བུན་ཁྲང་ཚེ་བརྟན་གྱིས་རྒྱ་ཡིག་ལས་བསྒྱུར། སྐལ་ཚེ་ཡིས་འོས་སྦྱོར་བྱས།
དེ་རིང་། ང་ཚོ་གནས་འདི་རུ་འགྲེང་ཡོད་དེ། འཇར་མན་གྱི་རྒྱལ་ས་རུ་འགྲེང་ཡོད། པེར་ལིན་དུ་འགྲེང་ཡོད། ང་རང་ཚོའི་ཕ་མེས་ཡང་མེས་ཚོའི་ཟུངས་ཕྲག་དང་ལ་རྒྱས་བརླན་ཡོད་པའི་ས་ཆེན་འདིའི་སྟེང་དུ་འགྲེང་ཡོད། ངའི་ལྟག་རྒྱབ་དུ་ཡོད་པ་འདི་ནི། ཨན་ངྷི་ལི། ཁོ་ལི་ཨང་མཆོག་གི་བརྐོས་གཟུགས་ཡིན་ལ། ཁོང་ཉིད་ནི་འཛམ་གླིང་ཧྲིལ་བོ་ན་མགྲིན་གཅིག་ཏུ་ཁས་ལེན་གནང་གིན་པའི་རང་དབང་གི་དཔའ་རྒོད་ཅིག་ཡིན་ལ། འཇིག་རྟེན་འདིའི་ལམ་སྟོན་གྱི་སྒྲོན་མེ་ཡང་ཡིན།
ངའི་མདུན་ཕྱོགས་སུ་ཡར་འགྲེང་ཡོད་པ་འདི་ནི་མི་རིགས་ཤིག་སྟེ། ཚད་མེད་པའི་བཙན་གནོན་འོག་སྨྲེ་ངག་འུར་འུར་འདོན་བཞིན་པའི་མི་རིགས་ཤིག་རེད། འཛམ་གླིང་འཁྲུག་ཆེན་དང་པོ་མཇུག་རྫོགས་པ་ནས་བཟུང་། ང་ཚོའི་རིགས་ཀྱི་ང་རྒྱལ་དེ་གར་སོང་ཆ་མེད་དུ་གྱུར་སོང་། གཡུལ་ལས་རྒྱལ་པ་དེ་དག་ང་ཚོའི་གཉའ་རུ་ཞོན་ཏེ་དབང་ཤེད་བཙན་ཤེད་ཀྱིས་བརྙས་བཅོས་ཚད་མེད་བྱས་སོང་ལ། ང་ཚོ་སྟེ་ཡོ་རོབ་གླིང་གི་ཆེས་མཆོག་ཏུ་གྱུར་བའི་མི་རིགས་ཤིག་གི་རྩིས་ཐང་ལ་མི་དེ་དག་གིས་སྣང་མེད་དུ་རྡོག་བརྫིས་བརྒྱབས། ཁྱེད་ཚོས་ཤོད་དང་། ཁྱེད་ཚོ་པཎ་ཇེ་མན། མཱ་ཏིན་ལྟ་བུའི་རང་དབང་གི་དཔའ་རྒོད་ཅིག་བྱ་རྒྱུ་ཡིན་ནམ། ཡང་ན། བྲན་གཡོག་ཅིག་བྱ་རྒྱུ་ཡིན།
ཁྱེད་ཚོས་འདི་ལྟར་ཤོད་ཀྱང་སྲིད་དེ། སྐུ་ཞབས་ཧི་ཐི་ལི་ལགས། ང་ལ་མཁོ་བ་ནི་ལས་ཀ་ཞིག་དང་ཁ་ལག་ཙམ་ཡིན། རེད། ཁྱེད་ཚོས་བཤད་པ་དེ་ངོ་མ་རེད། ཚེ་སྲོག་ནི་དངོས་ནས་གལ་ཆེན་ནང་གི་འགངས་ཆེན་ཞིག་རེད། ཡིན་ཡང་། ངས་ཁྱེད་ཚོར་བཤད་རྒྱུ་ཞིག་ལ། འཇིག་རྟེན་འདིའི་སྟེང་དུ་ཚེ་སྲོག་ལས་ཀྱང་གལ་ཆེན་ཞིག་ཡོད་དེ། དེ་ནི་རང་དབང་རེད། དེ་ནི་ལ་རྒྱ་རེད།
