སྲིད་སྐྱོང་འོས་བསྡུའི་རྒྱལ་ཕམ་གྱི་ལུང་བསྟན་བཞུགས་སོ།།

ཁྱུང་པོ་གཡུང་དྲུང་རྣམ་རྒྱལ།

ད་ལྟའི་ཆར། བོད་ཀྱི་ཆབ་སྲིད་གནས་བབ་དང་། བཙན་བྱོལ་བོད་མིའི་སྒྲིག་འཛུགས་འཛིན་སྐྱོང་། སྤྱི་ཚོགས་གནས་བབ་སྲ་བརྟན། ཕྱོགས་ཡོངས་ཀྱི་ཡར་རྒྱས་བཅས་གླེང་དགོས་ན། ༢༠༡༡ ལོ་ལ་ཕྱིར་ལོག་གིས་གླེང་དགོས་པ་ལས། དེ་ཚུན་ཆད་ཀྱི་ལོ་ངོ་བཅུ་ནི་འཐུས་ཤོར། ཉམས་རྒུད། འཐོར་ཤིག་བཅས་ཀྱི་ལོ་ངོ་བཅུ་ཆགས་ཡོད།

ང་ཚོས་ཁ་ནས་རྒྱལ་ཁ་དང་གྲུབ་འབྲས། སྤྱི་ཚོགས་ལྷིང་འཇགས་ཞེས་ག་ཚད་བཤད་ཀྱང་། ད་ནི་ ༢༠༢༡ ལོའི་འོས་བསྡུ་ལ་རེ་བ་བརྒྱབ་སྟེ། མདུན་སྐྱོད་གོམ་ཁ་དེ་ ༢༠༡༡ ལོར་ཕྱིར་ལོག་གིས་སྤོ་མགོ་འཛུགས་དགོས། གནས་སྟངས་ངོ་མ་ནི་འདི་རེད།

དེར་བརྟེན། ༢༠༢༡ ལོའི་སྲིད་སྐྱོང་འོས་བསྡུའི་རྒྱལ་ཕམ་ཐག་གཅོད་ནི། སུ་ཞིག་གིས་ཟམ་གདོང་རིན་པོ་ཆེའི་ལོ་ངོ་བཅུ་ཡི་རྗེས་མཐུད་དུ་སྣེ་ཁྲིད་ཀྱི་ནུས་པ་འདོན་ཐུབ་མཁན་དེར་རྒྱལ་ཁ་ཐོབ་རྒྱུ་དང་། སུ་ཞིག་གིས་རང་ཉིད་ད་ལྟའི་སྲིད་སྐྱོང་གི་བྱ་བྱེད་ཀྱི་རྗེས་མཐུད་དུ་སྣེ་ཁྲིད་བྱེད་མཁན་དུ་སྒྲོག་པ་དེ་ཕམ་ཉེས་འགྲོ་རྒྱུ་རེད། ལོ་ངོ་བཅུའི་རིང་གི་འཐུས་ཤོར་དང་ཕམ་ཉེས་ཀྱིས་གོ་བརྡ་སྤྲད་པའི་བརྡ་ལན་གསལ་ཤོས་གཅིག་ནི་འདི་རེད།

བློ་བཟང་སེང་གེས་གང་དྲན་བྱུང་རྒྱལ་རང་སྣང་གང་དྲན་བྱས་ནས་སྤྱི་ཚོགས་ཟང་ཟིང་བཟོས་པ། ལས་ཐོག་བཀའ་བློན་རྒན་གྲས་ཡིན་པ་ནང་སྲིད་བཀའ་བློན་དང་ཆོས་རིག་བཀའ་བློན་གཉིས་ཀྱིས་ཁྲིམས་སྒྲིག་ལ་ལྟོས་མེད་ཀྱིས་བགྲེས་ཤག་བརྒྱབ་པ་དེས་ད་ལྟའི་བཀའ་ཤག་ལ་ཡིད་ཆེས་བརླག་བཅུག་ཡོད་པ་སོགས་བྱ་བྱེད་མང་པོ་ཞིག་གི་བབ་ལ་བརྟག་ན། སུ་ཞིག་གིས་ད་ལྟའི་སྲིད་སྐྱོང་དང་བཀའ་ཤག་གི་ལས་ཀ་བྱེད་སྟངས་ཀྱི་མཇུག་མཐུད་ཀྱི་ཡིན་ལབ་ན། དེ་ནི་རང་ཉིད་ཕམ་ཉེས་འགྲོ་བྱེད་ལྟ་བུ་ཆགས་ཡོད།

