གཞུང་པ་ཚེ་དབང་བསོད་ནམས།
རྗེས་ལོ་ ༢༠༢༦ ལོའི་ནང་སྲིད་སྐྱོང་སྐབས་བཞི་པ་དང་། སྤྱི་འཐུས་སྐབས་བཅོ་བརྒྱད་ཀྱིས་སྔོན་འགྲོའི་འོས་བསྡུ་དེ་སྤྱི་ཟླ་གཉིས་པའི་ཚེས་གཅིག་དང་། དངོས་གཞིའི་འོས་བསྡུ་དེ་སྤྱི་ཟླ་བཞི་པའི་ཚེས་ཉི་ཤུ་རྩ་དྲུག་ཉིན་གནང་རྒྱུའི་གསལ་བསྒྲགས་དབུས་འོས་བསྡུ་ལས་ཁང་ནས་ཉེ་ལམ་སྤྱི་ཟླ་བཅུ་པའི་ཚེས་བདུན་ཉིན་གནང་བ་ནས་དེང་སྐབས་བཙན་བྱོལ་བོད་མིའི་སྤྱི་ཚོགས་ཆུང་ཆུང་འདིའི་ནང་མང་གཙོ་དང་རང་དབང་ཁ་དང་ལྕེ་ལ་སྦྱར་ནས་བཙན་བྱོལ་བོད་མིའི་བཅའ་ཁྲིམས་དང་འོས་བསྡུའི་སྒྲིག་གཞི་ངོ་མ་ཤེས་པའི་བྱ་སྤྱོད་སྤེལ་མཁན་གྱིས་སྐབས་ཚོལ་རིང་ལུགས་པ་ཚོར་རྨི་ལམ་སྐྱིད་པོ་གཏོང་བཞིན་པ་ནས་སྲིད་སྐྱོང་གི་འོས་དམིགས་ལ་བུད་མེད་ལྔ་དྲུག་གི་མིང་ངོ་དེབ་སོགས་ཌ་རྒྱའི་ནང་སྤེལ་བཞིན་པ་ནི་བཙན་བྱོལ་སྤྱི་ཚོགས་ཀྱི་མང་གཙོའི་འོས་བསྡུའི་ལས་རིམ་ལ་བར་ཆད་གཏོང་འདོད་པ་མ་རེད་དམ། སྲིད་སྐྱོང་དང་སྤྱི་འཐུས་ཀྱི་འོས་གཞི་ལ་ང་ལངས་ཀྱི་ཡིན་ཁོ་ལངས་ཀྱི་ཡིན་ཟེར་མཁན་མང་པོ་འདུག་ལ་ཕྱོགས་གཏོགས་དང་སྐབས་ཚོལ་ལ་འགན་འཁུར་ནས་སྲིད་སྐྱོང་དང་སྤྱི་འཐུས་ཀྱིས་འོས་དམིགས་འདོན་མཁན་ཡང་མང་པོ་འདུག་པ་དེ་དག་ནི་མང་གཙོ་དང་རང་དབང་ཁ་ལྕེར་བཟུང་ནས་བཅའ་སྒྲིག་ལ་འགན་འཁུར་མ་ཐུབ་པ་དབྱིན་སྐད་ནང་། ༼ Barking Dog and Hovering Vulture ༽ ཟེར་བ་དེ་མ་རེད་དམ། མང་གཙོ་དང་སྒྲིག་འཛུགས། ཁྲིམས་དང་སྒྲིག་གཞི། ལམ་དང་ལུགས་སྲོལ། ཡ་རབས་དང་བཟང་སྤྱོད། ཚེ་འདི་དང་ཕྱི་མ། ལས་རྒྱུ་དང་འབྲས་བུ། ཁྲེལ་ངོ་ཚ། སོགས་གང་ལའང་བརྩི་མི་དགོས་པའི་སྨད་བུད་གོང་ཆད་ཁ་ཕྱོགས་དང་ལངས་ཕྱོགས་ཀྱི་ལྟ་གྲུབ་གང་ཡང་མེད་པའི་དྲ་འབུ་སྐབས་ཚོལ་རིང་ལུགས་ཚོར་རྨི་ལམ་སྐྱིད་པོ་གཏོང་བཞིན་པ་ནི་འོས་འཕེན་རྒྱ་ཆེ་མང་ཚོགས་བགད་མོ་ཤོར་བའི་རྒྱུ་ལས་མ་འདས་། ༧ སྤྱི་ནོར་༧ གོང་ས་སྐྱབས་མགོན་ཆེན་པོ་མཆོག་ནས་འཛམ་གླིང་སྤྱི་སྲོལ་དང་མཐུན་པའི་མང་གཙོའི་ལམ་ལུགས་བཟང་པོ་སྤྱི་ལོ་ ༡༩༦༠ ཐམ་པའི་སྤྱི་ཟླ་དགུ་པའི་ཚེས་གཉིས་ཉིན་གནང་བའི་བརྒྱུད་རིམ་ནས་རྒྱལ་སྤྱིའི་ཆབ་སྲིད་འཕེལ་རིམ་ལ་འགན་འཁུར་ནས་སྤྱི་ལོ་ ༡༩༩༡ སྤྱི་ཟླ་ ༦ པའི་ཚེས་ ༡༤ ཉིན་སྤྱི་འཐུས་སྐབས་བཅུ་གཅིག་ནས་བར་བརྒལ་གྱི་ཁྲིམས་བཟོའི་འགན་འཁུར་བླངས་ནས་བཙན་བྱོལ་བོད་མིའི་བཅའ་ཁྲིམས་དོན་ཚན་བརྒྱ་དང་བཅོ་ལྔ་ཡོད་པ་དེ་དག་གཏན་འབེབས་གནང་ནས་སྤྱི་ལོ་ ༡༩༩༡ སྤྱི་ཟླ་ ༦ པའི་ཚེས་ ༢༨ ཉིན་༧ གོང་ས་མཆོག་གི་ཆོག་མཆན་མཚན་རྟགས་ཕེབས་པ་ནས་དངོས་སུ་ཁྲིམས་ཡིག་ཏུ་གཏན་འབེབས་གནང་ནས་བཙན་བྱོལ་བོད་མིའི་སྤྱི་ཚོགས་འདི་མང་གཙོ་ཁྲིམས་ཀྱི་དབང་བསྒྱུར་འོག་འགྲོ་བཞིན་པའི་སྐལ་བཟང་དུས་བཟང་གི་སྐབས་སུ་སྤྱི་འཐུས་སྐབས་བཅུ་དྲུག་དང་བཀའ་ཤག་སྐབས་བཅོ་ལྔ་གཉིས་ཀྱི་ལས་དུས་སུ་ཁྲིམས་འགལ་གྱིས་གྲོས་ཆོད་ཡིག་ཆ་ཨང་ ༣༩ ཟེར་འོག་ཆེས་མཐོའི་ཁྲིམས་ཞིབ་པ་ཆ་ཚང་འཕོ་འགྱུར་བཏང་བའི་འཇུག་འབྲས་སྤྱི་འཐུས་སྐབས་བཅུ་བདུན་པ་ལས་འཁུར་དམ་འབུལ་མ་གནང་ནས་༧ གོང་ས་མཆོག་ལ་མཛད་དཀའ་བཟོས་པ་དང་། གྲོས་ཚོགས་ཀྱི་ལས་རིམ་འཇུག་སྐྱོང་མ་ཐུབ་པ་དང་། སྤྱི་འཐུས་རྒྱུན་ལས་མེད་པར་ཚོགས་དྲུང་དང་ལས་བྱེད་ཙམ་ལ་ཐུག་པ་དང་། བཙན་བྱོལ་བོད་མི་ནང་ཁུལ་ལ་ང་ཚོ་དང་ཁོ་ཚོ་ཟེར་བའི་ཉམས་པ་སླར་གསོ་འམ་ངན་པ་སླར་གསོ་ཟེར་བ་དང་། ཞི་བའི་མི་མང་ལས་འགུལ་ཁང་ཟེར་བ་སོགས་འདས་པའི་མི་ལོ་དྲུག་ཅུ་ལྷག་ཙམ་ནང་ང་ཚོའི་གོ་མ་མྱོང་བ་དང་མཐོང་མ་མྱོང་བའི་སྒྲིག་འཛུགས་གསར་འཛུགས་གནང་ནས་དབུས་བོད་མིའི་སྒྲིག་འཛུགས་དང་བཙན་བྱོལ་བོད་མིའི་ཆིག་སྒྲིལ་ལ་ཉམས་ཆགས་བཏང་ནས་དགྲ་དགའ་གཉེན་སྡུག་གི་ལས་འགུལ་སྤེལ་མཁན་ཡང་འདུག་པ་འདི་དག་གི་འབྱུང་རྩ་སྤྱི་འཐུས་སྐབས་བཅུ་དྲུག་དང་བཀའ་ཤག་སྐབས་བཅོ་ལྔ་བཀའ་སྤྱི་གཉིས་ཀྱིས་ལས་དུས་སུ་བྱུང་བའི་ཁྲིམས་འགལ་གྱིས་གྲོས་ཆོད་ཡིག་ཆ་ཨང་ ༣༩ ཟེར་བ་དེའི་འཇུག་འབྲས་ཡིན་པ་ནས་རྗེས་ལོ་ ༢༠༢༦ ལོར་སྲིད་སྐྱོང་སྐབས་བཞི་པ་དང་། སྤྱི་འཐུས་སྐབས་བཅོ་བརྒྱད་ཀྱི་འོས་བསྡུ་དེ་བཙན་བྱོལ་བོད་མིའི་བཅའ་ཁྲིམས་དང་འོས་བསྡུའི་སྒྲིག་གཞི་བཅའ་སྒྲིག་གཉིས་ཀྱི་ལམ་སྟོན་འོག་སོ་སོའི་མང་གཙོའི་ཐོབ་ཐང་གི་འོས་ཤོག་དེ་སྐབས་ཚོལ་རིང་ལུགས་དང་། ཕྱོགས་གཏོགས་ཆབ་སྲིད། ལུང་ཚན་ཤོག་སྒྲིལ། གྲལ་རིམ་དམངས་གཙོ་སོགས་ཀྱི་བསླུ་ཁྲིད་འོག་དུས་ནམ་ཡང་མ་ཚུད་པའི་རང་འགན་རང་གི་ཁྱེར་ནས་སྲིད་སྤྱིའི་འོས་ཤོག་འཕེན་དགོས་པའི་འབོད་བསྐུལ་ཞུ་འདོད་བྱུང་།