ཨལ་ཟེ་ཞིན་དང་ལོའོ་རེན་གྱི་མཁའ་དབྱིངས་སུ་སྐྱོད་བཞིན་པའི་ཧྥ་རན་སིའི་རྒྱལ་དར་དེ་ཉིན་གཅིག་ལ་བསྐྱོད་མཚམས་མ་བཞག་ཚེ། ང་རང་ཚོར་ལ་རྒྱ་ཟེར་བ་ཞིག་གཏན་ནས་ཡོད་མི་སྲིད། ཧྥ་རན་སི་དང་དབྱིན་ཇི་བ་དེ་དག་གིས་འུ་ཅག་གི་ཕ་ས་གསེར་གྱི་གཞོང་བ་ལྟ་བུ་འདིའི་སྟེང་དུ་ཁྲིམས་མེད་ལུགས་མེད་ངང་རྒྱས་བཟའ་རྒྱས་འཐུང་བྱེད་པའི་མཚམས་འཇོག་ན་གནང་ཚེ། ང་ཚོར་ལ་རྒྱ་ཟེར་བ་ཞིག་གཏན་ནས་ཡོང་མི་སྲིད་དོ།། ཡོ་རོབ་གླིང་གི་མངའ་ཁོངས་སུ། འཇར་མན་ཞེས་པའི་རྒྱལ་ཁབ་འདི་སིལ་བུར་འཐོར་ནས་སྟོབས་མེད་ཉམ་ཐག་གི་གནས་སུ་གྱར་ཚེ། ང་ཚོར་ལ་རྒྱ་ཟེར་བ་ཞིག་གཏན་ནས་ཡོང་མི་སྲིད་དོ།། རྒྱབ་ཁབ་གཞན་གྱི་མི་ཚོས་ལབ་གླེང་གི་བར་གླགས་སུ་ཡང་འཇར་མན་ཞེས་པའི་ཚིག་འབྲུ་འདི་ཐོས་མ་ཐག་སྣང་ཆུང་དང་འཕྱ་དགོད་བྱེད་དུས། ང་ཚོར་ལ་རྒྱ་ཟེར་བ་ཞིག་གཏན་ནས་ཡོང་མི་སྲིད་དོ།།
ང་ཚོར་མཁོ་བ་ནི་ལྟོ་གོས་ཙམ་མ་ཡིན་པར། རང་དབང་དུ་འཚོ་བའི་ཁོར་ཡུག་ཅིག་ཡིན། མི་རིགས་ཤིག་གི་འཚོ་གནས་ཀྱི་ཁོར་ཡུག་ཅིག་ཡིན། འདི་ལྟ་བུའི་རང་དབང་ནི་གཞན་ལ་ཞུ་འབོད་དང་རྒོལ་གཏམ་ཙམ་སློག་པས་མངོན་འགྱུར་བྱ་ཐུབ་པ་ཞིག་རྩ་བ་ནས་མིན་ཏེ། ལྕགས་དང་ཁྲག་ལ་བརྟེན་པས་ད་བཟོད་འབྱུང་ཐུབ་པའོ།།
མི་རིགས་གཞན་པས་འུ་ཅག་ལ་བཟོད་པའི་མཐའ་མི་ཟད་པའི་བཙན་གནོན་བྱས་ལ། ཐ་ན་འཇིག་རྟེན་འདིའི་ཆེས་ཉམས་ཆུང་གི་མི་རིགས་ཤིག་གིས་ཀྱང་འཛེམས་ཟོན་ཅི་ཡང་མེད་པར་ང་ཚོར་ཐུབ་ཚོད་བྱེད་དུས། ང་ཚོས་འཕྲད་དུ་འདི་ལྟར་སྨྲ་སྟེ། ང་ཚོས་ཁོང་ཁྲོ་དང་རྒོལ་གཏམ་དྲག་ཏུ་བྱེད་ཅེས་ཁ་སྟོང་ནང་གི་ཚིག་སྟོང་ཁོ་ན་སྤུར། མི་འདི་འདྲ་བ་ནི་རུས་པའི་གསེང་ན་རྐང་མེད་མཁན་ཡིན་ལ། མི་འདི་ལྟ་བུ་ནི་གཉོན་ཆུང་ནུས་མེད་འབའ་ཞིག་ཡིན། དེ་ལས། ང་ཚོས་གནམ་ས་བླ་འོག་བསྒྱུར་བའི་མེ་སྒྱོགས་ཀྱི་འུར་སྒྲས་དགྲ་བོ་ཐམས་ཅད་ཀྱི་སྙིང་ཆུང་ལུ་གུ་ལྡིང་ལྡིང་དང་། ཡན་ལག་དར་ལྕོག་གཡུག་གཡུག་ཅིག་བྱེད་དུ་འཇུག་དགོས་པ་ཡིན། འུ་ཅག་གིས་ཁོ་ཚོའི་ལ་རྒྱ་དང་ཚེ་སྲོག་རྡོག་རོལ་ཏུ་བཏང་སྟེ་ང་ཚོ་ནི་རྒོལ་གཏམ་ཙམ་ལས་སློག་མི་ནུས་པའི་སྐྱག་གཟན་འབའ་ཞིག་མིན་པ་གཞི་ནས་ཤེས་སུ་འཇུག་དགོས།
ཁྱེད་ཚོས་མཁྱེན་འོས་པ་ཞིག་ལ། རྒོལ་གཏམ་ཙམ་སློག་པ་ལས་གཞན་ཅི་ཡང་མི་ནུས་པའི་རྒྱལ་ཁབ་ནི་རུས་གསེང་ན་རྐང་མེད་པའི་རྒྱལ་ཁབ་ཅིག་ཡིན་ལ། རྒོལ་གཏམ་ཙམ་སློག་པ་ལས་ཅི་ཡང་མི་ནུས་པའི་སྲིད་གཞུང་ནི་རུས་གསེང་ན་རྐང་མེད་པའི་སྲིད་གཞུང་ཞིག་ཡིན། ང་ཚོའི་ལ་རྒྱ་དང་ཕ་ཡུལ། འཚོ་གནས་ཀྱི་ཁོར་ཡུག་སོགས་འཇིག་ཉེན་གྱི་གཡང་དུ་ལྷུང་དུས། རྒོལ་གཏམ་ཙམ་ལས་ཅི་ཡང་མི་ནུས་པའི་ངོ་ཚ་མེད་པའི་སྲིད་གཞུང་དེ་ལྟ་བུ་ནི་ང་ཚོར་དགོས་དོན་གཏན་ནས་མེད་ལ། མཇུར་མཐར་ཁྱེད་ཚོས་ཁོ་ཚོ་ལོགས་སུ་གཡུག་པ་གདམ་གསེས་བྱ་ངེས།།
ཁྱེད་ཚོའི་ཁྲོད་དུ་རུས་གསེང་ན་རྐང་མེད་པའི་མི་ཐབས་རྡུགས་དེ་འདྲ་ཤིན་ཏུ་ཉུང་བས་ང་རང་ལ་བློ་སྤོབས་གནང་སོང་། ངའི་མདུན་ཕྱོགས་ཀྱི་རུ་དཔུང་འདིའི་རྩ་ལམ་དུ་རྒྱུ་བཞིན་པ་ནི་མི་ལོ་སྟོང་ཕྲག་ལྷག་གི་རིང་ལ་ཞུམ་པ་མེད་པར་སྟོབས་ཀྱིས་ཕྱུག་པའི་ཁྲག་རྒྱུན་ཅིག་ཡིན། ཁྲག་རྒྱུན་དེ་རང་ཅག་གི་ཡབ་མེས་ཚོའི་ལུས་སུ་ཡང་རྒྱུ་མྱོང་བ་ཡིན། ཁོང་ཚོའི་དཔའ་སྟོབས་དང་སྤོབས་གདེང་གིས་གཞན་སུ་ལ་ཡང་མགོ་བོ་བསྒུར་མ་མྱོང་། ད་ལྟ། ཁྲག་རྒྱུན་འདི་འུ་ཅག་གི་རྩ་ལམ་ན་ལྷོག་ལྷོག་ཏུ་འཕྱུར་བཞིན་ཡོད་པས། ཁྱེད་ཚོས་ཤོད་དང་། ང་ཚོས་ཞུམ་པ་མེད་པའི་ཟུངས་ཁྲག་དྲོན་མོ་འདིའི་ཚ་དྲོད་ཡལ་ཏུ་འཇུག་རྒྱུ་ཡིན་ནམ།
