞིག་མ་རེད་དམ།

ཧེ་ཙི་ནི་སྔོན་རྟོགས་མངའ་བའི་སྙན་ངག་སྨྲ་བ་བོ་ཞིག་སྟེ། ཁོང་ གི་ལུས་སྟེང་དུ་ལུང་བསྟན་རང་བཞིན་དང་། བློ་འབྱེད་རང་བཞིན་གྱི་དངོས་པོ་དག་ཆད་མེད་ཀྱིས་གྲུབ་པས་རྨོངས་པ་དག་ལ་ཤེས་ རབ་བསྐྱེད་པའི་གོ་ཆོད་པ་ཡིན་སྟེ། འདི་ནི་ཧེ་ཙི་ལྷ་སྒྲུང་དུ་གྲུབ་པའི་རྒྱུ་རྐྱེན་འགངས་ཆེ་བ་ཞིག་རེད་དོ།། ཧེ་ཙིས་སྙན་ངག་ནི་ཚེ་སྲོག་ཏུ་ལྟ་ལ། སྙན་ ངག་གིས་ཁོང་གི་ཚེ་སྲོག་གི་དོན་དངོས་འབྲི་བ་དང་། ཚེ་སྲོག་གི་དོན་དངོས་མཚོན་པ་དང་། ཚེ་སྲོག་གཞོམ་པར་མཛད་པ་དང་། ཚེ་སྲོག་མཇུག་སྒྲིལ་བྱེད་ཀྱང་སྙན་ངག་ཏུ་ལྟའོ།། ཁོང་ གི་སྙན་ངག་ཁྲོད་དུ་ང་ཚོས་ཁོང་གི་ཚེ་སྲོག་གི་རྒྱུ་བ་སྟོར་བའི་ཆེས་མཐའ་མཇུག་ གི་འཆི་བའི་འདུ་ཤེས་དང་། འཆི་བའི་སྣང་ཚུལ་གསལ་བོར་རྙེད་ཐུབ་པ་ཙམ་དུ་མ་ཟད། འཆི་བའི་འདུ་ཤེས་དང་སྣང་ཚུལ་དག་ནི་དེ་འདྲའི་གསོན་ཉམས་མངའ་བ་ཞིག་དང་བབ་བརླིང་ཟོལ་མེད་ཅིག་ཡིན་པ་དེའོ།། ཁོང་འཚོ་གཞེས་སྐབས་སུ་སྐྱེ་བོ་རྣམས་རྨོངས་གཉིད་ལས་བསླངས་པར་སུས་ཀྱང་ཡིད་གཟབ་བགྱི་བ་མི་སྲིད་ལ། མཚམས་ལན་རེར་ཡིད་གཟབ་བགྱིད་པའི་དབང་དུ་བཏང་ནའང་ཁོང་གི་འཆི་བའི་སྣང་ཚུལ་ལ་དོགས་ཟོན་བྱས་པ་མེད་དོ།། དེ་ལྟ་ནའང་། ད་ ཆ་སྐྱེ་བོ་དག་གི་དྲན་ངོར་ཁོང་གི་འཆི་བའི་སྣང་ཚུལ་དག་ཝ་ལེ་ཝ་ལེར་འཁོར་འོང་ བའི་སྐབས་ཉིད་དུ་སྙན་ངག་པ་ཁོང་ཕྱིར་མི་ལྡོག་པའི་ལམ་དུ་ཆས་སོང་ངོ་།། ཚེ་ཚེ་རབས་རབས་སུ་ཕྱིར་འོང་བ་མེད་དོ།།

ཧེ་ཙི་འཚོ་གཞེས་སྐབས་ཀྱི་གྲོགས་པོ་ཤིས་ཁྲོན་གྱིས་འདི་སྐད་དུ་སྨྲས་ཏེ། ཧེ་ཙི་ནི་འཆི་བ་དང་བརྩེ་བས་སྦྲེལ་ཡོད་པའི་མི་ཞིག་སྟེ། འཆི་བའི་འདུ་ཤེས་ནི་ཁོང་གི་སྙན་ངག་གི་བརྗོད་བྱ་འགངས་ཆེ་བ་དེ་ཡིན་པ་དང་། ཆེས་མཐའ་མཇུག་ཏུ་རང་སྲོག་སྟོར་བའི་འདུ་ཤེས་ཀྱང་སྙན་ངག་གིས་གསལ་བོར་མཚོན་ནས་ཡོད་པ་དེའོ།། ནེམ་ནུར་མི་དགོས་པ་ཞིག་ནི་ཁོང་མ་གཤེགས་པའི་སྔ་རོལ་ཏུ་བྲིས་པའི་སྙན་ངག་འགའ་ཞིག་གི་དུམ་བུ་ཞིག་སྟེ། སྤྱི་ལོ་གཅིག་སྟོང་དགུ་བརྒྱ་གྱ་དགུ་ལོའི་སྤྱི་ཟླ་གསུམ་པའི་ཚེས་བཅུ་བཞིར་བྲིས་པའི་༼དཔྱིད་ཀ ཧེ་ཙི་བཅུ༽རུ་འཁོད་པ་འདི་འདྲ་སྟེ། “དཔྱིད་ཀར། ཀླ་ཀློའམ་སྡུག་བསྔལ་གྱི་ཧེ་ཙི། ལྷག་སོང་བ་འདི་ནི། ཆེས་མཐའ་མཇུག་གི་འདི་ནི། འདི་ནི་མཚན་ལྗོངས་ཀྱི་བུས་པ་ཞིག་སྟེ། དགུན་གཞུང་དུ་གྱར་ཞིང་། འཆི་བ་ལ་སྨོན་པ་ཞིག་གོ།” ཧེ་ཙི་ཡིས་འདི་ལྟར་སོམ་ཉི་མི་དགོས་པའི་འཆི་བའི་བསྒྲགས་གཏམ་སྤེལ། འདི་ནི་སྡུག་བསྔལ་གྱི་ཧེ་ཙི་ཡིན་ལ། འཆི་བའི་སྐོབས་སུ་ཚུད་ཅིང་ནམ་ཡང་ཐར་བར་དཀའ་བ་སྟེ་འདི་ནི་རེ་ཐག་ཡོངས་སུ་ཆད་པའི་སྙན་ངག་པ་ཞིག་གོ། རྩ་ཐོར་དུ་ཕྱིན་པའམ་རེ་སྨོན་གང་ཡང་མེད་པའི་རྣམ་ཤེས་ཤིག་སྟེ། རླུང་ཆེན་ཤར་ནས་ནུབ་ཏུ་རྒྱུ་ཞིང་། བྱང་ནས་ལྷོ་རུ་རྒྱུ་ལ། ཅི་ཡང་མི་མཐོང་བའི་མཚན་ལྗོངས་དང་སྐྱ་རེངས། ཁྱེད་ཀྱིས་བསྙད་པའི་འོད་ཟེར་ཞེས་པ་དེ་ཡང་སྙིང་ཅི་ཞིག་ཡིན་ནམ།

