རྔ་བ་ཀུན་བཟང་།
རི་ཆུ་སྟོང་ཁྲག་གི་ཕ་རོལ་ན་དར་དར་ཏུ་ལྷག་པའི་བདག་གི་ཕ་ཡུལ་ལགས། དེ་རིང་ངས་དྲན་གདུང་གིས་མཆི་མ་བཏང་ཤིང་། བཟོད་མེད་ཀྱི་ན་ཟུག་ལྕི་མོ་ཞིག་དང་ལྷན་ཏུ་ཁྱེད་རང་དྲན་བཞིན་ཡོད་ལ། ཁྱེད་ཀྱི་རྟ་ནོར་ལུགས་ཀྱི་འཕེལ་ཁ་དང་། ཤིང་རྩི་ཤིང་ལོ་མའི་མཛེས་སྡུག། ། རྫ་རི་སྨུག་པོའི་ཁ་རླུང་། གཡང་དཀར་ལུག་གི་འབའ་སྒྲ ། དགོ་དགོ་འབྲུ་མོའི་འོ་ཞོ། སྨྲུག་པོ་སྤྲ་ནག་གི་འཚོ་བ་གླེང་བཞིན་ཡོད།
ཕ་ཡུལ་ལགས། ཧི་མ་ལའི་རྒྱབ་ངོས་ཀྱི་བདག་གི་ཕ་ཡུལ་ལགས། ཁྱེད་ནི་གོ་ལ་ཟླུམ་པོའི་ཡངས་ཐོག་གི་གངས་རི་དཀར་པོའི་ཕ་ས་ཡིན་ལ ། ཁྱེད་ནི་མང་མང་གིས་སྐྱིད་ན་སྐྱིད་གླུ་དང་། སྡུག་ན་སྐྱོ་གླུ་ལེན་སའི་བསམ་གཞིག་གི་རྒྱབ་གཏན་ངོ་མ་དེ་ཡིན། ཕ་ཡུལ་ལགས། ང་ཁྱོད་དང་བྲལ་བའི་ཉིན་དེ་ནས་བཟུང་། ངས་ཆེས་ཐོག་མའི་དྲན་གདུང་གི་མཆི་མ་བཏང་ས་ཁྱོད་ཡིན་ལ། ངས་ཆེས་མཐའ་མའི་དགོད་སྒྲ་ཡི་གླུ་དབྱངས་ལེན་ས་ཡང་ཁྱོད་ཡིན་འདུག།། མ་གཞིར། ཁྱོད་དང་ངའི་བར་ན་བཤད་མི་ཚར་བའི་གཏམ་རྒྱུད་གཅིག་དང་། མུ་མེད་ཀྱི་རྨི་ལམ་རིང་མོ་ཞིག་གི་རྣེ་མོ་མཐུད་འདུག
ཕ་ཡུལ་ལགས། ཧི་མ་ལའི་རྒྱབ་ངོས་ཀྱི་བདག་གི་ཕ་ཡུལ་ལགས། ཁྱེད་ཀྱི་རི་ལུང་ནགས་ཆུ་སྐྱ་མདོག་ཏུ་འགྱུར་ཤིང་། ལྷས་ར་གྲུབ་བཞི་ཁ་ཐོར་ཏུ་འགྱུར་སྟེ། རླུང་ནག་འཚུབ་མ་ཞིག་གི་འུར་སྒྲ་དག་ཐོས་དུས། ང་ནི་འདི་ལྟར་ཞེ་སྡང་དང་སྐྱོ་སྣང་གི་བཟི་ཏེ ། ཁྱེད་ཀྱི་ལས་དབང་ལ་འཁང་ར་ལངས། ཕ་ཡུལ་ལགས། དྲང་མོ་བཤད་ན། ཁྱོད་ནི་གཅར་རྡུང་གི་རུས་ལ་ཐུག་ཞིང་། མེ་སྲེགས་ཀྱི་ཐལ་བ་འགྱུར་ཡང་། ད་དུང་སྔར་བཞིན་ཕྱི་གསལ་ནང་གསལ་གྱི་དགོད་སྒྲའི་ཁེངས་བས། ང་ནི་འདི་ལྟར་ཁྱོད་ཀྱི་བཅོས་མིན་གྱི་སྙིང་སྟོབས་དང་། ཕུགས་བསམ་ལ་ཡིད་རང་བྱེད་བཞིན་ཡོད།