དེ་རིང་བར་དུ་སྲིད་སྐྱོང་ལ་ལངས་ཀྱི་ཡིན་གསུང་མཁན་ཡོངས་གྲགས་གསུམ་ཐོན་ཡོད། ཁོས་ཚོ་ཚང་མས་གོམ་པ་གསར་པ་ཞིག་རྒྱག་དགོས་པའི་ངོས་འཛིན་བྱས་ཡོད་པ་ལས། ད་ལྟའི་སྲིད་སྐྱོང་དང་བཀའ་ཤག་གི་ལས་མཇུག་སྐྱོང་གི་ཡིན་ཟེར་ནས་ཚིག་སྣེ་ཙམ་ཡང་ཐོན་མེད། དེ་ཡང་དོན་ལ། ང་ཚོས་མ་འོངས་པ་དེ་གྲུབ་འབྲས་དང་ལྡན་པ་ཞིག་དང་། ཡིད་ཆེས་ཀྱིས་ཁེངས་པ་ཞིག མཐུན་སྒྲིལ་དང་ལྡན་པ་ཞིག་གཞི་ལ་བཞག་ནས་མདུན་སྐྱོད་བྱེད་དགོས་པ་དང་། དེ་ནི་ ༢༠༡༡ ལོར་མཐུད་ནས་མདུན་སྐྱོད་བྱེད་དགོས་ངེས་སུ་གླེང་གི་ཡོད་པ་ལྟ་བུ་རེད། འདི་ནི། དགའ་ཆེས་ནས་གླེང་གི་ཡོད་པ་དང་འཇོན་ཆེས་ནས་བཤད་ཀྱི་ཡོད་པ་དེ་འདྲ་མ་རེད། གནད་དོན། གནས་སྟངས། དགོས་མཁོ་བཅས་ཀྱིས་ ༢༠༡༡ ལ་མཐུད་བརྒྱབ་པ་ཞིག་རེད།

ད་དུང་འོས་བསྡུ་དངོས་གཞིའི་སྐབས་ལ། སྲིད་སྐྱོང་འོས་མི་ཚོས། “ངས་མང་ཚོགས་མགོ་སྐོར་ལ་དམིགས་པའི་གསར་འགོད་གསལ་བསྒྲགས་བྱ་གི་མིན།” “ངས་ཕྱིའི་རྒྱལ་ཁབ་ཁག་གི་གཞུང་དང་གཞུང་འབྲེལ་མ་ཡིན་པའི་ཚོགས་སྡེ་མི་སྒེར་སུ་གང་དང་འབྲེལ་ལམ་དང་ཐུག་འཕྲད་བྱས་པ་ཚང་མ་བཀའ་ཤག་དང་ཕྱི་དྲིལ་ལས་ཁུངས་ཀྱི་དྲན་དེབ་ཏུ་གསལ་བ་ཞིག་བྱེད་ཀི་ཡིན། གར་སོང་དྲིས་ན་འདིར་སོང་དང་། གང་བྱས་དྲིས་ན་འདི་བྱས་ཟེར་བ་ཞིག་གཞུང་གི་དྲན་པར་གསལ་བ་བྱེད་ཀི་ཡིན།” ཞེས་སོགས་འགྲན་གླེང་བྱེད་ཀི་རེད།

ད་དུང་དེ་ལས་ཀྱང་ཉེ་ས་ནས་བཤད་ན། འགྲོ་གྲོན་ཕངས་མེད་བཏང་ཞིང་ས་བསྒྲགས་གནམ་བསྒྲགས་བྱས་ནས་འཚོགས་པའི་དམིགས་བསལ་ཚོགས་ཆེན་ལ་དམིགས་བསལ་གྱིས་འབོད་འགུགས་བྱས་པའི་ཨ་ཡོད་ནང་གི་ད་ཡོད་དང་སྒོ་ངའི་ནང་གི་སེལ་རིལ་ཚོས། བཀའ་ཤག་གིོས་རྩ་ཆེ་ཆེར་གླེང་དང་གླེང་བཞིན་པའི་ལྔ་དང་ལྔ་བཅུ་ཟེར་བ་དེ་གླེང་རིན་ལྡན་པ་ཞིག་ཏུའང་མ་རྩིས་པར་ཕམ་ཉེས་བཏང་བ་དེ་ནི། ཉེ་བའི་ལོ་ངོ་བཅུ་དེ་གྲུབ་འབྲས་མེད་པའི་ལོ་ངོ་བཅུར་ངོས་འཛིན་བྱས་པ་ལྟ་བུ་ཆགས་ཡོད། ལྔ་དང་ལྔ་བཅུ་ལ་རིན་ཐང་གང་ཡང་མ་མཐོང་བའི་ཕན་ན། ད་ལྟའི་བཀའ་ཤག་ལ་ཧ་ལམ་སྟོན་རྒྱུ་ངོམ་རྒྱུ་ཞིག་ལྷག་བཅུག་མེད། ལྔ་དང་ལྔ་བཅུ་ནི་ད་ལྟའི་བཀའ་ཤག་གིས་འགྲོ་སོང་ཆེ་ཤོས་དང་། ཚོགས་འཛོམས་མང་ཤོས་བྱས་པའི་འཆར་སྣང་ཞིག་ཡིན་པ་དེ། ད་ནི་འཆར་སྣང་གི་བར་སྣང་ནས་ཡལ་འགྲོ་རྒྱུ་ལས་མེད་པ་ཆགས་བཅུག་ཡོད།

གནས་སྟངས་འདི་འདྲ་མང་པོ་ཞིག་གུང་བསྒྲིགས་ནས་བལྟས་པ་ཡིན་ན། ༢༠༢༡ ལོའི་སྲིད་སྐྱོང་འོས་བསྡུའི་རྒྱལ་ཁ་ཐོབ་དགོས་ན། ༢༠༡༡ ལོ་ལ་མཐུད་པའི་སྣེ་ཁྲིད་ཀྱི་ལས་འཆར་ཡོད་དགོས་པ་དང་། ཟམ་གདོང་རིན་པོ་ཆེར་མཐུད་ནས་མདུན་སྐྱོད་བྱས་ན་རེ་བ་ཡོད་པ་ལས། ད་ལྟའི་སྲིད་སྐྱོང་དང་བཀའ་ཤག་གི་གནང་སྟངས་ཀྱི་རྗེས་མཐུད་ཀྱི་ཡིན་ལབ་ན། ཧ་ལམ་རེ་བ་འབྲས་མེད་ཆགས་རྒྱུ་རེད།

འགྱུར་བ་གནམ་ས་བླ་འོག་བརྗེས་པ་ལྟ་བུ་ཆགས་ནས་རེ་བ་ཆེན་པོ་ཡོད་པ་ཞིག་ཆགས་དགོས་ན། ད་ལྟའི་བཀའ་ཤག་གིས་རྫོགས་ལ་ཉེ་བའི་ལས་ཡུན་འདིའི་རིང་ལ། ལོ་ངོ་དགུའི་རིང་ལ་འཇོག་མ་ཐུབ་པའི་བྱས་རྗེས་ཧ་ལས་པ་ཞིག་འཇོག་ཐུབ་དགོས།