ཧེ་ཙི་མ་གཤེགས་པའི་སྔོན་དུ་གྲོགས་པོ་རེ་འགའ་དང་བསྡོངས་ནས་རང་སྲོག་རང་གཅོད་ཀྱི་ཐབས་ལམ་ལ་དཔྱད་གླེང་སྤེལ་མྱོང་ལ། ལྕགས་ལམ་དུ་འཕྲེད་ཀྱིས་ཉལ་ནས་རང་སྲོག་དོར་བ་ནི་ཆེས་མཐའ་མཇུག་གི་བདམས་ཀ་ཡིན་པ་དེའོ།། ཧེ་ཙིའི་གྲོགས་པོ་ཤིས་ཁྲོན་གྱིས་བསྙད་པ་ལྟར་ན། “གནམ་གྲུ་ལས་མཆོངས་པ་ནི་ཕལ་ཆེར་ཡོང་མི་སྲིད་པའི་བདམས་ཀ་ཞིག་ཡིན་པས་རེད།” དེ་ལྟ་ནའང་། དོན་རྐྱེན་འདི་ལས་སླ་བོའི་སྒོ་ནས་ཚད་འདི་འདྲར་བསླེབ་མི་སྲིད་པ་ཡིན་པས། “ཕལ་ཆེར་ལྕགས་ལམ་དུ་འཕྲེད་ཀྱིས་ཉལ་བ་ནི་ཆེས་སྟབས་བདེ་དང་། ཆེས་དྭངས་གཙང་། ཆེས་གཟི་བརྗིད་མངའ་བའི་བྱེད་ཐབས་ཤིག་ཡིན་པ་དེའོ།།”

དེ་ལྟ་ནའང་ང་ཚོས་རྒྱུན་བསྲིངས་ནས་ཁོང་གི་སྙན་ངག་ལ་བལྟས་ཏེ་ཡོང་ན། ལྕགས་ ལམ་དུ་རང་སྲོག་དོར་བའི་འཆི་བའི་འདུ་ཤེས་དེ་རྙེད་ནས་འདུག་སྟེ། དེ་ནི་ཁོང་གི་སྙན་ངག་ཁྲོད་དུ་ལུ་གུ་རྒྱུད་དུ་འབྱུང་བཞིན་པའི་ལྷ་ཡུལ་ཞེས་པ་ དེའོ།། ཕལ ཆེར་རང་ཉིད་ཀྱི་ཚེ་སྲོག་མཇུག་སྒྲིལ་བྱེད་དུ་གྱུར་པའི་སྙན་ངག་སྟེ། ༼ཉིན་བྱེད༽ནི་མགོ་བརྩམས་དུས་ནས་བརྙན་རིས་ཤིག་སྟེ། ནམ་མཁའ་དང་ས་གཞིའི་བར་དུ་ལྷིང་འཇགས་ཀྱི་ཐེམ་སྐས་ཤིག་གིས་སྦྲེལ་ནས་ཡོད་པ་དེའོ།། ཧེ་ ཙི་ཡིས་གནམ་གྱི་ཐེམ་སྐས་ཞེས་བྱ་བ་དེས་བསམ་བློའི་བླ་སྲོག་གི་དོན་སྙིང་མཚོན་ པར་བགྱིས་ཡོད་ཅིང་། གནམ་གྱི་ཐེམ་སྐས་ནི་ལྷ་ཡུལ་དུ་བགྲོད་པའི་ལྡོག་མེད་ཀྱི་བཤུལ་ལམ་ཡིན་པར་ དགོངས་ཡོད་པའོ།། སྙན་ངག་པས་དངོས་གནས་གནམ་གྱི་ཐེམ་སྐས་སྟེང་དུ་སྙན་ངག་དབྱངས་ལ་གྱེར་བའི་འགོ་བརྩམས་ཟིན་ཏེ། “བུད་ཤིང་སྒྲུག་པོས་ཉིན་འདི་དག་ལ། མིའི་རིགས་ཀྱི་ཚང་ཚིང་དུ། ལྗོན་པ་དུམ་བུར་བགྱིས་ཏེ། ལྷ་ཡུལ་གྱི་ཐེམ་སྐས་རྙེད་ཟིན། དེ་རྗེས་ཐེམ་སྐས་ལ་ཞུགས་ཏེ་ལྷ་ཡུལ་དུ་བསྙེག་འགྲོ།” (༼ཉིན་བྱེད༽)

དངོས་གནས་སྙན་ངག་པ་གནམ་གྱི་ཐེམ་སྐས་སུ་བསྡད་དེ་ལྷ་ཡུལ་དུ་ཆས་སོང་བ་དེ་དང་། ལྷའི་གོ་འཕང་དུ་བསྙེགས་སོང་བ་དེ་དང་། ད་དུང་འཆི་བ་བོའི་ཚེ་སྲོག་གི་འདུ་ཤེས་ཁམས་སུ་བཞུད་སོང་བ་དེ་ཡིན་ཏེ། “ང་རང་གནམ་གྱི་ཐེམ་སྐས་སུ་འགྲེང་ནས་ཡོད། ཉིན་འདི་འགར་བདག་གིས་མཁའ་དབྱིངས་ཀྱི་ཕོ་ཉ་བ་མཐོང་ལ་ཉེ།” (༼ཉིན་བྱེད༽) སྙན་ངག་པས༼སྨག་གླུའི༽ཁྲོད་དུའང་གོང་མ་དང་གཅིག་མཚུངས་ཀྱི་བརྗོད་སྙིང་འདི་ལྟར་བསྟན་ནས་ཡོད་དེ། “གནམ་གྱི་ཐེམ་སྐས་སྟེང་གི་སྨག་གླུ། ལྷ་ཡུལ་གྱི་སྨག་གླུ། སྨག་གླུ་ཡིས་ཁོ་བོ་གླུ་རུ་བླངས་སོང་།”དེའི་རྐྱེན་གྱིས་སྙན་ངག་པས་ལྕགས་ལམ་དུ་རང་སྲོག་དོར་བར་གཏིང་ཟབ་པའི་དོན་སྙིང་ཞིག་ཡོད་པ་བསྙད་མ་དགོས་སོ།།

གལ་སྲིད་མི་རེ་འགའ་སྨག་ཁྲོད་ཀྱི་མེ་འཁོར་ལ་ཞུགས་ཡོད་ཚེ་ཁོ་ལ་ངེས་ཅན་དུ་འདི་འདྲའི་མྱོང་བ་ཞིག་བདོག་པའི་སྲིད་པ་ཡོད་དེ། ཐག་ཉེ་བའི་གློག་འོད་གཤམ་དུ་རྒྱང་རིང་རྒྱང་རིང་ལ་བལྟས་ཚེ་མཐའ་མི་བདོག་པའི་ལྕགས་ལམ་ནི་ས་གཞི་ནས་ནམ་མཁར་འཕགས་ཤིང་། ནམ་མཁའི་པང་དུ་གདན་དུ་བགྱིས་འདུག་ལ། ཤིང་གི་སྐས་རིམ་རེ་རེ་ནི་མི་རྣམས་ཀྱི་སྔས་ཤིང་དུ་འོས་ཤིང་འཚམས་པ་དེའོ།། དེ་བས། ལྕགས་ལམ་དུ་ཤི་བའི་སྣང་ཚུལ་ནི་ལྷ་ཡུལ་གྱི་ཐེམ་སྐས་ཡིན་པར་སྙན་ངག་པས་སྙན་ངག་ཁྲོད་དུ་བསྟན་ཡོད་པར་མ་ཟད། དོན་དངོས་སུའང་ཁོང་གི་འཆི་བའི་འདུ་ཤེས་ཀྱི་བྱེ་བྲག་ཅིག་བསྟན་ཡོད་པ་དེའོ།།