ཕ་ཡུལ་ལགས། ཧི་མ་ལའི་རྒྱབ་ངོས་ཀྱི་བདག་གི་ཕ་ཡུལ་ལགས། ཁྱེད་ནི་དེ་འདྲའི་ངང་རྒྱུད་རིང་ལ། ཁྱེད་ནི་འདི་འདྲའི་དཔའ་ངར་ལྡན། ཁྱེད་དེ་འདྲའི་བློ་རྒྱ་ཡངས་ལ། ཁྱོད་ནི་དེ་འདྲའི་གཟི་བརྗིད་ཆེན། ཕ་ཡུལ་ལགས། གངས་ལྗོངས་ལགས། མ་གཞིར། ཁྱོད་ནི་གངས་ཕྲུག་ང་ཚོའི་སྲོག་ཤིང་གི་རྩ་བ་ཡིན་ལ། ནམ་ཡང་བརྗེད་མི་སྲིད་པའི་ཕ་ཁྱིམ་དྲོད་མོ་དེ་ཡིན། དེ་བས་ཀྱང་། གསོན་ན་གསོན་རོགས་དང་ཤི་ན་ཤི་རོགས་ཀྱི་རྣམ་ཤེས་དེ་ཡང་ཁྱེད་ཡིན་འདུག། ཕ་ཡུལ་ལགས། བསམ་གྱིན་བསམ་གྱིན་དུ། ངས་མིག་མཐའ་མཆི་མའི་ཁངས་ཞིང་། ཁྱོད་ཀྱི་གཞི་ཁྱིམ་ན་ཕྱིར་ལོག་མི་ཐུབ་པར་ཤེས་བྱུང་། འགྲོ་གྱིན་འགྲོ་གྱིན་དུ། ངས་རེ་ཐག་རྩ་ནས་ཆད་ཤིང་། ཁྱོད་དང་བར་ཐག་ཇི་རིང་དུ་སོང་བ་ཚོར་བྱུང་། གང་ལྟར་ཀྱང་། ཁྱེད་དང་ངས་བར་ཚེ་རབས་དུ་མའི་ལས་དབང་གི་འདུན་པ་དང་། ཕྱིར་ལྡོག་མེད་པའི་ཡིད་ཆེས་ཀྱི་ས་བོན་ཞིག་ཡོད་པས།ང་ཇི་སྲིད་འཚོ་བའི་བར་ཏུ། ཁྱོད་དྲོད་སྐྱིད་ལྡན་པའི་སྐྱེས་ཁམས་ཀྱི་མཛེས་སྡུག་ཡོད་ཚད་སྒོམ་ཤིང་། ནམ་ཡང་མི་བརྗེད་པའི་དམ་བཅའ་འཇོག་བཞིན་ཡོད། ཕ་ཡུལ་ལགས། ཧི་མ་ལའི་རྒྱབ་ངོས་ཀྱི་བདག་གི་ཕ་ཡུལ་ལགས།
༄༅། རྔ་བ་ཀུན་བཟང་ལགས་ཁྱོད་བདེན་ཡང་བདེན། དྲང་ཡང་དྲང་ང་ཡང་ཁྱོད་བཞིན་ཡིན།
དམར་པོས་ཕ་ཡུལ་འཕྲོག་སོང་བཅོམ་སོང། དམར་པོས་མི་རིགས་ཁ་བྲལ་བཏང་སོང།
དམར་པོས་གཉེན་སྤུན་ཁ་བྲལ་བཏང་སོང། དམར་པོས་གཏེར་ཁ་རྒྱུ་དངོས་བཅོམ་སོང།
དམར་པོས་ཆོས་རིག་རྕ་མེད་བཏང་སོང་བརྗེད་ཐབས་མི་འདུག།