མི་རྣམས་ཀྱི་བློ་ཁ་གཞོགས་གཅིག་ཏུ་ཕྱོགས་པའི་ལས་ནི་གཉིས་སྟེ། གཅིག་ནི་ཐུན་མོང་གི་ཕུགས་བསམ་དང་། ཅིག་ཤོས་ནི་ཐུན་མོང་གི་ནག་ཉེས་བཟོ་བ་དེའོ། ། ང་རང་ཚོར་འཇར་མན་གྱི་རྒྱལ་དར་སྟེང་ལ་བཅོལ་ཡོད་པའི་རླབས་ཆེན་གྱི་ཕུགས་འདུན་མཆིས་ཤིང་། ཕུགས་འདུན་དེ་ང་ཚོའི་ཟུངས་ཁྲག་གི་རྒྱུན་མ་ཆད་པའི་བར་ཏུ་བརྩོན་ལེན་བྱ་ངེས་ཡིན། དེ་རིང་གི་པེར་ལེན་ལ་མཚོན་ན། ང་རེའི་རྒྱལ་ཁབ་འདི་སྐྱོབ་བྱེད་ནི་ཕུགས་འདུན་འདི་ལས་གཞན་གང་ཡང་མ་ཡིན་ནོ།། བདག་ཅག་ལ་མཚོན་ན། ཧྥན་ཨར་སེ་ཞི་ཆིངས་ནི་ངོ་ཚ་ཆེན་པོ་ཞིག་ཡིན་ལ། ང་ཚོས་རྩ་ཁྲིམས་དེ་ལག་བསྟར་མི་བྱེད་བའི་ཆོད་སེམས་དང་གནས་ལུགས་མཆིས་སོ། ། ད་ནས་ཁྱེད་ཚོའི་བསྒྲུབ་འདོད་པ་དེ་སྒྲུབས་ཤིག པཎ་ཇེ་མན། མཱ་ཏིན་ལྟར་ལག་ཏུ་མེ་མདའ་བཟུང་སྟེ། རང་མི་སྤུན་ཟླ་རྣམས་དང་ལྷན་དུ། རང་དབང་གི་དར་ཆ་དགུང་ལ་འཕྱར་ཞོར་དགྲ་བོར་དམར་འཛིང་བྱེད་པ་ནང་བཞིན་ནོ། ། གལ་སྲིད། ཁྱེད་ཚོས་ཀྱང་དགྲ་ཇག་དང་ཁྱོད་ཤི་ང་གསོན་གྱི་དམར་འཛིང་ཞིག་བྱ་འདོད་ན། དེ་ལྟར་གྱིས་དང་། སྐབས་དེར་ཁྱེད་ཚོ་ནི་བྲན་གཡོག་སྡར་མ་ས་ཡ་བདུན་ཡིན་ནམ། ཡང་ན་དཔའ་མཛངས་རྟུལ་ཕོད་ཀྱི་འཇར་མན་པའི་བུ་རྒོད་ས་ཡ་བདུན་ཡིན་པ་ད་གཟོད་མཐོང་ཐུབ།
གལ་སྲིད། ཉིན་ཞིག་ལ་ཨ་ཏོའོ་ཧྥུ། ཧི་ཐི་ལི་བདག་གིས་ཀྱང་པཎ་ཇེ་མན། མཱ་ཏིན་ལྟར་འུ་ཅག་འཇར་མན་པའི་དར་ཆ་དེ་དགོར་དུ་འཕྱར་ཞོར། དམར་འཛིང་གི་མདུན་ཐད་དུ་མཆོངས་དུས། ངའི་ཚེ་སྲོག་རྟ་རྔ་ཙམ་པོ་འདི་སྐད་ཅིག་ལ་རྨེད་མེད་དུ་བཏང་ཡང་