སྙན་ངག་པས་ལྕགས་ལམ་དུ་རང་སྲོག་དོར་བ་ལ་ད་དུང་འགངས་ཆེ་བའི་བསམ་བློའི་ཡུལ་ལྗོངས་གཞན་ཞིག་གདའ་སྟེ། དེ་ནི་གས་ཆག་གི་གཟུགས་ཕུང་དེའོ།། ཧེ་ཙི་མ་གཤེགས་སྔོན་གྱི་ཤིན་ཏུ་ནས་རིང་བའི་དུས་ཚོད་ཁྲོད་དུ་བསམ་བློ་གས་ཆག་གི་ཕྱོགས་སུ་ཤོར་ཞིང་། རྗེས་སུའང་བསམ་བློ་གས་འཐོར་གྱི་ནད་གཞི་ཇེ་དྲག་ཏུ་ཕྱིན་པ་རེད་དོ།། (འདི་ནི་ཧེ་ཙི་མ་གཤེགས་ཡར་སྔོན་དུ་ཁྱིམ་ལ་བཞག་པའི་ཁ་ཆེམས་དེབ་ལས་རྙེད་ཐུབ་པ་གདའ་སྟེ། ཁ་ཆེམས་དེབ་ཏུ་བྲིས་པ་ལྟར་ན་མི་ཁ་ཤས་ཀྱིས་ཁོང་ལ་དོ་བསྡོ་བ་དང་མཐོ་འཚམས་པ་རེད་པས། ཁྱིམ་མི་དག་གིས་ཁོང་གི་སླད་དུ་དགྲ་ཤ་བརྩད་པའོ།།) དེར་བརྟེན། ཁོང་གི་སྙན་ངག་ཁྲོད་དུ་འཐོར་བ་དང་། ཆད་པ་དང་། ཆག་པ་སོགས་ནི་ཁོང་གི་སྙན་ངག་ཁྲོད་དུ་མར་ལ་ཏིལ་བཞག་ཟོལ་གྱིས་ཐིམ་ནས་ཡོད་དོ།། ཁོང་གི་སྙན་ངག་གིས་མངོན་པར་མཚོན་པ་ཞིག་ནི་ཁོང་གི་འཆི་བ་དང་དམ་དུ་སྦྲེལ་ནས་ཡོད་པའི་གས་ཆག་གི་གཟུགས་ཕུང་དེ་ཡིན་ཏེ། “ཡང་བསྐྱར་གས་འཐོར་དུ་ཕྱིན་པའི་ལུས་པོ། ཁངས་ཆར་བཞུར་སྟེ། ཟླ་བ་གཉིས་པར་མིག་ཆུ་འཐོར།” (༼སྐྱ་རེངས༽) “བདག་གིས་སྔ་ས་ནས་གླེང་མྱོང་། མགོ་བོ་གཏུབས་ནས་ཁྲག་དམར་བཞུར་བ་ནི་ཉིན་བྱེད་དོ།”(༼ཐོ་རངས༽) “ཆེས་ལྕི་བའི་མཁའ་དབྱིངས་ནས་ལྷུང་སྟེ། སྐམ་སའི་ས་གཞི་ལ་བརྡུངས་པས། མགོ་བོ་འདི་རྐང་ལག་བཞི་རུ་གྱེས་སོང་ངོ་།”(༼ཁམ་བུའི་མེ་ཏོག་གི་དུས་ཚིགས༽) “ཁྱེད་རང་རྨེག་མེད་དུ་གཞོམ་པའི་ན་ཟུག་དེས་ས་ཆེན་བྱིངས་ཀྱིས་མནན་སོང་།”(༼དཔྱིད་ཀ ཧེ་ཙི་བཅུ༽)

ང་ཚོས་མཐོང་ཐུབ་པ་ཞིག་སྟེ། གྱ་དགུ་ལོའི་ཟླ་གཉིས་པའི་ཚེས་ཉེར་གཉིས་ཀྱི༼སྐྱ་རེངས༽ནས་གྱ་དགུ་ལོའི་ཟླ་གསུམ་པའི་ཚེས་བཅུ་བཞིའི༼དཔྱིད་ཀ ཧེ་ཙི་བཅུའི་༽བར་དུས་ཡུན་ཤིན་ཏུ་ནས་ཐུང་བའི་ཉིན་ཉི་ཤུ་ལྷག་གི་ནང་དུ། “ཡན་ལག་དང་ཉིང་ལག་གཏུབས་ཤིག”དང་། “མགོ་བོ་གཏུབས་ཏེ་ཁྲག་དམར་བཞུར”། “རྨེག་མེད་དུ་གཞོམ་པའི་ན་ཟུག”སོགས་འཆི་བ་བོའི་འདུ་ཤེས་ཀྱི་ཁམས་དང་འབྲེལ་བའི་གསང་བ་སྣ་ཚོགས་ཤིག་སྙན་ངག་པའི་སེམས་སུ་གསལ་ལེར་ཤར་ཞིང་། སྙན་ངག་ཁྲོད་དུ་དྲག་ཏུ་རྒྱུ་བས་ང་ཚོས་ཡིད་ཆེས་བྱས་ན་ཆོག་པའི་གཏན་ཚིགས་ཤིག་རྙེད་པ་ནི། སྙན་ ངག་པའི་གས་ཆག་གི་གཟུགས་ཕུང་དང་འཆི་བ་བའི་བསམ་བློའི་ཡུལ་ལྗོངས་སུ་བདམས་པའི་ ལྕགས་ལམ་བཅས་ཀྱི་བར་དུ་གཅིག་ལ་གཅིག་བརྟེན་གྱི་འབྲེལ་བས་བཟུང་ཡོད་པ་དེ་ཙམ་ དུ་མ་ཟད། འཆི་བའི་སྔོན་བརྡ་རེད་ཅེས་ཀྱང་བཤད་ཆོག་པ་དེའོ།།

ཧེ་ཙི་ཧྲན་ཧེ་འགག་སྒོར་འགྲོ་བའི་དུས་ཉིད་དུ་གླེགས་བམ་བཞི་ཞིག་བསྣམས་ནས་ཡོད་དེ། ༼དམ་པའི་གསུང་རབ༽དང་། ཟོ་ ལ་ཡི༼ནགས་ཁྲོད་ཀྱི་འཚོ་བ༽ཧེ་ཡ་ཏའར་གྱི༼གདུང་གྲུ་ཁེར་རྐྱང་རྒྱ་མཚོར་ཞུགས་པ༽༼ ཁང་ལ་ཏིའི་བརྩམས་སྒྲུང་བདམས་སྒྲིག༽བཅས་སོ།། གླེགས་བམ་དེ་དག་ལས་ཤིན་ཏུ་ནས་འགངས་ཆེ་བ་ནི༼དམ་པའི་གསུང་རབ༽ཡིན་པ་ནི་བསྙོན་ དུ་མེད་དེ། སྙན་ངག་པའི་ཚེ་མཇུག་ཏུ་ཀློང་བརྡོལ་བའི་རིག་པ་དང་བསམ་པའི་ཁམས་ཡོད་ཚད་ཀྱང༼དམ་པའི་གསུང་རབ༽ལ་བརྟེན་ནས་བྱུང་བས་སོ།། དེ་ལྟ་ནའང་། ང་ཚོས་སྙན་ངག་པའི་སྙན་ངག་ཁྲོད་དུ་རྙེད་ཐུབ་པ་ཞིག་ནི། གསང་བ་ལྐོག་གྱུར་གྱི་༼དམ་པའི་གསུང་རབ༽ཏུ་བསྟན་པའི་འཆི་བའི་འདུ་ཤེས་ཀྱི་ཁམས་ནི་ཇི་འདྲའི་སྐྱི་གཡའ་བ་ཞིག་རེད་དེ། “གསུང་རབ་ཀྱི་སྔ་དུམ་ནི་བདག་གི་སྒྲོ་གཤོག་སྟེ། འོད་ཟེར་དཔག་ཏུ་མེད་དོ།། སྐབས་རེར་ནག་ཐིབ་ཐིབ་དང་མཚུངས་པའི་དེ་རིང་། གསུང་རབ་ཀྱི་ཕྱི་དུམ་ནི་དབྲེ་བོའམ་སྤྲོ་སྣང་སྟེ། བདག་གི་སྒྲོ་གཤོག་ལ་རྨ་ཁ་བརྟོལ་སོང་བ་ལྟ་ག་ལ་ཞིག ཡོ་ འཁྱོམས་ཆེ་བའི་སྟོང་ཁམས་ཀྱི་ས་གཞི་དང་། སྔ་དུམ་དང་ཕྱི་དུམ་མཉམ་སྡེབ་ཀྱིས་གྲུབ་པའི་དམ་པའི་གསུང་རབ་ནི་བཅད་ཅིང་ གཏུབས་པའི་བདག་གི་ཡན་ལག་རེད་དོ།།” (༼སྐྱ་རེངས།༽) འདི་ ཡིས་སྔ་དུམ་དང་ཕྱི་དུམ་གྱི་ཁྱད་པར་ལ་གསལ་བཤད་བགྱིས་པ་ཙམ་དུ་མ་ཟད། སྔ་དུམ་དང་ཕྱི་དུམ་གྱིས་གྲུབ་པའི་གསུང་རབ་ནི་དངོས་གནས་འཆི་བ་བོ་ཡིན་པར་ བསྟན་འདུག་སྟེ། “ཡན་ལག་གཏུབས་ཤིང་བཅད་པའི་བདག”ཅེས་པའོ།། འདི་ལྟར་གསུང་རབ་ཀྱི་འཆི་བའི་སྣང་ཚུལ་བསྟན་པ་ལས་གཞན་ད་དུང་། ལྕགས་ལམ་དུ་རང་སྲོག་དོར་བའི་འཆི་བའི་སྣང་ཚུལ་ཡང་མངོན་པར་མཚོན་པར་བགྱིས་པ་དེའོ།། དེ་ལྟ་ནའང་། མི་རྣམས་ལ་དོགས་པ་བསྐྱེད་སོང་བ་ཞིག་ནི་སྙན་ངག་པས༼དམ་པའི་གསུང་རབ༽ཀྱི་གསང་བ་ལྐོག་གྱུར་ལ་སྡང་སེམས་བཟུང་ཡོད་པ་འདྲ་སྟེ། དམ་པའི་གསུང་རབ༼སྤྲོ་སྣང་ངམ་དབྲེ་བོ༽ཞེས་པས་སོ།།

གསང་བ་ལྐོག་གྱུར་བ་འདི༼ཉིན་བྱེད༽ཁྲོད་དུ་དེ་ལས་གསལ་བོར་བསྟན་ཡོད་དེ། “དབྲེ་བོ་ཡི་གླེགས་བམ། ལག་དམར་གྱི་གླེགས་བམ་འདི་བདག་གི་མགོ་བོར་བསྣམས་ནས་ཡོད་པས། གཏིང་རིང་བའི་བརླན་ཁྲག་ལས་བདག་གིས་གཞན་ཅི་ཡང་མི་མཐོང་ངོ་།།” ད་དུང་གཤམ་གྱི་འདི་དག་གིས་དེ་ལས་ཀྱང་ངེས་ཤེས་འདྲོངས་ནུས་ཏེ། “གསུང་རབ་ཀྱིས་མི་འཆི་ལམ་དུ་འདེད། འཆི་བའི་མཇུག་འབྲས་ནི་བརླན་ཁྲག་འཕྲེད་ཀྱིས་བཞུར་བས། ཡང་བསྐྱར་རྒྱང་རིང་མཐོང་མི་ཐུབ་པ་དེའོ།།”

ཧེ་ཙི་ཡིས་ཧྲན་ཧེ་འགག་སྒོ་འཆི་སར་བདམས་ཀ་བྱས་པའི་ཚུལ་ལ། དེང་དུས་རྩོམ་རིག་དཔྱད་བརྗོད་པ་ཀྲོའུ་མོ་ཁིས་དམིགས་བསལ་གྱི་དོན་སྙིང་ཞིག་བཟུང་ནས་ཡོད་དེ། “རྒྱ་མཚན་ནི་འདི་ལྟ་སྟེ། ཧྲན་ཧེ་འགག་སྒོ་ནི་ལྕགས་རི་རིང་བོའི་འགོ་འཛུགས་ས་ཡིན་པ་དེ་དང་། ཆེས་ ཆེ་བའི་མི་རིགས་ཤིག་གི་སྒོ་ཆེན་ཡིན་པ་དེ་དང་། ལོ་རྒྱུས་སྟེང་ཆེས་ཆེ་བའི་སྲིད་དབང་སྒེར་སྤྱོད་ཀྱི་གོང་མའི་དབང་ཆ་དང་འབྲེལ་ ནས་ཡོད་པས་སོ།།” དེ་བས་ཧེ་ཙིའི་རང་སྲོག་རང་གཅོད་ནི་སྙིང་སྟོབས་ཀྱི་དམར་མཆོད་ཅིག་རེད་སྐད་དོ།།