། ང་རང་དགའ་དགའ་སྤྲོ་སྤྲོའི་ངང་དག་ཞིང་དུ་འགྲོ་ངེས་ཡིན་ལ། འཇར་མན་པའི་རླབས་ཆེན་གྱི་ཡབ་མེས་རྣམས་དང་མཇལ་དུས། བདག་གིས་མགོ་བོ་དགྱེ་སྟེ་རླབས་ཆེན་གྱི་མངའ་བདག་ཧྥེ་ཐི་ལེའི་མདུན་དུ་བཅར་ཏེ། རླབས་ཆེན་གྱི་མེས་པོ་ལགས། མཆོག་ཉིད་ཀྱི་བུ་རབས་ཚ་རྒྱུད་དུ་མཆེད་པའི་ཅོལ་ཆུང་ངས་ཁྱེད་ཅག་གི་བླ་རྫབ་མེད་ལ། འཇར་མན་པའི་ཆེད་དུ་ཟུངས་ཁྲག་གི་བཞུར་རྒྱུན་ཆད་རག་བར་དུ་དམར་འཛིང་བྱས་པ་ཡིན་ལགས་ཞེས་ང་རྒྱལ་དང་བཅས་ཏེ་ཞུ་ངེས་སོ།།
ང་ཚོས་རང་དབང་གི་ཆེད་དུ་དམར་འཛིང་བྱེད་པ་ལས་གཞན་སུ་ཞིག་ལ་བཙན་འཛུལ་བྱ་བའི་ཆེད་དུ་མིན། ང་ཚོ་འཕྲུལ་ཆས་མིན་ལ། དུད་འགྲོ་དེ་བས་ཀྱང་མིན། ང་ཚོ་ནི་སྨྲ་ཤེས་ཤིང་དོན་གོ་བའི་འགྲོ་བ་མིའི་རིགས་སྟེ། དུས་ནམ་ཡང་གཞན་སུ་དང་གང་ལ་ཡང་མགོ་བོ་གཏན་ནས་བསྒུར་མི་སྲིད་པའི་འཇར་མན་པ་ཡིན།
ང་ཚོས་རང་དབང་གི་མིང་ཐོག་ནས་དཔུང་རྡང་གཅིག་ཏུ་སྦྲེལ་ཏེ། རྣམ་པ་གསར་བ་དང་འདྲ་མཉམ་གྱི་འཇིག་རྟེན་ཞིག་གི་ཆེད་དུ་དམར་འཛིང་བྱེད་པ་ཡིན་ལ། མི་ཐམས་ཅད་ལ་བྱ་བ་རེ་ཡོད་པའི་ཆེད་དུ་དམར་འཛིང་བྱེད་པ་ཡིན། འུ་ཅག་ལ་བཙན་འཛུལ་བྱས་པའི་མི་དེ་དག་འཇར་མན་གྱི་ས་གཞིའི་སྟེང་ནས་མཐར་བསྐྲོད་པའི་ཆེད་དུ་དམར་འཛིང་བྱེད་པ་ཡིན་ལ། ང་རང་ཚོས་ཉིན་རེ་རེར་རྒོལ་གཏམ་སློག་མི་དགོས་པའི་ཆེད་དུ་དམར་འཛིང་བྱེད་པ་ཡིན། ང་ཚོའི་ལ་རྒྱའི་ཆེད་དུ་དམར་འཛིང་བྱེད་པ་ཡིན་ལ། འུ་ཅག་གི་དམ་བཅའི་ཆེད་དུ་དམར་འཛིང་བྱེད་པ་ཡིན། རྒྱལ་ཁབ་འདི་བཅིངས་བ་ལས་འགྲོལ་ཆེད་དམར་འཛིང་བྱེད་པ་ཡིན། འཇར་མན་པ་རྣམ་པ། ང་ཚོས་རང་རེའི་ཡབ་མེས་རྣམས་ཀྱི་གཟི་བརྗིད་ཀྱི་ཆེད་དུ་དམར་འཛིང་བྱེད་པ་བྱེད་པ་ཡིན་ལ། འུ་ཅག་གི་བུ་རབས་ཚ་རྒྱུད་ཀྱིས་དབུ་འཕངས་དགོང་ལ་གཏད་དེ་ང་ཚོ་ནི་ནམ་ཡང་ཞུམ་པ་མེད་པའི་དཔའ་མཛངས་རྟུལ་ཕོད་ཀྱི་འཇར་མན་པ་ཡིན་ཞེས་བརྗོད་ཆོག་པའི་ཆེད་དུ་དམར་འཛིང་བྱེད་པ་ཡིན། ང་ཡི་ཡུལ་མི་སྤུན་གྲོགས་རྣམ་པ། འཇར་མན་དང་འཇར་མན་པ་རྣམས་ཁྲི་ལོ་བརྟན་པར་ཤོག རང་དབང་ཁྲི་ལོ་བརྟན་པར་ཤོག
ཡག་གི དུས་ཚོད་ཡོད་དུས་ཁོང་གི་རྣམ་ཐར་༼ང་ཡི་འབད་འབུངས༽ཞེས་པ་དེ་རོབ་ཙམ་བསྒྱུར་རོགས། གང་ལྟར་ཁོང་གི་ལོ་རྒྱུས་ཤེས་པ་བོད་པ་ཉིན་མོའི་སྐར་མ་ཙམ་དུ་ཟད་པས་དེའི་སྐོར་མང་ཙམ་སྒྱུར་ཐུབ་ན་ང་ཚོར་ཁྲོམ་པའི་སྦལ་བ་འདྲ་བའི་ཤེས་ཡོན་ཅན་ལ་ཁས་འཆའ་བ་དག་ལ་ཕན། བཀའ་དྲིན་ཆེ། དེ་མིན་ཁྱེད་ཀྱི་མིང་འདི་ཐུན་མོང་མ་ཡིན་པ་ཞིག་འདུག ཨ་མྱེས་ཡུལ་ལྷའི་ལྷ་ཁང་ནས་གནང་བ་ཞིག་མིན་འགྲོ་བསམ།
འདི་འདྲའི་བསུན་པ་ལ་ཨང་། མྱི་འདི་ཅན་པོ་མང་པོ་ཞིག་གིས་དཔེ་བལྟ་ས་དང་། ལུང་འདྲེན་ཁུངས་ཡོངས་རྫོགས་འཛམ་གླིང་གི་ལག་དམར་དེ་ཚོདང་ཁོ་ཚོས་བཤད་པའི་སྐད་ཆ། ཁུངས་མ་འཁྱོལ་བའི་ལྟ་བ་དག་ཡིན་དོན་ཅི་ཡིན་ནམ། མ་ཤེས་སམ་རྐང་བཙུགས་ནས་རང་ཉིད་ཤེས་ཡོན་པའི་གྲལ་དུ་འཚང་ཐབས་ཡིན། གང་ལྟར་ཧི་ཐི་ལར་གྱིས་མི་གྲངས་ས་ཡ་མང་པོའི་བདེ་སྐྱིད་གཏོར་བརླག་བྱས་ཡོད་ཅིང་། ཁོའི་ལྟ་བའམ་རྨི་ལམ་སྐྱིད་པོ་དེ་མ་གྲུབ་པར་རང་ཤི་བརྒྱབ་དགོས་ཐུག་ཡོད་པ་ཚང་མས་ཤེས་ཡོད། འགྲུབ་འབྲས་ཅིའང་མ་བླངས་པའི་ཁོའི་གཏམ་བཤད་ལས། མའོ་ཀྲུ་ཞིས་བཤད་པའི་སྐད་ཆ་འགའ་བསྒྱུར་ཡོད་ན་བཟང་སྟེ། ཁོའི་ཕུགས་འདུན་གྲུབ་པར་མ་ཟད། ད་སྐབས་རྒྱ་ནག་གོ་ལའི་སྟོབས་ཆེན་རྒྱལ་ཁབ་ཆགས་ཡོད།
དྲང་པོ་བཤད ན་བདེན་པ་དང། གསུངས་བཤད་གནད་ལ་ཕུག་པ་ཞིག་འདུག། བོད་པ་ཚོས་ཡང་ལེགས་ཆ་ལེན་དགོས་པ་འདུག།