དེ་ལྟ་ནའང་། ཤིས་ཁྲོན་གྱིས་བཤད་སྟངས་ནི་དེ་དག་སྣང་མེད་དུ་བཞག་པ་ཞིག་དང་། ཞྭ་དཔེ་ལྷམ་འགེབས་ཤིག་ཏུ་སྙམ་ནས་ཡོད་དེ། “དོན་དངོས་སྟེང་། ཧེ་ཙི་ཡིས་ཧྲན་ཧེ་འགག་སྒོ་ནི་འཆི་སར་བདམས་ཀ་བྱས་པ་གཞར་ནས་མ་ཡིན་ཏེ། ཧྲན་ཧེ་འགག་སྒོ་དང་ལུང་ཅ་ཡིན་བར་གྱི་མེ་འཁོར་དལ་ལམ་དེ་བདམས་ཀ་བྱས་ཡོད་པས་སོ།།” དེ་ལྟ་ནའང་། ཀྲོའུ་མོ་ཁིའི་གཟུགས་འདས་ཀྱི་ལྟ་ཚུལ་ཐལ་དྲགས་པ་དང་། ཤིས་ཁྲོན་གྱི་ལྟ་ཚུལ་ཡང་གུ་དོགས་པའི་ལམ་དུ་སོང་བ་རེད་དེ། འདི་ནས་མངོན་གསལ་དུ་མཐོང་བ་ཞིག་ནི་ཧྲན་ཧེ་འགག་སྒོ་ནི་ལོང་ཅ་ཡིན་གྱི་ས་གནས་སུ་གཏོགས་པས། ཧེ་ཙི་ཡང་གོ་དོན་དེའི་ཕྱོགས་སུ་བསྙེགས་པ་རེད་དོ།། དེ་དང་དུས་མཉམ་དུ་ཧེ་ཙི་ཡིས་ཧྲན་ཧེ་འགག་སྒོ་བདམས་པ་ལ་ངེས་པར་དུ་ཁ་ཕྱོགས་ཤིག་ཡོད་ལས་ཆེ་སྟེ། པེ་ ཅིན་དུ་ལྕགས་ལམ་དེ་འདྲའི་མང་བོ་ཞིག་བདོག་པ་དེས་སོ།། གལ་སྲིད་ཁ་ཕྱོགས་ངེས་ཅན་ཞིག་མི་ལྡན་ཚེ་ཧྲན་ཧེ་འགག་སྒོར་འཆི་དགོས་པའི་ངེས་པ་ ག་ལ་ཡོད་དེ་གཏན་ནས་མེད་དོ།། འདིས་ཀྱང་ང་ཚོ་ལ་གཏིང་ཟབ་པའི་བསམ་གཞིགས་ཤིག་གི་གཏིང་ལ་འཐེན་པར་བྱེད་པ་སྟེ། སྙན་ངག་པའི་སྙན་ངག་ཁྲོད་དུ་རི་རྒྱུད་དང་རྒྱ་མཚོ་ཞེས་པ་མང་དུ་གདའ་འོ།།

སྙན་ངག་པས༼ཐོ་རངས༽ཁྲོད་དུ་འདི་ལྟར་བྲིས་ཡོད་དེ། “སྐེ་གཅོད་སྟེགས་བུ་ནི་སྙིང་རྩ་ཡོད་ཚད་རྒྱུ་བའི་ས་ཆ་ཡིན། ང་དང་མཉམ་དུ་འགྲོ། ཀ་པ་ལ་གཡུག་ཞོག ཆང་གིས་སྦགས་པའི་རླངས་ཁྲག་སྟེ། སྐྱ་རེངས། ཉི་མ་གསར་བ་ཞིག་བསླེབ་ལ་ཉེ།” རྒྱ་མཚོ་དང་སྦྲེལ་ནས་བཤད་ན། སྙན་ངག་པས་རང་ཉིད་ནི་རྒྱ་མཚོའི་བུས་པ་ཡིན་པར་བསྙད་དེ། (མཚོ་སྐྱེས海生）ཞེས་པའོ།། དེ་དང་མཉམ་དུ༼ཞི་བདེ་རྒྱ་མཚོ་ལ་ཕུལ་བ༽ཞེས་པའི་སྙན་ངག་ཁྲོད་དུ། “དཀོན་ཅོག་གིས་སྡུག་ལ་སྦྱར་བའི་བག་གསར། ཁྱེད་རང་ཉིད་ཁྲག་གིས་བྱུགས་སོང་། ནམ་མཁའ། ཁྱེད་ཀྱི་ནང་རོལ་ནི་ཁེར་རྐྱང་གི་རྒྱ་མཚོའོ།།” འདི་ན་རྒྱ་མཚོ་རུ་འཆི་བའི་འདུ་ཤེས་ཀྱི་སྣང་ཚུལ་བདོག་ལ། གོང་དང་སྦྲེལ་ནས་བཤད་ན་ས་འཛིན་གྱི་པང་དུ་འཆི་བའི་འདུ་ཤེས་ཡོད་ཕྱིར། ཧྲན་ཧེ་འགག་སྒོ་ཡིས་གནས་ལུགས་ཀྱི་ཟུར་ཞིག་གསེད་དགྲོལ་བྱས་ནས་ཡོད་དེ། འདི་ནི་ཧྲན་ཧེ་འགག་སྒོ(བོད་སྐད་དུ་བསྒྱུར་ན་རི་མཚོ་འགག་སྒོ) བདམས་པའི་རྒྱུ་རྐྱེན་གཅིག་དེ་རེད་སྙམ་མོ།། དེ་ལྟ་ནའང་། འགྲེལ་བཤད་འདི་ལ་ཕལ་ཆེར་བཙན་འགྲེལ་གྱི་ཉམས་ཤིག་ཅིས་ཀྱང་ཡོད་ཨང་།

ཟླ་ གསུམ་པའི་ཚེས་ཉེར་ལྔ་ཉིན་སྙན་ངག་པ་ཧྲན་ཧེ་འགག་སྒོ་རུ་སྔ་དྲོ་གཅིག་དང་ཕྱི་ དྲོ་གཅིག་ལ་ཕར་འགྲོ་ཚུར་འོང་བྱས་ཤིང་། དེའི་རྗེས་ཀྱི་ཚེས་ཉེར་དྲུག་ལ་གཞི་ནས་འཕྲེད་ཀྱིས་ཉལ་སའི་ལྕགས་ལམ་ཕྱོགས་སུ་ སོང་སྟེ། ཆེས་མཐའ་མའི་དུས་ཚོད་ནི་ས་སྲོས་ཡིན་པ་དེའོ།། ང་ཚོས་ཀྱང་ཁོང་གི་སྙན་ངག་ཁྲོད་དུ་འཆི་བའི་སྣང་ཚུལ་དང་དུས་ཚོད་མཐོང་ཐུབ་པ་ཡིན་ཏེ། “དངོས་ གནས་ས་སྲོས་ཀྱི་དུས་ཚོད་རེད། མགོ་བོ་མེད་པའི་དཔའ་རྒོད་ཀྱི་མཛུབ་མོ་ཉི་མའི་གདན་དུ་ལྷུང་སོང་། མཛུབ་མོ་ཉི་མའི་གདན་དང་མཁའ་ཡི་ལམ་དུ་ལྷུང་སོང་། མིག་ལ་ཁྲག་དང་རྡུལ་གྱིས་ཁེངས།” (༼ཉིན་བྱེད༽) འདི་ནི་ཅི་འདྲའི་གསོན་ཉམས་ལྡན་པའི་འཆི་བའི་མགུར་གླུ་ཞིག་རེད་ཨང་། ད་དུང་ཅི་འདྲའི་གདུག་རྩུབ་ཆེ་བའི་འཆི་བའི་སྔོན་བརྡ་ཞིག་རེད་ཨང་།

མཚམས་འདིར་བསླེབས་པའི་མོད་ལ། ང་ཚོས་སྙན་ངག་པའི་སྙན་ངག་ཁྲོད་དུ་ཁོང་གི་ཆེས་མཐའ་མའི་འཆི་བའི་སྣང་ཚུལ་ཡོད་ཚད་བྱིངས་ཀྱིས་རྙེད་སོང་ངོ་།། འདི་དག་ནི་ཕལ་ཆེར་འབྲེལ་མེད་བཙན་གྱིས་སྦྱར་བ་ཡིན་ཡང་སྲིད་ལ། ལྟས་དབང་གིས་རང་འགྲིག་ཏུ་གྱུར་བ་ཡིན་ཡང་སྲིད་མོད། ང་ཚོས་ཡིད་ཆེས་བྱས་ཆོག་པ་ཞིག་ནི་སྙན་ངག་པའི་རང་ཉིད་ལྷ་ཡི་བརྡ་རྟགས་སུ་བགྱིས་ཡོད་པ་དེ་དང་། རང་ཉིད་རྨེག་མེད་དུ་གཞོམ་པར་ཇུས་འགོད་འཐུས་ཚང་དུ་བྱས་འདུག་པ་དེའོ།། ཅི་སྟེ་སྙན་ངག་པ་གང་འདྲ་ཞིག་ཏུ་གྱུར་ནའང་། ང་ཚོས་ཚེ་ཚེ་རབས་རབས་སུ་བྱིངས་ཀྱིས་བསྙེལ་དུ་མི་རུང་བ་ཞིག་ནི་ཟླ་གསུམ་པའི་ཚེས་ཉེར་དྲུག་ཉིན་གྱི་སྙན་ངག་པའི་གཟུགས་བརྙན་ཏེ། ཁེར་རྐྱང་། ཐེ་ཚོམ། ཡངས་ཤིང་དབེན་པ། བཞིན་མདངས་ཉམས་པ། སྐྱོ་བས་སྡུག་ལ་སྦྱར་བའམ་རེ་ཐག་ཡོངས་སུ་ཆད་པ་དེའོ།། ང་ཚོས་དེ་ལས་ཀྱང་ཡིད་ཆེས་བྱས་ན་ཆོག་པ་ཞིག་གདའ་སྟེ། སྙན་ངག་པས“སྙན་ངག་གི་སླད་དུ་སྲོག་གཏོང་བ”དང་། ད་དུང་། “འཆི་བའི་ཕྱིར་དུ་སྲོག་གཏོང་བའོ།།”

སྙན་ ངག་ནི་སྙན་ངག་པའི་སྲོག་ཏུ་གྲུབ་ཡོད་པ་དེ་དང་། སྙན་ངག་པའི་དཀོན་ཅོག་ཏུ་གྲུབ་ཡོད་པ་དེ་དང་། སྙན་ངག་དང་འཆི་བའི་བར་དུ་ཐུན་མོང་གི་དོན་སྙིང་ཞིག་བདོག་པ་དེ་ཡིན་ཏེ། “བདག་གི་མགོ་བོ་ནི་སྲེག་ཟ་དང་། དད་ཡུལ་ནི་བདག་གི་བེམ་པོའོ།།”ཞེས་པ་དེས་སོ།། སྙན་ངག་པའི་འཆི་བའི་བསྒྲགས་གཏམ་གྱིས་ལོ་རབས་བརྒྱད་ཅུ་བའི་དྭངས་གཙང་གི་སྙན་ངག་མཇུག་སྒྲིལ་བ་དང་དུས་མཉམ་དུ། ལོ་རབས་དགུ་བཅུ་བའི་མི་སྡུག་པ་དང་སྐྱུག་བྲོ་བའི་སྙན་ངག་གི་འཇིག་རྟེན་ཞིག་རྒྱང་རིང་དུ་གྱེས་སོང་ངོ་།།

སྙན་ངག་པ་སྡུག་བསྔལ་གྱིས་མནར་བ་དག་འཚོ་གཞེས་དུས་སུ་སུས་ཀྱང་ཡིད་འཇོག་མ་བྱས་ཤིང་། སུས་ཀྱང་ཁས་ལེན་བྱས་མ་སོང་ལ། དབེན་འཇགས་དང་ཁེར་རྐྱང་གི་ངང་ནས་ཕར་འགྲོ་ཚུར་འོང་གི་མཐའ་མཚམས་ཀྱི་རྣམ་པ་དེ་སུས་ཀྱང་དང་དུ་ལེན་མ་ཕོད་དོ།། དེ་དང་མཐུད་ནས་སྤེལ་བའི་སྙན་ངག་དག་ཀྱང་ཤིན་ཏུ་ནས་ལེགས་པར་མ་གྲུབ་པས་སྙན་ངག་པ་ཤི་ཡང་མི་འཛུམ་པར་གྱུར་ཏོ།། དེ་ལྟ་ནའང་། འདི་ལྟ་བུའི་སྐྱོ་གར་འཇིག་རྟེན་ལ་མང་དུ་བྱུང་མྱོང་བས། སྙན་ངག་པས་ཀྱང་ཁྱད་འཕགས་ཀྱི་དགེ་མཚན་དེ་ལ་བརྟེན་ནས་ཕྱི་རབས་པ་དག་དུས་གཏན་དུ་ཡིད་ཆེས་བྱས་ཆོག་པའི་མཛད་རྗེས་ཤིག་བསྐྲུན་སོང་བ་ཡིན་ནོ།། སྨག་རིམ་ཁྲོད་དུ་ང་ཚོས་རྒྱང་རིང་གི་ནམ་མཁར་བལྟས་ཚེ་ངེས་པར་དུ་སྐར་མའི་ཚོགས་མཐོང་སྲིད། དེ་མིག་ཤེས་ཀྱི་ཚབ་ཏུ་སྤྱད་ནས་རང་ཉིད་ཀྱི་རྣམ་ཤེས་ལ་ཞིབ་བལྟ་བྱོས་ཤིག

སྙན་ངག་གི་ཆེད་དུ་ཚེ་སྲོག་དོར་བའི་སྙན་ངག་པའི་ཕྱིར་དུ་ང་ཚོས་མེ་ཧན་ཏོན་གྱི་སྙན་ངག་ཅིག་གིས་འདས་མཆོད་བྱ་སྟེ། “ཅི་སྟེ་སུ་ཞིག་ལྔ་ལམ་དུ་དེངས་ཀྱང་། ང་ལ་རང་ཉིད་ཀྱི་ཆ་ཤས་ཤིག་འཆི་ལམ་དུ་ཕྱིན་པའི་ཚོར་བ་སླེབ་ཀྱིན་འདུག རྒྱུ་མཚན། བདག་ནི་མིའི་རིགས་ཞེས་པའི་ཐ་སྙད་དེའི་ཁོངས་སུ་གཏོགས་པས་སོ།། དེར་བརྟེན་ང་ཚོས་མྱ་ངན་གྱི་དྲིལ་བརྡ་དེ་སུའི་ཆེད་དུ་ཞེས་མ་འདྲི་ཞིག ཁོ་ནི་བདག་གི་སླད་དུ། ད་དུང་ཁྱེད་ཀྱི་ཕྱིར་དུའོ།།”

༢༠༡༡། ༡། ༡༤། རང་མལ་དུ་ཡོངས་སུ་བསྒྱུརད།

སྒྱུར་མཁན་གྱི་གཏམ་ཐུང་ངུ། མ་ཕྱིའི་རྩོམ་མཁན་གྱི་མཚན་ལ་གསལ་ཁ་དེ་ཙམ་མེད་པས་ཀོད་མེད། སྙན་ངག་གི་དཔྱད་པ་བརྗོད་ལུགས་ཅུང་མ་འདྲ་བ་ཞིག་བདོག་པ་འདྲ་བས་འགྱུར་བའི་ཁུལ་དུ་བྱས་པ་ཡིན། འོན་ཀྱང་། ཧེ་ཙི་སྙན་ངག་ནི་གོ་དཀའ་བ་ཞིག་ཏུ་ངོས་འཛིན་པ་མང་དུ་ཡོད་ན་བོད་དུ་འགྱུར་བ་ལའང་ནོངས་པ་ཆེ་ཙམ་ཡོད་ལས་ཆེ་བས། དགོངས་དག

དྲ་ཚིགས་འདི་ལས་བཤུས་ཏེ་བསྒྱུར། http://zhidao.baidu.com/question/476926